„სესხის გამცემი სუბიექტისთვის ფულადი ჯარიმის ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2018 წლის 27 სექტემბრის №218/04 ბრძანებაში ცვლილების შეტანის შესახებ

საქართველოს ეროვნული ბანკის პრეზიდენტის

2026 წლის 2 ივლისი

ქ. თბილისი

„საქართველოს ეროვნული ბანკის შესახებ“ საქართველოს ორგანული კანონის მე-15 მუხლის პირველი პუნქტის „ზ“ ქვეპუნქტისა და „ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის საფუძველზე, ვბრძანებ:

„სესხის გამცემი სუბიექტისთვის ფულადი ჯარიმის ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2018 წლის 27 სექტემბრის №218/04 ბრძანებით (www.matsne.gov.ge, 28/09/2018; ს/კ: 220010020.18.011.016345) დამტკიცებულ წესში შეტანილ იქნეს შემდეგი ცვლილება:

  1. მე-2 მუხლის:

ა) პირველი პუნქტის „ბ“–„დ“ ქვეპუნქტები ჩამოყალიბდეს შემდეგი რედაქციით:

„ბ) ფინანსური ანგარიშგების დადგენილ ვადაში ან/და დადგენილი ფორმით ეროვნული ბანკისთვის წარუდგენლობა ან/და ფინანსური ანგარიშგებით არაზუსტი ინფორმაციის წარდგენა გამოიწვევს სესხის გამცემი სუბიექტის დაჯარიმებას 1 000 (ათასი) ლარის ოდენობით , დარღვევის თითოეულ ფაქტზე;

გ) სესხის გამცემ სუბიექტთან და მის საქმიანობასთან დაკავშირებული ნებისმიერი დოკუმენტაციის ან/და ინფორმაციის დადგენილ ვადებში ეროვნული ბანკისთვის წარუდგენლობა ან/და არაზუსტი ინფორმაციის წარდგენა ან/და წერილობითი მითითების შეუსრულებლობა გამოიწვევს სესხის გამცემი სუბიექტის დაჯარიმებას 1 000 (ათასი) ლარის ოდენობით, დარღვევის თითოეულ ფაქტზე. აღნიშნული მოთხოვნების განმეორებით დარღვევა გამოიწვევს სესხის გამცემი სუბიექტის დაჯარიმებას 10 000 (ათი ათასი) ლარის ოდენობით, დარღვევის თითოეულ ფაქტზე;

დ) საქართველოს ეროვნული ბანკის პრეზიდენტის 2018 წლის 27 სექტემბრის №217/04 ბრძანებით დამტკიცებული „სესხის გამცემი სუბიექტის საქართველოს ეროვნულ ბანკში რეგისტრაციის, რეგისტრაციის გაუქმებისა და რეგულირების წესის“ (შემდგომში – რეგულირების წესი) მე-9 მუხლის მე-14 პუნქტის დარღვევა გამოიწვევს სესხის გამცემი სუბიექტის დაჯარიმებას 1 000 (ათასი) ლარის ოდენობით, დარღვევის თითოეულ ფაქტზე;“;

  ბ) პირველი პუნქტის „დ“ ქვეპუნქტის შემდგომ დაემატოს შემდეგი შინაარსის „დ¹“- „დ⁷“ ქვეპუნქტები:

„დ¹) სესხის გამცემი სუბიექტის მიერ აქტივებისა და ვალდებულებების ან/და შემოსავლებისა და ხარჯების აღურიცხაობა გამოიწვევს სესხის გამცემი სუბიექტის დაჯარიმებას 5 000 (ხუთი ათასი) ლარის ოდენობით, აღურიცხაობის თითოეულ ფაქტზე;

დ²) რეგულირების წესის მე-9 მუხლის მე-5, მე-6, 6¹-6³, მე-7, მე-8 პუნქტებით ან/და 9³ მუხლის პირველი პუნქტის „დ“ ქვეპუნქტით დადგენილი მოთხოვნების შეუსრულებლობა გამოიწვევს სესხის გამცემი სუბიექტის დაჯარიმებას 10 000 (ათი ათასი) ლარის ოდენობით;

დ³) რეგულირების წესის მე-9 მუხლის მე-5, მე-6, 6¹-6³, მე-7, მე-8 პუნქტებით ან/და 9³ მუხლის პირველი პუნქტის „დ“ ქვეპუნქტით დადგენილი მოთხოვნების განმეორებით შეუსრულებლობა გამოიწვევს სესხის გამცემი სუბიექტის დაჯარიმებას 20 000 (ოცი ათასი) ლარის ოდენობით;

დ⁴) რეგულირების წესის 9² მუხლის მე-2 პუნქტით ან/და 9³ მუხლის მე-3 პუნქტით დადგენილი მოთხოვნების შეუსრულებლობა გამოიწვევს სესხის გამცემი სუბიექტის დაჯარიმებას 10 000 (ათი ათასი) ლარის ოდენობით;

დ⁵) რეგულირების წესის 9² მუხლის მე-2 პუნქტით ან/და 9³ მუხლის მე-3 პუნქტით დადგენილი მოთხოვნების განმეორებით შეუსრულებლობა გამოიწვევს სესხის გამცემი სუბიექტის დაჯარიმებას 20 000 (ოცი ათასი) ლარის ოდენობით;

დ⁶) რეგულირების წესის 9² ან/და 9³ მუხლებით განსაზღვრული სხვა მოთხოვნების (გარდა რეგულირების წესის 9² მუხლის მე-9 პუნქტის და 9³ მუხლის პირველი პუნქტის „ე“ და „ზ“ ქვეპუნქტების და 3¹ პუნქტისა) დარღვევა გამოიწვევს სესხის გამცემი სუბიექტის დაჯარიმებას 2 000 (ორი ათასი) ლარის ოდენობით;

დ⁷) რეგულირების წესის 9² ან/და 9³ მუხლებით განსაზღვრული სხვა მოთხოვნების (გარდა რეგულირების წესის 9² მუხლის მე-9 პუნქტის და 9³ მუხლის პირველი პუნქტის „ე“ და „ზ“ ქვეპუნქტების და 3¹ პუნქტისა) განმეორებით დარღვევა გამოიწვევს სესხის გამცემი სუბიექტის დაჯარიმებას 5 000 (ხუთი ათასი) ლარის ოდენობით;“.  

2. 2¹ მუხლის :

ა) მე-2 პუნქტის „ე“ და „ე¹“ ქვეპუნქტები ჩამოყალიბდეს შემდეგი რედაქციით:

„ე) ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს კანონმდებლობით, „საქართველოს ეროვნული ბანკის ზედამხედველობას დაქვემდებარებული ანგარიშვალდებული პირების მიერ სანქციათა რეჟიმების შესრულების წესის დამტკიცების თაობაზე“ საქართველოს ეროვნული ბანკის პრეზიდენტის 2023 წლის 4 აგვისტოს №208/04 ბრძანებით დამტკიცებული წესის (შემდგომში – სანქციათა რეჟიმების შესრულების წესი) მე-2 მუხლით ან/და ეროვნული ბანკის მიერ წერილობითი მითითებით განსაზღვრული სანქციათა რეჟიმებით გათვალისწინებული მოთხოვნების შესრულების ხელშეწყობის მიზნებისთვის პროგრამული (ელექტრონული) სისტემის, (რომელიც უზრუნველყოფს საყურადღებო/საეჭვო ნიშნების, მათ შორის, დანაწევრებული გარიგებების (ოპერაციების) გამოვლენას და პირის ავტომატურ გადამოწმებას პოლიტიკურად აქტიურ, გაეროს უშიშროების საბჭოს რეზოლუციებით და სანქციათა რეჟიმების შესრულების წესით ან/და ეროვნული ბანკის წერილობითი მითითებებით განსაზღვრულ სანქციათა რეჟიმებით გათვალისწინებულ სანქციადაკისრებულ პირთა სიებში), არქონის ან მნიშვნელოვანი ხარვეზებით ფუნქციონირების შემთხვევაში – 15 000 (თხუთმეტი ათასი) ლარის ოდენობით;

ე¹) გაეროს უშიშროების საბჭოს რეზოლუციებით ან გაეროს უშიშროების საბჭოს რეზოლუციების შესრულების საკითხებზე მომუშავე სამთავრობო კომისიის გადაწყვეტილებით განსაზღვრულ სანქციადაკისრებულ პირთან, სანქციათა რეჟიმების შესრულების წესით ან/და ეროვნული ბანკის მიერ წერილობითი მითითებებით განსაზღვრულ სანქციათა რეჟიმებით გათვალისწინებული მოთხოვნების დარღვევით ან გვერდის ავლით განხორციელებული ოპერაციების (გარიგების) გამოვლენის შემთხვევაში – 10 000 (ათი ათასი) ლარის ოდენობით, დარღვევის თითოეულ ფაქტზე;“;

  ბ) მე-3 პუნქტის „ზ“ ქვეპუნქტი ჩამოყალიბდეს შემდეგი რედაქციით:

„ზ) სესხის გამცემი სუბიექტი, კანონმდებლობის ან/და შიდა პოლიტიკის/პროცედურების შესაბამისად, არ ახორციელებს კლიენტთან დამყარებული საქმიანი ურთიერთობის მონიტორინგს, გარიგების (ოპერაციის), საქმიანობის, ქონების ან/და ფულადი სახსრების/ვირტუალური აქტივის წარმომავლობის შესწავლას – 2 000 (ორი ათასი) ლარის ოდენობით, თითოეულ კლიენტთან მიმართებაში;“;

  გ) მე-4 პუნქტის „გ“ ქვეპუნქტი ჩამოყალიბდეს შემდეგი რედაქციით:

„გ) სესხის გამცემი სუბიექტის მიერ ფულის გათეთრებისა და ტერორიზმის დაფინანსების რისკის ზედამხედველობის ანგარიშგებით ეროვნული ბანკისთვის არასწორი ინფორმაციის წარდგენის შემთხვევაში – 1 000 (ათასი) ლარის ოდენობით, წარდგენილი ანგარიშგების თითოეულ ფორმასთან მიმართებაში;“.

ეს ბრძანება ამოქმედდეს 2026 წლის 1 სექტემბრიდან.