1. აკრედიტაციის ერთიანი ეროვნული ორგანო – აკრედიტაციის ცენტრი (შემდგომში ცენტრი) არის “პროდუქტის უსაფრთხოებისა და თავისუფალი მიმოქცევის კოდექსის“ და „საჯარო სამართლის იურიდიული პირის შესახებ“ საქართველოს კანონების საფუძველზე აკრედიტაციის სფეროში საქმიანობის ორგანიზებისა და განხორციელების მიზნით შექმნილი საჯარო სამართლის იურიდიული პირი, რომელიც სახელმწიფო კონტროლით დამოუკიდებლად ახორციელებს თავის საქმიანობას.

2. ცენტრი თავისი საქმიანობისას ხელმძღვანელობს საქართველოს კონსტიტუციით, საერთაშორისო ხელშეკრულებებით და შეთანხმებებით, საქართველოს კანონით “პროდუქტის უსაფრთხოებისა და თავისუფალი მიმოქცევის კოდექსი“, სხვა სამართლებრივი აქტებითა და ამ დებულებით მინიჭებული კომპეტენციის ფარგლებში.

3. ცენტრი არის სახელმწიფო ქონების ბაზაზე შექმნილი საჯარო სამართლის იურიდიული პირი, რომლის სახელმწიფო კონტროლს ახორციელებს საქართველოს ეკონომიკისა და მდგრადი განვითარების სამინისტრო (შემდგომში – სამინისტრო).

4. ცენტრი დასახელებული მიზნებისა და დაკისრებული ფუნქციების განსახორციელებლად სარგებლობს სპეციალური უფლებაუნარიანობით, საკუთარი სახელით იძენს უფლებებსა და მოვალეობებს, დებს გარიგებებს და უფლებამოსილია სასამართლოში გამოვიდეს მოსარჩელედ და მოპასუხედ.

5. ცენტრს აქვს დამოუკიდებელი ბალანსი, ანგარიშსწორების ანგარიშები ხაზინასა და ბანკში, ბეჭედი, კანონმდებლობის შესაბამისად რეგისტრირებული ლოგო და ბლანკი.

6. ცენტრის იურიდიული მისამართია: 0177, საქართველო, თბილისი, ალ. ყაზბეგის გამზ. №42ა.

მუხლი 2. მიზნები, ფუნქციები და საქმიანობის საგანი

ცენტრის მიზნები და ფუნქციებია:

ა) აკრედიტაციის სფეროში სახელმწიფო პოლიტიკის ჩამოყალიბებასა და განხორციელებაში მონაწილეობა; ამ სფეროში დარგთაშორისი საქმიანობის კოორდინაცია;

ბ) აკრედიტაციის სისტემის ჩამოყალიბება, მისი ფუნქციონირებისა და განვითარების ხელშეწყობა;

გ) აკრედიტაციის სამუშაოთა დაგეგმვა, ორგანიზება და შესრულება მოქმედი კანონმდებლობის შესაბამისად;

დ) მომხმარებელთა ინტერესების დაცვის მექანიზმის სრულყოფის, აკრედიტაციის საერთაშორისო წესებთან შესაბამისობის უზრუნველყოფისა და ადგილობრივი მეწარმეობის კონკურენტუნარიანობის ამაღლების მიზნით აკრედიტაციის სისტემის სრულყოფის წინადადებათა შემუშავება, მისი ფუნქციონირებისა და განვითარების ხელშეწყობა;

ე) აკრედიტაციის მოწმობის გაცემა, მისი მოქმედების შეჩერება, გაგრძელება და გაუქმება კანონმდებლობით დადგენილი წესით;

ვ) აკრედიტებული იურიდიული და ფიზიკური პირების, აკრედიტაციის სისტემის მონაწილეთა და აკრედიტაციის მოთხოვნათა შემცველი დოკუმენტების რეესტრის წარმოება; რეესტრის მუდმივი განახლების უზრუნველყოფა;

ზ) (ამოღებულია);

თ) (ამოღებულია);

ი) სხვადასხვა ტიპის ლაბორატორიების, სხვადასხვა ტიპის სერტიფიკაციის ორგანოების, სხვადასხვა ტიპის ინსპექტირების ორგანოების, საკვალიფიკაციო ტესტირების მომწოდებლების აკრედიტაცია როგორც საქართველოში, ისე მის ფარგლებს გარეთ, დაინტერესებული მხარის მოთხოვნის შემთხვევაში;

კ) კომპეტენციიდან გამომდინარე სამეცნიერო და პრაქტიკული კონფერენციების, სემინარების ორგანიზება და მათში მონაწილეობა როგორც ქვეყნის შიგნით, ისე მის ფარგლებს გარეთ;

ლ) საქართველოს წარმოდგენა აკრედიტაციის საერთაშორისო და რეგიონალურ ორგანიზაციებში საკუთარი კომპეტენციის ფარგლებში;

მ) საერთაშორისო ნორმების თანახმად აკრედიტაციის წესების და საერთო პროცედურების შემუშავება, მიღება და გამოქვეყნება;

ნ) აკრედიტაციის სამუშაოების შესრულება და შესაბამისობის შემფასებელი იურიდიული ან ფიზიკური პირების უფლებამოსილების ოფიციალურად აღიარება შესაბამისობის შეფასების სფეროში განსაზღვრული საქმიანობის განსახორციელებლად;

ო) კომპეტენციის ფარგლებში განაცხადის მიღება სხვადასხვა ტიპის ლაბორატორიების, სხვადასხვა ტიპის სერტიფიკაციის ორგანოების, სხვადასხვა ტიპის ინსპექტირების ორგანოების, საკვალიფიკაციო ტესტირების მომწოდებლების აკრედიტაციისათვის;

პ) წარმოდგენილი დოკუმენტაციის ექსპერტიზის განხორციელება და შესაბამისი დასკვნის გაცემა;

ჟ) აკრედიტაციის ციკლის განმავლობაში აკრედიტებული პირების ყოველწლიური და არაგეგმური შეფასების განხორციელება თავისი კომპეტენციის ფარგლებში და შედეგების მიხედვით შესაბამისი გადაწყვეტილებების მიღება;

რ) კომპეტენციის ფარგლებში აკრედიტებული პირებისაგან ინფორმაციის მიღება, ანალიზი და შესაბამისი ღონისძიებების განხორციელება;

ს) აკრედიტაციის სფეროში წარმოქმნილი დავების (აპელაცია/საჩივარი) განხილვა საკუთარი კომპეტენციის ფარგლებში;

ტ) საკუთარი პერსონალის ატესტაციის უზრუნველყოფა;

უ) მომსახურების გაწევა დაინტერესებული იურიდიული და ფიზიკურ ი პირებისათვის კომპეტენციის ფარგლებში.

საქართველოს ეკონომიკური განვითარების მინისტრის 2010 წლის 2 ივნისის ბრძანება №1-1/ 882 - სსმ III, № 63 , 04 . 06 .2010, მუხ. 955

საქართველოს ეკონომიკისა და მდგარადი განვითარების მინისტრის 2019 წლის 1 მაისის ბრძანება №1-1/215 - ვებგვერდი, 06.05.2019წ.

მუხლი 2¹. (ამოღებლია)

საქართველოს ეკონომიკისა და მდგრადი განვითარების მინისტრის 2018 წლის 8 იანვრის ბრძანება №1-1/5 - ვებგვერდი, 09.01.2018 წ.

საქართველოს ეკონომიკისა და მდგრადი განვითარების მინისტრის 2021 წლის 3 თებერვლის ბრძანება №1-1/27 - ვებგვერდი, 03.02.2021 წ.

მუხლი 3. ცენტრის მართვის ორგანოები და მათი შექმნის წესი

1. ცენტრს ხელმძღვანელობს გენერალური დირექტორი (შემდგომში – დირექტორი), რომელსაც თანამდებობაზე ნიშნავს და თანამდებობიდან ათავისუფლებს საქართველოს პრემიერ – მინისტრი საქართველოს ეკონომიკისა და მდგრადი განვითარების მინისტრის (შემდგომში – მინისტრი) წარდგინებით.

2. ცენტრის საშტატო ნუსხას ამტკიცებს მინისტრი, დირექტორის წარდგინებით.

3. დირექტორი მინიჭებულ უფლებამოსილებათა ფარგლებში მოქმედებს დამოუკიდებლად და პერსონალურად აგებს პასუხს ცენტრის საქმიანობის კანონმდებლობის შესაბამისად წარმართვისათვის, ცენტრის მფლობელობაში არსებული ქონების დაცვისა და მიზნობრივი ხარჯვისათვის.

4. დირექტორი:

ა) ახორციელებს ცენტრის მართვას და წარმოადგენს მის ინტერესებს სხვა ფიზიკურ და იურიდიულ პირებთან ურთიერთობაში;

ბ) წარმოადგენს ცენტრს რეგიონალურ და საერთაშორისო ორგანიზაციებთან ურთიერთობაში;

გ) უფლებამოსილია თავისი კომპეტენციის ფარგლებში გამოსცეს ნორმატიული აქტი – ბრძანება და ინდივიდუალური ადმინისტრაციულ-სამართლებრივი აქტი – განკარგულება;

დ) შეიმუშავებს ცენტრის საშტატო ნუსხას და დასამტკიცებლად წარუდგენს მინისტრს;

ე) ცენტრის სახელით ხსნის ანგარიშებს ბანკებში (ეროვნული, სავალუტო), დებს ხელშეკრულებებს;

ვ) კანონმდებლობით დადგენილი წესით განკარგავს ცენტრის სახსრებს;

ზ) ინდივიდუალური ადმინისტრაციულ-სამართლებრივი აქტით ამტკიცებს ცენტრის შიდა სტრუქტურული ქვედანაყოფების დებულებებს;

თ) დამტკიცებული ხელფასის ფონდის ფარგლებში სამინისტროსთან შეთანხმებით განსაზღვრავს საშტატო ნუსხით გათვალისწინებულ თანამდებობათა სარგოებს;

ი) თანამდებობაზე ნიშნავს და თანამდებობიდან ათავისუფლებს ცენტრის საშტატო ნუსხით გათვალისწინებულ თანამშრომლებს;

კ) სამინისტროს შესათანხმებლად წარუდგენს მოადგილეების კანდიდატურებს და განსაზღვრავს მათ უფლებამოსილებებს;

ლ) შრომითი ხელშეკრულების საფუძველზე იწვევს სპეციალისტებს მუდმივ ან დროებით სამუშაოზე;

მ) უფლებამოსილია მიავლინოს თანამშრომლები როგორც ადგილობრივ ი , ისე საერთაშორისო ორგანიზაციების მიერ მოწყობილ სემინარებზე, კომფერენციებსა და პროფესიული დონის ამაღლების კურსებზე;

ნ) უფლებამოსილია მინისტრთან შეთანხმებით ცენტრში დასაქმებულ პირებზე დააწესოს დანამატი გარკვეული პერიოდის განმავლობაში (არაუმეტეს შესაბამისი საბიუჯეტო წლის ბოლომდე) „საქართველოს შრომის კოდექსის“მე-17 მუხლით განსაზღვრული ზეგანაკვეთური სამუშაოს შესრულების, ცენტრის დირექტორის ან/და უშუალო ხელმძღვანელის დავალებით, იმ სამუშაოს შესრულებისათვის, რაც სცდება დასაქმებული პირის უშუალო მოვალეობას, თუმცა პირდაპირ არის დაკავშირებული ცენტრის ან/და სამინისტროს საქმიანობის მიზნებთან და ამოცანებთან, აგრეთვე განსაკუთრებული სირთულის ან/და მნიშვნელობის დავალების შესრულებისათვის, რომელიც დაკავშირებულია ცენტრის ან/და სამინისტროს საქმიანობასთან;

ო) სამინისტროს თანხმობით ამტკიცებს ეკონომიკური თანამშრომლობისა და განვითარების ორგანიზაციის (OECD) და ევროკავშირის წევრ ქვეყნებში აკრედიტებულ ინსპექტირების ორგანოების რეგისტრაციის წესს.

5. დირექტორის არყოფნის შემთხვევაში მის მოვალეობას ასრულებს დირექტორის მოადგილე.

6. ცენტრი თავისი საქმიანობის შესახებ ადგენს ყოველწლიურ ანგარიშს, რომელსაც წარუდგენს სამი-ნისტროს.

საქართველოს ეკონომიკისა და მდგარადი განვითარების მინისტრის 2017 წლის 21 მარტის ბრძანება №1-1/98 - ვებგვერდი, 23.03.17წ.

მუხლი 4. ცენტრის სტრუქტურა

1. ცენტრის სტრუქტურული ქვედანაყოფებია:

ა) ადმინისტრაციული სამსახური;

ბ) აკრედიტაციის სამსახური.

2. ცენტრის სტრუქტურული ქვედანაყოფების ფუნქციებია:

ა) ადმინისტრაციული სამსახური ახორციელებს აკრედიტაციის ცენტრის საქმისწარმოების სისტემის ორგანიზებას, საჯარო საინფორმაციო მომსახურების გაწევას, აკრედიტაციის მაძიებელი პირების განაცხადის მიღებას თანდართული დოკუმენტებით, აკრედიტებული ორგანოების რეესტრის წარმოებას, რეესტრის მუდმივ განახლებას და სხვა ორგანიზებულ სამუშაოს. ამასთან, კანონმდებლობის შესაბამისად ახორციელებს საბუღალტრო საფინანსო-ეკონომიკური საქმიანობის აღრიცხვა-ანგარიშგებას, ბალანსის შედგენას, სამივლინებო დოკუმენტების გაფორმებას, აწარმოებს ურთიერთობებს საგადასახადო ინსპექციასთან და ბანკში, აუცილებელი შესყიდვების და მასთან დაკავშირებული ურთიერთობების კოორდინაციას ყოველწლიურად, ასევე მოთხოვნის შემთხვევაში სამინისტროსათვის წარსადგენად ამზადებს ცენტრის ფინანსურ ანგარიშს;

ბ) აკრედიტაციის სამსახური – მოქმედი კანონმდებლობის შესაბამისად ახორციელებს აკრედიტაციის მაძიებელი პირების აკრედიტაციის სამუშაოების ორგანიზებას და აკრედიტებული პირების ყოველწლიურ შეფასებას აკრედიტაციის ციკლის გამავლობაში და არაგეგმური შეფასების შესაბამისი ღონისძიებების გატარებას

მუხლი 5. ცენტრის ქონება და დაფინანსება

1. დასახული მიზნებისა და დაკისრებული ფუნქციების განსახორციელებლად, ცენტრს კანონმდებლობით დადგენილი წესით გადაეცემა შესაბამისი ქონება.

2. ცენტრი მისთვის გადაცემულ ქონებას ფლობს და სარგებლობს კანონმდებლობით დადგენილი წესით.

3. ცენტრის დაფინანსების წყაროა:

ა) საქართველოს სახელმწიფო ბიუჯეტი;

ბ) აკრედიტაციის ცენტრის მიერ გაწეული მომსახურების საფასურის სახით მიღებული შემოსავალი. ამ საფასურის განსაზღვრის წესს ამტკიცებს საქართველოს მთავრობა, მათ შორის:

ბ.ა) აკრედიტაციისა და ყოველწლიური/არაგეგმიური შეფასების განხორციელებით მიღებული შემოსავალი;

ბ.ბ) ხელშეკრულების საფუძველზე დაინტერესებული პირისთვის ჩატარებული სწავლებებიდან მიღებული შემოსავალი;

ბ.გ) კონფერენციების ორგანიზებიდან მიღებული შემოსავალი;“

გ) ხელშეკრულების საფუძველზე მიღებული შემოსავალი;

დ) საქართველოს კანონმდებლობით დაშვებული სხვა შემოსავლები.

4. ცენტრის მიერ მიღებული სახსრები და შემოსავლები მთლიანად ხმარდება ცენტრის მიზნებისა და ფუნქციების განხორციელებას.

მუხლი 6. სახელმწიფო კონტროლი

1. ცენტრის საქმიანობის სახელმწიფო კონტროლს, მოქმედი კანონმდებლობის შესაბამისად, ახორციელებს სამინისტრო, რომელსაც უფლება აქვს მოითხოვოს კონტროლის განსახორციელებლად საჭირო ინფორმაციისა და მასალების წარდგენა.

2. მინისტრი უფლებამოსილია შეაჩეროს ან/და გააუქმოს დირექტორის არამართლზომიერი გადაწყვეტილება.

3. სამინისტროს თანხმობას საჭიროებს ცენტრის მიერ შემდეგი მოქმედების განხორციელება:

ა) უძრავი ქონების შეძენა, გასხვისება, დატვირთვა;

ბ) სესხის აღება;

გ) თავდებობა;

დ) თანამშრომელთა მატერიალური წახალისებისათვის და დანამატებისათვის გამოსაყოფი სახსრების, აგრეთვე საჯარო სამართლის იურიდიული პირის მიერ შესაძენი საწვავისა და გასაწევი საკომუნიკაციო ხარჯების ლიმიტების განსაზღვრა;

ე) სხვა გადაწყვეტილებები ცენტრის ქონებასთან დაკავშირებით, თუ ისინი სცილდება ჩვეულებრივი საქმიანობის ფარგლებს.

3¹. აკრედიტაციის ცენტრის ბიუჯეტის განსაზღვრა ხდება სამინისტროსთან შეთანხმებით.

4. ამ მუხლის მე-3 პუნქტის „ბ“ და „გ“ ქვეპუნქტებით გათვალისწინებულ მოქმედებათა განხორციელება საჭიროებს საქართველოს ფინანსთა სამინისტროს თანხმობას.

მუხლი 7. საბუღალტრო ანგარიშგება

1. ცენტრი, საქართველოს კანონმდებლობით დადეგენილი წესით, აწარმოებს საფინანსო-ეკონომიური საქმიანობის აღრიცხვა-ანგარიშგებას, ადგენს ბალანსს და დასამტკიცებლად წარუდგენს სამინისტროს.

2. ყოველწლიურად, ასევე მოთხოვნის შემთხვევაში ცენტრი სამინისტროს წარუდგენს ფინანსურ ანგარიშს.

3. ცენტრის წლიურ ბალანსს ამოწმებს სამინისტროს მიერ დანიშნული დამოუკიდებელი აუდიტორი, რომლის სათანადო ხარჯებს ანაზღაურებს ცენტრი.

მუხლი 8. ცენტრის რეორგანიზაცია და ლიკვიდაცია

1. ცენტრის რეორგანიზაცია და ლიკვიდაცია ხორციელდება კანონმდებლობით დადგენილი წესით.

2. ცენტრის ლიკვიდაციის შემთხვევაში დარჩენილი ქონება გადადის სახელმწიფო საკუთრებაში.

მუხლი 9. დებულებაში ცვლილებების და დამატებების შეტანის წესი

დებულებაში ცვლილებებისა და დამატებების შეტანა ხორციელდება მინისტრის ბრძანებით.

დანართი 1 - (ამოღებლია)

გამოსვლა შენახვა

Annotate

როგორ დავიმოწმოთ

საქართველოს მინისტრის ბრძანება „საჯარო სამართლის იურიდიული პირის – აკრედიტაციის ერთიანი ეროვნული ორგანოს – აკრედიტაციის ცენტრის დებულების დამტკიცების შესახებ“, №1-1/330, 16.03.2010, სარეგისტრაციო კოდი 040030000.22.024.014344 (კონსოლიდირებული რედაქცია 03.02.2021). ხელმისაწვდომია: https://legali.ge/law/1009193-10/

შემდგომი ცვლილებები (2)

წინა ცვლილებები (10)

დოკუმენტის ტექსტი

მუხლი 21. (ამოღებლია)🔗

მუხლი 1. ზოგადი დებულებანი🔗

მუხლი 2. მიზნები, ფუნქციები და საქმიანობის საგანი🔗

მუხლი 21. (ამოღებლია)🔗

მუხლი 3. ცენტრის მართვის ორგანოები და მათი შექმნის წესი🔗

მუხლი 4. ცენტრის სტრუქტურა🔗

მუხლი 5. ცენტრის ქონება და დაფინანსება🔗

მუხლი 6. სახელმწიფო კონტროლი🔗

მუხლი 7. საბუღალტრო ანგარიშგება🔗

მუხლი 8. ცენტრის რეორგანიზაცია და ლიკვიდაცია🔗

მუხლი 9. დებულებაში ცვლილებების და დამატებების შეტანის წესი🔗

როგორ დავიმოწმოთ