„საჯარო სამართლის იურიდიული პირის – ჯანმრთელობის დაზღვევის მედიაციის სამსახურის დებულების დამტკიცების შესახებ“

სახელმწიფო სარეგისტრაციო კოდი 040.030.000.22.035.014.797

საქართველოს შრომის, ჯანმრთელობისა და სოციალური დაცვის

მინისტრის ბრძანება №192/ნ

2010 წლის 30 ივნისი

ქ. თბილისი

საჯარო სამართლის იურიდიული პირის – ჯანმრთელობის დაზღვევის მედიაციის სამსახურის დებულების დამტკიცების შესახებ

„საჯარო სამართლის იურიდიული პირის – ჯანმრთელობის დაზღვევის მედიაციის სამსახურის დაფუძნების შესახებ“ საქართველოს პრეზიდენტის 2010 წლის 7 ივნისის №386 ბრძანებულების მე-2 პუნქტის საფუძველზე, ვბრძანებ:

1. დამტკიცდეს საჯარო სამართლის იურიდიული პირის – ჯანმრთელობის დაზღვევის მედიაციის სამსახურის თანდართული დებულება.

2. ბრძანება ამოქმედდეს 2010 წლის 1 ივლისიდან.

ა. კვიტაშვილი

შეტანილი ცვლილებები:

1. საქართველოს შრომის, ჯანმრთელობისა და სოციალური დაცვის მინისტრის 2011 წლის 9 მარტის ბრძანება №01-7/ნ - ვებგვერდი, 10.03.2011წ.

2. საქართველოს შრომის, ჯანმრთელობისა და სოციალური დაცვის მინისტრის 2011 წლის 24 მაისის ბრძანება №01-23/ნ - ვებგვერდი, 25.05.2011წ.

დანართი

საჯარო სამართლის იურიდიული პირის – ჯანმრთელობის დაზღვევის მედიაციის სამსახურის დებულება

    მუხლი 1. ზოგადი დებულებები

1. ჯანმრთელობის დაზღვევის მედიაციის სამსახური (შემდგომში – სამსახური) არის საქართველს შრომის, ჯანმრთელობისა და სოციალური დაცვის სამინისტროს (შემდგომში – სამინისტრო) სახელმწიფო კონტროლს დაქვემდებარებული საჯარო სამართლის იურიდიული პირი.

2. სამსახური თავისი საქმიანობისას ხელმძღვანელობს საქართველოს კონსტიტუციით, საერთაშორისო ხელშეკრულებებითა და შეთანხმებებით, სხვა სამართლებრივი აქტებითა და წინამდებარე დებულებით.

3. სამსახური ანგარიშვალდებულია სამინისტროს წინაშე საქართველოს მოქმედი კანონმდებლობისა და ამ დებულებით დადგენილ ფარგლებში და წესით.

4. დასახული მიზნებისა და დაკისრებული ფუნქციების განსახორციელებლად სამსახურს გააჩნია სპეციალური უფლებაუნარიანობა. იგი საკუთარი სახელით იძენს უფლებებსა და მოვალეობებს, დებს გარიგებებს. საკუთარი სახელით გამოდის მხარედ სასამართლოში და მესამე პირებთან ურთიერთობებში.

5. სამსახურს აქვს ბეჭედი საქართველოს სახელმწიფო გერბის გამოსახულებით და სამსახურის სახელწოდებით, დამოუკიდებელი ბალანსი, ანგარიში ხაზინასა და საბანკო დაწესებულებაში, ემბლემა და იურიდიული პირის სხვა რეკვიზიტები.

6. სამსახურის იურიდიული მისამართია: ქ. თბილისი, 0119, წერეთლის გამზირი №144.

საქართველოს შრომის, ჯანმრთელობისა და სოციალური დაცვის მინისტრის 2011 წლის 9 მარტის ბრძანება №01-7/ნ - ვებგვერდი, 10.03.2011წ.

    მუხლი 2. სამსახურის საქმიანობის მიზნები და ამოცანები, საქმიანობის პრინციპები, ფუნქციები და უფლებამოსილება

1. სამსახურის მიზნები და ამოცანებია:

ა) სახელმწიფო სადაზღვევო პროგრამების ფარგლებში დაზღვევის სუბიექტებს შორის სახელშეკრულებო ურთიერთობებიდან წარმოშობილი დავების გადაწყვეტასთან დაკავშირებით მედიატორის როლის შესრულება და რეკომენდაციების მომზადება;

ბ) სახელმწიფო სადაზღვევო პროგრამების ფარგლებში, დაზღვევის სუბიექტებისაგან მიღებული ინფორმაციის საფუძველზე ან საკუთარი ინიციატივით სახელმწ ი ფო პროგრამების განხორციელების გაუმჯობესებასთან დაკავშირებით წინადადებების მომზადება და სამინისტროსათვის წარდგენა;

გ) სახელმწიფო სადაზღვევო პროგრამების ფარგლებში, ვაუჩერის/კონკურსის პირობებით გათვალისწინებულ ვალდებულებების სისტემატური და უხეში დარღვევის შესახებ წინადადებების მომზადება და სამინისტროსათვის წარდგენა;

დ) სახელმწიფო სადაზღვევო პროგრამების განხორციელების ხელშეწყობა;

ე) სახელმწიფო სადაზღვევო პროგრამების ფარგლებში მზღვეველისა და დაზღვეულის კანონიერი ინტერესების დაცვა;

ვ) დაზღვეულისა და მზღვეველის სამედიცინო პროვაიდერს შორის სწორი კომუნიკაციის ხელშეწყობა;

ზ) სახელმწიფო სადაზღვევო პროგრამის ფარგლებში მზღვეველსა და სამედიცინო პროვაიდერს შორის კომუნიკაციის ხელშეწყობა, მედიატორის ფუნქციის განხორციელებისათვის საჭირო ღონისძიებების გატარება.

2. სამსახურის საქმიანობის პრინციპებია:

ა) დაზღვევის სუბიექტების, ასევე დაზღვევ ი ს სუბიექტის სამედიცინო პროვაიდერის უფლებების დაცვის უზრუნველყოფა;

ბ) დამოუკიდებლობა კანონმდებლობით განსაზღვრული საკითხების გადაწყვეტისას;

გ) სამართლიანობა და მიუკერძოებლობა;

დ) საქმიანობის საჯაროობა.

3. სამსახურის ფუნქციები და უფლებამოსილებებია:

ა) სახელმწიფო სადაზღვევო პროგრამების ფარგლებში დავების განხილვა და შესაბამისი გადაწყვეტილების მიღება (რეკომენდაციების სახით), მედიატორის ფუნქციის განხორციელება ისეთი სახის ურთერთობებში, რომელიც წარმოიშობა:

ა.ა) დაზღვეულ მოსახლეობასა და სადაზღვევო ორგანიზაციებს შორის;

ა.ბ) დაზღვეულ მოსახლეობასა და სადაზღვევო ორგანიზაციის პროვაიდერ კლინიკას შორის;

ა.გ) სადაზღვევო ორგანიზაციასა და სადაზღვევო ორგანიზაციის პროვაიდერ კლინიას შორის.

ბ) სახელმწიფო სადაზღვევო პროგრამების ფარგლებში დაზღვევის ურთიერთობებში მონაწილე მხარეების უფლებებისა და კანონიერი ინტერესების დაცვა, რაც უკავშირდება სამედიცინო სერვისის მიწოდებისა და მისი დაფინანსების საკითხებს;

გ) ჯანმრთელობის დაზღვევის ურთიერთობებში მზღვეველთა და დაზღვეულთა უფლება-მოვალეობების შესახებ ინფორმაციის გავრცელება და მისი ხელმისაწვდომობის უზრუნველყოფა;

დ) კანონმდებლობით განსაზღვრული სხვა უფლებამოსილებების განხორციელება.

საქართველოს შრომის, ჯანმრთელობისა და სოციალური დაცვის მინისტრის 2011 წლის 24 მაისის ბრძანება №01-23/ნ - ვებგვერდი, 25.05.2011წ.

    მუხლი 3. საქმიანობა, რომელიც საჭიროებს თანხმობას

1. სამსახურმა სამინისტროს თანხმობითა და კანონმდებლობით დადგენილი წესით შეიძლება განახორციელოს შემდეგი ქმედებები:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო განრიგისა და ხელფასის ფონდის განსაზღვრა;

ე) თანამშრომელთა მატერიალური წახალისებისათვის გამოსაყოფი სახსრების, აგრეთვე მის მიერ შესაძენი საწვავისა და გასაწევი საკომუნიკაციო ხარჯების ლიმიტების განსაზღვრა;

ვ) სხვა გადაწყვეტილებები, რომლებიც დაკავშირებულია სამსახურის ქონებასთან, თუ ისინი სცილდება ჩვეულებრივი საქმიანობის ფარგლებს.

2. ამ მუხლის პირველი პუნქტის „ბ“ და „გ“ ქვეპუნქტებით გათვალისწინებულ ქმედებათა განსახორციელებლად აუცილებელია საქართველოს ფინანსთა სამინისტროს თანხმობა.

3. სამსახურის მიერ სახელმწიფო საკუთრებაში არსებული ქონების გასხვისება ან/და სარგებლობაში გადაცემა ხორციელდება კანონმდებლობით დადგენილი წესით.

    მუხლი 4. სამსახურის მართვა და სტრუქტურა

1. სამსახურს ხელმძღვანელობს დირექტორი.

2. სამსახურის ძირითადი ფუნქციებისა და ამოცანების შესასრულებად იქმნება მუდმივმოქმედი საკონსულტაციო ორგანო – მედიაციის საბჭო.

 3. სამსახურს შეიძლება ჰყავდეს ტერიტორიული ორგანოები. სამსახურის საშტატო ნუსხას, დირექტორის წარდგინებით და სამინისტროს თანხმობით, ამტკიცებს დირექტორი.

საქართველოს შრომის, ჯანმრთელობისა და სოციალური დაცვის მინისტრის 2011 წლის 24 მაისის ბრძანება №01-23/ნ - ვებგვერდი, 25.05.2011წ.

    მუხლი 5. მედიაციის საბჭო

1. მედიაციის საბჭო (შემდგომში – საბჭო) წარმოადგენს სამსახურის საქმიანობის გაუმჯობესების, მისი დამოუკიდებლობის, გამჭვირვალობისა და ეფექტიანობის უზრუნველყოფის მიზნით, შექმნილ მუდმივმოქმედ საკონსულტაციო ორგანოს.

2. საბჭოს შემადგენლობაში შედიან სადაზღვევო სექტორი და სახელმწიფო სექტორის წარმომადგენლები. ასევე შესაძლებელია შედიოდნენ სხვა დაინტერესებული მხარეებიც. საბჭოს შემადგენლობა შესაბამისი წარდგინების საფუძველზე განისაზღვრება მინისტრის ინდივიდუალური ადმინისტრაციულ-სამართლებრივი აქტით.

საქართველოს შრომის, ჯანმრთელობისა და სოციალური დაცვის მინისტრის 2011 წლის 24 მაისის ბრძანება №01-23/ნ - ვებგვერდი, 25.05.2011წ.

    მუხლი 6. საბჭოს ფუნქციები

1. საბჭო:

ა) შეიმუშავებს წინადადებებსა და რეკომენდაციებს სახელმწიფო სადაზღვევო პროგრამების ფარგლებში სახელმწიფო სადაზღვევო პროგრამების გაუმჯობესებასთან, აგრეთვე სადაზღვევო პროგრამების მიმდინარეობის პროცესში გამოვლენილ დარღვევა-ნაკლოვანებებთან დაკავშირებით, დაინტერესებული მხარეებისაგან მიღებული ინფორმაციების საფუძველზე;

ბ) შეიმუშავებს წინადადებებს სახელმწიფო სადაზღვევო პროგრამების ფარგლებში დაზღვეულ მოსახლეობას, მზღვეველის პროვაიდერ სამედიცინო დაწესებულებასა და სადაზღვევო ორგანიზაციებს შორის წარმოშობილი დავების გამომწვევი მიზეზების აღმოფხვრის თაობაზე;

გ) მონაწილეობს სამსახურის ძირითადი ფუნქციისა და ამოცანების მისაღწევად მედიაციის ფუნქციის შესრულების პროცესში.

დ) ახორციელებს კანონმდებლობით გათვალისწინებულ სხვა უფლებამოსილებებს.

2. საბჭოს სხდომა მოიწვევა ერთ-ერთი წევრის ან სამსახურის დირექტორის ინიციატივით.

3. საბჭოს სხდომების მომზადებას უზრუნველყოფს და სხდომებს წარმართავს საბჭოს მდივანი.

4. საბჭოს სხდომა უფლებამოსილია, თუ მას ესწრება საბჭოს წევრთა ნახევარზე მეტი. საბჭოს გადაწყვეტილება მიიღება დამსწრე წევრების ხმათა უმრავლესობით.

5. საბჭოს სხდომა ფორმდება ოქმით, რომელსაც ხელს აწერს საბჭოს მდივანი.

6. საბჭოს წევრთა შრომის ანაზღაურებისათვის არ გამოიყენება სამსახურისათვის სახელმწიფო ბიუჯეტით გამოყოფილი მიზნობრივი სახსრები. გამონაკლისი შეიძლება დაშვებულ იქნეს მინისტრთან შეთანხმებით.

საქართველოს შრომის, ჯანმრთელობისა და სოციალური დაცვის მინისტრის 2011 წლის 24 მაისის ბრძანება №01-23/ნ - ვებგვერდი, 25.05.2011წ.

    მუხლი 7. დირექტორი

1. სამსახურს ხელმძღვანელობს დირექტორი, რომელსაც თანამდებობაზე ნიშნავს და თანამდებობიდან ათავისუფლებს საქართველოს შრომის, ჯანმრთელობისა და სოციალური დაცვის მინისტრი (შემდგომში – მინისტრი).

2. (ამოღებულია - 24.05.2011, №01-23/ნ).

3. სამსახურის დირექტორი მოქმედებს კანონით, ამ დებულებით მინიჭებულ უფლებამოსილებათა ფარგლებში და პერსონალურად აგებს პასუხს სამსახურის მიერ განხორციელებული საქმიანობის კანონიერებაზე, მიზანშეწონილობასა და ეფექტიანობაზე, სამსახურის მფლობელობაში არსებული ქონების დაცვასა და ფულადი სახსრების მიზნობრივ ხარჯვაზე.

4. დირექტორის არყოფნის შემთხვევაში დირექტორის მოვალეობებს ასრულებს მის მიერ ინდივიდუალური ადმინისტრაციულ-სამართლებრივი აქტით განსაზღვრული დირექტორის მოადგილე.

5. დირექტორი:

ა) უძღვება სამსახურის საქმიანობას, ამ დებულებით განსაზღვრულ ფარგლებში ახორციელებს სამსახურის საერთო ხელმძღვანელობას, სამართლებრივ, მეთოდურ-საინფორმაციო და მატერიალურ-ტექნიკურ უზრუნველყოფას, რისთვისაც გამოსცემს ინდივიდუალურ ადმინისტრაციულ-სამართლებრივ აქტებს;

ბ) თავისი კომპეტენციის ფარგლებში, პასუხისმგებელია საქართველოს კონსტიტუციის, საქართველოს საკანონმდებლო აქტების, მინისტრის ბრძანებების, საბჭოს გადაწყვეტილებებისა და სხვა კანონქვემდებარე აქტების შესრულებაზე;

გ) წარმოადგენს სამსახურს მესამე პირებთან ურთიერთობაში ან ანიჭებს წარმომადგენლობით უფლებამოსილებას;

დ) (ამოღებულია - 24.05.2011, №01-23/ნ);

ე) სამინისტროს თანხმობით ამტკიცებს სამსახურის სახელფასო ფონდსა და საშტატო განრიგს;

ვ) მინისტრის თანხმობით თანამდებობაზე ნიშნავს და თანამდებობიდან ათავისუფლებს დირექტორის მოადგილე(ებ)ს;

ვ^​1) თანამდებობაზე ნიშნავს და თანამდებობიდან ათავისუფლებს სამსახურის თანამშრომლებს. სამსახურის თანამშრომელთა მიმართ იყენებს წახალისებისა და დისციპლინური პასუხისმგებლობის ზომებს;

ზ) ამტკიცებს სამსახურის საქმიანობისათვის საჭირო წესებსა და ფორმებს, სტრუქტურული ერთეულების დებულებებს, საორგანიზაციო და ადმინისტრაციულ ხარჯებს;

თ) ანაწილებს მოვალეობებს სამსახურის თანამშრომლებს შორის, აძლევს მათ სათანადო მითითებებს და დავალებებს, აკონტროლებს სამსახურის თანამშრომელთა მიერ სამსახურებრივი მოვალეობების შესრულებას;

ი) ხელს აწერს სამსახურის კომპეტენციის ფარგლებში გასაფორმებელ შეთანხმებებს;

კ) ახორციელებს საქართველოს კანონმდებლობით მინიჭებულ სხვა უფლებამოსილებებს.

საქართველოს შრომის, ჯანმრთელობისა და სოციალური დაცვის მინისტრის 2011 წლის 24 მაისის ბრძანება №01-23/ნ - ვებგვერდი, 25.05.2011წ.

    მუხლი 8. სახელმწიფო კონტროლი

1. სამსახურის სახელმწიფო მაკონტროლებელი ორგანოა სამინისტრო, რომელიც ზედამხედველობას უწევს სამსახურის საფინანსო-ეკონომიკურ საქმიანობას, აგრეთვე სამსახურის მიერ განხორციელებული საქმიანობის კანონიერებას, მიზანშეწონილობასა და ეფექტურობას.

2. მინისტრი აჩერებს ან აუქმებს სამსახურის არამართლზომიერ გადაწყვეტილებას, უკანონო აქტის ან მოქმედების შესრულებას.

3. სამინისტრო უფლებამოსილია მოითხოვოს კონტროლის განსახორციელებლად საჭირო მასალებისა და ინფორმაციის წარდგენა.

    მუხლი 9. ქონება და დაფინანსების წყაროები

1. სამსახურს გააჩნია ქონება, რომელიც მას გადაეცემა კანონმდებლობით დადგენილი წესით.

2. სამსახურის ქონებას შეადგენს ძირითადი საბრუნავი საშუალებები, აგრეთვე სხვა მატერიალური ფასეულობები და ფინანსური რესურსები.

3. სამსახურის დაფინანსების წყარო შეიძლება იყოს:

ა) შესაბამისი ბიუჯეტიდან გამოყოფილი მიზნობრივი სახსრები;

ბ) გრანტები;

გ) შემოწირულობის სახით მიღებული სახსრები;

დ) ხელშეკრულების საფუძველზე შესრულებული სამუშაოდან მიღებული შემოსავალი;

ე) საქართველოს კანონმდებლობით ნებადართული სხვა შემოსავლები.

4. ამ მუხლის მე-2 და მე-3 პუნქტებით განსაზღვრული სახსრები და შემოსავლები მთლიანად ხმარდება სამსახურის მიზნებისა და ფუნქციების განხორციელებას.

5. სამსახური კანონმდებლობით დადგენილი წესით აწარმოებს საფინანსო-ეკონომიკური საქმიანობის აღრიცხვა-ანგარიშგებას, ადგენს ბალანსს და დასამტკიცებლად წარუდგენს სამინისტროს.

6. სამსახურის წლიურ ბალანსს ამოწმებს სახელმწიფო კონტროლის განმახორციელებელი ორგანოს მიერ დანიშნული დამოუკიდებელი აუდიტორი.

    მუხლი 10. ლიკვიდაცია და რეორგანიზაცია

1. სამსახურის ლიკვიდაცია და რეორგანიზაცია ხორციელდება კანონმდებლობით დადგენილი წესის შესაბამისად.

2. ლიკვიდაციის შედეგად დარჩენილი ქონება გადადის სახელმწიფოს საკუთრებაში.

 

 

Annotate