საქართველოს განათლებისა და მეცნიერების სამინისტროს ადმინისტრაციის (დეპარტამენტის) დებულების დამტკიცების შესახებ

სახელმწიფო სარეგისტრაციო კოდი 430.210.000.22.022.014.969

საქართველოს განათლებისა და მეცნიერების მინისტრის

ბრძანება №70/ნ

2010 წლის 11 აგვისტო

ქ. თბილისი

საქართველოს განათლებისა და მეცნიერების სამინისტროს ადმინისტრაციის (დეპარტამენტის) დებულების დამტკიცების შესახებ

„საქართველოს განათლებისა და მეცნიერების სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №37 დადგენილებით დამტკიცებული დებულების მე-3 მუხლის მე-2 პუნქტის „ნ“ ქვეპუნქტის შესაბამისად, ვბრძანებ:

1. დამტკიცდეს საქართველოს განათლებისა და მეცნიერების სამინისტროს ადმინისტრაციის (დეპარტამენტის) თანდართული დებულება.

2. ეს ბრძანება ამოქმედდეს გამოქვეყნებისთანავე.

მინისტრის მოვალეობის შემსრულებელი ა. სეფერთელაძე

შეტანილი ცვლილებები:

1. საქართველოს განათლებისა და მეცნიერების მინისტრის 2011 წლის 3 თებერვლის ბრძანება №10/ნ - ვებგვერდი, 08.02.2011 წ.

2. საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

 

საქართველოს განათლებისა და მეცნიერების სამინისტროს ადმინისტრაციის (დეპარტამენტი)

დ ე ბ უ ლ ე ბ ა

თავი I

ზოგადი დებულებანი

    მუხლი 1

ეს დებულება განსაზღვრავს საქართველოს განათლებისა და მეცნიერების სამინისტროს (შემდგომში – სამინისტრო) სტრუქტურული ქვედანაყოფის – ადმინისტრაციის (დეპარტამენტი) (შემგომში – ადმინისტრაცია) სამართლებრივ სტატუსს, სტრუქტურას, უფლებამოსილებას, ანგარიშვალდებულებას და აწესრიგებს ადმინისტრაციის საქმიანობასთან დაკავშირებულ სხვა საკითხებს.

    მუხლი 2

ადმინისტრაცია თავის საქმიანობაში ხელმძღვანელობს საქართველოს კონსტიტუციით, საერთაშორისო ხელშეკრულებებით, საქართველოს კანონებით, საქართველოს პრეზიდენტის, საქართველოს მთავრობისა და საქართველოს განათლებისა და მეცნიერების მინისტრის (შემდგომში – მინისტრი) სამართლებრივი აქტებით, სამინისტროს დებულებით, წინამდებარე დებულებით და სხვა საკანონმდებლო და კანონქვემდებარე ნორმატიული აქტებით.

    მუხლი 3

ადმინისტრაცია თავისი უფლებამოსილების განხორციელებისას წარმოადგენს სამინისტროს.

    მუხლი 4

ადმინისტრაცია ანგარიშვალდებულია მინისტრის წინაშე, რომელიც ახორციელებს მასზე სამსახურებრივ ზედამხედველობას.

თავი II

ადმინისტრაციის ძირითადი ფუნქციები და ამოცანები

    მუხლი 5

ა) სამინისტროში დოკუმენტბრუნვის მოწესრიგება;

ბ) სამინისტროს საქმიანობის ეფექტიანობის ამაღლების მიზნით საქმისწარმოების ერთიანი წესების დამკვიდრება;

გ) საქმისწარმოების საკითხების შესახებ ნორმატიული და მეთოდური დოკუმენტების შემუშავება და დანერგვა;

დ) სამინისტროს მიერ მიღებულ საკონტროლო დავალებათა შესრულების კონტროლის უზრუნველყოფა;

ე) სამინისტროს სისტემის მოსამსახურეთა დადგენილი წესის შესაბამისად დანიშვნის, სამსახურებრივი გადაადგილების (გადაყვანის), გათავისუფლების, წახალისებისა და დისციპლინური პასუხისმგებლობის ღონისძიებათა გამოყენების, შვებულებისა და მივლინების შესახებ ბრძანებების პროექტების მომზადება;

ვ) სოციალური საკითხების გადაწყვეტა და საპენსიო საბუთების გაფორმება ნამსახურობის მიხედვით;

ზ) სამინისტროს სისტემის მოსამსახურეთა პროფესიულ მომზადებასა და გადამზადებასთან დაკავშირებული წინადადებების შემუშავება;

თ) სამინისტროს სისტემაში კანონმდებლობით დადგენილი წესით კონკურსისა და ატესტაციის გამართვის ორგანიზება, აგრეთვე, სტაჟირებასთან დაკავშირებული საკითხების გადაწყვეტის უზრუნველყოფა;

ი) სამინისტროში მოსამსახურეთა რეზერვის ფორმირება და მისი მიზნობრივი გამოყენება;

კ) სამინისტროს შინაგანაწესის შემუშავება და მისი შესრულების კონტროლი, სამინისტროს მოსამსახურეთა შრომის დისციპლინის დაცვის კონტროლი;

ლ) თავისი კომპეტენციის ფარგლებში, მინისტრის ბრძანებათა რეესტრის წარმოება;

მ) დეპარტამენტის კომპეტენციაში შემავალ საკითხებზე სხვადასხვა სახელმწიფო და არასახელმწიფო დაწესებულების, აგრეთვე, მოქალაქეთა განცხადებებისა და წერილების დადგენილი წესით განხილვა და მათზე რეაგირება;

ნ) სამინისტროს საქმიანობის გეგმის შედგენის კოორდინაცია;

ო) სამინისტროს ტერიტორიული ორგანოების საგანმანათლებლო რესურსცენტრების საქმიანობის კოორდინაცია;

პ) სამინისტროს ტერიტორიული ორგანოების საგანმანათლებლო რესურსცენტრების, სამინისტროს სისტემაში შემავალი საჯარო სამართლის იურიდიული პირებისა და სამინისტროს სტრუქტურული ქვედანაყოფების ურთიერთობის კოორდინაცია;

ჟ) საზოგადოებრივი საბჭოს სხდომების ორგანიზება;

რ) სამინისტროს საშტატო ნუსხისა და თანამდებობრივი სარგოების შემუშავება;

ს) სამინისტროს თანამშრომელთა სამუშაო აღწერილობის შემუშავების კოორდინაცია და სამინისტროს სისტემის საკადრო რესურსების მართვის მიზნით რეკომენდაციების შემუშავება;

ტ) სამინისტროს ვებგვერდის განახლება;

უ) საიდუმლო საქმისწარმოების განხორციელება, მოქმედი კანონმდებლობით გათვალისწინებულ შესაბამის ინფორმაციასა და დოკუმენტაციასთან დაკავშირებული საიდუმლოების რეჟიმის დაცვის უზრუნველყოფა;

ფ) საქმისწარმოებაში დასრულებული დოკუმენტაციის აღრიცხვა, დამუშავება და გადაცემა არქივისათვის, არსებული წესის შესაბამისად;

ქ) სამინისტროს საშვთა ბიუროს მუშაობის უზრუნველყოფა;

ღ) სხვადასხვა სახელმწიფო დაწესებულებასთან, საჯარო და კერძო სამართლის იურიდიულ პირებსა და არასამთავრობო ორგანიზაციებთან თავისი კომპეტენციის ფარგლებში სამინისტროს ურთიერთობის კოორდინაცია;

ყ) მასობრივი ინფორმაციის საშუალებებთან ურთიერთობა, სამინისტროს კომპეტენციას მიკუთვნებული საქმიანობის განხორციელების თაობაზე საზოგადოების ინფორმირება;

შ) პრესკონფერენციების, ბრიფინგებისა და სხვა საკომუნიკაციო საშუალებების გამოყენებით სამინისტროს საზოგადოებრივ ღონისძიებათა დაგეგმვა და განხორციელება.

საქართველოს განათლებისა და მეცნიერების მინისტრის 2011 წლის 3 თებერვლის ბრძანება №10/ნ - ვებგვერდი, 08.02.2011 წ.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

თავი III

ადმინისტრაციის ხელმძღვანელობა და მოსამსახურეები

    მუხლი 6

1. ადმინისტრაციას ხელმძღვანელობს ადმინისტრაციის უფროსი.

2. ადმინისტრაციის უფროსი ანგარიშვალდებულია მინისტრის წინაშე.

3. ადმინისტრაციის უფროსს თანამდებობაზე ნიშნავს და თანამდებობიდან ათავისუფლებს მინისტრი.

4. ადმინისტრაციის უფროსი:

ა) ხელმძღვანელობს ადმინისტრაციის საქმიანობას;

ბ) წარმოადგენს ადმინისტრაციას დაკისრებული უფლება-მოვალეობების განხორციელებისას და პასუხისმგებელია ადმინისტრაციაზე დაკისრებული ფუნქციებისა და ამოცანების შესრულებაზე;

გ) ანაწილებს მოვალეობებს ადმინისტრაციის მოსამსახურეებს შორის, აძლევს მათ მითითებებსა და დავალებებს;

დ) აკონტროლებს ადმინისტრაციის მოსამსახურეების მიერ თავიანთი სამსახურებრივი მოვალეობების შესრულებას;

ე) აკონტროლებს ადმინისტრაციის მოსამსახურეთა მიერ სამინისტროს შრომის შინაგანაწესის დაცვას;

ვ) ხელს აწერს ადმინისტრაციის კომპეტენციის ფარგლებში შემავალ საკითხებთან დაკავშირებით მომზადებულ დოკუმენტებს, მათ შორის, ცნობებს სამინისტროს მოსამსახურეთა საკადრო საკითხებთან დაკავშირებით;’

ზ) საქართველოს კანონმდებლობის შესაბამისად, უფლებამოსილების ფარგლებში, ახდენს სამინისტროს მიერ მომზადებული დოკუმენტაციის ვიზირებას;

თ) კანონმდებლობით დადგენილი წესით წარუდგენს წინადადებებს მინისტრს ადმინისტრაციის მოსამსახურეთა წახალისებისა და მათ მიმართ დისციპლინური პასუხისმგებლობის ზომების გამოყენების თაობაზე;

ი) წარუდგენს სამინისტროს ხელმძღვანელობას წინადადებებს ადმინისტრაციის სტრუქტურისა და საშტატო განრიგის ოპტიმიზაციის მიზნით;

კ) უფლებამოსილია, ადმინისტრაციის კომპეტენციისთვის მიკუთვნებულ საკითხებზე, საქართველოს კანონმდებლობით დადგენილი წესით, მოითხოვოს და მიიღოს ინფორმაცია და დოკუმენტაცია;

ლ) ხელს უწყობს ადმინისტრაციაში შრომის სათანადო პირობების შექმნას და მოსამსახურეთა პროფესიული დონის ამაღლებას;

მ) ახორციელებს საქართველოს კანონმდებლობით და ამ დებულებით მისთვის მინიჭებულ სხვა უფლებამოსილებებს, ასრულებს მინისტრის ცალკეულ დავალებებს.

5. ადმინისტრაციის უფროსის შვებულების, მივლინების ან მოვალეობათა შესრულების შეუძლებლობის შემთხვევაში ადმინისტრაციის უფროსის მოვალეობას ასრულებს ადმინისტრაციის უფროსის მოადგილე, ხოლო ადმინისტრაციის უფროსის მოადგილის შვებულების, მივლინების ან მოვალეობათა შესრულების შეუძლებლობის შემთხვევაში – მინისტრის ბრძანებით განსაზღვრული ადმინისტრაციის ერთ-ერთი სამმართველოს უფროსი.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

    მუხლი 7

1. ადმინისტრაციის უფროსს ჰყავს მოადგილე, რომელსაც, კანონმდებლობით დადგენილი წესით, თანამდებობაზე ნიშნავს და თანამდებობიდან ათავისუფლებს მინისტრი.

2. ადმინისტრაციის უფროსის მოადგილე:

ა) ხელს უწყობს ადმინისტრაციის უფროსს მასზე დაკისრებული მოვალეობების განხორციელებაში;

ბ) ზედამხედველობს ადმინისტრაციის მოხელეთა მიერ სამსახურეობრივი მოვალეობების შესრულებას;

გ) ასრულებს მინისტრისა და ადმინისტრაციის უფროსის დავალებებს;

დ) ახორციელებს საქართველოს კანონმდებლობითა და ამ დებულებით მისთვის მინიჭებულ სხვა უფლებამოსილებებს.

3. ადმინისტრაციის უფროსის მოადგილე, კანონმდებლობით დადგენილი წესით, მასზე დაკისრებული სამსახურებრივი ამოცანების შესრულებისათვის ანგარიშვალდებულია ადმინისტრაციის უფროსისა და მინისტრის წინაშე.

    მუხლი 8

1. ადმინისტრაციაში სამმართველოს სახით შემავალ სტრუქტურულ ერთეულს ხელმძღვანელობს სამმართველოს უფროსი, რომელსაც თანამდებობაზე ნიშნავს და ათავისუფლებს მინისტრი.

2. სამმართველოს უფროსი:

ა) ხელმძღვანელობს და წარმართავს სამმართველოს საქმიანობას;

ბ) ანაწილებს ფუნქციებს სამმართველოს მოსამსახურეებს შორის, აძლევს მათ მითითებებსა და დავალებებს;

გ) აკონტროლებს სამმართველოს მოსამსახურეთა მიერ დაკისრებული მოვალეობების შესრულებას და ამ მოვალეობათა შესრულებისას უზრუნველყოფს საქართველოს კანონმდებლობის დაცვას;

დ) უზრუნველყოფს სამმართველოს კომპეტენციაში შემავალ საკითხებზე სხვადასხვა სახელმწიფო და არასახელმწიფო დაწესებულების, აგრეთვე მოქალაქეთა განცხადებებისა და წერილების დადგენილი წესით განხილვას და მათზე რეაგირებას;

ე) ახორციელებს სამმართველოს კომპეტენციის ფარგლებში შემავალ საკითხთან დაკავშირებით მომზადებული წერილების, ინდივიდუალური ადმინისტრაციულ-სამართლებრივი აქტების პროექტების და სხვა დოკუმენტების ვიზირებას;

ვ) მოთხოვნის შემთხვევაში ადმინისტრაციის უფროსს წარუდგენს ანგარიშს სამმართველოს მიერ განხორციელებული სამუშაოს შესახებ;

ზ) პასუხისმგებელია სამმართველოს ფუნქციებისა და ამოცანების შესრულებაზე;

თ) ასრულებს ადმინისტრაციის უფროსის ცალკეულ დავალებებს;

ი) ახორციელებს კანონმდებლობითა და ამ დებულებით განსაზღვრულ სხვა უფლება-მოვალეობებს.

3. სამმართველოს უფროსი სამმართველოზე დაკისრებული სამსახურებრივი ამოცანების შესრულებისათვის ანგარიშვალდებულია ადმინისტრაციის უფროსის და მისი მოადგილის წინაშე.

4. სამმართველოს მოსამსახურეთა უფლებები და მოვალეობები განისაზღვრება სამინისტროს დებულებით, სამინისტროს შინაგანაწესით, ამ დებულებითა და საქართველოს კანონმდებლობით.

    მუხლი 9

1. ადმინისტრაციაში საჯარო სამსახურს ეწევიან:

ა) მინისტრის თანაშემწეები;

ბ) მინისტრის პირველი მოადგილისა და მოადგილეების თანაშემწეები;

გ) მთავარი სპეციალისტები;

დ) უფროსი სპეციალისტები.

2. ადმინისტრაციაში არამუდმივ ამოცანათა შესასრულებლად, შრომითი ხელშეკრულებით, შეიძლება მიღებულ იქნეს შტატგარეშე მოსამსახურე.

3. ადმინისტრაციის მოსამსახურეებს კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი.

4. დეპარტამენტის მოსამსახურეთა უფლებები და მოვალეობები განისაზღვრება ამ დებულებითა და საქართველოს კანონმდებლობით.

5. ადმინისტრაციის საშტატო რიცხოვნობა განისაზღვრება სამინისტროს საშტატო განრიგით, რომელსაც ამტკიცებს მინისტრი.

 

თავი IV

ადმინისტრაციაში შემავალი სტრუქტურული ერთეულები, მათი ძირითადი ფუნქციები და ამოცანები

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

 

    მუხლი 10

ადმინისტრაციის სტრუქტურული ერთეულებია:

ა) საორგანიზაციო სამმართველო;

ბ) ადამიანური რესურსების მართვის სამმართველო;

გ) საქმისწარმოების სამმართველო;

დ) რეგიონული კოორდინაციის სამმართველო;

ე) საზოგადოებასთან ურთიერთობის სამმართველო.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

    მუხლი 11

საორგანიზაციო სამმართველოს ძირითადი ფუნქციები და ამოცანები:

ა) სამინისტროში გამართული სათათბირო სხდომის ოქმის წარმოება;

ბ) სამინისტროში გამართული სათათბირო სხდომების ოქმების, დავალებების შესაბამისად, სამინისტროს სტრუქტურული ქვედანაყოფებისა და საჯარო სამართლის იურიდიული პირებისათვის მიწოდების უზრუნველყოფა;

გ) თავისი კომპეტენციის ფარგლებში, მინისტრისათვის ორგანიზაციულ-ტექნიკური მომსახურების გაწევა;

დ) სამინისტროს საქმიანობის გეგმის შედგენის კოორდინაცია;

ე) სამინისტროს საშვთა ბიუროს მუშაობის უზრუნველყოფა;

ვ) კანონმდებლობით მინიჭებული სხვა უფლებამოსილებების განხორციელება.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

    მუხლი 12

ადამიანური რესურსების მართვის სამმართველოს ძირითადი ფუნქციები და ამოცანებია:

ა) კანონმდებლობით დადგენილი, სამინისტროს სისტემის მოსამსახურეთა პირადი საქმეების შედგენა და შრომისუუნარობის ფურცლების აღრიცხვის წარმოება;

ბ) სამინისტროს სისტემის მოსამსახურეთა დადგენილი წესის შესაბამისად დანიშვნის, სამსახურებრივი გადაადგილების (გადაყვანის), გათავისუფლების, წახალისებისა და დისციპლინური პასუხისმგებლობის ღონისძიებათა გამოყენების, შვებულებისა და მივლინების შესახებ ბრძანებების პროექტების მომზადება;

გ) საკადრო საკითხებთან დაკავშირებით სამინისტროში დაცული საჯარო ინფორმაციის მოძიება და გასაცემად მომზადება, ან ინფორმაციის გაცემაზე უარის თქმის საფუძვლების არსებობის შემთხვევაში, შესაბამისი გადაწყვეტილების პროექტის მომზადება;

დ) სამინისტროს სისტემის მოსამსახურეთა პროფესიულ მომზადებასთან და გადამზადებასთან დაკავშირებული წინადადებების შემუშავება და ორგანიზაციულ საკითხთა უზრუნველყოფა;

ე) სამინისტროს მოსამსახურეთა სამუშაო აღწერილობის შემუშავების კოორდინაცია და სამინისტროს სისტემის საკადრო რესურსების მართვის მიზნით რეკომენდაციების შემუშავება;

ვ) სამინისტროს სისტემაში, კანონმდებლობით დადგენილი წესით, კონკურსისა და ატესტაციის გამართვის ორგანიზება, აგრეთვე სტაჟირებასთან დაკავშირებული საკითხების გადაწყვეტის უზრუნველყოფა;

ზ) ადამიანური რესურების სტაბილურობის, მოძრაობის და დენადობის თაობაზე სტატისტიკური მონაცემების შემუშავება, პერიოდული ანალიზი, შეფასება;

თ) სოციალური საკითხების გადაწყვეტა და საპენსიო საბუთების გაფორმება ნამსახურობის მიხედვით;

ი) სამინისტროს საშტატო ნუსხისა და თანამდებობრივი სარგოების შემუშავება;

კ) სამინისტროს მოსამსახურეთა კვალიფიკაციის ამაღლების მიზნით საჭირო ღონისძიებათა განხორციელება; მოსამსახურეთა პროფესიული დონის ანალიზი; კვალიფიკაციის ამაღლების ორგანიზება;

ლ) იმ პირთა აღრიცხვა, რომელთაც სასამართლოს გამამტყუნებელი განაჩენის საფუძველზე ნარკოტიკული საშუალების მოხმარებისათვის, ნარკოტიკული საქმიანობის ხელშეწყობისათვის ან ნარკოტიკული საშუალების გასაღებისათვის ჩამოერთვათ პედაგოგიური და საგანმანათლებლო დაწესებულებაში საქმიანობის უფლება;

მ) სამინისტროს შინაგანაწესის შემუშავება და მისი შესრულების კონტროლი, სამინისტროს მოსამსახურეთა შრომის დისციპლინის დაცვის კონტროლი;

ნ) კანონმდებლობით მინიჭებული სხვა უფლებამოსილებების განხორციელება.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

    მუხლი 13

საქმისწარმოების სამმართველოს ძირითადი ფუნქციები და ამოცანებია:

ა) სამინისტროს საქმიანობის ეფექტიანობის ამაღლების მიზნით საქმისწარმოების ერთიანი წესების დამკვიდრება;

ბ) საქმისწარმოების საკითხებზე ნორმატიული და მეთოდური დოკუმენტების შემუშავება და დანერგვა;

გ) დოკუმენტაციის აღნუსხვა და რეგისტრაციაში გატარება;

დ) სამინისტროში შემოსული კორესპონდენციების პირველადი დამუშავების, წინასწარი გარჩევის, რეგისტრაციის, ინდექსაციის, ხელმძღვანელობის მიერ განხილვის, შემსრულებლებისათვის შესრულების ვადის განსაზღვრისა და შემსრულებელთათვის გადაცემის უზრუნველყოფა;

ე) საქმისწარმოებაში დასრულებული დოკუმენტაციის აღრიცხვა, დამუშავება და გადაცემა არქივისათვის, არსებული წესის თანახმად;

ვ) სამინისტროში შემოსული და სამინისტროდან გასული კორესპონდენციების სტატისტიკა, კანონმდებლობასთან შესაბამისობაში მოყვანისა და დროული რეაგირების უზრუნველყოფა;

ზ) საქმისწარმოებისთვის საჭირო ბლანკების, ბეჭდებისა და შტამპების გამოყენების, მკაცრი აღრიცხვის დოკუმენტბრუნვის ორგანიზება და კონტროლი;

თ) მინისტრის ბრძანებათა რეესტრის წარმოება;

ი) საიდუმლო საქმისწარმოების განხორციელება, მოქმედი კანონმდებლობით გათვალისწინებულ შესაბამის ინფორმაციასა და დოკუმენტაციასთან დაკავშირებით საიდუმლოების რეჟიმის დაცვის უზრუნველყოფა;

კ) სამინისტროში დოკუმენტბრუნვის მოწესრიგება;

ლ) სამინისტროს მიერ მიღებულ საკონტროლო დავალებათა შესრულების კონტროლის უზრუნველყოფა;

მ) საკონტროლო კორესპონდენციების განსაზღვრის უზრუნველყოფა;

ნ)კანონმდებლობით მინიჭებული სხვა უფლებამოსილებების განხორციელება.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

    მუხლი 14

რეგიონული კოორდინაციის სამმართველოს ძირითადი ფუნქციები და ამოცანები:

ა) სამინისტროს ტერიტორიული ორგანოების – საგანმანათლებლო რესურსცენტრების საქმიანობის კოორდინაცია;

ბ) სამინისტროს ტერიტორიული ორგანოების – საგანმანათლებლო რესურსცენტრების, სამინისტროს სისტემაში შემავალი საჯარო სამართლის იურიდიული პირებისა და სამინისტროს სტრუქტურული ქვედანაყოფების ურთიერთობის კოორდინაცია;

გ) საჯარო სამართლის იურიდიული პირების – ზოგადსაგანმანათლებლო დაწესებულებების დირექტორებისა და სამეურვეო საბჭოს წევრების სამინისტროში სარეგისტრაციოდ წარდგენილი დოკუმენტების დამუშავება;

დ) საჯარო სამართლის იურიდიული პირების – ზოგადსაგანმანათლებლო დაწესებულებებში სამეურვეო საბჭოებისა და დირექტორების არჩევნების კოორდინაცია;

ე) სამინისტროს ტერიტორიული ორგანოების – საგანმანათლებლო რესურსცენტრებისგან ინფორმაციის მიღება/დამუშავება და საგანმანათლებლო რესურსცენტრებისათვის ინფორმაციის მიწოდება;

ვ) ზოგადსაგანმანათლებლო დაწესებულებათა, მოსწავლეთა პერსონალური მონაცემების რეესტრის, აგრეთვე სკოლისგარეშე საგანმანათლებლო დაწესებულებათა რეესტრების წარმოება;

ზ) კანონმდებლობით მინიჭებული სხვა უფლებამოსილებების განხორციელება.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

    მუხლი 15

საზოგადოებასთან ურთიერთობის სამმართველოს ძირითადი ფუნქციები და ამოცანები:

ა) სხვადასხვა სახელმწიფო დაწესებულებასთან, საჯარო და კერძო სამართლის იურიდიულ პირებთან და არასამთავრობო ორგანიზაციებთან, თავისი კომპეტენციის ფარგლებში, სამინისტროს ურთიერთობის კოორდინაცია;

ბ) მასობრივი ინფორმაციის საშუალებებთან ურთიერთობა, სამინისტროს კომპეტენციას მიკუთვნებული საქმიანობის განხორციელების თაობაზე საზოგადოების ინფორმირება;

გ) მასმედიასთან ურთიერთობა პრესკონფერენციების, ბრიფინგებისა და სხვა საკომუნიკაციო საშუალებების გამოყენებით, სამინისტროს საზოგადოებრივ ღონისძიებათა დაგეგმვა და განხორციელება;

დ) სამინისტროს საქმიანობის შესახებ საზოგადოების ინფორმირება, მათ შორის, სამინისტროს საქმიანობის ამსახველი საგამომცემლო მასალის მომზადება;

ე) სამინისტროს ვებგვერდის განახლება;

ვ) საზოგადოებრივი საბჭოს სხდომების ორგანიზება.

საქართველოს განათლებისა და მეცნიერების მინისტრის 2012 წლის 30 ივლისის ბრძანება №149/ნ - ვებგვერდი, 03.08.2012წ.

 

 

Annotate