ელექტროენერგიის ან ბუნებრივი გაზის (აირის) დატაცების, ასევე სასმელი წყლის უკანონო მოხმარებისა და წყალარინების ქსელით უკანონო სარგებლობისათვის ადმინისტრაციული სახდელის დადებისა და იძულებით აღსრულების წესების დამტკიცების შესახებ

სახელმწიფო სარეგისტრაციო კოდი 300.320.000.16.009.014.987

საქართველოს ენერგეტიკისა და წყალმომარაგების მარეგულირებელი

ეროვნული კომისიის

დადგენილება №14

2010 წლის 12 აგვისტო

ქ. ქუთაისი

ელექტროენერგიის ან ბუნებრივი გაზის (აირის) დატაცების, ასევე სასმელი წყლის უკანონო მოხმარებისა და წყალარინების ქსელით უკანონო სარგებლობისათვის ადმინისტრაციული სახდელის დადებისა და იძულებით აღსრულების წესების დამტკიცების შესახებ

საქართველოს ადმინისტრაციულ სამართალდარღვევათა კოდექსის 313-ე მუხლის მე-8 ნაწილის, „ელექტროენერგეტიკისა და ბუნებრივი გაზის შესახებ“ საქართველოს კანონის მე-5 მუხლის პირველი პუნქტის და საქართველოს ზოგადი ადმინისტრაციული კოდექსის 61-ე მუხლის საფუძველზე, ვადგენთ:

 მუხლი 1.

დამტკიცდეს თანდართული „ელექტროენერგიის ან ბუნებრივი გაზის (აირის) დატაცების, ასევე სასმელი წყლის უკანონო მოხმარებისა და წყალარინების ქსელით უკანონო სარგებლობისათვის ადმინისტრაციული სახდელის დადებისა და იძულებით აღსრულების წესები“.

 მუხლი 2.

დამტკიცდეს საქართველოს ადმინისტრაციულ სამართალდარღვევათა კოდექსის 96¹  და 149-ე მუხლებით გათვალისწინებულ ადმინისტრაციულ სამართალდარღვევებზე შესადგენი ადმინისტრაციული სამართალდარღვევის ოქმის ფორმა (დანართი 1).

 მუხლი 3.

დამტკიცდეს საქართველოს ადმინისტრაციულ სამართალდარღვევათა კოდექსის 96¹  და 149-ე მუხლებით გათვალისწინებული ადმინისტრაციული სამართალდარღვევების ჩადენისათვის გაფრთხილე-ბის სახით ადმინისტრაციული სახდელის დადების შესახებ დადგენილების ფორმა (დანართი 2).

 მუხლი 4.

დამტკიცდეს საქართველოს ადმინისტრაციულ სამართალდარღვევათა კოდექსის 96¹  და 149-ე მუხლებით გათვალისწინებული ადმინისტრაციული სამართალდარღვევების განმეორებით ჩადენისათვის დაჯარიმების სახით ადმინისტრაციული სახდელის დადების შესახებ დადგენილების ფორმა (დანართი 3).

 მუხლი 5.

დამტკიცდეს გამოსაყენებლად უვარგისი მკაცრი აღრიცხვის ფორმის (ოქმის) ჩამოწერის აქტი (დანართი 4).

 მუხლი 6.   

 ამ დადგენილების ამოქმედებიდან 1 თვის ვადაში საქართველოს ადმინისტრაციულ სამართალდარღვევათა კოდექსის 96¹  და 149-ე მუხლებით გათვალისწინებულ სამართალდარღვევებზე ოქმის შედგენის და ადმინისტრაციული სახდელის დადების უფლების მქონე სუბიექტებმა უზრუნველყონ ადმინისტრაციული სამართალდარღვევათა ოქმის აღრიცხვის და რეგისტრაციის ჟურნალების შექმნა.

 მუხლი 7.

ამ დადგენილების ამოქმედებისთანავე ძალადაკარგულად გამოცხადდეს „ელექტროენერგიის ან ბუნებრივი გაზის (აირის) დატაცების შესახებ ოქმის შედგენის წესის დამტკიცების შესახებ” საქართველოს ენერგეტიკის მარეგულირებელი ეროვნული კომისიის 2005 წლის 30 მარტის №3 დადგენილება.

 მუხლი 8.

დადგენილება ძალაშია 2010 წლის 1 სექტემბრიდან.

კომისიის თავმჯდომარე                               გ. ჩალაგაშვილი

 

ელექტროენერგიის ან ბუნებრივი გაზის (აირის) დატაცების, ასევე სასმელი წყლის უკანონო მოხმარებისა და წყალარინების ქსელით უკანონო სარგებლობისათვის ადმინისტრაციული სახდელის დადებისა და იძულებით აღსრულების წესები

თავი I. ზოგადი დებულებანი

    მუხლი 1. ზოგადი დებულებები

1. ელექტროენერგიის ან ბუნებრივი გაზის (აირის) დატაცების, ასევე სასმელი წყლის უკანონო მოხმარებისა და წყალარინების ქსელით უკანონო სარგებლობისათვის ადმინისტრაციული სახდელის დადებისა და იძულებით აღსრულების წესები (შემდგომში – წესები) არეგულირებს საქართველოს ადმინისტრაციულ სამართალდარღვევათა კოდექსის 96¹  და 149-ე მუხლებით გათვალისწინებულ ადმინისტრაციულ სამართალდარღვევებთან დაკავშირებული ადმინისტრაციულ სამართალდარღვევათა ოქმების შედგენასთან, აღრიცხვა-ანგარიშგებასა და შესაბამისი საწარმოების მიერ ადმინისტრაციული სახდელის დადებასთან დაკავშირებულ საკითხებს.

2. საწარმო ადმინისტრაციულ სამართალდარღვევათა ოქმების (შემდგომში – ოქმი/ოქმები) გამოყენებასა და აღრიცხვა-ანგარიშგებას ახორციელებს „მკაცრი აღრიცხვის ფორმების შესახებ” საქართველოს კანონისა და ამ წესების საფუძველზე.

3.  ამ წესებით დადგენილი მოთხოვნები სავალდებულოა ყველა იმ პირისათვის, რომელიც მონაწილეობს ადმინისტრაციული სახდელის დადებაში.

    მუხლი 2. ტერმინთა განმარტება

1.  ამ წესებში გამოყენებულ ტერმინებს გააჩნიათ შემდეგი მნიშვნელობა:

ა) საწარმო – ელექტროენერგიის წარმოების, გადაცემის ან განაწილების ლიცენზიანტი, მცირე სიმძლავრის ელექტროსადგური, ბუნებრივი გაზის (აირის) ტრანსპორტირების ან განაწილების ლიცენზიანტი, აგრეთვე, სასმელი წყლის მიმწოდებელი კომპანია;

ბ) რეგისტრაციის ჟურნალი – საწარმოში არსებული რეესტრის ფორმა, რომელშიც აისახება სრული ინფორმაცია ოქმების შედგენასთან დაკავშირებით, მათ შორის, გაფრთხილებულ პირთა მონაცემები, დაჯარიმებულ პირთა მონაცემები, ოქმების და დადგენილებების მონაცემები;

გ) აღრიცხვის ჟურნალი – საქართველოს ფინანსთა მინისტრის 2005 წლის 2 აგვისტოს №669 ბრძანებით დამტკიცებული მკაცრი აღრიცხვის ფორმების რეგისტრაციის ჟურნალი;  

დ) დადგენილება – ადმინისტრაციული სამართალდარღვევის ოქმის საფუძველზე, უფლებამოსილი პირის მიერ სამართალდამრღვევი პირის მიმართ გამოცემული დადგენილება გაფრთხილების ან დაჯარიმების სახით ადმინისტრაციული სახდელის დადების შესახებ. დადგენილება, როგორც შესაბამისი კანონმდებლობის საფუძველზე საჯარო უფლებამოსილების განხორციელებისას გამოცემული აქტი, წარმოადგენს ინდივიდუალურ ადმინისტრაციულ-სამართლებრივ აქტს და მისი გამოცემის წესი, ისევე როგორც მისი რეკვიზიტები, უნდა აკმაყოფილებდეს საქართველოს კანონმდებლობით დადგენილ მოთხოვნებს.

2.  ამ წესებში გამოყენებულ სხვა ტერმინებს აქვს იგივე მნიშვნელობა, რაც დადგენილია საქართველოს ადმინისტრაციულ სამართალდარღვევათა კოდექსით და „ელექტროენერგეტიკისა და ბუნებრივი გაზის შესახებ“ საქართველოს კანონით.

    მუხლი 3. საწარმოს ვალდებულებები

1.  საწარმო ვალდებულია, ამ წესების თანახმად, აწარმოოს აღრიცხვის ჟურნალი, რომელიც უნდა აიკინძოს, გადაინომროს და დადასტურდეს საწარმოს ხელმძღვანელის ხელმოწერით. საწარმო ვალდებულია კომისიის მოთხოვნის შემთხვევაში უმოკლეს ვადაში წარადგინოს მისი დამოწმებული ასლი კომისიაში.

2.  საწარმოს მიერ ამ წესებით დადგენილი მოთხოვნების დარღვევით პირის დაჯარიმების შემთხვევაში, პირს ჯარიმის სახით გადახდილი თანხა დაუბრუნდება კანონმდებლობით დადგენილი წესით.

3.  საწარმო ვალდებულია, წერილობით წარუდგინოს კომისიას იმ პირის/პირების ნუსხა, რომელთაც გააჩნიათ ადმინისტრაციული სახდელის დადების უფლებამოსილება, აგრეთვე იმ ბრძანების ასლი, რომლის საფუძველზეც მოხდა ამ პირის/პირების უფლებამოსილების განსაზღვრა.

4.  საწარმო ვალდებულია, შეინახოს ყველა გამოყენებული, გაუქმებული და გამოუყენებელი ოქმები და დადგენილებები, არანაკლებ 3 წლის ვადით.

5.  საწარმო ვალდებულია, ადმინისტრაციულ სამართალდარღვევათა ოქმის შედგენისას და დადგენილების გამოტანისას, გაითვალისწინოს საქართველოს ადმინისტრაციულ სამართალდარღვევათა კოდექსის 270-ე მუხლის მე-2 ნაწილის მოთხოვნა.

 

თავი II. ადმინისტრაციული სამართალდარღვევის ოქმის შედგენის წესი

    მუხლი 4. ოქმის შედგენის საფუძველი

1.  ამ წესების შესაბამისად, ადმინისტრაციული სამართალდარღვევის ოქმი დგება საქართველოს ადმინისტრაციულ სამართალდარღვევათა კოდექსის 96¹  მუხლით გათვალისწინებული სამართალდარღვევის – ელექტროენერგიის წარმოების ლიცენზიანტის, მცირე სიმძლავრის ელექტროსადგურის, გადაცემის ან განაწილების ქსელიდან ელექტროენერგიის ან ბუნებრივი გაზის (აირის) ტრანსპორტირების სისტემიდან ან განაწილების ქსელიდან ბუნებრივი გაზის (აირის) დატაცების, ელექტროენერგიის ან ბუნებრივი გაზის (აირის) აღრიცხვის გარეშე ან აღრიცხვის წესების დარღვევით მოხმარების, აგრეთვე, 149-ე მუხლით გათვალისწინებული სამართალდარღვევის – სასმელი წყლის უკანონო მოხმარების ან წყალარინების ქსელით უკანონო სარგებლობის ფაქტზე.

2.  დაუშვებელია ოქმის შედგენა, თუ ადგილი არ ჰქონია საქართველოს ადმინისტრაციულ სამართალდარღვევათა კოდექსის 96¹  ან 149-ე მუხლით გათვალისწინებულ ადმინისტრაციულ სამართალდარღვევას.

    მუხლი 5. ოქმის შედგენის უფლებამოსილების მინიჭება

1.  ოქმის შედგენაზე უფლებამოსილი პირი განისაზღვრება საწარმოს ხელმძღვანელის მიერ შესაბამისი უფლებამოსილების მინიჭებით.

2.  ოქმის შედგენის უფლებამოსილების მინიჭება ხორციელდება სათანადო ბრძანების გამოცემით, ან შესაბამისი რწმუნებულების (მინდობილობის) გაცემით, რომელიც დამტკიცებული უნდა იყოს საწარმოს ხელმძღვანელის ხელმოწერით.

3.  ოქმის შედგენის უფლებამოსილების მინიჭება უნდა განხორციელდეს შეზღუდული ვადით და იგი არ უნდა აღემატებოდეს 6 თვეს.

4.  დაუშვებელია ოქმის შედგენის უფლებამოსილების მინიჭება განუსაზღვრელ პირთა ჯგუფისათვის.

    მუხლი 6. ოქმის შევსება და წარმოება

1.  ოქმი ივსება ლურჯი ან შავი კალმით. ოქმში ყველა ჩანაწერი კეთდება გარკვევით. ოქმში დაუშვებელია ტექსტის გადახაზვა, გადაფხეკა, გადაშლა და ა. შ. ოქმის დაზიანების ან მასში არასწორი მონაცემების შეტანის შემთხვევაში ივსება ახალი ოქმი, ხოლო ძველი დაიხაზება ჯვარედინად, რომელსაც ოქმის შემვსები მოხსენებითი ბარათით, გაუქმების მიზეზების მითითებით აბარებს ოქმის გამცემს.

2.  ოქმში აღინიშნება:

ა) ოქმის შედგენის თარიღი და ადგილი;

ბ) ოქმის შემდგენი პირის სამუშაო ადგილი, თანამდებობა, სახელი, მამის სახელი და გვარი;

გ) მონაცემები დამრღვევის შესახებ – სახელი, მამის სახელი, გვარი, მისამართი, აბონენტის ნომერი, იურიდიული პირის შემთხვევაში – სახელი, იურიდიული ან/და ფაქტობრივი მისამართი, საგადასახადოსაიდენტიფიკაციო ნომერი (სსნ), აბონენტის ნომერი;

დ) ადმინისტრაციული სამართალდარღვევის ჩადენის ადგილი, დრო და არსი;

ე) ნორმატიული აქტი, რომელიც ითვალისწინებს პასუხისმგებლობას ამ სამართალდარღვევისათვის;

ვ) მოწმეთა ან/და დაზარალებულთა სახელები, გვარები და მისამართები, მათი არსებობის შემთხვევაში;

ზ) დამრღვევის ახსნა-განმარტება;

თ) საქმის გადასაწყვეტად საჭირო სხვა ცნობები.

3.  ოქმს ხელს აწერს მისი შემდგენი და ადმინისტრაციული სამართალდარღვევის ჩამდენი. თუ არიან მოწმეები და დაზარალებულები, ოქმს ხელი შეიძლება მოაწერონ ამ პირებმაც.

4.  იმ შემთხვევაში, თუ სამართალდამრღვევი უარს იტყვის ოქმის ხელმოწერაზე, ოქმში კეთდება სათანადო ჩანაწერი. სამართალდარღვევის ჩამდენს უფლება აქვს წარმოადგინოს ოქმისათვის დასართავი ახსნა-განმარტებები და შენიშვნები ოქმის შინაარსის გამო, აგრეთვე ჩამოაყალიბოს მის ხელმოწერაზე უარის თქმის მოტივები. ოქმის შედგენისას დამრღვევს უნდა განემარტოს მისთვის ადმინისტრაციულ სამართალდარღვევათა კოდექსის 252-ე მუხლით გათვალისწინებული უფლებები და მოვალეობანი, რაც აღინიშნება ოქმში.

5.  ოქმი დგება ორ ეგზემპლარად, რომელთაც გააჩნიათ თანაბარი იურიდიული ძალა. შედგენილი ოქმის ერთი ეგზემპლარი დამრღვევ პირს გადაეცემა პირადად ან გაეგზავნება დაზღვეული ფოსტით, რაზედაც ოქმში კეთდება სათანადო ჩანაწერი. ოქმის მე-2 ეგზემპლარი რჩება საწარმოს.

    მუხლი 7. დამატებითი მტკიცებულებები

1.  ადმინისტრაციულ სამართალდარღვევათა კოდექსით გათვალისწინებული სამართალდარღვევის ფაქტის გამოვლენისას დამატებითი მტკიცებულების სახით შესაძლებელია გადაღებულ იქნეს ფოტო ან/და ვიდეოფირები.

2.  ფოტო ან/და ვიდეოფირები გადაღებულ უნდა იქნეს იმ სახით, რომ შესაძლებელი იყოს მათი გადაღების პერიოდის იდენტიფიცირება.

    მუხლი 8. ოქმის რეგისტრაცია

1.  უფლებამოსილი პირის მიერ შედგენილი ოქმი, შედგენიდან არა უგვიანეს მეორე სამუშაო დღისა, რეგისტრირებული უნდა იყოს აღრიცხვისა და რეგისტრაციის ჟურნალებში.

2   აღრიცხვის ჟურნალის წარმოებისა და დალუქვის წესი განისაზღვრება საწარმოს ხელმძღვანელის მიერ. ამასთან, აღრიცხვისა და რეგისტრაციის ჟურნალების წარმოების წესი უნდა ითვალისწინებდეს ისეთი სახის პროცედურებს, რომ გამორიცხული იყოს მათში შეტანილი მონაცემების თვითნებური ცვლილება. რეგისტრაციის ჟურნალში არსებული ინფორმაცია თავმოყრილ უნდა იქნეს საწარმოს ცენტრალურ ოფისში ელექტრონული სახით.

3.  რეგისტრაციის ჟურნალში შეიტანება შემდეგი ინფორმაცია:

ა) ფიზიკური პირის შემთხვევაში – სახელი, მამის სახელი, გვარი, მისამართი და აბონენტის ნომერი; იურიდიული პირის შემთხვევაში, სახელი, იურიდიული ან/და ფაქტობრივი მისამართი, საგადასახადო საიდენტიფიკაციო ნომერი (სსნ) და აბონენტის ნომერი;

ბ) ოქმის ნომერი, შედგენის თარიღი, მიზეზი და ადგილი, ასევე შემდგენის სახელი, მამის სახელი, გვარი, სამუშაო ადგილი, თანამდებობა და რწმუნებულების ნომერი;

გ) დადგენილების ნომერი, თარიღი და გამომცემი პირის სახელი და გვარი.      

 

თავი III. ადმინისტრაციული სახდელის დადების წესი

    მუხლი 9. ადმინისტრაციული სახდელის დადება

1. ადმინისტრაციული სახდელის დადება ოქმის საფუძველზე ხდება გაფრთხილების ან დაჯარიმების სახით ადმინისტრაციული სახდელის დადების შესახებ დადგენილებით.

2. ადმინისტრაციული სამართალდარღვევის გამოვლენისას საწარმოს უფლებამოსილი პირი ადგენს ადმინისტრაციული სამართალდარღვევის ოქმს და საქმის განხილვის შემდეგ, ადმინისტრაციული სახდელის დადებაზე უფლებამოსილი პირის მიერ გამოიცემა გაფრთხილების სახით ადმინისტრაციული სახდელის დადების შესახებ დადგენილება, რომლის ერთი ეგზემპლარიც გადაეცემა ადმინისტრაციული სამართალ-დარღვევის ჩამდენს.

3. ადმინისტრაციული სამართალდარღვევის განმეორებითი გამოვლენის შემთხვევაში საწარმოს უფლებამოსილი პირი ადგენს ოქმს და საქმის განხილვის შემდეგ ადმინისტრაციული სახდელის დადებაზე უფლებამოსილი პირის მიერ გამოიცემა დაჯარიმების სახით ადმინისტრაციული სახდელის დადებისშესახებ დადგენილება , რომლის ერთი ეგზემპლარიც გადაეცემა ადმინისტრაციული სამართალდარღვევის ჩამდენს .

4.  ამ მუხლის მე-3 პუნქტში მოყვანილი გარემოება ხორციელდება იმ შემთხვევაში, თუ გაფრთხილების სახით ადმინისტრაციული სახდელის დადების დღიდან 1 წლის განმავლობაში ხელმეორედ გამოვლინდა ადმინისტრაციული დარღვევა. ამ ვადის გასვლის შემთხვევაში პირი აღარ ითვლება ადმინისტრაციულ სახდელდადებულად და სამართალდარღვევის გამოვლენის შემთხვევაში პირის მიმართ უნდა იქნეს გამოყენებული ამ მუხლის მე-2 პუნქტით გათვალისწინებული ღონისძიება.

5.  საწარმომ უნდა უზრუნველყოს ადმინისტრაციული სახდელის დადების შესახებ დადგენილების გამოცემა ადმინისტრაციულ სამართალდარღვევათა კოდექსის შესაბამისად.

6.  დადგენილება ადმინისტრაციული სახდელის დადების შესახებ გამოცემიდან 3 სამუშაო დღის ვადაში უნდა ჩაბარდეს ან გაეგზავნოს დაზღვეული ფოსტით პირს, რომლის მიმართაც არის გამოტანილი დადგენილება.

    მუხლი 10. ადმინისტრაციული სახდელის დადებაზე უფლებამოსილი პირის განსაზღვრა

1.  ადმინისტრაციული სახდელის დადებაზე უფლებამოსილი პირი განისაზღვრება საწარმოს ხელმღვანელის მიერ, ბრძანების საფუძველზე.

    მუხლი 11. გასაჩივრების წესი

1.  ადმინისტრაციული სახდელის დადების შესახებ დადგენილება შეიძლება გასაჩივრდეს საქართველოს ენერგეტიკისა და წყალმომარაგების მარეგულირებელ ეროვნულ კომისიაში.

2.  პირი, რომლის მიმართაც იქნა მიღებული ადმინისტრაციული სახდელის დადების შესახებ დადგენილება, უფლებამოსილია იგი გაასაჩივროს კომისიაში პირდაპირი წესით (თვითონ შეიტანოს საჩივარი) ან დადგენილების გამომცემი საწარმოს მეშვეობით.

3   საწარმოში საჩივრის შეტანის შემთხვევაში, საწარმო ვალდებულია კომისიას გადაუგზავნოს საჩივარი და მის ხელთ არსებული სრული დოკუმენტაცია, არა უგვიანეს 10 დღისა.

4.  საჩივრის მიღების შემთხვევაში, კომისიაში იწყება ადმინისტრაციული წარმოება, რომლის შესახებაც ინფორმაცია ქვეყნდება კომისიის ოფიციალურ ვებგვერდზე (www.gnerc.org).

5.  კომისიაში ადმინისტრაციული წარმოების დაწყება შეაჩერებს ადმინისტრაციული სახდელის დადების შესახებ დადგენილების, ოქმის და დარიცხვის აქტის მოქმედებას საკითხის საბოლოო გადაწყვეტამდე.

6.  ადმინისტრაციული წარმოების დაწყების თაობაზე კომისიის მიერ ნებისმიერი ფორმით ინფორმაციის მიწოდებისთანავე საწარმო ვალდებულია დავის საბოლოო გადაწყვეტამდე (მიმდინარე დავალიანების გადახდის პირობით) არ შეუწყვიტოს მომსახურება პირს, რომლის მიმართაც იქნა მიღებული ადმინისტრაციული სახდელის დადების შესახებ დადგენილება, ხოლო იმ შემთხვევაში, როდესაც უკვე შეწყვეტილია მომსახურება, აღუდგინოს იგი, არა უგვიანეს 1 სამუშაო დღისა.

7.  საკითხის ობიექტურად გადაწყვეტის უზრუნველსაყოფად კომისია უფლებამოსილია მოითხოვოს საჭირო ინფორმაცია ადმინისტრაციული წარმოების ნებისმიერ ეტაპზე.

8.  კომისიას საჩივრის განხილვისას გამოაქვს ერთ-ერთი შემდეგი გადაწყვეტილება:

ა) დადგენილების უცვლელად დატოვებისა და საჩივრის დაუკმაყოფილებლად დატოვების შესახებ;

ბ) დადგენილების გაუქმებისა და საქმის ხელახალი განხილვისათვის დაბრუნების შესახებ;

გ) დადგენილების გაუქმებისა და საქმის შეწყვეტის შესახებ.

9.  თუ დადგენილება გამოტანილია არაუფლებამოსილი პირის მიერ, მაშინ ასეთი დადგენილება გაუქმდება და საქმე განსახილველად დაუბრუნდება შესაბამის საწარმოს.

10.     კომისია საჩივარს განიხილავს მისი მიღებიდან 30 დღის ვადაში.

11.     ადმინისტრაციული სამართალდარღვევის საქმეზე მიღებული დადგენილების გაუქმება საქმის შეწყვეტით გამოიწვევს დადგენილებით დაკისრებული ფულადი თანხების დაბრუნებას და ამ დადგენილებასთან დაკავშირებული შეზღუდვების გაუქმებას.

12.     კომისია უფლებამოსილია, დადგენილების გაუქმების ან უცვლელად დატოვების მიუხედავად, იმსჯელოს საწარმოს მიერ მის სასარგებლოდ პირზე დარიცხული თანხის საფუძვლიანობაზე და მიიღოს შესაბამისი გადაწყვეტილება.

    მუხლი 12. დაჯარიმების სახით ადმინისტრაციული სახდელის დადების შესახებ დადგენილების იძულებით აღსრულების წესი

1.  ფიზიკური პირისთვის დაჯარიმების სახით ადმინისტრაციული სახდელის დადების შემთხვევაში, საწარმო დამოუკიდებლად ახორციელებს დაჯარიმების შესახებ დადგენილების აღსრულებას.

2.  საწარმო ვალდებულია დაჯარიმებულ ფიზიკურ პირს შეუწყვიტოს მომსახურება, ამ უკანასკნელისმიერ ჯარიმის გადახდამდე. ფიზიკურ პირს უნდა განემარტოს, თუ როგორ და სად შეიძლება ჯარიმის გადახდა.

3. დაჯარიმებულ ფიზიკურ პირს, დადგენილების გასაჩივრების ვადის გასვლიდან უნდა განესაზღვროს ერთთვიანი ვადა ჯარიმის ნებაყოფლობით გადასახდელად.

4.  ფიზიკურ პირს ჯარიმის გადახდის დამადასტურებელი საბუთის საწარმოში წარდგენის შემდეგ უნდა აღუდგეს მომსახურება არა უგვიანეს მეორე დღისა, თუ პირს არ გააჩნია საწარმოს მიმართ სხვა დავალიანება.

5.  დაჯარიმებული პირის მიერ დაჯარიმებიდან 3 თვის შემდეგ, ჯარიმის გადაუხდელობის შემთხვევაში დაჯარიმების სახით ადმინისტრაციული სახდელის დადების შესახებ დადგენილება იძულებით აღსასრულებლად მიექცევა „სააღსრულებო წარმოებათა შესახებ“ საქართველოს კანონით დადგენილი წესით.

6.  ამ მუხლის მე-2 პუნქტით გათვალისწინებული ღონისძიების გატარების შეუძლებლობების შემთხვევაში დაჯარიმების სახით ადმინისტრაციული სახდელის დადების შესახებ დადგენილება იძულებით აღსასრულებლად მიექცევა „სააღსრულებო წარმოებათა შესახებ“ საქართველოს კანონით დადგენილი წესით.

თავი IV. ადმინისტრაციული სამართალდარღვევის ოქმის დამზადება და აღრიცხვა-ანგარიშგება

    მუხლი 13. ოქმების მომარაგება, გადაცემა და დაბრუნება

1. ოქმების მომარაგებას საწარმო ახორციელებს დამოუკიდებლად.

2. ოქმების შეკვეთას საწარმო აწარმოებს “მკაცრი აღრიცხვის ფორმების შესახებ” საქართველოს კანონის თანახმად, კანონმდებლობის შესაბამისად შერჩეულ პოლიგრაფიულ საწარმოში.

3. ოქმის ფორმების პოლიგრაფიული საწარმოდან გამოტანის უფლება აქვს საწარმოს მიერ სათანადო მინდობილობით აღჭურვილ პირს.

4. ოქმის ბლანკების შენახვაზე პასუხისმგებელი პირის/პირების მიერ ოქმების გაცემა, დაბრუნება და გაუქმება აღირიცხება აღრიცხვის ჟურნალში.

    მუხლი 14. ოქმის ფორმა და მისი აღწერილობა

1. ოქმის ფორმა უნდა აკმაყოფილდეს შემდეგ მოთხოვნებს:

ა) „მკაცრი აღრიცხვის ფორმების შესახებ” საქართველოს კანონის მე-3 მუხლის „ბ” პუნქტით განსაზღვრულ      პირობებს;

ბ) ოქმზე პოლიგრაფიული წესით აღნიშნული უნდა იყოს დამკვეთისა და დამამზადებლის სახელი ინიციალებით, რეგისტრაციის ნომერი, ინდივიდუალური ნომერი (არანაკლებ 6 ციფრისა), სერია, აგრეთვე ფინანსთა სამინისტროს ინიციალები – „სფს”;

გ) ოქმის ფორმა უნდა დამზადდეს ა-4 ფორმატის წყლის ნიშნიან ქაღალდზე;

დ) მისი ზედაპირი დაფარული უნდა იყოს დამცავი (გილოშერული) ბადით.

    მუხლი 15. ოქმების შენახვა

1.  ოქმების შენახვა ხორციელდება “მკაცრი აღრიცხვის ფორმების შესახებ” საქართველოს კანონის მე-8 მუხლის მე-5, მე-6 და მე-7 პუნქტების შესაბამისად.

2.  ოქმების ბლანკები შენახულ უნდა იქნეს ცეცხლგამძლე სეიფში.

    მუხლი 16. გამოსაყენებლად უვარგისი ოქმის/ოქმების ჩამოწერა

1.  გამოსაყენებლად უვარგისი ოქმის/ოქმების ჩამოწერა შეიძლება:

ა) შევსების დროს დაშვებული შეცდომების გამო;

ბ) ოქმების ფიზიკური დაზიანების გამო.

2. გამოსაყენებლად უვარგისი ოქმის/ოქმების ჩამოწერა უნდა მოხდეს ჩამოწერის აქტის მიხედვით. გამოსაყენებლად უვარგისი ოქმის/ოქმების ექსკლუზიური ნუმერაცია შეტანილ უნდა იქნეს მკაცრი აღრიცხვის ფორმების (დოკუმენტების) ჩამოწერის აქტში.

3.  საწარმოს ხელმძღვანელი ნიშნავს გამოსაყენებლად უვარგისი ოქმების ჩამოწერაზე პასუხისმგებელ პირებს.

4. გამოსაყენებლად უვარგისი ოქმის/ოქმების უტილიზაცია ხორციელდება მოქმედი კანონმდებლობის შესაბამისად.

 

 

დანართი №1                                  

ადმინისტრაციული სამართალდარღვევის

ოქმი №

 

.................................... 20 წ.                                  .........................................

                                          (შედგენის ადგილი)

1. შემდგენი: .......................................................................................................................

                                        (თანამდებობა, სახელი, მამის სახელი, გვარი)

2. დარღვევის ადგილი, დრო, არსი: ..............................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

..................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

 

3. დამრღვევი: .....................................................................................................................................................

                           (იურიდიული/ფიზიკური პირი, მისამართი, ტელეფონი, აბონენტის ნომერი)

.......................................................................................................................................................................................

4. დამრღვევის ახსნა-განმარტება: .....................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

 

5. მოწმე(ები), დაზარალებული(ები): ..............................................................................................

(გვარი, სახელი, მისამართი)

.......................................................................................................................................................................

6. კვალიფიკაცია: საქართველოს ადმინისტრაციულ სამართალდარღვევათა კოდექსის მუხლი

..........................................

 

7. საქმის გადასაწყვეტად საჭირო სხვა ცნობები:

.................................................................................................................................................................................

................................................................................................................................................................................

ადმინისტრაციულ სამართალდამრღვევს უფლება აქვს გაეცნოს საქმის მასალებს, მისცეს ახსნა-განმარტებანი, წარადგინოს მტკიცებულებანი, განაცხადოს შუამდგომლობანი; საქმის განხილვისას ისარგებლოს ადვოკატის იურიდიული დახმარებით; გამოვიდეს მშობლიურ ენაზე და თუ არ იცის მიმდინარე წარმოების ენა, ისარგებლოს თარჯიმნის მომსახურებით; გაასაჩივროს საქმის გამო მიღებული დადგენილება. ადმინისტრაციული სამართალდარღვევის საქმე განიხილება იმ პირის თანდასწრებით, რომელიც მიცემულია ადმინისტრაციულ პასუხისგებაში. ამ პირის დაუსწრებლად საქმე შეიძლება განხილულ იქნეს მხოლოდ ისეთ შემთხვევებში, როცა არის ცნობა მისთვის საქმის განხილვის ადგილისა და დროის დროული შეტყობინების შესახებ და მისგან არ შემოსულა შუამდგომლობა საქმის განხილვის გადადების თაობაზე.

ოქმის შემდგენი: /......................................../                           მოწმე: /........................................./

                                            (ხელმოწერა)                                                                 (ხელმოწერა)

ოქმის შემდგენი: /......................................../                                    

                                            (ხელმოწერა)

დამრღვევი:   /.........................................../                       მოწმე: /......................................./

                                      (ხელმოწერა)                                                             (ხელმოწერა)

 

შენიშვნა: ...........................................................................................................................................................................

...................................................................................................................................................................................................

...................................................................................................................................................................................................

...................................................................................................................................................................................................

..................................................................................................................................................................................................

 

დანართი №2                                 

 

დადგენილება №

გაფრთხილების სახით ადმინისტრაციული სახდელის

დადების შესახებ 

                                          ---------------      

----------------------- 20  წ.                                 ადგილი               

1. დადგენილების გამომტანი ორგანო (თანამდებობის პირი):

.......................................................................................................................................................................

.......................................................................................................................................................................

 

2. საქმის განხილვის თარიღი: .......................................................................................................

 

3. ცნობები პირის შესახებ, რომლის მიმართ განიხილება საქმე: ............................................

.......................................................................................................................................................................

4. საქმის განხილვისას დადგინდა შემდეგი გარემოებები: ................................................................

.......................................................................................................................................................................

.......................................................................................................................................................................

.......................................................................................................................................................................

5. ზემოაღნიშნულის საფუძველზე ვიხელმძღვანელე რა საქართველოს ადმინისტრაციულ სამართალდარღვევათა კოდექსის . . . . . . მუხლით

დ ა ვ ა დ გ ი ნ ე:

6. --------------------------------------------------------- დაედოს ადმინისტრაციული სახდელი – გაფრთხილება.

(სამართალდარღვევის ჩამდენი პირის დასახელება)

7. იგივე ქმედება, ჩადენილი განმეორებით, გამოიწვევს ფიზიკური პირის დაჯარიმებას 100 ლარის ოდენობით, იურიდიული პირისა და დაწესებულების დაჯარიმებას – 15000 ლარის ოდენობით.

8. სპეციალური საექსპერტო დაწესებულებისა (ექსპერტისა) და თარჯიმნისათვის ასანაზღაურებული მომსახურების ხარჯების კომპენსაციის საკითხი: -------------------------------------------------------------------------

-------------------------------------------------------------------------------------------------

9. დადგენილება შეიძლება გასაჩივრდეს მისი გამოტანიდან 10 დღის ვადაში საქართველოს ენერგეტიკისა და წყალმომარაგების მარეგულირებელ ეროვნულ კომისიაში.

 

 უფლებამოსილი პირის ხელმოწერა:               ----------------------------------------------------

 

დანართი №3                                 

დადგენილება №

დაჯარიმების სახით ადმინისტრაციული სახდელის

დადების შესახებ 

                                        

---------------

----------------------- 20  წ.                                        ადგილი             

 

1. დადგენილების გამომტანი ორგანო (თანამდებობის პირი): ..............................................

.......................................................................................................................................................................

 

2. საქმის განხილვის თარიღი: ............................................................................................

 

3. ცნობები პირის შესახებ, რომლის მიმართ განიხილება საქმე: .............................................

.......................................................................................................................................................................

4. საქმის განხილვისას დადგინდა შემდეგი გარემოებები: ...................................................

.......................................................................................................................................................................

.......................................................................................................................................................................

........................................................................................................................................................................

5. ზემოაღნიშნულის საფუძველზე ვიხელმძღვანელე რა საქართველოს ადმინისტრაციულ სამართალდარღვევათა კოდექსის . . . . . . მუხლით

დ ა ვ ა დ გ ი ნ ე:

6. -------------------------------------------- დაედოს ადმინისტრაციული სახდელი – ჯარიმა. ------ ოდენობით.

(სამართალდარღვევის ჩამდენი პირის დასახელება)

 

7. სპეციალური საექსპერტო დაწესებულებისა (ექსპერტისა) და თარჯიმნისათვის ასანაზღაურებული მომსახურების ხარჯების კომპენსაციის საკითხი: -------------------------------------------------------------------------

------------------------------------------------------------------------

8. დადგენილება შეიძლება გასაჩივრდეს მისი გამოტანიდან 10 დღის ვადაში საქართველოს ენერგეტიკისა და წყალმომარაგების მარეგულირებელ ეროვნულ კომისიაში.

 

 უფლებამოსილი პირის ხელმოწერა:               --------------------------------------------------------

 

                                  

  დანართი №4

მკაცრი აღრიცხვის ფორმის ჩამოწერის აქტი №

 

      „-----“ ------------------------------------ 20 წელი

 

გამოსაყენებლად უვარგისი მკაცრი აღრიცხვის ფორმის ჩამოწერის შესახებ

 

№	მკაცრი აღრიცხვის ფორმის სახე	რაოდენობა	მკაცრი აღრიცხვის ფორმის სტამბური ნომერი	მკაცრი აღრიცხვის ფორმის სარეგისტრაციო ნომერი
1
2
3

 

 

 

კომისია ხელმოწერით ვადასტურებთ აქტის მიხედვით წარმოდგენილი გამოსაყენებლად უვარგისი მკაცრი აღრიცხვის ფორმის ნიმუშების ჩამოწერის სისწორეს

 

საექსპერტო კომისიის თავმჯდომარე

წევრები:

მდივანი:

მკაცრი აღრიცხვის ფორმების შენახვა-გაცემაზე პასუხისმგებელი პირი.