საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის შექმნის შესახებ

საქართველოს მთავრობის

დადგენილება №108

2004 წლის 15 ნოემბერი

ქ. თბილისი

საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის შექმნის შესახებ

„სახელმწიფო ვალის შესახებ“ საქართველოს კანონის 48-ე მუხლის პირველი პუნქტით აღიარებული სახელმწიფო საშინაო ვალის პრობლემების განხილვის, გადაჭრისა და რეკომენდაციების შემუშავების მიზნით:

1. შეიქმნას საქართველოს სახელმწიფო საშინაო ვალის პრობლემათა შემსწავლელი სახელმწიფო კომისია შემდეგი შემადგენლობით:

ალექსი ალექსიშვილი – საქართველოს ფინანსთა მინისტრი, კომისიის თავმჯდომარე

გიორგი არველაძე – საქართველოს ეკონომიკური განვითარების მინისტრი, კომისიის თავმჯდომარის მოადგილე

კახა ბენდუქიძე – საქართველოს სახელმწიფო მინისტრი რეფორმების კოორდინაციის საკითხებში

გიორგი უგულავა – ქ. თბილისის მერი

გია ქავთარაძე – საქართველოს იუსტიციის მინისტრი.

საქართველოს მთავრობის 2005 წლის 20 იანვრის დადგენილება №7-სსმIII, №6, 20.01.2005წ., მუხ.75

საქართველოს მთავრობის 2005 წლის 25 თებერვლის დადგენილება №33-სსმIII, №22, 25.02.2005წ., მუხ.214

საქართველოს მთავრობის 2005 წლის 15 ივლისის დადგენილება №116-სსმIII, №85, 19.07.2005წ., მუხ.973

საქართველოს მთავრობის 2006 წლის 12 იანვრის დადგენილება №1-სსმIII, №5, 13.01.2006წ., მუხ.30

საქართველოს მთავრობის 2006 წლის 22 ნოემბრის დადგენილება №217-სსმIII, №157, 22.11.2006წ., მუხ.2164

2. ეთხოვოთ საქართველოს პარლამენტის საფინანსო-საბიუჯეტო კომიტეტის თავმჯდომარეს ი. კოვზანაძეს, საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარეს ნ. ლეკიშვილს, საქართველოს კონტროლის პალატის თავმჯდომარეს ზ. სოსელიას, საქართველოს ეროვნული ბანკის პრეზიდენტს რ. გოცირიძეს მონაწილეობა მიიღონ სახელმწიფო საშინაო ვალის პრობლემათა შემსწავლელი სახელმწიფო კომისიის მუშაობაში წევრობის სტატუსით

საქართველოს მთავრობის 2005 წლის 14 აპრილის დადგენილება №70-სსმIII, №45, 18.04.2005წ., მუხ.464

3. კომისიის უფლებამოსილების ვადა განისაზღვროს 2006 წლის 31 დეკემბრამდე.

საქართველოს მთავრობის 2006 წლის 26 აპრილის დადგენილება №87-სსმIII, №59, 28.04.2006წ., მუხ.776

4. დამტკიცდეს საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის თანდართული დებულება.

პრემიერ-მინისტრი ზ. ჟვანია

შეტანილი ცვლილებები:

1.საქართველოს მთავრობის 2005 წლის 20 იანვრის დადგენილება №7-სსმIII, №6, 20.01.2005წ., მუხ.75

2.საქართველოს მთავრობის 2005 წლის 25 თებერვლის დადგენილება №33-სსმIII, №22, 25.02.2005წ., მუხ.214

3.საქართველოს მთავრობის 2005 წლის 14 აპრილის დადგენილება №70-სსმIII, №45, 18.04.2005წ., მუხ.464

4.საქართველოს მთავრობის 2005 წლის 15 ივლისის დადგენილება №116-სსმIII, №85, 19.07.2005წ., მუხ.973

5.საქართველოს მთავრობის 2006 წლის 12 იანვრის დადგენილება №1-სსმIII, №5, 13.01.2006წ., მუხ.30

6.საქართველოს მთავრობის 2006 წლის 26 აპრილის დადგენილება №87-სსმIII, №59, 28.04.2006წ., მუხ.776

7.საქართველოს მთავრობის 2006 წლის 22 ნოემბრის დადგენილება №217-სსმIII, №157, 22.11.2006წ., მუხ.2164

საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის

დ ე ბ უ ლ ე ბ ა

    მუხლი 1. ზოგადი დებულებანი

საქართველოს სახელმწიფო საშინაო ვალის პრობლემათა შემსწავლელი სახელმწიფო კომისია (შემდგომში – კომისია) თავისი საქმიანობისას ხელმძღვანელობს საქართველოს კანონებითა და კანონქვემდებარე აქტებით, „სახელმწიფო ვალის შესახებ“ საქართველოს კანონით, საქართველოს პრეზიდენტის ბრძანებულებებით, საქართველოს მთავრობის დადგენილებებითა და ამ დებულებით.

    მუხლი 2. კომისიის ძირითადი ამოცანები და ფუნქციები

1. კომისია შეიმუშავებს „სახელმწიფო ვალის შესახებ“ საქართველოს კანონის 48-ე მუხლის პირველი პუნქტით აღიარებული სახელმწიფო საშინაო ვალის ანაზღაურების მექანიზმთან დაკავშირებულ რეკომენდაციებს და გადაწყვეტილების მისაღებად წარუდგენს მათ საქართველოს მთავრობასა და საქართველოს პარლამენტს.

2. კომისია განიხილავს ზემოთ აღნიშნული საქართველოს სახელმწიფო საშინაო ვალის მართვასთან დაკავშირებულ საკითხებს.

    მუხლი 3. კომისიის უფლებამოსილება

1. კომისია უფლებამოსილია:

ა) მოითხოვოს და მიიღოს სამინისტროებიდან, უწყებებიდან, საწარმოებიდან და ორგანიზაციებიდან სახელმწიფო საშინაო ვალის და მის მართვასთან დაკავშირებით მუშაობისათვის საჭირო დოკუმენტები და ცნობები;

ბ) შექმნას სამუშაო ჯგუფი, რომლის შემადგენლობაში შევლენ შესაბამისი სამინისტროების, უწყებების, ორგანიზაციების სპეციალისტები და დამოუკიდებელი ექსპერტები ეკონომიკურ საკითხებში;

გ) საჭიროების შემთხვევაში თავის სხდომაზე მოიწვიოს სამინისტროების, უწყებების, საწარმოებისა და ორგანიზაციების დაინტერესებული და პასუხისმგებელი პირები.

2. კომისია უფლებამოსილი არ არის განიხილოს საკითხები, რომლებიც არ ეხება „სახელმწიფო ვალის შესახებ“ საქართველოს კანონის 48-ე მუხლის პირველი პუნქტით აღიარებულ სახელმწიფო საშინაო ვალის პრობლემებს.

    მუხლი 4. კომისიის საქმიანობის ზოგადი წესი და ხელმძღვანელობა

1. კომისიის სხდომა იმართება თვეში ერთხელ, საჭიროების შემთხვევაში კომისიის თავმჯდომარე უფლებამოსილია მოიწვიოს რიგგარეშე სხდომა.

2. კომისიის სხდომა უფლებამოსილია, თუ მას ესწრება კომისიის წევრთა სრული შემადგენლობის ნახევარი.

3. კომისია საოქმო გადაწყვეტილებით სამუშაო ჯგუფს ავალებს შეისწავლოს „სახელმწიფო ვალის შესახებ“ საქართველოს კანონის 48-ე მუხლის პირველი პუნქტით აღიარებული სახელმწიფო საშინაო ვალთან დაკავშირებული მასალები და მოამზადოს კომისიის სხდომაზე განსახილველი გადაწყვეტილებების პროექტები.

4. კომისია სხდომაზე განიხილავს სამუშაო ჯგუფის მიერ შემუშავებულ პროექტებს და იღებს შესაბამის გადაწყვეტილებას.

5. კომისიის სხდომის გადაწყვეტილება მიღებულად ჩაითვლება, თუ მას მხარს უჭერს დამსწრე წევრთა ნახევარზე მეტი.

6. კომისიის საბოლოო დასკვნას, წინადადებასა და გადაწყვეტილებას ხელს აწერს კომისიის ყველა წევრი.

7. კომისია მიღებული გადაწყვეტილების საფუძველზე შემუშავებული ნორმატიული აქტების პროექტებს დადგენილი წესით გადაწყვეტილების მისაღებად წარუდგენს საქართველოს მთავრობასა და საქართველოს პარლამენტს.

8. საქართველოს სახელმწიფო საშინაო ვალის პრობლემათა შემსწავლელ სახელმწიფო კომისიას ხელმძღვანელობს და კომისიის სხდომებს უძღვება კომისიის თავმჯდომარე, მისი არყოფნის შემთხვევაში – კომისიის თავმჯდომარის მოადგილე.

 

Annotate