საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის შექმნის შესახებ

საქართველოს პრეზიდენტის

ბრძანებულება №350

2000 წლის 4 აგვისტო

ქ. თბილისი

საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის შექმნის შესახებ

„საქართველოს ჯანმრთელობის დაცვის ობიექტების პრივატიზაციის დაჩქარების შესახებ“ საქართველოს პრეზიდენტის 1998 წლის 31 ოქტომბრის №615 ბრძანებულებიდან და „საქართველოს 2000 წლის სახელმწიფო ბიუჯეტის შესახებ“ საქართველოს კანონიდან გამომდინარე:

1. შეიქმნას საჯარო სამართლის იურიდიული პირი – საქართველოს საავადმყოფოთა რესტრუქტურიზაციის ფონდი.

2. დამტკიცდეს საქართველოს საავადმყოფოთა რესტრუქტურიზაციის ფონდის თანდართული დებულება.

3. დამტკიცდეს საქართველოს საავადმყოფოთა რესტრუქტურიზაციის ფონდის სამეთვალყურეო საბჭოს შემადგენლობა თანდართული სიის მიხედვით.

4. საქართველოს ა და მსოფლიო ბანკის საერთაშორისო განვითარების ასოციაციას შორის განვითარების საკრედიტო ხელშეკრულების (სტრუქტურული რეფორმების ხელშეწყობის პროექტი) პირობებიდან გამომდინარე, საქართველოს სახელმწიფო ქონების მართვის სამინისტრომ უზრუნველყოს ჯანმრთელობის დაცვის ობიექტების პრვატიზაციისა და იჯარისაგან შემოსული თანხების პირდაპირ ჩარიცხვა ფონდის ანგარიშზე.

5. საქართველოს ფინანსთა სამინისტრომ (ზ. ნოღაიდელი):

ა) ერთ თვეში შეიმუშაოს და წარმოადგინოს შესაბამისი კანონპროექტები „საბიუჯეტო სისტემისა და საბიუჯეტო უფლებამოსილებათა შესახებ“ და „საქართველოს 2000 წლის სახელმწიფო ბიუჯეტის შესახებ“ საქართველოს კანონებში ცვლილებების შეტანის თაობაზე;

ბ) ერთ თვეში წარმოადგინოს სათანადო რეკომენდაციები ფონდის სამეურნეო საქმიანობისათვის აუცილებელი სახსრების გამოსაძებნად.

6. საქართველოს შრომის, ჯანმრთელობისა და სოციალური დაცვის სამინისტრომ (ა.ჯორბენაძე) სახელმწიფო ქონების მართვის სამინისტროსთან (მ. უკლება) შეთანხმებით ერთ თვეში უზრუნველყოს საქართველოს საავადმყოფოთა რესტრუქტურიზაციის ფონდისათვის შესაბამისი ქონების გამოყოფა.

7. საქართველოს საავადმყოფოთა რესტრუქტურიზაციის ფონდის საქმიანობის სახელმწიფო კონტროლი განახორციელოს საქართველოს შრომის, ჯანმრთელობისა და სოციალური დაცვის სამინისტრომ.

8. საქართველოს საავადმყოფოთა რესტრუქტურიზაციის ფონდის სამეთვალყურეო საბჭომ საქართველოს შრომის,  ჯანმრთელობისა და სოციალური დაცვის სამინისტროსთან ერთად საქართველოს პრეზიდენტს წელიწადში ორჯერ წარუდგინოს ანგარიში გაწეული მუშაობის შესახებ.

ე. შევარდნაძე

შეტანილი ცვლილებები:

1. საქართველოს პრეზიდენტის 2002  წლის 5 მარტის ბრძანებულება №98 - სსმIII,№24,12.03.2002წ., მუხ.196

2. საქართველოს პრეზიდენტის 2005  წლის 24 მარტის ბრძანებულება №166 - სსმIII,№35,28.03.2005წ., მუხ.352

3. საქართველოს პრეზიდენტის 2006  წლის 30 იანვრის ბრძანებულება №87 - სსმIII,№14,03.02.2006წ., მუხ.160

4. საქართველოს პრეზიდენტის 2006  წლის 26  ოქტომბრის ბრძანებულება №630 - სსმIII,№147,30.10.2006წ., მუხ.2033

5. საქართველოს პრეზიდენტის 2006  წლის 10 ნოემბრის ბრძანებულება №684 - სსმIII,№152,13.11.2006წ., მუხ.2114

საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის დებულება

 

1. ზოგადი დებულებები

1. საქართველოს საავადმყოფოთა რესტრუქტურიზაციის ფონდი (შემდგომში – ფონდი) შექმნილია „საქართველოს 2000 წლის სახელმწიფო ბიუჯეტის შესახებ“ საქართველოს კანონისა და „საჯარო სამართლის იურიდიული პირის შესახებ“ საქართველოს კანონის საფუძველზე.

2. ფონდი არის საჯარო სამართლის იურიდიული პირი, რომელიც პასუხისმგებელია ფონდის საკუთრებაში არსებულ ქონებისა და ფულადი სახსრების მიზნობრივად და სწორად ხარჯვისათვის. ფონდს აქვს განკერძოებული ქონება, იძენს ქონებრივ და პირად არაქონებრივ უფლებებს, არის მოსარჩელე და მოპასუხე სასამართლოში.

3. ფონდი თავის საქმიანობაში ხელმძღვანელობს  საქართველოს კონსტიტუციით, საქართველოს კანონებით, საქართველოს პრეზიდენტის ბრძანებულებებითა და განკარგულებებით, საქართველოს პარლამენტის დადგენილებებით, სხვა  ნორმატიული აქტებით, ამ დებულებით და ფონდის სამეთვალყურეო საბჭოს მიერ დამტკიცებული „სამოქმედო სახელმძღვანელოს“ მიხედვით.

4. ფონდს აქვს დამოუკიდებელი ბალანსი, საბანკო ანგარიში, ბეჭედი და იურიდიული პირის ყველა სხვა ატრიბუტი.

5. ფონდის იურიდიული მისამართია: ქ. თბილისი, ივანე ჯავახიშვილის ქ. №51.

 

II. ფონდის მიზანი, ფუნქციები და ამოცანები

6. ფონდის მიზანია საკუთარი დაფინანსების ფარგლებში სახელმწიფო საკუთრებაში არსებული და სახელმწიფოს წილობრივი მონაწილეობით შექმნილი ჯანმრთელობის და სოციალური დაცვის დაწესებულებების, აგრეთვე საქართველოს შრომის, ჯანმრთელობისა და სოციალური დაცვის სამინისტროს სისტემაში შემავალი დაწესებულებების ტექნიკური  მდგომარეობის გაუმჯობესება, მათი აღჭურვა და რეკონსტრუქცია/ რეაბილიტაცია.

საქართველოს პრეზიდენტის 2006  წლის 26  ოქტომბრის ბრძანებულება №630 - სსმIII,№147,30.10.2006წ., მუხ.2033

საქართველოს პრეზიდენტის 2006  წლის 10 ნოემბრის ბრძანებულება №684 - სსმIII,№152,13.11.2006წ., მუხ.2114

7. ფონდის ფუნქციები და ამოცანებია:

ა) (ამოღებულია);

ბ) სახელმწიფო ბიუჯეტიდან მიღებული ფინანსების მრთვა, მოქმედი კანონმდებლობითა და ამ დებულებით გათვალისწინებული რესურსების მობილიზება, პროგრამების განხორციელება და დაფინანსება;

გ) (ამოღებულია);

დ) განსაზღვრული სამედიცინო დაწესებულებების ხანდაზმულთა და სოციალურად დაუცველთა დაწესებულებად გარდაქმნის  პროცესის მართვა;

ე) საზოგადოებრივ სექტორში დარჩენილ სამედიცინო დაწესებულებათა აღდგენის, აღჭურვის, რესტრუქტურიზაციისა და საჭიროების შემთხვევაში რეორგანიზაციის პროცესების მართვაში მონაწილეობა და აუცილებლობის შემთხვევაში აღნიშნული პროცესების უშუალო მართვა, აგრეთვე, დარჩენილი ს ამედიცინო დაწესებულებების მართვის სისტემის სრულყოფა;

   ვ) ჯანმრთელობისა და სოციალური დაცვის დაწესებულებათა რესტრუქტურიზაციისა და რეაბილიტაციის შესაბამისი პროგრამის ფარგლებში ადამიანურ რესურსებთან დაკავშირებულ ისეთ ღონისძიებებში მონაწილეობა, როგორიცაა კადრების ოპტიმიზაცია, მომზადება, გადაადგილება და სხვ. აგრეთვე ჯანმრთელობისა და სოციალური დაცვის დაწესებულებებთან დაკავშირებული კონკრეტული პროგრამებისა და პროექტების განხორციელება და მათი მართვა, კომპეტენციის ფარგლებში;

   ზ) ჯანმრთელობისა და სოციალური დაცვის დაწესებულებების რესტრუქტურიზაციასთან და რეაბილიტაციასთან დაკავშირებით საზოგადოების ინფორმირება კომპეტენციის ფარგლებში;“;

თ) ზემოთ მოყვანილი ოპერაციების შესრულების მიზნით ორგანიზაციისა და მმართველობის შიდა სისტემის შექმნა, ორგანიზაციის დაკომპლექტება კვალიფიციური კადრებით, თანამშრომელთა მოტივაციის, ინიციატივისა და დისციპლინის უზრუნველყოფა,თანამშრომელთა საქმიანობის დაგეგმვის, კონტროლისა და ანგარიშგების ეფექტიანი ფორმების განხორციელება;

     ი) სახელმწიფო ბიუჯეტიდან და საქართველოს კანონმდებლობით დადგენილი წესით მიღებულ სახსრებს ფონდი იყენებს შემდეგი მიზნებისათვის:

   ი.ა) ჯანმრთელობისა და სოციალური დაცვის დაწესებულებათა ინფრასტრუქტურის გაუმჯობესებისა და რეაბილიტაციისათვის;

   ი.ბ) ჯანმრთელობისა და სოციალური დაცვის დაწესებულებათა სამედიცინო აპარატურითა და საჭირო ინვენტარით აღჭურვისათვის;

   ი.გ) ჯანმრთელობისა და სოციალური დაცვის დაწესებულებებში ადამიანური რესურსების ოპტიმიზაციის ღონისძიებების დაფინანსებისათვის;

ი.დ) ჯანმრთელობისა და სოციალური დაცვის დაწესებულებების, აგრეთვე საქართველოს შრომის, ჯანმრთელობისა და სოციალური დაცვის სამინისტროს სისტემაში შემავალი  დაწესებულებების  რესტრუქტურიზაცია/რეაბილიტაციასთან დაკავშირებული ღონისძიებების დაფინანსებისათვის;

ი.ე) ფონდის საოპერაციო ხარჯების დასაფარავად.

საქართველოს პრეზიდენტის 2005  წლის 24 მარტის ბრძანებულება №166 - სსმIII,№35,28.03.2005წ., მუხ.352

საქართველოს პრეზიდენტის 2006  წლის 26  ოქტომბრის ბრძანებულება №630 - სსმIII,№147,30.10.2006წ., მუხ.2033

საქართველოს პრეზიდენტის 2006  წლის 10 ნოემბრის ბრძანებულება №684 - სსმIII,№152,13.11.2006წ., მუხ.2114

 

III. ფონდის ფინანსები და ქონება

8. ფონდის ფინანსები იქმნება:

ა) სახელმწიფო ბიუჯეტიდან დადგენილი წესით მიღებული თანხებით;

ბ) ჯანმრთელობის დაცვის ღონისძიებებისათვის სახელმწიფო ბიუჯეტიდან გამოყოფილი დაფინანსების ფარგლებში დადგენილი წესით მიღებული სხვა მიზნობრივი სახსრებით;

გ) გრანტებით, ტექნიკური დახმარებებით, უცხოური კრედიტებითა და ინვესტიციებით;

დ) საქველმოქმედო შენატანებით;

      ე) ფონდის ქონება შედგება მისთვის უსასყიდლოდ ან სასყიდლით გადაცემული ქონებისაგან. სახელმწიფო ქონება ფონდს გადაეცემა საქართველოს მოქმედი კანონმდებლობის შესაბამისად.

საქართველოს პრეზიდენტის 2005  წლის 24 მარტის ბრძანებულება №166 - სსმIII,№35,28.03.2005წ., მუხ.352

საქართველოს პრეზიდენტის 2006  წლის 26  ოქტომბრის ბრძანებულება №630 - სსმIII,№147,30.10.2006წ., მუხ.2033

 

IV.ფონდის სტრუქტურა და მართვა

9. ფონდის ხელმძღვანელი ორგანოებია:

ა) ფონდის სამეთვალყურეო საბჭო, რომელსაც ხელმძღვანელობს სამეთვალყურეო საბჭოს თავმჯდომარე (შემდგომში – თავმჯდომარე). ს აბჭო წარმოადგენს ფონდის საქმიანობის წარმმართველ ორგანოს. სამეთვალყურეო საბოს შემადგენლობასა და თავმჯდომარეს საქართველოს შრომის, ჯანმრთელობისა და სოციალური დაცვის მინისტრის წარდგინებით ამტკიცებს საქართველოს პრეზიდენტი;

ბ) ფონდის აღმასრულებელი დირექტორი. ფონდის აღმასრულებელ დირექტორს საქართველოს შრომის, ჯანმრთელობისა და სოციალური დაცვის მინისტრის წარდგინებით თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი.

10. სამეთვალყურეო საბჭოს ფუნქციებია:

ა) ფონდის საქმიანობის ძირითად მიმართულებათა განსაზღვრა;

ბ) ფონდის  სამოქმედო სახელმძღვანელოს დამტკიცება და მასში  ცვლილებების შეტანა;

ნ) ფონდის წლიური ბიუჯეტის პროექტის განხილვა, სამუშაო  გეგმებისა და მათგან გამომდინარე ნებისმიერ ცვლილებათა დამტკიცება;

დ) ფონდის საქმიანობის წლიური და კვარტალური ანგარიშების განხილვა და მათი საქართველოს შრომის, ჯანმრთელობისა და სოციალური დაცვის სამინისტროსათვის დასამტკიცებლად წარდგენა;

ე) ამ დებულებითა და სამოქმედო სახელმძღვანელოში განსაზღვრული სხვა უფლებებით სარგებლობა.

11. სამეთვალყურეო საბ ჭ ოს ყოველ წევრს აქვს ერთი ხმის უფლება.

12. ფონდის აღმასრულებელი დირექტორი, რომელიც არ არის სამეთვალყურეო საბჭოს წევრი, მონაწილეობს სამეთვალყურეო საბჭოს სხდომებში ხმის უფლების გარეშე.

13. სამეთვალყურეო საბჭოს რეგულარული სხდომები იმართება სამ თვეში ერთხელ მაინც. რიგგარეშე სხდომები იმართება თავმჯდომარის ინიციატივით ან სამეთვალყურეო საბჭოს ორი წევრის მოთხოვნით.

14. სამეთვალყურეო საბჭოს სხდომა უფლებამოსილია, თუ მას ესწრება სამეთვალყურეო საბჭოს წევრთა ნახევარზე მეტი. საბჭოს წევრის სხდომაზე არდასწრების შემთხვევაში იგი ვალდებულია  სხდომამდე სულ ცოტა სამი დღით ადრე წერილობით აცნობოს საბ ჭ ოს თავმჯდომარეს თავისი შეხედულებები განსახილველი საკითხის შესახებ.

15. ს აბოს სხდომის მოწვევა არ არის აუცილებელი, როცა მისი ყველა წევრი წერილობით ეთანხმება განსახილველ საკითხებს.

16. სამეთვალყურეო საბჭოს სხდომაზე ნებისმიერი გადაწყვეტილება მიიღება დამსწრე წევრთა ხმების უბრალო უმრავლესობით.  ხმების გაყოფის შემთხვევაში გადამწყვეტი ხმის უფლება აქვს თავმჯდომარეს.

17. საბჭოს საქმიანობაში მონაწილეობის მისაღებად  (ხმის უფლების გარეშე) შეიძლება მოწვეული ქნენ წარმომადგენლობით ორგანოთა და სხვა უწყებათა, აგრეთვე მასობრივი ინფორმაციის საშუალებათა წარმომადგენლები.

18. საბჭოს წევრები საბჭოს საქმიანობაში მონაწილეობისას არ იღებენ რაიმე ანაზღაურებას.

19. სამეთვალყურეო საბჭოს გადაწყვეტილება ფორმდება ოქმით. სამეთვალყურეო  საბჭოს გადაწყვეტილების შესრულებას ახორცილებს ფონდის აღმასრულებელი დირექტორი.

20. ფონდის ყოველდღიურ საქმიანობას ხელმძღვანელობს აღმასრულებელი დირექტორი, რომელიც პასუხისმგებელია ფონდის საქმიანობისათვის.

21. აღმასრულებელი დირექტორი პასუხისმგებელია სამეთვალყურეო საბჭოს წინაშე.

22. ფონდის აღმასრულებელ დირექტორს ჰყავს პირველი მოადგილე და მოადგილე, რომელთაც საქართველოს შრომის, ჯანმრთელობისა და სოციალური დაცვის მინისტრთან შეთანხმებით თანამდებობაზე ნიშნავს და თანამდებობიდან ათავისუფლებს ფონდის აღმასრულებელი დირექტორი. აღმასრულებელი დირექტორის ადგილზე არყოფნის შემთხვევაში მის მოვალეობას ასრულებს დირექტორის პირველი მოადგილე ან დირექტორის ბრძანებით მისი მოადგილე.

23. აღმასრულებელი დირექტორი:

ა) პერსონალურად ხელმძღვანელობს ფონდის საქმიანობას და აწესრიგებს იმ საკითხებს, რომლებიც მიეკუთვნება ფონდის გამგებლობის სფეროს;

ბ) მოქმედებს ფონდის სახელით და წარმოადგენს მის ინტერესებს წერილობით მინიებული უფლებამოსილების გარეშე;

გ) ასრულებს თავის მოვალეობებს სამოქმედო სახელმძღვანელოში გათვალისწინებული პირობების შესაბამისად და ამ დებულებით დასახული მიზნების მისაღწევად და ამოცანების შესასრულებლად;

დ)  ანაწილებს სამუშაოს ძირითად პერსონალს შორის საქმიანობის სფეროების მიხედვით;

ე) განკარგავს ფონდის აქტივებსა და ფინანსურ რესურსებს სამოქმედო სახელმძღვანელოსა და ფინანსთა სამინისტროს მიერ დამტკიცებული ბიუჯეტის შესაბამისად;

ვ) ხსნის საბანკო ანგარიშებს;

ზ) ადგენს თანამშრომლებისათვის ხელფასის ოდენობას სამოქმედო სახელმძღვანელოსა და ფინანსთა სამინისტროსთან შეთანხმებით დამტკიცებული ბიუჯეტის შესაბამისად;

თ) სარგებლობს ფონდის საქმიანობისათვის საჭირო სხვა უფლებებით, თუ ეს უფლებები არ ეწინააღმდეგება საქართველოში მოქმედ კანონმდებლობას.

24. ფონდმა დადგენილი წესით საქართველოს შრომის, ჯანმრთელობისა და სოციალური დაცვის სამინისტროს თანხმობით შეიძლება განახორციელოს შემდეგი მოქმედებები:

ა) სესხის აღება;

ბ) თავდებობა;

გ) საშტატო ნუსხისა და შრომის ანაზღაურების ფონდის განსაზღვრა;

დ) შრომის ანაზღაურების ფონდის ფარგლებში თანამშრომელთა თანამდებობრივი განაკვეთების განსაზღვრა და საორგანიზაციო-ადმინისტრაციული ხარჯების ხარჯთა ნუსხის დამტკიცება.

25. ფონდმა დადგენილი წესით საქართველოს შრომის, ჯანმრთელობისა და სოციალური დაცვის სამინისტროსა და საქართველოს ეკონომიკური განვითარების სამინისტროს თანხმობით შეიძლება განახორციელოს ქონების შეძენა, გასხვისება და დატვირთვა.

საქართველოს პრეზიდენტის 2005  წლის 24 მარტის ბრძანებულება №166 - სსმIII,№35,28.03.2005წ., მუხ.352

26. ფონდის საქმიანობა პერიოდულად შუქდება მასობრივი ინფორმაციის საშუალებებით.

 

V. ფონდის საქმიანობის სახელმწიფო კონტროლი, აღრიცხვა და ანგარიშგება

27. ფონდის საქმიანობასა და დასახული მიზნების განხორციელებაზე სახელმწიფო კონტროლს ახორციელებს საქართველოს შრომის, ჯანმრთელობისა და სოციალური დაცვის სამინისტრო.

28. ფონდის მიერ განხორციელებული საქმიანობის კანონიერების, მიზანშეწონილობის, ეფექტიანობისა და საფინანსო-ეკონომიკური საქმიანობის ზედამხედველობისათვის საქართველოს შრომის, ჯანმრთელობისა და სოციალური დაცვის სამინისტროს უფლება აქვს:

ა) მოითოვოს საჭირო მასალები და ინფორმაცია;

ბ) შეაჩეროს ან გააუქმოს ფონდის არამართლზომიერი გადაწყვეტილებები;

გ) ფონდი ანგარიშვალდებულია საქართველოს შრომის, ჯანმრთელობისა და სოციალური დაცვის სამინისტროს წინაშე.

29. ფონდის საფინანსო საქმიანობის აღრიცხვა, ანგარიშგება და შეფასება ხორციელდება საქართველოში მოქმედი კანონმდებლობის შესაბამისად.

 

VI. ცვლილებების შეტანა, ლიკვიდაცია და რეორგანიზაცია

30. ფონდის დებულებაში ცვლილებების შეტანა ხდება საქართველოს პრეზიდენტის ბრძანებულებით.

31. ფონდის ლიკვიდაცია და რეორგანიზაცია ხდება საქართველოს კანონმდებლობით დადგენილი წესით. ფონდის ლიკვიდაციის საფუძველი შეიძლება იყოს მის მიერ დასახული მიზნის მიღწევა, ან მიზნის მიღწევის შეუძლებლობა.

საქართველოს საავადმყოფოთა რესტრუქტურიზაციის ფონდის სამეთვალყურეო საბჭოს შემადგენლობა

ვლადიმერ ჭიპაშვილი – საქართველოს შრომის, ჯანმრთელობისა და სოციალური დაცვის მინისტრი, საბჭოს თავმჯდომარე

გრიგოლ გობეჯიშვილი – საქართველოს ფინანსთა მინისტრის მოადგილე

მანანა მაისურაძე – საქართველოს ექიმთა თავისუფალი პროფკავშირის „სოლიდარობის“ წევრი

კახი პაპოშვილი – ჯანმრთელობის ეროვნული ინსტიტუტის დირექტორი

ზაზა ჭელიძე– საქართველოს ეკონომიკური განვითარების მინისტრის მოადგილე

მამუკა ჯაფარიძე – საქართველოს ჯანმრთელობისა და სოციალური პროექტების განმახორციელებელი ცენტრის დირექტორის მოადგილე.

საქართველოს პრეზიდენტის 2002  წლის 5 მარტის ბრძანებულება №98 - სსმIII,№24,12.03.2002წ., მუხ.196

 საქართველოს პრეზიდენტის 2006  წლის 30 იანვრის ბრძანებულება №87 - სსმIII,№14,03.02.2006წ., მუხ.160

 

 

 

Annotate