საერთო სასამართლოების მოსამართლეთა რეზერვის შესახებ დებულების დამტკიცების თაობაზე

საქართველოს პრეზიდენტის

ბრძანებულება №465

2000 წლის 27 ოქტომბერი

ქ. თბილისი

საერთო სასამართლოების მოსამართლეთა რეზერვის შესახებ დებულების დამტკიცების თაობაზე

„საერთო სასამართლოების შესახებ“ საქართველოს ორგანული კანონის 54^​1 მუხლის მე-2 პუნქტის საფუძველზე დამტკიცდეს დებულება „საერთო სასამართლოების მოსამართლეთა რეზერვის შესახებ“.

ე. შევარდნაძე

შეტანილი ცვლილებები:

1. საქართველოს პრეზიდენტის 2006 წლის 11 ივლისის ბრძანებულება №409-სსმIII,№92,12.07.2006წ.,

მუხ.1229

დებულება საერთო სასამართლოების მოსამართლეთა რეზერვის შესახებ

    მუხლი 1. ზოგადი დებულებანი

ეს დებულება განსაზღვრავს საერთო სასამართლოების (გარდა საქართველოს უზენაესი სასამართლოსი) მოსამართლეთა რეზერვის ფორმირების წესსა და რეზერვში ჩარიცხულ მოსამართლეთა უფლება-მოვალეობებს.

    მუხლი 2. მოსამართლეთა რეზერვი და მისი შექმნის მიზანი

1. საერთო სასამართლოების მოსამართლეთა რეზერვს (შემდგომში – მოსამართლეთა რეზერვი) შეადგენენ ის მოსამართლეები, რომლებიც ვერ ახორციელებენ სამოსამართლო უფლებამოსილებას სასამართლოს ლიკვიდაციის ან რეორგანიზაციის გამო.

2. მოსამართლეთა რეზერვის შექმნის მიზანია კანონმდებლობით განსაზღვრული მოსამართლის სამოსამართლო უფლებამოსილების ვადის დაცვა და სოციალური უზრუნველყოფა.

    მუხლი 3. მოსამართლეთა რეზერვში ჩარიცხვის წესი

1. „საერთო სასამართლოების შესახებ“ საქართველოს ორგანული კანონის 54^​1 მუხლის შესაბამისად, სასამართლო წყობილების შეცვლასთან დაკავშირებით სასამართლოს ლიკვიდაციის, აგრეთვე მოსამართლის თანამდებობის შემცირების შემთხვევაში, თუ შეუძლებელია თანამდებობიდან გათავისუფლებული მოსამართლისთვის სხვა სასამართლოს მოსამართლის უფლებამოსილების განხორციელების დაკისრება ან მოსამართლე უარს განაცხადებს უფლებამოსილების დაკისრებაზე, მოსამართლე, მისი წინასწარი წერილობითი თანხმობით, სამოსამართლო უფლებამოსილების ვადის ამოწურვამდე ირიცხება მოსამართლეთა რეზერვში.

2. მოსამართლეთა რეზერვში ჩარიცხვას აწარმოებს საქართველოს იუსტიციის უმაღლესი საბჭო სასამართლოს ლიკვიდაციიდან ან მოსამართლის თანამდებობის შემცირებიდან არა უგვიანეს 3 თვისა.

3. მოსამართლეს შეუძლია უარი განაცხადოს რეზერვში ჩარიცხვაზე.

საქართველოს პრეზიდენტის 2006 წლის 11 ივლისის ბრძანებულება №409-სსმIII,№92,12.07.2006წ.,

მუხ.1229

     მუხლი 4. მოსამართლეთა რეზერვიდან გამოყვანა

1.    მოსამართლე რეზერვიდან გამოყვანილი იქნება, თუ:

ა) დაეკისრა სამოსამართლო უფლებამოსილების განხორციელება;

ბ) მის მიმართ კანონიერ ძალაში შევიდა სასამართლოს გამამტყუნებელი განაჩენი;

გ) სასამართლოს მიერ ცნობილ იქნა ქმედუუნაროდ ან შეზღუდული ქმედუნარიანობის მქონედ;

დ) მიაღწია 65 წლის ასაკს;

ე) შეუწყდა საქართველოს მოქალაქეობა;

ვ) რეზერვში ყოფნის პერიოდში ამოეწურა სამოსამართლო უფლებამოსილების ვადა;

ზ) გარდაიცვალა;

თ) განცხადებით მიმართა საქართველოს იუსტიციის უმაღლეს საბჭოს მოსამართლეთა რეზერვიდან მისი გამოყვანის შესახებ, თუ არ არსებობს ამ მუხლის „ა-ვ“ ქვეპუნქტებით გათვალისწინებული საფუძვლები.

საქართველოს პრეზიდენტის 2006 წლის 11 ივლისის ბრძანებულება №409-სსმIII,№92,12.07.2006წ.,

მუხ.1229

    მუხლი 5. სამოსამართლო უფლებამოსილების დაკისრება

1. რეზერვში ჩარიცხულ მოსამართლეს, მისი წინასწარი წერილობითი თანხმობით, საქართველოს პრეზიდენტის განკარგულებით შეიძლება ნებისმიერ დროს დაეკისროს სხვა სასამართლოს მოსამართლის უფლებამოსილების განხორციელება.

2. „საერთო სასამართლოების შესახებ“ საქართველოს ორგანული კანონის 54^​1 მუხლის მე-3 პუნქტის შესაბამისად საქართველოს იუსტიციის უმაღლესი საბჭო მოსამართლეთა რეზერვში ჩარიცხული მოსამართლისათვის სხვა სასამართლოს მოსამართლის უფლებამოსილების განხორციელების დაკისრების საკითხს იხილავს აგრეთვე ამავე კანონის 85^​2 მუხლით გათვალისწინებული სამოსამართლო უფლებამოსილების დაკისრების საკითხის გადაწყვეტისას.

3. სამოსამართლო უფლებამოსილების განხორციელების დასაკისრებლად საქართველოს იუსტიციის უმაღლესი საბჭოს მიერ მოსამართლეთა რეზერვში ჩარიცხულთაგან კანდიდატის შერჩევისას უპირატესობა ენიჭება მოსამართლეს შემდეგი კრიტერიუმების გათვალისწინებით:

ა) სპეციალობით მუშაობის გამოცდილება;

ბ) საქმიანი და მორალური რეპუტაცია;

გ) საკლასო ჩინი;

დ) სამეცნიერო ხარისხი.“;

საქართველოს პრეზიდენტის 2006 წლის 11 ივლისის ბრძანებულება №409-სსმIII,№92,12.07.2006წ.,

მუხ.1229

    მუხლი 6. მოსამართლეთა რეზერვში ჩარიცხული მოსამართლის სოციალური დაცვის გარანტიები

მოსამართლეთა რეზერვში ჩარიცხული მოსამართლე „საერთო სასამართლოების შესახებ“ საქართველოს ორგანული კანონის 54^​1 შესაბამისად სამოსამართლო უფლებამოსილების ვადის ამოწურვამდე იღებს თანამდებობრივ სარგოს კანონმდებლობით განსაზღვრული ოდენობით, ხოლო საპენსიო ასაკის მიღწევისას ენიშნება სახელმწიფო კომპენსაცია „სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონით დადგენილი წესითა და ოდენობით.

საქართველოს პრეზიდენტის 2006 წლის 11 ივლისის ბრძანებულება №409-სსმIII,№92,12.07.2006წ.,

მუხ.1229

 

Annotate