საქართველოს იუსტიციის მინისტრის სათათბირო ორგანოს – საქართველოს იუსტიციის სამინისტროს საბჭოს შექმნის შესახებ

სახელმწიფო სარეგისტრაციო კოდი 010.240.030.11.106.005.233

საქართველოს იუსტიციის მინისტრის

ბრძანება №187

2002 წლის 5 აპრილი

ქ. თბილისი

საქართველოს იუსტიციის მინისტრის სათათბირო ორგანოს – საქართველოს იუსტიციის სამინისტროს საბჭოს შექმნის შესახებ

„აღმასრულებელი ხელისუფლების სტრუქტურისა და საქმიანობის წესის შესახებ” საქართველოს 1997 წლის 15 აპრილის კანონის მე-14 მუხლის მე-3 პუნქტისა და საქართველოს პრეზიდენტის 2001 წლის 31 დეკემბრის №544 ბრძანებულებით დამტკიცებული „საქართველოს იუსტიციის სამინისტროს დებულების” 31-ე მუხლის მოთხოვნათა შესაბამისად, სამინისტროს კომპეტენციაში შემავალი საკითხების კოლეგიალურად განხილვის მიზნით,  ვბრძანებ:

მუხლი1. შეიქმნას საქართველოს იუსტიციის მინისტრის სათათბირო ორგანო – საქართველოს იუსტიციის სამინისტროს საბჭო.

მუხლი 2. დამტკიცდეს საქართველოს იუსტიციის სამინისტროს საბჭო შემდეგი შემადგენლობით:

1. საქართველოს იუსტიციის მინისტრი, საბჭოს თავმჯდომარე;

2. მინისტრის პირველი მოადგილე;

3. მინისტრის მოადგილეები;

4. აფხაზეთის ავტონომიური რესპუბლიკის იუსტიციის მინისტრი;

5. აჭარის ავტონომიური რესპუბლიკის იუსტიციის მინისტრი;

6. სასჯელაღსრულების დეპარტამენტის თავმჯდომარე;

7. სააღსრულებო დეპარტამენტის თავმჯდომარე;

8. გენერალური ინსპექციის უფროსი;

9. საკადრო საკითხთა დეპარტამენტის უფროსი;

10. ნოტარიატის დეპარტამენტის უფროსი;

11. სამედიცინო დეპარტამენტის უფროსი;

12. ეკონომიკური დეპარტამენტის უფროსი;

13. სასჯელაღსრულების სისტემის რეფორმისა და მონიტორინგის დეპარტამენტის უფროსი;

14. მოქალაქეობის, სამოქალაქო მდგომარეობის რეგისტრაციისა და იმიგრაციის საკითხთა დეპარტამენტის უფროსი;

15. პარლამენტთან ურთიერთობისა და სამართალშემოქმედების დეპარტამენტის უფროსი;

16. ნორმატიული აქტების რეგისტრაციის, კოდიფიკაციისა და სამართლებრივი ინფორმატიზაციის დეპარტამენტის უფროსი;

17. სამართლებრივი ექსპერტიზის დეპარტამენტის უფროსი;

18. არასაპატიმრო სასჯელთა აღსრულებისა და პრობაციის დეპარტამენტის უფროსი;

19. საქართველოს ნოტარიუსთა პალატის თავმჯდომარე;

20. საქართველოს იუსტიციის სამინისტროს ექსპერტიზისა და სპეციალური გამოკვლევათა ცენტრის დირექტორი;

21. „საქართველოს კანონთა წიგნისა და საქართველოს საკანონმდებლო მაცნეს“ მთავარი რედაქტორი;

22. მინისტრის აპარატის უფროსი, საბჭოს მდივანი.

საქართველოს იუსტიციის მინისტრის 2002 წლის 22 აგვისტოს ბრძანება №717-სსმIII,№85,26.08.2002წ.,მუხ.778

საქართველოს იუსტიციის მინისტრის 2002 წლის 25 დეკემბრის ბრძანება №1074-სსმIII,№125,26.12.2002წ., მუხ.1113

საქართველოს იუსტიციის მინისტრის 2003 წლის 19  აგვისტოს ბრძანება №940-სსმIII,№90,19.08.2003წ.,მუხ.768

მუხლი 3. დამტკიცდეს საქართველოს იუსტიციის მინისტრის სათათბირო ორგანოს – საქართველოს იუსტიციის სამინისტროს საბჭოს თანდართული დებულება.

მუხლი 4. ძალადაკარგულად ჩაითვალოს საქართველოს იუსტიციის მინისტრის 2001 წლის 12 მარტის №95 ბრძანება ,,საქართველოს იუსტიციის მინისტრის სათათბირო ორგანოს – საქართველოს იუსტიციის სამინისტროს საბჭოს შექმნის შესახებ.”.

მუხლი 5. ეს ბრძანება ამოქმედდეს გამოქვეყნებისთანავე.

რ. გილიგაშვილი

შეტანილი ცვლილებები:

1.საქართველოს იუსტიციის მინისტრის 2002 წლის 22 აგვისტოს ბრძანება №717-სსმIII,№85,26.08.2002წ.,მუხ.778

2.საქართველოს იუსტიციის მინისტრის 2002 წლის 25 დეკემბრის ბრძანება №1074-სსმIII,№125,26.12.2002წ., მუხ.1113

3.საქართველოს იუსტიციის მინისტრის 2003 წლის 19  აგვისტოს ბრძანება №940-სსმIII,№90,19.08.2003წ.,მუხ.768

საქართველოს იუსტიციის მინისტრის სათათბირო ორგანოს – საქართველოს იუსტიციის სამინისტროს საბჭოს დებულება

თავი I

ზოგადი დებულებანი

    მუხლი 1.

ეს დებულება განსაზღვრავს საქართველოს იუსტიციის მინისტრის სათათბირო ორგანოს – საქართველოს იუსტიციის სამინისტროს საბჭოს (შემდგომში – საბჭო) კომპეტენციას, მისი შექმნისა და საქმიანობის წესს.

    მუხლი 2.

საბჭოს მიზანია იუსტიციის სამინისტროს მმართველობის სფეროს მიკუთვნებული საკითხების კოლეგიალური განხილვის საფუძველზე სამართლებრივად სწორი და ოპტიმალური გადაწყვეტილების მისაღებად საჭირო პირობების შექმნა.

თავი II

საბჭოს კომპეტენცია

    მუხლი 3.

საბჭოს კომპეტენციას შეადგენს:

ა) სამინისტროში მომზადებული ან სამართლებრივ ექსპერტიზაზე წარმოდგენილი კანონპროექტების, აგრეთვე სხვა ნორმატიული აქტების პროექტების განხილვა;

ბ) სამართლებრივი ურთიერთდახმარების შესახებ საქართველოს საერთაშორისო ხელშეკრულებების პროექტების და საერთაშორისო კონვენციებთან საქართველოს მიერთების პრობლემატური საკითხების განხილვა;

გ) ადამიანის უფლებათა ევროპის სასამართლოში საქართველოს გენერალური წარმომადგენლის სამსახურის მიერ გაწეული საქმიანობის გაანალიზება;

დ) საააღსრულებო ბიუროების და სააღსრულებო პოლიციის ადგილობრივი განყოფილებების მუშაობის კოორდინაციასთან დაკავშირებული საკითხების განხილვა;

ე) ნოტარიუსებისა და ნოტარიუსთა პალატის საქმიანობის ზედამხედველობასთან დაკავშირებული საკითხების განხილვა;

ვ) ექსპერტიზისა და სპეციალურ გამოკვლევათა ცენტრის მუშაობასთან დაკავშირებული საკითხების განხილვა;

ზ) „საქართველოს კანონთა წიგნისა და საქართველოს საკანონმდებლო მაცნეს“ ოფიციალური გამოცემების უზრუნველყოფასთან დაკავშირებული საკითხების განხილვა;

თ) ნორმატიული აქტების რეგისტრაციის, კოდიფიკაციისა და სამართლებრივი ინფორმატიზაციის პრობლემატური საკითხების განხილვა;

ი) სასჯელაღსრულების დეპარტამენტის მუშაობასთან დაკავშირებული საკითხების განხილვა;

კ) მოქალაქეობის, იმიგრაციისა და სამოქალაქო აქტების რეგისტრაციასთან დაკავშირებული საკითხების განხილვა;

ლ) სახელმწიფო რეგისტრაციის, ლიცენზირებისა და საჯარო რეესტრის წარმოებასთან დაკავშირებული საკითხების განხილვა;

მ) იუსტიციის სამინისტროს დაქვემდებარებაში არსებული სამედიცინო დაწესებულებების მუშაობისა და მათზე ზედამხედაველობასთან დაკავშირებული საკითხების განხილვა;

ნ) იუსტიციის სამინისტროს სისტემის მოხელეთა მიერ დისციპლინისა და კანონიერების დაცვასთან დაკავშირებული საკითხების განხილვა;;

ო) სამინისტროს ტერიტორიული ორგანოების საქმიანობასთან დაკავშირებული საკითხების განხილვა;

პ) მოქალაქეთა პოლიტიკური გაერთიანებების, შემოქმედებითი კავშირებისა და ფონდების რეგისტრაციასთან დაკავშირებული დოკუმენტების შემოწმების, აგრეთვე რეგისტრირებული ორგანიზაციების საქმიანობაზე სამინისტროს მიერ კანონით დადგენილი წესით განხორციელებული კონტროლის შედეგების განხილვა;

ჟ) იუსტიციის სამინისტროს კომპეტენციაში შემავალი ნებისმიერი სხვა საკითხის განხილვა.

თავი III

საბჭოს შემადგენლობა

    მუხლი 4.

საბჭოს პერსონალურ შემადგენლობას ამტკიცებს იუსტიციის მინისტრი.

    მუხლი 5.

საბჭოს შემადგენლობაში შედიან საქართველოს იუსტიციის მინისტრის მოადგილეები და სამინისტროს სტრუქტურული ქვედანაყოფების ხელმძღვანელები, აჭარის ავტონომიური რესპუბლიკისა და აფხაზეთის ავტონომიური რესპუბლიკის იუსტიციის მინისტრები.

    მუხლი 6.

მინისტრის გადაწყვეტილებით საბჭოს შემადგენლობაში შეიძლება შეყვანილ იქნენ სამინისტროს მმართველობის სფეროში არსებული საჯარო სამართლის იურიდიული პირებისა და სახელმწიფო საქვეუწყებო დაწესებულებების ხელმძღვანელები, სამინისტროს სხვა მოხელეები, აგრეთვე პირები, რომლებიც არ არიან სახელმწიფო მოხელეები, მათი წინასწარი თანხმობით.

თავი IV

საბჭოს სხდომის მოწვევისა და გადაწყვეტილების მიღების წესი

    მუხლი 7.

საბჭოს სხდომას თავმჯდომარეობს მინისტრი – საბჭოს თავმჯდომარე, მისი არყოფნის შემთხვევაში კი – მინისტრის ერთ-ერთი მოადგილე, მინისტრთან წინასწარი შეთანხმებით.

    მუხლი 8.

საბჭოს სხდომა მოიწვევა თვეში ერთხელ. საჭიროების შემთხვევაში მინისტრის გადაწყვეტილებით შეიძლება მოწვეულ იქნეს რიგგარეშე სხდომა.

    მუხლი 9.

სხდომის მოწვევის დროსა და სხდომის დღის წესრიგს განსაზღვრავს მინისტრი.

    მუხლი 10.

საბჭოს სხდომაზე, საჭიროების შემთხვევაში, შეიძლება მოწვეულ იქნენ სხვა სამინისტროების, ორგანიზაციების წარმომადგენლები, დაინტერესებული პირები.

    მუხლი 11.

საბჭოს სხდომაზე განსახილველი საკითხების თაობაზე მომზადებული მასალები წარედგინება მინისტრის აპარატს სხდომის ჩატარებამდე 5 დღით ადრე. მინისტრის აპარატი სხდომაზე განსახილველ საკითხებს წინასწარ ათანხმებს მინისტრთან.

    მუხლი 12.

საბჭოს სხდომაზე განსახილველი საკითხების მომზადებაზე პასუხისმგებლობა ეკისრება სამინისტროს შესაბამისი სტრუქტურული ქვედანაყოფისა და მის მმართველობაში შემავალი სხვა სამსახურების ხელმძღვანელებს.

    მუხლი 13.

საბჭოს სხდომაზე გასატანად მომზადებულ მასალებში ხარვეზის აღმოჩენის შემთხვევაში, მასალა მინისტრის აპარატის მიერ უბრუნდება მის მომზადებაზე პასუხისმგებელ სამსახურს.

    მუხლი 14.

სხდომის მომზადება და ოქმის გაფორმება ევალება სხდომის მდივანს, რომელიც არ არის საბჭოს წევრი, არ სარგებლობს ხმის მიცემის უფლებით და პასუხისმგებელია მხოლოდ სხდომის ოქმის სწორად წარმოებისათვის.

    მუხლი 15.

საბჭო უფლებამოსილია, თუ სხდომას ესწრება საბჭოს წევრთა უმრავლესობა.

    მუხლი 16.

საბჭოს მიერ განხილული საკითხების თაობაზე საბოლოო გადაწყვეტილებას იღებს მინისტრი.

    მუხლი 17.

საბჭო უფლებამოსილია განხილულ საკითხებს მისცეს შემდეგი შეფასება:

ა) დადებითად შეაფასოს განხილული საკითხი;

ბ) ცნოს არასაკმარისად განხილული საკითხის ირგვლივ გაწეული საქმიანობა;

გ) უარყოფითად შეაფასოს განხილული საკითხი;

დ) ცნობად მიიღოს შესაბამისი სამსახურის მიერ წარდგენილი მასალა (ანგარიში, ინფორმაცია, პროექტი და ა.შ.)

ე) განუხილველად დატოვოს სხდომაზე წარდგენილი საკითხი;

ვ) გადადოს საკითხის განხილვა;

ზ) დამატებით მოსამზადებლად დააბრუნოს განსახილველად წარდგენილი საკითხი.

    მუხლი 18.

საბჭოს სხდომა შეიძლება გადაიდოს მინისტრის გადაწყვეტილებით.

    მუხლი 19.

საბჭოს სხდომის მიმდინარეობა, განხილული საკითხები და მიღებული გადაწყვეტილებები ფორმდება სხდომის ოქმით, რომელსაც ხელს აწერენ სხდომის თავმჯდომარე და მდივანი. სხდომის ოქმზე მიეთითება თარიღი და რიგითი ნომერი.

თავი V

დასკვნითი დებულებანი

    მუხლი 20.

სხდომაზე განსახილველად წარმოდგენილი დოკუმენტები და მასალები დაერთვება სხდომის ოქმს და ინახება სამინისტროს მთავარ კანცელარიაში, დადგენილი წესით.

    მუხლი 21.

საბჭოს მიერ მიღებული გადაწყვეტილების აღსრულებას ახორციელებენ სამინისტროს შესაბამისი სამსახურები.

    მუხლი 22.

საბჭოს ლიკვიდაციის, აგრეთვე მის შემადგენლობაში და საბჭოს საქმიანობის წესში ცვლილებების შეტანის საკითხს წყვეტს მინისტრი.

Annotate