თვითმმართველ ქალაქ რუსთავში და თბილისის მიმართულებით ადგილობრივი საქალაქო რეგულარული სამგზავრო გადაყვანის (M2 და M3 კატეგორიის ავტოსატრანსპორტო საშუალებებით) ნებართვის მაძიებელთა საკონკურსო კომისიის დებულების დამტკიცების შესახებ

თვითმმართველი ქალაქ რუსთავის საკრებულო ს

დადგენილება №90

2011 წლის 01 ივნისი

ქ. თბილისი

თვითმმართველ ქალაქ რუსთავში და თბილისის მიმართულებით ადგილობრივი საქალაქო რეგულარული სამგზავრო გადაყვანის (M₂ და M₃ კატეგორიის ავტოსატრანსპორტო საშუალებებით) ნებართვის მაძიებელთა საკონკურსო   კომისიის დებულების დამტკიცების შესახებ

 „ადგილობრივი თვითმმართველობის შესახებ“ საქართველოს ორგანული კანონის  მე-16 მუხლის მე-2 პუნქტის „მ“ ქვეპუნქტის და „ლიცენზიებისა და ნებართვების შესახებ“ საქართველოს კანონის 26² მუხლის შესაბამისად,

თვითმმართველი ქალაქი რუსთავის საკრებულო ა დ გ ე ნ ს :

    მუხლი 1

დამტკიცდეს თვითმმართველ ქალაქ რუსთავში და თბილისის მიმართულებით ადგილობრივი საქალაქო რეგულარული სამგზავრო გადაყვანის (M₂ და M₃ კატეგორიის ავტოსატრანსპორტო საშუალებებით) ნებართვის მაძიებელთა საკონკურსო კომისიის დებულება თანდართული რედაქციით.

    მუხლი 2

დადგენილება ძალაშია გამოქვეყნებისთანავე.

საკრებულოს თავმჯდომარე                           კ. გურგენიძე

 

დანართი

თვითმმართველ ქალაქ რუსთავში და თბილისის მიმართულებით საქალაქო რეგულარული სამგზავრო გადაყვანის (M² და M³ კატეგორიის ავტოსატრანსპორტო საშუალებებით) ნებართვის მაძიებელთა საკონკურსო კომისიის დებულება

    მუხლი 1. ზოგადი დებულებანი

1. წინამდებარე დებულება განსაზღვრავს თვითმმართველ ქალაქ რუსთავში და თბილისის მიმართულებით ადგილობრივი საქალაქო რეგულარული სამგზავრო გადაყვანის (M2 და M3 კატეგორიების ავტოსატრანსპორტო საშუალებებით) ნებართვის მაძიებელთა კომისიის (შემდგომში – კომისია) შექმნის, საქმიანობის წესს და მის უფლებამოსილებას.

2. კომისია თავის საქმიანობაში ხელმძღვანელობს საქართველოს ზოგადი ადმინისტრაციული კოდექსით, „თვითმმართველ ქალაქ რუსთავში და თბილისის მიმართულებით ადგილობრივი საქალაქო რეგულარული სამგზავრო გადაყვანის ნებართვის გაცემისათვის (M₂ და M₃ კატეგორიის ავტოსატრანსპორტო საშუალებებით) კონკურსის ჩატარების წესის დამტკიცების და ნებართვის ფასის განსაზღვრის შესახებ“ თვითმმართველი ქალაქ რუსთავის საკრებულოს 2011 წლის 01 ივნისის №89 დადგენილებით,საქართველოს სხვა ნორმატიული აქტებითა და წინამდებარე დებულებით.

    მუხლი 2. კომისიის საქმიანობის ორგანიზება

1. კომისია დამოუკიდებელია. არავის არ აქვს უფლება მოახდინოს რაიმე ზეგავლენა ან/და ჩაერიოს მის საქმიანობაში.

2. კომისიას აქვს ბლანკი სახელწოდების აღნიშვნით.

3. კომისიის შემადგენლობაში შედიან კომისიის თავმჯდომარე, თავმჯდომარის მოადგილე, კომისიის სხვა წევრები.

4. კომისიის წევრთა მიმართ ვრცელდება საქართველოს ზოგადი ადმინისტრაციული კოდექსის მე-8 და 92-ე მუხლების მოთხოვნები.  

5. კომისიის მუშაობას ხელმძღვანელობს კომისიის თავმჯდომარე, რომელიც პასუხისმგებელია კომისიის მუშაობის ორგანიზებაზე. კომისიის თავმჯდომარე უფლებამოსილია ხელი მოაწეროს კომისიის საქმიანობას მიკუთვნებულ კორესპონდენციას.

6. კომისიის წევრებს შორის მოვალეობებს ანაწილებს და მუშაობის რეჟიმს განსაზღვრავს კომისიის თავმჯდომარე.

7. კომისიის თავმჯდომარის მოადგილე ცვლის თავმჯდომარეს მისი არყოფნის შემთხვევაში.

8. კომისიის წევრი ვალდებულია:

ა) მონაწილეობა მიიღოს კომისიის სხდომებში და არ გამოტოვოს სხდომა არასაპატიო მიზეზით;

ბ) დაიცვას წინამდებარე დებულებით განსაზღვრული მოთხოვნები;

გ) დაიცვას კონკურსის მონაწილეთა შესახებ საქართველოს ნორმატიული აქტებით განსაზღვრული ინფორმაციის კონფიდენციალობა.

9.  კომისიის წევრებს შეიძლება მიეცეთ აცილება საკითხის განხილვაში მონაწილეობისაგან, თუ ცნობილი გახდა ან დადასტურდება მათი პირდაპირი ან ირიბი კერძო დაინტერესება კომისიაში განსახილველ საკითხთან დაკავშირებით. ასეთ შემთხვევებში კომისიის წევრს აქვს თვითაცილების უფლებაც.                                      

10. კომისიის საქმიანობის ტექნიკურ და ორგანიზაციულ უზრუნველყოფას ახორციელებს კომისიის აპარატი, რომელიც ექვემდებარება უშუალოდ კომისიის თავმჯდომარეს და ასრულებს მის დავალებებს.

11. კომისიის საქმისწარმოებას უზრუნველყოფს კომისიის სხდომის მდივანი, რომელიც იმავდროულად არის კომისიის აპარატის უფროსი.

12. კომისიის სხდომები ტარდება საჯაროდ.

13. კომისია უფლებამოსილია, თუ სხდომას ესწრება კომისიის წევრთა ნახევარზე მეტი.

14. კომისიის სხდომას სათათბირო ხმის უფლებით შეიძლება დაესწრონ სხვადასხვა საჯარო დაწესებულების წარმომადგენლები, ცალკეული დარგის ექსპერტები/სპეციალისტები ან/და სხვა მოწვეული პირები. კომისიის სხდომაზე დასასწრებად შეიძლება მოწვეულ იქნენ დაინტერესებული პირები.

 15.    დაინტერესებული პირი უფლებამოსილია დაესწროს სხდომებს და კომისიის თავმჯდომარის თანხმობის შემთხვევაში მისცეს ახსნა-განმარტება განსახილველ საკითხთან დაკავშირებით.

16.     კომისია ვალდებულია უზრუნველყოს საქმისთვის მნიშვნელობის მქონე გარემოებათა გამოკვლევა და დამსწრე დაინტერესებულ მხარეს მისცეს საქმესთან დაკავშირებით საკუთარი აზრის გამოთქმის უფლება.           

17.     კომისიის სხდომა ფორმდება ოქმით, რომელიც არის ინდივიდუალური ადმინისტრაციულ-სამართლებრივი აქტი და რომელსაც ხელს აწერენ კომისიის თავმჯდომარე და სხდომის მდივანი.

 

    მუხლი 3. კომისიის უფლებამოსილება

     კომისიის უფლებამოსილებას განეკუთვნება კონკურსში მონაწილეობაზე ნებართვის მაძიებლის წერილობითი განცხადებისა და თანდართული დოკუმენტების შემოწმება, ნებართვის მაძიებლების შეფასება დადგენილი კრიტერიუმების მიხედვით და კონკურსში გამარჯვებულის გამოვლენა.

    მუხლი 4. საკონკურსო პირობები

1. ნებართვის მაძიებელმა კონკურსში მონაწილეობის მიღების მიზნით წერილობითი განცხადება უნდა წარადგინოს თვითმმართველი ქალაქ რუსთავის საკრებულოს სახელზე, რომელიც დაუყო ვ ნებლივ წარედგინება კომისიას.

2. განცხადება უნდა შეესაბამებოდეს საქართველოს ზოგადი ადმინისტრაციული კოდექსის 78-ე მუხლის მოთხოვნებს და მას თან უნდა დაერთოს ნებართვის მაძიებლის მიერ წარსადგენი დოკუმენტები, რომელთა ჩამონათვალიც მტკიცდება საკრებულოს დადგენილებით.

3. კომისია განცხადების წარდგენიდან 3 სამუშაო დღის ვადაში ამოწმებს ნებართვის მაძიებლის განცხადების შესაბამისობას საქართველოს ზოგადი ადმინისტრაციული კოდექსის 78-ე მუხლის მოთხოვნებთან და ამ მუხლის მე-2 პუნქტთან მიმართებაში მოქმედებს იმავე კოდექსის 83-ე მუხლის შესაბამისად.

4. ნებართვის მაძიებელი ვალდებულია ამ მუხლის მე-3 პუნქტით გათვალისწინებულ შემთხვევაში კომისიის მიერ მითითებულ ვადაში წარადგინოს მოთხოვნილი დოკუმენტი ან მიაწოდოს კომისიას მოთხოვნილი ინფორმაცია, ასევე მოახდინოს წარდგენილ განცხადებაში დაშვებული ტექნიკური შეცდომების გასწორება.

    მუხლი 5. საკონკურსო განცხადების განხილვაზე უარის თქმის საფუძვლები

საკონკურსო განცხადების განხილვაზე უარის თქმის საფუძვლებია:

ა)  ნებართვის მაძიებლის მიერ წარმოდგენილი მონაცემების საკონკურსო პირობებისადმი შეუსაბამობა;

ბ)  ნებართვის მაძიებლის მიერ წარმოდგენილი მონაცემების და/ან მათი დამადასტურებელი დოკუმენტების სიყალბე.

    მუხლი 6. კომისიის მიერ ნებართვის მაძიებლის შეფასება

კომისიის მიერ ნებართვის მაძიებლების შეფასება ხორციელდება თვითმმართველი ქალაქ რუსთავის საკრებულოს მიერ დადგენილი პირობების და კრიტერიუმების შესაბამისად.

    მუხლი 7. კონკურსის შედეგების შეჯამება

1. კონკურსში გამარჯვებული გამოვლინდება ლოტზე.

2. კომისიის გადაწყვეტილება კონკურსში გამარჯვებულის გამოვლენის შესახებ ფორმდება ოქმით, რომელსაც თან ერთვის კომისიის წევრთა წერილობითი შეფასებები.

3. ხმის მიცემა წარმოებს ღია კენჭისყრის ფორმით. ხმის მიცემა წარმომადგენლის მეშვეობით დაუშვებელია.

4. კომისიის წევრს უფლება არ აქვს თავი შეიკავოს ხმის მიცემისაგან ან ხმა მისცეს იმ საკითხს, რომლის განხილვაშიც არ იღებდა მონაწილეობას.

5. ოქმი მიღებულად ჩაითვლება, თუ მას მხარს დაუჭერს სხდომაზე დამსწრე წევრთა უმრავლესობა. კომისიის თითოეულ წევრს აქვს მხოლოდ ერთი ხმის უფლება. ხმების თანაბარი გადანაწილების შემთხვევაში გადამწყვეტია კომისიის თავმჯდომარის ხმა.

6.  ოქმში უნდა მიეთითოს:

ა) კომისიის დასახელება;

ბ) სხდომის ჩატარების თარიღი, დრო და ადგილი;

გ) სხდომის თავმჯდომარის და წევრების ვინაობა;

დ) სხდომაში მონაწილე სხვადასხვა საჯარო დაწესებულების წარმომადგენლების, ცალკეული დარგის ექსპერტების/სპეციალისტების ან/და სხვა მოწვეული, აგრეთვე დაინტერესებული პირების ვინაობა (მათი არსებობის შემთხვევაში);

ე) განხილვის საგანი;

ვ) სხვადასხვა საჯარო დაწესებულების წარმომადგენლების, ცალკეული დარგის ექსპერტების/სპეციალისტების ან/და სხვა მოწვეული, აგრეთვე დაინტერესებული პირების ახსნა-განმარტებების აღწერა;

ზ)      კენჭისყრის შედეგები;

თ)     მიღებული გადაწყვეტილება.

7. კომისიის ოქმი კონკურსში გამარჯვებულის გამოვლენის შესახებ ცხადდება საჯაროდ და ეგზავნება თვითმმ ა რთველი ქალაქ რუსთავის საკრებულოს.

8.  კონკურსში გამარჯვებულს, ნებართვის მიღებამდე, უფლება არა აქვს განახორციელოს აღნიშნული საქმიანობა.

    მუხლი 8. არშემდგარი კონკურსი

კონკურსი ითვლება არშემდგარად და კომისიის მიერ ფორმდება სათანადო ოქმი:

ა) თუ კონკურსის მოწყობის თაობაზე ინფორმაციის გამოქვეყნების შემდეგ დადგენილ ვადაში არ იქნა წარდგენილი არც ერთი განცხადება;

ბ) საქართველოს ნორმატიული აქტებით გათვალისწინებული სხვა შემთხვევებისას.

    მუხლი 9. კომისიის გადაწყვეტილების გასაჩივრება

1.  კომისიის გადაწყვეტილებასთან დაკავშირებული ყველა სადავო საკითხი რეგულირდება საქართველოს ნორმატიული აქტების შესაბამისად.

2.  კომისიის გადაწყვეტილება შეიძლება გასაჩივრდეს სასამართლოში, საქართველოს კანონმდებლობით დადგენილი წესით.

3. კომისიის გადაწყვეტილებაზე სარჩელის წარდგენა სასამართლოში არ აჩერებს გასაჩივრებული ინდივიდუალური ადმინისტრაციული აქტის მოქმედებას, გარდა საქართველოს ადმინისტრაციული საპროცესო კოდექსის 29-ე მუხლის მე-3 ნაწილით გათვალისწინებული შემთხვევებისა.

    მუხლი 10. დასკვნითი დებულებანი

1.  კომისიის სხდომების ოქმები და საქმისწარმოების სხვა მასალები ინახება საქართველოს კანონმდებლობის შესაბამისად.

2. წინამდებარე დებულებაში ცვლილებებისა და დამატებების შეტანა ხდება საკრებულოს დადგენილებით.