ქ. თბილისის ტერიტორიაზე სპეციალური (ზონალური) შეთანხმების გაცემისათვის მოსაკრებლის გადახდასთან დაკავშირებით შეთანხმების გაფორმების წესის შესახებ

ქ. თბილისის ტერიტორიაზე სპეციალური (ზონალური) შეთანხმების გაცემისათვის მოსაკრებლის გადახდასთან დაკავშირებით შეთანხმების გაფორმების წესი

ქ. თბილისის ტერიტორიაზე სპეციალური (ზონალური) შეთანხმების გაცემისათვის მოსაკრებლის გადახდასთან დაკავშირებით შეთანხმების გაფორმების წესის (შემდგომში - წესი) შესაბამისად, „ადგილობრივი მოსაკრებლის შესახებ“ საქართველოს კანონის საფუძველზე, ქ. თბილისის მთავრობა უფლებამოსილია მიიღოს გადაწყვეტილება აღნიშნული კანონის 17^​2 მუხლით გათვალისწინებული პირობების არსებობისას, სპეციალური (ზონალური) შეთანხმების გაცემისთვის გადასახდელი მოსაკრებლის გადახდისაგან სრულად გათავისუფლების ან/და მოსაკრებლის გადახდის შენობა-ნაგებობის ექსპლუატაციაში მიღებამდე გადავადების შესახებ, მოსაკრებლის გადამხდელთან  შეთანხმების დადების  თაობაზე.

1. მოსაკრებლის გადამხდელთან, რომელსაც 2012 წლის 28 ივნისის დროისათვის წარმოშობილი აქვს სპეციალური (ზონალური) შეთანხმების გაცემასთან დაკავშირებით გადასახდელი მოსაკრებლის დავალიანება, შესაძლებელია ქ. თბილისის მთავრობის გადაწყვეტილებით დადებულ იქნეს შეთანხმება არსებული დავალიანების გადახდისაგან მისი სრულად გათავისუფლების თაობაზე,  თუ იგი შეთანხმებით იკისრებს ვალდებულებას, რომ შენობა-ნაგებობის ექსპლუატაციაში მიღების თაობაზე განცხადებას წარუდგენს შესაბამის უფლებამოსილ  ორგანოს აღნიშნული წესის ძალაში შესვლიდან 2014 წლის 1 ივლისამდე და შენობა-ნაგებობა დააკმაყოფილებს ექსპლუატაციაში მიღებისათვის საქართველოს კანონმდებლობით დადგენილ მოთხოვნებს.

2. მოსაკრებლის გადამხდელთან, რომელსაც 2012 წლის 28 ივნისის დროისათვის წარმოშობილი აქვს  სპეციალური (ზონალური) შეთანხმების გაცემასთან დაკავშირებით გადასახდელი მოსაკრებლის დავალიანება, შესაძლებელია ქ. თბილისის მთავრობის გადაწყვეტილებით დადებულ იქნეს შეთანხმება არსებული დავალიანების შენობა-ნაგებობის ექსპლუატაციაში მიღებამდე გადავადების შესახებ, თუ იგი შეთანხმებით იკისრებს ვალდებულებას, რომ შენობა-ნაგებობის ექსპლუატაციაში მიღების თაობაზე განცხადებას წარუდგენს შესაბამის უფლებამოსილ ორგანოს  შეთანხმებით განსაზღვრულ ვადაში, მაგრამ არა უგვიანეს 2015 წლის 1 იანვრისა და შენობა-ნაგებობა დააკმაყოფილებს ექსპლუატაციაში მიღებისათვის საქართველოს კანონმდებლობით დადგენილ მოთხოვნებს.

3.  ამ წესის მოქმედება ვრცელდება ასევე მის ძალაში შესვლამდე, ქ. თბილისის მთავრობასა და მოსაკრებლის გადამხდელს შორის, გადასახდელი მოსაკრებლის გადავადებასთან/გათავისუფლებასთან დაკავშირებით  გაფორმებულ იმ შეთანხმებაზე, რომლის შესრულების ვადა ახალი შეთანხმების გაფორმებაზე განცხადების წარდგენის დროისათვის არ არის გასული. ამასთან, შეთანხმების ორივე მხარე თანახმაა ამ წესის შესაბამისად ახალი შეთანხმების დადებაზე.

4.  ამ წესის შესაბამისად გაფორმებული შეთანხმების პირობების დარღვევის შემთხვევაში დადებული შეთანხმება გაუქმდება და მოსაკრებლის გადამხდელი ვალდებულია გადაიხადოს მოსაკრებელი შეთანხმების გაუქმებიდან 1 თვის ვადაში.

5. ამ წესის მე-4 პუნქტით გათვალისწინებულ შემთხვევაში, შეთანხმების გაუქმების თაობაზე გადაწყვეტილებას იღებს ქ. თბილისის მთავრობა.

ქალაქ თბილისის მთავრობის 2013 წლის 14 ნოემბრის დადგენილება №28.08.1364 - ვებგვერდი, 20.11.2013 წ.

ქალაქ თბილისის მთავრობის 2014 წლის 8 იანვრის დადგენილება №01.05.05 - ვებგვერდი, 13.01.2014 წ.