“საკონსულტაციო საბჭოს დებულების დამტკიცების შესახებ”

სახელმწიფო სარეგისტრაციო კოდი 430.010.000.11.101.006.545

საქართველოს განათლებისა და მეცნიერების მინისტრის

ბრძანება №104

2004 წლის 2 ივლისი

ქ. თბილისი

საკონსულტაციო საბჭოს დებულების დამტკიცების შესახებ

`საქართველოს მთავრობის სტრუქტურის, უფლებამოსილების და საქმიანობის წესის შესახებ” საქართველოს 2004 წლის 11 თებერვლის კანონისა და საქართველოს მთავრობის 2004 წლის 21 მაისის №37 დადგენილებით დამტკიცებული საქართველოს განათლებისა და მეცნიერების სამინისტროს დებულების შესაბამისად:

1. შეიქმნას საქართველოს განათლებისა და მეცნიერების სამინისტროს საკონსულტაციო საბჭო თანდართული ნუსხის შესაბამისად.

2. დამტკიცდეს საქართველოს განათლებისა და მეცნიერების სამინისტროს საკონსულტაციო საბჭოს თანდართული დებულება.

3. ეს ბრძანება ამოქმედდეს გამოქვეყნებისთანავე.

ა. ლომაია

 

 

საქართველოს განათლებისა და მეცნიერების სამინისტროს საკონსულტაციო საბჭოს დებულება

თავი I

ზოგადი დებულებანი

    მუხლი 1

საქართველოს განათლებისა და მეცნიერების სამინისტროს საკონსულტაციო საბჭო (შემდგომში – საბჭო) არის განათლებისა და მეცნიერების სისტემების რეფორმის გამჭვირვალობის, განათლებისა და მეცნიერების სამინისტროს (შემდგომში – სამინისტრო) მუშაობის საჯაროობის უზრუნველყოფისა და დემოკრატიული პრინციპებით მართვის მიზნით შექმნილი სათათბირო ორგანო, რომელიც მოქმედებს საზოგადოებრივ საწყისებზე.

    მუხლი 2

საბჭო თავისი საქმიანობისას ხელმძღვანელობს საქართველოს კონსტიტუციით, საერთაშორისო ხელშეკრულებებითა და შეთანხმებებით, საქართველოს კანონმდებლობით, საქართველის განათლებისა და მეცნიერების სამინისტროს დებულებითა და ამ დებულებით.

თავი II

საბჭოს შემადგენლობა

    მუხლი 3

1. საბჭოს თავმჯდომარეობს მინისტრი ან მისი დავალებით მინისტრის ერთ-ერთი მოადგილე.

2. საბჭოს შემადგენლობაში შედიან პედაგოგები, მეცნიერები, ექსპერტები და ჟურნალისტები. საბჭოს წევრებს, მათი თანხმობით, ერთი წლის ვადით ნიშნავს მინისტრი.

3. მინისტრის უფლებამოსილების შეწყვეტის შემთხვევაში ახალ მინისტრს უფლება აქვს დაითხოვოს საბჭო.

4. მინისტრი უფლებამოსილია შეუწყვიტოს საბჭოს წევრს უფლებამოსილება:

ა) თუ იგი სისტემატურად არ ესწრება საბჭოს სხდომებს;

ბ) თუ მან დაიკავა თანამდებობა სამინისტროს სტრუქტურულ ერთეულში;

გ) საბჭოს წევრის პირადი სურვილით;

დ) საბჭოს წევრისათვის შეუფერელი საქციელის ჩადენის შემთხვევაში;

ე) თუ სასამართლომ იგი ქმედუუნაროდ ცნო;

ვ) მის წინააღმდეგ კანონიერ ძალაში შევიდა გამამტყუნებელი განაჩენი.

თავი III

საბჭოს საქმიანობის წესი

    მუხლი 4

საბჭო რეკომენდაციებს იღებს მის კომპეტენციაში შემავალ საკითხებთან დაკავშირებით საბჭოს სხდომებზე ღია კენჭისყრით, სხდომაზე დამსწრე საბჭოს წევრთა ხმათა უმრავლესობით. საბჭოს სხდომა უფლებამოსილია, თუ მას ესწრება საბჭოს წევრთა ნახევარზე მეტი.

    მუხლი 5

საბჭოს სხდომები იმართება თვეში ერთხელ მაინც. მინისტრს უფლება აქვს მოიწვიოს საბჭოს საგანგებო სხდომა. საბჭოს სხდომის შედეგები ფორმდება საბჭოს სხდომის ოქმით.

    მუხლი 6

იმ შემთხვევაში, თუ საბჭოს რომელიმე წევრი არ ეთანხმება სხდომაზე მიღებულ გადაწყვეტილებას, მას უფლება აქვს თავისი პოზიცია გააფორმოს წერილობითი დასკვნით, რომელიც ერთვის სხდომის ოქმს.

    მუხლი 7

საბჭოს სხდომის ოქმი წარმოადგენს საჯარო დოკუმენტს. სხდომის გადაწყვეტილებები შეიძლება გამოქვეყნდეს კანონმდებლობით დადგენილი წესით.

თავი IV

საბჭოს ფუნქციები და უფლება-მოვალეობა

    მუხლი 8

თავის სხდომებზე საბჭო:

ა) განიხილავს სამინისტროს მიერ გამოსაცემი მნიშვნელოვანი ნორმატიული აქტების, მნიშვნელოვანი გადაწყვეტილებების, სპეციალური პროგრამების და სამინისტროს სტრუქტურული ქვედანაყოფების დებულებებს;

ბ) განიხილავს მთავრობისათვის წარსადგენ სამინისტროს საქმიანობის წლიურ ანგარიშს;

გ) განიხილავს სამინისტროს დებულებაში შესატან მნიშვნელოვან ცვლილებათა პროექტებს;

დ) მინისტრის წარდგინებით განიხილავს საგანმანათლებლო დაწესებულებების ხელმძღვანელების კანდიტატურებს და აძლევს მინისტრს რეკომენდაციებს საკადრო გადაწყვეტილებების შესახებ.

    მუხლი 9.

თავისი საქმიანობის შესახებ საბჭო ადგენს ყოველწლიურ ანგარიშს.