„კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინასური მონიტორინგის სამსახურისათვის გადაცემის წესის შესახებ” დებულების დამტკიცების თაობაზე

სახელმწიფო სარეგისტრაციო კოდი 220.090.000.141.224.006.595

საქართველოს ფინანსური მონიტორინგის

სამსახურის უფროსის

ბრძანება №95

2004 წლის 28 ივლისი

ქ.თბილისი

„კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ’’დებულების დამტკიცების თაობაზე

„უკანონო შემოსავლის ლეგალიზაციის აღკვეთის ხელშეწყობის შესახებ’’ საქართველოს კანონის მე-10 და მე-15 მუხლების შესაბამისად, ვბრძანებ:

1. დამტკიცდეს თანდართული დებულება „კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ’’.

2.  დებულება „კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ’’ ამოქმედდეს 2004 წლის 1 სექტემბრიდან.

3. დებულების ამოქმედებიდან ძალადაკარგულად ჩაითვალოს საქართველოს ფინანსური მონიტორინგის სამსახურის უფროსის 2003 წლის 25 დეკემბრის N24 ბრძანება „საქართველოს საბანკო დაწესებულებების მიერ ინფორმაციის მიღების, აღრიცხვის, დამუშავებისა და საქართველოს ფინანსური მონიტორინგის სამსახურისათვის გადაცემის შესახებ“ დებულების დამტკიცების თაობაზე“.

4. საქართველოს საბანკო დაწესებულებებმა:

ა) 2004 წლის 1 სექტემბრამდე უზრუნველყონ ფინანსური მონიტორინგის განხორციელებასთან დაკავშირებით მათ მიერ დამტკიცებული შიდა ინხტრუქციების შესაბამისობაში მოყვანა „კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ’’ დებულების მოთხოვნებთან, ხოლო შიდა ინსტრუქციების არარსებობის შემთხვევაში – მათი შემუშავება და დამტკიცება;

ბ) ამ ბრძანების ამოქმედებიდან 10 დღის ვადაში წარუდგინონ საქართველოს ფინანსური მონიტორინგის სამსახურს “კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ’’ დებულებით გათვალისწინე-ბული „საქართველოს ფინანსური მონიტორინგის სამსახურში კომერციული ბანკების აღრიცხვის ფორმა“;

გ) უზრუნველყონ კლიენტებისა და სხვა შესააბამისი პირების საიდენტიფიკაციო მონაცემებისა და მონიტორინგს დაქვემდებარებული საბანკო ოპერაციების (გარიგებების) შესახებ მონაცემთა ელექტრონული ბაზის ამოქმედება არაუგვიანეს 2005 წლის 1 იანვრისა, ხოლო საეჭვო და დანაწევრების მიზნით განხორციელებული საბანკო ოპერაციების (გარიგებების) გამოვლენისათვის შესაბამისი პროგრამული სისტემის დანერგვა - არაუგვიანეს 2005 წლის 1 მარტისა.

5. კომერციულმა ბანკებმა, რომლებიც დაიწყებენ ფუნქციონირებას ამ ბრძანების ამოქმედების შემდეგ, გაითვალისწინონ „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონისა და „კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ’’ დებულების მოთხოვნები და საქართველოს საფინანსო ზედამხედველობის სააგენტოდან ლიცენზიის მიღებიდან ერთი თვის ვადაში წარუდგინონ საქართველოს ფინანსური მონიტორინგის სამსახურს „საქართველოს ფინანსური მონიტორინგის სამსახურში კომერციული ბანკების აღრიცხვის ფორმა“.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

6. ეს ბრძანება ამოქმედდეს გამოქვეყნებისთანავე.

ნ.გეგუჩაძე

 

შეტანილი ცვლილებები:

1. საქართველოს ფინანსური მონიტორინგის სამსახურის უფროსის 2004 წლის 20 დეკემბრის ბრძანება №165-სსმIII, №151, 23.12.2004წ.; მუხ.1375

2. საქართველოს ფინანსური მონიტორინგის სამსახურის უფროსის 2007 წლის 17 ოქტომბრის ბრძანება №142-სსმIII, №152, 30.10.2007წ.; მუხ.1693

3. საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

 

 

დებულება

კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ

    მუხლი 1. ზოგადი დებულებები

1. წინამდებარე დებულება შემუშავებულია „უკანონო შემოსავლის ლეგალიზაციის აღკვეთის ხელშეწყობის შესახებ’’ საქართველოს კანონის, „საჯარო სამართლის იურიდიული პირის - საქართველოს ფინანსური მონიტორინგის სამსახურის დებულების დამტკიცების შესახებ“ საქართველოს პრეზიდენტის 2007 წლის 23 აგვისტოს №483 ბრძანებულებისა და საქართველოს სხვა ნორმატიული აქტების საფუძველზე.

2. დებულება განკუთვნილია საქართველოს კომერციული ბანკებისა და მათი ფილიალებისათვის, აგრეთვე სხვა ქვეყნების ბანკების ფილიალებისათვის (წარმომადგენლობებისათვის) საქართველოში (შემდგომში „ბანკი”).

3. დებულების მოთხოვნები ვრცელდება საქართველოს რეზიდენტ და არარეზიდენტ პირებზე, მათ წარმომადგენლებზე, წარმომადგენლობებსა და ფილიალებზე, აგრეთვე უწყებებზე, დაწესებულებებსა და ორგანიზაციებზე.

4. დებულება არეგულირებს ბანკის მიერ უკანონო შემოსავლების ლეგალიზაციისა და ტერორიზმის დაფინანსების აღკვეთის ხელშეწყობის მიზნით ფინანსური მონიტორინგის განხორციელების ზოგად პრინციპებსა და წესებს, კერძოდ, ბანკის კლიენტებისა და სხვა შესაბამისი პირების იდენტიფიკაციის, სათანადო ინფორმაციის მიღების, სისტემატიზაციის, დამუშავების, შენახვისა და საქართველოს ფინანსური მონიტორინგის სამსახურისათვის გადაცემის პირობებსა და წესებს.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 2. ტერმინთა განმარტება

ამ დებულებაში გამოყენებულ ტერმინებს აქვს შემდეგი მნიშვნელობა:

ა) უკანონო შემოსავალი – პირის საკუთრებაში ან მფლობელობაში არსებული უკანონო ან/და დაუსაბუთებელი ქონება;

ბ) ქონება – საქართველოს სამოქალაქო კოდექსით გათვალისწინებული ქონება: ყველა ნივთი (როგორც მოძრავი, ისე უძრავი) და არამატერიალური ქონებრივი სიკეთე, რომელთა ფლობა, სარგებლობა და განკარგვა შეუძლიათ ფიზიკურ და იურიდიულ პირებს;

გ) უკანონო შემოსავლის ლეგალიზაცია – უკანონო შემოსავლისათვის კანონიერი სახის მიცემა (შეძენა, გამოყენება, გადაცემა ან სხვა მოქმედება), აგრეთვე მისი ნამდვილი წარმოშობის, მესაკუთრის ან მფლობელის ან/და ქონებრივი უფლებების დამალვა ან შენიღბვა ანდა ასეთი ქმედების ჩადენის მცდელობა;

დ) მონიტორინგი – ბანკის მიერ „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონით განსაზღვრული პირების იდენტიფიკაცია, საბანკო ოპერაციებისა და გარიგებების შესახებ, აგრეთვე ამ ოპერაციებისა და გარიგებების მონაწილე პირების შესახებ ინფორმაციის აღრიცხვა, სისტემატიზაცია, დამუშავება და საქართველოს ფინანსური მონიტორინგის სამსახურისათვის წარდგენა „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონით, ამ დებულებითა და ზემოაღნიშნული კანონის საფუძველზე მიღებული სხვა ნორმატიული აქტებით დადგენილი წესით;

ე) საეჭვო გარიგება – გარიგება (მიუხედავად მისი თანხის ოდენობისა და ოპერაციის სახეობისა), რომელზედაც არსებობს საფუძვლიანი ეჭვი, რომ იგი დაიდო ან შესრულდა უკანონო შემოსავლის ლეგალიზაციის ან ტერორიზმის დაფინანსების მიზნით (ეჭვს იწვევს გარიგების მონაწილე პირი ან გარიგების თანხის წარმოშობა, ან არსებობს სხვა საფუძველი, რომლის გამოც იგი შეიძლება მიჩნეულ იქნას საეჭვოდ), ან რომ მისი მონაწილე რომელიმე პირი შეტანილია ტერორისტთა ან ტერორიზმის ხელშემწყობ პირთა სიაში ან/და შესაძლებელია დაკავშირებული იყოს მათთან, ან/და მასში მონაწილე ფულადი სახსრები შესაძლებელია დაკავშირებული იყოს ან გამოყენებულ იქნას ტერორიზმისათვის, ტერორისტული აქტისათვის ან ტერორისტების მიერ ან ტერორიზმის დამფინანსებლის მიერ, ან რომ მისი მონაწილე რომელიმე პირის იურიდიული ან ფაქტობრივი მისამართი ან საცხოვრებელი ადგილი არის არაკოოპერირებად (არამოთანამშრომლე) ზონაში, ან რომ მისი თანხის გადარიცხვა ხდება ასეთ ზონაში ან ასეთი ზონიდან;

ე^​1) უჩვეულო გარიგება – რთული, უჩვეულოდ დიდი გარიგება, აგრეთვე გარიგებათა ტიპი, რომელსაც არ აქვს აშკარა ეკონომიკური (კომერციული) შინაარსი ან აშკარა კანონიერი მიზანი, არ შეესაბამება გარიგების მონაწილე პირის ჩვეულებრივ საქმიანობას;

ვ) პირი – ნებისმიერი როგორც რეზიდენტი, ისე არარეზიდენტი ფიზიკური და იურიდიული პირი, აგრეთვე კანონმდებლობით გათვალისწინებული ორგანიზაციული წარმონაქმნი, რომელიც არ წარმოადგენს იურიდიულ პირს (არარეგისტრირებული კავშირი, ამხანაგობა, ბინის მესაკუთრეთა ამხანაგობა).

ზ) ბანკის კლიენტი – ნებისმიერი პირი, რომელიც მიმართავს ბანკს „კომერციული ბანკების საქმიანობის შესახებ“ საქართველოს კანონით გათვალისწინებული საბანკო მომსახურებისათვის და საბანკო ოპერაციების განსახორციელებლად;

ზ^​1) ბენეფიციარი მესაკუთრე – ფიზიკური პირი (პირები), რომელიც წარმოადგენს პირის საბოლოო მფლობელს (მფლობელებს) ან მაკონტროლებელ პირს (პირებს);  

ზ^​2) კონტროლი – „საქართველოს ეროვნული ბანკის შესახებ” საქართველოს ორგანული კანონით განსაზღვრული ტერმინი;

ზ^​3) მაკონტროლებელი პირი – კონტროლის განმახორციელებელი პირი;

თ) პირის იდენტიფიკაცია – პირის შესახებ ისეთი ინფორმაციის მოპოვება, რომელიც საჭიროების შემთხვევაში იძლევა პირის მოკვლევისა და მისი სხვა პირებისგან გამორჩევის საშუალებას;

ი) საბანკო ოპერაციის (გარიგების) მონაწილე პირი – საბანკო ოპერაციის (გარიგების) მონაწილე ყველა პირი, მათ შორის საბანკო ოპერაციის (გარიგების) მხარეები, წარმომადგენლები, მარწმუნებლები, მესამე პირები, რომელთა სასარგებლოდაც სრულდება ოპერაცია (გარიგება);

კ) არაკოოპერირებადი (არამოთანამშრომლე) ან საყურადღებო ზონა – საქართველოს ფინანსური მონიტორინგის სამსახურის წარდგინებით საქართველოს მთავრობის მიერ განსაზღვრული ქვეყანა ან ქვეყნის ტერიტორიის ნაწილი. აღნიშნული ქვეყანა ან ქვეყნის ტერიტორიის ნაწილი არაკოოპერირებად (არამოთანამშრომლე) ან საყურადღებო ზონად მიიჩნევა კომპეტენტური საერთაშორისო ორგანიზაციის ინფორმაციაზე დაყრდნობით, ან თუ არსებობს დასაბუთებული ვარაუდი, რომ მითითებულ ზონაში მოქმედებს უკანონო შემოსავლის ლეგალიზაციის სუსტი მაკონტროლებელი მექანიზმი;

ლ) ამოღებულია;

მ) მონიტორინგის განხორციელებაზე პასუხისმგებელი თანამშრომელი – ბანკის თანამშრომელი, რომელსაც ბანკის სათანადოდ გაფორმებული გადაწყვეტილების საფუძველზე დაეკისრება ბანკში მონიტორინგის განხორციელებასთან დაკავშირებული სამუშაოების განხორციელების უზრუნველყოფა და მიენიჭება შესაბამისი უფლება-მოვალეობანი. იმ შემთხვევაში, თუ მონიტორინგის განხორციელებასთან დაკავშირებული სამუშაოების შესრულების მიზნით ბანკში შექმნილია სპეციალური სტრუქტურული ერთეული, მონიტორინგის განხორციელებაზე პასუხისმგებელ თანამშრომლად ითვლება ამ სტრუქტურული ერთეულის ხელმძღვანელი. მონიტორინგის განხორციელებაზე პასუხისმგებელი თანამშრომლის უფლება-მოვალეობანი და პასუხისმგებლობა განისაზღვრება „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონისა და ამ დებულების საფუძველზე ბანკის მიერ შემუშავებული და დამტკიცებული შიდა ინსტრუქციით;

ნ) საეჭვო ზონა – ქვეყანა ან ქვეყნის ტერიტორიის ნაწილი, რომელიც მონიტორინგის განმახორციელებელი პირის ხელთ არსებული ინფორმაციის საფუძველზე მიჩნეულია უკანონო შემოსავლის ლეგალიზაციის სუსტი მაკონტროლებელი მექანიზმის მქონედ;

ო) ფინანსური ინსტიტუტები – ,,კომერციული ბანკების საქმიანობის შესახებ“ საქართველოს კანონით განსაზღვრული ინსტიტუტები;

პ) საეჭვო ფინანსური ინსტიტუტი – საქართველოს მთავრობის მიერ განსაზღვრული ფინანსური ინსტიტუტი, რომელიც ვერ პასუხობს უკანონო შემოსავლის ლეგალიზაციის აღკვეთის სტანდარტებს;

ჟ) მსოფლიო ბანკთაშორისი საფინანსო ტელეკომუნიკაციების საზოგადოება (SWIFT) – საერთაშორისო ბანკთაშორისი ქსელი (სისტემა), რომელიც ბანკთაშორისი ანგარიშსწორების განხორციელებისა და ინფორმაციის გაცვლის ერთ-ერთი საშუალებაა;

რ) კომპეტენტური საერთაშორისო ორგანიზაციები – ევროსაბჭო, ფინანსური ქმედების სპეციალური ჯგუფი (FATF) და სხვა ორგანიზაციები, რომლებიც ასეთად აღიარებულია საერთაშორისო თანამეგობრობის მიერ;

ს) ფიქტიური ბანკი („შელ ბანკი“) – ბანკი, რომელიც არ არის ფიზიკურად წარმოდგენილი იმ ქვეყანაში, სადაც რეგისტრირებულია/ლიცენზირებულია, და რომელზედაც კონტროლი და ზედამხედველობა არ ხორციელდება.

საქართველოს ფინანსური მონიტორინგის სამსახურის უფროსის 2007 წლის 17 ოქტომბრის ბრძანება №142-სსმIII, №152, 30.10.2007წ.; მუხ.1693

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

 

    მუხლი 3. მონიტორინგს დაქვემდებარებული საბანკო ოპერაციები (გარიგებები)

1. ამ დებულების მიზნებისათვის მონიტორინგს ექვემდებარება პირის მიერ შესრულებული საბანკო ოპერაცია ან დადებული გარიგება, ანდა საბანკო ოპერაციის (გარიგების) დანაწევრების მიზნით შესრულებული საბანკო ოპერაციების (დადებული გარიგებების) ერთობლიობა, თუ არსებობს ერთ-ერთი ან ორივე შემდეგი პირობა:

ა) საბანკო ოპერაცია (გარიგება) საეჭვოა ამ დებულების მე-2 მუხლის „ე“ ქვეპუნქტის შესაბამისად. მიუხედავად მისი თანხის ოდენობისა, შემდეგ შემთხვევებში:

ა.ა) საბანკო ოპერაცია (გარიგება), რომელზეც არსებობს საფუძვლიანი ეჭვი, რომ იგი დაიდო ან შესრულდა უკანონო შემოსავლის ლეგალიზაციის ან ტერორიზმის დაფინანსების მიზნით (ეჭვს იწვევს გარიგების მონაწილე პირი ან გარიგების თანხის წარმოშობა, ან არსებობს სხვა საფუძველი, რომლის გამოც იგი შეიძლება მიჩნეულ იქნას საეჭვოდ);

ა.ბ) საბანკო ოპერაციის (გარიგების) მონაწილე რომელიმე პირი შეტანილია ტერორისტთა ან ტერორიზმის ხელშემწყობ პირთა სიაში ან/და შესაძლებელია დაკავშირებული იყოს მათთან;

ა.გ) საბანკო ოპერაციაში (გარიგებაში) მონაწილე ფულადი სახსრები შესაძლებელია დაკავშირებული იყოს ან გამოყენებულ იქნას ტერორიზმისათვის, ტერორისტული აქტისათვის ან ტერორისტების მიერ ან ტერორიზმის დამფინანსებლის მიერ;

ა.დ) საბანკო ოპერაციის (გარიგების) მონაწილე რომელიმე პირის იურიდიული ან ფაქტობრივი მისამართი ან საცხოვრებელი ადგილი არის არაკოოპერირებად (არამოთანამშრომლე) ზონაში, ან რომ მისი თანხის გადარიცხვა ხდება ასეთ ზონაში ან ასეთი ზონიდან;

ბ) პირის მიერ დადებული ან შესრულებული გარიგება ან/და მისი დანაწევრების მიზნით დადებულ ან შესრულებულ გარიგებათა ერთობლიობა, თუ გარიგების ან გარიგებათა ერთობლიობის თანხა აღემატება 30 000 ლარს (ან მის ეკვივალენტს სხვა ვალუტაში) და ამავე დროს იგი თავისი შინაარსით არის შემდეგი გარიგება (ოპერაცია):

ბ.ა) თანხის მიღება წარმომდგენზე საბანკო ჩეკით;

ბ.ბ) უცხოური ვალუტის ყიდვა-გაყიდვა ბანკნოტების საშუალებით;

ბ.გ) საყურადღებო ან საეჭვო ზონაში მოქმედი ან რეგისტრირებული ბანკის საბანკო ანგარიშიდან მფლობელის მიერ თანხის გადმორიცხვა საქართველოში არსებულ საბანკო ანგარიშზე ან თანხის გადარიცხვა საქართველოდან ასეთ ზონაში მოქმედ ან რეგისტრირებულ ბანკში არსებულ საბანკო ანგარიშზე;

ბ.დ) საყურადღებო ან საეჭვო ზონაში რეგისტრირებული პირის მიერ სესხის გაცემა ან მიღება, ანდა ასეთი პირის მიერ საქართველოში არსებული საბანკო დაწესებულების მეშვეობით განხორციელებული ნებისმიერი სხვა გარიგება (ოპერაცია);

ბ.ე) სხვა სახელმწიფოში ანონიმური პირის საბანკო ანგარიშზე თანხის საქართველოდან გადარიცხვა ან ანონიმური პირის სხვა სახელმწიფოში არსებული საბანკო ანგარიშიდან თანხის საქართველოში გადმორიცხვა;

ბ.ვ) საწარმოს საწესდებო კაპიტალში ფულადი სახსრების შეტანა, გარდა ,,ფასიანი ქაღალდების ბაზრის შესახებ“ საქართველოს კანონით გათვალისწინებულ ანგარიშვალდებულ საწარმოთა აქციების შეძენისა;

ბ.ზ) ფიზიკური პირის (არამეწარმე სუბიექტის) მიერ ნაღდი ფულადი ფორმით შეტანილი თანხის გადარიცხვა (გარდა ბიუჯეტში თანხების ჩარიცხვისა და საქართველოს ფარგლებში მის საკუთარ ანგარიშებს შორის თანხის გადარიცხვისა); აღნიშნული გარიგების ქვეშ იგულისხმება როგორც ანგარიშიდან, ასევე ანგარიშის გაუხსნელად შესრულებული ოპერაცია;

ბ.თ) სესხის გაცემა წარმომდგენზე ფასიანი ქაღალდებით უზრუნველყოფით;

ბ.ი) იურიდიული პირის რეგისტრაციიდან 90 კალენდარულ დღეში თანხის მის საბანკო ანგარიშზე ჩარიცხვა ან ამ ანგარიშიდან გადარიცხვა;

ბ.კ) გრანტის ან საქველმოქმედო დახმარების თანხის ანგარიშზე ჩარიცხვა ან ანგარიშიდან გადარიცხვა;

ბ.ლ) საეჭვო ფინანსური ინსტიტუტის მონაწილეობით განხორციელებული გარიგება (ოპერაცია).

2. მონიტორინგს ექვემდებარება ამ მუხლის პირველი პუნქტის „ა.გ” ქვეპუნქტით განსაზღვრული ფულადი სახსრები, მიუხედავად იმისა კანონიერი თუ უკანონო გზით იქნა იგი მოპოვებული, რომელიც შესაძლებელია, დაკავშირებული იყოს ან გამოყენებულ იქნას ტერორიზმისთვის, ტერორისტული აქტისთვის ან ტერორისტების მიერ ან ტერორიზმის დამფინანსებლების მიერ, ტერორისტი და ტერორიზმის ხელშემწყობი პირების სია ნორმატიული აქტისთვის დადგენილი წესით ქვეყნდება „საქართველოს საკანონმდებლო მაცნეში”.

3.  მონიტორინგს ექვემდებარება აგრეთვე საეჭვო გარიგების დადების ან საბანკო ოპერაციის შესრულების მცდელობა და სხვა ფაქტი (გარემოება), რომელიც, საქართველოს ფინანსური მონიტორინგის სამსახურის წერილობითი მითითებების შესაბამისად შეიძლება უკავშირდებოდეს უკანონო შემოსავლის ლეგალიზაციას ან ტერორიზმის დაფინანსებას.

3^​1. ბანკებმა განსაკუთრებული ყურადღება უნდა მიაქციონ უჩვეულო გარიგებებსა და ამ მუხლის პირველი პუნქტის „ბ.გ” და „ბ.დ” ქვეპუნქტებით განსაზღვრულ გარიგებებს, რომელთაც არ აქვთ აშკარა ეკონომიკური (კომერციული) შინაარსი ან აშკარა კანონიერი მიზანი, შესაძლებლობის ფარგლებში შეისწავლონ ასეთი გარიგების დადების მიზანი და საფუძველი და წერილობით დააფიქსირონ მიღებული შედეგები.

3^​2. ბანკები, „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონის მიზნებიდან გამომდინარე, ამ ბრძანების ამოქმედებიდან ორი თვის ვადაში ამ დებულებისა და საქართველოს ფინანსური მონიტორინგის სამსახურის მითითებების გათვალისწინებით თავად განსაზღვრავენ მათთან საქმიანი ურთიერთობით დაკავშირებული პირის გარიგების უჩვეულო გარიგებისთვის მიკუთვნების პრინციპებს.

4. „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონის მე-5 მუხლის მე-5 პუნქტის შესაბამისად საქართველოს ფინანსური მონიტორინგის სამსახურს უფლება აქვს განსაზღვროს კონკრეტული სახის გარიგებათა (საბანკო ოპერაციათა) ჩამონათვალი (ან მათი დამახასიათებელი ნიშნები, როგორიცაა საბანკო ოპერაციის (გარიგების) მონაწილე პირთა საქმიანობის სფერო, მათი ადგილმდებარეობის (რეგისტრაციის ადგილის) გეოგრაფიული არეალი, გარიგების (საბანკო ოპერაციის) არსი და სხვა), რომელთა შესახებაც უნდა ეცნობოს საქართველოს ფინანსური მონიტორინგის სამსახურს ანგარიშგების წარდგენის ამ დებულებით განსაზღვრული წესით.

საქართველოს ფინანსური მონიტორინგის სამსახურის უფროსის 2007 წლის 17 ოქტომბრის ბრძანება №142-სსმIII, №152, 30.10.2007წ.; მუხ.1693

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 4. ბანკის ვალდებულებანი შიდა კონტროლის განხორციელებასთან დაკავშირებით

1. „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონის მე-8 მუხლის შესაბამისად უკანონო შემოსავლის ლეგალიზაციის ფაქტების თავიდან აცილების მიზნით ბანკი ვალდებულია განახორციელოს შიდა კონტროლი.

2. შიდა კონტროლის განხორციელების ძირითად მიმართულებებად მიჩნეულ უნდა იქნეს:

ა) ბანკთან საქმიანი ურთიერთობებით დაკავშირებული ყველა პირის (კლიენტის), მისი წარმომადგენლისა და მარწმუნებლის, ბენეფიციარი მესაკუთრის, აგრეთვე, თუ საბანკო ოპერაცია (გარიგება) სრულდება მესამე პირის სასარგებლოდ – ამ პირის, იდენტიფიკაცია;

ბ) იდენტიფიკაციის შედეგად მიღებული ინფორმაციის გაანალიზება და მონიტორინგს დაქვემდებარებული საბანკო ოპერაციების (გარიგებების) გამოვლენა;

გ) ინფორმაციის დოკუმენტურად დაფიქსირება, სისტემატიზაცია და შენახვა;

დ) მონიტორინგს დაქვემდებარებული საბანკო ოპერაციების (გარიგებების) შესახებ ინფორმაციის საქართველოს ფინანსური მონიტორინგის სამსახურისათვის წარდგენა ანგარიშგების სპეციალური ფორმით;

ე) ბანკის თანამშრომლების სწავლების პროგრამების განხორციელება (უკანონო შემოსავლების ლეგალიზაციისა და ტერორიზმის დაფინანსების ფაქტების თავიდან აცილების კუთხით).

3. შიდა კონტროლის განხორციელების პროცედურისა და წესის განსაზღვრის მიზნით „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონისა და ამ დებულების საფუძველზე ბანკმა უნდა შეიმუშაოს შიდა ინსტრუქცია, რომელიც უნდა დამტკიცდეს ბანკის სამეთვალყურეო საბჭოს ან დირექტორთა საბჭოს მიერ. შიდა ინსტრუქციით უნდა დადგინდეს ბანკის (მისი ფილიალებისა და წარმომადგენლობების) კლიენტებისა და საქმიანი ურთიერთობების დამყარების მსურველი პირების, მათი ბენეფიციარი მესაკუთრის, ასევე სხვა შესაბამისი პირების იდენტიფიკაციის, იდენტიფიკაციის შედეგად მიღებული ინფორმაციის სისტემატიზაციის, გაანალიზებისა და შენახვის, მონიტორინგს დაქვემდებარებული გარიგებების (საბანკო ოპერაციების) გამოვლენის და საქართველოს ფინანსური მონიტორინგის სამსახურისათვის ანგარიშგების სპეციალური ფორმების წარდგენის პირობები. შიდა ინსტრუქციას უნდა გაეცნოს ბანკის ყველა თანამშრომელი.

4. ბანკის მიერ შემუშავებული და დამტკიცებული მონიტორინგის განხორციელების შიდა ინსტრუქციით უნდა განისაზღვროს:

ა) ბანკის კლიენტების, მათი ბენეფიციარი მესაკუთრის და „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონით განსაზღვრული სხვა შესაბამისი პირების იდენტიფიკაციის პირობები და წესი;

ბ) იდენტიფიკაციის შედეგად მიღებული და ბანკის სხვადასხვა სტრუქტურულ ერთეულებში არსებული სხვა ინფორმაციის მონიტორინგის განხორციელებაზე პასუხისმგებელი თანამშრომლისათვის (სპეციალური სტრუქტურული ერთეულისათვის) გადაცემის წესი;

გ) მონიტორინგის განხორციელებასთან დაკავშირებული ინფორმაციის აღრიცხვის, სისტემატიზაციის და შენახვის წესი;

დ) საქართველოს ფინანსური მონიტორინგის სამსახურისათვის ანგარიშგების სპეციალური ფორმებისა და სხვა მასალების წარდგენის წესი (მათ შორის ანგარიშგების სპეციალური ფორმების შევსებისა და ხელმოწერითა და, თუ ბანკი საჭიროდ ჩათვლის – ბეჭდით დამოწმების უფლებამოსილების მინიჭების და სხვა საკითხები);

ე) მონიტორინგის განხორციელებაზე პასუხისმგებელი თანამშრომლის ფუნქციები, უფლებები და პასუხისმგებლობა (სპეციალური სტრუქტურული ერთეულის არსებობის შემთხვევაში – მისი ხელმძღვანელისა და თითოეული თანამშრომლის ფუნქციები, უფლებები და პასუხისმგებლობა);

ვ) ბანკის სხვა თანამშრომლების (სტრუქტურული ერთეულების), მათ შორის ხელმძღვანელი მუშაკების ფუნქციები, უფლებები და პასუხისმგებლობა მონიტორინგის პროცესის განხორციელებასთან დაკავშირებით, აგრეთვე ბანკის ხელმძღვანელი, რომელსაც უშუალოდ დაეკისრება მონიტორინგის პროცესის ზედამხედველობა;

ზ) ბანკის ხელმძღვანელები, პასუხისმგებელი მუშაკები და/ან თანამშრომლები, რომელთაც შიდა ინსტრუქციით მიენიჭებათ უფლება ფლობდნენ მონიტორინგის განხორციელებასთან დაკავშირებულ კონფიდენციალურ ინფორმაციას;

თ) კლიენტების მიერ წარმოდგენილი დოკუმენტების ასლების დამოწმების წესი და დამოწმების უფლებამოსილების მქონე თანამშრომელი (თანამშრომლები) ამ დებულების მე-8 მუხლის მე-2 პუნქტის შესაბამისად.

5. ბანკის მიერ შემუშავებული და დამტკიცებული მონიტორინგის განხორციელების შიდა ინსტრუქცია აუცილებლად უნდა ითვალისწინებდეს შემდეგ საკითხებს:

ა) გადაწყვეტილება საბანკო ოპერაციის (გარიგების) საეჭვოდ, უჩვეულოდ და/ან დანაწევრების მიზნით განხორციელებულად მიჩნევისა და საქართველოს ფინანსური მონიტორინგის სამსახურისათვის ანგარიშგების სპეციალური ფორმის წარდგენის შესახებ მიიღება ყოველ ცალკეულ შემთხვევაში, ბანკის სათანადო სტრუქტურული ერთეულების მიერ კლიენტებისა და სხვა შესაბამისი პირების იდენტიფიკაციისა და მომსახურების შედეგად მოპოვებული, აგრეთვე ბანკში არსებული (მათ შორის ბანკის სხვადასხვა ფილიალში) ინფორმაციის საფუძველზე (საერთო საბანკო საინფორმაციო ქსელის დანერგვის შემდეგ გამოყენებულ უნდა იქნას ამ ქსელში არსებული ინფორმაციაც). ამასთან, მხედველობაში უნდა იქნას მიღებული საქართველოს ფინანსური მონიტორინგის სამსახურის მიერ ბანკისათვის მიწოდებული მითითებები და სხვა ინფორმაცია. საეჭვო, უჩვეულო და/ან დანაწევრებული საბანკო ოპერაციების (გარიგებების) გამოვლენის მიზნით ბანკი ვალდებულია შექმნას მონაცემთა ელექტრონული ბაზა (სისტემა);

ბ) მონიტორინგის პროცესი საეჭვო საბანკო ოპერაციებთან (გარიგებებთან) მიმართებაში უნდა წარიმართოს იმგვარად, რომ ბანკის კლიენტებისათვის, საბანკო ოპერაციების (გარიგებების) მონაწილე და სხვა შესაბამისი პირებისათვის არ გახდეს ცნობილი, რომ მათი ქმედებები წარმოადგენს მონიტორინგის ობიექტს;

გ) ბანკი ვალდებულია უზრუნველყოს მონიტორინგის განხორციელების შედეგად მოპოვებული ინფორმაციის (მათ შორის: კლიენტების, მათი ბენეფიციარი მესაკუთრეების და სხვა შესაბამისი პირების იდენტიფიკაციის შედეგად მიღებული ინფორმაციის, ამ ინფორმაციის შემოწმებისა და გაანალიზების მასალების), აგრეთვე მონიტორინგს დაქვემდებარებულ საეჭვო საბანკო ოპერაციებთან (გარიგებებთან) დაკავშირებით ანგარიშგების სპეციალური ფორმების შევსებისა და საქართველოს ფინანსური მონიტორინგის სამსახურისათვის წარდგენის შესახებ ინფორმაციის კონფიდენციალურობა;

დ)     ფინანსური მონიტორინგის განხორციელების ერთ-ერთი ძირითადი პრინციპია ბანკის ყველა თანამშრომლის მონაწილეობა (თავიანთი კომპეტენციის ფარგლებში) უკანონო შემოსავლის ლეგალიზაციისა და ტერორიზმის დაფინანსების ფაქტების გამოვლენის ხელშეწყობის პროცესში.

6. ბანკის თანამშრომელთა შერჩევის პოლიტიკა (რომელიც მოიცავს თანამშრომელთა კვალიფიკაციისა და რეპუტაციის შესწავლას), შიდა ინსტრუქციით დადგენილი პროცედურები და წესები მაქსიმალურად უნდა უწყობდეს ხელს უკანონო შემოსავლების ლეგალიზაციისა და ტერორიზმის დაფინანსების პროცესებში ბანკის თანამშრომლების შესაძლო მონაწილეობის აღკვეთას.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 5. მონიტორინგის განხორციელებაზე პასუხისმგებელი თანამშრომლის ფუნქციები და უფლება-მოვალეობანი

1. მონიტორინგის პროცესის წარმართვის მიზნით, ბანკმა სათანადოდ გაფორმებული გადაწყვეტილებით უნდა განსაზღვროს მონიტორინგის განხორციელებაზე პასუხისმგებელი თანამშრომელი (ან სპეციალური სტრუქტურული ერთეული). მონიტორინგის განხორციელებაზე პასუხისმგებელი თანამშრომელის (სტრუქტურული ერთეულის ხელმძღვანელის) თანამდებობა ბანკის ორგანიზაციულ სტრუქტურაში უნდა შეესაბამებოდეს ზედა იერარქიულ დონეს (მონიტორინგის განხორციელებაზე პასუხისმგებელი თანამშრომლის თანამდებობა ბანკის სიდიდიდან გამომდინარე, ბანკებში შესაძლებელია იყოს განსხვავებული,).

2. მონიტორინგის განხორციელებაზე პასუხისმგებელი თანამშრომლის (სპეციალური სტრუქტურული ერთეულის) ფუნქციები, უფლებები და პასუხისმგებლობა უნდა განისაზღვროს ბანკის შიდა ინსტრუქციით, აგრეთვე, თუ ეს გათვალისწინებულია ბანკის შინაგანაწესით – შესაბამისი სამსახურებრივი ინსტრუქციით (სპეციალური სტრუქტურული ერთეულის არსებობის შემთხვევაში - ინსტრუქციებით).

3. მონიტორინგის განხორციელებაზე პასუხისმგებელი თანამშრომელი (სპეციალური სტრუქტურული ერთეული) თავის საქმიანობაში უნდა ხელმძღვანელობდეს “უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონით, ამ დებულებით, ბანკის შიდა ინსტრუქციით, საქართველოს ფინანსური მონიტორინგის სამსახურის მითითებებით და ამ უკანასკნელის მიერ, აგრეთვე საქართველოს საფინანსო ზედამხედველობის სააგენტოსა და საქართველოს ეროვნული ბანკის მიერ გამოცემული შესაბამისი ნორმატიული აქტებით.

4. მონიტორინგის განხორციელებაზე პასუხისმგებელ თანამშრომელს (სპეციალურ სტრუქტურულ ერთეულს) უნდა დაეკისროს შემდეგი ფუნქციები:

ა) მონიტორინგის პროცესის ორგანიზება, „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონით, ამ დებულებითა და ბანკის შიდა ინსტრუქციით განსაზღვრული სამუშაოების შესრულების უზრუნველყოფა;

ბ) ბანკის სხვადასხვა სტრუქტურული ერთეულებისაგან მიღებული ინფორმაციის (მათ შორის, პირების საიდენტიფიკაციო მონაცემების, საბანკო ოპერაციების (გარიგებების) შესახებ ინფორმაციის) გაანალიზება, მონიტორინგს დაქვემდებარებული საბანკო ოპერაციების (გარიგებების) გამოვლენა, მონიტორინგს დაქვემდებარებული საბანკო ოპერაციების (გარიგებების) თაობაზე ანგარიშგების სპეციალური ფორმების შევსების, დამოწმების და საქართველოს ფინანსური მონიტორინგის სამსახურისათვის წარდგენის უზრუნველყოფა ბანკის შიდა ინსტრუქციით განსაზღვრული წესით, მონიტორინგის პროცესთან დაკავშირებული ინფორმაციის (დოკუმენტების) სისტემატიზაცია და შენახვა. (საბანკო ოპერაციის (გარიგების) ან მისი მონაწილე პირის საეჭვოდ მიჩნევის და საქართველოს ფინანსური მონიტორინგის სამსახურისათვის შესაბამისი ანგარიშგების ფორმის წარდგენის შესახებ გადაწყვეტილების მიღების, აგრეთვე ანგარიშგების ფორმების ხელმოწერის უფლებამოსილება ბანკის შიდა ინსტრუქციით შეიძლება მიენიჭოს როგორც მონიტორინგის განხორციელებაზე პასუხისმგებელ თანამშრომელს (სპეციალური სტრუქტურული ერთეულის ხელმძღვანელს), აგრეთვე ბანკის იმ ხელმძღვანელს, რომელიც შიდა ინსტრუქციის თანახმად კურირებს მონიტორინგთან დაკავშირებულ საკითხებს);

გ) უკანონო შემოსავლების ლეგალიზაციისა და ტერორიზმის დაფინანსების აღკვეთის საკითხებთან დაკავშირებით, ბანკის სხვა თანამშრომლების კონსულტირება და სპეციალური სასწავლო პროგრამების ორგანიზება. სასწავლო პროცესს უნდა ჰქონდეს სისტემატური ხასიათი, რათა უზრუნველყოფილ იქნას საქართველოს კანონმდებლობაში, ბანკის შიდა ინსტრუქციაში განხორციელებული ცვლილებების, ასევე ფულის გათეთრებისა და ტერორიზმის დაფინანსების ახალი საშუალებების, მეთოდებისა და მიმართულების თანამშრომლებისათვის გაცნობა;

დ) შიდა ინსტრუქციით დადგენილი წესით ბანკის ხელმძღვანელობისათვის მონიტორინგის პროცესის მიმდინარეობის თაობაზე წერილობითი ანგარიშის, აგრეთვე, საჭიროების შემთხვევაში, ბანკის შიდა ინსტრუქციის სრულყოფის თაობაზე წინადადებების მომზადება და წარდგენა.

5. მონიტორინგის განხორციელებაზე პასუხისმგებელ თანამშრომელს (სპეციალურ სტრუქტურულ ერთეულს) ბანკის შიდა ინსტრუქციით უნდა მიენიჭოს უფლება მიიღოს ბანკის სხვა თანამშრომლებისაგან თავისი ფუნქციების განხორციელებისათვის საჭირო ნებისმიერი ინფორმაცია და დაეკისროს მიღებული ინფორმაციის, აგრეთვე მის საქმიანობასთან დაკავშირებული ნებისმიერი ინფორმაციის კონფიდენციალურობის უზრუნველყოფის ვალდებულება.

6. მონიტორინგის განხორციელებაზე პასუხისმგებელი თანამშრომელი (სპეციალური სტრუქტურული ერთეული) მონიტორინგის განხორციელებასთან დაკავშირებული ფუნქციების შესრულების ნაწილში უნდა ექვემდებარებოდეს მხოლოდ შიდა ინსტრუქციით განსაზღვრულ ბანკის ხელმძღვანელს და იყოს ანგარიშვალდებული მხოლოდ მის წინაშე.

7. თუ მონიტორინგის განხორციელებაზე პასუხისმგებელი თანამშრომელი (სპეციალური სტრუქტურული ერთეულის ხელმძღვანელი) აღმოაჩენს, რომ ბანკის რომელიმე თანამშრომელი არ ასრულებს შიდა ინსტრუქციით დადგენილ წესებს და თავისი კომპეტენციის შესაბამისად არ იღებს მონაწილეობას მონიტორინგის პროცესში, იგი ვალდებულია დაუყოვნებლივ აცნობოს ამის შესახებ ბანკის ხელმძღვანელს, რომელიც შიდა ინსტრუქციის თანახმად კურირებს მონიტორინგთან დაკავშირებულ საკითხებს.

8. მონიტორინგის განხორციელებაზე პასუხისმგებელი თანამშრომელი შეიძლება ამავდროულად ასრულებდეს სხვა ფუნქციებსაც (მონიტორინგის განხორციელებასთან დაკავშირებული ფუნქციების გარდა) იმ პირობით, რომ მას არ უნდა გააჩნდეს ბანკის საანგარიშსწორებო, საბუღალტრო, აგრეთვე ბანკის ვალდებულებებისა და უფლებების რეალიზაციასთან დაკავშირებული დოკუმენტების ხელმოწერის უფლება (მონიტორინგის განხორციელებასთან დაკავშირებული დოკუმენტების გარდა).

9. მონიტორინგის განხორციელებაზე პასუხისმგებელი თანამშრომლის (სპეციალური სტრუქტურული ერთეულის ხელმძღვანელის) არყოფნისას მისი ფუნქციების შესრულება უნდა დაევალოს ბანკის სხვა თანამშრომელს, რაც უნდა დაფიქსირდეს ბანკის სათანადოდ გაფორმებულ გადაწყვეტილებაში, რომლის ასლიც დაუყოვნებლივ უნდა წარედგინოს საქართველოს ფინანსური მონიტორინგის სამსახურს.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 6. ბანკის ვალდებულებანი იდენტიფიკაციასა და საიდენტიფიკაციო მონაცემების (დოკუმენტების) აღრიცხვასთან დაკავშირებით

1. ბანკი ვალდებულია მოახდინოს თავისი ძირითადი საქმიანობიდან გამომდინარე მასთან საქმიანი ურთიერთობით დაკავშირებული პირის (მისი წარმომადგენლისა და მარწმუნებლის, აგრეთვე მესამე პირის, თუ გარიგება იდება მესამე პირის სასარგებლოდ) იდენტიფიკაცია, როდესაც:

ა) გარიგების (ოპერაციის) თანხა აღემატება 3000 ლარს (ან მის ექვივალენტს სხვა ვალუტაში);

ბ) ფულადი გზავნილების (ადგილობრივი და საერთაშორისო (SWIFT, Western Union, Money Gram და სხვა მსგავსი) სისტემებით შესრულებეული ოპერაციებისას (გადარიცხვებისა და ფულადი გზავნილების განხორციელებისას), თანხა აღემატება 1500 ლარს (ან მის ექვივალენტს სხვა ვალუტაში);

გ) ეს გარიგება არის საეჭვო გარიგება ამ დებულების მე-2 მუხლის „ე“ ქვეპუნქტის შესაბამისად;

დ) ჩნდება ეჭვი არსებული კლიენტების საიდენტიფიკაციო მონაცემების სიზუსტესა და/ან შესაბამისობაში.

2. მონიტორინგის განმახორციელებელი პირები ვალდებული არიან მოახდინონ თავიანთი ძირითადი საქმიანობიდან გამომდინარე მათთან საქმიანი ურთიერთობით დაკავშირებული პირების (წარმომადგენლისა და მარწმუნებლის, აგრეთვე მესამე პირის, თუ გარიგება იდება მესამე პირის სასარგებლოდ), მათ მიერ დადებული გარიგებების „უკანონო შემოსავლის ლეგალიზაციის აღკვეთის ხელშეწყობის შესახებ“ კანონისა და ამ დებულების მიზნებიდან გამომდინარე რისკის მიხედვით შეფასება და შესაბამისი რისკის კატეგორიაში გაერთიანება, თითოეულ კატეგორიას მიუსადაგონ შესაბამისი (გამარტივებული ან გაძლიერებული) იდენტიფიკაციისა და საიდენტიფიკაციო მონაცემების შემოწმების პროცედურები. საიდენტიფიკაციო მონაცემების შემოწმება უნდა განხორციელდეს სანდო, დამოუკიდებელ წყაროზე დაყრდნობით.

 3. ბანკები, ამ დებულების მიზნებიდან გამომდინარე, თავად განსაზღვრავენ პროცედურებს, რომლებიც აუცილებელია პირის იდენტიფიკაციისათვის (გარდა ანგარიშის გახსნის პროცედურებისა). ამასთანავე, მათ უფლება აქვთ, მოითხოვონ გარიგებასთან (ოპერაციასთან) და მასში მონაწილე პირებთან დაკავშირებული ნებისმიერი სხვა სახის ინფორმაცია ან/და დოკუმენტები;

4. ბანკები, მათთან საქმიანი ურთიერთობით დაკავშირებული პირის იდენტიფიკაციისას ან/და შემოწმებისას, შეიძლება დაეყრდნონ მესამე პირს/შუამავალს, რომელიც, საერთაშორისო სტანდარტების გათვალისწინებით, ექვემდებარება უკანონო შემოსავლის ლეგალიზაციისა და ტერორიზმის დაფინანსების აღკვეთის შესაბამის ზედამხედველობასა და რეგულირებას. ამასთანავე, ბანკებმა მესამე პირისგან/შუამავლისგან იდენტიფიკაციასთან დაკავშირებული ინფორმაციის (დოკუმენტების ან მათი ასლების) ხელმისაწვდომობის უზრუნველსაყოფად უნდა გაატარონ შესაბამისი ღონისძიება. ამ შემთხვევაში პასუხისმგებლობა ეკისრება მონიტორინგის განმახორციელებელ პირებს (ბანკებს).

5. ბანკებს ეკრძალებათ ფიქტიურ ბანკებთან საკორესპონდენტო ურთიერთობის დამყარება. ისინი ვალდებული არიან მიიღონ გონივრული ზომები, რათა გამოარკვიონ:

 ა) მიეკუთვნება თუ არა მათთან საქმიან ურთიერთობაში მყოფი პირი (ან პირი, რომელთანაც ისინი ამყარებენ საქმიან ურთიერთობას) ფიქტიური ბანკის კატეგორიას;

 ბ) აქვს თუ არა მათთან საქმიან ურთიერთობაში მყოფ პირს (ან პირს, რომელთანაც ისინი ამყარებენ საქმიან ურთიერთობას) ფიქტიურ ბანკთან ურთიერთობა.

6. ბანკებმა საერთაშორისო საკორესპონდენტო ურთიერთობების დამყარებისას საჯარო წყაროებიდან უნდა მოიძიონ ინფორმაცია რესპოდენტი ბანკის რეპუტაციისა და მასზე განხორციელებული ზედამხედველობის ხარისხის შესახებ, წარმოადგენს თუ არა იგი მონიტორინგის განმახორციელებელ პირს ფულის გათეთრებისა და ტერორიზმის დაფინანსებასთან ბრძოლის საკითხებში. ბანკებმა უნდა მოითხოვონ რესპოდენტი ბანკისგან ინფორმაცია მის მიერ ფულის გათეთრებისა და ტერორიზმის დაფინანსების წინააღმდეგ ბრძოლის საკითხებში შიდა კონტროლის განხორციელებასთან დაკავშირებით და შეაფასონ კონტროლის ხარისხი.

7. დაუშვებელია საერთაშორისო საკორესპონდენტო ურთიერთობების დამყარება დირექტორატის (კურატორი დირექტორის) თანხმობის გარეშე.

8. იდენტიფიკაციის პროცესი უნდა წარიმართოს „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონით, ამ დებულებით, საქართველოს ეროვნული ბანკისა და საქართველოს საფინანსო ზედამხედველობის სააგენტოს მიერ გამოცემული შესაბამისი ნორმატიული აქტებით, ბანკის შიდა ინსტრუქციით დადგენილი წესითა და საქართველოს ფინანსური მონიტორინგის სამსახურის მითითებებისა და რეკომენდაციების გათვალისწინებით.

9. ბანკს არა აქვს უფლება გაუწიოს მომსახურება კლიენტს, ან დაამყაროს პირთან საქმიანი ურთიერთობა (მათ შორის აწარმოოს ისეთი საბანკო ოპერაციები, რომლებიც არ ითვალისწინებენ პირის მიერ საბანკო ანგარიშის გახსნას, კერძოდ, ფულადი გზავნილების გაგზავნა ან მიღება, უცხოური ვალუტის ყიდვა-გაყიდვა ბანკნოტების საშუალებით, ბანკნოტების გადაცვლა და სხვა), თუ წინასწარ არ მოახდენს მის იდენტიფიკაციას ამ მუხლის პირველი პუნქტის „ა“, „ბ“ და „გ“ ქვეპუნქტებით გათვალისწინებულ შემთხვევებში.

10. აკრძალულია ანონიმური ან ფიქტიურ სახელზე ანგარიშის გახსნა ან წარმოება.

11. ბანკი ვალდებულია კლიენტთან საქმიანი ურთიერთობის დაწყებამდე გამოარკვიოს, თუ რა სახის და რა მიზნით სურს მას ბანკთან ურთიერთობა, მუდმივად აწარმოოს არსებულ კლიენტებსა და ბანკს შორის ურთიერთობის შესწავლა.

12. ოპერაციის (გარიგების) საეჭვოობის შესახებ ვარაუდის არსებობისა და ოპერაციის (გარიგების) თანხის ოდენობის მიუხედავად, ბანკი არ აჩერებს ოპერაციის (გარიგების) შესრულებას (მასთან საქმიანი ურთიერთობით დაკავშირებული პირის (კლიენტის) მომსახურებას), გარდა შემდეგი შემთხვევებისა:

ა) თუ ბანკთან საქმიანი ურთიერთობის დამყარების მსურველი პირის ან კლიენტის იდენტიფიკაცია ვერ ხერხდება;

ბ) თუ გარიგების მონაწილე რომელიმე პირი შეტანილია ტერორისტ ან ტერორიზმის ხელშემწყობ პირთა სიაში.

13. ამ მუხლის მე-12 პუნქტის „ა“ და „ბ“ ქვეპუნქტებში მითითებულ შემთხვევებში ბანკი ვალდებულია უარი განაცხადოს კლიენტის მომსახურებაზე (პირთან საქმიანი ურთიერთობის დამყარებაზე). ამ მუხლის მე-12 პუნქტის „ა“ ქვეპუნქტში მითითებული შემთხვევის საეჭვოდ მიჩნევის შემთხვევაში და ამ მუხლის მე–12 პუნქტის „ბ“ ქვეპუნქტში მითითებულ შემთხვევებში ბანკი ვალდებულია დაუყოვნებლივ წარუდგინოს საქართველოს ფინანსური მონიტორინგის სამსახურს ანგარიშგების შესაბამისი ფორმა, ბანკის ხელთ არსებული მასალები და ნებისმიერი სხვა ინფორმაცია ამ ოპერაციის (გარიგების) და მისი მონაწილე პირების შესახებ.

14.     იდენტიფიკაციის სტანდარტული პროცედურის შედეგად უნდა დადგინდეს შემდეგი მონაცემები:

ა) ფიზიკური პირის შემთხვევაში:

ა.ა) სახელი და გვარი;

ა.ბ) მოქალაქეობა

ა.გ) დაბადების თარიღი;

ა.დ) საცხოვრებელი ადგილი;

ა.ე) პირადობის მოწმობის (პასპორტის) ნომერი და მოქალაქის პირადი ნომერი პირადობის მოწმობის (პასპორტის) მიხედვით;

ა.ვ) თუ ფიზიკური პირი რეგისტრირებულია როგორც ინდივიდუალური მეწარმე – შესაბამისი რეგისტრაციის თარიღი, ნომერი, მარეგისტრირებელი ორგანო,გადასახადის გადამხდელის საიდენტიფიკაციო ნომერი;

ბ) იურიდიული პირის შემთხვევაში:

ბ.ა) სრული სახელწოდება;

ბ.ბ) საქმიანობის საგანი;

ბ.გ) იურიდიული მისამართი (ფილიალის ან წარმომადგენლობის შემთხვევაში, როგორც მისი მისამართი, ასევე სათაო დაწესებულების მისამართი);

ბ.დ) მარეგისტრირებელი ორგანო, რეგისტრაციის თარიღი და ნომერი;

ბ.ე) გადასახადის გადამხდელის საიდენტიფიკაციო ნომერი;

ბ.ვ)    ხელმძღვანელობასა და წარმომადგენლობაზე უფლებამოსილი პირების საიდენტიფიკაციო მონაცემები (ამ პუნქტის „ა” ქვეპუნქტის შესაბამისად);

ბ.ზ) იმ პირის საიდენტიფიკაციო მონაცემები, რომელიც წარმოადგენს იურიდიულ პირს მონიტორინგს დაქვემდებარებულ კონკრეტულ საბანკო ოპერაციაში (გარიგებაში);

გ) კანონმდებლობით გათვალისწინებული ისეთი ორგანიზაციული წარმონაქმნის შემთხვევაში, რომელიც არ წარმოადგენს იურიდიულ პირს:

გ.ა) სრული სახელწოდება;

გ.ბ) იურიდიული მისამართი;

გ.გ) სამართლებრივი აქტი ან სხვა დოკუმენტი, რომლითაც შექმნილია (ან რომლის საფუძველზეც მოქმედებს) ეს ორგანიზაციული წარმონაქმნი;

გ.დ) გადასახადის გადამხდელის საიდენტიფიკაციო ნომერი;

გ.ე) ხელმძღვანელობასა და წარმომადგენლობაზე უფლებამოსილი პირების საიდენტიფიკაციო მონაცემები (ამ პუნქტის “ა” ქვეპუნქტის შესაბამისად);

გ.ვ) იმ პირის საიდენტიფიკაციო მონაცემები, რომელიც წარმოადგენს ასეთ ორგანიზაციულ წარმონაქმნს მონიტორინგს დაქვემდებარებულ კონკრეტულ საბანკო ოპერაციაში (გარიგებაში).

15. იდენტიფიკაციისათვის საჭირო დოკუმენტებია:

ა) თუ ფიზიკური პირი საქართველოს მოქალაქეა – პირადობის მოწმობა, ან პასპორტი, ან საქართველოს კანონმდებლობით მათთან გათანაბრებული სხვა ოფიციალური დოკუმენტი, რომელიც შეიცავს სათანადო მონაცემებს, ხოლო, თუ ფიზიკური პირი რეგისტრირებულია როგორც ინდივიდუალური მეწარმე – აგრეთვე მისი რეგისტრაციის დამადასტურებელი დოკუმენტი;

ბ) თუ ფიზიკური პირი უცხო სახელმწიფოს მოქალაქეა – შესაბამისი ქვეყნის სათანადო ორგანოს მიერ გაცემული პასპორტი;

გ) რეზიდენტი იურიდიული პირის შემთხვევაში (აგრეთვე, იმ ორგანიზაციული წარმონაქმნის შემთხვევაში, რომელიც არ წარმოადგენს იურიდიულ პირს) – სასამართლოს (საქართველოს კანონმდებლობით გათვალისწინებული სხვა ორგანოს) დადგენილება (სხვა შესაბამისი სამართლებრივი აქტი ან დოკუმენტი) მისი შექმნის შესახებ, ასევე რეგისტრაციის მოწმობა (ამონაწერი სამეწარმეო და სხვა შესაბამისი რეესტრიდან) და პირის წარმომადგენლობაზე უფლებამოსილების დამადასტურებელი დოკუმენტი.

დ) არარეზიდენტი იურიდიული პირის შემთხვევაში შესაბამისი ქვეყნის სათანადო ორგანოების მიერ გაცემული პირის შექმნისა და რეგისტრაციის დამადასტურებელი დოკუმენტები და პირის წარმომადგენლობაზე უფლებამოსილების დამადასტურებელი დოკუმენტი.

16. ფიზიკური პირის იდენტიფიკაციისათვის პირადობის მოწმობის და პასპორტის გარდა პირადობის დამადასტურებელი სხვა დოკუმენტის გამოყენება შეიძლება მხოლოდ ისეთ გამონაკლის შემთხვევებში, როდესაც პირს არ შეიძლება გააჩნდეს პირადობის მოწმობა ან პასპორტი (მაგალითად, არასრულწლოვანი პირის სახელზე ანაბრის გახსნის შემთხვევაში).

17. ბანკებმა უნდა დააფიქსირონ პირის იდენტიფიკაციისათვის წარმოდგენილი დოკუმენტების გამცემი ქვეყანა, ორგანო, გაცემის თარიღი და მოქმედების ვადა.

18. ბანკებმა უნდა მიიღონ გონივრული ზომები მათთან საქმიანი ურთიერთობით დაკავშირებული პირის ბენეფიციარი მესაკუთრის ვინაობის დადგენისა და გადამოწმების მიზნით. ბენეფიციარი მესაკუთრის მიმართ უნდა გატარდეს ფიზიკური პირის მსგავსი საიდენტიფიკაციო პროცედურები.

19. ბანკის მუდმივი კლიენტების (იმ პირების, რომელთაც ბანკში გახსნილი აქვთ ერთი ან მეტი საბანკო ანგარიში და, რომლებიც პერიოდულად მიმართავენ ბანკს ფინანსური ოპერაციების განსახორციელებლად), საიდენტიფიკაციო მონაცემების დაფიქსირების, სისტემატიზაციისა და მათი უკეთ შესწავლის მიზნით ბანკს შეუძლია გამოიყენოს კლიენტების ანკეტირების პროცედურა. ანკეტირების პროცესის პარალელურად ბანკმა უნდა უზრუნველყოს შესაბამის მონაცემთა ელექტრონული ბაზის შექმნა.

20. ანკეტირების პროცესის გამოყენება დასაშვებია აგრეთვე იმ პირების იდენტიფიკაციისათვის, რომლებიც მიმართავენ ბანკს ერთჯერადი ფინანსური ოპერაციის განხორციელების მიზნით (ფულადი გზავნილების გაგზავნა ან მიღება, ვალუტის ყიდვა-გაყიდვა, ბანკნოტების გადაცვლა და სხვა), ან წარმოადგენენ საბანკო ოპერაციის (გარიგების) მონაწილე მეორე ან მესამე (თუ საბანკო ოპერაცია (გარიგება) სრულდება მესამე პირის სასარგებლოდ) პირებს.

21. თუ იდენტიფიკაციისათვის წარმოდგენილი დოკუმენტები ან ბანკში არსებული ინფორმაცია იძლევა საშუალებას, ამ მუხლის მე-14 პუნქტის „ა“, „ბ” და „გ” ქვეპუნქტებში მითითებული ინფორმაციის გარდა, უნდა დაფიქსირდეს აგრეთვე შემდეგი მონაცემები:

ა) ფიზიკური პირის შემთხვევაში:

ა.ა) მამის სახელი;

ა.ბ) დაბადების ადგილი;

ა.გ) დროებითი (ფაქტობრივი) საცხოვრებელი ადგილი (როგორც საქართველოში, ისე საზღვარგარეთ), თუ იგი არ ემთხვევა რეგისტრირებულ საცხოვრებელ ადგილს;

ა.დ) ძირითადი საქმიანობა და დაკავებული თანამდებობა;

ა.ე) სხვა ბანკებში საბანკო ანგარიშის (ანგარიშების) რეკვიზიტები;

ა.ვ) ტელეფონი, ფაქსი, ელექტრონული ფოსტის მისამართი;

ბ) იურიდიული პირის შემთხვევაში (აგრეთვე იმ ორგანიზაციული წარმონაქმნის შემთხვევაში, რომელიც არ წარმოადგენს იურიდიულ პირს):

ბ.ა) ხელმძღვანელობასა და წარმომადგენლობაზე უფლებამოსილი პირების თანამდებობაზე დანიშვნის თარიღი;

ბ.ბ) სხვა ბანკებში საბანკო ანგარიშის (ანგარიშების) რეკვიზიტები.

22. ბანკები ვალდებულნი არიან პერიოდულად (შიდა ინსტრუქციით დადგენილ შემთხვევებში და ვადებში) განაახლონ და მოიყვანონ მოქმედ ნორმებთან შესაბამისობაში არსებული საიდენტიფიკაციო მონაცემები.

23. კლიენტების იდენტიფიკაციასთან, ანკეტირებასთან და არსებული საიდენტიფიკაციო მონაცემების განახლებასთან დაკავშირებული სამუშაოების განხორციელების დეტალური წესი და ბანკის თანამშრომლების შესაბამისი ფუნქციები განისაზღვრება ბანკის შიდა ინსტრუქციით.

საქართველოს ფინანსური მონიტორინგის სამსახურის უფროსის 2007 წლის 17 ოქტომბრის ბრძანება №142-სსმIII, №152, 30.10.2007წ.; მუხ.1693

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 6^​1. ბანკის ვალდებულებანი ფულადი გზავნილების (გადარიცხვების) განხორციელებისას საიდენტიფიკაციო მონაცემების ასახვასთან დაკავშირებით

1. მე-6 მუხლის პირველი პუნქტის „ბ” ქვეპუნქტით განსაზღვრული ოპერაციების (გადარიცხვების, ფულადი გზავნილების) შესრულებისას ბანკი ვალდებულია პირის საიდენტიფიკაციო მონაცემები ასახოს ფულადი სახსრების გადარიცხვის განკარგულებაში (სალარე და უცხოური ვალუტის საგადახდო დავალებაში, სწრაფი ფულადი გზავნილების განაცხადის ფორმაში).

2. ადგილობრივი და საერთაშორისო გადარიცხვების/ფულადი გზავნილების შესრულებისას სავალდებულოა შემდეგი ინფორმაციის ასახვა:

ა) დასახელება,

ბ) ანგარიშის ნომერი (ასეთის არსებობის შემთხვევაში) ან პირის უნიკალური კოდი,

გ) მისამართი (მისამართი შეიძლება ჩაინაცვლოს: ფიზიკური პირის შემთხვევაში – პირადი ნომრით პირადობის მოწმობის/პასპორტის მიხედვით ან დაბადების თარიღითა და ადგილით, გადამხდელის საიდენტიფიკაციო კოდით, ხოლო იურიდიული პირის შემთხვევაში - გადამხდელის საიდენტიფიკაციო კოდით)

3. ამ მუხლის მე-2 პუნქტში აღნიშნული საიდენტიფიკაციო მონაცემები შეყვანილ უნდა იქნას ფულადი გზავნილების შესაბამისი სისტემის ელექტრონულ საბუთშიც, იმგვარად, რომ გადარიცხვის/ფულადი გზავნილის შესრულების შემდგომ აღნიშნული ინფორმაცია გადაცემულ იქნას თანხის მიმღებ დაწესებულებამდე.

4. თუ ტექნიკურად შეუძლებელია ფულადი გზავნილების სისტემაში ამ მუხლის მე–2 პუნქტში მოყვანილი საიდენტიფიკაციო მონაცემების ელექტრონული სახით სრულად ასახვა, გადამხდელი ბანკი ვალდებულია, თანხის მიმღები დაწესებულების მიერ გადამხდელის დამატებითი საიდენტიფიკაციო მონაცემების მოთხოვნისას, მიაწოდოს აღნიშნული ინფორმაცია.

5. ბანკებმა, რომლებიც გადარიცხვების პროცესში ასრულებენ შუამავლების როლს, უნდა უზრუნველყონ პირის საიდენტიფიკაციო მონაცემების გატარება (გადატანა) გადამხდელი ბანკიდან მიმღებ ბანკამდე. თუ ტექნიკური მიზეზების გამო შეუძლებელია აღნიშნულის შესრულება, შუამავალმა ბანკებმა უნდა შეინახონ გადამხდელის საიდენტიფიკაციო მონაცემები ამ დებულების მე-8 მუხლის პირველი პუნქტით განსაზღვრული ვადით.

6. დასაშვებია ადგილობრივი გადარიცხვების შესრულებისას მხოლოდ ამ მუხლის მე–2 პუნქტის „ა” და „ბ” ქვეპუნქტებით განსაზღვრული ინფორმაციის ასახვა. ამ შემთხვევაში გადამხდელი ბანკი ვალდებულია თანხის მიმღები დაწესებულების მიერ გადამხდელის სრული საიდენტიფიკაციო მონაცემების მოთხოვნისას (ან კანონმდებლობით განსაზღვრულ სხვა შემთხვევებში), მიაწოდოს აღნიშნული ინფორმაცია სამი საბანკო დღის განმავლობაში.        

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

 

     მუხლი 7. ბანკის ვალდებულებანი საბანკო ოპერაციების (გარიგებების) შესახებ ინფორმაციის (დოკუმენტების) აღრიცხვასთან დაკავშირებით

1. „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონის მე-6 მუხლის მე-4 პუნქტის შესაბამისად ბანკი ვალდებულია აღრიცხოს ინფორმაცია (დოკუმენტები) საბანკო ოპერაციების და/ან გარიგებების შესახებ.

2. საბანკო ოპერაციის (გარიგების) შესახებ ინფორმაციის აღრიცხვის მოთხოვნა ვრცელდება როგორც თვით ბანკის მიერ დადებულ გარიგებებზე და შესრულებულ საბანკო ოპერაციებზე, ასევე კლიენტების დავალებით შესრულებულ საბანკო ოპერაციებზე და იმ გარიგებებზე, რომლებიც საბანკო ოპერაციის განხორციელების საფუძველს წარმოადგენენ.

3. საბანკო ოპერაციის შესახებ ინფორმაციის აღრიცხვის დროს ბანკმა უნდა დააფიქსიროს შემდეგი ინფორმაცია:

ა) ოპერაციის შინაარსი (მაგალითად, თანხის გადარიცხვა, ანგარიშზე განთავსება, ფულადი გზავნილის გაგზავნა ან მიღება და ა.შ.);

ბ) ოპერაციის შესრულების თარიღი, თანხა და ვალუტა, რომელშიც ოპერაცია უნდა შესრულდეს;

გ) იმ პირის საიდენტიფიკაციო მონაცემები, რომლის დავალებითაც ბანკი ახორციელებს ოპერაციას (ოპერაციის განმახორციელებელი პირის), მათ შორის იმ საბანკო ანგარიშის (ანგარიშების) სახეობა, ნომერი და გახსნის თარიღი (საჭიროების შემთხვევაში აგრეთვე ანგარიშის დახურვის თარიღი), რომელიც გამოიყენება ამ კონკრეტული ოპერაციის შესრულებისათვის;

დ) ოპერაციის მეორე მხარე (მისი არსებობის შემთხვევაში) და მისი საბანკო რეკვიზიტები (მაგალითად, თანხის გადარიცხვის შემთხვევაში – შესაბამისი საბანკო დაწესებულების დასახელება, ანგარიშის სახეობა, ნომერი და ანგარიშის მფლობელი);

ე) იმ პირის საიდენტიფიკაციო მონაცემები, რომელიც მოქმედებს ბანკის კლიენტის დავალებით (წარმომადგენლის, რწმუნებულის); აგრეთვე შესაბამისი მინდობილობის ან რწმუნების შინაარსი, გამცემი პირი, გაცემის თარიღი და მოქმედების ვადა, მინდობილობის ან რწმუნების დამმოწმებელი პირი (მაგალითად, ნოტარიუსი), დამოწმების თარიღი და ადგილი;

ვ) თუ ოპერაცია სრულდება მესამე პირის სასარგებლოდ – ამ პირის საიდენტიფიკაციო მონაცემები;

ზ) ოპერაციის შესრულების საფუძველი – ინფორმაციის არსებობის შემთხვევაში (მაგალითად, ოპერაციის შესრულების საფუძვლად შეიძლება მიჩნეული იქნას ბანკის კლიენტის მიერ დადებული გარიგება, რომლის საფუძველზეც იგი ახორციელებს საბანკო ოპერაციას და ა.შ.).

4. ბანკსა და კლიენტს შორის დადებული გარიგების (მათ შორის სასესხო ან საბანკო მომსახურების თაობაზე დადებული გარიგების), აგრეთვე იმ გარიგების შესახებ ინფორმაციის აღრიცხვის დროს, რომელიც საბანკო ოპერაციის განხორციელების საფუძველს წარმოადგენს, ბანკმა უნდა დააფიქსიროს შემდეგი ინფორმაცია:

ა) გარიგების სახე (მაგალითად, ნასყიდობა, ყიდვა-გაყიდვა, იჯარა, ლიზინგი და ა.შ.);

ბ) გარიგების საგანი (კონკრეტული ნივთი, მატერიალური ფასეულობა ან არამატერიალური უფლება, რომელიც გარიგების საგანს წარმოადგენს, ან მომსახურება, სამუშაო, რომელიც გარიგების თანახმად უნდა შესრულდეს);

გ) გარიგების ფორმა (წერილობითი ხელშეკრულება, ზეპირი გარიგება);

დ) გარიგების მიზანი (მაგალითად, კომერციული საქმიანობა, მოგების მიღება, ქველმოქმედება, ვალის გადახდა და სხვა);

ე) გარიგების მონაწილე პირების (მათ შორის მათი წარმომადგენლებისა და მარწმუნებლების) საიდენტიფიკაციო მონაცემები;

ვ) გარიგების დადების თარიღი, ადგილი და მოქმედების ვადა;

ზ) გარიგების თანხის ოდენობა და ვალუტა, რომელშიც გარიგება უნდა შესრულდეს;

თ) იმ შემთხვევაში, თუ გარიგება ექვემდებარება რეგისტრაციას (დამოწმებას) – გარიგების მარეგისტრირებელი ორგანოს დასახელება, რეგისტრაციის თარიღი, ადგილი და ნომერი (მაგალითად, გარიგების ნოტარიულად დამოწმების შემთხვევაში).

5. ამ მუხლის მე-3 და მე-4 პუნქტებში მითითებული ინფორმაციის დოკუმენტურად დაფიქსირების, სისტემატიზაციის და შენახვის მიზნით ბანკმა უნდა შეიმუშაოს შესაბამისი სისტემა.

6. იმ პირების საიდენტიფიკაციო მონაცემები, რომლებიც არ არიან ბანკის კლიენტები (ბანკთან საქმიანი ურთიერთობით დაკავშირებული პირები), აღირიცხება წარმოდგენილი (ბანკის ხელთ არსებული) ინფორმაციის (დოკუმენტების) საფუძველზე. ბანკს არ ევალება დამატებით მოსთხოვოს კლიენტს გარიგების მეორე მხარის საიდენტიფიკაციო დოკუმენტების წარმოდგენა.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 8. ბანკის ვალდებულებანი გარიგების შესახებ ინფორმაციის (დოკუმენტების) შენახვასთან დაკავშირებით

1. ბანკი ვალდებულია პირის იდენტიფიკაციისათვის წარმოდგენილი ინფორმაცია (დოკუმენტები) შეინახოს ამ პირთან საქმიანი ურთიერთობის გაწყვეტის მომენტიდან არანაკლებ 6 წლის განმავლობაში, ასევე საბანკო ოპერაციის (გარიგების) შესახებ სხვა ინფორმაცია (დოკუმენტები და ამ დებულების მე–3 მუხლის 3^​1 პუნქტით განსაზღვრული ჩანაწერები) – საბანკო ოპერაციის (გარიგების) შესრულების დღიდან არანაკლებ 6 წლის განმავლობაში, თუ შესაბამისი საზედამხედველო ორგანოს მიერ არ არის მოთხოვნა უფრო მეტი ვადით შენახვაზე ან/და საქართველოს კანონმდებლობით ასეთი ინფორმაციის (დოკუმენტებისა და ჩანაწერების) შენახვისათვის უფრო მეტი ვადა არ არის დაწესებული. ამასთან, ინფორმაცია უნდა იყოს შენახული როგორც დოკუმენტური, ასევე ელექტრონული სახით (შესაბამისი მონაცემთა ბაზები და სხვა).

2. საბანკო ოპერაციის (გარიგების) შესახებ, მათ შორის, პირის იდენტიფიკაციისათვის წარმოდგენილი ინფორმაცია (დოკუმენტები) ინახება ორიგინალის სახით, ხოლო თუ ეს შეუძლებელია – ასლების სახით. ამასთან, ასლები უნდა იყოს დამოწმებული ნოტარიუსის ან თავად ბანკის უფლებამოსილი თანამშრომლის მიერ. ამ უკანასკნელი მოთხოვნის შესრულების უზრუნველსაყოფად ბანკმა შიდა ინსტრუქციით ან სათანადოდ გაფორმებული გადაწყვეტილებით უნდა განსაზღვროს თანამშრომელი (თანამშრომლები), რომელსაც მიენიჭება ასლის დამოწმების უფლება. ასლი უნდა იყოს დამოწმებული იმგვარად, რომ ნათლად ჩანდეს, ვის მიერ არის იგი დამოწმებული და დამოწმების თარიღი.

3. ამ მუხლის პირველ პუნქტში მითითებული ინფორმაციის გარდა, აგრეთვე 6 წლის ვადით (თუ შესაბამისი საზედამხედველო ორგანოს მიერ არ არის მოთხოვნა უფრო მეტი ვადით შენახვაზე) შენახვას ექვემდებარება „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონის მე-9 მუხლისა და ამ დებულების მე-9 მუხლის შესაბამისად საქართველოს ფინანსური მონიტორინგის სამსახურისათვის წარდგენილი ანგარიშგების ფორმები. ამასთან, ბანკში შენახული ნაბეჭდი ანგარიშგების ფორმები უნდა იყოს დამოწმებული ბანკის იმ თანამშრომლის ხელმოწერით, რომელსაც ანგარიშგების ფორმების ხელმოწერის უფლებამოსილება მინიჭებული აქვს ბანკის შიდა ინსტრუქციით და, თუ ეს გათვალისწინებულია ბანკის შიდა ინსტრუქციით – ბანკის ბეჭდითაც.

4. ბანკში შენახული ინფორმაცია (დოკუმენტები) სრულად უნდა ასახავდეს შესრულებულ საბანკო ოპერაციას და/ან გარიგებას და მის მონაწილე პირებს. გარდა ამისა, იგი უნდა იყოს აღრიცხული, სისტემატიზირებული და შენახული იმგვარად, რომ საჭიროების შემთხვევაში (მათ შორის საზედამხედველო ორგანოებისთვის მათი ოპერატიულად წარდგენის, ასევე სისხლისსამართლებრივი დევნისას მტკიცებულებების სახით გამოყენების აუცილებლობის შემთხვევაში) შესაძლებელი იყოს მისი მოძიება და ამოღება უმოკლეს ვადაში.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 9. ბანკის ვალდებულებანი მონიტორინგს დაქვემდებარებულ საბანკო ოპერაციათა (გარიგებათა) შესახებ ანგარიშგების ფორმების წარდგენასთან დაკავშირებით

1. „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონის მე-9 მუხლის შესაბამისად ბანკი ვალდებულია მიაწოდოს საქართველოს ფინანსური მონიტორინგის სამსახურს წერილობითი ცნობები ზემოაღნიშნული კანონის მე-5 მუხლითა და ამ დებულების მე-3 მუხლით განსაზღვრულ მონიტორინგს დაქვემდებარებულ საბანკო ოპერაციებთან (გარიგებებთან) დაკავშირებით, ასევე არსებული საიდენტიფიკაციო მონაცემების უტყუარობაში ეჭვის გაჩენის შემთხვევაში.

2. საქართველოს ფინანსური მონიტორინგის სამსახურისათვის წარდგენილი წერილობითი ცნობები უნდა იყოს შედგენილი „მონიტორინგს დაქვემდებარებული საბანკო ოპერაციის (გარიგების) ანგარიშგების ფორმის“ (შემდგომში „ანგარიშგების ფორმა“) მიხედვით (დანართი №1).

3. ანგარიშგების ფორმები უნდა მიეწოდოს (შეივსოს და გაიგზავნოს) საქართველოს ფინანსური მონიტორინგის სამსახურს როგორც ნაბეჭდი, ასევე ელექტრონული ფორმით.

4. ანგარიშგების ფორმების მიწოდება (შევსება და გაგზავნა) საქართველოს ფინანსური მონიტორინგის სამსახურისათვის უნდა განხორციელდეს შემდეგ ვადებში:

ა) თუ საბანკო ოპერაციის (გარიგების) ან საბანკო ოპერაციათა (გარიგებათა) ერთობლიობის თანხა აღემატება 30 000 ლარს, ან მის ეკვივალენტს სხვა ვალუტაში – საბანკო ოპერაციის შესრულებიდან ან გარიგების დადებიდან (ან ასეთი გარიგების, ოპერაციათა (გარიგებათა) ერთობლიობის არსებობის შესახებ ინფორმაციის მიღებიდან) არა უგვიანეს 5 სამუშაო დღისა;

ბ) თუ საბანკო ოპერაცია (გარიგება) ან საიდენტიფიკაციო მონაცემები მიჩნეულია საეჭვოდ ან არსებობს დასაბუთებული ვარაუდი, რომ საბანკო ოპერაცია (გარიგება) წარმოადგენს დანაწევრების მიზნით განხორციელებული ოპერაციების (გარიგებების) ერთობლიობის შემადგენელ ნაწილს – შესაბამისი ეჭვის ან ვარაუდის წარმოშობიდან არა უგვიანეს 3 სამუშაო დღისა;

გ) თუ საბანკო ოპერაციის (გარიგების) მონაწილე რომელიმე პირი შეტანილია ტერორისტი ან ტერორიზმის ხელშემწყობ პირების სიაში ან/და შესაძლებელია დაკავშირებული იყოს მათთან ან/და მასში მონაწილე ფულადი სახსრები, შესაძლებელია, დაკავშირებული იყოს ან გამოყენებულ იქნას ტერორიზმისთვის, ტერორისტული აქტისთვის ან ტერორისტების მიერ ან ტერორიზმის დამფინანსებლების მიერ – შესაბამისი ინფორმაციის მიღების დღესვე. ამასთან, ამ უკანასკნელ შემთხვევაში, ანგარიშგების ფორმასთან ერთად საქართველოს ფინანსური მონიტორინგის სამსახურს უნდა მიეწოდოს ბანკის ხელთ არსებული ყველა სათანადო მასალა და დოკუმენტი.

5. თუ ანგარიშგების ფორმის გაგზავნა ობიექტური მიზეზების გამო ვერ ხერხდება ამ მუხლის მე-4 პუნქტში მითითებულ ვადებში, ბანკის ხელთ არსებული ინფორმაცია უნდა მიეწოდოს საქართველოს ფინანსური მონიტორინგის სამსახურს კომუნიკაციის არსებული საშუალებით (ტელეფონით, ფაქსით, ელექტრონული ფოსტით). ზემოაღნიშნული საშუალებით ინფორმაციის მიწოდების მიუხედავად, ბანკი ვალდებულია, ინფორმაციის მიწოდებიდან არა უგვიანეს 3 სამუშაო დღისა, გაუგზავნოს საქართველოს ფინანსური მონიტორინგის სამსახურს სათანადოდ შევსებული ანგარიშგების ფორმა, რომელშიც უნდა აღინიშნოს ინფორმაციის მიწოდების საშუალება, ზუსტი დრო, გამგზავნი და მიმღები პირები, აგრეთვე ანგარიშგების ფორმის დაგვიანებით წარდგენის მიზეზები.

6. ანგარიშგების ფორმის ნაბეჭდი სახით (აგრეთვე საჭიროების შემთხვევაში, თანდართული მასალების) საქართველოს ფინანსური მონიტორინგის სამსახურისთვის მიწოდება ხდება საიმედოდ დაბეჭდილი კონვერტით, ბანკის უფლებამოსილი კურიერის მიერ, ხოლო თუ საკურიერო მომსახურების გამოყენება შეუძლებელია - ფოსტის საშუალებით შეკვეთილი საფოსტო გზავნილის სახით. კონვერტზე უნდა აღინიშნოს მისი გამომგზავნი ბანკის სახელწოდება და მისამართი, ადრესატი საქართველოს ფინანსური მონიტორინგის სამსახური, მისი მისამართი - 0105, საქართველო, ქ. თბილისი, გ. ლეონიძის ქ. №3/5 და კონფიდენციალური ინფორმაციის გრიფი.

7. ანგარიშგების ფორმის ელექტრონული ვერსიის, აგრეთვე მონიტორინგს დაქვემდებარებული საბანკო ოპერაციების (გარიგებების) შესახებ სხვა კონფიდენციალური ინფორმაციის ელექტრონული ფოსტის მეშვეობით გაგზავნა ხდება კოდირებული ფაილის სახით ელექტრონული ფოსტის შემდეგ მისამართზე: „str@fms.gov.ge”. საქართველოს ფინანსური მონიტორინგის სამსახურისათვის ელექტრონული ფოსტის საშუალებით წარსადგენი კონფიდენციალური ინფორმაციის კოდირება ხდება საქართველოს ფინანსური მონიტორინგის სამსახურის მიერ შემუშავებული წესის მიხედვით.

8. ინფორმაცია მონიტორინგს დაქვემდებარებული საბანკო ოპერაციების (გარიგებების) შესახებ უნდა მიეწოდოს საქართველოს ფინანსური მონიტორინგის სამსახურს ტელეფონისა და ფაქსის შემდეგ ნომრებზე: ტელეფონი/ფაქსი: (+995 32) 31 27 03.

9. გადაწყვეტილებას ანგარიშგების ფორმის შევსებისა და საქართველოს ფინანსური მონიტორინგის სამსახურისათვის გაგზავნის შესახებ იღებს ბანკის ის თანამშრომელი, რომელსაც ბანკის შიდა ინსტრუქციით მინიჭებული აქვს შესაბამისი უფლებამოსილება.

10. ანგარიშგების ფორმების შევსების უფლება აქვთ ბანკის მხოლოდ იმ თანამშრომლებს, რომლებსაც შესაბამისი უფლებამოსილება მინიჭებული აქვთ ბანკის შიდა ინსტრუქციით.

11. ანგარიშგების ფორმა უნდა დაიბეჭდოს ორ ეგზემპლარად, რომელთაგან თითოეული უნდა დამოწმდეს ბანკის შიდა ინსტრუქციით განსაზღვრული თანამშრომლის (მონიტორინგის განხორციელებაზე პასუხისმგებელი თანამშრომლის, სპეციალური სტრუქტურული ერთეულის არსებობის შემთხვევაში – მისი ხელმძღვანელის ან ბანკის იმ ხელმძღვანელის, რომელიც კურირებს მონიტორინგთან დაკავშირებულ საკითხებს) ხელმოწერით და, თუ ეს გათვალისწინებულია ბანკის შიდა ინსტრუქციით – ბანკის ბეჭდითაც. ფორმის ერთი ეგზემპლარი ეგზავნება საქართველოს ფინანსური მონიტორინგის სამსახურს, ხოლო მეორე – რჩება ბანკში და ექვემდებარება შენახვას არანაკლებ 6 წლის განმავლობაში.

12. ბანკი ვალდებულია აწარმოოს საქართველოს ფინანსური მონიტორინგის სამსახურისათვის გაგზავნილი ანგარიშგების ფორმების აღრიცხვა, რაც უნდა ითვალისწინებდეს ანგარიშგების თითოეული ფორმისათვის ინდივიდუალური ნომრის მინიჭებას. ანგარიშგების ფორმების ნუმერაცია უნდა იყოს თანმიმდევრული ყოველი კალენდარული წლის განმავლობაში და უნდა აისახებოდეს სპეციალურ ჟურნალში, რომლის გვერდები უნდა იყოს დანომრილი. ანგარიშგების ფორმის გამომგზავნი ბანკი (ბანკის ფილიალი) ფორმის შესაბამის გრაფებში მიუთითებს როგორც ფორმის ნომერს, ისე საქართველოს ფინანსური მონიტორინგის სამსახურის მიერ ბანკისათვის (ფილიალისათვის) მინიჭებულ ინდივიდუალურ სააღრიცხვო კოდს.

13. ანგარიშგების ფორმა ივსება სრულად. თუ ფორმით გათვალისწინებული რომელიმე მონაცემი ბანკს არ გააჩნია, შესაბამის გრაფაში უნდა ჩაიწეროს: „ინფორმაცია არ გაგვაჩნია”, ხოლო, თუ კონკრეტული საბანკო ოპერაციის (გარიგების) თავისებურებებიდან გამომდინარე, ფორმის რომელიმე გრაფის შევსება არ არის საჭირო, შესაბამისი გრაფა უნდა შეივსოს „——” სიმბოლოებით.

14. თუ ანგარიშგების ფორმის რომელიმე გრაფაში არ არის საკმარისი ადგილი ბანკის ხელთ არსებული ინფორმაციის სრულად ჩასაწერად, ფორმას უნდა დაერთოს დამატებითი ფურცელი (ფურცლები), რომელშიც დაწვრილებით აისახება საჭირო ინფორმაცია. თითოეული დამატებითი ფურცლის თავში უნდა მიეთითოს იმ ფორმის და გრაფის ნომრები, რომლის დანართსაც იგი წარმოადგენს. თითოეული დამატებითი ფურცელი უნდა იყოს დამოწმებული ბანკის იმ თანამშრომლის ხელმოწერით, რომელსაც ანგარიშგების ფორმების ხელმოწერის უფლებამოსილება მინიჭებული აქვს ბანკის შიდა ინსტრუქციით.

15. კანონმდებლობით გათვალისწინებული იმ ორგანიზაციული წარმონაქმნების შესახებ, რომლებიც არ წარმოადგენენ იურიდიულ პირებს, ივსება ფორმის ის გრაფები, რომლებიც განკუთვნილია იურიდიული პირებისათვის.

16. საეჭვო საბანკო ოპერაციის (გარიგების) გამოვლენისა და მასთან დაკავშირებით საქართველოს ფინანსური მონიტორინგის სამსახურისათვის ანგარიშგების ფორმის წარდგენის შემთხვევაში ბანკი ვალდებულია განსაკუთრებული ყურადღება დაუთმოს ამ საბანკო ოპერაციის (გარიგების) მონაწილე პირების მიერ განხორციელებულ სხვა საბანკო ოპერაციებს (გარიგებებს).

17. „უკანონო შემოსავლის ლეგალიზაციის აღკვეთის ხელშეწყობის შესახებ” საქართველოს კანონის მე-10 მუხლის მე-4 პუნქტის „ა” ქვეპუნქტის შესაბამისად საქართველოს ფინანსური მონიტორინგის სამსახურს უფლება აქვს მოითხოვოს ბანკისაგან დამატებითი ინფორმაცია და მის ხელთ არსებული დოკუმენტები (კონფიდენციალურის ჩათვლით) ნებისმიერ საბანკო ოპერაციასთან (გარიგებასთან) და მის მონაწილე პირებთან დაკავშირებით, მათ შორის იმ საბანკო ოპერაციების (გარიგებების) თაობაზე, რომელთა შესახებაც ანგარიშგების ფორმა არ იყო წარდგენილი საქართველოს ფინანსური მონიტორინგის სამსახურში. ბანკი ვალდებულია მიაწოდოს (გაუგზავნოს) საქართველოს ფინანსური მონიტორინგის სამსახურს მის მიერ მოთხოვნილი ინფორმაცია მოთხოვნის მიღებიდან არა უგვიანეს 2 სამუშაო დღის ვადაში.

18. თუ ანგარიშგების ფორმის წარდგენის შემდეგ ბანკი შეიტყობს (ან მის ხელთ აღმოჩნდება) შესაბამის საბანკო ოპერაციასთან (გარიგებასთან) ან მის მონაწილე პირებთან დაკავშირებულ რაიმე დამატებით ინფორმაციას, ბანკი ვალდებულია დაუყოვნებლივ გადაუგზავნოს ეს ინფორმაცია საქართველოს ფინანსური მონიტორინგის სამსახურს. ამასთან, დამატებით ინფორმაციაზე უნდა აღინიშნოს იმ ანგარიშგების ფორმის ნომერი და გაგზავნის თარიღი, რომლის დამატებასაც იგი წარმოადგენს. საჭიროების შემთხვევაში დამატებითი ინფორმაცია უნდა იყოს წარმოდგენილი ანგარიშგების ფორმის სახით.

19. ბანკი ვალდებულია მკაცრად დაიცვას საეჭვო საბანკო ოპერაციებთან (გარიგებებთან) დაკავშირებით ანგარიშგების ფორმის შევსებისა და საქართველოს ფინანსური მონიტორინგის სამსახურისათვის წარდგენის ფაქტისა და მასთან დაკავშირებული სხვა ინფორმაციის კონფიდენციალურობა. ინფორმაცია საბანკო ოპერაციასთან, გარიგებასთან ან მის მონაწილე პირებთან დაკავშირებით ეჭვის წარმოშობის, ანგარიშგების ფორმის შევსებისა და საქართველოს ფინანსური მონიტორინგის სამსახურისათვის წარდგენის შესახებ არ უნდა ეცნობოს შესაბამისი საბანკო ოპერაციის (გარიგების) მონაწილე პირებს, მათ წარმომადგენლებს და არც ნებისმიერ სხვა პირს. ბანკის თანამშრომელს, რომელიც გამოავლენს საეჭვო საბანკო ოპერაციას (გარიგებას) ან შეავსებს ანგარიშგების ფორმას შეუძლია აცნობოს ეს ინფორმაცია ბანკის მხოლოდ იმ თანამშრომლებს, რომლებსაც ბანკის შიდა ინსტრუქციის თანახმად უფლება აქვთ ფლობდნენ ასეთ ინფორმაციას.

20. ამოღებულია.

საქართველოს ფინანსური მონიტორინგის სამსახურის უფროსის 2004 წლის 20 დეკემბრის ბრძანება №165-სსმIII, №151, 23.12.2004წ.; მუხ.1375

საქართველოს ფინანსური მონიტორინგის სამსახურის უფროსის 2007 წლის 17 ოქტომბრის ბრძანება №142-სსმIII, №152, 30.10.2007წ.; მუხ.1693

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 10. საქართველოს ფინანსური მონიტორინგის სამსახურის მონაცემთა ბაზაში კომერციული ბანკების (მათი ფილიალების, წარმომადგენლობების) შესახებ ინფორმაციის შეტანა

1. მონიტორინგს დაქვემდებარებული საბანკო ოპერაციების (გარიგებების) შესახებ ინფორმაციის სისტემატიზაციისა და ანალიტიკური სამუშაოების განსახორციელებლად და „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონის მე-10 მუხლის მე-5 პუნქტის „ა“ ქვეპუნქტის თანახმად საქართველოს ფინანსური მონიტორინგის სამსახური ქმნის მონაცემთა ელექტრონულ ბაზას. აღნიშნულ მონაცემთა ბაზაში თითოეული კომერციული ბანკის (მისი ფილიალის, წარმომადგენლობის) შესახებ ინფორმაციის შეტანის მიზნით ბანკმა უნდა წარუდგინოს საქართველოს ფინანსური მონიტორინგის სამსახურს „საქართველოს ფინანსური მონიტორინგის სამსახურში კომერციული ბანკების აღრიცხვის ფორმა“ (დანართი №2), რომელიც უნდა იყოს შევსებული სრულად და დამოწმებული ბანკის აღმასრულებელი ორგანოს ხელმძღვანელის ხელმოწერით. მონაცემთა ბაზის გამართული ფუნქციონირების უზრუნველსაყოფად საქართველოს ფინანსური მონიტორინგის სამსახური თითოეულ ბანკს (და მის ფილიალს) ანიჭებს ინდივიდუალურ სააღრიცხვო კოდს.

2. საქართველოს ფინანსური მონიტორინგის სამსახურში კომერციული ბანკების აღრიცხვის ფორმაში დაფიქსირებული ნებისმიერი ინფორმაციის შეცვლის შემთხვევაში (მათ შორის, მონიტორინგის განხორციელებაზე პასუხისმგებელი თანამშრომლის შეცვლის შემთხვევაში) ბანკი ვალდებულია, შესაბამისი ცვლილების განხორციელებიდან არა უგვიანეს 3 სამუშაო დღისა, წარუდგინოს საქართველოს ფინანსური მონიტორინგის სამსახურს განახლებული ინფორმაციით შევსებული ნაბეჭდი ფორმა, დამოწმებული ბანკის აღმასრულებელი ორგანოს ხელმძღვანელის ხელმოწერით.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

    მუხლი 11. მონიტორინგის განხორციელებასთან დაკავშირებული პასუხისმგებლობა

1. ზედამხედველობას ბანკის მიერ „უკანონო შემოსავლის ლეგალიზაციის აღკვეთის ხელშეწყობის შესახებ’’ საქართველოს კანონითა და ამ დებულებით დადგენილი ნორმებისა და მოთხოვნების დაცვაზე ახორციელებს საქართველოს საფინანსო ზედამხედველობის სააგენტო.

2. „უკანონო შემოსავლის ლეგალიზაციის აღკვეთის ხელშეწყობის შესახებ’’ საქართველოს კანონითა და ამ დებულებით დადგენილი ნორმებისა და მოთხოვნების დარღვევისათვის ბანკის მიმართ გამოყენებული იქნება სანქციები საქართველოს საფინანსო ზედამხედველობის სააგენტოს მიერ დადგენილი წესითა და ოდენობით.

საქართველოს ფინანსური მონიტორინგის სამსახურის უფროსის 2008 წლის 13 ივნისის ბრძანება №3-სსმIII, №85, 17.06.2008წ.; მუხ.935

 

 

კონფიდენციალური ნაწილი 1

საქართველოს ფინანსური

მონიტორინგის სამსახურის უფროსის

2004 წლის 28 ივლისის №95 ბრძანებით

დამტკიცებული დებულების დანართი № 1

მონიტორინგს დაქვემდებარებული საბანკო ოპერაციის

(გარიგების) ანგარიშგების ფორმა (№ 1)

 გამომგზავნის ბანკის (ფილიალის) სააღრიცხვო კოდი კოდი ______

 

     გამომგზავნის მიერ მინიჭებული №________

     ფმს-ში გამომგზავნის თარიღი_______________

     ფმს-ს მიერ მინიჭებული _____________

ინფორმაცია საბანკო ოპერაციის შესახებ

 

 

 

 

 

 

 

 

კონფიდენციალური ნაწილი 2

საქართველოს ფინანსური

მონიტორინგის სამსახურის უფროსის

2004 წლის 28 ივლისის №95 ბრძანებით

დამტკიცებული დებულების დანართი №1

მონიტორინგს დაქვემდებარებული საბანკო ოპერაციის

(გარიგების) ანგარიშგების ფორმა (№1)

 გამომგზავნის ბანკის (ფილიალის) სააღრიცხვო კოდი კოდი ______

      გამომგზავნის მიერ მინიჭებული №________

      ფმს-ში გამომგზავნის თარიღი_______________

      ფმს-ს მიერ მინიჭებული _____________

 

მონაცემები ფიზიკური პირის შესახებ

 

 

საბანკო რეკვიზიტები:

 

კონფიდენციალური ნაწილი 3

საქართველოს ფინანსური

მონიტორინგის სამსახურის უფროსის

2004 წლის 28 ივლისის N95 ბრძანებით

დამტკიცებული დებულების დანართი N 1

მონიტორინგს დაქვემდებარებული საბანკო ოპერაციის

(გარიგების) ანგარიშგების ფორმა (N 1)

 გამომგზავნის ბანკის (ფილიალის) სააღრიცხვო კოდი კოდი ______

                                    გამომგზავნის მიერ მინიჭებული N________

                                    ფმს-ში გამომგზავნის თარიღი_______________

                                    ფმს-ს მიერ მინიჭებული _____________

 

მონაცემები იურიდიული პირის შესახებ

 

 

ნაწილი 3

გვერდი 2

აქციების, წილის, პაის და ა.შ. 20 და მეტი პროცენტის მფლობელი პირები:

 

 

კონფიდენციალური ნაწილი 4

საქართველოს ფინანსური

მონიტორინგის სამსახურის უფროსის

2004 წლის 28 ივლისის №95 ბრძანებით

დამტკიცებული დებულების დანართი №1

მონიტორინგს დაქვემდებარებული საბანკო ოპერაციის

(გარიგების) ანგარიშგების ფორმა (№1)

 გამომგზავნის ბანკის (ფილიალის) სააღრიცხვო კოდი კოდი ______

გამომგზავნის მიერ მინიჭებული №________

ფმს-ში გამომგზავნის თარიღი_______________

ფმს-ს მიერ მინიჭებული _____________

ინფორმაცია გარიგების შესახებ

 

 

 

 

 

 

კონფიდენციალური ნაწილი 5

საქართველოს ფინანსური

მონიტორინგის სამსახურის უფროსის

2004 წლის 28 ივლისის №95 ბრძანებით

დამტკიცებული დებულების დანართი №1

მონიტორინგს დაქვემდებარებული საბანკო ოპერაციის

(გარიგების) ანგარიშგების ფორმა (№1)

 გამომგზავნის ბანკის (ფილიალის) სააღრიცხვო კოდი კოდი ______

პირველადი

დამატებითი

შეცვლილი

გამომგზავნის მიერ მინიჭებული №________

ფმს-ში გამომგზავნის თარიღი_______________

ფმს-ს მიერ მინიჭებული _____________

 

ინფორმაცია ფორმის წარდგენის მიზეზებისა და ბანკის ხელთ არსებული დამატებითი მონაცემების (დოკუმენტების) შესახებ

 

 

 

 

 

კონფიდენციალური ნაწილი 6

საქართველოს ფინანსური

მონიტორინგის სამსახურის უფროსის

2004 წლის 28 ივლისის №95 ბრძანებით

დამტკიცებული დებულების დანართი №1

მონიტორინგს დაქვემდებარებული საბანკო ოპერაციის

(გარიგების) ანგარიშგების ფორმა (№1)

 გამომგზავნის ბანკის (ფილიალის) სააღრიცხვო კოდი კოდი ______

გამომგზავნის მიერ მინიჭებული N________

ფმს-ში გამომგზავნის თარიღი_______________

      ფმს-ს მიერ მინიჭებული _____________

 

 

დამატებითი ფურცელი

 

6.1 ფორმის შევსების თარიღი

6.2. ხელმოწერა

 

საქართველოს ფინანსური

მონიტორინგის სამსახურის უფროსის

2004 წლის 28 ივლისის №95 ბრძანებით

დამტკიცებული დებულების დანართი №2

 

საქართველოს ფინანსური მონიტორინგის სამსახურში კომერციული

ბანკების აღრიცხვის ფორმა