“საქართველოს გენერალური პროკურატურის ეკონომიკური დეპარტამენტის დამტკიცების შესახებ"

 

 

საქართველოს გენერალური პროკურორის

ბრძანება №24

2005 წლის 25 ოქტომბერი

ქ. თბილისი

საქართველოს გენერალური პროკურატურის ეკონომიკური დეპარტამენტის დებულების დამტკიცების შესახებ

,,პროკურატურის შესახებ” საქართველოს ორგანული კანონის მე-7 მუხლის მე-6 პუნქტის ,,კ” და ,,ო” ქვეპუნქტების შესაბამისად, ვბრძანებ:

1. დამტკიცდეს საქართველოს გენერალური პროკურატურის ეკონომიკური დეპარტამენტის თანდართული დებულება.

2. ეს ბრძანება ამოქმედდეს გამოქვეყნებისთანავე.

ზ. ადეიშვილი

 

დანართი

საქართველოს გენერალური პროკურატურის ეკონომიკური დეპარტამენტის დებულება

    მუხლი 1. ზოგადი დებულებანი

1. საქართველოს გენერალური პროკურატურის ეკონომიკური დეპარტამენტი (შემდგომში – დეპარტამენტი) არის საქართველოს გენერალური პროკურატურის (შემდგომში – გენერალური პროკურატურა) სტრუქტურული დანაყოფი.

2. თავის საქმიანობაში დეპარტამენტი ხელმძღვანელობს საქართველოს კონსტიტუციით, “პროკურატურის შესახებ” საქართველოს ორგანული კანონით, საქართველოს გენერალური პროკურატურის დებულებით, საქართველოს გენერალური პროკურორის (შემდგომში – გენერალური პროკურორი) ბრძანებებით, ინსტრუქციებით და მითითებებით, ამ დებულებით, სხვა საკანონმდებლო და კანონქვემდებარე ნორმატიული აქტებით.

3. დეპარტამენტი ანგარიშვალდებულია გენერალური პროკურორისა და უფლებამოსილი გენერალური პროკურორის მოადგილის წინაშე, რომელიც წარმართავს დეპარტამენტის საქმიანობას და ახორციელებს მასზე სამსახურებრივ ზედამხედველობას კანონით დადგენილი წესით.

    მუხლი 2. დეპარტამენტის ამოცანები

დეპარტამენტის ამოცანებია:

საქართველოს პროკურატურის ბიუჯეტის პროექტის მომზადება, საბიუჯეტო პოლიტიკის შემუშავება და გამოყოფილ ასიგნებათა გეგმური განაწილება; საქართველოს ფინანსთა სამინისტროსთან და სხვა დაინტერესებულ უწყებებთან ფინანსური საქმიანობის კოორდინაცია; პროკურატურის ეკონომიკური და ფინანსური საქმიანობის წარმართვა, ფინანსური და მატერიალური აქტივებისა და პასივების აღრიცხვა-ანგარიშგების წარმოება და კონტროლი; სახელმწიფო ბიუჯეტიდან მიღებული ფულადი სახსრების მიზნობრივად და დამტკიცებული გეგმის მიხედვით ხარჯვაზე კონტროლის განხორციელება; საქართველოს პროკურატურის მიერ ყველა სახის სამეურნეო სამუშაოზე დადებული ხელშეკრულების მომზადება და შესრულების კონტროლი, გენერალური პროკურატურის ადმინისტრაციული შენობისა და მიმდებარე ტერიტორიის სანიტარიული დასუფთავებისა და ხანძარსაწინააღმ-დეგო უსაფრთხოების, ადმინისტრაციულ შენობაში სატელეფონო კავშირის, ელექტრო და სანტექნიკური მეურნეობის გამართული და შეუფერხებელი მუშაობის უზრუნველყოფა; საქართველოს პროკურატურის კუთვნილი მატერიალური ფასეულობების მიღების, აღ-რიცხვის, შენახვის და გაცემის კანონიერებაზე, ასევე ენერგორესურსების ხარჯვაზე კონტროლის განხორციელება; მოქმედი კანონმდებლობის შესაბამისად სახელმწიფო შესყიდვების ორგანიზება; საქართველოს პროკურატურის სისტემაში კომპიუტერიზაციისა და საქმისწარმოების ავტომატიზაციის დანერგვა და მათი შემდგომი განვითარება.

საქართველოს გენერალური პროკურორის 2006 წლის 19 ივნისის ბრძანება №7 - სსმ III, №82 , 20.06.2006 წ., მუხ.1092

 

მუხლი 3. დეპარტამენტის სტრუქტურა

დეპარტამენტის სტრუქტურული ქვედანაყოფებია:

ა) ბუღალტრული აღრიცხვის სამმართველო;

ბ) მატერიალურ-ტექნიკური უზრუნველყოფის სამმართველო;

გ) საინფორმაციო ტექნოლოგიების სამმართველო.

საქართველოს გენერალური პროკურორის 2006 წლის 19 ივნისის ბრძანება №7 - სსმ III, №82 , 20.06.2006 წ., მუხ.1092

    მუხლი 4. დეპარტამენტის სტრუქტურული ქვედანაყოფების კომპეტენცია

1. ბუღალტრული აღრიცხვის სამმართველო:

ა) უზრუნველყოფს ბუღალტრული აღრიცხვის სწორ ორგანიზაციას საქართველოს კანონმდებლობის შესაბამისად;

ბ) უზრუნველყოფს ბუღალტრული ანგარიშების შედგენას და დაწესებულ ვადებში წარდგენას;

გ) ახორციელებს კონტროლს საბუთების დროულ გაფორმებასა და სამმართველოს კომპეტენციას მიკუთვნებულ ოპერაციების კანონიერებაზე;

დ) ახორციელებს კონტროლს ფულადი სახსრების სწორად და ეკონომიკურად ხარჯვაზე და მიზნობრივი დანიშნულებით გამოყენებაზე ბიუჯეტით დამტკიცებული ხარჯთანუსხის შესაბამისად;

ე) ახორციელებს კონტროლს ფულადი სახსრებისა და მატერიალურ ფასეულობათა დაცვაზე;

ვ) განცალკევებულად აღრიცხავს სხვადასხვა წყაროების მიხედვით მიღებულ სახსრებს და ამ სახსრებით განხორციელებულ ოპერაციებს;

ზ) უზრუნველყოფს ხარჯთანუსხის შესრულების პროცესში საწარმოებთან, დაწესებულებებთან ორგანიზაციებთან და ცალკეულ პირებთან წარმოშობილ ანგარისწორებათა დროულ წარმოებას;

თ) მონაწილეობს ფულადი სახსრებისა და მატერიალურ ფასეულობათა ინვენტარიზაციის ჩატარებაში, უზრუნველყოფს ინვენტარიზაციის შედეგების დროულ განსაზღვრას და აღრიცხვას;

ი) უზრუნველყოფს მუშა-მოსამსახურეთა ხელფასების, პრემიების და სხვა გასაცემი თანხების დროულ დარიცხვას და გაცემას;

კ) ახორცილებს კონტროლს მატერიალური ფასეულობების დაცვაზე მათი შენახვის და ექსპლუატაციის ადგილებში;

ლ) ახორციელებს ბუღალტრული დოკუმენტების, აღრიცხვის რეგისტრების, ხარჯთანუსხის, მათი გაანგარიშებების და სხვა საბუთების შენახვას და დადგენილი წესით არქივში ჩაბარებას;

მ) ახორციელებს სასაწყობო მეურნეობის ბუღალტრულ აღრიცხვას მოქმედი კანონმდებლობის და ინსტრუქციების შესაბამისად;

ნ) აკონტროლებს სასაწყობო ნაშთების შესაბამისობას საბალანსო მაჩვენებლებთან, ახდენს ნაშთების დეკადურ შედარებას;

ო) უზრუნველყოფს ყოველთვიური ხარჯების ანალიზური ფორმის მომზადებას და დეპარტამენტის უფროსისათვის წარდგენას;

პ) უზრუნველყოფს სხვა არასაბიუჯეტო სახსრების აღრიცხვას;

ჟ) უზრუნველყოფს გენერალური პროკურატურის სადეპოზიტო ანგარიშის აღრიცხვას, მართვას და კონტროლს;

რ) უზრუნველყოოფს სადეპოზიტო ანგარიშზე რიცხული თანხების ოპერატიულ კლასიფიცირებას და ბიუჯეტში გადარიცხვას არსებული კანონმდებლობის შესაბამისად;

ს) აწარმოებს სადეპოზიტო ანგარიშზე შემოსული თანხების მონაცემთა ბაზის ფორმირებას მათი კლასიფიკაციის, თარიღის, გადახდის ადგილის, მოცულობის და სხვა მონაცემების მიხედვით;

ტ) არეგულირებს ურთიერთობას მომსახურე ბანკთან და ფინანსთა სამინისტროს სახაზინო სამსახურთან;

უ) ახორციელებს დეპარტამენტის უფროსის მიერ განსაზღვრულ სხვა უფლებამოსილებას.

2. მატერიალურ-ტექნიკური უზრუნველყოფის სამმართველო:

ა) ამზადებს ტექნიკურ დოკუმენტაციებს შენობათა მიმდინარე და კაპიტალური შეკეთებისათვის, დადგენილ ვადებში ახდენს მათ გაფორმება-წარდგენას გენერალური პროკურატურის აპარატსა და მისდამი დაქვემდებარებულ უწყებებში;

ბ) უზრუნველყოფს მატერიალურ-ტექნიკური და სათბობ-ენერგეტიკული საშუალებებით შეუფერხებელ მომარაგებას;

გ) ახორციელებს გენერალური პროკურატურის ბალანზე რიცხულ ავტოსატრანსპორტო საშუალებთა ექსპლუატაციასთან დაკავშირებული საკითხების რეგულირებას, ხარჯების კონტროლს და ანგარიშგებას;

დ) ახორციელებს მომწოდებლებთან ურთიერთობას პროკურატურის მოთხოვნების და ინტერესების მაქსიმალურად გათვალისწინებით არსებული კანონმდებლობის ფარგლებში;

ე) უზრუნველყოფს გენრალური პროკურატურის ადმინისტრაციული შენობისა და მიმდებარე ტერიტორიის სანიტარიულ დასუფთავებას, კეთილმოწყობას და ხანძარსაწინააღმდეგო უსაფრთხოებას;

ვ) უზრუნველყოფს საკანცელარიო და სამეურნეო საქონლით მომარაგებას, საჭირო ინვენტარის შეძენას და სხვა მიმდინარე საკითხების გადაწყვეტას;

ზ) ახორციელებს საფინანსო და მატერიალური უზრუნველყოფის სწორ დაგეგმვას, სახელმწიფო ბიუჯეტიდან გამოყოფილი დაფინანსების გეგმურ განაწილებას, სამმართველოს საქმიანობის ძირითადი მიმართულებების ფინანსური უზრუნველყოფის ღონისძიებების დაგეგმვა-გატარებას, პროკურატურის საბიუჯეტო პროცესის მართვას, ხელშეკრულებების პროექტის შედგენას, რეგისტრაციას სახაზინო სამსახურში და მათი შესრულების კონტროლს თავისი კომპეტენციის ფარგლებში;

თ) უზრუნველყოფს სახელმწიფო შესყიდვების დაგეგმვას და კანონმდებლობის შესაბამისად განხორციელებას;

ი) უზრუნველყოფს ინსპექტირების ჯგუფის ეფექტურ ფუნქციონირებას, რომლის მიზანია გააკონტროლოს მომწოდებლების მიერ ხელშეკრულებით ნაკისრი ვალდებულებების შესრულება;

კ) აკონტროლებს შესყიდული საქონლისა და მომსახურების ხარისხს და ღირებულებას;

ლ) ამზადებს და დეპარტამენტის უფროსს წარუდგენს ყოველთვიურ ანგარიშგებას გაწეული ხარჯების და მათი გეგმასთან შესაბამისობის შესახებ;

მ) ამზადებს ყოველთვიურ ანგარიშს სასაწყობო ნაშთების და თვიური ბრუნვის (გახარჯვის) შესახებ, წარუდგენს ანგარიშს დეპარტამენტის უფროსს და მის მოადგილეს;

ნ) მონაწილეობს მატერიალურ ფასეულობათა ინვენტარიზაციის ჩატარებაში, უზრუნველყოფს ინვენტარიზაციის შედეგების დროულ განსაზღვრას და აღრიცხვას;

ო) აკონტროლებს ძირითადი საშუალებების ექსპლუატაციის ხარჯებს და მათ მიზანშეწონილობას;

პ) შეიმუშავებს საჭირო პროცედურებს პროკურატურის მატერიალურ-ტექნიკური უზრუნველყოფის ეფექტური ფუნქციონირების მიზნით;

ჟ) მართავს და ზედამხედველობს ტექნიკური პერსონალის ეფექტურ მუშაობას;

რ) ახორციელებს დეპარტამენტის უფროსის მიერ განსაზღვრულ სხვა უფელბამოსილებებს.

3. საინფორმაციო ტექნოლოგიების სამმართველო:

ა) უზრუნველყოფს პროკურატურის სისტემაში საინფორმაციო ტექნოლოგიების ინფრასტრუქტურის აპარატურული ნაწილის გამართულ ფუნქციონირებას, საჭიროების შემთხვევაში ატარებს აუცილებელ სარემონტო სამუშაოებს;

ბ) აწარმოებს საკომუნიკაციო საშუალებების (კომპიუტერული და სატელეფონო ქსელების) მონტაჟს, კონფიგურირებასა და შემდგომ მომსახურებას;

გ) ახორციელებს პროკურატურის ფუნქციონირებისათვის საჭირო პროგრამული უზრუნველყოფის დანერგვას;

დ) აღმოუჩენს დახმარებას მომხმარებელ პროკურატურის მუშაკებს კომპიუტერული და სატელეფონო ქსელების გამოყენებისას წამოჭრილ პრობლემებთან დაკავშირებით, მუშაობს ამ სფეროში მომხმარებელთა კვალიფიკაციის ამაღლების კუთხით;

ე) ატარებს საინფორმაციო ტექნოლოგიების ინფრასტრუქტურის უსაფრთხოებისათვის საჭირო ღონისძიებებს;

ვ) საჭიროების შემთხვევაში, უზრუნველყოფს სხვა ორგანიზაციებისა და დაწესებულებების საინფორმაციო ტექნოლოგიების ინფრასტრუქტურებთან საქართველოს პროკურატურის საინფორმაციო ტექნოლოგიების ინფრასტრუქტურის ინტეგრაციას;

ზ) შეიმუშავებს საქართველოს პროკურატურის საინფორმაციო ტექნოლოგიების ინფრასტრუქტურის განვითარების პერსპექტიულ გეგმებს.

საქართველოს გენერალური პროკურორის 2006 წლის 19 ივნისის ბრძანება №7 - სსმ III, №82 , 20.06.2006 წ., მუხ.1092

    მუხლი 5. დეპარტამენტის ხელმძღვანელობა

1. დეპარტამენტს ხელმძღვანელობს დეპარტამენტის უფროსი, რომელსაც თანამდებობაზე ნიშნავს და თანამდებობიდან ათავისუფლებს გენერალური პროკურორი.

2. დეპარტამენტის უფროსი:

ა) ახორციელებს დეპარტამენტის საქმიანობის საერთო ხელმძღვანელობას, უზრუნველყოფს დეპარტამენტის წინაშე მდგარი ამოცანების შესრულებას;

ბ) ანაწილებს ფუნქციებს დეპარტამენტის სტრუქტურულ ქვედანაყოფებსა და დეპარტამენტის მუშაკებს შორის, აძლევს მათ მითითებებსა და დავალებებს;

გ) აწესებს კონტროლს სახელმწიფო ბიუჯეტიდან გამოყოფილი ასიგნების ეკონომიკური კლასიფიკაციის მუხლების მიხედვით ხარჯვის სისწორეზე;

დ) აკონტროლებს დეპარტამენტის მუშაკების მიერ სამსახურებრივი მოვალეობების შესრულებას და შრომის დისციპლინის დაცვას;

ე) ხელს აწერს და ვიზას ადებს დეპარტამენტში მომზადებულ დოკუმენტებს;

ვ) გენერალური პროკურატურის ხელმძღვანელობას წარუდგენს წინადადებებს დეპარტამენტის სტრუქტურისა და საშტატო განრიგის ოპტიმიზაციის მიზნით;

ზ) კანონმდებლობით დადგენილი წესით გენერალური პროკურატურის ხელმძღვანელობას წარუდგენს წინადადებებს დეპარტამენტის მუშაკთა წახალისების ან მათთვის დისციპლინური პასუხისმგებლობის დაკისრების შესახებ;

თ) შუამდგომლობს იმ სახსრების, მოწყობილობებისა და ინვენტარის გამოყოფის თაობაზე, რომლებიც საჭიროა დეპარტამენტის ამოცანების შესასრულებლად;

ი) ახორციელებს კანონმდებლობით გათვალისწინებულ სხვა უფლებამოსილებებს.

3. დეპარტამენტის უფროსს ჰყავს მოადგილე, რომელსაც თანამდებობაზე ნიშნავს და თანამდებობიდან ათავისუფლებს გენერალური პროკურორი.

4. დეპარტამენტის უფროსის მოადგილე:

ა) ადგენს ყველა სახის სამეურნეო სამუშაოებზე დადებული ხელშეკრულების პროექტებს, ამზადებს ტექნიკურ დოკუმენტაციებს შენობათა მიმდინარე და კაპიტალური შეკეთებისათვის და დადგენილ ვადებში უზრუნველყოფს მათ გაფორმებას;

ბ) უზრუნველყოფს მატერიალურ-ტექნიკური და სათბობ-ენერგეტიკული საშუალებებით შეუფერხებელ მომარაგებას;

გ) ახორციელებს გენერალური პროკურატურის ბალანსზე რიცხულ ავტოსატრანსპორტო საშუალებათა ექსპლუატაციასთან დაკავშირებული საკითხების მართვას;

დ) ორგანიზებას უწევს გენერალური პროკურატურის ადმინისტრაციული შენობისა და მისი მიმდებარე ტერიტორიის დასუფთავებას, კეთილმოწყობას და ხანძარსაწინაღმდეგო უსაფრთხოების უზრუნველყოფას;

ე) ორგანიზებას უწევს საკანცელარიო და სამეურნეო საქონლით მომარაგებას, საჭირო ინვენტარის შეძენას და სხვა საკითხების მოწესრიგებას;

ვ) ახორციელებს საფინანსო და მატერიალურ-ტექნიკური უზრუნველყოფის სწორ დაგეგმვას, სახელმწიფო ბიუჯეტიდან გამოყოფილი დაფინანსების გეგმურ განაწილებას;

ზ) ახორციელებს სამსახურის საქმიანობის ძირითადი მიმართულებების ფინანსური უზრუნველყოფის ღონისძიებების დაგეგმვა-განაწილებას, პროკურატურის საბიუჯეტო პროცესის მართვას, ხელშეკრულებების პროექტების შედგენას, მათ რეგისტრაციას სახაზინო სამსახურში და შესრულების კონტროლს თავისი კომპეტენციის ფარგლებში;

თ) უზრუნველყოფს სახელმწიფო შესყიდვების დაგეგმვას და კანონმდებლობის შესაბამისად მის განხორციელებას.

5. დეპარტამენტის უფროსის არყოფნის შემთხვევაში მის მოვალეობას ასრულებს დეპარტამენტის უფროსის მოადგილე.

    მუხლი 6. სამმართველოს ხელმძღვანელობა

1. სამმართველოს ხელმძღვანელობს სამმართველოს უფროსი, რომელსაც თანამდებობაზე ნიშნავს და თანამდებობიდან ათავისუფლებს გენერალური პროკურორი.

2. სამმართველოს უფროსი:

ა) ხელმძღვანელობს სამმართველოს საქმიანობას;

ბ) ანაწილებს მოვალეობებს სამმართველოს მუშაკებს შორის, უზრუნველყოფს სამმართველოს მუშაობის ორგანიზაციას, აკონტროლებს სამმართველოს მუშაკთა მხრივ სამსახურებრივი და საშემსრულებლო დისციპლინის დაცვას;

გ) აკონტროლებს გენერალური პროკურორის ბრძანებების, მითითებების, დავალებების, გენერალური პროკურორის მოადგილეების, დეპარტამენტის უფროსის დავალებების შესრულებას;

დ) ასრულებს პროკურატურის ზემდგომ თანამდებობის პირთა ცალკეულ დავალებებს;

ე) ახორციელებს კანონმდებლობით მინიჭებულ სხვა უფლებამოსილებებს.

3. სამმართველოს უფროსს ჰყავს მოადგილე, რომელსაც თანამდებობაზე ნიშნავს და თანამდებობიდან ათავისუფლებს გენერალური პროკურორი. სამმართველოს უფროსის არყოფნის შემთხვევაში მის მოვალეობას ასრულებს სამმართველოს უფროსის მოადგილე.

    მუხლი 7. დეპარტამენტის მუშაკები

1. დეპარტამენტში საჯარო სამსახურს ეწევიან:

ა) მრჩევლები;

ბ) სპეციალისტები;

გ) ინჟინრები და სხვა პერსონალი, რომლებიც მუშაობას წარმართავენ დაკისრებული ფუნქციების შესაბამისად.

2. დეპარტამენტის მუშაკებს თანამდებობაზე ნიშნავს და თანამდებობიდან ათავისუფლებს გენერალური პროკურორი.

3. დეპარტამენტის საშტატო რიცხოვნობა განისაზღვრება გენერალური პროკურატურის საშტატო განრიგით, რომელსაც ამტკიცებს გენერალური პროკურორი.

4. დეპარტამენტის სამმართველოების მრჩეველთა საქმიანობის კონკრეტული მიმართულებები, სამმართველოების ამოცანათა შესაბამისად, განისაზღვრება დეპარტამენტის უფროსის ზეპირი ან წერილობითი დავალებით (მითითება, დირექტივა).

საქართველოს გენერალური პროკურორის 2006 წლის 19 ივნისის ბრძანება №7 - სსმ III, №82 , 20.06.2006 წ., მუხ.1092

    მუხლი 8. დასკვნითი დებულება

საქართველოს გენერალური პროკურატურის ეკონომიკური დეპარტამენტის დებულების გაუქმება, მასში ცვლილებებისა და დამატებების შეტანა ხდება საქართველოს გენერალური პროკურორის ბრძანებით.

Annotate