„უმაღლესი საგანმანათლებლო პროგრამების კრედიტებით გაანგარიშების წესის დამტკიცების შესახებ“

სახალმწიფო სარეგისტრაციო კოდი 430.030.000.22.022.009.780

საქართველოს განათლებისა და მეცნიერების

მინისტრის ბრძანება №3

2007 წლის 5 იანვარი

  ქ. თბილისი

უმაღლესი საგანმანათლებლო პროგრამების კრედიტებით გაანგარიშების წესის დამტკიცების შესახებ

„უმაღლესი განათლების შესახებ“საქართველოს კანონის 87- ე მუხლის მე-8 პუნქტის უზრუნველსაყოფად, „უმაღლესი განათლების შესახებ“საქართველოს კანონის მე-7 მუხლის პირველი პუნქტის „პ1“ქვეპუნქტის, „საქართველოს განათლებისა და მეცნიერების სამინისტროს დებულების დამტკიცების შესახებ“საქართველოს მთავრობის 2004 წლის 21 მაისის №37 დადგენილების მე-3 მუხლის მე-2 პუნქტის „მ“ქვეპუნქტის საფუძველზე, ვბრძანებ:

1. დამტკიცდეს თანდართული უმაღლესი საგანმანათლებლო პროგრამების კრედიტებით გაანგარიშების წესი.

2. ბრძანება ამოქმედდეს გამოქვეყნებიდან 15 დღის შემდეგ.

  მინისტრის მოვალეობის

  შემსრულებელი ა. დიდებულიძე

 

 

შეტანილი ცვლილებები:

1. საქართველოს განათლებისა და მეცნიერების მინისტრის 2007 წლის 16 თებერვლის ბრძანება №120-სსმIII, №124, 22.02.2007წ.; მუხ.288

2. საქართველოს განათლებისა და მეცნიერების მინისტრის 2007 წლის 20 ივნისის ბრძანება №441-სსმIII, №94, 02.07.2007წ.; მუხ.1013

3. საქართველოს განათლებისა და მეცნიერების მინისტრის 2008 წლის 11 თებერვლის ბრძანება №100-სსმIII, №26, 20.02.2008წ.; მუხ.272

 

 

უმაღლესი საგანმანათლებლო პროგრამების კრედიტებით გაანგარიშების წესი

    მუხლი 1. ზოგადი დებულებანი

ტრანსფერისა და დაგროვების ევროპული საკრედიტო სისტემა ( შემდგომში – საკრედიტო სისტემა) სტუდენტზე ორიენტირებული სისტემაა. მისი დანიშნულებაა აკადემიური დატვირთვის ასახვა, რომელიც სტუდენტს ესაჭიროება სასწავლო პროგრამის მიზნების მისაღწევად.

    მუხლი 2. სტუდენტის სასწავლო საქმიანობა (სტუდენტის დატვირთვა)

1. სტუდენტის საქმიანობა ( სტუდენტის დატვირთვა) მოიცავს:

ა) ლექციებზე, სემინარებზე, პრაქტიკულ და ლაბორატორიულ მეცადინეობებზე დასწრებას;

ბ) დამოუკიდებელ მეცადინეობას;

გ) სასწავლო, სამეცნიერო და საწარმოო პრაქტიკას;

დ) გამოცდების მომზადება- ჩაბარებას;

ე) სასწავლო- სამეცნიერო ნაშრომზე ( საკურსო ნაშრომი, მოხსენება კონფერენციაზე, სამეცნიერო წერილი, საპატენტო განაცხადი, სადიპლომო ნაშრომი, საბაკალავრო ნაშრომი, სამაგისტრო ნაშრომი, სადოქტორო დისერტაცია) მუშაობას;

ვ) სასწავლო- სამეცნიერო ნაშრომის დაცვას და გამოქვეყნებას.

2. სტუდენტთა საქმიანობის შესაფასებლად გამოიყენება კრედიტი – ერთეული, რომელიც გამოხატავს სტუდენტის მიერ ერთი საგნის ასათვისებლად შესასრულებელი სამუშაოს მოცულობას, გამოხატულს დროის ერთეულში – საათებში.

3. საკრედიტო სისტემის შესაბამისად, სტუდენტის დატვირთვა ერთი აკადემიური წლის განმავლობაში მოიცავს 60 კრედიტს, რაც შეესაბამება სასწავლო საქმიანობის 1500-1800 ასტრონომიულ საათს, ხოლო 1 კრედიტი მოიცავს სტუდენტის სასწავლო საქმიანობას ( სტუდენტის დატვირთვას) 25-30 ასტრონომიული საათის განმავლობაში.

4. ერთ უმაღლეს საგანმანათლებლო დაწესებულებაში ერთი და იგივე შინაარსის და მოცულობის მოდული ან საგანი ყველა პროგრამის სტუდენტისათვის მოიცავს თანაბარი რაოდენობის კრედიტებს.

5. უმაღლესი საგანმანათლებლო პროგრამის ან/ და სტუდენტის ინდივიდუალური სასწავლო პროგრამის თავისებურებების გათვალისწინებით, დასაშვებია სტუდენტის წლიური დატვირთვა აღემატებოდეს 60 კრედიტს ან იყოს 60 კრედიტზე ნაკლები.

    მუხლი 3. კრედიტების განაწილება

1. კრედიტების განაწილება ხდება საგანმანათლებლო პროგრამის ყველა კომპონენტს შორის ( როგორიცაა მოდულები, კურსები, პრაქტიკა, დისერტაცია და სხვ.), მისი ხანგრძლივობის და ტიპის მიუხედავად. საგანმანათლებლო პროგრამა შეიძლება შედგებოდეს ერთწლიანი კურსების ან უფრო მოკლე მოდულებისაგან.

2. კრედიტი ასახავს სამუშაოს იმ რაოდენობას, რომელიც საჭიროა ამა თუ იმ კომპონენტის დასასრულებლად და სწავლის შედეგების მისაღწევად.

3. კრედიტთა განაწილება სხვადასხვა კომპონენტებს შორის უნდა ეფუძნებოდეს საშუალო აკადემიური მიღწევების მქონე სტუდენტის დატვირთვის რეალურ შეფასებას, რომელიც საჭიროა ყოველი კომპონენტისათვის დადგენილი სწავლის შედეგის მისაღწევად. კრედიტების განაწილების სისწორე უნდა შემოწმდეს სტუდენტის რეალური დატვირთვის შესახებ სრული ინფორმაციის შეგროვებითა და ანალიზით, რაშიც პროფესორ- მასწავლებლებთან ერთად სტუდენტებიც უნდა იღებდნენ მონაწილეობას.

4. კრედიტი არ შეიძლება იქნეს გაანგარიშებული მხოლოდ სტუდენტის მიერ პროფესორ- მასწავლებლებთან სასწავლო გარემოში გატარებული საათების ( საკონტაქტო საათების) მიხედვით.

    მუხლი 4. სტუდენტის მიღწევების შეფასება

1. კრედიტების მიღება შესაძლებელია მხოლოდ სტუდენტის მიმართ მოთხოვნილი სამუშაოს წარმატებით დასრულების შემდეგ და ამ სამუშაოს დადებითი შეფასების შემთხვევაში.

2 დაუშვებელია სტუდენტის სემესტრული ( ტრიმესტრული) მიღწევის შეფასება მხოლოდ სემესტრის ( ტრიმესტრის) ბოლოს ჩატარებული გამოცდის მიხედვით. სტუდენტის სემესტრის ( ტრიმესტრის) განმავლობაში გაწეული შრომის შეფასება გარკვეული შეფარდებით უნდა ითვალისწინებდეს:

ა) მისი დამოუკიდებელი მუშაობის შეფასებას;

ბ) შუა სემესტრულ რეიტინგულ შეფასებას;

გ) სემესტრის ( ტრიმესტრის) საბოლოო გამოცდის შეფასებას.

3. სემესტრის ( ტრიმესტრის) საბოლოო გამოცდაზე ჩაჭრილი სტუდენტი, მიუხედავად მისი მიღწევებისა შეფასების სხვა კომპონენტებში, ითვლება ჩაჭრილად.

4. ამ მუხლის მე-2 პუნქტში მოყვანილი შეფასებების შეფარდება შეიძლება იცვლებოდეს საგნის, საგანმანათლებლო პროგრამის ( კურსის) ან მოდულის მიხედვით.

5. საკრედიტო სისტემის შეფასებათა სისტემა უშვებს ხუთი სახის დადებით შეფასებას:

ა) (A) ფრიადი – მაქსიმალური შეფასების 90%- ზე მეტი;

ბ) (B) ძალიან კარგი – მაქსიმალური შეფასების 81-90%;

გ) (C) კარგი – მაქსიმალური შეფასების 71-80%;

დ) (D) დამაკმაყოფილებელი – მაქსიმალური შეფასების 61-70%;

ე) (E) საკმარისი – მაქსიმალური შეფასების 51-60%,

არსებობს ორი უარყოფითი შეფასება:

ვ) (FX) ვერ ჩააბარა – მაქსიმალური შეფასების 41-50%, რაც ნიშნავს, რომ სტუდენტს ჩასაბარებლად მეტი მუშაობა სჭირდება და ეძლევა დამოუკიდებელი მუშაობით ხელახლა გამოცდაზე გასვლის უფლება;

ზ) (F) ჩაიჭრა – მაქსიმალური შეფასების 40% და ნაკლები, სტუდენტს მნიშვნელოვანი სამუშაო აქვს ჩასატარებელი, ანუ საგანი ახლიდან აქვს შესასწავლი.

6. დოქტორანტის სადისერტაციო ნაშრომის შეფასება უშვებს ორი სახის შეფასებას:

ა) (P) – დაიცვა;

ბ (F) – ვერ დაიცვა.

საქართველოს განათლებისა და მეცნიერების მინისტრის 2007 წლის 20 ივნისის ბრძანება №441-სსმIII, №94, 02.07.2007წ.; მუხ.1013

 

    მუხლი 41. კრედიტების დაგროვება და ტრანსფერი

41 პირის მიერ უმაღლეს საგანმანათლებლო დაწესებულებაში კანონმდებლობით დადგენილი წესით ჩარიცხვამდე დაგროვებული უმაღლესი საგანმათლებლო პროგრამის ფარგლებში მოპოვებული კრედიტები შეიძლება აღიარებულ იქნეს იმ უმაღლესი საგანმანათლებლო დაწესებულების მიერ, რომელშიც პირი აგრძელებს ან იწყებს სწავლას.

საქართველოს განათლებისა და მეცნიერების მინისტრის 2007 წლის 16 თებერვლის ბრძანება №120-სსმIII, №124, 22.02.2007წ.; მუხ.288

საქართველოს განათლებისა და მეცნიერების მინისტრის 2008 წლის 11 თებერვლის ბრძანება №100-სსმIII, №26, 20.02.2008წ.; მუხ.272

    მუხლი 5. გარდამავალი დებულებანი

1. ყველა ლიცენზირებული საგანმანათლებლო დაწესებულება, რომელშიც დანერგილია სხვა სახის საკრედიტო სისტემები; 2006/2007 სასწავლო წლისათვის უნდა გადავიდეს ამ წესით განსაზღვრულ საკრედიტო სისტემაზე.

2. უმაღლესი საგანმანათლებლო დაწესებულება უფლებამოსილია მიიღოს გადაწყვეტილება იმის თაობაზე, რომ ეს წესი არ გავრცელდეს 2006-2007 სასწავლო წლამდე ჩარიცხულ სტუდენტებზე. საჯარო სამართლის იურიდიულ პირ – უმაღლეს საგანმანათლებლო დაწესებულებებში ეს გადაწყვეტილება უნდა მიიღოს რექტორის მოვალეობის შემსრულებელმა დეკანის მოვალეობის შემსრულებლის წარდგინებით, ხოლო დაწესებულების აკადემიური საბჭოს შექმნის შემდეგ – აკადემიურმა საბჭომ, და უნდა გაფორმდეს ინდივიდუალური ადმინისტრაციულ-სამართლებრივი აქტით.

3. ამ წესის 41 მუხლი ვრცელდება აგრეთვე იმ უმაღლესი განათლების სასწავლო კურსებზე, რომლებიც პირის მიერ გავლილ იქნა უმაღლეს საგანმანათლებლო დაწესებულებაში საკრედიტო სისტემის შემოღებამდე. ამ შემთხვევაში უმაღლესი საგანმანათლებლო დაწესებულება უფლებამოსილია ავტონომიის ფარგლებში გამოიანგარიშოს გავლილი სასწავლო კურსების შესაბამისი კრედიტები გავლილი საათების შესაბამისად.

საქართველოს განათლებისა და მეცნიერების მინისტრის 2007 წლის 16 თებერვლის ბრძანება №120-სსმIII, №124, 22.02.2007წ.; მუხ.288

 

Annotate