საქართველოს შინაგან საქმეთა სამინისტროს საექსპერტო-კრიმინალისტიკური მთავარი სამმართველოს დებულების დამტკიცების შესახებ

სახელმწიფო სარეგისტრაციო კოდი 140.010.000.22.034.010.467

საქართველოს შინაგან საქმეთა მინისტრის

ბრძანება №849

2007 წლის 15 ივნისი

ქ. თბილისი

საქართველოს შინაგან საქმეთა სამინისტროს საექსპერტო-კრიმინალისტიკური მთავარი სამმართველოს დებულების დამტკიცების შესახებ

„ნორმატიული აქტების შესახებ“ საქართველოს კანონის 47-ე მუხლის, „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-18 მუხლის მე-2 პუნქტის, „საქართველოს შინაგან საქმეთა სამინისტროს დებულების დამტკიცების შესახებ“ საქართველოს პრეზიდენტის 2004 წლის 27 დეკემბრის №614 ბრძანებულებით დამტკიცებული დებულების მე-11 მუხლის „ა“, „კ“ და „ნ“ ქვეპუნქტების საფუძველზე, ვბრძანებ:

1. დამტკიცდეს საქართველოს შინაგან საქმეთა სამინისტროს საექსპერტო-კრიმინალისტიკური მთავარი სამმართველოს თანდართული დებულება.

2. ბრძანება ამოქმედდეს 2007 წლის 7 მარტიდან.

ი. მერაბიშვილი

შეტანილია ცვლილებები:

1. საქართველოს შინაგან საქმეთა მინისტრის 2007 წლის 27 ნოემბრის ბრძანება №1521-სსმIII, №170,30.11.2007წ., მუხ.1893

2. საქართველოს შინაგან საქმეთა მინისტრის 2009 წლის 17 ივლისის ბრძანება №891-სსმ III, №88, 20.07.2009წ., მუხ.939

3. საქართველოს შინაგან საქმეთა მინისტრის 2010 წლის 19 ივლისის ბრძანება №644-სსმ III, №89, 21.07.2010წ., მუხ.1295

4. საქართველოს შინაგან საქმეთა მინისტრის 2010 წლის 26 აგვისტოს ბრძანება №767-სსმ III, №106, 27.08.2010წ., მუხ.1604

5.საქართველოს შინაგან საქმეთა მინისტრის 2010 წლის 16 ნოემბრის ბრძანება №994 - სსმ III, №151, 18.11.2010წ., მუხ.1604

დანართი №1

საქართველოს შინაგან საქმეთა სამინისტროს საექსპერტო-კრიმინალისტიკური მთავარი სამმართველოს დებულება

თავი I

ზოგადი დებულებანი

    მუხლი 1. საქართველოს შინაგან საქმეთა სამინისტროს საექსპერტო-კრიმინალისტიკური მთავარი სამმართველოს სტატუსი და ანგარიშვალდებულება

1. საქართველოს შინაგან საქმეთა სამინისტროს (შემდგომში – სამინისტრო) საექსპერტო-კრიმინალისტიკური მთავარი სამმართველო (შემდგომში – მთავარი სამმართველო) წარმოადგენს სამინისტროს სტრუქტურულ ქვედანაყოფს, რომელიც ახორციელებს კანონმდებლობით, სამინისტროს დებულებით და ამ დებულებით დაკისრებულ ამოცანებს.

2. მთავარი სამმართველო ანგარიშვალდებულია საქართველოს შინაგან საქმეთა მინისტრის (შემდგომში – მინისტრი) და კურატორი მინისტრის მოადგილის წინაშე.

    მუხლი 2. მთავარი სამმართველოს საქმიანობის სამართლებრივი და ორგანიზაციული საფუძვლები

მთავარი სამმართველო თავისი საქმიანობის პროცესში ხელმძღვანელობს საქართველოს საერთაშორისო ხელშეკრულებებით და შეთანხმებებით, საქართველოს კანონებით, საქართველოს პრეზიდენტის ბრძანებულებებით და განკარგულებებით, საქართველოს მთავრობის დადგენილებებითა და განკარგულებებით, სამინისტროს დებულებით, ამ დებულებით, მინისტრის ბრძანებებით და სხვა სამართლებრივი აქტებით.

    მუხლი 3. მთავარი სამმართველოს ძირითადი ამოცანები

მთავარი სამმართველოს ძირითადი ამოცანებია:

ა) კანონმდებლობით დადგენილი წესით სამოქალაქო, ადმინისტრაციულ ან სისხლის სამართლის საქმეებზე საექსპერტო-კრიმინალისტიკური და სპეციალური გამოკვლევებით მომსახურება;

ბ) საგამოძიებო და ოპერატიულ-სამძებრო სამსახურებთან ერთად, კვლევის სპეციფიკური საშუალებებისა და მეთოდების გამოყენებით, კვალთა და ნივთიერი მტკიცებულებების აღმოჩენა, დაფიქსირება, ამოღება და მათი შემდგომი გამოკვლევის გზით დანაშაულის გახსნის უწყვეტ პროცესში მონაწილეობა;

გ) ოპერატიული თვალსაზრისით სხვა საჭირო მტკიცებულებათა მოპოვება კანონით დადგენილი წესით, დანაშაულის გამომწვევი მიზეზების დადგენა, მათი აღკვეთა-აცილება;

დ) დამნაშავე პირთა მხილება;

ე) კვლევის სპეციალური საშუალებების, კრიმინალისტიკური ტექნიკისა და მეცნიერული მეთოდების საექსპერტო პრაქტიკაში დანერგვა და მისი გამოყენება დანაშაულის წინააღმდეგ ბრძოლაში;

ვ) გაანალიზოს საექსპერტო-კრიმინალისტიკური დანაყოფების მიერ გაწეული მუშაობა, განაზოგადოს პრაქტიკა და დასახოს ღონისძიებები ჩატარებული ექსპერტიზებისა და გამოკვლევების ხარისხის ამაღლებისა და საექსპერტო საქმიანობის სრულყოფისათვის;

ზ) მთავარ სამმართველოს დაქვემდებარებულ სტრუქტურულ დანაყოფებს ადგილებზე გაუწიოს მეთოდური და პრაქტიკული დახმარება, მთავარ ექსპერტთა, უფროს ექსპერტთა და ექსპერტთა მომზადების, გადამზადებისა და კვალიფიკაციის ამაღლებისათვის შესაბამისი წინადადებების მომზადება, შეამოწმოს მათი მუშაობა და განახორციელოს სათანადო ღონისძიებები გამოვლენილი ნაკლოვანებების გამოსასწორებლად.

თ) კანონმდებლობით დადგენილი წესით განახორციელოს დოკუმენტური რევიზიისა და თემატური შემოწმებების ჩატარება ობიექტური ჭეშმარიტების დადგენის მიზნით;

ი) დანაშაულის გახსნისა და სისხლის სამართლის საქმეზე ჭეშმარიტების დადგენის მიზნით ორგანიზება გაუკეთოს ადგილებზე სხვა სამსახურებთან ურთიერთშეთანხმებულ მუშაობას.

საქართველოს შინაგან საქმეთა მინისტრის 2010 წლის 16 ნოემბრის ბრძანება №994 - სსმ III, №151, 18.11.2010წ., მუხ.1604

 

თავი II

მთავარი სამმართველოს ხელმძღვანელობა

    მუხლი 4. მთავარი სამმართველოს უფროსი

1. მთავარ სამმართველოს ხელმძღვანელობს უფროსი, რომელსაც თანამდებობაზე ნიშნავს და თანამდებობიდან ათავისუფლებს მინისტრი.

2. მთავარი სამმართველოს უფროსი:

ა) ხელმძღვანელობს მთავარი სამმართველოს საქმიანობას და კოორდინაციას უწევს მის კომპეტენციას მიკუთვნებულ საკითხთა შესრულებას;

ბ) კურატორ მინისტრის მოადგილესთან შეთანხმებით მინისტრს წარუდგენს წინადადებებს მთავარი სამმართველოს სტრუქტურის, საშტატო განრიგისა და საქმიანობის ორგანიზაციის შესახებ;

გ) მოქმედი კანონმდებლობის საფუძველზე თანამდებობაზე ნიშნავს და თანამდებობიდან ათავისუფლებს მთავარი სამმართველოს თანამშრომლებს;

დ) კანონმდებლობით დადგენილი წესით მინისტრს (კურატორ მინისტრის მოადგილეს) წარუდგენს წინადადებებს მთავარი სამმართველოს თანამშრომელთა წახალისების ან მათი დისციპლინური პასუხისმგებლობის შესახებ;

ე) სამინისტროს ხელმძღვანელობის წინაშე შუამდგომლობს იმ სახსრებისა და მატერიალური ფასეულობების გამოყოფის თაობაზე, რომელიც საჭიროა მთავარი სამმართველოს ამოცანების შესასრულებლად;

ვ) შუამდგომლობს მინისტრთან (კურატორ მინისტრის მოადგილესთან), მთავარი სამმართველოს მოსამსახურეთა კვალიფიკაციის ამაღლების შესახებ;

ზ) სამინისტროს ხელმძღვანელობას წარუდგენს წინადადებებს იმ საკითხებზე, რომლებიც მთავარი სამმართველოს კომპეტენციას განეკუთვნება;

თ) საქართველოს კანონმდებლობის შესაბამისად ახორციელებს სხვა უფლებამოსილებებს.

    მუხლი 5. მთავარი სამმართველოს უფროსის მოადგილეები

1. მთავარი სამმართველოს უფროსს ჰყავს ორი მოადგილე, რომელთაც მთავარი სამმართველოს უფროსის წარდგინებით თანამდებობაზე ნიშნავს და თანამდებობიდან ათავისუფლებს მინისტრი.

2. მთავარი სამმართველოს უფროსის არყოფნისას მთავარი სამმართველოს უფროსის მოვალეობას მინისტრის ან კურატორი მინისტრის მოადგილის დავალებით ასრულებს მთავარი სამმართველოს უფროსის ერთ-ერთი მოადგილე.

3. მთავარი სამმართველოს უფროსის ერთ-ერთი მოადგილე ხელმძღვანელობს და პასუხისმგებელია მთავარი სამმართველოს საექსპერტო-კრიმინალისტიკური კვლევის სამმართველოში შემავალი განყოფილებების მუშაობაზე.

4. მთავარი სამმართველოს უფროსის ერთ-ერთი მოადგილე ხელმძღვანელობს და პასუხისმგებელია მთავარი სამმართველოს ნარკოლოგიური შემოწმების სამსახურისა და რეგიონალური დანაყოფების საქმიანობაზე.

5. მთავარი სამმართველოს უფროსის მოადგილეები პასუხისმგებელნი არიან მათ საკურატორო სფეროში შემავალი დანაყოფებისა და ქვედანაყოფების მიერ გაწეულ საქმიანობაზე.

საქართველოს შინაგან საქმეთა მინისტრის 2007 წლის 27 ნოემბრის ბრძანება №1521 - სსმ III, №170,  30.11.2007წ., მუხ.1893

თავი III

მთავარი სამმართველოს სტრუქტურული დანაყოფები და მათი კომპეტენცია

    მუხლი 6

1. მთავარი სამმართველოს სტრუქტურული დანაყოფებია:

ა) საექსპერტო-კრიმინალისტიკური კვლევის სამმართველო;

ბ) ნარკოლოგიური შემოწმების სამსახური;

გ) ორგანიზაციული უზრუნველყოფის განყოფილება;

დ) კინოლოგიის სამსახური;

დ^​1) ქ. თბილისისა და მცხეთა-მთიანეთის საექსპერტო-კრიმინალისტიკური სამმართველო;

ე) რეგიონალური დანაყოფები;

ვ) ანალიზისა და მონიტორინგის განყოფილება.

2. მთავარი სამმართველოს სტრუქტურული დანაყოფები იყოფა ქვედანაყოფებად.

3. მთავარი სამმართველოს სტრუქტურული დანაყოფების, სტრუქტურულ დანაყოფებში შემავალი ქვედანაყოფების სტრუქტურას, უფლება-მოვალეობების განაწილებისა და საქმიანობის წესს მთავარი სამმართველოს უფროსის წარდგინებით ამტკიცებს მინისტრი.

საქართველოს შინაგან საქმეთა მინისტრის 2007 წლის 27 ნოემბრის ბრძანება №1521 - სსმ III, №170, 30.11.2007წ., მუხ.1893

საქართველოს შინაგან საქმეთა მინისტრის 2009 წლის 17 ივლისის ბრძანება №891 - სსმ III, №88,20.07.2009წ., მუხ.939

საქართველოს შინაგან საქმეთა მინისტრის 2010 წლის 19 ივლისის ბრძანება №644 - სსმ III, №89 ,21.07.2010,წ., მუხ.1295

საქართველოს შინაგან საქმეთა მინისტრის 2010 წლის 26 აგვისტოს ბრძანება №767 - სსმ III, №106 27.08.2010წ.,მუხ.1604

    მუხლი 7. საექსპერტო-კრიმინალისტიკური კვლევის სამმართველოს კომპეტენცია

1. საექსპერტო-კრიმინალისტიკური კვლევის სამმართველოს კომპეტენციაა:

ა) საექსპერტო-კრიმინალისტიკური და სპეციალური კვლევების ჩატარების უზრუნველყოფა;

ბ) საგამოძიებო მოქმედებებში მთავარ ექსპერტთა, მონაწილეობის უზრუნველყოფა ოპერატიულ საგამოძიებო ჯგუფებთან ერთად, ამა თუ იმ სახის კვალის, საგნის და სხვა ნივთიერ მტკიცებულებათა აღმოჩენა, დაფიქსირება, ამოღება, დანაშაულის ხელშემწყობი მიზეზებისა და პირობების დადგენისა და სწორი ვერსიების ჩამოყალიბების მიზნით.

გ) ოპერატიულ-სამძებრო სამსახურების მომართვის საფუძველზე საინფორმაციო-საძიებო კრიმინალისტიკური კარტოთეკებითა და კოლექციებით შემოწმების უზრუნველყოფა, დანაშაულის ხელშემწყობი მიზეზებისა და პირობების დადგენისა და სწორი ვერსიების ჩამოყალიბების მიზნით;

დ) გაანალიზოს საექსპერტო-კრიმინალისტიკური დანაყოფების მიერ გაწეული მუშაობა, განაზოგადოს პრაქტიკა და დასახოს ღონისძიებები ჩატარებული ექსპერტიზებისა და გამოკვლევების ხარისხის ამაღლებისა და საექსპერტო საქმიანობის სრულყოფისათვის;

ე) დანაშაულის გახსნისა და სისხლის სამართლის საქმეზე ჭეშმარიტების დადგენის მიზნით ორგანიზება გაუკეთოს ადგილებზე სხვა სამსახურებთან ურთიერთშეთანხმებულ მუშაობას;

ვ) საექსპერტო-კრიმინალისტიკური დანაყოფების საქმიანობაზე კონტროლი და მეთოდური ხელმძღვანელობა.

2. საექსპერტო-კრიმინალისტიკური კვლევის სამმართველო ატარებს შემდეგ საექსპერტო და სპეციალურ კვლევებს:

ა) ფეთქებადსაშიში ნივთიერებების ექსპერტიზას, ელექტროტექნიკური, ასაფეთქებელი მოწყობილობებისა და მექანიზმების ექსპერტიზას, რადიაციულ ექსპერტიზას, სახანძრო ექსპერტიზას;

ბ) ავტოტექნიკურ ექსპერტიზას;

გ) ტრასოლოგიურ და ბალისტიკურ ექსპერტიზას, ცივი იარაღის კვლევას;

დ) ქიმიურ და ბიოლოგიურ კრიმინალისტიკურ ექსპერტიზას (მათ შორის, ნარკოტიკული საშუალებების და ფარმაცევტული პრეპარატების ექსპერტიზას);

ე) ხელნაწერების გრაფიკულ ექსპერტიზას, დოკუმენტების ტექნიკურ ექსპერტიზას;

ვ) დაქტილოსკოპიურ ექსპერტიზას;

ზ) ბუღალტრულ და ეკონომიკურ ექსპერტიზას;

თ) სასაქონლო და საინჟინრო-ტექნიკურ ექსპერტიზას;

ი) ფონოსკოპიურ ექსპერტიზას;

კ) ჰაბიტოსკოპიური და ფოტო-ვიდეო ექსპერტიზას;

ლ) ოდოროლოგიურ ექსპერტიზას.

3. საექსპერტო-კრიმინალისტიკური კვლევის სამმართველოს საქმიანობაზე პასუხისმგებელია მთავარი სამმართველოს უფროსი და სამმართველოს კურატორი შესაბამისი მთავარი სამმართველოს უფროსის მოადგილე.

საქართველოს შინაგან საქმეთა მინისტრის 2010 წლის 16 ნოემბრის ბრძანება №994 - სსმ III, №151, 27.08.2010წ., მუხ.1604

    მუხლი 8. ნარკოლოგიური შემოწმების სამსახურის კომპეტენცია

1. ნარკოლოგიური შემოწმების სამსახურის კომპეტენციაა:

ა) კანონმდებლობით დადგენილი წესით უზრუნველყოს ორგანიზაციული საკითხების გადაწყვეტა;

ბ) კანონმდებლობით დადგენილი წესით ნარკოლოგიური გამოკვლევებისა და ექსპერტიზების განხორციელება, შესაბამისი დასკვნის გაცემა;

გ) ნარკოლოგიური გამოკვლევებისა და ექსპერტიზის განხორციელებისათვის სამსახურისა და რეგიონალური დანაყოფების საჭირო საშუალებებით მომარაგება, მათი შესაბამისი აღრიცხვა-რეგისტრაცია და ხარჯვაზე კონტროლი.

დ) უზრუნველყოს გამოკვლევის პროცესში მიღებული ბიოლოგიური მასალის დალუქვა-შენახვა.

2. ნარკოლოგიური შემოწმების სამსახურის საქმიანობაზე პასუხისმგებელია მთავარი სამმართველოს უფროსის ერთ-ერთი მოადგილე.

საქართველოს შინაგან საქმეთა მინისტრის 2007 წლის 27 ნოემბრის ბრძანება №1521 - სსმ III, №170, 30.11.2007წ., მუხ.1893

საქართველოს შინაგან საქმეთა მინისტრის 2009 წლის 17 ივლისის ბრძანება №891 - სსმ III, №88,  20.07.2009წ.,მუხ.939

    მუხლი 9. კინოლოგიის სამსახურის კომპეტენცია

1. კინოლოგიის სამსახურის კომპეტენციაა:

ა) შემთხვევის ადგილზე არსებული სუნით, ოდოროლოგიური კვალის მიხედვით პიროვნების, ასევე ნარკოტიკულ ნივთიერებათა, ფეთქებად და სხვა საგანთა აღმოსაჩენად შესაბამისი კინოლოგიური მომსახურება; 

ბ) ექსპერტიზების ჩატარება;

გ) სამომსახურეო დანიშნულების ძაღლების გაწვრთნა და სპეციალური სამსახურებრივი ძაღლებით მომსახურე (მეპატრონე) სამინისტროს თანამშრომელთა სათანადო გადამზადება და კონტროლი;

დ) სამომსახურეო დანიშნულების ძაღლების სათანადო საკვებით და მედიკამენტებით დროული უზრუნველყოფა და კონტროლი.

2. კინოლოგიის სამსახურის საქმიანობაზე პასუხისმგებელია მთავარი სამმართველოს უფროსი.

საქართველოს შინაგან საქმეთა მინისტრის 2010 წლის 19 ივლისის ბრძანება №644 - სსმ III, №89 21.07.2010წ., მუხ.1295

    მუხლი 9^​1. ქ. თბილისისა და მცხეთა-მთიანეთის საექსპერტო-კრიმინალისტიკური სამმართველოს კომპეტენცია

1. ქ. თბილისისა და მცხეთა-მთიანეთის საექსპერტო-კრიმინალისტიკური სამმართველოს კომპეტენციაა:

ა) დანაშაულის კვალის და ნივთიერ მტკიცებულებათა აღმოჩენის, დაფიქსირების, ამოღებისა და მათი შემდეგი გამოკვლევის მიზნით შემთხვევის ადგილის დათვალიერებაში, ასევე სხვა საგამოძიებო და ოპერატიულ-სამძებრო ღონისძიებებში მონაწილეობა;

ბ) გაწეული საქმიანობის ამსახველი სტატისტიკის წარმოება და სტატისტიკური მონაცემების ყოველთვიური წარდგენა მთავარი სამმართველოს უფროსის წინაშე;

გ) დანაშაულის შესახებ შეტყობინება-გამოძახების მიღება, აღრიცხვა-რეგისტრაცია და შესაბამისი რეაგირების ორგანიზება.

2. ქ. თბილისისა და მცხეთა-მთიანეთის საექსპერტო-კრიმინალისტიკური სამმართველოს საქმიანობაზე პასუხისმგებელია მთავარი სამმართველოს უფროსი.

საქართველოს შინაგან საქმეთა მინისტრის 2010 წლის 26 აგვისტოს ბრძანება №767 - სსმ III, №106 27.08.2010წ., მუხ.1604

    მუხლი 10. რეგიონალური დანაყოფები

1. მთავარი სამმართველოს რეგიონალური დანაყოფებია:

ა) (ამოღებულია);

ბ) აჭარის ავტონომიური რესპუბლიკის საექსპერტო-კრიმინალისტიკური სამსახური;

გ) დასავლეთ საქართველოს საექსპერტო-კრიმინალისტიკური რეგიონალური სამსახური;

დ) სამეგრელო-ზემო სვანეთის სამხარეო საექსპერტო-კრიმინალისტიკური სამსახური;

ე) შიდა ქართლის საექსპერტო-კრიმინალისტიკური სამსახური;

ვ) ქვემო ქართლის საექსპერტო-კრიმინალისტიკური სამსახური;

ზ) კახეთის საექსპერტო-კრიმინალისტიკური სამსახური;

თ) სამცხე-ჯავახეთის საექსპერტო-კრიმინალისტიკური სამსახური.

2. რეგიონალური დანაყოფების კომპეტენციაა:

ა) თავისი კომპეტენციის ფარგლებში საექსპერტო-კრიმინალისტიკური და სპეციალური კვლევების ჩატარების უზრუნველყოფა;

ბ) დანაშაულის კვალის და ნივთიერ მტკიცებულებათა აღმოჩენის, დაფიქსირების, ამოღებისა და მათი შემდგომი გამოკვლევის მიზნით შემთხვევის ადგილის დათვალიერებაში, ასევე სხვა საგამოძიებო და ოპერატიულ-სამძებრო ღონისძიებებში მონაწილეობა;

გ) კანონმდებლობით დადგენილი წესით ნარკოლოგიური გამოკვლევებისა და ექსპერტიზების განხორციელება, შესაბამისი დასკვნის გაცემა;

დ) გაწეული საქმიანობის ამსახველი სტატისტიკის წარმოება და სტატისტიკური მონაცემების ყოველთვიური წარდგენა მთავარი სამმართველოს უფროსის წინაშე;

ე) დანაშაულის შესახებ შეტყობინება-გამოძახების მიღება, აღრიცხვა-რეგისტრაცია და შესაბამისი რეაგირების ორგანიზება.

3. რეგიონალური დანაყოფების საქმიანობაზე პასუხისმგებელია მთავარი სამმართველოს უფროსის მოადგილე.

საქართველოს შინაგან საქმეთა მინისტრის 2009 წლის 17 ივლისის ბრძანება №891 - სსმ III, №88,  20.07.2009,წ.,მუხ.939

საქართველოს შინაგან საქმეთა მინისტრის 2010 წლის 19 ივლისის ბრძანება №644 - სსმ III, №89 21.07.2010წ., მუხ.1295

საქართველოს შინაგან საქმეთა მინისტრის 2010 წლის 26 აგვისტოს ბრძანება №767 - სსმ III, №106 27.08.2010წ., მუხ.1604

    მუხლი 11. ორგანიზაციული უზრუნველყოფის განყოფილება

ორგანიზაციული უზრუნველყოფის განყოფილების კომპეტენციაა:

ა) მთავარ სამმართველოში განსახილველად შემოსული, კონტროლზე აყვანილი დოკუმენტების აღრიცხვა, მთავარი სამმართველოს კორესპონდენციების მიღება-დაგზავნა, მთავარი სამმართველოს მიერ მომზადებული, შემოსული და გასული დოკუმენტების რეგისტრაცია;

ბ) ექსპერტიზების ხარისხის გაუმჯობესების ხელშეწყობა უახლესი მეთოდების, სტანდარტების, პროგრამების, აპარატურის მოძიების, შემუშავებისა და დანერგვის გზით;

გ) მთავარ სამმართველოში შესრულებული ექსპერტიზების, გამოკვლევების და მათზე დართული ნივთიერი მტკიცებულებების შენახვა და გაცემა, გარდა ამ დებულების მე-8 მუხლის პირველი პუნქტის „დ“ ქვეპუნქტით გათვალისწინებული შემთხვევისა.

საქართველოს შინაგან საქმეთა მინისტრის 2007 წლის 27 ნოემბრის ბრძანება №1521 - სსმ III, №170,  30.11.2007წ., მუხ.1893

საქართველოს შინაგან საქმეთა მინისტრის 2009 წლის 17 ივლისის ბრძანება №891 - სსმ III, №88,  20.07.2009წ., №88, მუხ.939

    მუხლი 11^​1. ანალიზისა და მონიტორინგის განყოფილება

ანალიზისა და მონიტორინგის განყოფილების კომპეტენციაა:

ა) თავისი კომპეტენციის ფარგლებში, მთავარ სამმართველოში შემავალი სტრუქტურული დანაყოფების საქმიანობის შემოწმება შესრულებული სამუშაოების გაცნობისა და შეფასების მიზნით; მათი შესრულების კონტროლი და ანალიზი, ფუნქციონალური მოვალეობებით გათვალისწინებული მოთხოვნების შესრულებაზე და თანამშრომელთა საშემსრულებლო დისციპლინაზე კონტროლი, გამოვლენილ დარღვევებზე შესაბამისი წერილის მომზადება და მთავარი სამმართველოს უფროსისათვის წარდგენა;

ბ) მთავარ სამმართველოში შემოსული მოქალაქეთა განცხადებების განხილვა და არსებული კანონმდებლობის შესაბამისად მათი შესრულების უზრუნველყოფა;

გ) მთავარი სამმართველოს კომპეტენციას მიკუთვნებულ საკითხებზე ნორმატიული აქტების პროექტების შემუშავება, მინისტრის ბრძანებებისა და სხვა სამართლებრივი აქტების გაცნობა პირადი შემადგენლობისათვის;

დ) მთავარ სამმართველოში შესათანხმებლად შემოსული ნორმატიული აქტების პროექტების განხილვა და სათანადო პასუხის მომზადება;

ე) მთავარ სამმართველოში შემავალი სტრუქტურული დანაყოფების მიერ გაწეული საქმიანობის ამსახველი ინფორმაციის მომზადება და განხილვის ორგანიზება.

საქართველოს შინაგან საქმეთა მინისტრის 2009 წლის 17 ივლისის ბრძანება №891 - სსმ III, №88,  20.07.2009წ., მუხ.939

    მუხლი 12. წინამდებარე დებულების გაუქმების, ცვლილებებისა და დამატებების შეტანის წესი

წინამდებარე დებულების გაუქმება, მასში ცვლილებებისა და დამატებების შეტანა ხდება მოქმედი კანონმდებლობით დადგენილი წესით.

Annotate