,,საქართველოს შეიარაღებული ძალების გაერთიანებული შტაბის J-4 ლოგისტიკის დეპარტამენტის დებულების დამტკიცების შესახებ“

სახელმწიფო სარეგისტრაციო კოდი 120.340.000.22.026.011.340

საქართველოს თავდაცვის

მინისტრის ბრძანება №12

2008 წლის 10 იანვარი

ქ. თბილისი

საქართველოს შეიარაღებული ძალების გაერთიანებული შტაბის J-4 ლოგისტიკის დეპარტამენტის დებულების დამტკიცების შესახებ

,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-18 მუხლის მე-2 პუნქტის, ,,საქართველოს თავდაცვის სამინისტროს დებულების დამტკიცების შესახებ“ საქართველოს პრეზიდენტის 2004 წლის 5 აპრილის №119 ბრძანებულებით დამტკიცებული საქართველოს თავდაცვის სამინისტროს დებულების მე-3 მუხლის მე-3 პუნქტის ,,უ“ ქვეპუნქტის შესაბამისად, ვბრძანებ:

მუხლი 1. დამტკიცდეს საქართველოს შეიარაღებული ძალების გაერთიანებული შტაბის J-4 ლოგისტიკის დეპარტამენტის თანდართული დებულება.

მუხლი 2. ბრძანებას გაეცნონ საქართველოს თავდაცვის მინისტრის მოადგილეები, საქართველოს შეიარაღებული ძალების გაერთიანებული შტაბის უფროსი და მისი მოადგილეები, საქართველოს თავდაცვის სამინისტროს ყველა სტრუქტურული ქვედანაყოფის ხელმძღვანელი და შემსრულებლები.

მუხლი 3. ბრძანება ძალაშია გამოქვეყნებისთანავე.

დ. კეზერაშვილი

 

შეტანილია ცვლილებები:

1. საქართველოს თავდაცვის მინისტრის 2008 წლის 24 ნოემბრის ბრძანება №730 - სსმ III, 27.11.2008, №168, მუხ.1712

2. საქართველოს თავდაცვის მინისტრის 2010 წლის 27 იანვრის ბრძანება №51 - სსმ III, №9, 27.01.2010, მუხ.99

3. საქართველოს თავდაცვის მინისტრის 2010 წლის 15 სექტემბრის ბრძანება №614 - სსმ III, №120, 21.09.2010, მუხ.1776

 

 

საქართველოს შეიარაღებული ძალების გაერთიანებული შტაბის J-4 ლოგისტიკის დეპარტამენტის დებულება

თავი I

ზოგადი დებულებანი

    მუხლი 1

საქართველოს შეიარაღებული ძალების გაერთიანებული შტაბის J-4 ლოგისტიკის დეპარტამენტი (შემდგომში – დეპარტამენტი) არის საქართველოს შეიარაღებული ძალების გაერთიანებული შტაბის სტრუქტურული ქვედანაყოფი.

    მუხლი 2

დეპარტამენტი თავის საქმიანობაში ხელმძღვანელობს საქართველოს კონსტიტუციით, საქართველოს საერთაშორისო ხელშეკრულებებითა და შეთანხმებებით, საქართველოს სხვა საკანონმდებლო და კანონქვემდებარე ნორმატიული აქტებით, საქართველოს თავდაცვის მინისტრის სამართლებრივი აქტებით, შეიარაღებული ძალების გაერთიანებული შტაბის უფროსის ინდივიდუალურ-სამართლებრივი აქტებით, დირექტივებით, განკარგულებებითა და წინამდებარე დებულებით.

    მუხლი 3

დეპარტამენტი ანგარიშვალდებულია საქართველოს თავდაცვის მინისტრისა და გაერთიანებული შტაბის უფროსის წინაშე.

    მუხლი 4

დეპარტამენტს აქვს ბეჭედი ქართულ-ინგლისური წარწერით ,,საქართველოს შეიარაღებული ძალების გაერთიანებული შტაბის J-4 ლოგისტიკის დეპარტამენტი“, შტამპი, აგრეთვე ბლანკი საკუთარი სახელწოდებით.

თავი II

დეპარტამენტის ამოცანები და ფუნქციები

    მუხლი 5

დეპარტამენტის ამოცანებია:

ა) შეიარაღებული ძალების ლოგისტიკური, სამხედრო-სამედიცინო უზრუნველყოფისა და ინფრასტრუქტურის განვითარების ძირითადი პრინციპების შემუშავება;

ბ) შეიარაღებულ ძალებში სამხედრო გადაზიდვების დაგეგმვა და კოორდინაცია. ასევე შესაბამისი სახელმძღვანელო დოკუმენტების შექმნა და სრულყოფა;

გ) შეიარაღებული ძალებისათვის საჭირო ოპერატიული და საჯარისო მარაგების განსაზღვრა;

დ) შეიარაღებული ძალების ლოგისტიკური და სამხედრო-სამედიცინო უზრუნველყოფის, საერთაშორისო მოთხოვნებთან თავსებადობის მიღწევის მიზნით, განვითარების პერსპექტიული გეგმების შემუშავება;

ე) შეიარაღებული ძალების ბიუჯეტის პროექტისა და სახელმწიფო შესყიდვების გეგმის ფორმირებაში მონაწილეობის მიღება და პრიორიტეტების გათვალისწინებით, ლოგისტიკის, სამხედრო-სამედიცინო და ინფრასტრუქტურის სფეროებში მოთხოვნების შემუშავება;

ვ) სამხედრო წვრთნების, სწავლებებისა და სხვა ღონისძიებების ლოგისტიკური უზრუნველყოფის გეგმების შემუშავება;

ზ) ლოგისტიკის, სამხედრო-სამედიცინო და ინფრასტრუქტურის სახელმძღვანელო დოკუმენტაციისა და ნორმატიული აქტების შემუშავება;

თ) მატერიალურ-ტექნიკური საშუალებების მდგომარეობის შესახებ მიღებული ინფორმაციისა (დადგენილი წესით) და ინვენტარიზაციის შედეგების საფუძველზე, ლოგისტიკური ვითარების დადგენა, რეაგირება და შესაბამისი მონიტორინგის განხორციელება;

ი) საქართველოსა და მის ფარგლებს გარეთ დაგეგმილი მრავალეროვნული სწავლებების, აგრეთვე სამშვიდობო ოპერაციების ლოგისტიკური უზრუნველყოფის გეგმების შემუშავება ეროვნული მხარდაჭერის კონცეფციის ელემენტების გათვალისწინებით. ასევე სათანადო დოკუმენტაციების, დირექტივებისა და ბრძანებების პროექტების მომზადება;

კ) სამხედრო ტექნიკის, შეიარაღების, დანადგარების, მოწყობილობებისა და სხვა სამხედრო ქონების სარემონტო-აღდგენითი სამუშაოების დაგეგმვა;

ლ) ტექნიკური ბიბლიოთეკის შესაქმნელად სათანადო ლიტერატურის მოძიება და მისი სისტემატიზაცია;

მ) ეროვნული კოდიფიკაციის სისტემის ჩამოყალიბების ხელშეწყობა.

საქართველოს თავდაცვის მინისტრის 2010 წლის 15 სექტემბრის ბრძანება №614 - სსმ III, №120, 21.09.2010, მუხ.1776

    მუხლი 6

დეპარტამენტის ფუნქციებია:

ა) შეიარაღებული ძალების ლოგისტიკური, სამხედრო-სამედიცინო უზრუნველყოფისა და ინფრასტრუქტურის განვითარების მიმდინარე და პერსპექტიული გეგმების შემუშავება, მათი განხორციელების მონიტორინგი;

ბ) შეიარაღებული ძალების სამხედრო ტექნიკით, შეიარაღებით, საბრძოლო მასალებით, აღჭურვილობითა და სხვა მატერიალურ-ტექნიკური ქონებით უზრუნველყოფისათვის წინადადებების მომზადება და გაერთიანებული შტაბის უფროსისთვის წარდგენა;

გ) საქართველოს თავდაცვის სამინისტროს მიერ საერთაშორისო ხელშეკრულებებითა და შეთანხმებებით ნაკისრი ვალდებულებების შესრულების უზრუნველყოფაში მონაწილეობა;

დ) ,,მასპინძელი ქვეყნის მხარდაჭერის“ პროგრამის პროექტების დაგეგმვა და კოორდინაცია, ასევე საქართველოს ,,მასპინძელი ქვეყნის მხარდაჭერის“ შესაძლებლობათა კატალოგის შექმნა და სისტემატიზაცია;

ე) საქართველოში მოქმედი კანონმდებლობის შესაბამისად, გარემოს დაცვის სფეროში შეიარაღებული ძალებისათვის სახელმძღვანელო დოკუმენტაციებისა და აქტების შემუშავება. სამხედრო ნაწილებსა და გარნიზონებში არსებული მდგომარეობის შესახებ სათანადო მონაცემთა ბაზის შექმნა. მონაცემთა ბაზასა და არსებულ პრიორიტიტებზე დაყრდნობით, გარემოს დაცვითი პროექტების შემუშავება და კოორდინაცია;

ვ) ლოგისტიკის საინფორმაციო სისტემის დანერგვასა და პროგრამული უზრუნველყოფის შემუშავებაში მონაწილეობა;

ზ) სამხედრო-სამრეწველო კომპლექსისა და სამოქალაქო-სამრეწველო პოტენციალის შესაძლებლობის შესახებ საინფორმაციო ბანკის შექმნა;

თ) NATO-ს პრინციპების გათვალისწინებით, ეროვნული კოდიფიკაციის სისტემის შექმნის ორგანიზება.

საქართველოს თავდაცვის მინისტრის 2010 წლის 15 სექტემბრის ბრძანება №614 - სსმ III, №120, 21.09.2010, მუხ.1776

თავი III

დეპარტამენტის ხელმძღვანელობა

    მუხლი 7

დეპარტამენტს ხელმძღვანელობს დეპარტამენტის უფროსი.

    მუხლი 8

დეპარტამენტის უფროსს, კანონმდებლობით დადგენილი წესით, შეიარაღებული ძალების გაერთიანებული შტაბის უფროსის წარდგინებით, თანამდებობაზე ნიშნავს და თანამდებობიდან ათავისუფლებს საქართველოს თავდაცვის მინისტრი.

    მუხლი 9

დეპარტამენტის უფროსი უშუალოდ ექვემდებარება შეიარაღებული ძალების გაერთიანებული შტაბის უფროსს.

    მუხლი 10

დეპარტამენტის უფროსის მოადგილეს, დეპარტამენტის უფროსის წარდგინებით, შეიარაღებული ძალების გაერთიანებული შტაბის უფროსთან შეთანხმების საფუძველზე, თანამდებობაზე ნიშნავს და თანამდებობიდან ათავისუფლებს საქართველოს თავდაცვის მინისტრი.

    მუხლი 11

დეპარტამენტის უფროსის არყოფნის შემთხვევაში მის მოვალეობას ასრულებს დეპარტამენტის უფროსის მოადგილე.

    მუხლი 12

დეპარტამენტის უფროსი:

ა) ხელმძღვანელობს და წარმართავს დეპარტამენტის საქმიანობას;

ბ) წარადგენს დასამტკიცებლად დეპარტამენტის საშტატო ნუსხას;

გ) განსაზღვრავს და ანაწილებს ფუნქციონალურ მოვალეობებს მისდამი დაქვემდებარებულ მოსამსახურეებს შორის, აძლევს მათ მითითებებს;

დ) ახორციელებს კონტროლს დეპარტამენტის სტრუქტურული ქვედანაყოფების მუშაობაზე, თანამშრომელთა მიერ სამსახურებრივი მოვალეობებისა და დისციპლინის დაცვაზე;

ე) დეპარტამენტის შესაბამისი სტრუქტურული ქვედანაყოფის უფროსის შუამდგომლობის საფუძველზე, საქართველოს თავდაცვის მინისტრსა და გაერთიანებული შტაბის უფროსს წარუდგენს წინადადებებს დეპარტამენტის (სტრუქტურული ქვედანაყოფების) მოსამსახურეთა თანამდებობაზე დანიშვნის, გათავისუფლების, გადაადგილების ან/და მათ მიმართ დისციპლინური ზომების გამოყენების შესახებ;

ვ) ხელს აწერს ან ვიზირებას უკეთებს დეპარტამენტში მომზადებულ დოკუმენტებს;

ზ) პასუხისმგებელია დეპარტამენტის ფუნქციების შესრულებაზე;

თ) გამოითხოვს საჭირო ინფორმაციას საქართველოს თავდაცვის სამინისტროს სტრუქტურული ქვედანაყოფებიდან ან კომპეტენციის ფარგლებში სხვა ადმინისტრაციული ორგანოებიდან;

ი) უზრუნველყოფს დაქვემდებარებული პირადი შემადგენლობის საბრძოლო და სამობილიზაციო მზადყოფნას.

თავი IV

დეპარტამენტის სტრუქტურული ქვედანაყოფები, მათი მმართველობა, სტატუსი და ფუნქციები

    მუხლი 13

დეპარტამენტის სტრუქტურული ქვედანაყოფებია:

ა) მატერიალურ-ტექნიკური უზრუნველყოფისა და მომსახურების დაგეგმვის სამმართველო;

ბ) ლოგისტიკური ოპერაციების დაგეგმვის სამმართველო.

საქართველოს თავდაცვის მინისტრის 2010 წლის 27 იანვრის ბრძანება №51 - სსმ III, №9, 27.01.2010, მუხ.99

    მუხლი 14

მატერიალურ-ტექნიკური უზრუნველყოფისა და მომსახურების დაგეგმვის სამმართველოს სტრუქტურული ერთეულებია:

ა) შეიარაღების დაგეგმვის განყოფილება, რომელიც ახორციელებს: საქართველოს შეიარაღებული ძალების სტრატეგიული, ოპერატიული, საჯარისო და ბრძანებით განსაზღვრული მარაგების დაგეგმვასა და მონიტორინგს; შეიარაღების, საავტომობილო, ჯავშანტექნიკის, მცურავი საშუალებების, საფრენი აპარატების, სააეროდრომო და სხვა სპეციალური ტექნიკის დაგეგმვას; საინჟინრო-ქიმიური საშუალებებისა და საბრძოლო მასალების დაგეგმვას, მათ მიმდინარე უზრუნველყოფის მონიტორინგს; ტექნიკის, შეიარაღების, აღჭურვილობისა და სხვა სამხედრო ქონების სარემონტო-აღდგენითი სამუშაოების დაგეგმვასა და კოორდინაციას; მატერიალურ-ტექნიკურ საშუალებებით მომარაგების ორგანიზაციის ძირითადი პრინციპებისა და საფუძვლების შემუშავებას; საქართველოს შეიარაღებული ძალებისთვის შეიარაღებისა და ტექნიკის სასიცოცხლო ციკლის გაანგარიშების სისტემისა და შესაბამის მონაცემთა ბაზის შექმნას; ჩანაცვლებისა და მოდერნიზაციის გეგმების შემუშავებას. მონაწილეობს სახელმძღვანელო და ნორმატიულ-ტექნიკური დოკუმენტაციის შემუშავებაში; მონაწილეობს საქართველოს შეიარაღებული ძალების ბიუჯეტის პროექტის შემუშავებაში;

ბ) მარაგების დაგეგმვის განყოფილება, რომელიც ახორციელებს: სურსათის, სანივთე ქონების, სამედიცინო ქონების, საინჟინრო-ქიმიური, საწვავ-საპოხი მასალების, საბრძოლო მასალების, სტრატეგიული, ოპერატიული, საჯარისო და ბრძანებით განსაზღვრული მარაგების დაგეგმვასა და მონიტორინგს; მატერიალურ-ტექნიკურ საშუალებებით მომარაგების ორგანიზაციის ძირითადი პრინციპებისა და საფუძვლების შემუშავებას. მონაწილეობს საქართველოს შეიარაღებული ძალების ბიუჯეტის პროექტის შემუშავებაში.

გ) ლოგისტიკური მონაცემების ანალიზის განყოფილება, რომელიც ახორციელებს: ლოგისტიკური ინფორმაციის შეგროვებას, დამუშავებასა და ანალიზს; საქართველოს შეიარაღებული ძალების ლოგისტიკური რესურსების გამოყენებისა და შევსების ანალიზს; ძირითადი ლოგისტიკური განვითარების პროგრამების შემუშავებას; საქართველოს შეიარაღებული ძალების მატერიალურ-ტექნიკური საშუალებებით უზრუნველ-ყოფისათვის საჭირო ლოგისტიკური საშუალებების გაანგარიშებას და მათ სამხედრო ბიუჯეტის პროექტში და შესყიდვების გეგმაში ასახვას; ლოგისტიკური ინფორმაციის ანალიზზე დაყრდნობით, საქართველოს კანონმდებლობის შესაბამისი ლოგისტიკური უზრუნველყოფის პრინციპებისა და სახელმძღვანელო დოკუმენტების შემუშავებაში მონაწილეობის მიღებას.

საქართველოს თავდაცვის მინისტრის 2010 წლის 27 იანვრის ბრძანება №51 - სსმ III, №9, 27.01.2010, მუხ.99

    მუხლი 15(ამოღებულია)

საქართველოს თავდაცვის მინისტრის 2010 წლის 27 იანვრის ბრძანება №51 - სსმ III, №9, 27.01.2010, მუხ.99

    მუხლი 16

ლოგისტიკური ოპერაციების დაგეგმვის სამმართველოს სტრუქტურული ერთეულებია:

ა) ლოგისტიკური ოპერაციების დაგეგმვის განყოფილება, რომელიც ახორციელებს: სამხედრო ოპერაციებისა და სწავლებების ლოგისტიკური უზრუნველყოფის დაგეგმვას; ლოგისტიკური ქვედანაყოფების სწავლების დაგეგმვასა და კოორდინაციას. ასევე, „მასპინძელი ქვეყნის მხარდაჭერის“ პროექტების დაგეგმვასა და შესაძლებლობების კატალოგის შექმნასა და განახლებას; სამხედრო გადაზიდვებისა და ტრანსპორტირების, ოპერატიული სამობილიზაციო და ბრძანებით განსაზღვრული მარაგების დაგეგმვასა და კოორდინაციას; სამედიცინო ღონისძიებების დაგეგმვასა და ამ მიმართულებით სახელმძღვანელო დოკუმენტების შემუშავებაში მონაწილეობის მიღებას. საქართველოს შეირაღებულ ძალებში სანიტარიულ-ჰიგიენური და ეპიდემიოლოგიური მდგომარეობის შესწავლას, შესაბამისი ღონისძიებების დაგეგმვასა და მონიტორინგს. ჯანმრთელობისათვის მავნე ფაქტორების შესწავლას და მათ პრევენციას. ლოგისტიკური უზრუნველყოფის სისტემის ოპტიმიზაციის მიზნით რეკომენდაციების მომზადებას; ასევე, გარემოს დაცვის სფეროში საჭირო ღონისძიებების დაგეგმვასა და კოორდინაციას;

ბ) ინფრასტრუქტურის დაგეგმვის განყოფილება, რომელიც ახორციელებს: საქართველოს შეიარაღებული ძალების ინფრასტრუქტურის ობიექტებზე სამშენებლო-სარემონტო სამუშაოების, კომუნალური მომსახურების (წყალი, გაზი, ელექტროენერგია და სხვ), საოფისე-საყაზარმე ავეჯის დაგეგმვასა და კოორდინაციას. მონაწილეობს: ინფრასტრუქტურის სახელმძღვანელო დოკუმენტაციის შემუშავებაში; ორგტექნიკის, სამეურნეო საქონლისა და საოფისე-საკანცელარიო ინვენტარის დაგეგმვასა და მონიტორინგში; უძრავი ქონების მართვის მიზნით შექმნილი შესაბამისი კომისიების მუშაობაში.

გ) კოდიფიკაციის განყოფილება, რომელიც ახორციელებს: NATO-ს პრინციპების გათვალისწინებით, ეროვნული კოდიფიკაციის სისტემის შექმნის ორგანიზებას; ეროვნული კოდიფიკაციის სისტემის ჩამოყალიბების ხელშეწყობის მიზნით, ამზადებს სახელმძღვანელო დოკუმენტაციას; საქართველოს შეიარაღებული ძალების სტრუქტურული ერთეულებისათვის რეკომენდაციების მომზადებას კომპეტენციის ფარგლებში.

საქართველოს თავდაცვის მინისტრის 2008 წლის 24 ნოემბრის ბრძანება №730 - სსმ III, 27.11.2008, №168, მუხ.1712

საქართველოს თავდაცვის მინისტრის 2010 წლის 15 სექტემბრის ბრძანება №614 - სსმ III, №120, 21.09.2010, მუხ.1776

    მუხლი 17

ქვედანაყოფს ხელმძღვანელობს სამმართველოს უფროსი, რომელსაც დეპარტამენტის უფროსის წარდგინებით თანამდებობაზე ნიშნავს და თანამდებობიდან ათავისუფლებს საქართველოს თავდაცვის მინისტრი.

საქართველოს თავდაცვის მინისტრის 2010 წლის 27 იანვრის ბრძანება №51 - სსმ III, №9, 27.01.2010, მუხ.99

    მუხლი 18

ქვედანაყოფის უფროსი:

ა) ხელმძღვანელობს და წარმართავს ქვედანაყოფის საქმიანობას, პასუხს აგებს ქვედანაყოფზე დაკისრებული ფუნქციების შესრულებაზე;

ბ) წარმოადგენს ქვედანაყოფს დაკისრებული უფლება-მოვალეობის განხორციელებისას;

გ) ანაწილებს მოვალეობებს ქვედანაყოფის მოსამსახურეებს შორის, აძლევს მათ მითითებებსა და დავალებებს, ახორციელებს კონტროლს თანამშრომელთა სამსახურებრივი მოვალეობის შესრულებაზე;

დ) ხელს აწერს ქვედანაყოფში მომზადებულ დოკუმენტებს;

ე) შეიმუშავებს წინადადებებს ქვედანაყოფების შიდა სტრუქტურის, შტატების, მუშაობის ორგანიზაცების, ქვედანაყოფის მოსამსახურეთა წახალისების ან მათთვის დისციპლინური პასუხისმგებლობის დაკისრების შესახებ;

ვ) შუამდგომლობს ქვედანაყოფის მოსამსახურეთა კვალიფიკაციის ამაღლებასა და გადამზადებაზე;

ზ) ანგარიშვალდებულია დეპარტამენტის უფროსის წინაშე.

თავი V

დასკვნით დებულება

    მუხლი 19

ამ დებულების გაუქმება, მასში ცვლილებებისა და დამატებების შეტანა ხდება საქართველოს თავდაცვის მინისტრის ბრძანებით.

Annotate