,,მოსახლეობის სოციალური მდგომარეობის გაუმჯობესების ღონისძიებათა შესახებ“

საქართველოს მთავრობის

დადგენილება №225

2007 წლის 10 ოქტომბერი

ქ. თბილისი

მოსახლეობის სოციალური მდგომარეობის გაუმჯობესების ღონისძიებათა შესახებ

„საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის შესაბამისად, მოსახლეობის სოციალური მდგომარეობის გაუმჯობესების მიზნით:

1. ქ. თბილისში, ქ. რუსთავში, ქ. ქუთაისში, ქ. ფოთსა და ქ. ბათუმში მცხოვრები მოსახლეობისათვის (შემდგომში – ბენეფიციარი) ერთჯერადად გაიცეს 50 ლარის ღირებულების ელექტროენერგიის ვაუჩერი და 50 ლარის ღირებულების ბუნებრივი გაზის ვაუჩერი. იმ შემთხვევაში, თუ მითითებულ ქალაქებში რომელიმე ბენეფიციარი არ არის ბუნებრივი გაზის მომხმარებელი, ბუნებრივი გაზის ვაუჩერის ნაცვლად გაიცეს 50 ლარის ღირებულების ელექტროენერგიის ვაუჩერი.

2. საქართველოს დანარჩენ ტერიტორიაზე მცხოვრები ბენეფიციარებისათვის ერთჯერადად გაიცეს 50 ლარის ღირებულების ელექტროენერგიის ვაუჩერი, ხოლო ყოველი ოჯახისათვის (შემდგომში – მოსარგებლე) – 50 კგ ფქვილი.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

3. ამ დადგენილებით გათვალისწინებული ბენეფიციარია პირი, რომელიც 2007 წლის 4 ოქტომბრის მდგომარეობით:

ა) არის საჯარო სკოლის პედაგოგი;

ბ) „სახელმწიფო პენსიის შესახებ“ საქართველოს კანონით გათვალისწინებული ყველა კატეგორიის პენსიის მიმღები პენსიონერი;

გ) არის „სოციალურად დაუცველი ოჯახების მონაცემთა ერთიან ბაზაში“ რეგისტრირებული იმ ოჯახის წევრი, რომელსაც მინიჭებული აქვს 57 000-ის ტოლი ან ნაკლები სოციალურ-ეკონომიკური მდგომარეობის ამსახველი სარეიტინგო ქულა.

4. ამ დადგენილებით გათვალისწინებული ვაუჩერები მიეცემა ყოველ ბენეფიციარს ინდივიდუალურად, ხოლო ფქვილი – ოჯახს. იმ შემთხვევაში, თუ ბენეფიციარს ვაუჩერის მიღების უფლება აქვს ამ დადგენილების მე-3 პუნქტის „ა“, „ბ“ და „გ“ ქვეპუნქტებით გათვალისწინებული ერთზე მეტი საფუძვლით, ვაუჩერი მიეცემა მხოლოდ ერთი საფუძვლით.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

5. ბენეფიციართა სიების ფორმირებისას საქართველოს განათლებისა და მეცნიერების სამინისტრომ (ა. ლომაია) 2007 წლის 13 ოქტომბრამდე უზრუნველყოს საჯარო სკოლის პედაგოგების დაზუსტებული სიების მიწოდება სსიპ – სოციალური სუბსიდიების სააგენტოსათვის.

6. სსიპ – სოციალური სუბსიდიების სააგენტომ უზრუნველყოს ამ დადგენილების მე-3 პუნქტის „ა“, „ბ“ ან „გ“ ქვეპუნქტებით გათვალისწინებულ პირთა სიების დაზუსტება გადაფარვების გამოსარიცხად და დაზუსტებული სიების ხელმისაწვდომობა ამ დადგენილებით გათვალისწინებული სხვა შესაბამისი ადმინისტრაციული ორგანოებისათვის (ადგილობრივი თვითმმართველობის ორგანოები, სახელმწიფო რწმუნებულები – გუბერნატორები შესაბამის ადმინისტრაციულ-ტერიტორიულ ერთეულებში).

7. ელექტროენერგიის ვაუჩერისა და ბუნებრივი გაზის ვაუჩერების ფორმა განისაზღვროს თანდართული დანართის შესაბამისად.

8. ვაუჩერი განისაზღვროს როგორც მატერიალური ფორმის ფინანსური ინსტრუმენტი, რომლის განაღდებაც განახორციელოს სსიპ – სოციალური სუბსიდიების სააგენტომ შესაბამისი საბანკო დაწესებულებისათვის თანხის გადარიცხვის გზით.

9. ვაუჩერის განაღდებისათვის აუცილებელია:

ა) სსიპ – სოციალური სუბსიდიების სააგენტომ უზრუნველყოს ბენეფიციართა სიების მიწოდება შესაბამისი საბანკო დაწესებულებებისათვის;

ბ) ბენეფიციარის მიერ ვაუჩერის წარდგენა მოხდეს შესაბამის საბანკო დაწესებულებაში 2008 წლის 1 ივლისამდე;

გ) შესაბამისი საბანკო დაწესებულების მიერ მიღებული ვაუჩერის სანაცვლოდ ბენეფიციარისათვის გაიცეს ვაუჩერის ჩაბარების დამადასტურებელი საბუთი სსიპ – სოციალური სუბსიდიების სააგენტოს მიერ გადაცემული სიების მეშვეობით განხორციელებული ბენეფიციარის იდენტიფიკაციის შემდეგ;

გ^​1) სსიპ – სოციალური სუბსიდიების სააგენტომ შესაბამის საბანკო დაწესებულებას თანხა გადაურიცხოს საბანკო დაწესებულების მიერ მიწოდებული ინფორმაციის სსიპ – სოციალური სუბსიდიების სააგენტოს მიერ ფორმირებულ ბაზასთან შედარების საფუძველზე.

დ) სსიპ – სოციალური სუბსიდიების სააგენტოს მიერ შესაბამისი საბანკო დაწესებულებისათვის გადარიცხული თანხა დადგენილი წესების მიხედვით აისახოს ელექტროენერგიისა და გაზის გამანაწილებელი კომპანიების ანგარიშზე.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

10. მოსახლეობისათვის ვაუჩერის განაღდების პროცესის მაქსიმალური გაიოლებისა და ხელმისაწვდომობის მიზნით სსიპ – სოციალური სუბსიდიების სააგენტომ გაითვალისწინოს „სოციალური გასაცემლების“ გაცემის არსებული პრაქტიკა ამ დადგენილების მე-9 პუნქტით განსაზღვრული პირობების დაცვით.

11. ვაუჩერებისა და საინფორმაციო ბუკლეტების ბეჭდვა და ბენეფიციარებისათვის გადაცემა უზრუნველყოს სსიპ – სოციალური სუბსიდიების სააგენტომ.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

12. ფქვილის შესყიდვა უზრუნველყოს საქართველოს სოფლის მეურნეობის სამინისტრომ (პ. ცისკარიშვილი).

13. ეთხოვოთ ადგილობრივი თვითმმართველობის ორგანოებს, უზრუნველყონ ამ დადგენილებით გათვალისწინებული მოსარგებლეებისათვის ფქვილის გადაცემა და შესაბამისი დახმარება აღმოუჩინონ სსიპ – სოციალური სუბსიდიების სააგენტოს ვაუჩერების დასარიგებლად. აღნიშნული პროცესის კოორდინაცია განახორციელონ სახელმწიფო რწმუნებულებმა – გუბერნატორებმა შესაბამის ადმინისტრაციულ-ტერიტორიულ ერთეულებში.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

14. საქართველოს შრომის, ჯანმრთელობისა და სოციალური დაცვის სამინისტრომ (დ. ტყეშელაშვილი) ამ დადგენილებით გათვალისწინებული ღონისძიებების თაობაზე მოსახლეობის ინფორმირებულობისათვის უზრუნველყოს საინფორმაციო კლიპების დამზადება და განთავსება.

15. ამ დადგენილებით გათვალისწინებული საჭირო ხარჯები დაიფაროს შრომის, ჯანმრთელობისა და სოციალური დაცვის სამინისტროსა და სოფლის მეურნეობის სამინისტროსათვის „საქართველოს 2007 წლის სახელმწიფო ბიუჯეტის შესახებ“ საქართველოს კანონით გამოყოფილი ასიგნებებიდან.

15^​1. დამტკიცდეს საპრეზიდენტო სუბსიდიის ვაუჩერის მოსარგებლისათვის გადაცემის, სარეალიზაციოდ წარდგენისა და ანაზღაურების თანდართული წესი.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

15^​2. ვაუჩერის დარიგების, სარეალიზაციოდ გამოყენებისა და ანაზღაურებასთან დაკავშირებული ღონისძიებების ორგანიზაციულ-ტექნიკურ რეგულირებას ახორციელებს სსიპ – სოციალური სუბსიდიების სააგენტო.

საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

16. „სახელმწიფო შესყიდვების შესახებ“ საქართველოს კანონის მე-10 მუხლის მე-3 პუნქტის „ე“ ქვეპუნქტის შესაბამისად ამ დადგენილებასთან დაკავშირებული ღონისძიებების შეზღუდულ ვადებში შესრულების უზრუნველსაყოფად საქართველოს შრომის, ჯანმრთელობისა და სოციალური დაცვის სამინისტრომ, სსიპ – სოციალური სუბსიდიების სააგენტომ და სოფლის მეურნეობის სამინისტრომ საჭირო მომსახურების, საქონლის ან/და სამუშაოთა შესყიდვა განახორციელონ ერთ პირთან მოლაპარაკების საშუალებით.

17. დადგენილება ამოქმედდეს 2007 წლის 10 ოქტომბრიდან.

პრემიერ-მინისტრი ზ. ნოღაიდელი

შეტანილი ცვლილებები:

1.საქართველოს მთავრობის 2007 წლის 17 ოქტომბრის დადგენილება №230-სსმIII, №145, 18.10.2007წ., მუხ.1625

Annotate