„საქართველოს მოსახლეობისა და საცხოვრისების 2010 წლის საყოველთაო აღწერის საორგანიზაციო სახელმწიფო კომისიის შექმნის შესახებ”

 

საქართველოს პრეზიდენტის

ბრძანებულება№81

2006 წლის 27 იანვარი

ქ. თბილისი

საქართველოს მოსახლეობისა და საცხოვრისების 2010 წლის საყოველთაო აღწერის საორგანიზაციო სახელმწიფო კომისიის შექმნის შესახებ

„საქართველოს მოსახლეობის საყოველთაო აღწერის შესახებ“ საქართველოს კანონის მე- 7 მუხლის მე- 3 და მე- 4 პუნქტების შესაბამისად საქართველოს მოსახლეობისა და საცხოვრისების 2010 წლის საყოველთაო აღწერის მოსამზადებელი სამუშაოების შესრულების, მისი ორგანიზებულად ჩატარების და წამოჭრილი საკითხებისა და პრობლემების ოპერატიულად გადაწყვეტის უზრუნველსაყოფად:

1. შეიქმნას საორგანიზაციო სახელმწიფო კომისია (შემდგომში _ კომისია) შემდეგი შემადგენლობით:

ზურაბ ნოღაიდელი _ საქართველოს პრემიერ- მინისტრი, კომისიის თავმჯდომარე

ალექსი ალექსიშვილი  _ საქართველოს ფინანსთა მინისტრი, კომისიის თავმჯდომარის მოადგილე

ჯამბულ ბაკურაძე  _ საქართველოს მთავრობის კანცელარიის რეგიონალურ საკითხთა დეპარტამენტის უფროსი

ზინაიდა ბესტაევა  _ საქართველოს სახელმწიფო მინისტრი სამოქალაქო ინტეგრაციის საკითხებში

გელა ბეჟუაშვილი _ საქართველოს საგარეო საქმეთა მინისტრი

ზაზა ბროლაძე _ საქართველოს ეკონომიკური განვითარების სამინისტროს სახელმწიფო საქვეუწყებო დაწესებულების _ სტატისტიკის დეპარტამენტის თავმჯდომარე

დავით ეგიაშვილი _ საჯარო სამართლის იურიდიული პირის _ საჯარო რეესტრის ეროვნული სააგენტოს თავმჯდომარე

თამარ კინწურაშვილი _   საჯარო სამართლის იურიდიული პირის _ „საზოგადოებრივი მაუწყებლის“ გენერალური დირექტორი

როზა კუხალაშვილი _ აფხაზეთის ა/რ ეკონომიკის სამინისტროს სტატისტიკის სამმართველოს უფროსი

ალექსანდრე (კახა) ლომაია  _ საქართველოს განათლებისა და მეცნიერების მინისტრი

ივანე მერაბიშვილი _ საქართველოს შინაგან საქმეთა მინისტრი

ირაკლი ოქრუაშვილი _ საქართველოს თავდაცვის მინისტრი

გიორგი პაპუაშვილი _ საქართველოს გარემოს დაცვისა და ბუნებრივი რესურსების მინისტრი

გიგი უგულავა  _ ქ. თბილისის მერი

გია ქავთარაძე _    საქართველოს იუსტიციის მინისტრი

პაატა შავიშვილი _ საქართველოს ეკონომიკური განვითარების სამინისტროს სახელმწიფო საქვეუწყებო დაწესებულების _ სტატისტიკის დეპარტამენტის სოციალური და დემოგრაფიული სტატისტიკის სამმართველოს უფროსის მოადგილე, კომისიის პასუხისმგებელი მდივანი

ვლადიმერ ჭიპაშვილი _   საქართველოს შრომის, ჯანმრთელობისა და სოციალური დაცვის მინისტრი

ირაკლი ჩოგოვაძე  _ საქართველოს ეკონომიკური განვითარების მინისტრი, კომისიის თავმჯდომარის მოადგილე

გიორგი ხევიაშვილი _ საქართველოს ლტოლვილთა და განსახლების მინისტრი

მერაბ ხიმშიაშვილი  _ აჭარის ა/რ ფინანსთა და ეკონომიკის სამინისტროს საქვეუწყებო დაწესებულების _ სტატისტიკის დეპარტამენტის თავმჯდომარე

ირინა ბადურაშვილი _ მოსახლეობის კვლევის ცენტრის დირექტორი.

2. კომისიამ საქართველოს მთავრობის სხდომებზე პერიოდულად წარადგინოს ინფორმაცია მოსახლეობისა და საცხოვრისების 2010 წლის საყოველთაო აღწერასთან დაკავშირებული ღონისძიებების მიმდინარეობის შესახებ.

3. კომისიის უფლებამოსილების ვადა განისაზღვროს 2010 წლის 21 ივლისამდე.

4. დამტკიცდეს საქართველოს მოსახლეობისა და საცხოვრისების 2010 წლის საყოველთაო აღწერის საორგანიზაციო სახელმწიფო კომისიის თანდართული დებულება.

მ. სააკაშვილი

საქართველოს მოსახლეობისა და საცხოვრისების 2010 წლის საყოველთაო აღწერის საორგანიზაციო სახელმწიფო კომისიის

დ ე ბ უ ლ ე ბ ა

    მუხლი 1. ზოგადი დებულებები

1. საქართველოს მოსახლეობისა და საცხოვრისების 2010 წლის საყოველთაო აღწერის (შემდგომში _ აღწერა) საორგანიზაციო სახელმწიფო კომისია (შემდგომში _ კომისია) არის სათათბირო ორგანო, რომელიც იქმნება ქვეყანაში 2010 წლის აღწერის მოსამზადებელი სამუშაოების შესრულების, მისი ორგანიზებულად ჩატარების, წამოჭრილი საკითხებისა და პრობლემების ოპერატიულად გადაწყვეტის უზრუნველსაყოფად.

2. კომისია თავისი საქმიანობისას ხელმძღვანელობს საქართველოს კონსტიტუციით, საქართველოს პრეზიდენტისა და საქართველოს მთავრობის აქტებით, მოქმედი კანონმდებლობით და ამ დებულებით.

    მუხლი 2. კომისიის ძირითადი ამოცანები

კომისიის ძირითადი ამოცანებია:

ა) აღმასრულებელი ხელისუფლების დაწესებულებებისა და ადმინისტრაციულ- ტერიტორიულ ერთეულებში შექმნილი საორგანიზაციო კომისიების მონაწილეობისა და საქმიანობის კოორდინაცია აღწერასთან დაკავშირებული ღონისძიებების მომზადებასა და განხორციელებაში;

ბ) აღწერის ორგანიზებისათვის ხელშეწყობა და ამ მიზნით სათანადო დასკვნებისა და რეკომენდაციების შემუშავება;

გ) აღწერასთან დაკავშირებული ღონისძიებების განხორციელების პროცესში წარმოქმნილი სირთულეებისა და პრობლემების შესწავლა და გადაწყვეტილებების ოპერატიულად მიღება;

დ) პერიოდულად თითოეულ ადმინისტრაციულ-ტერიტორიულ ერთეულში აღწერასთან დაკავშირებული ღონისძიებების მიმდინარეობის შესახებ ინფორმაციის მოსმენა, ღონისძიებების დასახვა ჩამორჩენათა სასწრაფოდ აღმოსაფხვრელად;

ე) აღწერის შედეგების კონტროლის მიზნით შესაბამისი ღონისძიებების დაგეგმვა- განხორციელება.

    მუხლი 3. კომისიის უფლებამოსილებანი

კომისია უფლებამოსილია:

ა) თავის კომპეტენციას მიკუთვნებულ საკითხებთან დაკავშირებით საქართველოს პრეზიდენტსა და მთავრობას წარუდგინოს ნორმატიული აქტების პროექტები;

ბ) გასცეს დასკვნა აღწერის პროგრამის შინაარსობრივი მიზანშეწონილობის შესახებ, შეიმუშაოს შესაბამისი რეკომენდაციები ამ სფეროში;

გ) თავის კომპეტენციას მიკუთვნებულ საკითხებთან დაკავშირებით მოითხოვოს ყველა სახის საჭირო ინფორმაცია საქართველოს სამთავრობო დაწესებულებებისაგან, უწყებებისა და სხვა ორგანიზაციებისაგან;

დ) საჭიროების შემთხვევაში სათათბირო ხმის უფლებით თავის სხდომაზე მოიწვიოს სამინისტროების, უწყებების და ორგანიზაციების დაინტერესებული და პასუხისმგებელი პირები, აგრეთვე, დამოუკიდებელი ექსპერტები.

    მუხლი 4. კომისიის თავმჯდომარე და კომისიის პასუხისმგებელი მდივანი

1. კომისიის თავმჯდომარე:

ა) ხელმძღვანელობს კომისიის საქმიანობას;

ბ) ამტკიცებს კომისიის სამუშაო განრიგს;

გ) იწვევს და წარმართავს კომისიის სხდომებს;

დ) ქმნის უწყებათაშორის სამუშაო ჯგუფებს;

ე) წარმოადგენს კომისიას მესამე პირთან ურთიერთობაში.

2. კომისიის პასუხისმგებელი მდივანი:

ა) უზრუნველყოფს კომისიის სხდომის გამართვის ორგანიზებას;

ბ) პასუხისმგებელია კომისიის სხდომის ოქმის სწორად და ზუსტად შედგენის, სხდომათა მასალების შენახვისა და დაცვისათვის.

    მუხლი 5. კომისიის სხდომის ჩატარების წესი

1. კომისიის სხდომა იმართება პერიოდულად, სულ ცოტა სამ თვეში ერთხელ, კომისიის თავმჯდომარის გადაწყვეტილებით ან საქართველოს ეკონომიკური განვითარების სამინისტროს სახელმწიფო საქვეუწყებო დაწესებულების _ სტატისტიკის დეპარტამენტის წინადადებით, დამტკიცებული დღის წესრიგის მიხედვით.

2. კომისიის სხდომას ხელმძღვანელობს თავმჯდომარე, ხოლო მისი არყოფნის შემთხვევაში, მისი დავალების შესაბამისად _ ერთ- ერთი მოადგილე.

3. სხდომა უფლებამოსილია მიიღოს გადაწყვეტილება, თუ მას ესწრება კომისიის წევრთა ნახევარზე მეტი.

4. კომისიის სხდომაზე გადაწყვეტილება მიიღება დამსწრეთა უბრალო უმრავლესობით, მაგრამ არანაკლებ კომისიის შემადგენლობის ერთი მესამედის თანხმობით.

5. კომისიის გადაწყვეტილება აისახება სხდომის ოქმში, რომელსაც ხელს აწერენ სხდომის თავმჯდომარე და კომისიის პასუხისმგებელი მდივანი. ოქმში უნდა აისახოს კომისიის ნებისმიერი წევრის კენჭისყრაში მონაწილეობის შესახებ თავშეკავების ან უარის თქმის მიზეზი (თუ კომისიის წევრი ამის შესახებ სხდომაზე განაცხადებს), აგრეთვე _ სხდომაზე გამოთქმული ყველა განსხვავებული აზრი.

    მუხლი 6. დებულებაში ცვლილებებისა და დამატებების შეტანის წესი

კომისიის დებულებაში ცვლილებები და დამატებები შეიტანება პრეზიდენტის ბრძანებულებით, მოქმედი კანონმდებლობით დადგენილი წესით.