,,საჯარო სამართლის იურიდიული პირის – საქართველოს ეროვნული სამეცნიერო ფონდის წესდების დამტკიცების შესახებ“

საქართველოს მთავრობის

დადგენილება №64

2006 წლის 16 მარტი

ქ. თბილისი

საჯარო სამართლის იურიდიული პირის – საქართველოს ეროვნული სამეცნიერო ფონდის წესდების დამტკიცების შესახებ

1. “მეცნიერების, ტექნოლოგიებისა და მათი განვითარების შესახებ“ საქართველოს კანონის 151 მუხლის მე-3 პუნქტის შესაბამისად დამტკიცდეს საჯარო სამართლის იურიდიული პირის – საქართველოს ეროვნული სამეცნიერო ფონდის თანდართული წესდება.

2. ძალადაკარგულად გამოცხადდეს საქართველოს განათლებისა და მეცნიერების მინისტრის 2005 წლის 28 ივლისის №383 ბრძანება (სსმ III, 2005 წ., №89, მუხლი 1022) „საჯარო სამართლის იურიდიული პირის – საქართველოს ეროვნული სამეცნიერო ფონდის დებულების დამტკიცების შესახებ“.

3. დადგენილება ამოქმედდეს გამოქვეყნებისთანავე.

პრემიერ-მინისტრი      ზ. ნოღაიდელი

 

საჯარო სამართლის იურიდიული პირის – საქართველოს ეროვნული სამეცნიერო ფონდის წესდება

    მუხლი 1. ზოგადი დებულებანი

1. საქართველოს ეროვნული სამეცნიერო ფონდი (შემდგომში – ფონდი) არის საჯარო სამართლის იურიდიული პირი, რომელიც ხელს უწყობს საქართველოში მეცნიერების განვითარებას.

2. ფონდი თავისი საქმიანობისას ხელმძღვანელობს საქართველოს კონსტიტუციით, საერთაშორისო ხელშეკრულებებით, საკანონმდებლო და კანონქვემდებარე ნორმატიული აქტებითა და ამ წესდებით.

3. ფონდს აქვს დამოუკიდებელი ბალანსი, საკუთა-რი საბანკო ანგარიში და ბეჭედი.

4. ფონდის იურიდიული მისამართია: საქართველო, ქ. თბილისი 0102, უზნაძის ქუჩა №68.

    მუხლი 2. ფონდის მიზნები და ამოცანები

1. ფონდის ძირითადი მიზანია დაფინანსების გზით საქართველოში მეცნიერების განვითარების, მეცნიერთა პოტენციალის მაქსიმალური გამოვლენის, მეცნიერების სტანდარტის ამაღლების, საქართველოს მეცნიერებისათვის მსოფლიო მეცნიერების მიღწევებში წვლილის შეტანის, ქართული კულტურული მემკვიდრეობის მეცნიერული კვლევის ხელშეწყობა.

2. ფონდის ამოცანებია:

ა) სამეცნიერო პოტენციალის გასაძლიერებლად ხელი შეუწყოს ფუნდამენტური და გამოყენებითი სამეცნიერო და ტექნოლოგიური კვლევების განხორციელებას სამეცნიერო გრანტების საშუალებით;

ბ) უზრუნველყოს საქართველოში არსებული სამეცნიერო და ტექნოლოგიური პოტენციალის შესახებ მონაცემთა შეგროვება, დამუშავება და ანალიზი, მოამზადოს წინადადებები მეცნიერებისა და ტექნოლოგიების განვითარების ეროვნული პრიორიტეტების განსახორციელებლად;

გ) კანონმდებლობით დადგენილი წესით უზრუნველყოს გრანტების გაცემა ქვეყნის სამეცნიერო პოტენციალის მაქსიმალური ამოქმედების მიზნით;

დ) ხელი შეუწყოს მეცნიერებისა და ტექნოლოგიების განვითარების სფეროში სამეცნიერო ინფორმაციის გაცვლას საქართველოსა და უცხო ქვეყნების სამეცნიერო წრეებს შორის, საქართველოს მეცნიერთა და სპეციალისტთა მონაწილეობას საერთაშორისო პროგრამებში, კონფერენციებსა და შეხვედრებში;

ე) მონაწილეობა მიიღოს საერთაშორისო ორგანიზაციებთან და უცხო ქვეყნებთან მეცნიერებისა და ტექნოლოგიების განვითარების სფეროში თანამშრომლობის შესახებ მთავრობათაშორის, უწყებათაშორის შეთანხმებათა და ხელშეკრულებათა პროექტების მომზადებაში;

ვ) მოაწყოს სამეცნიერო კონფერენციები, სემინარები და სიმპოზიუმები, გამოაცხადოს კონკურსები სხვადასხვა სახის გრანტებისა და პრემიების მოსაპოვებლად;

ზ) პოპულარიზაცია გაუწიოს სამეცნიერო კვლევებს.

3. დასახულ ამოცანათა გადასაწყვეტად ფონდი:

ა) ხელს უწყობს სხვადასხვა სამეცნიერო-კვლევით დაწესებულებებში გამართული სამეცნიერო კვლევების შედეგების ინტეგრირებას საგანმანათლებლო პროცესთან;

ბ) ხელს უწყობს პრინციპულად ახალი ტექნოლოგიების განვითარებას მათი პროდუქციის წარმოებაში დანერგვის მიზნით, აგრეთვე აღიარებული საბაზო ტექნოლოგიების გამოყენებას საქართველოს სამეცნიერო-ტექნოლოგიური მიღწევების წარმოებაში დანერგვისა და ქვეყნის საექსპორტო პოტენციალის გაზრდის მიზნით;

გ) ხელს უწყობს ახალი საინფორმაციო ტექნოლოგიების დამუშავებისა და დანერგვის პროცესს, ქვეყნის ერთიანი საინფორმაციო-საკომუნიკაციო სივრცის ფორმირებასა და მსოფლიოს საინფორმაციო-საკომუნიკაციო სივრცეში მის ინტეგრირებას;

დ) ქვეყანაში და მის ფარგლებს გარეთ აწყობს სამეცნიერო და ტექნოლოგიური განვითარების სფეროში მიღწევათა გამოფენებს, სემინარებს, კონგრესებს, სიმპოზიუმებსა და სამეცნიერო-პრაქტიკულ კონფერენციებს; მონაწილეობას იღებს პარტნიორი ქვეყნების ანალოგიური ხასიათის ღონისძიებებში. ხელს უწყობს მეცნიერთა გაცვლის პროცესს, ამყარებს საქმიან კონტაქტებს საერთაშორისო ორგანიზაციებთან, უცხო ქვეყნების შესაბამის სახელმწიფო და არასახელმწიფო სტრუქტურებთან;

ე) რეკომენდაციას უწევს სახელმწიფო ხელისუფლების ორგანოებს მეცნიერებისა და ტექნოლოგიების განვითარების სფეროში;

ვ) საკუთარი კომპეტენციის ფარგლებში აწარმოებს მოლაპარაკებას და დებს ხელშეკრულებებს საქართველოსა და უცხო ქვეყნების იურიდიულ და ფიზიკურ პირებთან;

ზ) ანიჭებს პრემიებს მეცნიერებასა და ტექნოლოგიებში განსაკუთრებული მიღწევებისა და წვლილისათვის;

თ) ახორციელებს საქართველოს კანონმდებლობით განსაზღვრულ სხვა უფლებამოსილებებს.

    მუხლი 3. ფონდის ფინანსები

1. ფონდის სახსრები იქმნება:

ა) სახელმწიფო ბიუჯეტიდან გამოყოფილი მიზნობრივი სახსრებით;

ბ) საერთაშორისო საფინანსო-ეკონომიკური ორგანიზაციებისა და სამეცნიერო ფონდების სახსრების მოზიდვით, ორმხრივი და მრავალმხრივი საერთაშორისო პროგრამებიდან მიღებული გრანტებით;

გ) საქველმოქმედო შემოწირულობებით;

დ) ხელშეკრულების საფუძველზე შესრულებული სამუშაოდან მიღებული შემოსავლებით;

ე) საქართველოს კანონმდებლობით ნებადართული სხვა შემოსავლებით.

2. ამ მუხლის პირველი პუნქტით განსაზღვრული სახსრები და შემოსავლები მთლიანად ხმარდება ფონდის მიზნებისა და ამოცანების უზრუნველყოფას. ფონდის სახსრების სხვა მიზნით გამოყენება აკრძალულია.

3. ფონდი ვალდებულია საქართველოს კანონმდებლობით დადგენილი წესით აწარმოოს საფინანსო-ეკონომიური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს საქართველოს განათლებისა და მეცნიერების სამინისტროს (შემდგომში – სამინისტრო).

4. ფონდის წლიურ ბალანსს ამოწმებს სამინისტროს მიერ დანიშნული დამოუკიდებელი აუდიტორი.

    მუხლი 4. ფონდის ქონება

ფონდს თავისი უფლებამოსილებების განსახორციელებლად გადაეცემა შესაბამისი სახელმწიფო ქონება მოქმედი კანონმდებლობით დადგენილი წესით.

    მუხლი 5. ფონდის მართვა

ფონდის მართვის ორგანოებია:

ა) სამეცნიერო საბჭო;

ბ) დირექტორი.

    მუხლი 6. ფონდის სამეცნიერო საბჭო

1. ფონდის მართვის კოლეგიური ორგანოა სამეცნიერო საბჭო, რომელიც შედგება 15 წევრისაგან.

2. სამეცნიერო საბჭოს წევრის უფლებამოსილების ვადაა 3 წელი.

3. სამეცნიერო საბჭოს წევრის უფლებამოსილების ვადამდე შეწყვეტის საფუძვლებია:

ა) პირადი განცხადება;

ბ) გარდაცვალება;

გ) მის მიმართ სასამართლოს მიერ გამოტანილი გამამტყუნებელი განაჩენის ძალაში შესვლა;

დ) სასამართლოს მიერ მისი ქმედუუნაროდ ან შეზღუდულქმედუნარიანად აღიარება;

ე) დაკისრებულ მოვალეობათა სისტემატური შეუსრულებლობა;

ვ) კანონმდებლობით დადგენილი სხვა შემთხვევა.

4. სამეცნიერო საბჭო:

ა) შეიმუშავებს ფონდის პოლიტიკას და ზედამხედველობას უწევს ფონდის საქმიანობას;

ბ) ამტკიცებს ფონდის ბიუჯეტს და მისი შესრულების ანგარიშს;

გ) ამტკიცებს ფონდის მუშაობის პრიორიტეტებს;

დ) საქართველოს მთავრობას წარუდგენს ფონდის მუშაობის ყოველწლიურ ანგარიშს;

ე) აქვეყნებს მეცნიერებისა და ტექნოლოგიების განვითარების შესახებ მონაცემებს.

5. საბჭოს შემადგენლობის მინიმუმ 2/3 არიან მეცნიერები.

6. საბჭოს შემადგენლობის 1/3 განისაზღვრება საჯარო სამართლის იურიდიული პირების – მეცნიერებათა აკადემიების კვოტით, მათ შორის საჯარო სამართლის იურიდიული პირის – სოფლის მეურნეობის მეცნიერებათა აკადემიისათვის – ერთი კვოტით.

7. საბჭოს შემადგენლობის 1/3 განისაზღვრება საჯარო სამართლის იურიდიული პირების – უმაღ-ლესი საგანმანათლებლო დაწესებულებების კვოტით სამინისტროს მიერ კანონმდებლობის საფუძველზე შემუშავებული წესის შესაბამისად.

8. საბჭოს შემადგენლობის 1/3 განისაზღვრება საქართველოს მთავრობის კვოტით.

9. საბჭო უფლებამოსილია, თუ მას ესწრება წევრთა ნახევარი მაინც. საბჭო გადაწყვეტილებებს იღებს დამსწრე წევრების ხმათა უბრალო უმრავლესობით.

10. საბჭოს სხდომებს უძღვება საბჭოს თავმჯდომარე, რომელიც ირჩევა საბჭოს წევრთაგან საკუთარი უფლებამოსილების ვადით საბჭოს წევრთა სიითი შემადგენლობის უმრავლესობით.

11. საბჭოს სხდომებს ესწრება ფონდის დირექტორი სათათბირო ხმის უფლებით.

12. საბჭოს ყოველ წევრს აქვს ერთი ხმის უფლება. ხმების გაყოფის შემთხვევაში გადამწყვეტია თავმჯდომარის ხმა.

13. საბჭო იკრიბება წელიწადში 4-ჯერ მაინც, რაც განისაზღვრება საბჭოს მიერ დადგენილი რეგლამენტის შესაბამისად. საბჭოს რიგგარეშე სხდომა შეიძლება მოწვეულ იქნეს ფონდის დირექტორის, საბჭოს თავმჯდომარის ან საბჭოს სიითი შემადგენლობის უმრავლესობის მიერ.

    მუხლი 7. ფონდის დირექტორი

1. ფონდის საქმიანობას ხელმძღვანელობს ფონდის დირექტორი, რომელსაც 4 წლის ვადით თანამდებობაზე ნიშნავს და თანამდებობიდან ათავისუფლებს საქართველოს პრემიერ-მინისტრი.

2. დირექტორის კანდიდატურის შერჩევა ხორციელდება ღია კონკურსის საფუძველზე. კანდიდატურას არჩევს სამინისტროს მიერ შექმნილი საკონკურსო კომისია. კონკურსის მოწყობის თარიღსა და საკვალიფიკაციო მოთხოვნებს ადგენს საქართველოს განათლებისა და მეცნიერების მინისტრი კონკურსის გამართვამდე არა უგვიანეს 15 დღისა. შერჩეული კანდიდატი 10 დღეში წარედგინება საქართველოს პრემიერ-მინისტრს.

3. ფონდის დირექტორი:

ა) მოქმედებს ფონდის სახელით და სპეციალური უფლებამოსილების გარეშე წარმოადგენს მას მესამე პირებთან ურთიერთობაში;

ბ) უზრუნველყოფს საბჭოს მიერ დამტკიცებული პოლიტიკის განხორციელებას ამ წესდებითა და კანონმდებლობით დადგენილი წესით;

გ) ინდივიდუალური ადმინისტრაციულ-სამართლებრივი აქტით ამტკიცებს სტიპენდიების, ჰონორარების, პრემიების მინიჭების წესებს;

დ) სამეცნიერო საბჭოსთან შეთანხმებით ნიშნავს დირექტორის მოადგილეს, რომელიც მისი არყოფნის შემთხვევაში ასრულებს დირექტორის მოვალეობას;

ე) ანაწილებს სამუშაოს ფონდის აპარატის თანამშრომელთა შორის;

ვ) მოქმედი კანონმდებლობით დადგენილი წესით განკარგავს ფონდის სახსრებსა და რესურსებს;

ზ) ფონდის ბიუჯეტის შესაბამისად ამტკიცებს ფონდის საშტატო ნუსხას, ადგენს ფონდის თანამშრომელთა ანაზღაურების ოდენობასა და პირობებს;

თ) კონკურსის წესით სამსახურში იყვანს ფონდის თანამშრომლებს;

ი) წარუდგენს საბჭოს ყოველწლიურ ანგარიშს ფონდის მუშაობისა და ბიუჯეტის შესრულების შესახებ;

კ) საკუთარი კომპეტენციის ფარგლებში დაკისრებულ მოვალეობათა შესასრულებლად ახორციელებს კანონმდებლობით მინიჭებულ სხვა უფლებამოსილებებს.

4. დირექტორს ვადაზე ადრე უწყდება უფლებამოსილება:

ა) პირადი სურვილით;

ბ) გარდაცვალების შემთხვევაში;

გ) მის მიმართ სასამართლოს მიერ გამოტანილი გამამტყუნებელი განაჩენის ძალაში შესვლისას;

დ) სასამართლოს მიერ ქმედუუნაროდ ან შეზღუდულქმედუნარიანად აღიარების შემთხვევაში;

ე) კანონმდებლობით დადგენილ სხვა შემთხვევებში.

5. დირექტორი პასუხისმგებელია ფონდის საქმიანობის კანონიერების, ეფექტიანობისა და მიზანშეწონილობისათვის.

    მუხლი 8. ფონდის სტრუქტურა

1. ფონდის სტრუქტურა ყალიბდება ფონდის ამოცანების, ფუნქციებისა და შესაძლო დაფინანსების შესაბამისად.

2. ფონდის სტრუქტურას განსაზღვრავს და ამტკიცებს ფონდის დირექტორი სამეცნიერო საბჭოს თანხმობით.

    მუხლი 9. სახელმწიფო კონტროლი

1. ფონდის სახელმწიფო კონტროლს ახორციელებს საქართველოს განათლებისა და მეცნიერების სამინისტრო.

2. სამინისტროს თანხმობით ფონდი უფლებამოსილია განახორციელოს შემდეგი მოქმედებები:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო ნუსხისა და ხელფასის ფონდის განსაზღვრა;

ე) სხვა გადაწყვეტილებები ფონდის ქონების თაობაზე, თუ ისინი სცილდება ჩვეულებრივი საქმიანობის ფარგლებს.

3. ამ მუხლის მე-2 პუნქტის “ბ“ და “გ“ ქვეპუნქტებით გათვალისწინებულ მოქმედებათა განსახორციელებლად საჭიროა საქართველოს ფინანსთა სამინისტროს თანხმობა.

4. ამ მუხლის მე-2 პუნქტის “ა“ და “ე“ ქვეპუნქტებით გათვალისწინებული მოქმედების განხორციელება საჭიროებს საქართველოს ეკონომიკური განვითარების სამინისტროს თანხმობას.

    მუხლი 10. ფონდის წესდებაში ცვლილების შეტანა, რეორგანიზაცია და ლიკვიდაცია

1. ფონდის წესდებაში ცვლილების შეტანა, რეორგანიზაცია და ლიკვიდაცია შეიძლება განხორციელდეს მოქმედი კანონმდებლობით დადგენილი წესით.

2. ფონდის ლიკვიდაციის შედეგად დარჩენილი ქონება სრულად გადადის სახელმწიფოს საკუთრებაში.