საჯარო სამართლის იურიდიული პირის – საქართველოს სოციალური დაზღვევის ერთიანი სახელმწიფო ფონდის ჩამოყალიბების შესახებ

საქართველოს პრეზიდენტის

ბრძანებულება №558

2002 წლის 31 დეკემბერი

ქ. თბილისი

საჯარო სამართლის იურიდიული პირის – საქართველოს სოციალური დაზღვევის ერთიანი სახელმწიფო ფონდის ჩამოყალიბების შესახებ

„საჯარო სამართლის იურიდიული პირის შესახებ“ საქართველოს კანონისა და „საქართველოს სოციალური განვითარების კონცეფციის რეალიზაციის პირველი რიგის ღონისძიებების შესახებ“ საქართველოს პრეზიდენტის 2002 წლის 7 აპრილის №156 ბრძანებულების შესაბამისად:

1. „საქართველოს სოციალური უზრუნველყოფის ერთიანი სახელმწიფო ფონდისა“ და „სამედიცინო დაზღვევის სახელმწიფო კომპანიის“ რეორგანიზაციის შედეგად ჩამოყალიბდეს საჯარო სამართლის იურიდიული პირი – საქართველოს სოციალური დაზღვევის ერთიანი სახელმწიფო ფონდი.

2. დამტკიცდეს:

ა) საჯარო სამართლის იურიდიული პირის – საქართველოს სოციალური დაზღვევის ერთიანი სახელმწიფო ფონდის თანდართული დებულება;

ბ) საჯარო სამართლის იურიდიული პირის – საქართველოს სოციალური დაზღვევის ერთიანი სახელმწიფო ფონდის სამეთვალყურეო საბჭოს თანდართული შემადგენლობა.

3. საჯარო სამართლის იურიდიული პირი – საქართველოს სოციალური დაზღვევის ერთიანი სახელმწიფო ფონდი არის „საქართველოს სოციალური უზრუნველყოფის ერთიანი სახელმწიფო ფონდისა“ და „სამედიცინო დაზღვევის სახელმწიფო კომპანიის“ უფლებამონაცვლე.

4. საქართველოს სოციალური დაზღვევის ერთიანი სახელმწიფო ფონდის სახელმწიფო კონტროლი განახორციელოს საქართველოს შრომის, ჯანმრთელობისა და სოციალური დაცვის სამინისტრომ.

5. საქართველოს სახელმწიფო ქონების მართვის სამინისტრომ (ს. პავლიაშვილი) უზრუნველყოს „საქართველოს სოციალური დაზღვევის ერთიანი სახელმწიფო ფონდისათვის“ ქონების გადაცემა კანონმდებლობით დადგენილი წესით.

6. საქართველოს შრომის, ჯანმრთელობისა და სოციალური დაცვის სამინისტრომ (ა. გამყრელიძე) ფინანსთა სამინისტროსთან ერთად 2003 წლის 15 მარტამდე წარმოადგინოს საჯარო სამართლის იურიდიული პირების „საქართველოს სოციალური უზრუნველყოფის ერთიანი სახელმწიფო ფონდის“ და „საქართველოს სამედიცინო დაზღვევის სახელმწიფო კომპანიის“ 2003 წლისთვის რიცხული მოთხოვნილებისა და ვალდებულების დაფარვის ღონისძიებათა უზრუნველყოფის შესახებ წინადადებები და შესაბამისი ნორმატიული აქტის პროექტი.

7. საქართველოს პრეზიდენტის ყველა ნორმატიულ აქტში სიტყვები: „საქართველოს სოციალური უზრუნველყოფის ერთიანი სახელმწიფო ფონდი“ და „საქართველოს სამედიცინო დაზღვევის სახელმწიფო კომპანია“ შეიცვალოს სიტყვებით: „სოციალური დაზღვევის ერთიანი სახელმწიფო ფონდი“.

8. ამ ბრძანებულების ამოქმედებიდან ძალადაკარგულად ჩაითვალოს:

ა) „საქართველოს სოციალური უზრუნველყოფის ერთიანი სახელმწიფო ფონდის საჯარო სამართლის იურიდიულ პირად ჩამოყალიბების შესახებ“ საქართველოს პრეზიდენტის 2000 წლის 7 მაისის №181 ბრძანებულება;

ბ) „საქართველოს სამედიცინო დაზღვევის სახელმწიფო კომპანიის დებულების დამტკიცების შესახებ“ საქართველოს პრეზიდენტის 1999 წლის 13 მარტის №102 ბრძანებულება“;

გ) „საქართველოს სამედიცინო დაზღვევის სახელმწიფო კომპანიის დებულების დამტკიცების შესახებ“ საქართველოს პრეზიდენტის 1999 წლის 13 მარტის №102 ბრძანებულებით დამტკიცებულ საქართველოს სამედიცინო დაზღვევის სახელმწიფო კომპანიის დებულებაში ცვლილებებისა და დამატებების შეტანის თაობაზე“ საქართველოს პრეზიდენტის 2000 წლის 8 აპრილის №142 ბრძანებულება;

დ) „საქართველოს სამედიცინო დაზღვევის სახელმწიფო კომპანიის სამეთვალყურეო საბჭოს დამტკიცების შესახებ“ საქართველოს პრეზიდენტის 2000 წლის 8 აპრილის N303 განკარგულება;

ე) „საქართველოს სოციალური უზრუნველყოფის ერთიანი სახელმწიფო ფონდის სამეთვალყურეო საბჭოს შემადგენლობის დამტკიცების შესახებ“ საქართველოს პრეზიდენტის 2000 წლის 7 მაისის №414 განკარგულება;

ვ) „საქართველოს სოციალური უზრუნველყოფის ერთიანი სახელმწიფო ფონდის სამეთვალყურეო საბჭოს შემადგენლობის დამტკიცების შესახებ“ საქართველოს პრეზიდენტის 2000 წლის 7 მაისის №414 განკარგულებაში ცვლილებების შეტანის თაობაზე“ საქართველოს პრეზიდენტის 2000 წლის 31 ივლისის N836 განკარგულება;

ზ) „საქართველოს სოციალური უზრუნველყოფის ერთიანი სახელმწიფო ფონდის სამეთვალყურეო საბჭოს შემადგენლობის დამტკიცების შესახებ“ საქართველოს პრეზიდენტის 2000 წლის 7 მაისის №414 განკარგულებაში ცვლილებების შეტანის თაობაზე“ საქართველოს პრეზიდენტის 2000 წლის 20 ოქტომბრის №1130 განკარგულება.

9. ბრძანებულება ამოქმედდეს 2003 წლის 1 იანვრიდან.

ე. შევარდნაძე

საჯარო სამართლის იურიდიული პირის – საქართველოს სოციალური დაზღვევის ერთიანი სახელმწიფო ფონდის დებულება

    მუხლი 1. ზოგადი დებულებები

1. საქართველოს სოციალური დაზღვევის ერთიანი სახელმწიფო ფონდი (შემდგომში – ფონდი) არის საჯარო სამართლის იურიდიული პირი, რომელიც შექმნილია „საჯარო სამართლის იურიდიული პირის შესახებ“ საქართველოს კანონის შესაბამისად და არის „საქართველოს სოციალური უზრუნველყოფის ერთიანი სახელმწიფო ფონდისა“ და „საქართველოს სამედიცინო დაზღვევის სახელმწიფო კომპანიის“ უფლებამონაცვლე.

2. ფონდი, როგორც საჯარო სამართლის იურიდიული პირი, ამ დებულებით დადგენილი მიზნებისა და დაკისრებული ფუნქციების განსახორციელებლად იძენს უფლებებსა და მოვალეობებს, დებს გარიგებებს და უფლებამოსილია სასამართლოში გამოვიდეს მოსარჩელედ და მოპასუხედ. გარიგებები, რომლებიც სცილდება კანონით დადგენილი უფლებამოსილების ფარგლებს, ბათილია.

3. ფონდი თავის საქმიანობაში ხელმძღვანელობს საქართველოს კონსტიტუციით, საქართველოს კანონებით, საქართველოს პრეზიდენტის ბრძანებულებითა და განკარგულებით, ამ დებულებითა და სხვა ნორმატიული აქტით.

4. ფონდს დასახული მიზნებისა და დაკისრებული ფუნქციების განსახორციელებად სახელმწიფო ქონების მართვის სამინისტრო, თხოვების და უსასყიდლო უზუფრუქტის ხელშეკრულების საფუძველზე, გადასცემს სახელმწიფო ქონებას.

5. ფონდს აქვს ბეჭედი საქართველოს სახელმწიფო გერბის გამოსახულებით და ფონდის სახელწოდებით, დამოუკიდებელი ბალანსი, სათანადო ანგარიშები (მათ შორის – სავალუტო) საბანკო დაწესებულებებში, რომლებიდანაც ახორციელებს ფონდი ბიუჯეტის მიერ გამოყოფილი სახსრებისა და სოციალური დაზღვევის გადასახადების აკუმულაციასა და ანგარიშსწორებას.

6. ფონდის იურიდიული მისამართია: ქ. თბილისი, აკაკი წერეთლის გამზირი №144.

    მუხლი 2. ფონდის მიზნები

1. ფონდის მიზნებია:

ა) მოქმედი კანონმდებლობის შესაბამისად, დასაქმების, ჯანმრთელობისა და სახელმწიფო სოციალური დაზღვევის პროგრამების განხორციელება;

ბ) ფიზიკურ და იურიდიულ პირთა სოციალური დაზღვევის სისტემაში მოქცევის მიზნით საქართველოს მოქალაქეთა რეგისტრაცია და პერსონიფიცირებული აღრიცხვა;

გ) კანონმდებლობით დაკისრებული სხვა ამოცანები.

  მუხლი 3. ფონდის ფუნქციები

1. დაკისრებული ამოცანების შესრულების მიზნით, ფონდი:

ა) მონაწილეობს დასაქმების, ჯანმრთელობისა და სოციალური დაზღვევის ბიუჯეტის, სოციალური სფეროს სახელმწიფო პროგრამების შემუშავებასა და განხილვაში;

ბ) საქართველოს კანონმდებლობის შესაბამისად ახორციელებს მოქალაქეთა სოციალური დაზღვევის, სამედიცინო დახმარებების, სოციალური დაცვის, დასაქმებისა და სხვა სახელმწიფო პროგრამებს;

გ) სახელმწიფო პროგრამების განხორციელებასთან დაკავშირებით, „სახელმწიფო შესყიდვების შესახებ“ საქართველოს კანონის შესაბამისად, პროგრამებში მონაწილე დაწესებულებებთან და ორგანიზაციებთან აფორმებს სათანადო ხელშეკრულებებს და აკონტროლებს მათ შესრულებას;

დ) საქართველოს შრომის, ჯანმრთელობისა და სოციალური დაცვის სამინისტროს წარუდგენს სახელმწიფო პროგრამების დაფინანსების ანგარიშებს;

ე) თავისი კომპეტენციის ფარგლებში ახორციელებს მისი სტრუქტურული ერთეულებისა და ფილიალების მუშაობის ორგანიზაციას, კოორდინაციას, მართვასა და კონტროლს;

ვ) მასობრივი ინფორმაციის საშუალებებით სისტემატურად უზრუნველყოფს მოსახლეობის ინფორმირებას სოციალური დაზღვევის საკითხებზე. ახორციელებს საკუთარი ბეჭდვითი ორგანოს (გაზეთები, ჟურნალები და სხვ.) გამოცემას;

ზ) მოსახლეობის სოციალური დაზღვევის მიზნით, აქტიურად თანამშრომლობს სოციალურ პარტნიორებთან, პროფესიულ კავშირებთან, სამთავრობო და არასამთავრობო და სხვა დაინტერესებულ ორგანიზაციებთან. სოციალური დაზღვევის საკითხებთან დაკავშირებით თანამშრომლობს საერთაშორისო ორგანიზაციებთან;

თ) ფონდის მუშაკთა პროფესიული კვალიფიკაციის სისტემატურად ამაღლების მიზნით, შეიმუშავებს და ახორციელებს შესაბამის ღონისძიებებს;

ი) შეიმუშავებს და საქართველოს შრომის, ჯანმრთელობისა და სოციალური დაცვის სამინისტროს წარუდგენს წინადადებებს მოსახლეობის სოციალური დაზღვევის პროგრამებისა და სოციალური დაზღვევის სისტემის გაუმჯობესების შესახებ“;

კ) მონაწილეობს მოსახლეობის სოციალური დაზღვევის საკითხებთან დაკავშირებული ნორმატიული აქტების პროექტების მომზადებაში.

    მუხლი 4. ფონდის უფლება-მოვალეობანი

1. ფონდი თავისი კომპეტენციის ფარგლებში უფლებამოსილია:

ა) უზრუნველყოს ჯანმრთელობის სოციალური დაზღვევის, დასაქმებისა და სხვა სახელმწიფო პროგრამების განხორციელება, მოსახლეობის სოციალური დაზღვევის ორგანიზაცია, მათთვის კანონმდებლობით გათვალისწინებული გასაცემლების დანიშვნა;

ბ) მიღებული შემოსავლების (დაფინანსების) ფარგლებში ოპერატიულად უზრუნველყოს ჯანმრთელობის სოციალური დაზღვევის, დასაქმების და სხვა სახელმწიფო პროგრამების მიხედვით შესრულებული სამუშაოს, პენსიების, დახმარებების და სხვა სოციალური სადაზღვევო გასაცემლების გადარიცხვა;

გ) კანონმდებლობით დადგენილი წესით განახორციელოს ეკონომიკური საქმიანობა;

დ) სახელმწიფო ხელისუფლების ორგანოებისაგან, იურიდიული და ფიზიკური პირებისაგან მოითხოვოს და მიიღოს თავისი საქმიანობისათვის საჭირო, კანონმდებლობით ნებადართული ინფორმაცია;

ე) თავისი მიზნების მისაღწევად, კომპეტენციის ფარგლებში, კანონმდებლობით დადგენილი წესით შექმნას სტრუქტურული ერთეულები (განყოფილებები, დეპარტამენტები, სამმართველოები, წარმომადგენლობები) და ფილიალები;

ვ) მოაწყოს კონფერენციები, თათბირები, სემინარები და გამოიყენოს ინფორმაციის მიწოდების სხვა საშუალებები.

    მუხლი 5. ფონდის მართვა და სტრუქტურა

1. ფონდის ხელმძღვანელი ორგანოებია:

- გენერალური დირექტორი;

- ფონდის სამეთვალყურეო საბჭო.

    მუხლი 6. გენერალური დირექტორი

1. ფონდს ხელმძღვანელობს გენერალური დირექტორი, რომელსაც საქართველოს შრომის, ჯანმრთელობისა და სოციალური დაცვის მინისტრის წარდგინებით თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი.

2. გენერალური დირექტორი:

ა) პერსონალურად ხელმძღვანელობს ფონდის საქმიანობას და აწესრიგებს ფონდის გამგებლობის სფეროს მიკუთვნებულ საკითხებს;

ბ) მოქმედებს ფონდის სახელით და წარმოადგენს მის ინტერესებს წერილობით მინიჭებული უფლებამოსილების გარეშე ყველა სახელმწიფო და არასახელმწიფო დაწესებულებებთან ურთიერთობისას, აგრეთვე, სასამართლოში ფონდის საქმიანობასთან დაკავშირებული საკითხების განხილვისას;

გ) საქართველოს შრომის, ჯანმრთელობისა და სოციალური დაცვის მინისტრთან და აჭარისა და აფხაზეთის ავტონომიური რესპუბლიკების მინისტრთა საბჭოებთან შეთანხმებით, თანამდებობაზე ნიშნავს და თანამდებობიდან ათავისუფლებს საქართველოს სოციალური დაზღვევის ერთიანი სახელმწიფო ფონდის აჭარისა და აფხაზეთის ავტონომიური რესპუბლიკების ფილიალების დირექტორებს;

დ) თანამდებობაზე ნიშნავს და თანამდებობიდან ათავისუფლებს ფონდის თანამშრომლებს;

ე) გამოსცემს ინდივიდუალური ხასიათის ბრძანებებს, რომლებიც სავალდებულოა შესასრულებლად ყველა თანამშრომლისათვის;

ვ) საქართველოს შრომის, ჯანმრთელობისა და სოციალური დაცვის მინისტრთან შეთანხმებით ამტკიცებს დაწესებულების საშტატო ნუსხას და შრომის ანაზღაურების ფონდს;

ზ) ამტკიცებს ფონდის შინაგანაწესს, რომლითაც რეგულირდება ფონდის პერსონალის მართვის საკითხები და მისი შესრულება სავალდებულოა ფონდის თითოეული თანამშრომლისათვის;

თ) განკარგავს ფონდის სახსრებს და აკონტროლებს მათ გამოყენებას, პასუხისმგებელია ფონდის საკუთრებაში ან მფლობელობაში და/ან სარგებლობაში არსებული ქონებისა და ფულადი სახსრების მიზნობრივი და სწორი ხარჯვისათვის;

ი) ფონდის საქმეებს უძღვება ერთპიროვნულად და პერსონალურად აგებს პასუხს ფონდის საქმიანობის სწორად წარმართვისათვის.

3) ფონდის გენერალურ დირექტორს ჰყავს ხუთი მოადგილე (მათ შორის, ერთი პირველი), რომელთაც საქართველოს შრომის, ჯანმრთელობისა და სოციალური დაცვის მინისტრთან შეთანხმებით თანამდებობაზე ნიშნავს და თანამდებობიდან ათავისუფლებს ფონდის გენერალური დირექტორი. მოადგილეებს შორის ფუნქციებს ანაწილებს ფონდის გენერალური დირექტორი. გენერალური დირექტორის მოადგილეები უშუალოდ პასუხისმგებლები არიან გენერალური დირექტორის წინაშე.

    მუხლი 7. ფონდის სამეთვალყურეო საბჭო

1. ფონდის სამეთვალყურეო საბჭო არის სოციალური დაზღვევის ერთიანი სახელმწიფო ფონდის სისტემის გამჭირვალობის, ფონდის მუშაობის საჯაროობის უზრუნველყოფისა და დემოკრატიული პრინციპებით მართვის მიზნით შექმნილი ორგანო.

2. საქართველოს პრეზიდენტი, საქართველოს შრომის, ჯანმრთელობისა და სოციალური დაცვის მინისტრის წარდგინებით 3 წლის ვადით ნიშნავს სამეთვალყურეო საბჭოს 15 წევრს (საბჭოს თავმჯდომარის ჩათვლით). სამეთვალყურეო საბჭოს შემადგენლობაში შედიან საქართველოს პარლამენტის მიერ წარდგენილი სამი წევრი, სახელმწიფო მმართველობის ორგანოების თანამდებობის პირები და საზოგადოებრივი ორგანიზაციების წარმომადგენლები.

3. სამეთვალყურეო საბჭოს წევრი არ შეიძლება იყოს ფონდის გენერალური დირექტორი, მისი მოადგილე ან ფონდის სტრუქტურული ქვედანაყოფის ხელმძღვანელი.

4. სამეთვალყურეო საბჭოს თავმჯდომარე (მისი არყოფნის შემთხვევაში მოადგილე ან მისი მოვალეობის შემსრულებელი) იწვევს სამეთვალყურეო საბჭოს სხდომას და ადგენს დღის წესრიგს.

5. სამეთვალყურეო საბჭო უფლებამოსილია, თუ მას ესწრება საბჭოს ორი მესამედი. სამეთვალყურეო საბჭო გადაწყვეტილებას იღებს დამსწრე წევრთა ხმათა უმრავლესობით. ხმების თანაბრად გაყოფის შემთხვევაში გადამწყვეტია თავმჯდომარის ხმა.

6. სამეთვალყურეო საბჭოს სხდომები ტარდება ფონდის საქმიანობის შესაბამისად, მაგრამ არანაკლებ სამ თვეში ერთხელ. სხდომის გამართვის შესახებ ფონდის სამეთვალყურეო საბჭოს წევრებს ეცნობებათ სხდომის ჩატარებამდე არანაკლებ 7 დღით ადრე.

7. საბჭოს გადაწყვეტილებები ფორმდება ოქმით, რომელსაც ხელს აწერს საბჭოს თავმჯდომარე. იმ შემთხვევაში, თუ საბჭოს რომელიმე წევრი არ ეთანხმება სხდომაზე მიღებულ გადაწყვეტილებას, მას უფლება აქვს თავისი პოზიცია სხდომის ოქმში დააფიქსიროს.

8. საბჭოს სხდომა საჯაროა და მისი გადაწყვეტილებები ქვეყნდება საქართველოს კანონმდებლობით დადგენილი წესით.

9. სამეთვალყურეო საბჭოში წარმოდგენილი ინფორმაციის საიდუმლოების დაცვის წესი განისაზღვრება საქართველოს კანონმდებლობით.

10. სამეთვალყურეო საბჭო:

ა) განიხილავს ფონდის საქმიანობის პერიოდულ და წლიურ ანგარიშს, შემოსავალ-გასავლის ბალანსის – ბიუჯეტის პროექტს;

ბ) ამტკიცებს ფონდის წლიურ სამუშაო პროგრამას;

გ) სახელმწიფოს მიერ წინა პერიოდის დავალიანების სუბსიდირების შემთხვევაში ამტკიცებს გენერალური დირექტორის მიერ წარმოდგენილი დავალიანების დაფარვის გრაფიკს;

დ) განიხილავს ფონდის ფილიალების მიერ გაწეული საქმიანობის შედეგებს;

ე) განიხილავს და ამტკიცებს საქართველოს პრეზიდენტისათვის წარსადგენ ყოველწლიურ ანგარიშს ფონდის მიერ გაწეული საქმიანობის შესახებ.

11. სამეთვალყურეო საბჭოს უფლება აქვს უფლებამოსილების ფარგლებში მოითხოვოს თავის საქმიანობასთან დაკავშირებული ნებისმიერი სახის ინფორმაცია (საქართველოს ზოგადი ადმინისტრაციული კოდექსით გათვალისწინებული კონფიდენციალურობის პირობის დაცვით) და შეამოწმოს წარმოდგენილი მონაცემებისა და ინფორმაციის სისწორე.

12. სამეთვალყურეო საბჭო ყოველწლიურ ანგარიშს თავის მიერ გაწეული საქმიანობის შესახებ წარუდგენს საქართველოს პრეზიდენტს და უზრუნველყოფს მის საჯაროობას.

    მუხლი 8. ფონდის საქმიანობის სახელმწიფო კონტროლი

1. ფონდის საქმიანობის სახელმწიფო კონტროლს ახორციელებს საქართველოს შრომის, ჯანმრთელობისა და სოციალური დაცვის სამინისტრო.

2. საქართველოს შრომის, ჯანმრთელობისა და სოციალური დაცვის სამინისტრო განსაზღვრავს და ზედამხედველობას უწევს ფონდის საქმიანობის მიზანშეწონილობას, კანონიერებას, მისი მიზნების განსახორციელებლად აუცილებელ საქმიანობას, რესურსების ეკონომიურ გამოყენებას და ამავე დროს ამოწმებს ფონდის საფინანსო და ეკონომიკური საქმიანობის კანონიერებასა და ეფექტიანობას.

3. საქართველოს შრომის, ჯანმრთელობისა და სოციალური დაცვის მინისტრი ფონდისაგან გამოითხოვს კონტროლის განსახორციელებლად საჭირო დოკუმენტაციას და ინფორმაციას.

4. საქართველოს შრომის, ჯანმრთელობისა და სოციალური დაცვის მინისტრი უფლებამოსილია შეაჩეროს ან გააუქმოს ფონდის არამართლზომიერი გადაწყვეტილება.

5. ფონდმა საქართველოს შრომის, ჯანმრთელობისა და სოციალური დაცვის სამინისტროს თანხმობით შეიძლება განახორციელოს:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო განრიგისა და შრომის ანაზღაურების ფონდის განსაზღვრა;

ე) სხვა გადაწყვეტილებები ფონდის ქონებასთან დაკავშირებით, თუ ისინი სცილდება ჩვეულებრივი საქმიანობის ფარგლებს.

6. ამ მუხლის მე-5 პუნქტის „ბ“ და „გ“ ქვეპუნქტებით გათვალისწინებულ მოქმედებათა განსახორციელებლად აუცილებელია აგრეთვე საქართველოს ფინანსთა სამინისტროს თანხმობა.

7. ამ მუხლის მე-5 პუნქტის „ა“ ქვეპუნქტით გათვალისწინებულ მოქმედებათა განსახორციელებლად აუცილებელია აგრეთვე საქართველოს სახელმწიფო ქონების მართვის სამინისტროს თანხმობა.

8. სახელმწიფო კონტროლის განმახორციელებელი ორგანოს უარი ამ მუხლის მეხუთე პუნქტით განსაზღვრული მოქმედებების განხორციელებაზე უნდა იყოს დასაბუთებული. უარი შეიძლება გასაჩივრდეს სასამართლოში.

    მუხლი 9. ფონდის საფინანსო-სამეურნეო საქმიანობა

1. ფონდის დაფინანსების წყაროებია:

ა) საქართველოს ცენტრალური ბიუჯეტიდან გამოყოფილი სუბსიდიები და მიზნობრივი ტრანსფერი;

ბ) სოციალური დაზღვევის გადასახადი;

გ) ფიზიკური და იურიდიული პირებისაგან მიღებული ნებაყოფლობითი შენატანები და შემოწირულობები;

დ) ეკონომიკური საქმიანობიდან მიღებული შემოსავალი;

ე) სახელშეკრულებო ვალდებულებების დარღვევისათვის, ფონდის მიერ გატარებული ფინანსური სანქციებით მიღებული შემოსავლები;

ვ) საქართველოს კანონმდებლობით ნებადართული სხვა შემოსავლები.

2. ფონდი ვალდებულია საქართველოს კანონმდებლობით დადგენილი წესით აწარმოოს საფინანსო-ეკონომიკური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს საქართველოს შრომის, ჯანმრთელობისა და სოციალური დაცვის სამინისტროს.

3. ფონდის წლიურ ბალანსს ამოწმებს საქართველოს შრომის, ჯანმრთელობისა და სოციალური დაცვის სამინისტროს მიერ დანიშნული დამოუკიდებელი აუდიტი.

    მუხლი 10. ფონდის რეორგანიზაცია და ლიკვიდაცია

1. ფონდის რეორგანიზაცია ან ლიკვიდაცია „საჯარო სამართლის იურიდიული პირის შესახებ“ საქართველოს კანონის შესაბამისად ხორციელდება საქართველოს კანონმდებლობით დადგენილი წესით.

2. ფონდის ლიკვიდაციის შედეგად დარჩენილი ქონება გადადის სახელმწიფო საკუთრებაში.

    მუხლი 11. ფონდის დებულებაში ცვლილებების შეტანის წესი

ფონდის დებულებაში ცვლილებები შედის საქართველოს პრეზიდენტის ბრძანებულებით.

საჯარო სამართლის იურიდიული პირის – საქართველოს სოციალური დაზღვევის ერთიანი სახელმწიფო ფონდის სამეთვალყურეო საბჭოს შემადგენლობა:

ამირან გამყრელიძე – სამეთვალყურეო საბჭოს თავმჯდომარე, საქართველოს შრომის, ჯანმრთელობისა და სოციალური დაცვის მინისტრი

მერაბ ქავთარაძე – სამეთვალყურეო საბჭოს თავმჯდომარის მოადგილე

ვასილ გიგოლაშვილი – წევრი, საქართველოს ფინანსთა მინისტრის მოადგილე

თინა დანელია – წევრი, „პარტნიორობა სოციალური ინიციატივებისათვის“ – სოციალური უსაფრთხოების ცენტრის დირექტორი

რევაზ თათარაძე – წევრი, საქართველოს ექიმთა ასოციაციის ვიცე-პრეზიდენტი

ნათია თურნავა –    წევრი, საქართველოს ეკონომიკის, მრეწველობისა და ვაჭრობის მინისტრის პირველი მოადგილე

ირინე იმერლიშვილი – წევრი, საქართველოს იუსტიციის მინისტრის მოადგილე

გიორგი მალაზონია – წევრი, საქართველოს სახელმწიფო ქონების მართვის მინისტრის მოადგილე

ზაზა სიხარულიძე – წევრი, „სრულიად საქართველოს ღვთისშვილთა კავშირის“ პრეზიდენტი

ლონდა სიხარულიძე – წევრი, საქართველოს პროფესიული კავშირების გაერთიანების თავმჯდომარის მოადგილე

ზაზა სოფრომაძე – წევრი

ია შალამბერიძე –   წევრი

ლერი ჭალაგანიძე – წევრი, საქართველოს პოლიციის პენსიონერთა და ინვალიდთა კავშირ „აბჯრის“ გამგეობის წევრი

იოსებ ხაზარაძე – წევრი, საქართველოს პენსიონერთა და ვეტერანთა პროფესიული კავშირის თავმჯდომარე

დაზმირ ჯოჯუა – წევრი, საქართველოს სახელმწიფო კანცელარიის სოციალურ საკითხთა სამსახურის უფროსი.