მშენებლობის პროექტების სავალდებულო სახელმწიფო კომპლექსური ექსპერტიზის მოწყობის ფარგლებისა და წესის შესახებ

საქართველოს პრეზიდენტის

 ბრძანებულება №626

1999 წლის 21 ნოემბერი

ქ. თბილისი

მშენებლობის პროექტების სავალდებულო სახელმწიფო კომპლექსური ექსპერტიზის მოწყობის ფარგლებისა და წესის შესახებ

„მშენებლობის პროექტების სავალდებულო სახელმწიფო კომპლექსური ექსპერტიზისა და დამტკიცების შესახებ“ საქართველოს კანონის შესრულების უზრუნველყოფის, მშენებლობის პროექტების ხარისხის ამაღლების, სამშენებლო საქმიანობის შემდგომი სრულყოფისა და ეფექტიანი განხორციელების მიზნით:

1. „მშენებლობის პროექტების სავალდებულო სახელმწიფო კომპლექსური ექსპერტიზისა და დამტკიცების შესახებ“ საქართველოს კანონით დადგენილი „სახელმწიფო მნიშვნელობის ობიექტებად“ მიჩნეულ იქნეს მშენებლობები 500 ათასი ლარი და მეტი სახარჯთაღრიცხვო ღირებულებით, მიუხედავად დაფინანსების წყაროს, საკუთრების ფორმისა და კუთვნილებისა.

2. ექსპერტიზა მშენებლობის იმ პროექტებისა, რომლებიც არ ექვემდებარებიან სავალდებულო სახელმწიფო ექსპერტიზას, ხორციელდება დამოუკიდებელი საექსპერტო ორგანიზაციების მეშვეობით საქართველოს ურბანიზაციისა და მშენებლობის სამინისტროს მიერ დამტკიცებული წესის მიხედვით.

3. მშენებლობის პროექტების სახელმწიფო ექსპერტიზა განახორციელონ:

ა) საქართველოს ურბანიზაციისა და მშენებლობის სამინისტროსთან არსებულმა მშენებლობის პროექტების სახელმწიფო ექსპერტიზის მთავარმა სამმართველომ, როდესაც ობიექტის სახარჯთაღრიცხვო ღირებულება არის ან აღემატება 0,5 მილიონ ლარს, ხოლო ავტონომიური რესპუბლიკების ტერიტორიებზე - 1 მილიონ ლარს და იმ ობიექტებისა, რომელთა მშენებლობის პროექტები ექვემდებარებიან სავალდებულო სახელმწიფო ექსპერტიზას, მიუხედავად სახარჯთაღრიცხვო ღირებულებისა, საქართველოს ურბანიზაციისა და მშენებლობის სამინისტროს მიერ დამტკიცებული ჩამონათვალის შესაბამისად;

ბ) ავტონომიური რესპუბლიკების ურბანიზაციისა და მშენებლობის სამინისტროებთან არსებულმა მშენებლობის პროექტების სახელმწიფო ექსპერტიზის ორგანოებმა, შესაბამისად მათი იურისდიქციის ტერიტორიებზე, როდესაც ობიექტების სახარჯთაღრიცხვო ღირებულება არის 0,5-დან 1 მილიონ ლარამდე.

4. მშენებლობის პროექტების ექსპერტიზის ღირებულება განისაზღვრება საქართველოს ურბანიზაციისა და მშენებლობის სამინისტროს მიერ დამტკიცებული „მშენებლობის პროექტების ექსპერტიზის ღირებულების გაფასებების კრებულის“ მიხედვით, დადგენილი წესით დამტკიცებულ ხარჯთა ნუსხაში, ამ დანიშნულებით გათვალისწინებული კაპდაბანდებების თანხის ფარგლებში, დამკვეთისა და ექსპერტიზის მომწყობ ორგანოს შორის გაფორმებული ხელშეკრულებით ან გარიგების სხვა წესით (დაკვეთა, გადახდის გარანტით).

საექსპერტიზო მოსაკრებლების შესახებ კანონის მიღების კვალობაზე ზემოაღნიშნულ განფასებებს დაემატება ამ კანონით დადგენილი მოსაკრებლების თანხა.

5. ობიექტებისათვის, რომელთა მშენებლობის პროექტები ექვემდებარებიან სავალდებულო სახელმწიფო ექსპერტიზას, აუცილებელია ამ პროექტების შემადგენლობაში დამუშავებულ იქნეს სამშენებლო ნორმებითა და წესებით გათვალისწინებული ყველა თავი, მშენებლობის სახარჯთაღრიცხვო ღირებულების განსაზღვრა მიმდინარე ფასებში (ხარჯთანუსხის შედგენა) საქართველოს ურბანიზაციისა და მშენებლობის სამინისტროს მიერ დამტკიცებული ხარჯთანუსხების შედგენის მეთოდოლოგიისა და საპროექტო და საექსპერტო სამუშაოთა ღირებულების განსაზღვრის სახარჯთაღრიცხვო ნორმების საფუძველზე.

6. საქართველოს ურბანიზაციისა და მშენებლობის სამინისტრომ (მ.ჩხენკელი) გაამკაცროს კონტროლი მშენებლობის დამკვეთებისა და მენარდე ორგანიზაციების მიმართ არქიტექტურულ-სამშენებლო ინსპექციების მეშვეობით, რათა არ იქნეს დაშვებული საქართველოს ტერიტორიაზე იმ ობიექტების მშენებლობა და დაფინანსება, რომელთა პროექტები ექვემდებარებიან სავალდებულო სახელმწიფო ექსპერტიზას და არ მიუღიათ შესაბამის სახელმწიფო ექსპერტიზის ორგანოთა დადებითი დასკვნა.

7. ეს ბრძანებულება ამოქმედდეს გამოქვეყნებისთანავე.

ე. შევარდნაძე