საქონლის საბაჟო ღირებულების განსაზღვრის სისწორის კონტროლის წესების შესახებ ინსტრუქციის დამტკიცების თაობაზე

სახელმწიფო სარეგისტრაციო კოდი 200.120.000.22.033.009.683

საქართველოს ფინანსთა მინისტრის

ბრძანება №1768

2006 წლის 20 დეკემბერი

ქ. თბილისი

საქონლის საბაჟო ღირებულების განსაზღვრის სისწორის კონტროლის წესების შესახებ ინსტრუქციის დამტკიცების თაობაზე

საქართველოს საბაჟო კოდექსის 31-ე მუხლის მე-7 ნაწილისა და ,,საქართველოს ფინანსთა სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №39 დადგენილებით დამტკიცებული დებულების მე-4 მუხლის მე-3 პუნქტის ,,ლ“ ქვეპუნქტის საფუძველზე, ვბრძანებ:  

1. დამტკიცდეს:

ა) ,,საქონლის საბაჟო ღირებულების განსაზღვრის სისწორის კონტროლის წესების შესახებ“ ინსტრუქცია (დანართი №1);

ბ) ,,საქონლის საბაჟო ღირებულების კორექტირების აქტი“ (დანართი №2);

გ) ,,შეტყობინება საქონლის საბაჟო ღირებულების კორექტირების შესახებ“ (დანართი №3).

2. ამ ბრძანების ამოქმედებისთანავე ძალადაკარგულად გამოცხადდეს ,,საქონლის საბაჟო ღირებულების განსაზღვრის წესების“ დამტკიცების შესახებ“ საქართველოს ფინანსთა მინისტრის 2004 წლის 9 ნოემბრის №736 ბრძანება.

3. ბრძანება ამოქმედდეს 2007 წლის 1 იანვრიდან.

ა. ალექსიშვილი

შეტანილი ცვლილებები:

1. საქართველოს ფინანსთა მინისტრის 2007 წლის 23 აპრილი ს ბრძანება №402-სსმIII,№60, 30.04.2007წ.,მუხ.675

2. საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

დანართი №1

ინსტრუქცია

საქონლის საბაჟო ღირებულების განსაზღვრის სისწორის კონტროლის წესების შესახებ

    მუხლი 1. ზოგადი დებულებანი

1. საქონლის საბაჟო ღირებულებას განსაზღვრავს დეკლარანტი და შეაქვს იგი საბაჟო დეკლარაციაში.

2. დეკლარანტის მიერ განსაზღვრული საბაჟო ღირებულების სისწორეს აკონტროლებს ის საბაჟო ორგანო, რომელიც კანონმდებლობით დადგენილი წესით განიხილავს და ამოწმებს წარდგენილ საბაჟო დეკლარაციას.

3. გარიგების ფასის განსაზღვრის საფუძვლად მიიღება ხელშეკრულებაში ან ანგარიშ-ფაქტურაში ან ნებისმიერ სხვა საანგარიშსწორებო დოკუმენტში დაფიქსირებული ფასი.

4. საქონლის საბაჟო ღირებულების სარეზერვო მეთოდით განსაზღვრის სისწორის კონტროლის დროს გამოსაყენებელი ფასების მონაცემები წარმოადგენს საინფორმაციო სახის მონაცემებს და გამოიყენება მხოლოდ სარეზერვო მეთოდით საქონლის საბაჟო ღირებულების განსაზღვრის სისწორის დადგენის მიზნით და არ შეიძლება უშუალოდ იქნეს გამოყენებული საბაჟო გადასახდელების დარიცხვის საფუძვლად. ფასების მონაცემთა სისტემაში საქონელი იდენტიფიცირებული უნდა იქნეს საგარეო ეკონომიკური საქმიანობის ეროვნული სასაქონლო ნომენკლატურის (სეს ესნ) მიხედვით საქონლის დასახელების, სეს ესნ-ის კოდის, ზომის ერთეულის, ერთეულის ფასის, საქონლის წარმოშობის ქვეყნის და ექსპორტიორი ქვეყნის მიხედვით.

5. საქონლის საბაჟო ღირებულების სარეზერვო მეთოდით განსაზღვრის სისწორის კონტროლის დროს გამოსაყენებელი ფასების მონაცემები მაქსიმალურად უნდა ეფუძნებოდეს ადრე უკვე განსაზღვრულ საბაჟო ღირებულებებს და ჩამოყალიბდეს შემოსავლების სამსახურში არსებული მონაცემთა ბაზის სტატისტიკური დამუშავების მედიანას პრინციპის გამოყენებით, ამ მუხლის მე-4 პუნქტის მოთხოვნების დაცვით.

საქართველოს ფინანსთა მინისტრის 2007 წლის 23 აპრილი ს ბრძანება №402-სსმIII,№60, 30.04.2007წ.,მუხ.675

საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

მუხლი 2. საბაჟო ორგანოსათვის დამატებითი   დოკუმენტის ან სხვა ინფორმაციის წარდგენა

1. დეკლარირებული საბაჟო ღირებულების სისწორეში ეჭვის შეტანის შემთხვევაში საბაჟო ორგანო (საბაჟო მოხელე, რომელიც ახორციელებს საბაჟო ღირებულების შემოწმებას) უფლებამოსილია, დეკლარანტს გაუგზავნოს ,,შეტყობინება საქონლის საბაჟო ღირებულების კორექტირების შესახებ“ დანართი №3-ის შესაბამისად და საქართველოს ზოგადი ადმინისტრაციული კოდექსით დადგენილი წესის შესაბამისად მოსთხოვოს დამატებითი ინფორმაციის (მათ შორის, მტკიცებულებების და დოკუმენტების) წარმოდგენა. ეს დოკუმენტები და მტკიცებულებები შეიძლება იყოს:

ა) ანგარიშ-ფაქტურის (ინვოისის) ორიგინალი;

ბ) სატრანსპორტო და სადაზღვევო დოკუმენტები მიწოდების პირობების შესაბამისად;

გ) საქონლის ნასყიდობის ხელშეკრულება და მისი დანართები;

დ) მყიდველის მიერ მესამე პირებთან დადებული ხელშეკრულება, რომელიც გავლენას ახდენს გარიგების ფასზე (შუამდგომლობა, საავტორო, ლიცენზიების, პატენტების, მომსახურების, ნედლეულის და სხვა გადასახდელები);

ე) საბანკო გადარიცხვის დამადასტურებელი დოკუმენტები (თუ ანგარიში განაღდებულია);

ვ) დოკუმენტები გამყიდველის სასარგებლოდ მესამე პირებისათვის გადახდის შესახებ;

ზ) დოკუმენტები საქონლის დასაწყობებისა და შეფუთვის გადახდის შესახებ;

თ) სააღრიცხვო დოკუმენტები (სალაროს წიგნი, სალაროს შემოსავლისა და გასავლის ორდერები, ანგარიშგება მოგება-ზარალის შესახებ და სხვა);

ი) საქონლის შესყიდვის შეკვეთა და მისი დამადასტურებელი დოკუმენტი;

კ) საქონლის გამყიდველის პრეისკურანტი, სადაც მითითებულია ექსპორტის დროს საქონლის გასაყიდი ფასები და მიცემული ფასდაკლებები;

ლ) საქონლის კატალოგი;

მ) უცხო ქვეყნის ექსპორტის დეკლარაცია (თუ იმპორტიორს შეუძლია მისი წარმოდგენა);

ნ) ქონების შეფასების ანგარიში, რომელიც შედგენილია დამოუკიდებელი აუდიტორების მიერ (თუ, იმპორტიორს შეუძლია წარმოადგინოს);

ო) სხვა ინფორმაცია და დოკუმენტები, რომლებიც წარმოადგენს დეკლარირებული საბაჟო ღირებულებისა და მისი ელემენტების დასაბუთების საფუძველს.

2. დეკლარანტმა საბაჟო ორგანოს უნდა წარუდგინოს მოთხოვნილი დოკუმენტები და ინფორმაცია შეტყობინების მიღებიდან არა უგვიანეს 3 სამუშაო დღისა.

 3. დეკლარანტს უფლება აქვს, საბაჟო ორგანოს ამ მუხლის მე-2 პუნქტით გათვალისწინებული დოკუმენტების გარდა, დამატებით წარადგინოს ინფორმაცია და დოკუმენტები, რომელსაც იგი ჩათვლის საჭიროდ მის მიერ დეკლარირებული საქონლის საბაჟო ღირებულების უტყუარობის დასამტკიცებლად.

საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

    მუხლი 3. საბაჟო ორგანოს გადაწყვეტილება

1. საბაჟო ორგანოს (საბაჟო მოხელეს, რომელიც ახორციელებს საბაჟო ღირებულების შემოწმებას) უფლება აქვს ეჭვი შეიტანოს დეკლარანტის მიერ გაცხადებული საბაჟო ღირებულების სისწორეში და მოახდინოს მისი კორექტირება ან განსაზღვროს იგი სხვა მეთოდით.

2. საბაჟო ღირებულების კორექტირება ან სხვა მეთოდით განსაზღვრა ფორმდება საბაჟო ორგანოს გადაწყვეტილებით ,,საქონლის საბაჟო ღირებულების კორექტირების აქტით“ დანართი №2-ის შესაბამისად, რომელსაც აფორმებს საბაჟო მოხელე, რომელიც ახორციელებს საბაჟო ღირებულების შემოწმებას.

3. აქტი ივსება 2 ეგზემპლარად, რომელთაგან ერთი ეგზავნება დეკლარანტს, ხოლო მეორე რჩება საბაჟო ორგანოს და დაერთვის სატვირთო საბაჟო დეკლარაციას.

საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

    მუხლი 4. საბაჟო ღირებულების კორექტირება

1. დეკლარანტს უფლება აქვს:

ა) თუ ეთანხმება საქონლის კორექტირებულ საბაჟო ღირებულებას, ,,საქონლის საბაჟო ღირებულების კორექტირების აქტის“ მიღებიდან (ჩაბარებიდან) 3 დღის ვადაში წარმოადგინოს კორექტირებული სატვირთო საბაჟო დეკლარაცია;

ბ) თუ არ ეთანხმება, გაასაჩივროს ,,საქონლის საბაჟო ღირებულების კორექტირების აქტი“ საბაჟო კოდექსის 217-ე მუხლის მე-3 ნაწილის შესაბამისად, საქართველოს საგადასახადო კოდექსის VIII კარით დადგენილი წესით საქართველოს ფინანსთა სამინისტროს სისტემაში ან სასამართლოში, ამ აქტის მიღებიდან (ჩაბარებიდან) 20 კალენდარულ დღეში;

გ) საბაჟო ღირებულების განსაზღვრის თაობაზე საბოლოო გადაწყვეტილების მიღებამდე საბაჟო ორგანოდან გაიტანოს საქონელი, თუ იგი გადაიხდის თავის მიერ განსაზღვრული საქონლის საბაჟო ღირებულების საფუძველზე გაანგარიშებულ საბაჟო გადასახდელებს და დამატებით წარმოადგენს საბაჟო კოდექსით გათვალისწინებული ერთ-ერთი სახის გარანტიას, რომლის მოქმედების ვადა 2 თვეა, ხოლო საგარანტიო თანხა ტოლია კორექტირების აქტით განსაზღვრული საბაჟო ღირებულების საფუძველზე გაანგარიშებულ საბაჟო გადასახდელებსა და დეკლარანტის მიერ დეკლარირებული საბაჟო ღირებულების საფუძველზე გაანგარიშებულ საბაჟო გადასახდელებს შორის სხვაობისა.

2. საბაჟო ორგანო ვალდებულია:

ა) დეკლარანტის წერილობითი მოთხოვნისა და ამ მუხლის პირველი პუნქტის ,,გ“ ქვეპუნქტის შესაბამისად წარმოდგენილი გარანტიის საფუძველზე მისცეს დეკლარანტს საქონლის გატანის საშუალება;

ბ) საქონლის გარანტიით გაშვებამდე უზრუნველყოს საქონლის იდენტიფიცირება;

გ) დეკლარანტის მიერ ამ მუხლის პირველი პუნქტის ,,გ“ ქვეპუნქტის შესაბამისად წარმოდგენილი გარანტიის ვადის გასვლამდე 3 დღით ადრე უზრუნველყოს გარანტიის თანხის ჩარიცხვა სახელმწიფო ბიუჯეტში, თუ აღნიშნული თარიღისათვის დეკლარანტის მიერ არ იქნება წარმოდგენილი გარანტიით უზრუნველყოფილი საბაჟო გადასახდელების თანხის გადახდის დამადასტურებელი დოკუმენტები ან საბაჟო დავის განმხილველი ორგანოს მიერ დეკლარანტის საჩივრის დაკმაყოფილების თაობაზე მიღებული ძალაში შესული გადაწყვეტილება.

საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

 

მუხლი 5. ,,საქონლის საბაჟო ღირებულების  კორექტირების აქტის“ შევსების წესი

1. პირველ გრაფაში აღინიშნება საბაჟო ორგანოს დასახელება, მისამართი, უფლებამოსილი მოხელის თანამდებობა, სახელი და გვარი.

2. მე-2 – 4 გრაფები ივსება სატვირთო საბაჟო დეკლარაციის მიხედვით.

3. მე-5–6 გრაფებში მიეთითება საქონლის დეკლარირებულ საბაჟო ღირებულებაზე დასამატებელი და დეკლარირებული საბაჟო ღირებულებიდან გამოსაკლები ხარჯები, რაც განისაზღვრება დეკლარირებული საბაჟო ღირებულების შემოწმებისას მისი კორექტირების მიზნით.

4. მე-7 გრაფაში მიეთითება დეკლარირებულ საბაჟო ღირებულების სისწორეში ეჭვის შეტანისა და მისი კორექტირების (ან სხვა მეთოდით განსაზღვრის) დასაბუთება.

5. მე-8 გრაფაში მიეთითება საბაჟო ორგანოს მიერ საქონლის დეკლარირებული საბაჟო ღირებულების კორექტირებით ან სხვა მეთოდით განსაზღვრული საბაჟო ღირებულება.

6. მე-9 გრაფაში აღინიშნება კორექტირების განმახორციელებელი საბაჟო მოხელის ხელმოწერა (არსებობისას – ბეჭედიც).

7. მე-10 გრაფა საცნობარო შინაარსისაა და დამატებით შევსებას არ საჭიროებს.

საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

 

დანართი №2

საქართველოს ფინანსთა სამინისტროს

შემოსავლების სამსახური

საქონლის საბაჟო ღირებულების კორექტირების აქტი № –––––

,,–––––” –––––––––––– 200–– წ.

              რიცხვი    თვე

1. –––––––––––––––––––––––––––––––––––––––––––––––––––––––––––––––––––––––––

   (საბაჟო ორგანოს დასახელება, მისამართი, უფლებამოსილი მოხელის თანამდებობა, სახელი და გვარი)

–––––––––––––––––––––––––––––––––––––––––––––––––––––––––––––––––––– საქართველოს საბაჟო კოდექსის 31-ე და 41-ე მუხლებით მინიჭებული უფლებამოსილების ფარგლებში არ ეთანხმება:

2. დეკლარანტის –––––––––––––––––––––––––––––––––––––––––––––– მიერ

             (დასახელება, მისამართი, საიდენტიფიკაციო ნომერი)

3. –––––––––––––––––––––––––––––––––– სატვირთო საბაჟო დეკლარაციაში

     (სსდ-ს ნომერი და თარიღი )

4. დეკლარირებულ საბაჟო ღირებულებას –––––––––––––––––––––

 

 

7.  დეკლარირებულ საბაჟო ღირებულების სისწორეში ეჭვის შეტანისა და მისი კორექტირების (ან სხვა მეთოდით განსაზღვრის) საფუძველია –––––––––––––––––––––––––––––––

–––––––––––– –––––––––––––––––––––––––––––––––––––––––––––––––––––––––––––––––––––––––

–––––––––––––––––––––––––––––––––––––––––––––––––––––––––––––

8. საბაჟო ორგანოს მიერ კორექტირებით (ან სხვა მეთოდით) განსაზღვრულ იქნა საქონლის საბაჟო ღირებულება –––––––––––––––––––––––––––––

9. კორექტირების განმახორციელებელი საბაჟო მოხელე ––––––––––––––––––––––

                                                                                                         ხელმოწერა (ბეჭედი)

10.     დეკლარანტს უფლება აქვს:

ა) თუ ეთანხმება საქონლის კორექტირებულ საბაჟო ღირებულებას, ამ აქტის მიღებიდან (ჩაბარებიდან) 3 დღის ვადაში წარმოადგინოს კორექტირებული სატვირთო საბაჟო დეკლარაცია;

ბ) თუ არ ეთანხმება, გაასაჩივროს ეს აქტი საბაჟო კოდექსის 217-ე მუხლის მე-3 ნაწილის შესაბამისად, საქართველოს საგადასახადო კოდექსის VIII კარით დადგენილი წესით საქართველოს ფინანსთა სამინისტროს სისტემაში ან სასამართლოში, ამ აქტის მიღებიდან (ჩაბარებიდან) 20 კალენდარულ დღეში;

გ) საბაჟო ღირებულების განსაზღვრის თაობაზე საბოლოო გადაწყვეტილების მიღებამდე საბაჟო ორგანოდან გაიტანოს საქონელი, თუ იგი გადაიხდის თავის მიერ განსაზღვრული საქონლის საბაჟო ღირებულების საფუძველზე გაანგარიშებულ საბაჟო გადასახდელებს და დამატებით წარმოადგენს საბაჟო კოდექსით გათვალისწინებული ერთ-ერთი სახის გარანტიას, რომლის მოქმედების ვადა 2 თვეა, ხოლო საგარანტიო თანხა ტოლია კორექტირების აქტით განსაზღვრული საბაჟო ღირებულების საფუძველზე გაანგარიშებულ საბაჟო გადასახდელებსა და დეკლარანტის მიერ დეკლარირებული საბაჟო ღირებულების საფუძველზე გაანგარიშებულ საბაჟო გადასახდელებს შორის სხვაობისა. 

 საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

დანართი №3

საქონლის საბაჟო ღირებულების კორექტირების შესახებ

შეტყობინება

,,–––––” –––––––––––– 200–– წ.

რიცხვი    თვე

––––––––––––––––––––––––––––––––––––––––––––––––––––––––––––––––––––– –ს

        (დეკლარანტის დასახელება, მისამართი, საიდენტიფიკაციო ნომერი )

გაცნობებთ, რომ ––––––––––––––––––––––––––––––––––––––––––––––––––––––

          (საბაჟო ორგანოს დასახელება, მისამართი, უფლებამოსილი მოხელის

–––––––––––––––––––––––––––––––––––––––––––––––––––––––––––––––––––––––––––

             თანამდებობა, სახელი და გვარი)

საქართველოს საბაჟო კოდექსის 31-ე და 41-ე მუხლებით მინიჭებული უფლებამოსილების ფარგლებში აკონტროლებს რა თქვენს მიერ განსაზღვრული საქონლის საბაჟო ღირებულების სისწორეს, არ ეთანხმება–––––––––––––––––––––––––

             (სსდ-ს ნომერი და თარიღი )

სატვირთო საბაჟო დეკლარაციაში დეკლარირებულ საბაჟო ღირებულებას

საბაჟო ორგანოს მიერ საბაჟო ღირებულების განსაზღვრის მიზნით გევალებათ, არა უგვიანეს 3 დღისა, წარმოადგინოთ ,,X"-ით მონიშნული შემდეგი დამატებითი დოკუმენტები:

□   ა) ანგარიშ-ფაქტურის (ინვოისის) ან ნებისმიერი სხვა საანგარიშსწორებო დოკუმენტის ორიგინალი;

□   ბ) სატრანსპორტო და სადაზღვევო დოკუმენტები მიწოდების პირობების შესაბამისად;

□   გ) საქონლის ნასყიდობის ხელშეკრულება და მისი დანართები;

□   დ) მყიდველის მიერ მესამე პირებთან დადებული ხელშეკრულება, რომელიც გავლენას ახდენს გარიგების ფასზე (შუამდგომლობა, საავტორო, ლიცენზიების, პატენტების, მომსახურების, ნედლეულის და სხვა გადასახდელები);

□   ე) საბანკო გადარიცხვის დამადასტურებელი დოკუმენტები (თუ ანგარიში განაღდებულია);

□   ვ) დოკუმენტები გამყიდველის სასარგებლოდ მესამე პირებისათვის გადახდის შესახებ;

□   ზ) დოკუმენტები საქონლის დასაწყობებისა და შეფუთვის გადახდის შესახებ;

□   თ) სააღრიცხვო დოკუმენტები (სალაროს წიგნი, სალაროს შემოსავლისა და გასავლის ორდერები, ანგარიშგება მოგება-ზარალის შესახებ და სხვა);

□   ი) საქონლის შესყიდვის შეკვეთა და მისი დამადასტურებელი დოკუმენტი;

□   კ) საქონლის გამყიდველის პრეისკურანტი, სადაც მითითებულია ექსპორტის დროს საქონლის გასაყიდი ფასები და მიცემული ფასდაკლებები;

□   ლ) საქონლის კატალოგი;

□   მ) უცხო ქვეყნის ექსპორტის დეკლარაცია (თუ იმპორტიორს შეუძლია მისი წარმოდგენა);

□   ნ) ქონების შეფასების ანგარიში, რომელიც შედგენილია დამოუკიდებელი აუდიტორების მიერ (თუ იმპორტიორს შეუძლია წარმოადგინოს);

□   ო) სხვა ინფორმაცია და დოკუმენტები, რომლებიც წარმოადგენს თქვენ მიერ დეკლარირებული საბაჟო ღირებულებისა და მისი ელემენტების დასაბუთების საფუძველს.

საბაჟო ორგანოს უფლებამოსილი

           მოხელე             –––––––––––––––––––––––––––––––

                                             (ხელმოწერა, ბეჭედი, თარიღი)

 

(შეტყობინების ფურცლის მეორე მხარე)

 

 

საქართველოს საბაჟო კოდექსი

    მუხლი 38. საბაჟო ღირებულების ელემენტები

1. იმპორტირებული საქონლის საბაჟო ღირებულების ამ კოდექსის 32-ე მუხლის საფუძველზე განსაზღვრისას გარიგების ფასს უნდა დაემატოს შემდეგი ხარჯები, იმ პირობით, რომ ეს ხარჯები მყიდველმა რეალურად გასწია, მაგრამ ისინი არ არის ჩართული გარიგების ფასში:

ა) საკომისიო და საბროკერო ხარჯები, გარდა შესყიდვაზე გაწეული საკომისიო ხარჯებისა;

ბ) იმ კონტეინერების ღირებულება, რომლებიც საბაჟო მიზნებისათვის განიხილება იმპორტირებულ საქონელთან ერთობლიობაში;

გ) შეფუთვის ღირებულება, გაწეული შრომისა და შესაფუთი მასალების ჩათვლით.

2. თუ მყიდველის მიერ საქონელი ან მომსახურება გამყიდველს უფასოდ ან ფასდაკლებით, პირდაპირ ან არაპირდაპირ მიეწოდება და გამოიყენება იმპორტირებული საქონლის წარმოებასთან და საექსპორტოდ გაყიდვასთან დაკავშირებით, საქონლის საბაჟო ღირებულების ამ კოდექსის 32-ე მუხლის საფუძველზე განსაზღვრისას გარიგების ფასს უნდა დაემატოს შემდეგი საქონლისა და მომსახურების პროპორციულად განაწილებული ღირებულება იმ ოდენობით, რომლითაც ეს ღირებულება ჩართული არ არის გადახდილ ან გადასახდელ ფასში:

ა) საქონლის შემადგენლობაში შემავალი მასალები, ნაწილები (დეტალები) და სხვა ანალოგიური კომპონენტები;

ბ) საქონლის წარმოების დროს გამოყენებული სამუშაო ინსტრუმენტები, შტამპები, ჩამოსასხმელი ფორმები და შრომის სხვა საშუალებები;

გ) საქართველოს ფარგლებს გარეთ წარმოებული ინჟინერია, დამუშავება, საკონსტრუქტორო და სამხატვრო-დიზაინერული საქმიანობა, მხაზველობითი სამუშაოები, პროექტები, სქემები, ესკიზები და სხვა სამუშაოები.

3. ამ მუხლის მე-2 ნაწილის მიზნებისათვის საქონლისა და მომსახურების ღირებულება, რომელიც უნდა შევიდეს საბაჟო ღირებულებაში, უნდა განისაზღვროს იმ ფასით, რომლითაც იგი შეიძინა მყიდველმა. თუ ეს საქონელი ნაწარმოებია თვით მყიდველის მიერ, მისი ფასი განისაზღვრება მყიდველის საბუღალტრო დოკუმენტაციაზე დაყრდნობით. იმ შემთხვევაში, როცა მოცემული საქონელი ამორტიზებულია, მისი ღირებულება განისაზღვრება ამორტიზაციის ნორმების გათვალისწინებით.

4. საქონლის საბაჟო ღირებულების ამ კოდექსის 32-ე მუხლის საფუძველზე განსაზღვრისას გარიგების ფასს უნდა დაემატოს იმპორტირებულ საქონელთან დაკავშირებული საავტორო ჰონორარი ან სალიცენზიო გადასახდელები იმ ოდენობით, რა ოდენობითაც ჩართული არ არის გადახდილ ან გადასახდელ ფასში და პირდაპირ ან არაპირდაპირ უნდა გადაიხადოს მყიდველმა, როგორც ყიდვა-გაყიდვის ხელშეკრულებით გათვალისწინებული იმპორტირებული საქონლის პირობა. მასში შედის გადასახდელები პატენტებზე, სასაქონლო მარკებზე, საავტორო უფლებებზე, ,,ნოუ-ჰაუზე“. ამასთანავე, სალიცენზიო და ინტელექტუალური საკუთრების გადასახდელები ჩაირთვება საბაჟო ღირებულებაში, თუ ინტელექტუალური საკუთრების ნიმუშებს განუყრელი კავშირი აქვს იმპორტირებულ საქონელთან და ეს პირობები დაფიქსირებულია კონტრაქტში. თუ მყიდველი სალიცენზიო გადასახდელებს უხდის მესამე პირს, ეს შეთანხმებული უნდა იყოს გამყიდველთან.

5. საქონლის საბაჟო ღირებულების ამ კოდექსის 32-ე მუხლის საფუძველზე განსაზღვრისას გარიგების ფასს უნდა დაემატოს იმ მოგების ნაწილის ღირებულება, რომელიც საქონლის ყოველი შემდგომი გადაყიდვის, განკარგვის და გამოყენების შედეგად პირდაპირ ან არაპირდაპირ ეკუთვნის გამყიდველს.

6. საქონლის საბაჟო ღირებულებაში ჩაირთვება იმპორტირებული საქონლის მიერ საქართველოს საბაჟო საზღვრის გადმოკვეთამდე გაწეული შემდეგი ხარჯები:

ა) ტრანსპორტირების ღირებულება, დატვირთვა-გადმოტვირთვისა და დამუშავების (მათ შორის, საწყობში შენახვის) ხარჯები. თუ სხვადასხვა საქონლის პარტია ერთი და იმავე ტრანსპორტით არის იმპორტირებული, ტრანსპორტირების ხარჯები პროპორციულად გადანაწილდება;

ბ) დაზღვევასთან დაკავშირებული ხარჯები.

7. ამ მუხლის დებულებების შესაბამისად გარიგების ფასს ემატება საიმედო მონაცემების საფუძველზე განსაზღვრული ხარჯები, რომლებიც გაწეულ იქნა საქონლის მკაცრად განსაზღვრულ რაოდენობაზე.

8. საქონლის საბაჟო ღირებულების განსაზღვრისას დაუშვებელია გარიგების ფასისათვის იმ ხარჯების მიკუთვნება, რომლებიც ამ მუხლით არ არის გათვალისწინებული.

9. საქონლის საბაჟო ღირებულებაში არ უნდა იყოს ჩართული შემდეგი გადასახდელები და ხარჯები, თუ ისინი გამოყოფილია საქონლის ფაქტობრივი ფასიდან:

ა) საქართველოს კანონმდებლობით დადგენილი გადასახადები და მოსაკრებლები;

ბ) ექსპორტიორი ქვეყნის არაპირდაპირი გადასახადები, რომლებიც გამოყოფილია გარიგების ფასიდან;

გ) საქართველოს საბაჟო საზღვრის გადმოკვეთის შემდგომი ტრანსპორტირების ხარჯები;

დ) სამშენებლო-სამონტაჟო სამუშაოების, საწყობის, მომსახურების ან გაწეული ტექნიკური დახმარების ხარჯები, რომლებიც გაწეულ იქნა საქონლის შემოტანის შემდეგ;

ე) საბაჟო პროცედურებთან დაკავშირებული ხარჯები და სხვა ხარჯები, რომლებიც დაკავშირებულია საქართველოს ტერიტორიაზე იმპორტირებული საქონლის გადაადგილებასთან.

საქართველოს ფინანსთა მინისტრის 2007 წლის 15 ივნისის ბრძანება №654-სსმIII,№84, 19.06. 2007წ.,მუხ.905

 

Annotate