უმაღლეს საგანმანათლებლო დაწესებულებათა აკრედიტაციის დებულებისა და ინსტიტუციური აკრედიტაციის საფასურის ზღვრული ოდენობის განსაზღვრის ინსტრუქციის დამტკიცების შესახებ

სახელმწიფო სარეგისტრაციო კოდი 430.080.000.22.022.008.309

საქართველოს განათლებისა და მეცნიერების მინისტრის

ბრძანება №223

2006 წლის 27 მარტი

ქ. თბილისი

უმაღლეს საგანმანათლებლო დაწესებულებათა აკრედიტაციის დებულებისა და ინსტიტუციური აკრედიტაციის საფასურის ზღვრული ოდენობის განსაზღვრის ინსტრუქციის დამტკიცების შესახებ

„უმაღლესი განათლების შესახებ“ საქართველოს კანონის მე-7 მუხლის პირველი პუნქტის „ვ“ და „ო“ ქვეპუნქტებისა და საქართველოს ზოგადი ადმინისტრაციული კოდექსის 61-ე მუხლის პირველი ნაწილის, საქართველოს მთავრობის 2004 წლის 21 მაისის №37 დადგენილებით დამტკიცებული საქართველოს განათლებისა და მეცნიერების სამინისტროს დებულების მე-3 მუხლის მე-2 პუნქტის „ა“ და „მ“ ქვეპუნქტების შესაბამისად, ვბრძანებ:

1. დამტკიცდეს უმაღლეს საგანმანათლებლო დაწესებულებათა აკრედიტაციის დებულება დანართი №1-ის შესაბამისად.

2. დამტკიცდეს ინსტიტუციური აკრედიტაციის საფასურის ზღვრული ოდენობის განსაზღვრის ინსტრუქცია დანართი №2-ის შესაბამისად.

3. ძალადაკარგულად იქნეს ცნობილი:

ა) „საქართველოს უმაღლეს საგანმანათლებლო დაწესებულებათა ინსტიტუციური აკრედიტაციის წესის დებულების და ინსტიტუციური აკრედიტაციის საფასურის ზღვრული ოდენობის განსაზღვრის შესახებ“ საქართველოს განათლებისა და მეცნიერების მინისტრის 2005 წლის 11 ნოემბრის №618 ბრძანება (სსმ III, 14.11.2005., №133, მუხ. 1472);

 ბ) „აკრედიტებულ უმაღლეს საგანმანათლებლო დაწესებულებაში მისაღებ სტუდენტთა მაქსიმალური კონტინგენტის დადგენის წესის დამტკიცების შესახებ“ საქართველოს განათლებისა და მეცნიერების მინისტრის 2006 წლის 30 იანვრის №71 ბრძანება (სსმ III, 03.02.2006, №14, მუხ. 171).

4. ბრძანება ამოქმედდეს გამოქვეყნებისთანავე.

ა. ლომაია

დანართი №1

უმაღლეს საგანმანათლებლო დაწესებულებათა აკრედიტაციის

დ ე ბ უ ლ ე ბ ა

თავი I

ზოგადი დებულებანი

    მუხლი 1. ზოგადი დებულებანი

ეს დებულება ადგენს უმაღლესი საგანმანათლებლო დაწესებულებების (შემდგომში – დაწესებულება) ინსტიტუციური აკრედიტაციის კრიტერიუმებს და აწესრიგებს საგანმანათლებლო დაწესებულებათა სახელმწიფო სააკრედიტაციო სამსახურის (შემდგომში – სამსახური) მიერ დაწესებულებებისათვის აკრედიტაციის მინიჭების, აკრედიტაციის მინიჭებაზე უარის თქმის, პირობითი აკრედიტაციის მინიჭების, აკრედიტაციის პირობების შემოწმების, აკრედიტაციის გაუქმებისა და მისაღებ სტუდენთა კონტინგენტის განსაზღვრის პირობებს, აგრეთვე ინსტიტუციური აკრედიტაციის საფასურის ზღვრულ ოდენობებს.

თავი II

აკრედიტაციის კრიტერიუმები

    მუხლი 2. გადაწყვეტილება ინსტიტუციური აკრედიტაციის მინიჭების შესახებ

1. დაწესებულებისთვის ინსტიტუციური აკრედიტაციის მინიჭება ხდება 5 წლის ვადით, გარდა პირობითი აკრედიტაციის მინიჭებისა.

2. დაწესებულებას ინსტიტუციური აკრედიტაცია მიენიჭება იმ შემთხვევაში, თუ იგი აკმაყოფილებს ინსტიტუციური აკრედიტაციის ყველა ძირითად და დამატებით კრიტერიუმს.

3. ინსტიტუციური აკრედიტაციის მინიჭების შესახებ გადაწყვეტილებაში აღინიშნება აგრეთვე დაწესებულების მიერ მომდევნო კალენდარულ წელს და აკრედიტაციის ვადის განმავლობაში მისაღებ სტუდენტთა კონტინგენტის რაოდენობა.

    მუხლი 3. გადაწყვეტილება პირობითი ინსტიტუციური აკრედიტაციის მინიჭების შესახებ

1. დაწესებულებას პირობითი ინსტიტუციური აკრედიტაცია მიენიჭება იმ შემთხვევაში, თუ იგი აკმაყოფილებს ინსტიტუციური აკრედიტაციის ყველა ძირითად კრიტერიუმს და ვერ აკმაყოფილებს დამატებითი კრიტერიუმებიდან ერთ-ერთს მაინც.

2. პირობითი აკრედიტაციის მინიჭების შესახებ გადაწყვეტილებაში მითითებული უნდა იყოს აკრედიტაციის მინიჭების პირობის შესრულების წესი.

3. პირობითი აკრედიტაციის მინიჭების შემთხვევაში შემდგომი აკრედიტაცია ტარდება არა უგვიანეს 2 წლის ვადაში, რაც განისაზღვრება პირობითი აკრედიტაციის მინიჭების შესახებ გადაწყვეტილებით.

4. პირობითი აკრედიტაციის მინიჭების შემთხვევაში დაწესებულებას არ აქვს სტუდენტთა მიღების უფლება.

    მუხლი 4. გადაწყვეტილება ინსტიტუციური აკრედიტაციის მინიჭებაზე უარის თქმის შესახებ

დაწესებულება ინსტიტუციური აკრედიტაციის მინიჭებაზე უარს მიიღებს იმ შემთხვევაში, თუ იგი ვერ აკმაყოფილებს ინსტიტუციური აკრედიტაციის ძირითადი კრიტერიუმებიდან ერთ-ერთს მაინც.

    მუხლი 5. ინსტიტუციური აკრედიტაციის კრიტერიუმები

ინსტიტუციური აკრედიტაციის კრიტერიუმები არის 2 სახის:

ა) ძირითადი კრიტერიუმები;

ბ) დამატებითი კრიტერიუმები.

    მუხლი 6. ინსტიტუციური აკრედიტაციის ძირითადი კრიტერიუმები

1. დაწესებულების ინსტიტუციური აკრედიტაციის ძირითადი კრიტერიუმებია:

ა) არანაკლებ 1000 მ² ფართი ერთ მისამართზე;

ბ) ერთ სტუდენტზე არანაკლებ 4 მ² ფართი, რომელიც გამოიყენება სასწავლო და კვლევითი მიზნებისათვის და აღჭურვილია სტუდენტთა განთავსებისათვის აუცილებელი ინვენტარით;

გ) ერთი პროფესორი (პროფესორი, ასოცირებული პროფესორი, ასისტენტ-პროფესორი) არა უმეტეს 30 სტუდენტზე;

დ) დაწესებულების მიერ სპეციალობების ჩამონათვალის (ბაკალავრიატის, მაგისტრატურისა და დოქტორანტურის საგანმანათლებლო პროგრამის მიხედვით) წარმოდგენა. ბაკალავრიატის სპეციალობები შეესაბამება „საქართველოს უმაღლესი განათლების ბაკალავრიატის სპეციალობათა ჩამონათვალის დამტკიცების შესახებ“ განათლებისა და მეცნიერების მინისტრის 2005 წლის 18 ნოემბრის №633 ბრძანებით (სსმ III, 24.11.2005., №136, მუხ. 1514) დამტკიცებულ სპეციალობათა ჩამონათვალს;

ე) ერთი კომპიუტერი არა უმეტეს 25 სტუდენტზე;

ვ) ბიბლიოთეკა, რომელიც აკმაყოფილებს შემდეგ პირობებს:

ვ.ა) ბიბლიოთეკა არსებობს დაწესებულების ბალანსზე;

ვ.ბ) არსებობს ბიბლიოთეკარის საშტატო ერთეული;

ვ.გ) ბიბლიოთეკაში არსებობს სტუდენტთა და მასწავლებელთა რაოდენობის შესაბამისი ინვენტარით აღჭურვილი სამკითხველო დარბაზი;

ვ.დ) არსებობს საბიბლიოთეკო პრინციპით მოწესრიგებული კატალოგი (ქაღალდის ან ელეტრონულ მატარებელზე), ინვენტარის წიგნი, სარეგისტრაციო ჟურნალი, მკითხველთა ბარათები;

ვ.ე) დაწესებულია ბიბლიოთეკის სამუშაო განრიგი.

ზ) ვებ-გვერდი, რომელიც აკმაყოფილებს შემდეგ პირობებს:

ზ.ა) ვებ-გვერდის ერთ-ერთი ენა აუცილებლად ქართულია;

ზ.ბ) არსებობს დაწესებულების მიერ დომეინური სახელის ყიდვის ხელშეკრულება და „ჰოსტინგის“ (ვებ-სივრცის) ფლობის დამადასტურებელი დოკუნეტი;

ზ.გ) ვებ-გვერდის მისამართს აქვს „.edu“ ან „.edu.ge“ გაფართოება;

ზ.დ) ვებ-გვერდზე განთავსებულია დაწესებულების საკონტაქტო ინფორმაცია.

2. ამ მუხლის 1-ლი პუნქტის „ა“ და „ბ“ ქვეპუნქტებით გათვალისწინებული პირობების არსებობა და შესაბამისი ფართის 24 საათიან რეჟიმში სარგებლობის უფლება დადასტურებული უნდა იყოს კანონმდებლობით დადგენილი წესით უწყვეტად 6 წლის ვადით გაფორმებული ხელშეკრულებით და ამ ფართზე ხელშეკრულების შესაბამისი მხარის საკუთრების უფლების დამადასტურებელი დოკუმენტით, რაც დგინდება ამონაწერით საჯარო რეესტრიდან. ხელშეკრულება, რომელიც ითვალისწინებს ფართით სარგებლობის უფლების დროით შეზღუდვას, არ ჩაითვლება სარგებლობის უფლების დამადასტურებელ დოკუმენტად.

3. ამ მუხლის 1-ლი პუნქტის „გ“ ქვეპუნქტით გათვალისწინებული პირობის შესრულება დადასტურებული უნდა იყოს კანონმდებლობით დადგენილი წესით გაფორმებული შრომითი ხელშეკრულებებით/დანიშვნის აქტით. პროფესორი, ასოცირებული პროფესორი და ასისტენტპროფესორი აკრედიტაციის მიზნებისთვის არ შეიძლება მიეკუთვნოს ორზე მეტი დაწესებულების აკადემიურ პერსონალს. დაწესებულებამ უნდა წარმოადგინოს თითოეული პროფესორის წერილობითი თანხმობა, სადაც მითითებული იქნება, თუ რომელი ერთი ან ორი დაწესებულების აკადემიურ პერსონალად სურს რომ იყოს მიკუთვნებული.

    მუხლი 7. ინსტიტუციური აკრედიტაციის დამატებითი კრიტერიუმები

დაწესებულების ინსტიტუციური აკრედიტაციის დამატებითი კრიტერიუმებია:

ა) სასწავლო და სამეცნიერო პროცესისთვის აუცილებელი ინვენტარი;

ბ) სრულყოფილი სასწავლო გეგმები. ამ მიზნით, დაწესებულება აკრედიტაციის ჩასატარებლად ვალდებულია წარმოადგინოს სასწავლო გეგმები (სასწავლო პროგრამის აღწერა, მოდული, კურიკულუმი სათანადო კრედიტებისა და აკადემიური საათების მითითებით, სტუდენტთა ცოდნის შეფასების სისტემა) ევროპული კრედიტების ტრანსფერის სისტემის შესაბამისად, სადაც სწავლების პირველ საფეხურზე გათვალისწინებული 240 კრედიტი გადანაწილებული იქნება 4 სასწავლო წელზე, თითოეულ წელზე 60 კრედიტი;

გ) სრულყოფილი ბიბლიოთეკა, რომელიც გარდა ძირითადი კრიტერიუმებისა აკმაყოფილებს შემდეგ მოთხოვნებს:

გ.ა) ბიბლიოთეკას გააჩნია სამკითხველო დარბაზებისგან გამიჯნული წიგნსაცავი;

გ.ბ) ბიბლიოთეკას აქვს სასწავლო გეგმებისა და სტუდენტთა რაოდენობის შესაბამისი წიგნადი – ერთ სტუდენტზე არანაკლებ 10 დასახელების სახელმძღვანელო ერთეული და არაწიგნადი ფონდი ინფორმაციის აუდიო, ვიდეო და ციფრული მატარებლების სახით;

გ.გ) ბიბლიოთეკას აქვს სასწავლო გეგმისა და სამეცნიერო პროგრამების შესაბამისი პერიოდიკა და ამ პერიოდიკაზე გაფორმებული მიმდინარე ხელმოწერები;

გ.დ) ბიბლიოთეკა მუშაობს არანაკლებ 5 დღისა კვირის განმავლობაში;

დ) სრულყოფილი ვებგვერდი, რომელიც გარდა ძირითადი კრიტერიუმებისა აკმაყოფილებს შემდეგ მოთხოვნებს:

დ.ა) ვებგვერდიდან უნდა ირკვეოდეს ვებგვერდის მესაკუთრე და მასზე განთავსებული უნდა იყოს მესაკუთრის კოორდინატები და მისი შექმნის თარიღი, უნდა გააჩნდეს ვებგვერდს სტუმართა მოქმედი სანდო მრიცხველი;

დ.ბ) ვებგვერდზე გამოყენებული უნდა იყოს ქართული უნიკოდები („სილფაენი“ ან სხვა);

დ.გ)ვებგვერდი უნდა ასრულებდეს საკომუნიკაციო, საინფორმაციო და საგანმანათლებლო ფუნქციას, კერძოდ, მასზე უნდა იყოს განთავსებული დაწესებულების სტრუქტურა, წესდება, სასწავლო გეგმები, პროგრამები, მონაცემები სტუდენტთა და პროფესორთა შესახებ, საჯარო სამართლის იურიდიული პირებისათვის – აგრეთვე დაწესებულების ბიუჯეტი;

დ.დ) მოთავსებული ინფორმაციის რელევანტურობის მიზნით, უნდა ხდებოდეს ვებგვერდის ხშირი და რეგულარული განახლება.

ე) დაწესებულების საქმიანობის ორგანიზაცია:

ე.ა) დაწესებულებას უნდა გააჩნდეს ნათლად ჩამოყალიბებული სტრუქტურა;

ე.ბ) დაწესებულებას უნდა გააჩნდეს უფლებამოსილი ორგანოს მიერ დამტკიცებული ორგანიზაციული და საგანმანათლებლო-სამეცნიერო საქმიანობის მარე-გულირებელი შიდასამართლებრივი აქტები;

ე.გ) დაწესებულებაში უნდა წარმოებდეს ნებისმიერი სახის შიდასამართლებრივი აქტების სანდო აღრიცხვიანობა.

თავი III

აკრედიტაციის ჩატარების წესი

    მუხლი 8. აკრედიტაციის ჩატარების პრინციპები

1. დაწესებულების აკრედიტაცია ემყარება ურთიერთშეთანხმების პრინციპს, რაც გულისხმობს აკრედიტაციის ნებაყოფლობითობას და კანონმდებლობით დადგენილი წესით ექსპერტთა კანდიდატურების შეთანხმებას აკრედიტაციის მაძიებელ დაწესებულებასთან.

2. დაწესებულების აკრედიტაცია გულისხმობს აგრეთვე მისი ფილიალის/ფილიალების პირობების შესაბამისობის დადგენას ამ დებულებით განსაზღვრულ კრიტერიუმებთან.

3. აკრედიტაციის შედეგად განისაზღვრება დაწესებულების სტუდენტთა მისაღები კონტინგენტი. აკრედიტებული დაწესებულებისა და ამ დაწესებულების ფილიალის/ფილიალების მისაღებ სტუდენტთა რაოდენობები დგინდება ცალ-ცალკე.

4. რეორგანიზებული საჯარო სამართლის იურიდიული პირები – დაწესებულებები ექვემდებარებიან ხელახალ აკრედიტაციას. ხელახალი აკრედიტაციის გავლამდე რეორგანიზაციის მომდევნო სასწავლო წელს გაერთიანების/შერწყმის გზით რეორგანიზებული დაწესებულების მისაღებ სტუდენტთა რაოდენობა წარმოადგენს გაერთიანებამდე არსებული თითოეული უმაღლესი საგანმანათლებლო დაწესებულებისათვის დადგენილ მისაღებ სტუდენტთა რაოდენობების ჯამს.

    მუხლი 9. ექსპერტთა ჯგუფი

1. სამსახური დაწესებულების აკრედიტაციის ჩატარების მიზნით ქმნის ექსპერტთა ჯგუფებს. კონკრეტული დაწესებულების აკრედიტაციის მიზნით ექსპერტთა ჯგუფის შექმნა იწყება დაწესებულების მიერ განაცხადის წარმოდგენის დღიდან.

2. ექსპერტთა ჯგუფის შემადგენლობაში შეიძლება შედიოდნენ როგორც საქართველოს, აგრეთვე უცხო ქვეყნის მოქალაქეები, საგანმანათლებლო, კვლევითი, პროფესიული დაწესებულებების და კერძო სამართლის იურიდიული პირების წარმომადგენლები, სხვა პირები.

3. ექსპერტთა ჯგუფი შედგება თავმჯდომარისა და არანაკლებ 2 ექსპერტისაგან. ექსპერტთა ჯგუფის წევრთა რაოდენობა განისაზღვრება სამსახურის მიერ შესამოწმებელი დაწესებულების სტუდენტთა რაოდენობის, სტრუქტურული ერთეულების და მატერიალურ-ტექნიკური ბაზის სიდიდით.

4. ექსპერტთა ჯგუფის შემადგენლობას აკრედიტაციის მაძიებელ მხარესთან შეთანხმების საფუძველზე ამტკიცებს სამსახურის დირექტორი.

    მუხლი 10. ექსპერტის სტატუსი

1. ექსპერტი უნდა იყოს დამოუკიდებელი იმ დაწესებულებისაგან, რომლის აკრედიტაციასაც ახორციელებს ექსპერტთა ჯგუფი.

2. ექსპერტის კანდიდატურა უნდა იყოს მოწონებული შესამოწმებელი დაწესებულების მიერ. დაწესებულებას უფლება აქვს ორჯერ მისცეს აცილება როგორც ექსპერტთა ჯგუფს მთლიანობაში, ასევე მის თითოეულ ექსპერტს.

3. ექსპერტი ვალდებულია იცნობდეს აკრედიტაციის ჩატარების კრიტერიუმებს, წესს, აგრეთვე ჰქონდეს უმაღლესი განათლების სისტემის შესახებ შესაბამისი ცოდნა.

    მუხლი 11. ექსპერტთა ჯგუფის თავმჯდომარის სტატუსი

1. ექსპერტთა ჯგუფის თავმჯდომარე არ უნდა იყოს საჯარო მოხელე და იმ დაწესებულების ყოფი-ლი ან მოქმედი თანამშრომელი, რომლის აკრედიტაციის კრიტერიუმებთან შესაბამისობასაც იგი ამოწ-მებს.

2. ექსპერტთა ჯგუფის თავმჯდომარეს უნდა ჰქონდეს გამოცდილება უმაღლესი განათლების დარგში.

    მუხლი 12. ექსპერტთა რეესტრი

1. სამსახური ქმნის აკრედიტაციის ექსპერტთა და ექსპერტთა კანდიდატების მონაცემთა ბაზას. მონაცემათა ბაზაში შეიძლება შეტანილ იქნეს მონაცემები ექსპერტთა შესახებ საზოგადოებრივი აზრის და პროფესიულ საზოგადოებებში კანდიდატების შეფასების შესახებ რეიტინგული კვლევის საფუძველზე.

2. ექსპერტთა კანდიდატების წარდგენა შეუძლიათ საგანმანათლებლო და სამეცნიერო დაწესებულებებს, საზოგადოებრივ გაერთიანებებს, პროფესიულ ასოციაციებს, საერთაშორისო და უცხო ქვეყნების ორგანიზაციებს. ექსპერტი შეიძლება იყოს აგრეთვე ფიზიკური პირი, რომელიც აკმაყოფილებს ამ დებულებით დადგენილ მოთხოვნებს.

3. კანდიდატის შერჩევის კრიტერიუმებს ადგენს და აქვეყნებს სამსახური.

    მუხლი 13. ექსპერტთა ტრენინგი

1. ექსპერტებს შეიძლება ჩაუტარდეთ ტრენინგი სამსახურის მიერ დადგენილი წესით.

2. ტრენინგის დროს ექსპერტმა უნდა ისწავლოს ჯგუფური მუშაობის ძირითადი პრინციპები, ინტერვიუირება, თვითშეფასების ანგარიშის ანალიზი, მიღებული მასალების შეფასება, სააკრედიტაციო დასკვნის წერა, აკრედიტაციასთან დაკავშირებული ნორმატიული ბაზა.

3. სამსახურის მიერ ამ მუხლის მე-2 პუნქტით გათვალისწინებული საკითხების გარდა შეიძლება განისაზღვროს დამატებითი საკითხები, რომლებიც გათვალისწინებულ უნდა იქნას ექსპერტთა ტრენინგში.

    მუხლი 14. ექსპერტთა ჯგუფის თავმჯდომარის უფლება-მოვალეობანი

ექსპერტთა ჯგუფის თავმჯდომარე ვალდებულია:

ა) აწარმოოს წინასწარი მოლაპარაკება საგანმანათლებლო დაწესებულებასთან სააკრედიტაციო ვიზიტის შესახებ და სამსახურის დირექტორისა და დაწესებულების შეთანხმების შესაბამისად განახორციელოს სააკრედიტაციო ვიზიტი;

ბ) უხელმძღვანელოს აკრედიტაციის პროცესს, უზრუნველყოს კომისიის წევრთა შორის მოვალეობათა განაწილება და ანგარიშის ჩაბარება;

გ) უზრუნველყოს შეხვედრების ორგანიზაცია და კავშირები დაწესებულებასთან;

დ) უზრუნველყოს ექსპერტთა ჯგუფის დასკვნის მომზადება.

    მუხლი 15. ექსპერტთა შრომის ანაზღაურება

ექსპერტთა შრომის ანაზღურების, მათი მგზავრობისა და დღიური ხარჯების ანაზღაურების წესს განსაზღვრავს სამსახური.

    მუხლი 16. ექსპერტთა ჯგუფის პასუხისმგებლობა

ექსპერტთა ჯგუფი ვალდებულია:

ა) სააკრედიტაციო ვიზიტის წინ მოახდინოს თვითშეფასების ანგარიშისა და სხვა წარმოდგენილი მასალების ანალიზი;

ბ) ვიზიტის დროს მიიღოს მონაწილეობა მასალების შეგროვებაში, აზრების გაზიარებაში, შემოწმებასა და თვითშეფასების ანგარიშის შინაარსის განხილვაში;

გ) ჩაატაროს სტუდენტთა, აკადემიური და დამხმარე პერსონალის, აგრეთვე სხვა პირების ინტერვიუი-რება;

დ) შეამოწმოს სააკრედიტაციოდ გამოტანილი ყველა საკითხი;

ე) მონაწილეობა მიიღოს ვიზიტის შემდგომი დასკვნის შემუშავებაში.

    მუხლი 17. დაწესებულების თვითშეფასება

1. დაწესებულების აკრედიტაციის პროცესი იწყება დაწესებულების მიერ თვითშეფასების კითხვარის წარ-მოდგენით. კითხვარის ფორმას ამტკიცებს საქართველოს განათლებისა და მეცნიერების მინისტრი.

2. თვითშეფასების კითხვარის ფორმა და შევსების წესი განისაზღვრება სამსახურის მიერ.

    მუხლი 18. ინსტიტუციური აკრედიტაციისთვის წარმოსადგენი დოკუმენტაცია

დაწესებულებამ ინსტიტუციური აკრედიტაციის მისაღებად სამსახურს უნდა წარუდგინოს შემდეგი დოკუმენტაცია:

ა) განაცხადი აკრედიტაციის მოთხოვნის შესახებ;

ბ) შევსებული თვითშეფასების კითხვარი;

გ) განმცხადებლის მიერ აკრედიტაციის განაცხადის საფასურის გადახდის დამადასტურებელი დოკუმენტი;

დ) დაწესებულების სათანადოდ დამტკიცებული წესდების ასლი;

ე) დაწესებულების დაფუძნების ასლი;

ვ) საგანმანათლებლო საქმიანობის ლიცენზიის მოწმობის ასლი, გარდა იმ საჯარო სამართლის იურიდიული პირებისა, რომლებიც საჯარო სამართლის იურიდიული პირის სტატუსით საქმიანობდნენ „ლიცენზიებისა და ნებართვების შესახებ“ საქართველოს კანონის ძალაში შესვლამდე;

ზ) შენობა-ნაგებობის კანონმდებლობით დადგენილი წესით ფლობისა და სარგებლობის უფლების დამადასტურებელი დოკუმენტაცია. ეს უფლება დაწესებულებას უნდა ჰქონდეს გაფორმებული საბუთის წარმოდგენის მომენტისათვის არანაკლებ 6 წლის ვადით;

თ) საინვენტარიზაციო აქტი/სააუდიტორო დასკვნა;

ი) კომპიუტერების ფლობის დამადასტურებელი დოკუმენტაცია;

კ) სტუდენტთა სახელობითი სიები კურსის, ფაკულტეტის, სპეციალობისა და სწავლების ფორმის მითითებით როგორც ნაბეჭდი, ასევე ელექტრონული ფორმით;

ლ) აკადემიური პერსონალის მიერ შევსებული სპეციალური ფორმა;

მ) საგადასახადო ინსპექციიდან ქონების გადასახადის გადახდის დამადასტურებელი დოკუმენტაცია;

ნ) დომენური სახელის და „ჰოსტინტის“ (ვებ-სივრცის) ფლობის ხელშეკრულების ასლი;

ო) დოკუმენტაცია ცენტრალური ბიუჯეტიდან პირდაპირი დაფინანსების, ადგილობრივი ბიუჯეტიდან დაფინანსების, სასწავლო გრანტის ოდენობის, ფასიანი სექტორიდან შემოსავლის შესახებ.

    მუხლი 19. სააკრედიტაციო ვიზიტი

1. სააკრედიტაციო ვიზიტის ძირითადი მიზანია საშუალება მისცეს ექსპერტებს დაადგინოს დაწესებულების აკრედიტაციის პირობებთან შესაბამისობა და გადაამოწმონ თვითშეფასების კითხვარში წარმოდგენილი ინფორმაცია.

2. სააკრედიტაციო ვიზიტის ხანგრძლივობა განისაზღვრება დაწესებულების რესურსების მოცულობის შესაბამისად.

3. აკრედიტაციის მიზნით ექსპერტები ამოწმებენ დაწესებულებაში არსებულ დოკუმენტაციას, ახორციელებენ დაწესებულებაში დასაქმებული პირების, სტუდენტების და სხვა დაინტერესებული პირების ინტერვიუირებას და შენობა-ნაგებობის და ინვენტარის ადგილზე დათვალიერებას. აკრედიტაციის პირობების გადამოწმების მიზნით ექსპერტები უფლებამოსილნი არიან მოიძიონ და გადაამოწმონ კონკრეტული მონაცემები და ინფორმაცია სხვა დაინტერესებულ პირებთან.

    მუხლი 20. აკრედიტაციის დასკვნა

1. სააკრედიტაციო ვიზიტის შედეგად დგება ექსპერტთა ჯგუფის დასკვნა, რომლის ფორმაც განისაზღვრება სამსახურის მიერ. დასკვნა წარმოადგენს აღწერასა და ანალიზს დაწესებულების თვითშეფასების კითხვარი მოყვანილ მონაცემებთან და ამ დებულებით განსაზღვრულ კრიტერიუმებთან შესაბამისობის შესახებ.

2. სააკრედიტაციო ვიზიტის შესახებ დასკვნას ექსპერტთა ჯგუფის თავმჯდომარე წერილობითი სახით წარუდგენს სამსახურს.

    მუხლი 21. გადაწყვეტილება აკრედიტაციის შესახებ

1. დირექტორი ექსპერტთა დასკვნისა და აკრედიტაციის საბჭოს რეკომენდაციის საფუძველზე იღებს ერთ-ერთ შემდეგ გადაწყვეტილებას:

ა) აკრედიტაციის მინიჭების შესახებ;

ბ) პირობითი აკრედიტაციის მინიჭების შესახებ;

გ) აკრედიტაციის მინიჭებაზე უარის თქმის შესახებ;

დ) აკრედიტაციის გაუქმების შესახებ.

2. დირექტორი ექსპერტთა დასკვნისა ან/და აკრედიტაციის საბჭოს რეკომენდაციის გაუთვალისწინებლობის შემთხვევაში ვალდებულია დაასაბუთოს თავისი გადაწყვეტილება.

3. გადაწყვეტილება ფორმდება დირექტორის ბრძანებით, რომელშიც განისაზღვრება მისი ძალაში შესვლის დრო.

    მუხლი 22. მისაღებ სტუდენტთა კონტინგენტის განსაზღვრა

1. გადაწყვეტილება კონტინგენტის განსაზღვრის შესახებ, გარდა ამ დებულების მე-8 მუხლის მე-4 პუნქტით დადგენილი შემთხვევისა, შესაძლებელია მიღებულ იქნეს მისაღები კონტინგენტის განაცხადის წარდგენის ვადის დაცვით დაწესებულების, მათ შორის ახალდაფუძნებული ლიცენზირებული დაწესებულების, მიმართვის საფუძველზე.

2. ამ მუხლის 1-ლი პუნქტით გათვალისწინებულ შემთხვევაში სამსახური უფლებამოსილია მისაღები კონტინგენტი განსაზღვროს დაწესებულების მიერ წარმოდგენილი დამატებითი ინფორმაციის შემოწმების საფუძველზე ამ დებულებით დადგენილი წესით.

3. მისაღები კონტინგენტის განსაზღვრის ვადას სამსახურისა და გამოცდების ეროვნული ცენტრის წინადადებების გათვალისწინებით ადგენს საქართველოს განათლებისა და მეცნიერების მინისტრი ინდივიდუალური ადმინისტრაციულ-სამართლებრივი აქტით.

4. ახალდაფუძნებული ლიცენზირებული დაწესებულებისათვის მისაღები კონტინგენტის განსაზღვრა ხდება ლიცენზიის ფარგლებში დაწესებულების მიერ სამინისტროში წარდგენილი მონაცემების შესაბამისად. ამ შემთხვევაში მისაღები კონტინგენტის განსაზღვრას ახორციელებს სამსახური სამინისტროდან მიღებული მონაცემების საფუძველზე.

5. სამსახურის ინიციატივით მისაღები კონტინგენტის რაოდენობა შეიძლება შეიცვალოს მხოლოდ ამ დებულებით დადგენილი წესით აკრედიტაციის კრიტერიუმების შემოწმების შედეგად და მის საფუძველზე. ამ გადაწყვეტილებას იღებს დირექტორი ექსპერტთა დასკვნის საფუძველზე, რაც ფორმდება ბრძანებით, რომელშიც მიეთითება გადაწყვეტილების ძალაში შესვლის დრო.

6. დაწესებულების მიერ განსაზღვრული მისაღები კონტინგენტის რაოდენობის დაცვისა და დაწესებულებაში აბიტურიენტთა/სტუდენტთა ჩარიცხვის კანონმდებლობით დადგენილი წესის შესრულების შემოწმების მიზნით, სამსახური უფლებამოსილია შეამოწმოს დაწესებულება არა უმეტეს 2-ჯერ კალენდარული წლის განმავლობაში სამსახურის დირექტორის ინდივიდუალური ადმინისტრაციულ-სამართლებრივი აქტით. ამ შემთხვევაში შემოწმების დრო, პერიოდი და შემოწმების განხორციელებაზე უფლებამოსილი პირის/პირების ვინაობა არ ექვემდებარება შეთანხმებას შესაბამის დაწესებულებასთან.

7. ამ მუხლის პირველი პუნქტითა და მე-3 მუხლის მე-3 პუნქტით გათვალისწინებული პირობების შესრუ-ლების შემოწმების მიზნით სამსახური აწარმოებს აკრედიტებული დაწესებულებების სტუდენტთა და პროფესორ-მასწავლებელთა რეესტრს.

თავი IV

აკრედიტაციის პირობების შესრულებაზე კონტროლი

    მუხლი 23. დაწესებულების თვითშეფასების ყოველწლიური ანგარიში

დაწესებულება, რომელსაც მინიჭებული აქვს აკრედიტაცია ან პირობითი აკრედიტაცია, ვალდებულია სამსახურში წარადგინოს თვითშეფასების ყოველწლიური ანგარიში აკრედიტაციის პირობებთან შესაბამისობის შესახებ სამსახურის მიერ დადგენილი წესის შესაბამისად.

    მუხლი 24. დაწესებულების აკრედიტაციის კრიტერიუმებთან შესაბამისობის შემოწმება და გადაწყვეტილების მიღება

1. აკრედიტაციის მინიჭების შემდეგ სამსახური უფლებამოსილია შეამოწმოს დაწესებულების შესაბამისობა აკრედიტაციის კრიტერიუმებთან იმ შემთხვევაში, თუ:

ა) დაწესებულება არ წარადგენს ამ დებულების მე-17 მუხლით განსაზღვრულ ყოველწლიურ თვითშე-ფასების ანგარიშს;

ბ) თვითშეფასების წარმოდგენილ კითხვარში მოყვანილი მონაცემების შესაბამისად დაწესებულება აღარ აკმაყოფილებს აკრედიტაციის კრიტერიუმებს ან მონაცემები წარმოშობენ აკრედიტაციის კრიტერიუმებთან შეუსაბამობის ეჭვს;

გ) არსებობს ინფორმაცია ან დასაბუთებული ეჭვი იმისა, რომ დაწესებულება არ შეესაბამება აკრედიტაციის კრიტერიუმებს ან არსებობს აკრედიტაციის ჩამორთმევის საფუძველი.

2. სამსახურს დაწესებულების აკრედიტაციის შემოწმების განხორციელება შეუძლია წელიწადში მხოლოდ ერთხელ.

3. დაწესებულების შემოწმების შედეგად ექსპერტთა დასკვნისა და აკრედიტაციის საბჭოს რეკომენდაციის საფუძველზე დირექტორი იღებს გადაწყვეტილებას, რომელიც შეიძლება იყოს შემდეგი სახის:

ა) აკრედიტაციის უცვლელად დატოვების შესახებ;

ბ) აკრედიტაციის ნაცვლად პირობითი აკრედიტაციის მინიჭების შესახებ;

გ) აკრედიტაციის გაუქმების შესახებ.

4. ამ მუხლის მე-3 პუნქტით გათვალისწინებული გადაწყვეტილება ფორმდება დირექტორის ბრძანებით, რომელშიც განისაზღვრება მისი ძალაში შესვლის დრო.

5. აკრედიტაციის გაუქმების საფუძველია ამ დებულებით განსაზღვრული აკრედიტაციის კრიტერიუმებთან დაწესებულების შეუსაბამობის დადგენა, აგრეთვე დაწესებულების მიერ ერთიანი ეროვნული გამოცდების ჩატარების დებულებით დადგენილი წესის, აგრეთვე უმაღლესი განათლების სფეროში მოქმედი ნორმატიული აქტებით დადგენილი წესის დარღვევა.

    მუხლი 25. დაწესებულების შემოწმების ჩატარების წესი

დაწესებულების აკრედიტაციის კრიტერიუმებთან შესაბამისობის შემოწმება ხორციელდება ამ დებულების მე-3 თავით განსაზღვრული წესის შესაბამისად.

თავი V

გარდამავალი დებულებანი

    მუხლი 26. გარდამავალი დებულებანი

სამსახურის მიერ პირველი აკრედიტაცია 2006 წელს ხორციელდება სამინისტროს მიერ დადგენილი ვადების შესაბამისად.

დანართი №2

ინსტიტუციური აკრედიტაციის საფასურის ზღვრული ოდენობის განსაზღვრის  ინსტრუქცია

    მუხლი 1. ინსტიტუციური აკრედიტაციის საფასურის ზღვრული ოდენობის გადახდის წესი

1. აკრედიტაციის საფასურს იხდის დაწესებულება ორგანიზაციულ-სამართლებრივი ფორმის მიუხედავად.

2. დაწესებულებათა აკრედიტაციის სამსახური განაცხადთან დაკავშირებით იღებს შემდეგ ერთ-ერთ გადაწყვეტილებას:

ა) განაცხადის მიღების შესახებ;

ბ) განაცხადის მიღებაზე უარის თქმის შესახებ.

3. განაცხადის დაკმაყოფილების შესახებ გადაწყვეტილების მიღების შემთხვევაში განმცხადებელს ენიჭება აკრედიტაციის მაძიებლის სტატუსი.

4. აკრედიტაციის საფასურის გადახდა წარმოებს როგორც განაცხადის შემოტანისას, ასევე აკრედიტაციის მაძიებლად ცნობის შემდეგ აკრედიტაციის პროცედურის დაწყებამდე.

5. აკრედიტაციის მაძიებლად ცნობის შემდეგ განმცხადებელს ევალება გადაიხადოს აკრედიტაციის პროცედურის განსახორციელებლად შესაბამისი საფასური, რის შემდეგაც იგი დაექვემდებარება დადგენილი წესით გადამოწმებას.

6. აკრედიტაციის საფასური განმცხადებელს არ უბრუნდება.

    მუხლი 2. ინსტიტუციური აკრედიტაციის საფასურის ნიხრები

1. აკრედიტაციის განაცხადის შემოტანის დროს ყველა განმცხადებელი ვალდებულია გადაიხადოს აკრედიტაციის განაცხადის საფასური 250 ლარის ოდენობით.

2. აკრედიტაციის მაძიებლად ცნობის შემთხვევაში დაწესებულება იხდის აკრედიტაციის პროცედურის საფასურის ზღვრულ ოდენობას, რომელიც განისაზღვრება შემდეგი სამი პარამეტრით:

ა) დაწესებულებაში არსებულ სტუდენტთა რაოდენობით;

ბ) დაწესებულების მიერ დაკავებული საერთო ფართით;

გ) სხვადასხვა მისამართზე არსებული ფართებისა და შენობა-ნაგებობების რაოდენობით.

3. საფასურის საერთო რაოდენობა დგინდება ამ მუხლის მე-2 პუნქტით განსაზღვრული პარამეტრების შესაბამისი ჯამით.

    მუხლი 3. დაწესებულებებში სტუდენტთა არსებული რაოდენობით აკრედიტაციის საფასურის ზღვრული ოდენობის განსაზღვრის წესი და ოდენობა

1. დაწესებულება ვალდებულია გადაიხადოს აკრედიტაციის პროცედურის საფასური შემდეგი ოდენობით:

ა) 100-მდე სტუდენტის არსებობისას – 500 ლარი;

ბ) 101-დან 300-მდე სტუდენტის არსებობისას – 1000 ლარი;

გ) 301-დან 500-მდე სტუდენტის არსებობისას – 1300 ლარი;

დ) 501-დან 1000-მდე სტუდენტის არსებობისას – 2000 ლარი;

ე) 1001-დან 5000-მდე სტუდენტის არსებობისას – 3000 ლარი;

ვ) 5001-დან 10000-მდე სტუდენტის არსებობისას – 5000 ლარი.

2. დაწესებულება 10000-ზე მეტ ყოველ 1000 სტუდენტზე იხდის აკრედიტაციის პროცედურის საფასურს 500 ლარის დამატებით.

    მუხლი 4. დაწესებულების მიერ საერთო ფართის მიხედვით გადასახდელი აკრედიტაციის საფასურის ზღვრული ოდენობის განსაზღვრის წესი და ოდენობა

1. დაწესებულება ვალდებულია ფართის მიხედვით გადაიხადოს აკრედიტაციის პროცედურის საფასური შემდეგი ოდენობით:

ა) 1000-დან 3000-კვ.მ-მდე ფართობის დროს – 500 ლარი;

ბ) 3001-დან 5000-კვ.მ-მდე ფართობის დროს – 1000 ლარი;

გ) 5001-დან 10000-კვ.მ-მდე ფართობის დროს – 1700 ლარი;

დ) 10001-დან 20000-კვ.მ-მდე ფართობის დროს – 2300 ლარი;

ე) 20001-დან 30000-კვ.მ-მდე ფართობის დროს – 2700 ლარი.

2. დაწესებულება 30000 კვ.მ-ზე მეტ ყოველ 10000 კვ.მ-ზე იხდის აკრედიტაციის პროცედურის საფასურს 200 ლარის დამატებით.

    მუხლი 5. დაწესებულებისათვის სხვადასხვა მისამართზე არსებული ფართებისა და შენობა-ნაგებობების მიხედვით აკრედიტაციის საფასურის ზღვრული ოდენობის განსაზღვრის წესი და ოდენობა

დაწესებულება ვალდებულია ყოველ ერთ მისამართზე არსებული 1 შენობა-ნაგებობისა ან შენობის ნაწილის ფლობის შემთხვევაში გადაიხადოს აკრედიტაციის პროცედურის საფასური 150 ლარის ოდენობით.