საოლქო საარჩევნო კომისიის წევრთა შესარჩევი კონკურსის დებულების დამტკიცების შესახებ

საქართველოს საარჩევნო ადმინისტრაცია საქართველოს ცენტრალური საარჩევნო კომისიის

დადგენილება №10/2012

201 2 წ ლის 2 მარტი

ქ. თბილისი

საოლქო საარჩევნო კომისიის წევრთა შესარჩევი კონკურსის დებულების დამტკიცების შესახებ

საქართველოს ორგანული კანონის „საქართველოს საარჩევნო კოდექსი“მე-14 მუხლის პირველი პუნქტის „ტ” ქვეპუნქტის, 30-ე მუხლის მე-3 პუნქტის, 77-ე მუხლის მე-5 პუნქტისა და საქართველოს ზოგადი ადმინისტრაციული კოდექსის 61-ე მუხლის საფუძველზე, საქართველოს ცენტრალური საარჩევნო კომისია ადგენს:

მუხლი 1. დამტკიცდეს თანდართული „საოლქო საარჩევნო კომისიის წევრთა შესარჩევი კონკურსის დებულება“.

მუხლი 2. ძალადაკარგულად გამოცხადდეს საქართველოს ცენტრალური საარჩევნო კომისიის 2011 წლის 8 აპრილის №5/2011 დადგენილება „საოლქო საარჩევნო კომისიის წევრთა შესარჩევი კონკურსის წესის(პირობების) დამტკიცების შესახებ“.

მუხლი 3. ეს დადგენილება შეიძლება გასაჩივრდეს თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი, მე-12 კილომეტრი, №6) მისი მიღებიდან 2 კალენდარული დღის ვადაში.

 მუხლი 4. ეს დადგენილება ამოქმედდეს 2012 წლის 6 მარტიდან.

 

 

კომისიის თავმჯდომარე     ზ. ხარატიშვილი

კომისიის მდივანი   გ. მჭედლიძე

 

დანართი

საოლქო საარჩევნო კომისიის წევრთა შესარჩევი კონკურსის დებულება

თავი I

ზოგადი დებულებანი

    მუხლი 1. ზოგადი დებულებანი

1. ეს დებულება შემუშავებულია საქართველოს ორგანული კანონის „საქართველოს საარჩევნო კოდექსი” შესაბამისად და განსაზღვრავს საოლქო საარჩევნო კომისიის წევრთა შესარჩევი კონკურსის ორგანიზების პროცედურებს, ჩატარების წესსა და კონკურსის პირობებს.

2. საოლქო საარჩევნო კომისიის წევრობის კანდიდატის შერჩევა ხორციელდება ღია კონკურსის წესით.

3. ცესკოს საარჩევნო პროცესების მართვის დეპარტამენტი პასუხისმგებელია უზრუნველყოს ამ დებულებით დადგენილი პროცედურების ეფექტური და სრულყოფილი შესრულება, აწარმოოს მონიტორინგი პროცედურის პრინციპების დაცვაზე.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/2016 - ვებგვერდი, 05.01.2016წ.

საქართველოს ცენტრალური საარჩევნო კომისიის 2017 წლის 27 ივნისის დადგენილება №15/2017 - ვებგვერდი, 28.06.2017წ.

საქართელოს ცენტრალური საარჩევნო კომისიის 2021 წლის 31 მაისის დადგენილება №13/2021 - ვებგვერდი, 31.05.2021 წ.

საქართველოს ცენტრალური საარჩევნო კომისიის 2022 წლის 16 დეკემბრის დადგენილება №46/2022 - ვებგვერდი, 16.12.2022წ.

 

მუხლი 2. კონკურსის მიზანი, ამოცანები და ჩატარების პრინციპები

1. კონკურსის მიზანია საოლქო საარჩევნო კომისიის წევრთა ვაკანტურ ადგილებზე ასარჩევ მაღალკვალიფიციურ პირთა შერჩევა.

2. კონკურსის ამოცანას წარმოადგენს კანდიდატის პროფესიული ჩვევების, კვალიფიკაციის, შესაძლებლობებისა და დასაკავებელი თანამდებობის მოთხოვნებთან შესაბამისობის დონის განსაზღვრა.

3. საოლქო საარჩევნო კომისიის წევრთა კონკურსი ტარდება ობიექტურობის, სამართლიანობის, გამჭვირვალობის, არადისკრიმინაციულობის, საჯაროობის, მიუკერძოებლობის, კოლეგიურობის და კორექტულობის პრინციპების გათვალისწინებით.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/201 6 - ვებგვერდი, 05.01.2016წ.

თავი II

საკონკურსო კომისია

    მუხლი 3. კომისიის შემადგენლობა

  საოლქო საარჩევნო კომისიის წევრთა შესარჩევ საკონკურსო კომისიაში შედიან ცესკოს თავმჯდომარე და ცესკოს არაუმეტეს 16 წევრი.

   საქართველოს ცენტრალური საარჩევნო კომისიის 2017 წლის 24 ნოემბრის დადგენილება №54/2017 - ვებგვერდი, 27.11.2017წ.

საქართველოს ცენტრალური საარჩევნო კომისიის 2021 წლის 26 ივლისის დადგენილება №38/2021 - ვებგვერდი, 27.07.2021წ.

    მუხლი 4. კომისიის მუშაობის წესი

საკონკურსო კომისიის მუშაობის წესი განისაზღვრება საქართველოს ორგანული კანონით „საქართველოს საარჩევნო კოდექსი”, საქართველოს ცენტრალური საარჩევნო კომისიის რეგლამენტით და წინამდებარე დებულებით.

    მუხლი 5. შესარჩევნი კონკურსის სამდივნო

1. კონკურსის ორგანიზებულად ჩატარების მიზნით ცესკო განკარგულებით ქმნის საკონკურსო კომისიის სამდივნოს (შემდგომში – სამდივნო).

2. სამდივნო იქმნება ცესკოს საარჩევნო პროცესების მართვის დეპარტამენტის თანამშრომლებისაგან, რომელსაც ხელმძღვანელობს ამავე დეპარტამენტის უფროსი.

3. სამდივნო:

ა) უზრუნველყოფს კონკურსის ყველა ორგანიზაციული საკითხის გადაწყვეტას, მათ შორის, კანდიდატთა განცხადებების მიღებას, წარმოდგენილი დოკუმენტაციის დადგენილ მოთხოვნებთან შესაბამისობის შემოწმებას და კანდიდატთა რეგისტრაციას შესაბამის ჟურნალში;

ბ) რეგისტრაციის შემთხვევაში შესარჩევი კონკურსის სამდივნო გასცემს საკონკურსო ფურცელს, რომელშიც აღინიშნება კანდიდატის სარეგისტრაციო ნომერი;

გ) წარუდგენს საკონკურსო კომისიას კანდიდატთა საკონკურსო დოკუმენტაციას საბუთების მისაღებად განსაზღვრული ვადის ამოწურვის შემდეგ;

დ) უზრუნველყოფს შესაბამისი პირის წერილობით ინფორმირებას კონკურსის შედეგების თაობაზე.

4. სამდივნოს საქმიანობაზე ზედამხედველობას ახორციელებს ცესკოს მიერ დანიშნული ცესკოს წევრი.

5. სამდივნოს უფლებამოსილება უწყდება მასზე დაკისრებული ამოცანების შესრულებისთანავე.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/201 6 - ვებგვერდი, 05.01.2016წ.

საქართველოს ცენტრალური საარჩევნო კომისიის 2017 წლის 27 ივნისის დადგენილება №15/2017 - ვებგვერდი, 28.06.2017წ.

საქართელოს ცენტრალური საარჩევნო კომისიის 2021 წლის 31 მაისის დადგენილება №13/2021 - ვებგვერდი, 31.05.2021 წ.

საქართველოს ცენტრალური საარჩევნო კომისიის 2022 წლის 16 დეკემბრის დადგენილება №46/2022 - ვებგვერდი, 16.12.2022წ.

 

თავი III

კონკურსი

    მუხლი 6. კონკურსის გამოცხადება

1. კონკურსის გამოცხადება ხდება საოლქო საარჩევნო კომისიაში წარმოქმნილი ვაკანსიის შევსების მიზნით.

2. საოლქო საარჩევნო კომისიის წევრის უფლებამოსილების ვადის გასვლამდე არა უგვიანეს 60 დღისა ან წევრის უფლებამოსილების ვადამდე შეწყვეტიდან არა უგვიანეს 3 დღისა ცესკო გამოსცემს განკარგულებას კონკურსის ჩატარების შესახებ.

3. კონკურსი ცხადდება და საკონკურსო დოკუმენტაციის მიღების თარიღები დგინდება ცესკოს განკარგულებით.

4.  ინფორმაცია კონკურსის გამოცხადების შესახებ ქვეყნდება ცესკოს ვებგვერდზე (www.cec.gov.ge) და ცესკოს თავმჯდომარის გადაწყვეტილებით შრომით ურთიერთობებთან დაკავშირებულ შესაბამის ვებგვერდებზე და სოციალურ ქსელებში.

5. შეტყობინება კონკურსის შესახებ უნდა შეიცავდეს შემდეგ მონაცემებს:

ა) საოლქო საარჩევნო კომისიის დასახელებას, ვაკანსიის რაოდენობას და თანამდებობრივი სარგოს ოდენობას;

ბ) კანდიდატებისათვის წაყენებული მოთხოვნებს;

გ) აუცილებელი დოკუმენტაციის ჩამონათვალს და წარდგენის ვადას;

დ) საკონკურსო კომისიის მისამართს და საკონტაქტო ინფორმაციას (ტელეფონის ნომერს, ელ-ფოსტის მისამართს).

6. კანდიდატი კონკურსში მონაწილედ ჩაითვლება ამ დებულების შესაბამისად სამდივნოში საკონკურსო დოკუმენტაციის რეგისტრაციის შემდეგ.

7. თუ კანდიდატი ვერ აკმაყოფილებს წაყენებულ მოთხოვნებს, დოკუმენტაცია წარმოდგენილია არასრულყოფილად (ხარვეზის შესავსებად განსაზღვრული ვადის გათვალისწინებით) ან რეგისტრაციის ვადის გასვლის შემდეგ, საკონკურსო დოკუმენტაცია არ განიხილება.

8. ცესკო კანდიდატთა საბუთების მიღების ვადის ამოწურვის შემდეგ, აქვეყნებს კანდიდატთა სიას ცესკოს ვებგვერდის საშუალებით.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/2016 - ვებგვერდი, 05.01.2016წ.

საქართველოს ცენტრალური საარჩევნო კომისიის 2017 წლის 27 ივნისის დადგენილება №15/2017 - ვებგვერდი, 28.06.2017წ.

 მუხლი 7. საოლქო საარჩევნო კომისიის წევრთა კონკურსში მონაწილე კანდიდატის რეგისტრაციისთვის წაყენებული მოთხოვნები

1.  საოლქო საარჩევნო კომისიის წევრთა კონკურსში მონაწილეობის უფლება აქვს საქართველოს ქმედუნარიან მოქალაქეს 21 წლიდან, რომელიც ფლობს სახელმწიფო ენას, აქვს უმაღლესი განათლება, საარჩევნო ადმინისტრაციის მოხელის სერტიფიკატი და რომელიც აკმაყოფილებს საქართველოს ორგანული კანონის „საქართველოს საარჩევნო კოდექსი“ მე-20 მუხლის მე-11 და მე-17 პუნქტებითა და საქართველოს კანონის „საჯარო სამსახურის შესახებ“ 27-ე მუხლის მე-2 პუნქტის „ა“, „გ“ და „დ“ ქვეპუნქტებით დადგენილ მოთხოვნებს.

2. საოლქო საარჩევნო კომისიის წევრთა კონკურსში მონაწილე კანდიდატმა, ცენტრალურ საარჩევნო კომისიაში, სამდივნოს უნდა წარუდგინოს შემდეგი საკონკურსო დოკუმენტაცია:

ა) განცხადების შევსებული ფორმა (დანართი №1);

  ბ) საქართველოს მოქალაქის პირადობის მოწმობის ან საქართველოს მოქალაქის პასპორტის ფოტოასლი;

 გ) უმაღლესი განათლების (აგრეთვე აკადემიური (სამეცნიერო) ხარისხის – თუ აქვს) დამადასტურებელი დოკუმენტის ფოტოასლი ;

დ) ავტობიოგრაფია ან Curriculum Vitae (CV);

ე) კანდიდატის შრომითი ბიოგრაფია და არჩევნებში მონაწილეობის გამოცდილების აღწერა (თუ აქვს ასეთი გამოცდილება).

ვ) ორი ფერადი ფოტოსურათი, ზომით 3X4;

ზ) საარჩევნო ადმინისტრაციის მოხელის სერტიფიკატის ფოტოასლი.

3. საბუთების ჩაბარებისას კანდიდატმა უნდა წარმოადგინოს დიპლომისა და კვალიფიკაციის დამადასტურებელი დოკუმენტაციის დედნები ან ნოტარიულად დამოწმებული ასლები, რომელთა ასლების შესაბამისობის დადგენის შემდგომ დოკუმენტაცია უბრუნდება კანდიდატს.

4. საკონკურსო საბუთების წარდგენის ვადაა:

ა) უფლებამოსილების ვადის გასვლისას – კონკურსის გამოცხადებიდან 14 დღე;

ბ) უფლებამოსილების ვადამდე შეწყვეტისას – კონკურსის გამოცხადებიდან 10 დღე, ხოლო თუ დანიშნულია არჩევნები – კონკურსის გამოცხადებიდან 2 დღე;

გ) ხელახალი კონკურსის შემთხვევაში - კონკურსის გამოცხადებიდან 10 დღე, ხოლო თუ დანიშნულია არჩევნები - კონკურსის გამოცხადებიდან 2 დღე.

5. კანდიდატს რეგისტრაციის ვადის განმავლობაში უფლება აქვს გამოითხოვოს მის მიერ წარმოდგენილი განცხადება.

6. კანდიდატს უფლება აქვს განცხადება შეიტანოს მხოლოდ ერთ ვაკანტურ თანამდებობაზე. თუ პირმა განცხადება შეიტანა, საოლქო საარჩევნო კომისიებში ერთზე მეტ არსებულ ვაკანტურ თანამდებობაზე, მისი საკონკურსო დოკუმენტაცია არ განიხილება.

7. თუ წარდგენილი საბუთები არ შეესაბამება ამ მუხლით დადგენილ მოთხოვნებს, ცესკოს თავმჯდომარე ან მის მიერ უფლებამოსილი პირი 2 დღის ვადაში აცნობებს ამის შესახებ (შეუსაბამობის მითითებით) კანდიდატს. შესწორებული საბუთები ცესკოს 2 დღეში, მაგრამ არა უგვიანეს რეგისტრაციის ბოლო დღისა უნდა დაუბრუნდეს.

8. თუ კანდიდატი დადგენილ ვადაში ვერ წარმოადგენს სრულყოფილ საკონკურსო დოკუმენტაციას, სამდივნოს გადაწყვეტილებით იგი მოიხსნება კონკურსიდან.

   9. საოლქო საარჩევნო კომისიის წევრად არ შეიძლება აირჩეს / დაინიშნოს :

   ა) პირი, რომელსაც არა აქვს მინიჭებული საარჩევნო ადმინისტრაციის მოხელის სერტიფიკატი;

ა^​1) პირი, რომელსაც საოლქო საარჩევნო კომისიის წევრად წარდგენის დღისათვის არ შესრულებია 21 წელი;

 ბ) პირი, რომელიც საქართველოს საარჩევნო კანონმდებლობის დარღვევისათვის საარჩევნო კომისიამ ან სასამართლომ გაათავისუფლა საქართველოს საარჩევნო ადმინისტრაციაში დაკავებული თანამდებობიდან, – თანამდებობიდან გათავისუფლების დღიდან 4 წლის განმავლობაში;

  გ) პირი, რომელიც საქართველოს საარჩევნო კანონმდებლობის დარღვევის გამო სასამართლოს მიერ ცნობილ იქნა ადმინისტრაციულ სამართალდამრღვევად, – სასამართლოს გადაწყვეტილების კანონიერ ძალაში შესვლიდან 4 წლის განმავლობაში;

  დ) ნასამართლევი პირი (გარდა იმ შემთხვევისა, როდესაც პირს სანქციის სახით შეფარდებული აქვს ჯარიმა);

  ე) საარჩევნო სუბიექტი/სუბიექტობის კანდიდატი და მისი წარმომადგენელი;

  ვ) დამკვირვებელი.

ზ) შესაბამის საარჩევნო კომისიაში აკრედიტებული პრესისა და მასობრივი ინფორმაციის სხვა საშუალებების წარმომადგენელი.

საქართველოს ცენტრალური საარჩევნო კომისიის 2015 წლის 23 მარტის დადგენილება №9/2015 - ვებგვერდი, 23.03.2015წ.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/2016 - ვებგვერდი, 05.01.2016წ.

საქართველოს ცენტრალური საარჩევნო კომისიის 2016 წლის 14 ივლისის დადგენილება №44 /2016 - ვებგვერდი, 15.07.2016წ.

საქართველოს ცენტრალური საარჩევნო კომისიის 2017 წლის 7 ივლისის დადგენილება №19/2017 - ვებგვერდი, 10.07.2017წ.

საქართველოს ცენტრალური საარჩევნო კომისიის 2018 წლის 1 აგვისტოს დადგენილება №34/2018 - ვებგვერდი, 02.08.2018წ.

საქართველოს ცენტრალური საარჩევნო კომისიის 2021 წლის 26 ივლისის დადგენილება №38/2021 - ვებგვერდი, 27.07.2021წ.

 

თავი IV

კონკურსის ჩატარების პროცედურა და გადაწყვეტილების მიღების წესი

    მუხლი 8. საოლქო საარჩევნო კომისიის წევრთა არჩევის წესი

1. საოლქო საარჩევნო კომისიის წევრს ცესკო ირჩევს კომისიის სხდომაზე.

2. საოლქო საარჩევნო კომისიაში ცესკოს მიერ არჩეული წევრის უფლებამოსილების ვადამდე შეწყვეტის შემთხვევაში, მის ადგილმონაცვლეს ცესკო ირჩევს 15 დღის ვადაში (ხოლო არჩევნების დანიშვნის შემდეგ – 7 დღის ვადაში).

2^​1. ხელახალი კონკურსის შემთხვევაში საოლქო საარჩევნო კომისიის წევრს ცესკო ირჩევს საკონკურსო საბუთების წარდგენის ვადის დასრულებიდან 14 დღის ვადაში (ხოლო თუ დანიშნულია არჩევნები, კონკურსის გამოცხადებიდან   7 დღის ვადაში).

3. ცესკო კანდიდატთა დაუსწრებლად წყვეტს ყოველი კანდიდატის შესაბამისობას დადგენილ მოთხოვნებთან.

4. ცესკოს უფლება აქვს საჭიროების შემთხვევაში საკუთარი ინიციატივით მოითხოვოს კანდიდატთან გასაუბრება.

5. ვაკანტურ თანამდებობაზე არჩევისას უპირატესობა ენიჭება კანდიდატს, რომელსაც გააჩნია საარჩევნო ადმინისტრაციაში მუშაობის გამოცდილება.

საქართველოს ცენტრალური საარჩევნო კომისიის 2015 წლის 23 მარტის დადგენილება №9/2015 - ვებგვერდი, 23.03.2015წ.

მუხლი 8^​1. საოლქო საარჩევნო კომისიის წევრების არჩევის პროცესის საჯაროობის ღონისძიებები

1. უფლებამოსილების ვადის გასვლის გამო, საოლქო საარჩევნო კომისიების წევრთა  შესარჩევი კონკურსის, მათი არჩევის საკითხის განხილვისა და გადაწყვეტილების მიღების პროცესს, საარჩევნო ადმინისტრაციის რეგლამენტითა და ამ მუხლით განსაზღვრული წესების დაცვით, საქართველოს ცენტრალური საარჩევნო კომისიის სხდომაზე,  საქართველოს ორგანული კანონის „საქართველოს საარჩევნო კოდექსი” მე-8 მუხლის მე-15 პუნქტით განსაზღვრულ პირთა გარდა, ასეევე შეიძლება დაესწრონ და არჩევის პროცესს დააკვირდნენ საქართველოს კანონმდებლობით დადგენილი წესით რეგისტრირებული არასამეწარმეო (არაკომერციული) იურიდიული პირები, თუ მათ გააჩნიათ ამ კონკურსის გამოცხადებამდე ჩატარებულ ბოლო საერთო არჩევნებზე (გარდა რიგგარეშე არჩევნებისა) დაკვირვების გამოცდილება.

2. ამ მუხლის პირველი პუნქტით განსზღვრულ ცესკოს სხდომასა და საოლქო საარჩევნო კომისიის წევრთა არჩევის პროცესზე დაკვირვების მიზნით, ის არასამეწარეო (არაკომერცილი) იურიდიული პირები, რომლებიც აკმაყოფილებენ ამ მუხლის პირველი პუნქტით დადგენილ პირობებს, წერილობითი განცხადებით მიმართავენ სამდივნოს, საოლქო საარჩევნო კომისიის წევრთა არჩევისათვის კანონით დადგენილ საწყის ვადამდე, 10 კალენდარული დღის განმავლობაში.

3. სამდივნო ცესკოს ვებვერდზე აქვეყნებს უფლებამოსილების ვადის გასვლის გამო გამოცხადებული კონკურსის შესახებ ინფორმაციას, კონკურსანტთა არჩევის საქართველოს ორგანული კანონის „საქართველოს საარჩევნო კოდექსი” დადგენილი თარიღებისა და დაკვირვებისათვის განცხადების წარმოდგენისათვის შესაბამისი თარიღების შესახებ.

4. საქართველოს ორგანული კანონის „საქართველოს საარჩევნო კოდექსი” მე-8 მუხლის მე-15 პუნქტით განსაზღვრული პირები (კონკურის გამართვის დროს, მათი არსებობის შემთხვევაში) უფლებამოსილების ვადის გასვლის გამო, საოლქო საარჩევნო კომისიის წევრთა კონკურსისა და მათი არჩევის საკითხების განხილვასა და გადაწყვეტილების მიღების პროცესს აკვირდებიან ცესკოს სხდომაზე, საქართველოს საარჩევნო კანონმდებლობით მათთვის მინიჭებული უფლებამოსილებების ფარგლებში და წესით.

5. ამ მუხლის მიზნებისათვის, მოწვეული ცესკოს სხდომის საკითხის განხილვას შეიძლება ერთდროულად აკვირდებოდეს არაუმეტეს 7 დამკვირვებლისა. ერთი და იგივე არასამეწარმეო (არაკომერციული) იურიდიული პირის მხოლოდ ერთ დამკვირვებელს აქვს უფლება ერთდროულად იმყოფებოდეს ამ მუხლით განსაზღვრული საკითხების განხილვის მიზნით მოწვეულ ცესკოს სხდომაზე, გარდა იმ შემთხვევისა, თუ სამდივნოს განცხადებით მიმართა მხოლოდ ერთმა ორგანიზაციამ.

6. თუ დამკვირვებელთა რაოდენობა 7-ზე მეტი აღმოჩნდა, ცესკოს სხდომის გამართვამდე 1 კალენდარული დღით ადრე, რეგისტრირებული დამკვირვებელი ორგანიზაციები შეთანხმდებიან დამსწრეთა განსაზღვრაზე და აცნობებენ სამდივნოს. შეუთანხმებლობის შემთხვევაში, ცესკოს სხდომაზე, საკითხის განხილვამდე ტარდება წილისყრა ამ დადგენილებით განსაზღვრული ოდენობის დამკვირვებელთა გამოვლენის მიზნით.

7. დამკვირვებელს ეკრძალება საოლქო საარჩევნო კომისიის წევრის არჩევის პროცესში ჩარევა. საარჩევნო კომისიისთვის არჩევის პროცესში ჩარევისა ან/და ხელის შეშლის შემთხვევაში, დამკვირვებელი დათხოვნილი იქნება ცესკოს სხდომათა დარბაზიდან, რის შესახებაც გადაწყვეტილება აღინიშნება სხდომის ოქმში.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/2016 - ვებგვერდი, 05.01.2016წ.

    მუხლი 9. კენჭისყრა

1. ცესკო საოლქო საარჩევნო კომისიის წევრებს ირჩევს სახელობითი კენჭისყრით. თითოეულ კანდიდატს ცალკე ეყრება კენჭი. არჩეულად ჩაითვლება ის კანდიდატი, რომელსაც მხარს დაუჭერს ცესკოს სრული შემადგენლობის არანაკლებ ორი მესამედი. თუ ამ კანდიდატთა რაოდენობა ასარჩევ რაოდენობაზე მეტი აღმოჩნდა, არჩეულად ჩაითვლებიან მათ შორის უკეთესი შედეგის მქონე კანდიდატები. თუ კანდიდატების მიერ მიღებულ ხმათა თანაბრობის გამო გამარჯვებული ვერ გამოვლინდა, ამ კანდიდატებს დაუყოვნებლივ ეყრებათ კენჭი მათ შორის გამარჯვებულის გამოსავლენად. თუ გამარჯვებული ისევ ვერ გამოვლინდა, იგი წილისყრით განისაზღვრება. თუ ამ პუნქტით დადგენილი წესით საოლქო საარჩევნო კომისიის წევრი ვერ აირჩა, კანდიდატებს კენჭი ხელახლა ეყრებათ. ხელახალი კენჭისყრისას არჩეულად ჩაითვლება ის კანდიდატი, რომელსაც მხარს დაუჭერს ცესკოს სრული შემადგენლობის უმრავლესობა. თუ ყველა ვაკანსია კვლავ არ შეივსო, დარჩენილ ვაკანსიაზე კონკურსი თავიდან ცხადდება.

2. ცესკოს გადაწყვეტილება ფორმდება ცესკოს განკარგულებით, რომელსაც ხელს აწერენ ცესკოს თავმჯდომარე და ცესკოს მდივანი.

საქართველოს ცენტრალური საარჩევნო კომისიის 2021 წლის 26 ივლისის დადგენილება №38/2021 - ვებგვერდი, 27.07.2021წ.

 

    მუხლი 10. კონკურსის შედეგი

1. საოლქო საარჩევნო კომისიის წევრის არჩევის შესახებ ცესკოს განკარგულებაში უნდა მიეთითოს:

ა) კომისიის წევრად არჩეული პირის სახელი და გვარი;

ბ) საოლქო საარჩევნო კომისიის დასახელება, რომლის წევრადაც იგი აირჩა.

2. ცესკოს გადაწყვეტილებას უნდა დაერთოს ამ დებულების მე-7 მუხლით გათვალისწინებული დოკუმენტაცია და არჩეული წევრის მიერ ხელმოწერილი განცხადება, რომელშიც უნდა აღინიშნოს, რომ იგი აკმაყოფილებს საქართველოს ორგანული კანონის „საქართველოს საარჩევნო კოდექსი“ მე-16 მუხლის მე-3 პუნქტით დადგენილ მოთხოვნებს.

3. საარჩევნო ადმინისტრაციის მოხელედ არჩევის შემთხვევაში პირი ვალდებულია 7 დღის ვადაში ცესკოს თავმჯდომარის სახელზე წარადგინოს:

ა) განცხადება საქართველოს ორგანული კანონის „საქართველოს საარჩევნო კოდექსი” მე-20 მუხლის მე-18 პუნქტით გათავლისწინებულ მოთხოვნებთან შესაბამისობის შესახებ;

ბ) (ამოღებულია - 11.04.2013, № 15);

გ) (ამოღებულია - 11.04.2013, № 15);

დ) ცნობა სამედიცინო-ნარკოლოგიური შემოწმების შესახებ.

4. ამ მუხლის მე-3 პუნქტის „დ” ქვეპუნქტის მოთხოვნები არ ვრცელდება ცესკოს მიერ არჩევნების პერიოდში არჩეულ საოლქო საარჩევნო კომისიის დროებით წევრებზე.

5. კონკურსის დასრულებიდან 24 საათის ვადაში ცესკო ვებგვერდის (www.cec.gov.ge) საშუალებით აქვეყნებს საოლქო საარჩევნო კომისიების არჩეულ წევრთა სიას.

საქართველოს ცენტრალური საარჩევნო კომისიის 2013 წლის 11 აპრილის დადგენილება №15 - ვებგვერდი, 12.04.2013წ.

    მუხლი 10^​1. ცესკოს მიერ არჩეული საოლქო საარჩევნო კომისიის წევრის უფლებამოსილების ვადების ათვლა

   1. ცესკოს მიერ არჩეული საოლქო საარჩევნო კომისიის წევრის უფლებამოსილების კანონით დადგენილი 5 წლიანი ვადის ათვლა იწყება, წინამორბედი კომისიის წევრის უფლებამოსილების ვადის ამოწურვის დღის მომდევნო დღიდან და სრულდება მისი უფლებამოსილების კანონით დადგენილი ვადის დასრულების  დღეს.

2. საოლქო საარჩევნო კომისიის წევრის არჩევის შესახებ ცესკოს განკარგულების ამოქმედების ვადის განსაზღვრისას, განკარგულებაში საჭიროებისამებრ  მითითებულ უნდა იქნეს ამ მუხლის პირველი პუნქტით დადგენილი წესის შესაბამისი  თარიღი.

3. საქართველოს ორგანული კანონით „საქართველოს საარჩევნო კოდექსი“ დადგენილი საქმიანობის შეზღუდვისა და სამსახურებრივი შეუთავსებლობის მოთხოვნების შესრულების, საარჩევნო კომისიის საქმიანობაში მონაწილეობის დაწყებისა და კომისიაში საქმიანობისათვის ანაზღაურების მიღების ვადა, ცესკოს მიერ არჩეული საოლქო საარჩევნო კომისიის წევრებისათვის აითვლება მათი არჩევის შესახებ ცესკოს განკარგულების ამოქმედების დღიდან.

საქართველოს ცენტრალური საარჩევნო კომისიის 2015 წლის 17 ივნისის დადგენილება №31/2015 - ვებგვერდი, 17.06.2015წ.

     მუხლი 11. ხელახალი კონკურსი

1. თუ კონკურსის შედეგად ერთ ან მეტ საოლქო საარჩვენო კომისიაში ყველა ვაკანსია არ შეივსო, კონკურსი დარჩენილ ვაკანსიაზე თავიდან ცხადდება.

2. ხელახალი კონკურსი ტარდება ამ დებულებით დადგენილი პირობებით.

    მუხლი 12. ამ დებულებით დადგენილი ვადების ათვლა

1. ამ დებულებით დადგენილი ვადების ათვლისას გამოიყენება საქართველოს ორგანული კანონის „საქართველოს საარჩევნო კოდექსი” მე-5^​ მუხლით დადგენილი ნორმები.

    მუხლი 13. დავები კონკურსთან დაკავშირებით

კონკურსთან დაკავშირებით წარმოშობილი დავა გადაწყდება საქართველოს კანონმდებლობის შესაბამისად.

საქართველოს ცენტრალური საარჩევნო კომისიის 2016 წლის 4 იანვრის დადგენილება №2/201 6 - ვებგვერდი, 05.01.2016წ.

Annotate