ქალაქ თბილისის საზღვრებში და მიმდებარე ტერიტორიაზე არსებული მწვანე ნარგავებისა და სახელმწიფო ტყის განსაკუთრებული დაცვის შესახებ

საქართველოს კანონი

ქალაქ თბილისის საზღვრებში და მიმდებარე ტერიტორიაზე არსებული მწვანე ნარგავებისა და სახელმწიფო ტყის ფონდის განსაკუთრებული დაცვის შესახებ

თავი I

ქ. თბილისის საზღვრებში და მიმდებარე ტერიტორიაზე არსებული სახელმწიფო ტყისა და სახელმწიფო ტყის ფონდის მიწების დაცვის წესი

    მუხლი 1

ქ. თბილისის საზღვრებში და მიმდებარე ტერიტორიაზე არსებული სახელმწიფო ტყისა და სახელმწიფო ტყის ფონდის მიწების პრივატიზაცია, მათთვის კატეგორიის შეცვლა და მათი იჯარით გაცემა აკრძალულია.

    მუხლი 2

ქ. თბილისის საზღვრებში და მიმდებარე ტერიტორიაზე არსებულ სახელმწიფო ტყეში და სახელმწიფო ტყის ფონდის მიწებზე აკრძალულია:

ა) ყოველგვარი მშენებლობა;

ბ) ხის ჭრა სამასალე მერქნის მიღების მიზნით, გარდა ხმელი, ხმობადი და ფუტურო საშეშე მერქნისა;

გ) პლანტაციური მეურნეობის წარმოება;

დ) სპეციალური და მიჩენის მიზნით სარგებლობის (სპეციალური დანიშნულების მიწებით სარგებლობის, წიაღის მოპოვების და სხვა) ნებართვის გაცემა;

ე) სამონადირეო მეურნეობის მოწყობის მიზნით სარგებლობის ნებართვის გაცემა.

თავი II

ქ. თბილისის საზღვრებში და მიმდებარე ტერიტორიაზე არსებული მწვანე ნარგავების დაზიანების, განადგურებისა და ამოძირკვის შედეგად გარემოსთვის მიყენებული ზიანის ანაზღაურების წესი

    მუხლი 3

ამ კანონით დგინდება ქ. თბილისის საზღვრებში და მიმდებარე ტერიტორიაზე არსებული მწვანე ნარგავების დაზიანების, განადგურებისა და ამოძირკვის, აგრეთვე მათი განზრახ დაზიანებისა და განადგურების შედეგად გარემოსთვის მიყენებული ზიანის ანაზღაურების წესი და ოდენობა.

    მუხლი 4

1. მწვანე ნარგავის სახეობისა და ხის (ბუჩქის, ხვიარა მცენარის) დიამეტრის მიხედვით განისაზღვრება მისი აღდგენითი ღირებულება ლარებში.

2. ხის (ბუჩქის, ხვიარა მცენარის) დიამეტრი იზომება ფესვის ყელიდან 10 სმ-ის სიმაღლეზე.

3. აღდგენითი ღირებულებები დგინდება:

ა) ხე-მცენარეთა ფოთლოვანი, წიწვოვანი და ხილ-კენკროვანი სახეობებისათვის;

ბ) ბუჩქებისა და ხვიარა მცენარეებისათვის.

    მუხლი 5

1. მაღალი ღირებულების ჯგუფის ფოთლოვან სახეობათა ხე-მცენარეებისათვის – მუხა (ყველა სახეობის), კავკასიური აკაცია, კაკალი, ქართული ნეკერჩხალი, კეთილშობილი დაფნა, წაბლი, წიფელი, საკმლის ხე, ჩვეულებრივი და კოლხური ჯონჯოლი, ქართული თხილი, შიშველი აკაკი, თუთა ნამყენი, თელა დუმა, თელა ნუშა, ქაცვი – აღდგენითი ღირებულებები განისაზღვრება 1-ლი ცხრილის შესაბამისად:

ცხრილი 1

ხის დიამეტრი სანტიმეტრებში	აღდგენითი ღირებულება ლარებში
4 სმ-მდე, ჩათვლით	17
4,1 – 8სმ	32
8,1 – 12 სმ	47
12,1 – 16 სმ	62
16,1 – 20 სმ	77
20,1 – 24 სმ	92
24,1 – 28 სმ	107
28,1 – 32სმ	122
32,1 – 36 სმ	137
36,1 – 40 სმ	152
40,1 – 44 სმ	167
44,1 – 48სმ	182
48,1 – 52სმ	197
52,1 – 56 სმ	212
56 სმ-ის ზევით	235

2. დაბალი ღირებულების ჯგუფის ფოთლოვან სახეობათა ხე-მცენარეებისათვის – ჭადარი, ცხენისწაბლი, იფანი, ცაცხვი, ნეკერჩხალი (გარდა ქართულისა), რცხილა, ჯაგრცხილა, აკაცია, აბრეშუმა აკაცია, სოფორი, გლედიჩია, არდავანი, არყის ხე, საპნის ხე, კატალპა, კუნელი – აღდგენითი ღირებულებები განისაზღვრება მე-2 ცხრილის შესაბამისად:

ცხრილი 2

ხის დიამეტრი სანტიმეტრებში	აღდგენითი ღირებულება ლარებში
4 სმ-მდე, ჩათვლით	12
4,1 – 8 სმ	22
8,1 – 12 სმ	35
12,1 – 16 სმ	45
16,1 – 20 სმ	55
20,1 – 24 სმ	65
24,1 – 28 სმ	75
28,1 – 32 სმ	90
32,1 – 36 სმ	110
36,1 – 40სმ	130
40,1 –44 სმ	145
44,1 – 48 სმ	160
48,1 – 52 სმ	170
52,1 – 56 სმ	180
56 სმ-ის ზევით	200

3. წიწვოვან სახეობათა ხე-მცენარეებისათვის – უთხოვარი, კედარი (ყველა სახეობის), ფიჭვი (ყველა სახეობის), კვიპაროსი (ყველა სახეობის), ცრუცუგა, სოჭი, ნაძვი (ყველა სახეობის) – აღდგენითი ღირებულებები განისაზღვრება მე-3 ცხრილის შესაბამისად:

ცხრილი 3

ხის დიამეტრი სანტიმეტრებში	აღდგენითი ღირებულება ლარებში
4 სმ-მდე, ჩათვლით	15
4,1 – 8 სმ	30
8,1 – 12 სმ	45
12,1 – 16 სმ	60
16,1 – 20 სმ	75
20,1 – 24 სმ	90
24,1 – 28 სმ	105
28,1 – 32 სმ	120
32,1 – 36 სმ	135
36,1 – 40 სმ	150
40,1 – 44 სმ	165
44,1 – 48 სმ	180
48,1 – 52 სმ	195
52,1 – 56 სმ	210
56 სმ-ის ზევით	225

4. ხილ-კენკროვან სახეობათა ხე-მცენარეებისათვის – მსხალი, ვაშლი, ბალი, ატამი, გარგარი, ალუბალი, ქლიავი, ლეღვი, შინდი, ტყემალი – აღდგენითი ღირებულებები განისაზღვრება მე-4 ცხრილის შესაბამისად:

ცხრილი 4

ხის დიამეტრი სანტიმეტრებში	აღდგენითი ღირებულება ლარებში
4 სმ-მდე, ჩათვლით	6
4,1 – 8 სმ	13
8,1 – 12 სმ	20
12,1 – 16 სმ	27
16,1 – 20 სმ	34
20,1 – 24 სმ	41
24,1 – 28 სმ	48
28,1 – 32 სმ	55

5. ბუჩქებისა და ხვიარა მცენარეებისათვის – ღვია, ტუია, წყავი, ჭყორი, შტამპიანი და მარადმწვანე ლუგუსტრუმი, მაპონია, მარადმწვანე კოწახური, იუკა დიდებული – აღდგენითი ღირებულებები განისაზღვრება მე-5 ცხრილის შესაბამისად:

ცხრილი 5

ბუჩქის ან ხვიარა მცენარის დიამეტრი სანტიმეტრებში	აღდგენითი ღირებულება ლარებში
4 სმ-მდე, ჩათვლით	8
4,1 – 8 სმ	17
8,1 – 12 სმ	32
12,1 – 16 სმ	42
16,1 – 20 სმ	50
20 სმ-ის ზევით	55

6. ამ მუხლით განსაზღვრული ჯგუფებისადმი სხვა ხე-მცენარეების, ბუჩქებისა და ხვიარა მცენარეების მიკუთვნებას ახორციელებს და ამტკიცებს საქართველოს გარემოსა და ბუნებრივი რესურსების დაცვის სამინისტრო.

    მუხლი 6

1. ქ. თბილისის საზღვრებში და მიმდებარე ტერიტორიაზე არსებული მწვანე ნარგავები მათი ადგილმდებარეობის მნიშვნელობიდან გამომდინარე იყოფა სამ კატეგორიად.

2. პირველ კატეგორიას განეკუთვნება:

ა) ბაღების, პარკებისა და სკვერების ნარგავები;

ბ) ქალაქის ისტორიულ ნაწილში არსებული ნარგავები;

გ) პროსპექტების, გზატკეცილების, ცალკეული მაგისტრალებისა და ქუჩების ნარგავები;

დ) ნარგავები, რომლებსაც განსაკუთრებული მნიშვნელობა აქვთ როგორც ნიადაგდამცავებსა და წყალმარეგულირებლებს.

3. მეორე კატეგორიას განეკუთვნება საბავშვო ბაღების, სკოლების, საავადმყოფოებისა და ფაბრიკა-ქარხნების ტერიტორიებზე არსებული სპეციალური დანიშნულებისა და შეზღუდული სარგებლობის ნარგავები.

4. მესამე კატეგორიას განეკუთვნება ნარგავები, რომლებიც არ შედის პირველ და მეორე კატეგორიებში.

    მუხლი 7

1. პირველი, მეორე და მესამე კატეგორიების მიხედვით წესდება შესაბამისი შემასწორებელი კოეფიციენტები 2, 1,5 და 1, რომლებზედაც მრავლდება აღდგენითი ღირებულების თანხა და გამოითვლება მწვანე ნარგავების დაზიანების, განადგურებისა და ამოძირკვის შედეგად გარემოსთვის მიყენებული ზიანის ოდენობა.

2. ნარგავების უნებართვო განადგურების შემთხვევაში ზიანის ოდენობა განისაზღვრება აღდგენითი ღირებულების თანხის შესაბამის შემასწორებელ კოეფიციენტზე ნამრავლის ორმაგი ოდენობით.

3. ნარგავების უნებართვო განადგურებად ითვლება მათი განზრახ განადგურება ან ისეთი დაზიანება, რომელიც იწვევს ნარგავების ხმობას.

4. წიწვოვან სახეობათა ხე-მცენარეების ისეთი დაზიანების შემთხვევაში, რომელიც აქვეითებს მათ დეკორატიულ ღირსებას და იწვევს ხე-მცენარეების შემდგომი ზრდის შეჩერებას, ზიანის ოდენობა შეესაბამება აღდგენითი ღირებულების თანხის 50%-ს.

5. საკუთარ საკარმიდამო ნაკვეთებში ხე-მცენარეების (გარდა ხილ-კენკროვანი სახეობებისა) უნებართვო განადგურების შემთხვევაში ზიანის ოდენობა განისაზღვრება აღდგენითი ღირებულების თანხის მესამე კატეგორიისათვის დაწესებულ შემასწორებელ კოეფიციენტზე ნამრავლის ოდენობით.

    მუხლი 8

1. ამ კანონის მიზნებისათვის ქ. თბილისის საზღვრებად ითვლება ქ. თბილისის პერსპექტიული განვითარების მოქმედი გენერალური გეგმის შესაბამისად დადგენილი საზღვრები.

2. ქ. თბილისის მიმდებარე ტერიტორიად ითვლება ქ. თბილისის ადმინისტრაციული საზღვრიდან შვიდკილომეტრიანი ზოლი.

თავი III

გარდამავალი და დასკვნითი დებულებანი

    მუხლი 9

საქართველოს გარემოსა და ბუნებრივი რესურსების დაცვის და ურბანიზაციისა და მშენებლობის სამინისტროებმა, სატყეო მეურნეობისა და მიწის მართვის სახელმწიფო დეპარტამენტებმა შეიმუშაონ და საქართველოს პარლამენტს 1 წლის ვადაში წარუდგინონ საკანონმდებლო წინადადებები ტყის დაცვისა და განაშენიანების კომპლექსურ ღონისძიებათა შესახებ.

    მუხლი 10

ეს კანონი ამოქმედდეს 2000 წლის 1 დეკემბრიდან.

საქართველოს პრეზიდენტი ედუარდ შევარდნაძე

თბილისი,

2000 წლის 10 ნოემბერი.

№594-Iს