პოლიციის ატაშეს, მეკავშირე ოფიცრისა და მათი აპარატების საქმიანობის წესის დამტკიცების თაობაზე

1. პოლიციის ატაშეს, მეკავშირე ოფიცრისა და მათი აპარატების საქმიანობის  წესი განსაზღვრავს პოლიციის ატაშესა და მეკავშირე ოფიცრის დანიშვნის, დაქვემდებარების, უფლებამოსილებისა და ფინანსური უზრუნველყოფის, ასევე მათ აპარატებთან დაკავშირებულ საკითხებს.

2. პოლიციის ატაშე და მეკავშირე ოფიცერი თავიანთი საქმიანობისას ხელმძღვანელობენ საქართველოს კონსტიტუციით, საქართველოს საერთაშორისო ხელშეკრულებებით, საერთაშორისო სამართლის საყოველთაოდ აღიარებული პრინციპებითა და ნორმებით, საქართველოს საკანონმდებლო და კანონქვემდებარე ნორმატიული აქტებით, ვალდებული არიან, დაიცვან ადგილსამყოფელი სახელმწიფოს კანონმდებლობა.

მუხლი 2. ტერმინთა განმარტება

ამ წესში გამოყენებულ ტერმინებს აქვს შემდეგი მნიშვნელობა:

ა) პოლიციის ატაშე – საქართველოს შინაგან საქმეთა სამინისტროს (შემდგომში - სამინისტრო) მიერ საქართველოს საგარეო საქმეთა სამინისტროსთან შეთანხმებით საზღვარგარეთის ქვეყანაში აკრედიტებული, საქართველოს დიპლომატიურ წარმომადგენლობაში მივლინებული პირი;

ბ) მეკავშირე ოფიცერი – სამინისტროს მიერ საქართველოს საგარეო საქმეთა სამინისტროსთან შეთანხმებით საერთაშორისო ორგანიზაციის შესაბამის სტრუქტურაში მივლინებული პირი;

გ)  დიპლომატიური წარმომადგენლობა – საქართველოს საგარეო საქმეთა სამინისტროს ქვედანაყოფი საზღვარგარეთ, რომელიც საერთაშორისო ორგანიზაციასა და ადგილსამყოფელ სახელმწიფოსთან დიპლომატიური და საკონსულო ურთიერთობებისას წარმოადგენს საქართველოს;

დ) (ამოღებულია - 27.02.2025, №17);

ე) საქართველოს შინაგან საქმეთა სამინისტროს საერთაშორისო ურთიერთობების დეპარტამენტი (შემდგომ – საერთაშორისო ურთიერთობების დეპარტამენტი) – პოლიციის ატაშეს, მეკავშირე ოფიცრის (გარდა ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრებისა) და მათი აპარატების საქმიანობის კოორდინაციაზე პასუხისმგებელი სტრუქტურული ქვედანაყოფი;

ვ) საქართველოს შინაგან საქმეთა სამინისტროს მმართველობის სფეროში შემავალი სახელმწიფო საქვეუწყებო დაწესებულება – საქართველოს სასაზღვრო პოლიცია (შემდგომ – საქართველოს სასაზღვრო პოლიცია) – ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრის საქმიანობის კოორდინაციაზე პასუხისმგებელი დაწესებულება.

მუხლი 3. პოლიციის ატაშესა და მეკავშირე ოფიცრის დანიშვნა/დაქვემდებარება

1.საქართველოს შინაგან საქმეთა მინისტრმა საქართველოს საგარეო საქმეთა სამინისტროსთან შეთანხმებით დიპლომატიურ წარმომადგენლობაში სამუშაოდ შეიძლება მიავლინოს პოლიციის ატაშე, ხოლო საერთაშორისო ორგანიზაციის შესაბამის სტრუქტურაში – მეკავშირე ოფიცერი, რომლებიც შედიან დიპლომატიური წარმომადგენლობის პერსონალის შემადგენლობაში და სამართალდამცავ სფეროში წარმოადგენენ საქართველოს თავიანთი კომპეტენციის ფარგლებში.

2. პოლიციის ატაშე და მეკავშირე ოფიცერი ინიშნებიან საქართველოს შინაგან საქმეთა მინისტრის ბრძანებით, სამინისტროს საერთაშორისო ურთიერთობების დეპარტამენტის/საქართველოს სასაზღვრო პოლიციის ხელმძღვანელის წარდგინების საფუძველზე.

3. პოლიციის ატაშესა და მეკავშირე ოფიცრის თანამდებობებზე საქართველოს შინაგან საქმეთა მინისტრი საქართველოს საგარეო საქმეთა სამინისტროსთან შეთანხმებით, საქართველოს კანონმდებლობით დადგენილი წესით ნიშნავს უმაღლესი განათლებისა და სათანადო კვალიფიკაციის მქონე პირებს, რომლებიც ფლობენ საქართველოს სახელმწიფო ენასა და უცხოურ ენას.

4. ადგილსამყოფელ სახელმწიფოსთან შეთანხმებით პოლიციის ატაშე შეიძლება აკრედიტებულ იქნეს ორ ან ორზე მეტ სახელმწიფოში.

5. პოლიციის ატაშე და მეკავშირე ოფიცერი იმყოფებიან დიპლომატიური წარმომადგენლობის ხელმძღვანელის ოპერატიულ დაქვემდებარებაში, კომპეტენციის ფარგლებში – საქართველოს შინაგან საქმეთა მინისტრის ადმინისტრაციულ დაქვემდებარებაში.

5^​​1. ბელგიის სამეფოში მივლინებულ პოლიციის ატაშეს შეიძლება დაეკისროს ჩრდილოატლანტიკური ხელშეკრულების ორგანიზაციის მეკავშირე ოფიცრის უფლებამოსილებები.

6. (ამოღებულია - 27.02.2025, №17);

7. პოლიციის ატაშესა და მეკავშირე ოფიცრისათვის (გარდა ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრისა) შესაბამისი დავალებებისა და მითითებების გაცემასა და კოორდინაციაზე უფლებამოსილი პირები არიან:

ა) საქართველოს შინაგან საქმეთა მინისტრი და საერთაშორისო ურთიერთობების დეპარტამენტის კურატორი მინისტრის მოადგილე ან/და საქართველოს შინაგან საქმეთა მინისტრის მიერ უფლებამოსილი სხვა თანამდებობის პირი;

ბ) დიპლომატიური წარმომადგენლობის ხელმძღვანელი ოპერატიული დაქვემდებარების ფარგლებში;

გ) საერთაშორისო ურთიერთობების დეპარტამენტის ხელმძღვანელი პირები.

8. ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრისთვის შესაბამისი დავალებებისა და მითითებების გაცემასა და კოორდინაციაზე უფლებამოსილი პირები არიან:

ა) საქართველოს შინაგან საქმეთა მინისტრი და საქართველოს სასაზღვრო პოლიციის უფროსი ან/და საქართველოს შინაგან საქმეთა მინისტრის მიერ უფლებამოსილი სხვა თანამდებობის პირი;

ბ) დიპლომატიური წარმომადგენლობის ხელმძღვანელი ოპერატიული დაქვემდებარების ფარგლებში;

გ) საქართველოს სასაზღვრო პოლიციის სანაპირო დაცვის დეპარტამენტის დირექტორი.

მუხლი 4. პოლიციის ატაშესა და მეკავშირე ოფიცრის უფლებამოსილება

პოლიციის ატაშესა და მეკავშირე ოფიცრის (გარდა ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრისა) უფლებამოსილებაა:

ა)შესაბამის ქვეყნებსა და საერთაშორისო ორგანიზაციებში საქართველოს წარმომადგენლობა სამართალდაცვითი კუთხით;

ბ)საქართველოსა და შესაბამის ადგილსამყოფელ სახელმწიფოს სამართალდამცავ უწყებებს/საერთაშორისო ორგანიზაციებს შორის  ურთიერთობების დამყარება და თანამშრომლობის განმტკიცებისათვის ხელშეწყობა;

გ)რეკომენდაციების მომზადება შესაბამისი ადგილსამყოფელი სახელმწიფოს სამართალდამცავ უწყებებთან/საერთაშორისო ორგანიზაციებთან სამართალდაცვით სფეროში თანამშრომლობის ახალი სფეროების განსაზღვრის მიზნით;

დ) კომპეტენციის ფარგლებში სამინისტროს ინტერესების წარმოდგენა და დაცვა;

ე) სამართალდაცვით სფეროში ურთიერთანამშრომლობის საკითხებთან დაკავშირებით ამ წესის მე-3 მუხლის მე-7 პუნქტებით განსაზღვრული სამინისტროს უფლებამოსილი პირებისგან მიღებული დავალებებისა და მითითებების შესრულება;

ვ) მათი საქმიანობის შესახებ საქართველოს შინაგან საქმეთა მინისტრისა და საერთაშორისო ურთიერთობების დეპარტამენტისათვის ანგარიშის წარდგენა;

ვ^​​1) (ამოღებულია - 27.02.2025, №17);

ზ) ადგილსამყოფელ სახელმწიფოში/საერთაშორისო ორგანიზაციაში აკრედიტებულ სამართალდამცავ-დიპლომატიურ კორპუსთან თანამშრომლობა;

თ) ადგილსამყოფელი სახელმწიფოს/საერთაშორისო ორგანიზაციის სამართალდაცვითი სფეროს შესწავლა, შესაბამისი ღია საინფორმაციო-ანალიტიკური მასალების მოპოვება, დამუშავება და საერთაშორისო ურთიერთობების დეპარტამენტის ინფორმირება, გასატარებელი ღონისძიებების შესახებ რეკომენდაციების მიწოდება, აგრეთვე შესაბამისი კონსულტაციების წარმართვა;

ი) ადგილსამყოფელ სახელმწიფოში საქართველოს დიპლომატიური წარმომადგენლობის ხელმძღვანელისთვის სამართალდაცვით საკითხებში ხელშეწყობა; 

კ) ადგილსამყოფელ სახელმწიფოში/საერთაშორისო ორგანიზაციაში სამინისტროს წარმომადგენელთა ვიზიტების მომზადებასა და განხორციელებაში  მონაწილეობა (საინფორმაციო-ანალიტიკური მასალების, განსახილველ საკითხთა შესაძლო თემატიკისა და რეკომენდაციების მომზადება) და საპროტოკოლო უზრუნველყოფა (ვიზიტის პროგრამა, შეხვედრები);

ლ) ადგილსამყოფელ სახელმწიფოში/საერთაშორისო ორგანიზაციაში სამსახურებრივი მივლინებით მყოფი სამინისტროს მოსამსახურეებისათვის კოორდინაციის გაწევა და თავისი კომპეტენციის ფარგლებში დახმარების აღმოჩენა;

მ) ადგილსამყოფელ სახელმწიფოში/საერთაშორისო ორგანიზაციაში სწავლების მიზნით მივლინებული სამინისტროს მოსამსახურეების მონიტორინგი და მათ წინაშე წამოჭრილი საკითხების გადაწყვეტაში ხელშეწყობა;

ნ) სამართალდაცვით სფეროში ოფიციალურ მიღებათა ორგანიზება;

ო) პოლიციის ატაშესა და მეკავშირე ოფიცრის აპარატების მოსამსახურის მიერ სამსახურებრივი მოვალეობების შესრულების ზედამხედველობა, მათთვის დავალებებისა და მითითებების მიცემა;

პ) კომპეტენციის ფარგლებში სამინისტროს სახელით სამართლებრივ დოკუმენტებზე ხელმოწერა;

ჟ) სამართალდაცვით სფეროში შესაბამის შეხვედრებში, სემინარებსა და კონფერენციებში მონაწილეობა;

რ) შესაბამისი უწყებების მიწვევით მიღებებსა და სხვა ოფიციალურ ღონისძიებებზე დასწრება;

ს)საქართველოს პოლიციის საიუბილეო დღესასწაულებთან დაკავშირებით მიღებების მოწყობა, საპროტოკოლო ღონისძიებების უზრუნველყოფა;

ტ) სამსახურებრივი და ფინანსური ანგარიშვალდებულების შესრულება საქართველოს კანონმდებლობის შესაბამისად;

უ) საქართველოს კანონმდებლობით  განსაზღვრული სხვა უფლება-მოვალეობის განხორციელება.

მუხლი 4^​1. ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრის უფლებამოსილება

ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრის უფლებამოსილებაა:

ა) საქართველოს შინაგან საქმეთა სამინისტროსა და ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბს შორის ხელმოწერილი ურთიერთგაგების შესახებ ტაქტიკური მემორანდუმის ფარგლებში ჩრდილოატლანტიკური ხელშეკრულების ორგანიზაციის საზღვაო უსაფრთხოების ოპერაციაში „ზღვის მცველი“ მონაწილეობის მიღება და საქართველოს სასაზღვრო პოლიციის სანაპირო დაცვის დეპარტამენტის ჩართულობის ხელშეწყობა აღნიშნული ოპერაციის მხარდასაჭერად;

ბ) ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბსა და საქართველოს შინაგან საქმეთა სამინისტროს შესაბამის სტრუქტურულ ერთეულებთან გეგმიური და საიდუმლო ინფორმაციის დადგენილი წესითა და საშუალებებით მიწოდების უზრუნველყოფა;

გ) კომპეტენციის ფარგლებში საქართველოს სასაზღვრო პოლიციის ინტერესების წარმოდგენა ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში;

დ) ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბის ხელმძღვანელის მოთხოვნის საფუძველზე სხვა ოფიციალური დავალებების შესრულებაში ჩართვა, თუკი ასეთი დავალებები ხელს არ შეუშლის მასზე დაკისრებული ძირითადი მოვალეობების შესრულებას და არ ეწინააღმდეგება საქართველოს კანონმდებლობას;

ე) საკუთარი საქმიანობის შესახებ საქართველოს შინაგან საქმეთა მინისტრისა და საქართველოს სასაზღვრო პოლიციისთვის ანგარიშის წარდგენა;

ვ) სამართალდაცვით და უსაფრთხოების სფეროში ურთიერთთანამშრომლობის საკითხებთან დაკავშირებით ამ წესის მე-3 მუხლის მე-8 პუნქტით განსაზღვრული უფლებამოსილი პირებისგან მიღებული დავალებებისა და მითითებების შესრულება;

ზ) დიდ ბრიტანეთში/ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში აკრედიტებულ დიპლომატიურ კორპუსთან თანამშრომლობა;

თ) დიდ ბრიტანეთში/ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში სამსახურებრივი მივლინებით მყოფ სამინისტროს წარმომადგენელთათვის კოორდინაციის გაწევა და თავისი კომპეტენციის ფარგლებში დახმარების აღმოჩენა;

ი) დიდ ბრიტანეთში/ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში სწავლების მიზნით მივლინებული საქართველოს სასაზღვრო პოლიციის მოსამსახურეების წინაშე წამოჭრილი საკითხების გადაწყვეტაში ხელშეწყობა;

კ) შესაბამისი უწყებების მიწვევით მიღებებსა და სხვა ოფიციალურ ღონისძიებებზე დასწრება;

ლ) სამსახურებრივი და ფინანსური ანგარიშვალდებულების შესრულება საქართველოს კანონმდებლობის შესაბამისად;

მ) საქართველოს კანონმდებლობით განსაზღვრული სხვა უფლება-მოვალეობის განხორციელება.

საქართველოს შინაგან საქმეთა მინისტრის 2023 წლის 25 მაისის ბრძანება №30 - ვებგვერდი, 25.05.2023წ.

მუხლი 5. პოლიციის ატაშესა და მეკავშირე ოფიცრის აპარატები

1.ადგილსამყოფელ სახელმწიფოსთან/საერთაშორისო ორგანიზაციასთან შეთანხმებით, საქართველოს შინაგან საქმეთა მინისტრის ბრძანებით ადგილსამყოფელ სახელმწიფოში შეიძლება შეიქმნას პოლიციის ატაშეს აპარატი, ხოლო საერთაშორისო ორგანიზაციაში - მეკავშირე ოფიცრის აპარატი, რომლებიც არ წარმოადგენს საზღვარგარეთ საქართველოს დიპლომატიური წარმომადგენლობის/საკონსულო დაწესებულების შემადგენელ ნაწილს.

2. პოლიციის ატაშეს აპარატს ხელმძღვანელობს პოლიციის ატაშე, ხოლო მეკავშირე ოფიცრის  აპარატს -  მეკავშირე ოფიცერი.

3. პოლიციის ატაშეს, მეკავშირე ოფიცრის აპარატების სტრუქტურასა და საშტატო განრიგს განსაზღვრავს საქართველოს შინაგან საქმეთა მინისტრი საერთაშორისო ურთიერთობების დეპარტამენტის ხელმძღვანელის წარდგინებით.

4. პოლიციის ატაშეს/მეკავშირე ოფიცერს შეიძლება ჰყავდეს დიპლომატიური სტატუსის არმქონე პოლიციის ატაშეს მოადგილე/უმცროსი მეკავშირე ოფიცერი, რომელიც:

ა) უფლებამოსილების ფარგლებში პოლიციის ატაშესთან/მეკავშირე ოფიცერთან შეთანხმებით ხელს აწერს პოლიციის ატაშეს, მეკავშირე ოფიცრის აპარატების მიერ მომზადებულ დოკუმენტებს;

ბ) აკონტროლებს აპარატის საქმიანობის მიმდინარეობასა და შედეგებს;

გ) უზრუნველყოფს აპარატის ეფექტიან ფუნქციონირებას;

დ) აპარატის ხელმძღვანელის დროებით არყოფნის შემთხვევაში ასრულებს მის მოვალეობებს;

ე) ახორციელებს პოლიციის ატაშესა და მეკავშირე ოფიცრის მიერ განსაზღვრული სხვა დავალებების შესრულებას.

საქართველოს შინაგან საქმეთა მინისტრის 2025 წლის 27 თებერვლის ბრძანება №17 - ვებგვერდი, 28.02.2025წ.

მუხლი 6. როტაცია და უფლებამოსილების შეწყვეტა

1. პოლიციის ატაშე, მეკავშირე ოფიცერი და მათი აპარატების უმცროსი დიპლომატიური თანამდებობის პირები წარიგზავნებიან ადგილსამყოფელ სახელმწიფოში/საერთაშორისო ორგანიზაციაში როტაციის წესით, საქართველოს კანონმდებლობით დადგენილი წესით.

2. საქართველოს შინაგან საქმეთა მინისტრი უფლებამოსილია დიპლომატიურ წარმომადგენლობაში როტაციის წესით სამუშაო მივლინებით წარგზავნილ პოლიციის ატაშეს, ხოლო საერთაშორისო ორგანიზაციის შესაბამის სტრუქტურაში – მეკავშირე ოფიცერს, აგრეთვე მათი აპარატების თანამდებობის პირებს როტაციის წესით სამუშაო მივლინების ვადა საჭიროების შემთხვევაში, საქართველოს საგარეო საქმეთა სამინისტროსთან შეთანხმებით 6 თვემდე გაუგრძელოს.

3. როტაციის წესით სამუშაო მივლინების ვადაზე ადრე შეწყვეტა და მოსამსახურის ვადაზე ადრე გამოწვევა შეიძლება განხორციელდეს საქართველოს შინაგან საქმეთა მინისტრის ბრძანებით, საერთაშორისო ურთიერთობების დეპარტამენტის/საქართველოს სასაზღვრო პოლიციის ხელმძღვანელის წარდგინებით, საქართველოს კანონმდებლობით დადგენილი წესით.

4. საზღვარგარეთ საქართველოს დიპლომატიურ წარმომადგენლობებსა და საერთაშორისო ორგანიზაციებში მივლინებული პოლიციის ატაშეების, მეკავშირე ოფიცრებისა და მათი აპარატების თანამდებობის პირთა როტაციის წესით სამუშაო მივლინების ვადაზე ადრე შეწყვეტის (მათ შორის, სამსახურიდან დათხოვნის/გათავისუფლების გამო მივლინების შეწყვეტისას) ან სამუშაო მივლინების ვადის გასვლის გამო გამოწვევის შემთხვევაში, გამოწვევასთან დაკავშირებული ადმინისტრაციულ-ორგანიზაციული საკითხების დარეგულირების მიზნით, მოსამსახურის გამოწვევა შესაძლებელია მოსამსახურის მივლინების ვადაზე ადრე შეწყვეტის ან მივლინების ვადის ამოწურვის თარიღიდან არა უმეტეს 20 კალენდარული დღის ვადაში, საქართველოს შინაგან საქმეთა მინისტრის ინდივიდუალური ადმინისტრაციულ-სამართლებრივი აქტის შესაბამისად.

5. როტაციის წესით სამუშაო მივლინების ვადის გასვლის ან ვადამდე გამოწვევის შემთხვევაში, თუ გამოწვევა არ უკავშირდება თანამდებობის პირის მიერ მოვალეობათა არაჯეროვნად შესრულებას, თანამდებობის პირი ინიშნება სამინისტროში არსებულ ვაკანტურ თანამდებობაზე, ხოლო შესაბამისი ვაკანსიის არარსებობის შემთხვევაში, მისივე თანხმობით ირიცხება სამინისტროს კადრების განკარგულებაში.

6. დაუშვებელია როტაციის წესით სამუშაო მივლინების ვადის გასვლის შემდეგ პირის იმავე დიპლომატიურ წარმომადგენლობაში ან საკონსულო დაწესებულებაში იმავე ან სხვა თანამდებობაზე დანიშვნა 1 წლის განმავლობაში.

7. როტაციის წესით სამუშაო მივლინების ვადის გასვლის შემდეგ ან როტაციის წესით სამუშაო მივლინების ვადაზე ადრე შეწყვეტის შემთხვევაში, საქართველოს შინაგან საქმეთა მინისტრი, საჭიროების შემთხვევაში, უფლებამოსილია პოლიციის ატაშე, მეკავშირე ოფიცერი და მათი აპარატების უმცროსი დიპლომატიური თანამდებობის პირები საქართველოში დაბრუნების გარეშე როტაციის წესით სამუშაო მივლინებით წარგზავნოს სხვა სახელმწიფოში.

8. ზედიზედ ორჯერ როტაციის წესით სამუშაო მივლინებიდან გამოწვეულმა მოსამსახურემ მომდევნო როტაციის წესით სამუშაო მივლინებამდე სამინისტროს სისტემაში უნდა იმუშაოს არანაკლებ ერთი წელი.

9. ამ მუხლის მე-8 პუნქტით გათვალისწინებულ ვადაში ჩაითვლება როტაციის წესით სამუშაო მივლინების ვადის ამოწურვის შემდეგ მოსამსახურის კადრების განკარგულებაში ყოფნის დრო.

10. დაუშვებელია მოსამსახურის როტაციის წესით სამუშაოდ მივლინება ზედიზედ სამჯერ.

11. როტაციის წესით სამუშაო მივლინებაში წარგზავნილი მოსამსახურეებისა და მათი ოჯახის წევრების დიპლომატიური სტატუსი განისაზღვრება საქართველოს საერთაშორისო ხელშეკრულებებისა და შეთანხმებების შესაბამისად.

მუხლი 7. პოლიციის ატაშეს, მეკავშირე ოფიცრის აპარატების ადმინისტრაციულ-ტექნიკური პერსონალი

საქართველოს შინაგან საქმეთა მინისტრთან შეთანხმებით, საერთაშორისო ურთიერთობების დეპარტამენტის ხელმძღვანელის მიერ პოლიციის ატაშეს/მეკავშირე ოფიცრის აპარატში არადიპლომატიურ თანამდებობაზე შეიძლება დანიშნულ ან ხელშეკრულების საფუძველზე სამუშაოდ მიღებულ იქნენ შესაბამისი კვალიფიკაციის მქონე პირები (ადმინისტრაციულ-ტექნიკური პერსონალი).

საქართველოს შინაგან საქმეთა მინისტრის 2025 წლის 27 თებერვლის ბრძანება №17 - ვებგვერდი, 28.02.2025წ.

მუხლი 8. პოლიციის ატაშეს, მეკავშირე ოფიცრისა და მათი აპარატების  ფინანსური უზრუნველყოფა

1. პოლიციის ატაშეს, მეკავშირე ოფიცრისა და მათი აპარატების მოსამსახურეთა მატერიალურ-ტექნიკურ და ფინანსურ უზრუნველყოფას ახორციელებს სამინისტრო, ხოლო ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრისას – საქართველოს სასაზღვრო პოლიცია საქართველოს კანონმდებლობით დადგენილი წესით.

2. პოლიციის ატაშეს, მეკავშირე ოფიცრისა და მათი აპარატების მოსამსახურეთა თანამდებობრივი სარგოები, სამივლინებო და აპარატის შენახვის ხარჯები, აგრეთვე პოლიციის ატაშეს, მეკავშირე ოფიცრის, მათი აპარატების მოსამსახურეთა და ოჯახის წევრთა პირველადი საყოფაცხოვრებო მოწყობის მიზნით ანაზღაურებადი ერთჯერადი თანხები განისაზღვრება საქართველოს შინაგან საქმეთა მინისტრის ბრძანებით.

3. პოლიციის ატაშეს, მეკავშირე ოფიცრისა და მათი აპარატების მოსამსახურეთა სოციალური დაცვის გარანტიები განისაზღვრება „დიპლომატიური სამსახურის შესახებ“ საქართველოს კანონმდებლობით დადგენილი წესით.

საქართველოს შინაგან საქმეთა მინისტრის 2023 წლის 25 მაისის ბრძანება №30 - ვებგვერდი, 25.05.2023წ.

მუხლი 8^​1. დამატებითი ღონისძიებები

1. პოლიციის ატაშესა და მეკავშირე ოფიცრის სამუშაო მივლინების ვადაზე ადრე შეწყვეტის, სამუშაო მივლინების ვადის გასვლის გამო გამოწვევის ან მათ მიერ მოვალეობის შესრულების შეუძლებლობის შემთხვევაში უფლებამონაცვლე პოლიციის ატაშესა და მეკავშირე ოფიცრის წარგზავნამდე, მათ სარგებლობაში არსებული ავტოსატრანსპორტო საშუალება დროებით სარგებლობაში გადაეცემა იმავე ქვეყანაში მყოფ საქართველოს დიპლომატიურ წარმომადგენლობას.

2. პოლიციის ატაშე და მეკავშირე ოფიცერი ვალდებულია, ამ მუხლის პირველი პუნქტით გათვალისწინებული გარემოების წარმოქმნისთანავე უზრუნველყოს ავტოსატრანსპორტო საშუალების გადაცემა მიღება-ჩაბარების აქტის საფუძველზე, რომელშიც აისახება:

ა) მოძრავი ქონების გადაცემის თარიღი, აგრეთვე ავტოსატრანსპორტო საშუალების მაიდენტიფიცირებელი მონაცემები (მარკა, მოდელი, სახელმწიფო ნომერი, გამოშვების წელი და ვინ-კოდი) და ზოგადი აღწერა ავტოსატრანსპორტო საშუალების მდგომარეობის შესახებ;

ბ) მოძრავი ქონების მიმღებისა და გადამცემის სახელი, გვარი და თანამდებობა.

3. ამ მუხლის მე-2 პუნქტით გათვალისწინებული მიღება-ჩაბარების აქტის გაფორმება სავალდებულოა ავტოსატრანსპორტო საშუალების გადმოცემისას.

4. საქართველოს დიპლომატიური წარმომადგენლობისთვის დროებით გადაცემული ავტოსატრანსპორტო საშუალების შენახვა-უსაფრთხოების ხარჯები (პარკირება, დაზღვევა და სხვა შესაბამისი ხარჯები) შეიძლება ანაზღაურდეს სამინისტროს მიერ, ხოლო, ჩრდილოატლანტიკური ხელშეკრულების ორგანიზაციის გაერთიანებული საზღვაო ძალების სარდლობის შტაბში მივლინებული მეკავშირე ოფიცრის შემთხვევაში – საქართველოს სასაზღვრო პოლიციის მიერ, შესაბამისი მომართვის საფუძველზე.

მუხლი 9. პოლიციის ატაშეს, მეკავშირე ოფიცრისა და მათი აპარატების რეორგანიზაცია და ლიკვიდაცია, თანამდებობის გაუქმება

პოლიციის ატაშესა და მეკავშირე ოფიცრის აპარატების რეორგანიზაცია ან ლიკვიდაცია, პოლიციის ატაშესა და მეკავშირე ოფიცრის თანამდებობის გაუქმება ხორციელდება საქართველოს შინაგან საქმეთა მინისტრის ბრძანებით, საქართველოს კანონმდებლობით დადგენილი წესით.