,,სახელმწიფო პროგრამა ,,იაფი კრედიტის“ ფარგლებში საკრედიტო რესურსის გაცემის წესის შესახებ“

საქართველოს მთავრობის

დადგენილება №55

2009 წლის 19 მარტი

ქ. თბილისი

სახელმწიფო პროგრამა „იაფი კრედიტის“ ფარგლებში საკრედიტო რესურსის გაცემის წესის შესახებ

    მუხლი 1

„საქართველოს 2009 წლის სახელმწიფო ბიუჯეტის შესახებ“ საქართველოს კანონის მე-14 მუხლით გათვალისწინებული სახელმწიფო პროგრამა „იაფი კრედიტის“ (შემდგომში – პროგრამა) განხორციელების მიზნით ,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის „ე“ ქვეპუნქტისა და „საქართველოს 2009 წლის სახელმწიფო ბიუჯეტის შესახებ“ საქართველოს კანონის 27-ე მუხლის საფუძველზე დამტკიცდეს ,,სახელმწიფო პროგრამა „იაფი კრედიტის“ ფარგლებში საკრედიტო რესურსის გაცემის წესი“.

    მუხლი 2

საქართველოს ეკონომიკური განვითარების სამინისტრომ კომერციულ ბანკთან (ბანკებთან) (შემდგომში – ბანკი) ან/და მიკროსაფინანსო ორგანიზაციასთან (ორგანიზაციებთან) ერთად უზრუნველყოს სათანადო ღონისძიებათა განხორციელება ამ დადგენილებით დამტკიცებული „სახელმწიფო პროგრამა „იაფი კრედიტის“ ფარგლებში საკრედიტო რესურსის გაცემის წესის“ დროულად და შეუფერხებლად შესრულების მიზნით.

    მუხლი 3

ბანკმა ან/და მიკროსაფინანსო ორგანიზაციამ:

1. მიიღოს განაცხადები პროგრამის ფარგლებში გასაცემი კრედიტის შესახებ.

2. შეარჩიოს დასაფინანსებელი პროექტები და გასცეს კრედიტი შერჩეულ პროექტზე ამ დადგენილებით გათვალისწინებული პირობებით და მიზნებით.

3. პროგრამის ბენეფიციარებთან გააფორმოს ხელშეკრულება ბანკის ან/და მიკროსაფინანსო ორგანიზაციის მიერ გასაცემი კრედიტის თაობაზე.

4. პროგრამის ფარგლებში განახორციელოს ბანკის ან/და მიკროსაფინანსო ორგანიზაციის მიერ გაცემული კრედიტის დოკუმენტური მონიტორინგი.

5. პროგრამის ფარგლებში მოსთხოვოს ბანკის ან/და მიკროსაფინანსო ორგანიზაციის მიერ გაცემული კრედიტის ბენეფიციარებს ყოველკვარტალური ანგარიშის წარდგენა პროექტების შესრულების მიმდინარეობის შესახებ და თავის მხრივ წარუდგინოს ინფორმაცია საქართველოს ეკონომიკური განვითარების სამინისტროს.

    მუხლი 4

დადგენილების შესრულების კონტროლი განახორციელოს საქართველოს ეკონომიკური განვითარების სამინისტრომ.

    მუხლი 5

ეს დადგენილება არ ვრცელდება მის ძალაში შესვლამდე პროგრამის განხორციელების შედეგად წარმოშობილ სამართლებრივ ურთიერთობებზე. აღნიშნული ურთიერთობები რეგულირდება „სახელმწიფო პროგრამა ,,იაფი კრედიტის“ დამტკიცებასა და მის შესრულებასთან დაკავშირებულ ღონისძიებათა შესახებ“ საქართველოს მთავრობის 2009 წლის 19 თებერვლის №31 დადგენილებით.

მუხლი 6

დადგენილება ამოქმედდეს გამოქვეყნებისთანავე.

პრემიერ-მინისტრი ნ. გილაური

სახელმწიფო პროგრამა „იაფი კრედიტის“ ფარგლებში საკრედიტო რესურსის გაცემის წესი

    მუხლი 1. პროგრამის მიზანი

პროგრამის მიზანია მეწარმე სუბიექტებისათვის შეღავათიანი საკრედიტო რესურსის ხელმისაწვდომობის გაზრდით ახალი საწარმოების შექმნა, არსებულის განვითარება და ახალი სამუშაო ადგილების შექმნა.

    მუხლი 2. პროგრამის ბენეფიციარები

პროგრამის ბენეფიციარები არიან სოფლის მეურნეობის, ტურიზმის, ხალხური რეწვისა და სხვა სექტორებში სამეწარმეო საქმიანობით დაკავებული, აგრეთვე აღნიშნულ სექტორებში ბიზნესის დაწყების მსურველი მეწარმე სუბიექტები.

    მუხლი 3. პროგრამის ძირითადი მიმართულებები, განხორციელების პრინციპები და კრედიტის პირობები

პროგრამის ძირითადი მიმართულებები და განხორციელების პრინციპებია:

1. პროგრამის ფარგლებში განისაზღვროს ბანკის ან/და მიკროსაფინანსო ორგანიზაციის მიერ ბენეფიციარებისათვის კრედიტის გაცემის შემდეგი პირობები:

ა) ბანკმა ან/და მიკროსაფინანსო ორგანიზაციამ უზრუნველყოს კრედიტის გაცემა 59 თვითმმართველი ერთეულისათვის, გარდა თვითმმართველი ქალაქი თბილისისა და თიღვის, ერედვის, ქურთის, ახალგორისა და აჟარის მუნიციპალიტეტებისა, თითოეულისათვის არა უმეტეს 60.0 ათასი ლარის ოდენობით;

ბ) ბანკმა ან/და მიკროსაფინანსო ორგანიზაციამ უზრუნველყოს კრედიტის გაცემა 4 თვითმმართველი ქალაქისათვის (ქალაქები: ბათუმი, ფოთი, ქუთაისი, რუსთავი), თითოეულისათვის არა უმეტეს 150.0 ათასი ლარის ოდენობით;

გ) „ა“ და „ბ“ ქვეპუნქტებით განსაზღვრული კრედიტის ოდენობის გარდა ბანკმა ან/და მიკროსაფინანსო ორგანიზაციამ უზრუნველყოს დამატებით კრედიტის გაცემა საქართველოს ცხრა რეგიონისა და აჭარის ავტონომიური რესპუბლიკისათვის, თითოეულისათვის არა უმეტეს 500.0 ათასი ლარის ოდენობით;

დ) „ა“, „ბ“ და „გ“ ქვეპუნქტებით განსაზღვრული კრედიტის ოდენობის გარდა ბანკმა უზრუნველყოს დამატებით კრედიტის გაცემა სოფლის მეურნეობის პროდუქციის გადამმუშავებელი საწარმოების დასაფინანსებლად აღმოსავლეთ საქართველოს შესაბამისი ადმინისტრაციულ-ტერიტორიული ერთეულებისათვის – არა უმეტეს 4 673.0 ათასი ლარის ოდენობით და არანაკლებ ორი პროექტისა; დასავლეთ საქართველოს შესაბამისი ადმინისტრაციულ-ტერიტორიული ერთეულებისათვის – არა უმეტეს 4 673.0 ათასი ლარის ოდენობით და არანაკლებ ორი პროექტისა.

2. ბენეფიციარებს ბანკის ან/და მიკროსაფინანსო ორგანიზაციის მეშვეობით საკრედიტო რესურსი გამოეყოფათ შეღავათიანი პირობებით, კერძოდ: ერთი ბენეფიციარისათვის გასაცემი კრედიტის ოდენობა უნდა იყოს 20.0 ათას ლარზე მეტი, კრედიტით სარგებლობის მაქსიმალური ვადა – 7 წელი, საშეღავათო პერიოდი – 2 წლამდე, კრედიტით სარგებლობის წლიური განაკვეთი: პარტნიორი კომერციული ბანკისათვის ან/და მიკროსაფინანსო ორგანიზაციისათვის – წლიური 2 პროცენტი, ხოლო მეწარმე სუბიექტებისათვის – არა უმეტეს 12 პროცენტისა.

3. ბანკის ან/და მიკროსაფინანსო ორგანიზაციის მიერ ბენეფიციარისათვის კრედიტის გაცემის საბოლოო ვადაა 2009 წლის 22 დეკემბერი.

4. ბანკი ან/და მიკროსაფინანსო ორგანიზაცია საქართველოს მთავრობის მიერ დადგენილი პირობებით ბენეფიციარებისათვის გასცემს კრედიტს მათთან გაფორმებული ხელშეკრულებების საფუძველზე.

5. ბენეფიციარებს მოეთხოვებათ კრედიტის უზრუნველყოფა, რომელიც უნდა იყოს სულ მცირე კრედიტის (ტრანშის) მოცულობის ტოლი. კრედიტის უზრუნველყოფა დასაშვებია პირველი ან/და მეორე რიგის იპოთეკით, კომერციული ბანკების გარანტიით, სადაზღვევო კომპანიების სადაზღვევო მოწმობით (პოლისი), ან პირველი ან/და მეორე რიგის გირავნობით. ბენეფიციარებს საჭიროების შემთხვევაში მოეთხოვებათ პროექტების თანადაფინანსება (თანამონაწილეობა). ბანკს ან/და მიკროსაფინანსო ორგანიზაციას შეუძლია მონაწილეობა მიიღოს პროექტის თანადაფინანსებაში.

    მუხლი 4. ბანკის ან/და მიკროსაფინანსო ორგანიზაციის შერჩევა პროგრამის განსახორციელებლად

1. პროგრამის განმახორციელებელი ბანკი ან/და მიკროსაფინანსო ორგანიზაცია შეირჩევა ტენდერის საფუძველზე, რომელსაც გამართავს საჯარო სამართლის იურიდიული პირი – საქართველოს მუნიციპალური განვითარების ფონდი საქართველოს მთავრობასთან შეთანხმებით.

2. საჯარო სამართლის იურიდიული პირის – საქართველოს მუნიციპალური განვითარების ფონდის მიერ გამოვლენილ გამარჯვებულ ბანკთან ან/და მიკროსაფინანსო ორგანიზაციასთან საქართველოს ფინანსთა სამინისტრო და საქართველოს ეკონომიკური განვითარების სამინისტრო აფორმებენ შესაბამის ხელშეკრულებას.

    მუხლი 5. პროგრამის ბიუჯეტი და დაფინანსება

პროგრამის დაფინანსება ხდება ,,საქართველოს 2009 წლის სახელმწიფო ბიუჯეტის შესახებ“ საქართველოს კანონის მე-14 მუხლით გათვალისწინებული ასიგნებებიდან (ორგანიზაციული კოდი – 24 14).

    მუხლი 6. პროგრამის მონიტორინგი

1. ბანკი ან/და მიკროსაფინანსო ორგანიზაცია პროგრამის ბენეფიციარებისათვის ახორციელებს თავის მიერ გაცემული კრედიტის დოკუმენტურ მონიტორინგს.

2. ბანკის ან/და მიკროსაფინანსო ორგანიზაციის მიერ გაცემული კრედიტის ბენეფიციარები ყოველკვარტალურად (კვარტალის დასრულებიდან შემდეგი თვის 20 რიცხვამდე) კრედიტის გამცემს წარუდგენენ სრულ ინფორმაციასა და დამადასტურებელ დოკუმენტაციას ყოველი კვარტალის განმავლობაში განხორციელებული (შესრულებული) სამუშაოების შესახებ (როგორც კრედიტის, ისე საკუთარი დაფინანსების ფარგლებში), ხოლო კრედიტის სრულად ათვისების (ხარჯვის დასრულების) შემდეგ მის სრულ დაფარვამდე ყოველწლიურად წარუდგენენ ინფორმაციას პროექტის განხორციელების თაობაზე (ახალი კალენდარული წლის პირველი თვის განმავლობაში), რის შესახებაც ბანკი ან/და მიკროსაფინანსო ორგანიზაცია თავის მხრივ მიაწვდის ინფორმაციას საქართველოს ეკონომიკური განვითარების სამინისტროს.