“ბავშვთა და ახალგაზრდული კავშირების რეესტრის დებულების დამტკიცების შესახებ”

სახელმწიფო სარეგისტრაციო კოდი 010.040.020.12.201.004.658

საქართველოს ახალგაზრდობის საქმეთა სახელმწიფო დეპარტამენტის თავმჯდომარის

ბრძანება №3

2001 წლის 15 თებერვალი

ქ. თბილისი

ბავშვთა და ახალგაზრდული კავშირების რეესტრის დებულების დამტკიცების შესახებ

„ბავშვთა და ახალგაზრდული კავშირების სახელმწიფოებრივი მხარდაჭერის შესახებ” საქართველოს კანონის მე-11, მე-13, და მე-15 მუხლების საფუძველზე დამტკიცდეს ბავშვთა და ახალგაზრდული კავშირების რეესტრის თანდართული დებულება.

ზ. გაიპარაშვილი

ბავშვთა და ახალგაზრდული კავშირების რეესტრის

დ ე ბ უ ლ ე ბ ა

 

I. ზოგადი დებულება

1. ბავშვთა და ახალგაზრდული კავშირების სახელმწიფოებრივი მხარდაჭერის განსახორციელებლად და ბავშვთა და ახალგაზრდული კავშირების აღრიცხვისათვის იქმნება ბავშვთა და ახალგაზრდული კავშირების რეესტრი.

2. რეესტრი იქმნება „ბავშვთა და ახალგაზრდული კავშირების სახელმწიფოებრივი მხარდაჭერის შესახებ” საქართველოს კანონის საფუძველზე.

 

II. რეესტრში გატარების უფლება

3. რეესტრში ტარდება:

ა) ბავშვთა კავშირი, რომლის წესდებით განსაზღვრული საქმიანობის მიზანია უფლებებისა და თავისუფლების დაცვა;

ბ)ახალგაზრდული კავშირი, რომლის წესდებით განსაზღვრულია, რომ წევრთა არანაკლებ 2/3 არის 26 წლამდე ასაკის საერთო ინტერესების მქონე მოქალაქე, გაერთიანებული თავისი უფლებებისა და თავისუფლებების დასაცავად;

გ) ის კავშირები, რომლებიც აერთიანებენ ბავშვთა და/ან ახალგაზრდულ კავშირებს;

დ) რეესტრში კავშირი ტარდება ერთხელ.

 

III. რეესტრში შეტანისა და რეესტრიდან ამოღების წესი

4. „ბავშვთა” ან „ახალგაზრდული” სტატუსის მქონე კავშირმა, რომელსაც სურს სახელმწიფოსაგან ფინანსური დახმარება, კანონმდებლობით დადგენილი რეგისტრაციის შემდეგ უნდა წარუდგინოს საქართველოს ახალგაზრდობის საქმეთა სახელმწიფო დეპარტამენტს განცხადება რეესტრში გატარების შესახებ.

5. რეესტრში გასატარებლად საჭიროა შემდეგი დოკუმენტების წარმოდგენა:

ა) კავშირის წესდება (ასლი);

ბ) სასამართლოში რეგისტრაციის მოწმობა (ასლი).

6. რეესტრში გატარებულ კავშირს ეძლევა შესაბამისი რეგისტრაციის მოწმობა.

7. რეესტრში გატარებულ ორგანიზაციას ეძლევა შესაბამისი ნომერი და აღირიცხება საინფორმაციო ბანკში.

8. კავშირის რეესტრიდან ამოღების საფუძვლებს წარმოადგენს:

ა) სასამართლოს მიერ ამ კავშირის ლიკვიდაცია ან რეორგანიზაცია, რომლის შესახებაც სასამართლო აცნობებს საქართველოს ახალგაზრდობის საქმეთა სახელმწიფო დეპარტამენტს, დეპარტამენტის სათანადო მიმართვის საფუძველზე;

ბ) კავშირის განცხადება რეესტრიდან გასვლის შესახებ.

9. კავშირი რეესტრიდან გამოსულად ჩაითვლება მხოლოდ მას შემდეგ, რაც საქართველოს ახალგაზრდობის საქმეთა სახელმწიფო დეპარტამენტს წარუდგენს კავშირის ფინანსურ ანგარიშს სახელმწიფოსაგან მიღებული თანხების გამოყენების ან დაბრუნების შესახებ.

 

IV. დასკვნითი დებულებები

10. რეესტრის დებულებას ამტკიცებს საქართველოს ახალგაზრდობის საქმეთა სახელმწიფო დეპარტამენტის თავმჯდომარე „ბავშვთა და ახალგაზრდული კავშირების სახელმწიფოებრივი მხარდაჭერის შესახებ” საქართველოს კანონის საფუძველზე.

11. რეესტრის დებულებაში ცვლილებები და დამატებები შეაქვს საქართველოს ახალგაზრდობის საქმეთა სახელმწიფო დეპარტამენტის თავმჯდომარეს მოქმედი კანონმდებლობის შესაბამისად.