“საჯარო სამრთლის იურიდიული პირის- “ზურაბ ჟვანიას სახელობის სახელმწიფო ადმინისტრირების სკოლის” წესდების დამტკიცების შესახებ”

სახელმწიფო სარეგისტრაციო კოდი 040.030.000.22.022.007.634

საქართველოს განათლებისა და მეცნიერების მინისტრის

ბრძანება №411

2005 წლის 18 აგვისტო

ქ. თბილისი

,,საჯარო სამართლის იურიდიული    პირის _ ,,ზურაბ ჟვანიას სახელობის სახელმწიფო ადმინისტრირების სკოლის” წესდების დამტკიცების შესახებ”

,,საჯარო სამართლის იურიდიული პირის შესახებ” საქართველოს კანონის მე-6 მუხლის და ,,საჯარო სამართლის იურიდიული პირის _ ,,ზურაბ ჟვანიას სახელობის სახელმწიფო ადმინისტრირების სკოლის” დაფუძნების” შესახებ საქართველოს პრეზიდენტის 2005 წლის 10 ივნისის №476 ბრძანებულების მე-2 პუნქტის ,,ბ” ქვეპუნქტის შესაბამისად:

1. დამტკიცდეს ,,საჯარო სამართლის იურიდიული პირის _ ,,ზურაბ ჟვანიას სახელობის სახელმწიფო ადმინისტრირების სკოლის” თანდართული წესდება.

2. ბრძანება ამოქმედდეს გამოქვეყნებისთანავე.

ა. ლომაია

შეტანილი ცვლილებები:

1. საქართველოს განათლებისა და მეცნიერების მინისტრის 2006 წლის 11 ოქტომბრის ბრძანება №856 - სსმ III, №142, 16.10.2006  წ.,მუხ.1866

 

 

საჯარო სამართლის იურიდიული პირის – ,,ზურაბ ჟვანიას სახელობის სახელმწიფო ადმინისტრირების სკოლის” წესდება

თავი I. ზოგადი დებულებანი

    მუხლი 1. ზურაბ ჟვანიას სახელობის სახელმწიფო ადმინისტრირების სკოლის სტატუსი

1. ,,ზურაბ ჟვანიას სახელობის სახელმწიფო ადმინისტრირების სკოლა” (შემდგომში – სკოლა) არის საჯარო სამართლის იურიდიული პირი, რომელიც იქმნება საქართველოში სახელმწიფო მმართველობის დეცენტრალიზაციის ხელშეწყობის, აგრეთვე საქართველოს რეგიონების მმართველობისა და თვითმმართველობის დაწესებულებებში მართვის დემოკრატიული სტილის დამკვიდრების, საზოგადოებრივი მომსახურების ხარისხის ამაღლების, საჯარო სამსახურში კვალიფიციური კადრების დეფიციტის დაძლევის და ეროვნული უმცირესობებით კომპაქტურად დასახლებულ რეგიონების მოხელეთა კვალიფიკაციის ამაღლების და მათი სახელმწიფოებრივ სივრცეში ინტეგრაციის მიზნით.

2. სკოლა თავის საქმიანობას ახორციელებს საქართველოს კონსტიტუციის, საქართველოს კანონმდებლობისა და ამ წესდების შესაბამისად.

3. სკოლის სრული სახელწოდებაა ,,საჯარო სამართლის იურიდიული პირი – ზურაბ ჟვანიას სახელობის სახელმწიფო ადმინისტრირების სკოლა”.

4. დასახული მიზნებისა და დაკისრებული ფუნქციების განხორციელების მიზნით სკოლას აქვს სპეციალური უფლებაუნარიანობა. იგი საკუთარი სახელით იძენს საქართველოს კანონმდებლობით გათვალისწინებულ უფლებებსა და მოვალეობებს, დებს გარიგებებს და შეუძლია სასამართლოში გამოვიდეს მოსარჩელედ და მოპასუხედ.

5. სკოლას აქვს ბეჭედი, შტამპი, დამოუკიდებელი წლიური ბალანსი, ანგარიშები ბანკში (მათ შორის სავალუტო) და საჯარო სამართლის იურიდიული პირის სხვა ატრიბუტიკა.

6. სკოლის იურიდიული მისამართია: ქუთაისი, ნიკეას ქუჩა №13.

    მუხლი 2. საქმიანობის საგანი

სკოლის საქმიანობის საგანია:

ა) საქართველოს ცენტრალური და რეგიონულ დონეებზე მმართველობის და თვითმმართველობის ორგანოებში დაკავებულ პირთა მომზადება, გადამზადება და კვალიფიკაციის ამაღლება და მათ პროფესიულ განვითარებაზე ზრუნვა;

ბ) საქართველოს საშინაო და საგარეო პოლიტიკის განხორციელების და საქართველოს ევროპულ და ევროატლანტიკურ სტრუქტურებში ინტეგრაციის პერსპექტივიდან გამომდინარე საქართველოს ცენტრალურ და ადგილობრივ დონეებზე დასაქმებულ საჯარო მოხელეთათვის მუდმივი პროფესიული ზრდისა და განვითარებისათვის შესაბამისი პროფესიულ-საგანმანათლებლო პროგრამების შერჩევა და განხორციელება.

    მუხლი 3. სკოლის მიზნები და ამოცანები

1. სკოლის მიზანია სკოლაში ჩარიცხულ მსმენელებს შესთავაზოს ისეთი სახის საგანმანათლებლო და პროფესიული დონის ამაღლების პროგრამები, რომელიც უზრუნველყოფს საჯარო მოხელეთათვის იმ საბაზო ცოდნას, რაც აუცილებელია მათ მიერ ხარისხიანი და საზოგადოების მოთხოვნებს მისადაგებული სამსახურის მიწოდებისათვის. სკოლა აგრეთვე მიზნობრივად გაამახვილებს ყურადღებას ისეთ კონტინგენტზე, როგორიცაა საქართველოს ცენტრალური, რეგიონული და ადგილობრივი დონეების ეროვნული უმცირესობების წარმომადგენელი მოქალაქეები, რათა მოხდეს მათი კვალიფიკაციისა და ინფორმირებულობის დონის ამაღლება და პროფესიული ციდნის დონის სრულყოფა. სკოლის მიზანია აგრეთვე ეროვნულ უმცირესობათა წარმომადგენლების სახელმწიფო ენის შემსწავლელი პროგრამებით უზრუნველყოფა.

2. ამ მუხლის 1-ლი პუნქტით გათვალისწინებული მიზნების მისაღწევად სკოლა ახორციელებს:

ა) სწავლების მიმართულებების, სასწავლო გეგმებისა და პროგრამების შერჩევა-შემუშავებას და დამტკიცებას;

ბ) სასწავლო კურსების ნუსხის შედგენას და დამტკიცებას სახელმწიფო მოთხოვნათა გათვალისწინებით;

გ) კავშირის დამყარებას სხვა საგანმანათლებლო და სამეცნიერო-კვლევით დაწესებულებებთან როგორც ქვეყნის შიგნით, ისე საზღვარგარეთ;

დ) საჯარო მოხელეთა მომზადებას, გადამზადებასა და კვალიფიკაციის ამაღლებას;

ე) კონკრეტული საგანმანათლებლო პროგრამების შესაქმნელად და განსახორციელებლად საექსპერტო ჯგუფების მოწვევას;

ვ) მსმენელთა ჯფუფების სასწავლო პროცესში მონაწილეობისათვის საორგანიზაციო საქმიანობების განხორციელებას;

ზ) საქართველოს საჯარო სამსახურის საბჭოსა და საჯარო სამსახურის ბიუროსთან თანამშრომლობას სკოლისათვის მსმენელთა ჯგუფების შერჩევისათვის პრიორიტეტების განსაზღვრის მიზნით;

თ) სემინარების, კონფერენციებისა და შეხვედრების ორგანიზებას.

    მუხლი 4. სასწავლო პროცესი

სკოლის სასწავლო პროცესისა და პროფესიული პრაქტიკული მუშაობის ორგანიზაციის ფორმები დგინდება სკოლის შინაგანაწესით, რომელსაც დირექტორის წარდგინებით ამტკიცებს სკოლის სამეთვალყურეო საბჭო. სკოლის შინაგანაწესით განისაზღვრება სკოლაში მსმენელთა მიღების წესები, სწავლების პირობები და ხანგრძლივობა, სასწავლო რეჟიმის, სასწავლო პროცესის შიდა კონტროლის ფორმები და სხვა.

    მუხლი 5. მიღების წესი

1. სკოლაში მიიღებიან უმაღლესი, პროფესიული და სრული ზოგადი განათლების მქონე პირები, საქართველოს საჯარო სამსახურის საბჭოს და საჯარო სამსახურის ბიუროს მიერ რეკომენდებული პრიორიტეტების შესაბამისად.

2. სკოლაში მსმენელთა ჩარიცხვა ხდება კონკურსის საფუძველზე.

    მუხლი 6. სერტიფიკატი

სკოლა მსმენელის მიერ პროგრამის წარმატებით ათვისების შემთხვევაში გასცემს შესაბამის სერტიფიკატს.

თავი II. სკოლის მართვა

    მუხლი 7. სკოლის მართვა

სკოლის მართვას ახორციელებს:

ა) დირექტორი;

ბ) სამეთვალყურეო საბჭო.

    მუხლი 8. სკოლის დირექტორი

1. სკოლის მიმდინარე საქმიანობას წარმართავს სკოლის დირექტორი, რომელსაც 4 წლის ვადით თანამდებობაზე ნიშნავს და თანამდებობიდან ათავისუფლებს საქართველოს განათლებისა და მეცნიერების მინისტრი.

2. დირექტორი:

ა) მოქმედი კანონმდებლობის, ამ დებულებისა და სკოლის სამეთვალყურეო საბჭოს მიერ დამტკიცებული წლიური სამოქმედო გეგმის შესაბამისად უძღვება სკოლის ყოველდღიურ საქმიანობას;

ბ) დებს შრომით ხელშეკრულებებს სკოლის თანამშრომლებთან და ღია კონკურსის საფუძველზე ხელშეკრულებით განსაზღვრული ვადით სამსახურში აჰყავს სკოლის მასწავლებლები. სამეთვალყურეო საბჭოს რეკომენდაციების გათვალისწინებით ქმნის საკონკურსო კომისიას;

გ) წარმოადგენს სკოლას სკოლის საქმიანობასთან დაკავშირებულ მესამე პირებთან ურთიერთობისას;

დ) სამეთვალყურეო საბჭოს დასამტკიცებლად წარუდგენს სამოქმედო გეგმის ფარგლებში განსახორციელებელ პროგრამებსა და მათი შესრულების გეგმებს, სკოლის ბიუჯეტს, სკოლის შინაგანაწესს;

ე) განკარგავს თანხებს სამეთვალყურეო საბჭოს მიერ დამტკიცებული ბიუჯეტის შესაბამისად;

ვ) ამტკიცებს სკოლის საშტატო განრიგს და სახელფასო ფონდს საქართველოს განათლებისა და მეცნიერების სამინისტროსთან შეთანხმებით;

ზ) სკოლის სახელით ხსნის და ხურავს საბანკო ანგარიშებს;

თ) პირადი ხელმოწერით ადასტურებს ცენტრის დოკუმენტაციას;

ი) ანიჭებს პირს სკოლის წარმომადგენლობას და განსაზღვრავს მის ფარგლებს;

კ) სკოლის სახელით ამყარებს კავშირს სხვა, მათ შორის, საზღვარგარეთის საგანმანათლებლო და სამეცნიერო-კვლევით, არასამთავრობო დაწესებულებებთან;

ლ) თავისი კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს;

მ) ახორციელებს კანონმდებლობით დადგენილ სხვა უფლებამოსილებებს.

5. დირექტორი პერსონალურად აგებს პასუხს:

ა) განათლების სფეროში მოქმედი ნორმატიული აქტების შესრულებაზე;

ბ) სკოლის საკუთრებაში არსებულ ქონებაზე და ფულადი სახსრების სწორად და მიზნობრივ ხარჯვაზე;

გ) სასწავლო, სამეცნიერო და საორგანიზაციო-ფინანსური საქმიანობის ხარისხსა და დონეზე.

6. გარდამავალ ეტაპზე დირექტორი ვალდებულია გაწეული საქმიანობის შესახებ ყოველწლიური ანგარიში წარადგინოს საქართველოს განათლებისა და მეცნიერების სამინისტროში კანონმდებლობით დადგენილი წესით.

7. სკოლის დირექტორი დანიშვნიდან 2 კვირის ვადაში საქართველოს განათლებისა და მეცნიერების სამინისტროში წარმოადგენს შესათანხმებლად დირექტორის მოადგილის კანდიდატურას.

8. სკოლის დირექტორის მოადგილის კომპეტენცია განისაზღვრება სკოლის დირექტორის ინდივიდუალური ადმინისტრაციულ-სამართლებრივი აქტით.

9. სკოლის ახალი დირექტორის დანიშვნა იწვევს სკოლის დირექტორის მოადგილის უფლებამოსილების შეწყვეტას.

საქართველოს განათლებისა და მეცნიერების მინისტრის 2006 წლის 11 ოქტომბრის ბრძანება №856 - სსმ III, №142, 16.10.2006  წ.,მუხ.1866

    მუხლი 9. სამეთვალყურეო საბჭო  

1. სკოლის მართვის მიზნით 4 წლის ვადით იქმნება სამეთვალყურეო საბჭო 7 წევრის შემადგენლობით, რომლებსაც ნიშნავს და ათავისუფლებს საქართველოს განათლებისა და მეცნიერების მინისტრი.

2. სამეთვალყურეო საბჭოს საქმიანობას ხელმძღვანელობს სამეთვალყურეო საბჭოს თავმჯდომარე, შემდგომში თავმჯდომარე, რომელსაც სამეთვალყურეო საბჭო თავისი შემადგენლობიდან ირჩევს ერთი წლის ვადით.

3. სკოლის სამეთვალყურეო საბჭოს რეგულარული სხდომები იმართება სამ თვეში ერთხელ მაინც. სხდომებს იწვევს და უძღვება სამეთვალყურეო საბჭოს თავმჯდომარე. სამეთვალყურეო საბჭოს რიგგარეშე სხდომა შეიძლება მოწვეულ იქნეს სკოლის დირექტორის, სამეთვალყურეო საბჭოს არანაკლებ ორი წევრის ან სამეთვალყურეო საბჭოს თავმჯდომარის ინიციატივით.

4. სამეთვალყურეო საბჭოს სხდომა უფლებამოსილია, თუ მას ესწრება საბჭოს წევრთა ნახევარზე მეტი. გადაწყვეტილება მიღებულად ითვლება, თუ მას მხარს დაუჭერს სხდომაზე დამსწრე წევრთა ნახევარზე მეტი. ხმების თანაბრად გაყოფის შემთხვევაში გადამწყვეტია საბჭოს თავმჯდომარის ხმა.

5. სამეთვალყურეო საბჭო:

ა) დირექტორის წარდგინებით ამტკიცებს სკოლის შინაგანაწესს;

ბ) ყოველწლიურად ამტკიცებს სკოლის სამოქმედო გეგმას სკოლის დირექტორის ან საკუთარი ინიციატივით;

გ) სკოლის დირექტორის წარდგინებით სამოქმედო გეგმის ფარგლებში ყოვეწლიურად ამტკიცებს განსახორციელებელ პროგრამებს და მათი შესრულების გეგმებს, სკოლის ბიუჯეტს;

დ) მოიზიდავს დაფინანსებას საერთაშორისო და ადგილობრივი დონორებიდან;

ე) ამტკიცებს სკოლის დირექტორის მიერ წარდგენილ კვარტალურ წლიურ ანგარიშებს;

ვ) კონტროლს უწევს სკოლის სამოქმედო გეგმის განხორციელებასა და სახსრების მიზნობრივ ხარჯვას;

ზ) ამზადებს წინადადებებს სკოლის წესდებაში ცვლილებებისა და დამატებების შესატანად;

თ) სასწავლო გეგმების, პროგრამების შემუშავება, განხილვა და დამტკიცება, სასწავლო და მეთოდური ლიტერატურის განხილვა და დამტკიცება;

ი) სკოლის საორგანიზაციო და სტრუქტურული დანაყოფების საქმიანობების ეფექტურობის შეფასება;

კ) ახორციელებს საქართველოს კანონმდებლობით მინიჭებულ სხვა უფლებამოსილებებს.

საქართველოს განათლებისა და მეცნიერების მინისტრის 2006 წლის 11 ოქტომბრის ბრძანება №856 - სსმ III, №142, 16.10.2006  წ.,მუხ.1866

    მუხლი 10. სკოლის მსმენელთა და თანამშრომელთა უფლება-მოვალეობები

სკოლის მსმენელთა და თანამშრომელთა უფლება-მოვალეობები განისაზღვრება სკოლის შინაგანაწესით, შესაბამისად, სკოლასა და თანამშრომელსა და სკოლასა და მსმენელს შორის დადებული ხელშეკრულებებით.

 

თავი III. სკოლის ქონება და დაფინანსება

    მუხლი 11. სკოლის ქონება

1. სკოლის წესდებით გათვალისწინებული ამოცანების განსახორციელებლად სახელმწიფოსგან გადაეცემა ქონება უსასყიდლო უზურფრუქტის წესით.

2. საქართველოს კანონმდებლობით დადგენილი წესით, თავისი მიზნებიდან გამომდინარე, სკოლა იძენს, ფლობს და სარგებლობს ქონებით და განკარგავს ფინანსურ სახსრებს, წყვეტს მის კომპეტენციაში შემავალ სხვა საკითხებს.

    მუხლი 12. სკოლის დაფინანსება

1. სკოლის დაფინანსების წყაროებია:

ა) სახელმწიფო ბიუჯეტიდან გამოყოფილი მიზნობრივი სახსრები;

ბ) ხელშეკრულების საფუძველზე შესრულებული სამუშაოდან მიღებული შემოსავალი;

გ) შემოწირულობები და გრანტები;

დ) კანონმდებლობით დადგენილი სხვა შემოსავლები.

2. სკოლის შემოსავლები მთლიანად ხმარდება მისი ფუნქციების შესრულებასა და დასახული მიზნების განხორციელებას.

    მუხლი 13. საქმიანობა, რომელიც საჭიროებს თანხმობას

1. განათლებისა და მეცნიერების სამინისტროს თანხმობით სკოლამ შეიძლება განახორციელოს შემდეგი საქმიანობა:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო განრიგისა და სახელფასო ფონდის განსაზღვრა;

ე) სხვა გადაწყვეტილება საჯარო სამართლის იურიდიული პირის ქონებასთან დაკავშირებით, თუ ის სცილდება ჩვეულებრივი საქმიანობის ფარგლებს.

2. ამ მუხლის მეორე პუნქტის ,,ბ” და ,,გ” ქვეპუნქტებით გათვალისწინებლ საქმიანობათა განსახორციელებლად საჭიროა საქართველოს ფინანსთა სამინისტროს თანხმობა.

3. ამ მუხლის მე-2 პუნქტის ,,ა” და ,,ე”ქვეპუნქტებით გათვალისწინებული საქმიანობის გახორციელება საჭიროებს საქართველოს ეკონომიკური განვითარების სამინისტროს თანხმობა.

    მუხლი 14. საბუღალტრო ანგარიშგება

1. სკოლა ვალდებულია საქართველოს კანონმდებლობით დადგენილი წესით აწარმოს საფინანსო-ეკონომიკური საქმიანობის აღიცხვა-ანგარიშგება, შეადგინოს ბალანსი და დასამტკიცებლად წარუდგინოს განათლებისა და მეცნიერების სამინისტროს.

2. სკოლის წლიურ ბალანსს ამოწმებს საქრთველოს განათლებისა და მეცნიერების სამინისტროს მიერ დანიშნული დამოუკიდებელი აუდუტორი.

    მუხლი 15. სახელმწიფო კონტროლი

1. სკოლა ექვემდებარება სახელმწიფო კონტროლს.

 2. სკოლის სახელმწიფო კონტროლი გულისხმობს მისი საქმიანობის კანონიერების, მიზანშეწონილობის, ეფექტურობისა და საფინანსო-ეკონომიკური საქმიანობის ზედამხედველობას, რომელსაც ახორციელებს განათლებისა და მეცნიერების სამინისტრო.

3. საქართველოს განათლებისა და მეცნიერების სამინისტროს უფლება აქვს სკოლას მოსთხოვოს კონტროლის გასახორციელებლად საჭირო მასალებისა და ინფორმაციის წარმოდგენა.

    მუხლი 16. წესდებაში ცვლილებების შეტანა, რეორგანიზაცია, ლიკვიდაცია

1. სკოლის წესდებაში ცვლილებებისა და დამატებების შეტანა, სკოლის რეორგანიზაცია და ლიკვიდაცია ხორციელდება საქართველოს კანონმდებლობის შესაბამისად.

2. სკოლის ლიკვიდაციის შედეგად დარჩენილი ქონება გადადის სახელმწიფო საკუთრებაში.

    მუხლი 17. გარდამავალი დებულებები

1. 2006 წლის 1 ოქტომბრამდე საქართველოს პრეზიდენტის სახელმწიფო მიზნობრივი პროგრამით გათვალისწინებული საჯარო მოხელეთა სასწავლო პროგრამას ამტკიცებს განათლებისა და მეცნიერების სამინისტრო სკოლის სამეთვალყურეო საბჭოს მონაწილეობით.

2. 2006 წლის 1 ოქტომბრამდე სკოლაში მსმენელთა მიღებას ახორციელებს საქართველოს განათლებისა და მეცნიერების სამინისტრო კონკურსის საფუძველზე.

3. საქართველოს პრეზიდენტის სახელმწიფო მიზნობრივი პროგრამის ფარგლებში სკოლის ფუნქციონირების დაწყებასთან დაკავშირებული ორგანიზაციული საკითხების მოგვარებას უზრუნველყოფს საქართველოს განათლებისა და მეცნიერების სამინისტრო.

 

Annotate