„საქართველოს შინაგან საქმეთა სამინისტროს საგანგებო სიტუაციების მართვის დეპარტამენტის დებულების დამტკიცების შესახებ“

სახელმწიფო სარეგისტრაციო კოდი 010.240.030.22.034.008.011

საქართველოს შინაგან საქმეთა მინისტრის

ბრძანება №9

2006 წლის 6 იანვარი

ქ. თბილისი

საქართველოს შინაგან საქმეთა სამინისტროს საგანგებო სიტუაციების მართვის დეპარტამენტის დებულების დამტკიცების შესახებ

„საქართველოს შინაგან საქმეთა სამინისტროს დებულების დამტკიცების შესახებ“საქართველოს პრეზიდენტის 2004 წლის 27 დეკემბრის №614 ბრძანებულებით დამტკიცებული საქართველოს შინაგან საქმეთა სამინისტროს დებულების მე-11 პუნქტის „კ“და „ნ“ქვეპუნქტების საფუძველზე, ვბრძანებ:

1. დამტკიცდეს საქართველოს შინაგან საქმეთა სამინისტროს საგანგებო სიტუაციების მართვის დეპარტამენტის თანდართული დებულება.

2. ძალადაკარგულად გამოცხადდეს საქართველოს შინაგან საქმეთა მინისტრის 2005 წლის 27 აპრილის №413 ბრძანება „საქართველოს შინაგან საქმეთა სამინისტროს ხანძარსაწინააღმდეგო სამსახურის დებულების დამტკიცების შესახებ“და საქართველოს შინაგან საქმეთა მინისტრის 2005 წლის 27 აპრილის №032 ბრძანება „საქართველოს შინაგან საქმეთა სამინისტროს საგანგებო სიტუაციებისა და სამოქალაქო უსაფრთხოების სამსახურის დებულების დამტკიცების შესახებ“.

3. ბრძანება ამოქმედდეს გამოქვეყნებისთანავე.

ი. მერაბიშვილი

 

შეტანილი ცვლილებები:

1. საქართველოს შინაგან საქმეთა მინისტრის 2006 წლის 22 აგვისტოს ბრძანება №1020-სსმIII, №119, 04.09.2006წ.; მუხ.1616

საქართველოს შინაგან საქმეთა სამინისტროს საგანგებო სიტუაციების მართვის დეპარტამენტის

დებულება

თავი I

ზოგადი დებულებანი

    მუხლი 1

საქართველოს შინაგან საქმეთა სამინისტროს (შემდგომში – სამინისტრო) საგანგებო სიტუაციების მართვის დეპარტამენტი (შემდგომში – დეპარტამენტი) წარმოადგენს შინაგან საქმეთა სამინისტროს სტრუქტურულ ქვედანაყოფს, რომელიც თავისი კომპეტენციის ფარგლებში ახორციელებს ქვეყნის მასშტაბით საგანგებო სიტუაციების (საგანგებო სიტუაცია – მდგომარეობა, შექმნილი განსაზღვრულ ტერიტორიაზე ბუნებრივი და ტექნოგენური, სტიქიური ან სხვა რაიმე ხასიათის უბედურების შედეგად, რასაც მოჰყვა ან შეიძლება მოჰყვეს ადამიანთა მსხვერპლი, მნიშვნელოვანი მატერიალური დანაკარგები, საფრთხე შეექმნას ადამიანის ჯანმრთელობას ან გარემოს) თავიდან აცილების, მათი შედეგების შერბილების და ლიკვიდაციის მიზნით საქმიანობის კოორდინაციას, ასევე საომარი მდგომარეობის პერიოდში სამოქალაქო თავდაცვის ამოცანების განხორციელების უზრუნველყოფას.

    მუხლი 2

დეპარტამენტის საქმიანობის სამართლებრივი საფუძვლებია საქართველოს კონსტიტუცია, საერთაშორისო ხელშეკრულებები, კონვენციები და შეთანხმებები, საქართველოს კანონები, საქართველოს პრეზიდენტის ბრძანებულებები და განკარგულებები, საქართველოს შინაგან საქმეთა მინისტრის ბრძანებები, წინამდებარე დებულება და სხვა სამართლებრივი აქტები.

    მუხლი 3

დეპარტამენტი დადგენილი წესის შესაბამისად შეიმუშავებს სახანძრო უსაფრთხოების სფეროში სახელმწიფო პილიტიკის ძირითად მიმართულებებს და ზედამხედველობას უწევს მათ განხორციელებას.

    მუხლი 4

დეპარტამენტი თავის საქმიანობას ახორციელებს საქართველოს სახელმწიფო დაწესებულებებთან, ადგილობრივი თვითმმართველობისა და მმართველობის ორგანოებთან სხვა იურიდიულ და ფიზიკურ პირებთან ურთიერთკავშირში.

    მუხლი 5

საერთაშორისო სტანდარტებთან შესაბამისად დეპარტამენტს გააჩნია ემბლემა, ნარინჯისფერ ფონზე ლურჯი ტოლგვერდა სამკუთხედი, რომელიც გამოიყენება ტანსაცმელზე, სატრანსპორტო საშუალებებზე და სხვა ატრიბუტებზე.

    მუხლი 6

დეპარტამენტს აქვს ბეჭედი და ბლანკი საქართველოს სახელმწიფო გერბის გამოსახულებითა და სახელწოდების აღნიშვნით.

    მუხლი 7

დეპარტამენტის მისამართია: ქ. თბილისი, ი. ცურტაველის №29.

თავი II

დეპარტამენტის ამოცანები

    მუხლი 8

საგანგებო სიტუაციების დროს ან მათი თავიდან ასაცილებლად დეპარტამენტის ძირითად ამოცანებს წარმოადგენს:

ა) მოსახლეობისა და ტერიტორიების უსაფრთხოების ღონისძიებების შემუშავება და განხორციელების კოორდინაცია;

ბ) საქართველოს ტერიტორიაზე სამოქალაქო თავდაცვის ამოცანების განხორციელების ხელშეწყობა;

გ) ხანძრის აღკვეთის და მასთან ბრძოლის საქმეში ადგილობრივი თვითმმართველობისა და მმართველობის ორგანოების სახანძრო დაცვის უფლებამოსილებისა და ორგანიზაციის საფუძვლების შემუშავება;

დ) ფართომასშტაბიანი საგანგებო სიტუაციების სალიკვიდაციო სამუშაოების ხელმძღვანელობა;

ე) ქვეყანაში ხანძრებისა და მათი შედეგების, ასევე საავარიო-სამაშველო სამუშაოების აღრიცხვის ერთიანი სახელმწიფო სტატისტიკური სისტემის შექმნის ორგანიზება;

ვ) საქართველოს ერთიანი შეტყობინების სისტემის მართვის უზრუნველყოფა;

ზ) მოსახლეობისა და ხელმძღვანელ მუშაკთა მომზადება საგანგებო სიტუაციებში მოქმედებისათვის;

თ) დაწესებულებებსა და ორგანიზაციებში საგანგებო სიტუაციების მართვის სამსახურების მეთოდური ხელმძღვანელობა და მათი საქმიანობის კოორდინაცია;

ი) საქართველოში სახელმწიფო ხანძარსაწინააღმდეგო ზედამხედველობის ორგანიზაცია;

კ) ადგილობრივი თვითმმართველობისა და მმართველობის ორგანოების სახანძრო დაცვის სამსახურების მიერ ხანძრის ჩაქრობისა და საავარიო-სამაშველო სამუშაოების ჩატარების ორგანიზებისა და განხორციელების წესის შესრულება, ტაქტიკური და პროფესიული მომზადების სრულყოფის კონტროლი;

ლ) რთული და დიდი ხანძრების შემთხვევაში სხვადასხვა სახის სახანძრო დაცვის სამსახურების საქმიანობის ორგანიზება;

მ) პირველადი რეაგირებისათვის სამაშველო ჯგუფების მომზადება და დაზიანების კერებში მათი მუშაობის ორგანიზება;

ნ) სახანძრო, საინჟინრო, რადიაციული, ქიმიური და ბიოლოგიური საგანგებო ვითარებების შეფასება, შესაბამისი დამაზიანებელი ფაქტორების ზემოქმედების თავიდან ასაცილებელი, ბირთვული ავარიის შემთხვევაში დეზაქტივიზაციისა და მოსახლეობის სპეციალური დაცვის სხვა ღონისძიებათა ორგანიზება;

ო) საქართველოს მთელ ტერიტორიაზე სამხედრო-სამოქალაქო თანამშრომლობის უზრუნველყოფა;

პ) თავისი კომპეტენციის ფარგლებში საერთაშორისო საქმიანობის ორგანიზება და ჰუმანიტარულ საქმეთა კოორდინაცია;

ჟ) კოლექტიური და ინდივიდუალური დაცვის საშუალებების, საინჟინრო დამცავი ნაგებობების შენახვისა და ექსპლუატაციის კონტროლის განხორციელება;

რ) იურიდიული და ფიზიკური პირების მიერ საგანგებო სიტუაციებისა და სამოქალაქო თავდაცვის საინჟინრო-ტექნიკური ღონისძიებების სამშენებლო ნორმებისა და წესების შესრულებაზე კონტროლი, მიუხედავად საკუთრების ფორმისა;

ს) საგანგებო სიტუაციების განვითარების დროს მთავრობის განაცხადის საფუძველზე საერთაშორისო ჰუმანიტარული დახმარებების მოთხოვნა, მათი მიღება და განაწილების კოორდინაცია.

თავი III

დეპარტამენტის კომპეტენცია

    მუხლი 9

დეპარტამენტის კომპეტენციაა:

ა) ბუნებრივ და ტექნოგენურ საგანგებო სიტუაციებზე ეროვნული რეაგირებისა და სამოქალაქო თავდაცვის გეგმების შემუშავება, სრულყოფა, პრეზიდენტთან დასამტკიცებლად წარდგენა და ქვეყნის მასშტაბით მათი რეალიზაციის კოორდინაცია;

ბ) მონაწილეობა მიიღოს საგანგებო სიტუაციებისა და სამოქალაქო უსაფრთხოებასთან დაკავშირებულ ი საკანონმდებლო და კანონქვემდებარე ნორმატიული აქტების პროექტების მომზადებაში;

გ) სათანადო უწყებებთან და დაწესებულებებთან ერთად ორგანიზება გაუწიოს ბუნებრივი და ტექნოგენური ხასიათის საგანგებო სიტუაციების პროგნოზირებას;

დ) კოორდინაცია გაუწიოს ეროვნული და რეგიონალური მიზნობრივი სამეცნიერო-ტექნიკური პროგრამების შემუშავებას, საგანგებო სიტუაციების თავიდან აცილების, მათი შედეგების შერბილებისა და ლიკვიდაციის უზრუნველყოფის მიზნით;

ე) კოორდინაცია გაუწიოს საგანგებო სიტუაციების შედეგების სალიკვიდაციო სამუშაოებს, განსაზღვროს მისთვის საჭირო ძალები და საშუალებები, უზრუნველყოს მათი თავმოყრა კატასტროფის რაიონში;

ვ) თავისი კომპეტენციის ფარგლებში საქართველოს ეროვნული უშიშროების საბჭოს საგანგებო სიტუაციების მართვის საუწყებათაშორისო მუდმივ კომისიაზე განსახილველად მოამზადოს შესაბამისი ნოვატორული წინადადებები;

ზ) დეპარტამენტი წარმოადგენს საქართველოს ეროვნული უშიშროების საბჭოს საგანგებო სიტუაციების მართვის საუწყებათაშორისო მუდმივი კომისიის სამუშაო ორგანოს;

თ) ერთიანი საავარიო-სამაშველო ქვედანაყოფების შექმნის მიზნით ორგანიზაცია გაუწიოს შესაბამის სპეციალისტთა მომზადებას და მათ გამოყენებას საგანგებო სიტუაციებში როგორც ქვეყნის შიგნით, ისე ქვეყნის ფარგლებს გარეთ;

ი) მოიწვიოს სამთავრობო და არასამთავრობო ორგანიზაციები, კერძო პირები და მაღალკვალფიციური უცხოელი სპეციალისტები საგანგებო სიტუაციების თავიდან აცილებისა და მისი შედეგების სალიკვიდაციო ღონისძიებების ჩასატარებლად;

კ) დახმარება აღმოუჩინოს ადგილობრივი მმართველობის ორგანოებს მათივე მოთხოვნის საფუძველზე საგანგებო სიტუაციების შედეგების სალიკვიდაციოდ სამაშველო რაზმების ჩამოყალიბებაში;

ლ) ორგანიზება გაუკეთოს საერთაშორისო სემინარებისა და ტრენინგების მოწყობას;

მ) კოორდინაცია გაუწიოს და გააკონტროლოს საშიში საწარმოო და სტრატეგიული დანიშნულების ობიექტებზე, საგანგებო სიტუაციების თავიდან აცილებისა და მათი განვითარების შემთხვევაში შედეგების შერბილების მიზნით სამოქალაქო უსაფრთხოების ღონისძიებათა დაგეგმვასა და განხორციელებას;

ნ) საქართველოს კანონმდებლობის შესაბამისად გააკონტროლოს სახანძრო უსაფრთხოების სფეროში ტექნიკური რეგლამენტების ან სტანდარტების შესაბამისი მოთხოვნების შესრულება;

ო) შეიმუშაოს სხვადასხვა ადმინისტრაციულ-ტერიტორიული ერთეულების ადგილობრივი თვითმმართველობისა და მმართველობის ორგანოების სახანძრო დაცვის ძალებისა და საშუალებების ჩაბმის წესი ხანძრების, ავარიების, კატასტროფების, სტიქიური უბედურებების და სხვა საგანგებო სიტუაციების შემთხვევებში;

პ) სახანძრო უსაფრთხოების მოთხოვნებთან დასაბუთებული გადახვევების ან ასეთი მოთხოვნების არარსებობის შემთხვევაში განიხილოს და შეითანხმოს მშენებლობის და ტექნიკური გადაიარაღების საპროექტო დოკუმენტაცია;

ჟ) შეითანხმოს ადგილობრივი თვითმმართველობისა და მმართველობის ორგანოების სახანძრო დაცვის პირადი შემადგენლობის სამსახურის გავლის წესი, საშტატო რაოდენობა და სტრუქტურა;

რ) თავისი კომპეტენციის ფარგლებში შეიმუშაოს წინადადებები, რომლებიც აუცილებელია საგანგებო სიტუაციების თავიდან აცილებისა და მისი შედეგების სალიკვიდაციო სამუშაოების ორგანიზებისათვის და რომლებიც სავალდებულოა შესასრულებლად სამინისტროების, ორგანიზაციების, ასევე ხელმძღვანელი პირებისა და მოქალაქეებისათვის, მიუხედავად მათი საკუთრებისა და ორგანიზაციული ფორმისა;

ს) სამინისტროებიდან, უწყებებიდან და ავტონომიური რესპუბლიკების შესაბამისი ორგანოებიდან თავისი კომპეტენციის ფარგლებში მოითხოვს და გასცემს ინფორმაციებს საგანგებო სიტუაციების შედეგების ლიკვიდაციის საკოორდინაციო სამუშაოებისათვის;

ტ) შეათანხმოს სასწავლო დაწესებულებების სასწავლო პროგრამები საგანგებო სიტუაციებში მოქმედებისათვის;

უ) იქონიოს სპეციალური ტექნიკა განმასხვავებელი ნიშნით, სპეციალური ხმოვანი სიგნალით, სპეციალური შეფერილობითა და კავშირის სპეციალური საშუალებებით;

ფ) დადგენილი წესით მოიწვიოს ადგილობრივი და უცხოელი ექსპერტები შესაძლო მოსალოდნელი საფრთხის თავიდან ასაცილებლად და ექსპერტიზის ჩასატარებლად;

ქ) კომპეტენციის ფარგლებში მონაწილეობა მიიღოს საერთაშორისო ხალშეკრულებებისა და შეთანხმებების პროექტების შემუშავებაში;

ღ) კანონმდებლობით დადგენილი წესით გასცეს ბირთვული და რადიაციული საქმიანობის ლიცენზირებასთან დაკავშირებული ნებართვა;

ყ) კანონმდებლობით დადგენილი წესით განსაკუთრებით სახიფათო ტვირთების გადაზიდვაში მონაწილეობა და გადამზიდველთან მარშრუტის შეთანხმება;

შ) კანონმდებლობით დადგენილი წესით გასცეს ბირთული და რადიაციული საქმიანობის ლიცენზირებასთან დაკავშირებული დასკვნა;

 ჩ) ბუნებრივი და ტექნოგენური ხასიათის საგანგებო სიტუაციების თავიდან აცილების, მათი შედეგების შერბილებისა და ლიკვიდაციის მიზნით, მეცნიერულად არგუმენტირებული ღონისძიებებისა და სამეცნიერო მიზნობრივი პროგრამების შემუშავების მიზნით შექმნას საექსპერტო-საკონსულტაციო საბჭო.

თავი IV

დეპარტამენტის მართვა

    მუხლი 10

დეპარტამენტს ხელმძღვანელობს დირექტორი, რომელსაც თანამდებობაზე ნიშნავს და ათავისუფლებს საქართველოს შინაგან საქმეთა მინისტრი.

    მუხლი 11

დეპარტამენტის დირექტორი:

1. ხელმძღვანელობს და წარმართავს დეპარტამენტის მუშაობას, აწესრიგებს დეპარტამენტის კომპეტენციას მიკუთვნებულ საკითხებს.

2. მინისტრს წარუდგენს წინადადებებს დეპარტამენტის სტრუქტურის, საშტატო განრიგის, საქმიანობის ორგანიზაციის შესახებ.

3. პასუხისმგებელია საქართველოს კონსტიტუციის, სხვა საკანონმდებლო და კანონქვემდებარე აქტების, მინისტრის ბრძანებების შესრულებაზე იმ სფეროში, რომელიც დეპარტამენტის მმართველობას განეკუთვნება.

4. საკადრო და ორგანიზაციული უზრუნველყოფის დეპარტამენტთან ერთად მინისტრს დასამტკიცებლად წარუდგენს დეპარტამენტის თანამშრომელთა კანდიდატურებს.

5. ამტკიცებს დეპარტამენტის სამუშაო პროგრამებსა და გეგმებს.

6. კანონმდებლობით დადგენილი წესით მინისტრის წინაშე აყენებს დეპარტამენტის თანამშრომელთა წახალისების ან მათი დისციპლინური პასუხისმგებლობის საკითხებს.

7. ხელს აწერს ან ვიზირებას უკეთებს დეპარტამენტში მომზადებულ დოკუმენტებს.

8. დეპარტამენტის სტრუქტურული დანაყოფის ხელმძღვანელის წინადადების საფუძველზე, ანაწილებს კომპეტენციას და ფუნქციონალურ მოვალეობებს დეპარტამენტის დანაყოფებსა და ცალკეულ თანამშრომლებს შორის, აძლევს მათ მითითებებსა და დავალებებს.

9. სამინისტროს ხელმძღვანელობის წინაშე შუამდგომლობს იმ ფინანსური სახსრებისა და მატერიალური ფასეულობების გამოყოფის თაობაზე, რომელიც საჭიროა დეპარტამენტის ამოცანების შესასრულებლად.

10. ყოველწლიურად ან მოთხოვნისამებრ წარუდგენს მინისტრს ანგარიშს დეპარტამენტის მიერ გაწეული საქმიანობის შესახებ.

11. საგანგებო ან საომარი მდგომარეობის დროს უზრუნველყოფს დეპარტამენტის პირადი შემადგენლობის სამობილიზაციო მზადყოფნას.

12. სამინისტროს ხელმძღვანელობას წარუდგენს წინადადებებს საკითხებზე, რომლებიც დეპარტამენტის კომპეტენციას განეკუთვნება.

13. საქართველოს კანონმდებლობის ან მინისტრის ბრძანების შესაბამისად ახორციელებს სხვა უფლებამოსილებებს.

    მუხლი 12

დეპარტამენტის დირექტორს ჰყავს მოადგილე, რომელსაც მისი წარდგინებით თანამდებობაზე ნიშნავს და ათავისუფლებს საქართველოს შინაგან საქმეთა მინისტრი.

    მუხლი 13

დეპარტამენტის დირექტორის მოადგილე:

1. თავისი უფლებამოსილების ფარგლებში წარმართავს დეპარტამენტის საქმიანობას.

2. დეპარტამენტის დირექტორის დავალებით ახორციელებს კონტროლს თანამშრომელთა მიერ სამსახურებრივ მოვალეობათა შესრულებაზე.

3. ხელმძღვანელობს მისდამი დაქვემდებარებულ სამმართველოებს.

4. ასრულებს დეპარტამენტის დირექტორის ცალკეულ დავალებებს.

5. დეპარტამენტის დირექტორის არყოფნის შემთხვევაში მინისტრის დავალებით მოადგილე ასრულებს დირექტორის მოვალეობებს.

თავი V

დეპარტამენტის სტრუქტურული ერთეულები და მათი კომპეტენცია

    მუხლი 14

დეპარტამენტის სტრუქტურული ერთეულებია:

1. ორგანიზაციული უზრუნველყოფის განყოფილება.

2. ცენტრალური სამაშველო რაზმი.

3. სამოქალაქო უსაფრთხოების სამმართველო:

ა) პროგნოზისა და ანალიზის განყოფილება;

ბ) ჰუმანიტარულ საქმეთა და სამხედრო-სამოქალაქო თანამშრომლობის განყოფილება;

გ) კრიზისების მართვის განყოფილება;

დ) ბირთვული, ბიოლოგიური და ქიმიური რეაგირების ჯგუფი.

 4. ხანძარსაწინააღმდეგო სამმართველო:

ა) სახანძრო-სამაშველო ძალების მართვის განყოფილება;

ბ) სახანძრო დაცვის ორგანიზაციულ-სამართლებრივი უზრუნველყოფის ჯგუფი;

გ) ხანძრის ჩაქრობის და საავარიო-სამაშველო სამუშაოების ორგანიზაციის განყოფილება;

დ) ხანძრების კვლევის ქვეგანყოფილება;

5. აჭარის ავტონომიური რესპუბლიკის საგანგებო სიტუაციების მართვის სამსახური:

ა) ხანძარსაწინააღმდეგო განყოფილება;

ბ) სამოქალაქო უსაფრთხოების ჯგუფი;

გ) სახანძრო-სამაშველო ოცეული.

    მუხლი 15

ორგანიზაციული უზრუნველყოფის განყოფილება:

1. უზრუნველყოფს დეპარტამენტში საოფისე მომსახურებას და საიდუმლო და არასაიდუმლო საქმის წარმოებას, დოკუმენტაციის თარგმნას.

2. ორგანიზებას უკეთებს საგანგებო სიტუაციების მართვისა და სამოქალაქო უსაფრთხოების სფეროში ნორმატიული აქტების, ინსტრუქციებისა და რეკომენდაციების საქართველოს კანონმდებლობასთან შესაბამისობაში მოყვანასა და დამუშავებას.

3. ახორციელებს დეპარტამენტის კომპეტენციაში შემავალ საკითხებთან დაკავშირებით საერთაშორისო საქმიანობის ორგანიზებას.

4. თავისი კომპეტენციის ფარგლებში იხილავს და ამზადებს საკადრო საქმეებს და წარუდგენს სამინისტროს შესაბამის სამსახურს განსახორციელებლად.

5. ახორციელებს დეპარტამენტის კუთვნილი მატერიალურ-ტექნიკური ფასეულობების შენახვას (უზრუნველყოფის მიმართულება).

6. ახორციელებს დეპარტამენტის კუთვნილი მატერიალურ-ტექნიკური ფასეულობების ტექნიკურ გამართულობას (სატრანსპორტო მიმართულება).

7. უზრუნველყოფს დეპარტამენტს საჭირო ინვენტარით, ორგტექნიკით და სხვა აუცილებელი საშუალებებით.

    მუხლი 16

ცენტრალური სამაშველო რაზმის კომპეტენციაა:

1. ქვეყნის მასშტაბით საგანგებო სიტუაციებზე ოპერატიული რეაგირება.

2. დისლოკაციის ადგილზე სამაშველო ოცეულების 24-საათიანი მორიგეობისა და მათი მუდმივი მზადყოფნის უზრუნველყოფა საგანგებო სიტუაციებზე რეაგირებისათვის.

3. კომპლექსურ და სპეციალურ ვარჯიშებში მონაწილეობის მიღება.

4. პროფესიული მომზადების გეგმების, სასწავლო პროგრამებისა და სახელმძღვანელოების შემუშავება. შესაბამისი სწავლებების ჩატარება მაშველ-მეხანძრეთა მომზადების, გადამზადებისა და კვალიფიკაციის ამაღლების მიზნით.

5. ადგილობრივი თვითმმართველობისა და მმართველობის ორგანოების სამაშველო ხანძარსაწინააღმდეგო სამსახურების პირადი შემადგენლობისა პროფესიული მომზადების ორგანიზება და განხორციელება.

6. ადგილობრივი თვითმმართველობისა და მმართველობის ორგანოების ხელმძღვანელი მუშაკების საგანგებო სიტუაციების მართვის სფეროში გადამზადების ხელშეწყობა.

7. საერთაშორისო სამაშველო ოპერაციებში და ტრენინგებში მონაწილეობის მისაღებად სამაშველო ჯგუფების მომზადება.

8. სამაშველო ტექნოლოგიებისა და აღჭურვილობის ნომენკლატურის შემუშავება, სამაშველო ოპერაციებში გამოცდა და შესაბამისი რეკომენდაციების შემუშავება.

9. სამაშველო-საძიებო ოპერაციების ჩასატარებლად ძაღლების გაწვრთნა და გამოყენება.

10. დადგენილი წესით მაშველ-მეხანძრეთა ატესტაცია-სერტიფიცირების განხორციელება.

    მუხლი 17

სამოქალაქო უსაფრთხოების სამმართველოს კომპეტენციას წარმოადგენს ქვეყნის მასშტაბით შესაძლო საგანგებო სიტუაციების თავიდან აცილების, მათი შედეგების შერბილების, ლიკვიდაციის ღონისძიებათა ორგანიზება და კოორდინირება.

    მუხლი 18

პროგნოზისა და ანალიზის განყოფილების კომპეტენციას წარმოადგენს:

1. ორგანიზაცია გაუწიოს დაინტერესებულ უწყებებთან და დაწესებულებთან ერთად ბუნებრივი და ტექნოგენური ხასიათის საგანგებო სიტუაციების პროგნოზირებას და მისი წინმსწრები მოვლენების მონიტორინგს.

2. ითანამშრომლოს ბუნებრივი და ტექნოგენური კატასტროფების პროგნოზირების მიზნით სამეცნიერო-კვლევით დაწესებულებებთან.

3. შეიმუშაოს და წარუდგინოს შემდგომი მსვლელობისათვის სამმართველოს უფროსს საგანგებო სიტუაციებზე ეროვნული რეაგირებისა და სამოქალაქო თავდაცვის გეგმები.

4. შეიმუშაოს და წარუდგინოს სამმართველოს უფროსს დასამტკიცებლად სამუშაო გეგმები.

    მუხლი 19

ჰუმანიტარულ საქმეთა და სამხედრო-სამოქალაქო თანამშრომლობის განყოფილების კომპეტენციას წარმოადგენს:

1. რეგიონალურ და რაიონულ (საქალაქო) მმართველობის დონეზე შესაძლო საგანგებო სიტუაციების მართვის სფეროში ადგილობრივი მმართველობის ორგანოების კოორდინაცია, მათთვის რეკომენდაციების, მეთოდური და ფორმალიზებული დოკუმენტების მომზადება და მიწოდება.

2. სტიქიური უბედურების, კატასტროფისა და სხვა საგანგებო სიტუაციების დროს ჰუმანიტარული დახმარებებისა და სამაშველო ჯგუფების მიღება, გაგზავნა და გადაგზავნა დანიშნულებისამებრ, ადგილობრივი თვითმმართველობის ორგანოებისთვის ჰუმანიტარული დახმარებების და სამინისტროს ბალანსზე რიცხული მატერიალური ფასეულობების გამოუყენებელი ნაშთების გადაცემა დაზარალებულ და უმწეო მდგომარეობაში მყოფ პირთათვის გასანაწილებლად.

3. ერთიანი კოორდინაცია გაუწიოს და რეკომენდაციები მისცეს საგანგებო სიტუაციებზე ეროვნული რეაგირების გეგმებისა და სამოქალაქო თავდაცვის გეგმების მიხედვით სამინისტროებსა და უწყებებში ამ საკითხებით დაკავებულ დანაყოფებს.

4. ორგანიზაცია გაუკეთოს სამხედრო-სამოქალაქო თანამშრომლობას ქვეყნის ტერიტორიაზე.

საქართველოს შინაგან საქმეთა მინისტრის 2006 წლის 22 აგვისტოს ბრძანება №1020-სსმIII, №119, 04.09.2006წ.; მუხ.1616

    მუხლი 20

კრიზისების მართვის განყოფილების კომპეტენციას წარმოადგენს:

1. საგანგებო სიტუაციების განვითარების შემთხვევაში მართვის პროცესების ორგანიზება და განხორციელება.

2. კრიზის მართვის უზრუნველსაყოფად სამინისტროების წარმომადგენელთა შეტყობინება და მათი საქმიანობის უზრუნველყოფა.

3. საგანგებოს სიტუაციების წინმსწრები მოვლენების შესახებ ინფორმაციის მიღება-დამუშავება და მუდმივი მონიტორინგის წარმოება.

4. კრიზის მართვის უზრუნველსაყოფად საინფორმაციო ტექნოლოგიების შემუშავება და საინფორმაციო ბანკის შექმნა.

5. შექმნილი ვითარებების შეფასების მიზნით, საერთაშორისო სტანდარტების მოთხოვნათა შესაბამისად, გეოგრაფიულ კოორდინატებთან მიბმული მონაცემთა ბაზებისა და კომპიუტერული მოდელირების საფუძველზე სპეციალური მეთოდიკის შემუშავება.

    მუხლი 21

ბირთვული, ბიოლოგიური და ქიმიური რეაგირების ქვეგანყოფილების კომპეტენციას წარმოადგენს ბირთვული, ბიოლოგიური და ქიმიური ხასიათის ინციდენტებზე რეაგირების მიზნით ვითარებათა შეფასება, სამაშველო ძალების მომზადება და კოორდინირება. ადგილზე დეკონტამინაციის ორგანიზება და განხორციელება.

    მუხლი 22

სახელმწიფო ხანძარსაწინააღმდეგო სამსახურის (სამმართველოს) კომპეტენციას წარმოადგენს საქართველოს კანონის „სახანძრო უსაფრთხოების შესახებ“დებულებებით განსაზღვრული უფლებამოსილების განხორციელება.

    მუხლი 23

სახანძრო-სამაშველო ძალების მართვის განყოფილება:

1. უზრუნველყოფს ხანძრებისა და სხვა საგანგებო სიტუაციების შესახებ შემოსული შეტყობინებების მიღებასა და დამუშავებას.

2. უზრუნველყოფს ხანძრისა და სხვა საგანგებო სიტუაციების შემთხვევაში გამოძახების ადგილზე სახანძრო დაცვისა და დეპარტამენტის შესაბამისი დანაყოფების ძალებისა და საშუალებების გაგზავნას.

3. უზრუნველყოფს ინფორმაციის მოპოვებას და მის მიწოდებას სახანძრო დაცვის დანაყოფებისათვის, ხანძრის ჩაქრობის ხელმძღვანელის განკარგულებებთან დაკავშირებით.

4. უზრუნველყოფს ინფორმაციის მოპოვებას და მის მიწოდებას დეპარტამენტის ხელმძღვანელობისა და შესაბამისი სამსახურებისათვის სახანძრო-სამაშველო დანაყოფების დავალებაზე გასვლის, მათი მუშაობისა და ადგილზე არსებული ვითარების შესახებ.

5. უზრუნველყოფს დეპარტამენტის სტრუქტურული ერთეულებიდან ინფორმაციის დროულ მიღებას, მასზე ოპერატიულ რეაგირებას.

6. საჭიროების შემთხვევაში უზრუნველყოფს შეტყობინება-გამოძახების გეგმის განხორციელებას.

    მუხლი 24

სახანძრო დაცვის ორგანიზაციულ-სამართლებრივი უზრუნველყოფის ჯგუფის კომპეტენციას წარმოადგენს:

1. სახელმწიფო ხანძარსაწინააღმდეგო სამსახურის ზედამხედველობის განხორციელების სამართლებრივი, სახანძრო უსაფრთხოების უზრუნველყოფისათვის აუცილებელი და სახანძრო-ტექნიკური საშუალებების გამოყენების მარეგლამენტირებელი ნორმატიული აქტების პროექტების შემუშავება.

2. აღმასრულებელი ხელისუფლების ორგანოების მიერ სახანძრო უსაფრთხოების სფეროში შემუშავებული და შესათანხმებლად წარმოდგენილი ნორმატიული აქტების პროექტების განხილვა და წინადადებების მომზადება.

    მუხლი 25

ხანძრის ჩაქრობისა და საავარიო-სამაშველო სამუშაოების ორგანიზაციის განყოფილების კომპეტენციას წარმოადგენს:

1. ადგილობრივი თვითმმართველობისა და მმართველობის ორგანოების და უწყებრივი სახანძრო დაცვის სამსახურების საქმიანობის ინსპექტირება და მეთოდური დახმარება.

2. სხვადასხვა სახის სახანძრო დაცვის სამსახურების კოორდინაცია.

3. ქვეყანაში ხანძრებისა და მათი შედეგების, საავარიო-სამაშველო სამუშაოების აღრიცხვის ერთიანი სახელმწიფო სტატისტიკური სისტემის შექმნის ორგანიზება და სახელმწიფო სტატისტიკური ანგარიშების მომზადება.

    მუხლი 26

ხანძრების კვლევის ქვეგანყოფილების კომპეტენციას წარმოადგენს რთული, ფართომაშტაბიანი და ადამიანთა მსხვერპლთან დაკავშირებული ხანძრების მიზეზების კვლევის და ანალიზის განხორციელება; მათი თავიდან აცილებისა და შედეგების შერბილების ღონისძიებების შემუშავება; ცეცხლსაქრობი საშუალებების, ნივთიერებების, მასალების, დანადგარების, კონსტრუქციების გამოცდა მათი სახანძრო უსაფრთხოების მოთხოვნების შესაბამისობაზე; სახანძრო უსაფრთხოების უზრუნველყოფის ორგანიზაციულ და ტექნიკურ გადაწყვეტილებათა გამოკვლევა-შესწავლა.

    მუხლი 27

აჭარის ავტონომიური რესპუბლიკის საგანგებო სიტუაციების მართვის სამმართველო, როგორც საქართველოს შს სამინისტროს საგანგებო სიტუაციების მართვის დეპარტამენტის სტრუქტურული ქვედანაყოფი, ახორციელებს მასზე დელეგირებულ უფლება-მოვალეობებს აჭარის ავტონომიური რესპუბლიკის მასშტაბით.

თავი VI

დასკვნითი დებულებები

    მუხლი 28

დეპარტამენტის რეორგანიზაცია ან მისი საქმიანობის შეწყვეტა ხდება საქართველოს კანონმდებლობით დადგენილი წესით.

    მუხლი 29

დებულებაში ცვლილებებისა და დამატებების შეტანა ხდება საქართველოს შინაგან საქმეთა მინისტრის ბრძანების საფუძველზე.

 

Annotate