„საჯარო სამართლის იურიდიული პირის საქართველოს სოფლის მეურნეობის სამინისტროს ლაბორატორიის დებულების დამტკიცების შესახებ"

სახელმწიფო სარეგისტრაციო კოდი 040.030.000.22.032.008.762

საქართველოს სოფლის მეურნეობის მინისტრის

ბრძანება №2-96

2006 წლის 12 ივნისი

ქ. თბილისი

საჯარო სამართლის იურიდიული პირის – საქართველოს სოფლის მეურნეობის სამინისტროს ლაბორატორიის დებულების დამტკიცების შესახებ

,,საჯარო სამართლის იურიდიული პირის შესახებ“ საქართველოს კანონისა და ,,საჯარო სამართლის იურიდიული პირის – საქართველოს სოფლის მეურნეობის სამინისტროს ლაბორატორიის შექმნის შესახებ“ საქართველოს პრეზიდენტის 2006 წლის 10 მაისის №307 ბრძანებულების თანახმად, ვბრძანებ:

1. დამტკიცდეს საჯარო სამართლის იურიდიული პირის – საქართველოს სოფლის მეურნეობის სამინისტროს ლაბორატორიის თანდართული დებულება.

2. დაევალოს სამინისტროს ადმინისტრაციულ დეპარტამენტს (შ. ლორთქიფანიძე) უზრუნველყოს ,,ნორმატიული აქტების შესახებ“ საქართველოს კანონის შესაბამისად ბრძანების სახელმწიფო რეესტრში გატარება და ,,საქართველოს საკანონმდებლო მაცნეში“ გამოქვეყნება.

3. კონტროლი ამ ბრძანების შესრულებაზე განახორციელოს მინისტრის პირველმა მოადგილემ ლ. ბეგიაშვილმა.

4. აღნიშნული ბრძანება ამოქმედდეს გამოქვეყნებისთანავე.

მ. სვიმონიშვილი

საჯარო სამართლის იურიდიული პირის – საქართველოს სოფლის მეურნეობის სამინისტროს ლაბორატორიის დებულება

    მუხლი 1. ზოგადი დებულებები

1. საჯარო სამართლის იურიდიული პირი – საქართველოს სოფლის მეურნეობის სამინისტროს ლაბორატორია (შემდგომში – ლაბორატორია) იქმნება ,,საჯარო სამართლის იურიდიული პირის შესახებ“ საქართველოს კანონისა და ,,საჯარო სამართლის იურიდიული პირის – საქართველოს სოფლის მეურნეობის სამინისტროს ლაბორატორიის შექმნის შესახებ“ საქართველოს პრეზიდენტის 2006 წლის 10 მაისის №307 ბრძანებულების საფუძველზე.

2. ლაბორატორია თავის საქმიანობაში ხელმძღვანელობს საქართველოს კონსტიტუციით, საერთაშორისო ხელშეკრულებებით, საქართველოს კანონმდებლობით, კანონქვემდებარე აქტებითა და ამ დებულებით.

3. ლაბორატორიას აქვს დებულება, ბეჭედი საქართველოს სახელმწიფო გერბის გამოსახულებით და საკუთარი სახელწოდების აღნიშვნით, დამოუკიდებელი ბალანსი და ანგარიშსწორების ანგარიში ხაზინაში.

4. ლაბორატორიის დებულებას, საშტატო განრიგსა და ხელფასის ფონდს ამტკიცებს საქართველოს სოფლის მეურნეობის მინისტრი.

5. ლაბორატორიის დაფინასების წყაროა საქართველოს სახელმწიფო ბიუჯეტი და კანონმდებლობით ნებადართული სხვა შემოსავლები.

6. ლაბორატორიის იურიდიული მისამართია: ქ. თბილისი, გოძიაშვილის ქ. №65.

7. ლაბორატორია ანგარიშვალდებულია სოფლის მეურნეობის სამინისტროს წინაშე.

    მუხლი 2. საქმიანობის სფერო და ამოცანები

ლაბორატორიის საქმიანობის სფეროში შედის:

ა) ცხოველთა (მ.შ., ფრინველი, თევზი, ფუტკარი) დაავადებების ლაბორატორიული დიაგნოსტიკა; ცხოველური და მცენარეული წარმოშობის პროდუქტებისა და ნედლეულის, ალკოჰოლიანი და უალკოჰოლო სასმელების, ცხოველთა საკვებისა და ნედლეულის, სასმელი წყლის ექსპერტიზა, ხარისხის, უსაფრთხოების მაჩვენებლებისა და საკვებად ვარგისიანობის დადგენა;

ბ) პათოლოგიური მასალის, ცხოველური და მცენარეული წარმოშობის პროდუქტებისა და ნედლეულის, ალკოჰოლიანი და უალკოჰოლო სასმელების, ცხოველთა საკვებისა და ნედლეულის, სასმელი წყლის მიკრობიოლოგიური, ქიმიოტოქსიკოლოგიური და რადიოლოგიური გამოკვლევების ჩატარება;

გ) ადამიანისა და ცხოველებისათვის საერთო საშიში დაავადებების გაჩენის რისკის შეფასება, დაავადების გაჩენის შემთხვევაში და/ან სერომონიტორინგის სამუშაოებისათვის სინჯების (პათმასალის) აღება. დაავადების კერის სალიკვიდაციო და საკარანტინო ღონისძიებებში მონაწილეობის მიღება;

დ) ცხოველების გადამდები სნეულებების აღმძვრელების, მცენარეთა საკარანტინო და სხვა საშიში მავნე ორგანიზმების დიაგნოსტიკა;

ე) ლაბორატორიული კონტროლის განხორციელების გზით ეპიზოოტიური და ფიტოსანიტარიული კეთილსაიმედობის მიღწევა;

ვ) ახალი სადიაგნოსტიკო მეთოდების, დანადგარ-მოწყობილობებისა და სადიაგნოსტიკო საშუალებების აპრობაცია და დანერგვა.

    მუხლი 3. უფლებამოსილებანი

ლაბორატორიას უფლება აქვს:

ა) მონაწილეობა მიიღოს ვეტერინარული დიაგნოსტიკის, ვეტერინარულ-სანიტარიული ექსპერტიზის, კონტროლქვემდებარე პროდუქტებისა და ნედლეულის, ალკოჰოლიანი და უალკოჰოლო სასმელების, ცხოველთა საკვებისა და სასმელი წყლის საკვებად ვარგისიანობის, უსაფრთხოებისა და ხარისხობრივი მაჩვენებლების განსაზღვრის, ლაბორატორიული კვლევების კრიტერიუმების შემუშავებასა და განხორციელებაში;

ბ) შეიტანოს წინადადებები სოფლის მეურნეობის სამინისტროში სადიაგნოსტიკო, ლაბორატორიულ და ორგანიზაციულ-სამეურნეო საკითხებთან დაკავშირებით;

გ) კანონმდებლობით დადგენილი წესით მოითხოვოს და მიიღოს იურიდიული და ფიზიკური პირებისაგან ეპიზოოტიური, რადიოლოგიური, ტოქსიკოლოგიური და სხვა ლაბორატორიული კვლევებისათვის აუცილებელი მასალები და დოკუმენტები;

დ) მისცეს მითითებები იურიდიულ და ფიზიკურ პირებს საკვლევი მასალების აღებისა და ლაბორატორიაში გადაგზავნის წესის თაობაზე;

ე) საჭიროების შემთხვევაში კანონმდებლობით დადგენილი წესით შეამოწმოს ლაბორატორიული დიაგნოსტიკისა და გამოკვლევების ჩატარების სისწორე;

ვ) გასცეს დასკვნები ჩატარებული ლაბორატორიული გამოკვლევების შედეგებზე;

ზ) ადამიანისა და ცხოველებისათვის საერთო საშიში დაავადებების გაჩენის შემთხვევაში იურიდიულ და ფიზიკურ პირებს კანონმდებლობით დადგენილი წესით მისცეს შესასრულებლად აუცილებელი მითითებები დაავადების კერის ლოკალიზაციისა და ლიკვიდაციისათვის და დაავადებული ან დაავადებაზე საეჭვო ცხოველებისაგან მიღებული პროდუქტებისა და ნედლეულის შემდგომი გამოყენების წესსა და მიზანშეწონილობაზე;

თ) უშუალოდ წარმართოს ლაბორატორიის სტრუქტურული ქვედანაყოფებისა და ტერიტორიული ორგანოების საქმიანობა. საჭიროების შემთხვევაში წინადადებით შევიდეს სოფლის მეურნეობის სამინისტროში არსებული სტრუქტურის შეცვლის ან ახალი სტრუქტურების შექმნის აუცილებლობის თაობაზე;

ი) აუცილებლობის შემთხვევაში დაუბრკოლებლად შევიდეს მისდამი დაქვემდებარებულ სტრუქტურულ ქვედანაყოფებში და მისცეს შესასრულებლად შესაბამისი მითითებები და დირექტივები.

    მუხლი 4. ლაბორატორიის მოვალეობები

ლაბორატორიის მოვალეობებია:

ა) შეასრულოს ამ დებულებით დაკისრებული ფუნქციები და განახორციელოს მინიჭებული უფლებამოსილებანი;

ბ) უზრუნველყოს ლაბორატორიული კვლევების ობიექტურობა, სიზუსტე და გამჭვირვალობა;

გ) დაიცვას ლაბორატორიული კვლევების ჩატარების დადგენილი ვადები;

დ) ითანამშრომლოს საკანონმდებლო, აღმასრულებელი ხელისუფლების ორგანოებთან, საზოგადოებრივ და არასამთავრობო ორგანიზაციებთან;

ე) მიაწოდოს ინფორმაცია გაწეული მუშაობის შესახებ დაინტერესებულ ორგანიზაციებსა და მასობრივი ინფორმაციის საშუალებებს დადგენილი წესით.

    მუხლი 5. ლაბორატორიის ორგანიზაცია და სტრუქტურა

1. ლაბორატორია შედგება შემდეგი სტრუქტურული ქვედანაყოფებისაგან:

ა) ლაბორატორიის ადმინისტრაცია, რომლის შემადგენლობაში შედის საქმისწარმოებისა და იურიდიულ საკითხთა, საფინანსო-ეკონომიკური და საბუღალტრო, სამეურნეო უზრუნველყოფისა და კომპიუტერული ქსელების განყოფილებები, რომელთა ძირითადი ფუნქციაა ლაბორატორიის საქმიანობისათვის საჭირო ორგანიზაციულ-ტექნიკური, იურიდიული, საკადრო საქმიანობის, ბუღალტრული აღრიცხვის უზრუნველყოფა;

ბ) საანალიზო მასალის მისაღები, პათომორფოლოგიისა და პარაზიტოლოგიის განყოფილება, რომლის ძირითადი ფუნქციაა საანალიზო მასალის შიდა რეგისტრაცია, დამუშავება, პათომორფოლოგიური და პარაზიტოლოგიური კვლევების ჩატარება;

გ) ექსპერტიზის, ქიმიოტოქსიკოლოგიის და რადიოლოგიის განყოფილება, რომლის ძირითადი ფუნქციაა, ტოქსიკოლოგიური და რადიოლოგიური კვლევების ჩატარება, საანალიზოდ შემოსული მასალის ექსპერტიზა;

დ) მცენარეთა საშიში მავნე ორგანიზმების დიაგნოსტიკისა და აგროქიმიური კვლევების განყოფილება, რომლის ძირითადი ფუნქციაა მცენარეთა მავნე საშიში ორგანიზმების დიაგნოსტიკისა და აგროქიმიური კვლევების ჩატარება;

ე) ვივარიუმი, რომლის ძირითადი ფუნქციაა ლაბორატორიული ცხოველების გამრავლება;

ვ) თბილისის ეპიდემიოლოგიური მონიტორინგის სადგური, რომელშიც შედის მიკრობიოლოგიის განყოფილება, ვირუსოლოგიისა და სეროლოგიის განყოფილება და მობილური რეაგირების ჯგუფი. მიკრობიოლოგიის განყოფილების ძირითადი ფუნქციაა მიკრობიოლოგიური და ბაქტერიოლოგიური კვლევების ჩატარება, ვირუსოლოგიისა და სეროლოგიის განყოფილების ძირითადი ფუნქციაა სეროლოგიური და მოლეკულურ-ბიოლოგიური კვლევების ჩატარება, ხოლო მობილური რეაგირების ჯგუფის ძირითადი ფუნქციაა სოფლის მეურნეობის სამინისტროს სურსათის უვნებლობის, ვეტერინარიისა და მცენარეთა დაცვის ეროვნული სამსახურის და მათი ტერიტორიული ორგანოების გადაწყვეტილებების საფუძველზე სახელმწიფო პროგრამებით გათვალისწინებული ეპიზოოტიის საწინააღმდეგო ღონისძიებების სერომორიტორინგის განხორციელება. დაავადებების აფეთქების შემთხვევაში, შესაბამის სამსახურებთან ერთად, საკუთარი კომპეტენციის ფარგლებში, შესაბამისი ვეტერინარულ-სანიტარიული და საკარანტინო ღონისძიებების განხორციელებაში მონაწილეობა.

2. ლაბორატორიის ტერიტორიული ორგანოებია:

ა) ქუთაისის და ახალციხის ეპიდემიოლოგიური მონიტორინგის სადგური, რომელთა შემადგენლობაში შედის მიკრობიოლოგიისა და სეროლოგიის განყოფილებები, მობილური რეაგირების ჯგუფი. მიკრობიოლოგიისა და სეროლოგიის განყოფილებების ძირითადი ფუნქციებია მიკრობიოლოგიური, სეროლოგიური და მოლეკულურ-ბიოლოგიური კვლევების ჩატარება. მობილური რეაგირების ჯგუფის ძირითადი ფუნქციებია სოფლის მეურნეობის სამინისტროს სურსათის უვნებლობის, ვეტერინარიისა და მცენარეთა დაცვის ეროვნული სამსახურის და მათი ტერიტორიული სამმართველოების გადაწყვეტილებების საფუძველზე სახელმწიფო პროგრამებით გათვალისწინებული ეპიზოოტიის საწინააგმდეგო ღონისძიებების სერომორიტორინგის განხორციელება. დაავადებების აფეთქების შემთხვევაში, შესაბამის სამსახურებთან ერთად, საკუთარი კომპეტენციის ფარგლებში, შესაბამისი ვეტერინარულ-სანიტარიული და საკარანტინო ღონისძიებების განხორციელებაში მონაწილეობა;

ბ) გურჯაანის, დუშეთის, მარნეულის, გორის, ზუგდიდის, ოზურგეთის, ამბროლაურის, ბათუმის საველე სადგური. საველე სადგურების ძირითადი ფუნქციებია დაავადებების სადიაგნოსტიკოდ პათოლოგიური მასალის მოძიება-აღება, მისი პირველადი დამუშავება და შემდგომი გამოკვლევებისათვის ეპიდემიოლოგიური მონიტორინგის სადგურში გადაგზავნა. სოფლის მეურნეობის სამინისტროს სურსათის უვნებლობის, ვეტერინარიისა და მცენარეთა დაცვის ეროვნული სამსახურის და მათი ტერიტორიული ორგანოების გადაწყვეტილების საფუძველზე სახელმწიფო პროგრამებით გათვალისწინებულ ეპიზოოტიის საწინააღმდეგო ღონისძიებებზე სერომონიტორინგის განხორციელება. დაავადებების აფეთქების შემთხვევაში, შესაბამის სამსახურებთან ერთად, საკუთარი კომპეტენციის ფარგლებში, შესაბამისი ვეტერინარულ-სანიტარიული და საკარანტინო ღონისძიებების განხორციელებაში მონაწილეობა.

    მუხლი 6. ლაბორატორიის მართვა

1. ლაბორატორიას ხელმძღვანელობს დირექტორი, რომელსაც თანამდებობაზე ნიშნავს და ათავისუფლებს საქართველოს სოფლის მეურნეობის მინისტრი.

2. ლაბორატორიის დირექტორი დამოუკიდებლად იღებს გადაწყვეტილებებს ლაბორატორიას მიკუთვნებული საკითხების გადაწყვეტაში და პერსონალურად აგებს პასუხს ამ დებულებით განსაზღვრული ფუნქციების შესრულებისა და მისი საქმიანობის სწორად წარმართვაზე.

3. დირექტორი მოქმედებს ლაბორატორიის სახელით და მინდობილობის გარეშე წარმოადგენს ლაბორატორიას სახელმწიფო ორგანიზაციებთან, იურიდიულ და ფიზიკურ პირებთან ურთიერთობაში.

4. ლაბორატორიის დირექტორს ჰყავს ორი მოადგილე, რომლებსაც სოფლის მეურნეობის მინისტრთან შეთანხმებით თანამდებობაზე ნიშნავს და თანამდებობიდან ათავისუფლებს ლაბორატორიის დირექტორი.

5. ლაბორატორიის დირექტორი:

ა) ორგანიზაციას უწევს და ხელმძღვანელობს ლაბორატორიის სტრუქტურული ქვედანაყოფების საქმიანობას;

ბ) თანამდებობაზე ნიშნავს და თანამდებობიდან ათავისუფლებს ლაბორატორიის თანამშრომლებს საქართველოს კანონმდებლობის შესაბამისად;

გ) თანამშრომლებს შორის ანაწილებს უფლება-მოვალეობებს;

დ) საჭიროების შემთხვევაში ამზადებს და წარუდგენს წინადადებებს საქართველოს სოფლის მეურნეობის მინისტრს ლაბორატორიის დებულებაში და სტრუქტურაში ცვლილებების შეტანის თაობაზე;

ე) ქმნის მეცნიერ ექსპერტთა საბჭოს, საკონკურსო და საატესტაციო კომისიებს;

ვ) აფორმებს ხელშეკრულებებს შესაბამის ორგანიზაციებთან, იურიდიულ და ფიზიკურ პირებთან ამ დებულებით განსაზღვრული ფუნქციებისა და ამოცანების შესასრულებლად;

ზ) აკონტროლებს ხარჯთაღრიცხვით გამოყოფილი თანხების მიზნობრივ ხარჯვას;

თ) კანონმდებლობის შესაბამისად ახორციელებს ლაბორატორიის თანამშრომლების წახალისებას ან დისციპლინ ა რ ულ ღონისძიებებს;

ი) კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს.

    მუხლი 7. ლაბორატორიის სახელმწიფო კონტროლი

1. ლაბორატორიის საქმიანობა ექვემდებარება სახელმწიფო კონტროლს.

2. ლაბორატორიის სახელმწიფო კონტროლი გულისხმობს მისი საქმიანობის კანონიერების, მიზანშეწონილობის, ეფექტიანობისა და საფინანსო ეკონომიკური საქმიანობის ზედამხედველობას.

3. ლაბორატორიის სახელმწიფო კონტროლის განმახორცილებელი ორგანო კანონმდებლობით მინიჭებულ უფლებამოსილებათა ფარგლებში არის საქართველოს სოფლის მეურნეობის სამინისტრო.

    მუხლი 8. ლაბორატორიის დაფინანსების წყარო

1. ლაბ ო რატორიის დაფინანსების წყაროა:

ა) სახელმწიფო ბიუჯეტიდან გამოყოფილი სახსრები;

ბ) სახელმწიფო შეკვეთების შესრულების შედეგად მიღებული შემოსავალი;

გ) ხელშეკრულების საფუძველზე შესრულებული სამუშაოდან მიღებული შემოსავალი;

დ) საქართველოს კანონმდებლობით ნებადართული სხვა შემოსავალი.

2. ლაბორატორიის მიერ მიღებული სახსრები და შემოსავლები მთლიანად ხმარდება ლაბორატორიის მიზნებისა და ფუნქციების განხორციელებას.

    მუხლი 9. ლაბორატორიის ქონება, ფინანსური სახსრები, საბუღალტრო აღრიცხვა და ანგარიშგება

1. ლაბორატორიას სახელმწიფო კონტროლის განმახორციელებელი ორგანოს თანხმობით შეუძლია:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო ნუსხისა და ხელფასის ფონდის განსაზღვრა;

ე) სხვა გადაწყვეტილებების მიღება საჯარო სამართლის იურიდიული პირის ქონებასთან დაკავშირებით, თუ ისინი სცილდება ჩვეულებრივი საქმიანობის ფარგლებს.

2. ამ მუხლის პირველი პუნქტის „ბ“ და „გ“ ქვეპუნქტებით გათვალისწინებულ მოქმედებათა განსახორციელებლად აუცილებელია საქართველოს ფინანსთა სამინისტროს თანხმობა.

3. ლაბორატორია მოქმედი კანონმდებლობის შესაბამისად აწარმოებს საფინანსო-ეკონომიკური საქმიანობის აღრიცხვა-ანგარიშგებას, ადგენს ბალანსს და დასამტკიცებლად წარუდგენს საქართველოს სოფლის მეურნეობის სამინისტროს.

    მუხლი 10. დასკვნითი დებულებანი

1. ლაბორატორიის დებულებაში ცვლილებებისა და დამატებების შეტანა ხდება კანონმდებლობით დადგენილი წესით.

2. ლაბორატორიის რეორგანიზაცია და ლიკვიდაცია ხორციელდება კანონმდებლობით დადგენილი წესით.

Annotate