ხელმოკლე ოჯახებში დაბადებული ახალშობილების დახმარების მიზნობრივი სახელმწიფო პროგრამის – ,,ღირსეული დასაწყისი“ – დამტკიცების შესახებ

საქართველოს მთავრობის

დადგენილება №273

2007 წლის 17 დეკემბერი

ქ. თბილისი

ხელმოკლე ოჯახებში დაბადებული ახალშობილების დახმარების მიზნობრივი სახელმწიფო პროგრამის – „ღირსეული დასაწყისი“ – დამტკიცების შესახებ

1. „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის „ე“ ქვეპუნტის საფუძველზე დამტკიცდეს ხელმოკლე ოჯახებში დაბადებული ახალშობილების დახმარების მიზნობრივი სახელმწიფო პროგრამა – „ღირსეული დასაწყისი“, დანართის მიხედვით.

2. საქართველოს ფინანსთა სამინისტრომ, ეკონომიკური განვითარების სამინისტრომ, შრომის, ჯანმრთელობისა და სოციალური დაცვის სამინისტრომ უზრუნველყონ დადგენილებით გათვალისწინებული პროგრამის განხორციელებისათვის საჭირო ასიგნებათა ასახვა 2008 წლის სახელმწიფო ბიუჯეტში.

3. საქართველოს შრომის, ჯანმრთელობისა და სოციალური დაცვის სამინისტრომ დადგენილების ამოქმედებიდან არა უგვიანეს ხუთი დღისა უზრუნველყოს „ღირსეული დასაწყისის“ ბარათის ფორმის დამტკიცება.

4. „სახელმწიფო შესყიდვების შესახებ“ საქართველოს კანონის მე-10 მუხლის მე-3 პუნქტის „ე“ ქვეპუნქტის შესაბამისად დადგენილებასთან დაკავშირებულ ღონისძიებათა შეზღუდულ ვადებში შესრულების უზრუნველსაყოფად საქართველოს ეკონომიკური განვითარების სამინისტრომ და სსიპ – სოციალური სუბსიდიების სააგენტომ საჭირო მომსახურების ან/და საქონლის შესყიდვა განახორციელონ ერთ პირთან მოლაპარაკების საშუალებით.

5. დადგენილება ამოქმედდეს გამოქვეყნებისთანავე.

პრემიერ-მინისტრი ვ. გურგენიძე

ხელმოკლე ოჯახებში დაბადებული ახალშობილების დახმარების მიზნობრივი სახელმწიფო პროგრამა – „ღირსეული დასაწყისი“

    მუხლი 1. პროგრამის მიზანი

პროგრამის მიზანია სოციალურად დაუცველი ოჯახების სოციალურ-ეკონომიკური მდგომარეობის გაუმჯობესება.

    მუხლი 2. პროგრამის მონაწილე პირები

ხელმოკლე ოჯახებში დაბადებული ახალშობილების დახმარების მიზნობრივ სახელმწიფო პროგრამაში – „ღირსეული დასაწყისი“ (შემდგომში – პროგრამა) მონაწილეობას მიიღებენ:

ა) დონორები (ფიზიკური და იურიდიული პირები) ნებაყოფლობის საფუძველზე;

ბ) საქართველოს შრომის, ჯანმრთელობისა და სოციალური დაცვის სამინისტროს საჯარო სამართლის იურიდიული პირი – სოციალური სუბსიდიების სააგენტო (შემდგომში – სააგენტო);

გ) საქართველოს ეკონომიკური განვითარების სამინისტრო;

დ) საქართველოს იუსტიციის სამინისტროს საჯარო სამართლის იურიდიული პირი – სამოქალაქო რეესტრის სააგენტო;

ე) საბანკო დაწესებულება – კანონმდებლობის შესაბამისად ლიცენზირებული იურიდიული პირი, რომელიც გამოხატავს სურვილს მონაწილეობა მიიღოს პროგრამაში და სააგენტოსთან გააფორმებს ხელშეკრულებას;

ვ) მოსარგებლე – ოჯახი, რომელიც რეგისტრირებულია სოციალურად დაუცველი ოჯახების მონაცემთა ერთიან ბაზაში და ბავშვის დაბადების დღისთვის ან ბავშვის დაბადებიდან 6 თვის განმავლობაში მინიჭებული აქვს 100 000 ტოლი ან ნაკლები სოციალურ-ეკონომიკური მდგომარეობის ამსახველი სარეიტინგო ქულა.

    მუხლი 3. პროგრამის ფარგლებში მონაწილე პირთა კომპეტენცია

1. პროგრამის ფინანსური მხარდაჭერისათვის ნებაყოფლობის საფუძველზე დონორები (ფიზიკური და იურიდიული პირები) ახორციელებენ შემოწირულობებს სახელმწიფო ხაზინის ბიუჯეტის შემოსულობების ერთიან ანგარიშზე თანხების ჩარიცხვით.

2. სააგენტო უზრუნველყოფს:

ა) „ღირსეული დასაწყისის“ ბარათის (შემდგომში – ბარათი) დამზადებას და მოსარგებლეებისათვის გადაცემას;

ბ) საინფორმაციო ბუკლეტების დამზადებას და სსიპ – სამოქალაქო რეესტრის სააგენტოსათვის გადაცემას;

გ) ახალშობილისათვის დახმარების გასაცემად საბანკო დაწესებულებასთან ხელშეკრულების გაფორმებას. სააგენტო უფლებამოსილია ამ პროგრამით გათვალისწინებული დახმარების გასაცემად ხელშეკრულება გააფორმოს ყველა იმ საბანკო დაწესებულებასთან, რომელიც წერილობით გამოხატავს სურვილს, მონაწილეობა მიიღოს ბარათის განაღდებაში;

დ) საბანკო დაწესებულების მეშვეობით მოსარგებლეებისათვის ყოველ ახალშობილზე ერთჯერადი დახმარების სახით 1000 ლარის გაცემას.

3. საქართველოს ეკონომიკური განვითარების სამინისტრო უზრუნველყოფს ამ პროგრამის თაობაზე მოსახლეობის ინფორმირებას (მათ შორის, საინფორმაციო კლიპების დამზადებასა და განთავსებას).

4. სსიპ – სამოქალაქო რეესტრის სააგენტო უზრუნველყოფს საინფორმაციო ბუკლეტების გავრცელებას.

5. საბანკო დაწესებულება უზრუნველყოფს:

ა) მოსარგებლის მიერ წარმოდგენილი ბარათის განაღდებას;

ბ) სააგენტოსთან გაფორმებული ხელშეკრულების საფუძველზე სააგენტოსათვის შესაბამისი ინფორმაციისა და დოკუმენტების წარდგენას განაღდებული ბარათისა და გაწეული მომსახურების ასანაზღაურებლად.

6. ბარათის გაყალბებისათვის პასუხისმგებლობა ეკისრება გამყალბებელს, მოქმედი კანონმდებლობის შესაბამისად.

    მუხლი 4. პროგრამის განხორციელების მექანიზმი

1. ბარათი არის მატერიალური ფორმის ფინანსური ინსტრუმენტი, რომელსაც გასცემს სააგენტო ტერიტორიული ერთეულების მეშვეობით. ბარათის მისაღებად მოსარგებლის წარმომადგენელმა სააგენტოს შესაბამის ტერიტორიულ ერთეულში უნდა წარადგინოს:

ა) ახალშობილის მშობლის პირადობის დამადასტურებელი დოკუმენტი;

ბ) ბავშვის დაბადების მოწმობა.

2. ბარათის მისაღებად მოსარგებლე განცხადებით მიმართავს სააგენტოს. განცხადებას თან უნდა დაერთოს ამ მუხლის პირველი პუნქტით გათვალისწინებული დოკუმენტების ასლები. განცხადების წარმოდგენიდან არა უმეტეს 10 სამუშაო დღის ვადაში სააგენტოს ტერიტორიული ერთეული მოსარგებლეს გადასცემს ბარათს ან დასაბუთებულ უარს.

3. ბარათს გასანაღდებლად მოსარგებლე წარუდგენს იმ საბანკო დაწესებულებას, რომელთანაც სააგენტოს გაფორმებული აქვს ხელშეკრულება.

    მუხლი 5. პროგრამის ბიუჯეტი

1. პროგრამის უზრუნველსაყოფად გამოიყენება შესაბამისი წლის სახელმწიფო ბიუჯეტის კანონით გამოყოფილი სახსრები, რომლის ფარგლებშიც დაიფარება პროგრამით გათვალისწინებული დახმარებისა და პროგრამის ადმინისტრირებასთან (მათ შორის საბანკო მომსახურება) დაკავშირებული ხარჯები.

2. საქართველოს ეკონომიკური განვითარების სამინისტროსა და სააგენტოს მიერ პროგრამის ფარგლებში გასატარებელი ღონისძიებების დაფინანსება განხორციელდება წლიური საბიუჯეტო კანონით შესაბამისი სამინისტროსათვის გამოყოფილ ასიგნებათა ფარგლებში.

    მუხლი 6. პროგრამის მოქმედების ვადა

პროგრამის მოქმედების ვადად განისაზღვროს 5 წელი.