საქართველოს ფინანსთა სამინისტროს შემოსავლების სამსახურის დებულების დამტკიცებისა და საქართველოს ფინანსთა სამინისტროს ფინანსური პოლიციის,საგადასახადო დეპარტამენტისა და საბაჟო დეპარტამენტის რეორგანიზაციის შესახებ

სახელმწიფო სარეგისტრაციო კოდი 010.320.010.22.033.010.049

საქართველოს ფინანსთა მინისტრის

ბრძანება №170

2007 წლის 2 მარტი

ქ. თბილისი

საქართველოს ფინანსთა სამინისტროს შემოსავლების სამსახურის დებულების დამტკიცებისა და საქართველოს ფინანსთა სამინისტროს ფინანსური პოლიციის, საგადასახადო დეპარტამენტისა და საბაჟო დეპარტამენტის რეორგანიზაციის შესახებ

,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის 25-ე მუხლის მე-5 პუნქტის, ,,საქართველოს ფინანსთა სამინისტროს შემოსავლების სამსახურის შესახებ“ საქართველოს კანონის მე-12 მუხლის მე-2 პუნქტის, 22-ე მუხლის მე-2, მე-5, მე-6 და მე-7 პუნქტებისა და საქართველოს მთავრობის 2004 წლის 21 მაისის №39 დადგენილებით დამტკიცებული საქართველოს ფინანსთა სამინისტროს დებულების მე-4 მუხლის მე-3 პუნქტის ,,ი“ ქვეპუნქტის საფუძველზე, ვბრძანებ:

1. დამტკიცდეს ,,საქართველოს ფინანსთა სამინისტროს შემოსავლების სამსახურის დებულება“.

2. შემოსავლების სამსახურის უფროსმა 2007 წლის 21 მარტამდე უზრუნველყოს:

ა) საგადასახადო და საბაჟო დეპარტამენტებისა და ფინანსური პოლიციის ცენტრალური აპარატის (მათ შორის საგამოძიებო დეპარტამენტის რეგიონალური სტრუქტურული ერთეულების) რეორგანიზაცია;

ბ) შემოსავლების სამსახურის ცენტრალური აპარატის სტრუქტურისა და საშტატო ნუსხის დამტკიცება და მითითებული საშტატო ნუსხიდან და სტრუქტურიდან გამომდინარე საგადასახადო და საბაჟო დეპარტამენტებისა და ფინანსური პოლიციის ცენტრალური აპარატის (მათ შორის საგამოძიებო დეპარტამენტის რეგიონალური სტრუქტურული ერთეულების) მოსამსახურეთა დანიშვნა შემოსავლების სამსახურის ცენტრალური აპარატის შესაბამის თანამდებობებზე ხელშეკრულებით არა უმეტეს 6 თვის ვადით ან მოვალეობის შემსრულებლად, ან გამოსაცდელი ვადით.

3. საგადასახადო და საბაჟო დეპარტამენტებისა და ფინანსური პოლიციის მოსამსახურეები, მიუხედავად იმისა, ფორმალურად მოხდა თუ არა მათი გადანიშვნა შემოსავლების სამსახურში, ექვემდებარებიან შემოსავლების სამსახურის ხელმძღვანელობას. მითითებული მოსამსახურეები განთავისუფლებამდე ან შემოსავლების სამსახურში გადანიშვნამდე, საქართველოს სისხლის სამართლის საპროცესო კოდექსით, ,,ოპერატიულ-სამძებრო საქმიანობის შესახებ“ საქართველოს კანონით, ,,საქართველოს ფინანსთა სამინისტროს შემოსავლების სამსახურის შესახებ“ საქართველოს კანონით, საქართველოს ზოგადი ადმინისტრაციული კოდექსით, საგადასახადო და საბაჟო კოდექსებით განსაზღვრულ მოქმედებებს ახორციელებენ და შესაბამის დოკუმენტებს აფორმებენ პირველ პუნქტში მითითებული დებულების ამოქმედებამდე მინიჭებული უფლებამოსილებების ფარგლებში.

4. იმ შემთხვევაში, თუ ვერ ხერხდება საგადასახადო და საბაჟო დეპარტამენტებისა და ფინანსური პოლიციის ცენტრალური აპარატის მოსამსახურეთა გადაყვანა შემოსავლების სამსახურის ცენტრალური აპარატის შესაბამის თანამდებობაზე, ისინი ითვლებიან სამსახურიდან განთავისუფლებულებად და შემოსავლების სამსახურის უფროსი, ხოლო შესაბამის თანამდებობებზე საქართველოს ფინანსთა მინისტრი შემოსავლების სამსახურის უფროსის წარდგინებით გამოსცემს შესაბამის ინდივიდუალურ ადმინისტრაციულ-სამართლებრივ აქტს.

5. მოსამსახურე შეიძლება განთავისუფლდეს თანამდებობიდან როგორც გაფრთხილების ვადის გასვლამდე, ისე გაფრთხილების ვადის გასვლის შემდეგ ნებისმიერ დღეს.

6. თუ მოსამსახურეები განთავისუფლდნენ რეორგანიზაციის საფუძველზე გაფრთხილების ვადის გასვლამდე, მათ მიეცემათ ხელფასი განთავისუფლებიდან გაფრთხილების ვადის გასვლამდე და კომპენსაცია სამსახურის შექმნის დღემდე არსებული 2 თვის თანამდებობრივი სარგოს ოდენობით. გაფრთხილების ვადის გასვლის შემდეგ (მიუხედავად იმისა, თუ რამდენი დღე გადაცდება გაფრთხილების ვადას) რეორგანიზაციის საფუძველზე განთავისუფლებულ პირებს მიეცემათ განთავისუფლებამდე სამსახურში ყოფნის ხელფასი და კომპენსაცია სამსახურის შექმნის დღემდე არსებული 2 თვის თანამდებობრივი სარგოს ოდენობით. კომპენსაციები არ გაიცემა შემოსავლების სამსახურში დანიშნულ პირებზე.

7. საგადასახადო დეპარტამენტისა და საბაჟო დეპარტამენტის ტერიტორიული ორგანოების რეორგანიზაციამდე შემოსავლების სამსახურის უფროსმა 2007 წლის 1 აპრილამდე უზრუნველყოს ამ ორგანოების მოსამსახურეების ავტომატური გადანიშვნა საგადასახადო და საბაჟო ორგანოების შესაბამის თანამდებობებზე.

8. შემოსავლების სამსახურმა უზრუნველყოს საგადასახადო და საბაჟო ორგანოებისა და ფინანსური პოლიციის მიერ გამოყენებული ადმინისტრაციულ სამართალდარღვევათა ოქმების, შესაბამისი ინდივიდუალური ადმინისტრაციულ-სამართლებრივი აქტების, საქართველოს სისხლის სამართლის საპროცესო კოდექსითა და ,,ოპერატიულ-სამძებრო საქმიანობის შესახებ“ საქართველოს კანონით განსაზღვრული საპროცესო და სხვა დოკუმენტებისა და ფორმების შეცვლა და საჭიროების შემთხვევაში მათი უნიფიცირება. ახალი ფორმების (დოკუმენტების) დამტკიცებამდე და დამზადებამდე გამოყენებულ იქნეს ძველი ფორმები (დოკუმენტები).

9. ძალადაკარგულად გამოცხადდეს:

ა) საქართველოს ფინანსთა მინისტრის 2006 წლის 7 აგვისტოს №932 ბრძანება ,,საქართველოს ფინანსთა სამინისტროს საგადასახადო დეპარტამენტის დებულების დამტკიცების თაობაზე“;

ბ) საქართველოს ფინანსთა მინისტრის 2005 წლის 25 აპრილის №285 ბრძანება ,,საქართველოს ფინანსთა სამინისტროს საბაჟო დეპარტამენტის დებულების დამტკიცების თაობაზე“;

გ) საქართველოს ფინანსთა მინისტრის 2004 წლის 18 მარტის №163 ბრძანება ,,საქართველოს ფინანსთა სამინისტროს ფინანსური პოლიციის დებულების დამტკიცების შესახებ“.

10. ბრძანება ამოქმედდეს 2007 წლის 5 მარტს.

ა. ალექსიშვილი

საქართველოს ფინანსთა სამინისტროს შემოსავლების სამსახურის

დებულება

    მუხლი 1. ზოგადი დებულებანი

1. საქართველოს ფინანსთა სამინისტროს შემოსავლების სამსახური (შემდგომში – სამსახური) არის საქართველოს ფინანსთა სამინისტროს სახელმწიფო საქვეუწყებო დაწესებულება, რომლის ცალკეული სტრუქტურული ერთეულები ასრულებენ სამართალდამცავი ორგანოს ფუნქციებს.

2. სამსახური თავის საქმიანობას წარმართავს საქართველოს კონსტიტუციის, საერთაშორისო ხელშეკრულებების, საგადასახადო და საბაჟო კანონმდებლობის, სისხლის სამართლის საპროცესო კანონმდებლობის, ,,ოპერატიულ-სამძებრო საქმიანობის შესახებ“ საქართველოს კანონის, ,,საქართველოს ფინანსთა სამინისტროს შემოსავლების სამსახურის შესახებ“ საქართველოს კანონის, საქართველოს ფინანსთა სამინისტროს დებულების, ამ დებულებისა და სხვა საკანონმდებლო და კანონქვემდებარე ნორმატიული აქტების შესაბამისად.

3. სამსახურს აქვს ბეჭედი საქართველოს სახელმწიფო გერბის გამოსახულებით და საკუთარი დასახელებით, დამოუკიდებელი ბალანსი, ანგარიშსწორების ანგარიშები ხაზინაში.

4. სამსახურის ადგილსამყოფელია ქ. თბილისი, გორგასალის ქ. №15.

    მუხლი 2. სამსახურის დაფინანსება

სამსახური ფინანსდება სახელმწიფო ბიუჯეტიდან.

    მუხლი 3. წარმომადგენლობა

1. სამსახური ახორციელებს სახელმწიფოს წარმომადგენლობას და მოქმედებს სახელმწიფოს სახელით მისთვის კანონმდებლობით დაკისრებული უფლება-მოვალეობების განხორციელებისას.

2. სამსახურის წარმომადგენლობაზე უფლებამოსილი პირია სამსახურის უფროსი.

3. ცალკეული საკითხების გადაწყვეტისას სამსახურის წარმომადგენლობის უფლებამოსილება სამსახურის უფროსის მიერ კანონმდებლობით დადგენილი წესით შეიძლება დელეგირებულ იქნეს სამსახურის სხვა მოხელეებზე ან სტრუქტურულ ქვედანაყოფებზე ინდივიდუალური ადმინისტრაციულ-სამართლებრივი აქტით.

    მუხლი 4. სამსახურის ფუნქციები და უფლებამოსილებები

სამსახური (სამსახურის უფლებამოსილი მოსამსახურე) თავისი კომპეტენციის ფარგლებში:

ა) უზრუნველყოფს საგადასახადო და საბაჟო კანონმდებლობის დაცვასა და შესრულებაზე კონტროლს;

ბ) ორგანიზაციას უწევს საქართველოს საგადასახადო კოდექსით განსაზღვრული გადასახადების, აგრეთვე სხვა კანონებით განსაზღვრული და მის კომპეტენციაში შემავალი გადასახდელების ადმინისტრირებას;

გ) ახორციელებს გადამხდელთა საგადასახადო და საბაჟო კონტროლს, აგრეთვე სახელმწიფო ფიტო-სანიტარიული სასაზღვრო-საკარანტინო, სახელმწიფო ვეტერინარული სასაზღვრო-საკარანტინო, სანიტარიულ-საკარანტინო და სხვა კონტროლს;

დ) ახორციელებს ტერიტორიული ორგანოებისა და სპეციალიზებული სტრუქტურული ქვედანაყოფების (საგადასახადო და საბაჟო ორგანოების და სხვა) საქმიანობის მართვას, კოორდინაციას და ზედამხედველობას;

ე) შეიმუშავებს საქართველოს საგადასახადო და საბაჟო კოდექსებით განსაზღვრული დადგენილებებისა და ბრძანებების პროექტებს და მეთოდურ მითითებებს, აგრეთვე მონაწილეობს საგადასახადო და საბაჟო სფეროში (მათ შორის სისხლის სამართლის სფეროში) კანონპროექტებისა და საერთაშორისო ხელშეკრულებების მომზადებასა და განხილვაში;

ვ) დადგენილი წესით მონაწილეობს სასამართლოში საქმეთა განხილვის დროს;

ზ) ახდენს სამსახურის სისტემაში კადრების შერჩევასა და განაწილებას, ახორციელებს ღონისძიებებს კადრების გადამზადებისა და კვალიფიკაციის ამაღლებისათვის;

თ) მონაწილეობს საერთაშორისო ურთიერთობებში და თანამშრომლობს საზღვარგარეთის ქვეყნების შესაბამის სამსახურებთან;

ი) იღებს გადაწყვეტილებებს ,,ლიცენზიებისა და ნებართვების შესახებ“ საქართველოს კანონით მის ქვემდებარეობას მიკუთვნებული ლიცენზიებისა და ნებართვების გაცემის, ცვლილებების შეტანის, გაუქმების, მოქმედების შეჩერების და განახლების თაობაზე;

კ) აწარმოებს საგადასახადო, საბაჟო და ადმინისტრაციულ სამართალდარღვევათა, აგრეთვე სისხლის სამართლის საქმეებს მოქმედი კანონმდებლობით საქართველოს ფინანსთა სამინისტროს კომპეტენციას მიკუთვნებულ სამართალდარღვევებთან და დანაშაულებებთან დაკავშირებით;

ლ) უზრუნველყოფს საფინანსო-ეკონომიკურ სფეროში დანაშაულთა გამოვლენას, გახსნას და აღკვეთას და ამ მიზნით:

ლ.ა) ახორციელებს ოპერატიულ-სამძებრო საქმიანობას, იყენებს ფიზიკურ იძულებას კანონით დადგენილი წესითა და ფარგლებში;

ლ.ბ) ატარებს სისხლის სამართლის საპროცესო კოდექსით გათვალისწინებულ ყველა საგამოძიებო და საპროცესო მოქმედებას, გამოითხოვს მოსამართლის ბრძანებას კანონმდებლობით დადგენილ შემთხვევაში და დადგენილი წესით;

ლ.გ) წინასწარი გამოძიების სტადიაზე საქართველოს სისხლის სამართლის საპროცესო კოდექსით დადგენილი წესით ახორციელებს შესაბამის ექსპერტიზას;

მ) დანაშაულისა თუ სხვა სამართალდარღვევის შესახებ საკმარისი მონაცემების არსებობისას აჩერებს და ათვალიერებს სატრანსპორტო საშუალებებს, ასევე ამოწმებს მოქალაქის პირადობის დამადასტურებელ საბუთებს, ახდენს პირის (საქონლისა და სატრანსპორტო საშუალებების) დაკავებას სისხლის სამართლის საპროცესო და ადმინისტრაციულ სამართალდარღვევათა კოდექსის შესაბამისად;

ნ) შეიმუშავებს ერთობლივ ღონისძიებებს სხვა სამართალდამცავ ორგანოებთან ერთად მასზე დაკისრებული ამოცანების შესრულების უზრუნველსაყოფად;

ო) სისხლის სამართლის ან ადმინისტრაციულ სამართალდარღვევათა საქმის წარმოებასთან დაკავშირებით იძახებს ფიზიკურ პირს, სთხოვს ახსნა-განმარტებას და საქმესთან (მასალებთან) დაკავშირებულ საჭირო დოკუმენტებს;

პ) ახორციელებს კანონმდებლობით დაკისრებულ სხვა უფლება-მოვალეობებს.

    მუხლი 5. სამსახურის ხელმძღვანელობა

1. სამსახურს ხელმძღვანელობს სამსახურის უფროსი, რომელსაც საქართველოს ფინანსთა მინისტრის წარდგინებით თანამდებობაზე ნიშნავს და თანამდებობიდან ათავისუფლებს საქართველოს პრემიერ-მინისტრი.

2. სამსახურის უფროსი:

ა) წარმოადგენს სამსახურს ან უფლებამოსილებას ანიჭებს სამსახურის წარმომადგენლობაზე, თუ კანონით სხვა რამ არ არის გათვალისწინებული;

ბ) ხელმძღვანელობს და კოორდინაციას უწევს სამსახურის საქმიანობას, უზრუნველყოფს კანონმდებლობით დაკისრებული მოვალეობების ჯეროვან შესრულებას;

გ) ანაწილებს ფუნქციებს სამსახურის უფროსის მოადგილეებს შორის, კოორდინაციას უწევს მათ მუშაობას, განსაზღვრავს სამსახურის მოსამსახურეთა ფუნქციებსა და მათი პერსონალური პასუხისმგებლობის საკითხებს;

დ) უშუალოდ, ხოლო დელეგირების შემთხვევაში – სამსახურის მოხელეების, ცენტრალური აპარატის სტრუქტურული ქვედანაყოფების, ტერიტორიული ორგანოების და მათი სტრუქტურული ქვედანაყოფების მეშვეობით წყვეტს სამსახურის კომპეტენციას მიკუთვნებულ საკითხებს;

ე) გამოსცემს მეთოდურ მითითებებს, რომელთა შესრულებაც სავალდებულოა სამსახურის საჯარო მოსამსახურეთათვის, ახორციელებს სამსახურებრივ ზედამხედველობას, უზრუნველყოფს და ახორციელებს სამსახურის მოსამსახურეთა წახალისებასა და დისციპლინურად დასჯას;

ვ) თანამდებობაზე ნიშნავს და თანამდებობიდან ათავისუფლებს სამსახურის საჯარო მოსამსახურეებს, რომელთა დანიშვნისა და განთავისუფლების კომპეტენციაც არ გააჩნია საქართველოს ფინანსთა მინისტრს საქართველოს მთავრობის 2004 წლის 21 მაისის №39 დადგენილებით დამტკიცებული საქართველოს ფინანსთა სამინისტროს დებულების საფუძველზე;

ზ) კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს;

თ) თავისი კომპეტენციის ფარგლებში ანიჭებს სპეციალურ წოდებებს და შუამდგომლობს ფინანსთა მინისტრის წინაშე თანამშრომლებისათვის შესაბამისი სპეციალური წოდებების მინიჭების თაობაზე;

ი) ბიუჯეტით განსაზღვრული წლიური ხელფასის ფონდისა და საშტატო რიცხოვნობის ფარგლებში შეიმუშავებს და წარუდგენს მინისტრს დასამტკიცებლად სამსახურის ცენტრალური აპარატის, ტერიტორიული ორგანოებისა და სტრუქტურული ქვედანაყოფების საშტატო ნუსხასა და სტრუქტურას;

კ) საქართველოს ფინანსთა მინისტრს წარუდგენს წინადადებებს შემოსავლების სამსახურში სამსახურის გავლის საკითხების გადაწყვეტის შესახებ და სამსახურის საქმიანობასთან დაკავშირებული ნორმატიული აქტების თაობაზე;

ლ) თავისი კომპეტენციის ფარგლებში, განკარგავს სამსახურისათვის გამოყოფილ ფულად სახსრებს, პასუხისმგებელია სამსახურის მატერიალურ-ტექნიკური ბაზის შენახვასა და მიზნობრივად გამოყენებაზე;

მ) ინდივიდუალური ადმინისტრაციულ-სამართლებრივი აქტით ქმნის უფროსის სათათბირო ორგანოს და განსაზღვრავს მის რიცხოვნობას და პერსონალურ შემადგენლობას;

ნ) კომპეტენციის ფარგლებში იღებს გადაწყვეტილებებს ოპერატიულ-სამძებრო საქმიანობის განხორციელებაზე;

ო) კომპეტენციის ფარგლებში ძალადაკარგულად ცნობს სამსახურის შესაბამისი მოსამსახურეების საქართველოს კანონმდებლობასთან შეუსაბამო ან მიზანშეუწონელ გადაწყვეტილებებს;

პ) კანონმდებლობით გათვალისწინებულ შემთხვევებში ამტკიცებს საკვალიფიკაციო მოთხოვნებს;

ჟ) განახორციელებს კანონმდებლობით მის კომპეტენციას მიკუთვნებულ სხვა უფლება-მოვალეობებს.

3. სამსახურის უფროსი ანგარიშვალდებულია საქართველოს ფინანსთა მინისტრის წინაშე.

4. სამსახურის უფროსს ჰყავს სამსახურის საშტატო განრიგით გათვალისწინებული რაოდენობის მოადგილე, რომლებიც ხელმძღვანელობენ უფროსის მიერ განსაზღვრულ მიმართულებებს.

5. სამსახურის სტრუქტურული ქვედანაყოფების, ტერიტორიული ორგანოებისა და სტრუქტურული ერთეულების ხელმძღვანელები წარმართავენ შესაბამისი სტრუქტურული ქვედანაყოფების, ტერიტორიული ორგანოებისა და ერთეულების საქმიანობას.

6. სამსახურის უფროსის არყოფნის შემთხვევაში მის მოვალეობას ფინანსთა მინისტრის დავალებით ასრულებს უფროსის ერთ-ერთი მოადგილე.

    მუხლი 6. სამსახურის სტრუქტურა

1. სამსახური დაკისრებულ მოვალეობებს ასრულებს საქართველოს მთელ ტერიტორიაზე. სამსახური შედგება ცენტრალური აპარატისა და ტერიტორიული ორგანოებისაგან, რომლებიც ქმნიან ერთიან ცენტრალიზებულ სისტემას.

2. სამსახურის ცენტრალური აპარატის სტრუქტურული ქვედანაყოფებია:

ა) აპარატი;

ბ) საგადასახადო საკითხებში:

ბ.ა) საზოგადოებასთან ურთიერთობის სამმართველო;

ბ.ბ) საერთაშორისო ურთიერთობების სამმართველო;

ბ.გ) დაბეგვრის მეთოდოლოგიის სამმართველო;

ბ.დ) აუდიტის და კონტროლის სამმართველო;

ბ.ე) არაპირდაპირი გადასახადების სამმართველო;

ბ.ვ) იურიდიული სამმართველო;

ბ.ზ) მომსახურების სამმართველო;

ბ.თ) ინფორმაციული ტექნოლოგიების სამმართველო;

ბ.ი) ადმინისტრირების სამმართველო;

ბ.კ) აღრიცხვა-ანალიზის სამმართველო;

ბ.ლ) საფინანსო-სამეურნეო სამმართველო;

ბ.მ) ადამიანური რესურსების მართვის სამმართველო.

გ) საგამოძიებო და ოპერატიულ-სამძებრო საქმიანობის საკითხებში:

გ.ა) ოპერატიული აღრიცხვის სამმართველო;

გ.ბ) სპეციალურ დავალებათა სამმართველო;

გ.გ) სტატისტიკის აღრიცხვისა და საინფორმაციო სამმართველო;

გ.დ) კანცელარია;

გ.ე) კადრების სამმართველო;

გ.ვ) სპეციალურ გამოკვლევათა და ფინანსური ექსპერტიზის დეპარტამენტი;

გ.ზ) მატერიალურ-ტექნიკური და ფინანსური უზრუნველყოფის სამსახური;

გ.თ) ბუღალტერია;

გ.ი) სამართლებრივ საკითხთა და საერთაშორისო ურთიერთობის სამსახური;

გ.კ) საზოგადოებასთან ურთიერთობის სამსახური;

გ.ლ) ოპერატიულ-ტექნიკური უზრუნველყოფის დეპარტამენტი;

გ.მ) საგამოძიებო დეპარტამენტი;

გ.ნ) სპეციალური დანიშნულების რაზმი.

დ) საბაჟო საკითხებში:

დ.ა) საბაჟო საქმის ორგანიზაციის მეთოდოლოგიის სამმართველო;

დ.ბ) მომსახურების სამმართველო;

დ.გ) საბაჟო კონტროლის ორგანიზაციის სამმართველო;

დ.დ) ფიტოსანიტარიული, ვეტერინარული და სპეციალური კონტროლის სამმართველო;

დ.ე) საბაჟო ღირებულების და სასაქონლო ნომენკლატურის საკითხთა სამმართველო;

დ.ვ) ინფორმაციული უზრუნველყოფის სამმართველო;

დ.ზ) ანალიტიკური სამმართველო;

დ.თ) იურიდიული სამმართველო;

დ.ი) ადმინისტრაციული სამმართველო;

დ.კ) მასმედიასთან ურთიერთობისა და საიდუმლო საქმისწარმოების სამსახური.

3. სამსახურის ტერიტორიული ორგანოებია:

ა) აფხაზეთის საგადასახადო ინსპექცია;

ბ) მსხვილ გადამხდელთა საგადასახადო ინსპექცია;

გ) აქციზის გადამხდელთა საგადასახადო ინსპექცია;

დ) ქ. თბილისის საგადასახადო ინსპექცია;

ე) ბათუმის საგადასახადო ინსპექცია;

ვ) ქუთაისის საგადასახადო ინსპექცია;

ზ) რუსთავის საგადასახადო ინსპექცია;

თ) ფოთის საგადასახადო ინსპექცია;

ი) გორის საგადასახადო ინსპექცია;

კ) თელავის საგადასახადო ინსპექცია;

ლ) ახალციხის საგადასახადო ინსპექცია;

მ) რეგიონალური საბაჟო „აღმოსავლეთი“;

ნ) რეგიონალური საბაჟო „დასავლეთი“.

    მუხლი 7. აპარატი

აპარატი:

ა) ორგანიზებას უწევს სამსახურის უფროსის თათბირების მომზადებას, შესაბამისი დოკუმენტების გაფორმებას და ახორციელებს კონტროლს მათ შესრულებაზე;

ბ) აწარმოებს შემოსული და გასული კორესპონდენციის, სამსახურის უფროსის ინდივიდუალური ადმინისტრაციულ-სამართლებრივი აქტების და დავალებების რეგისტრაციას, უზრუნველყოფს მათი შესრულების ორგანიზებას, გაწეული მუშაობის შედეგების შესახებ უმზადებს ინფორმაციას სამსახურის უფროსს;

გ) ორგანიზებას უწევს სამსახურის უფროსთან (მის მოადგილეებთან) მოქალაქეთა მიღების საკითხებს;

დ) უზრუნველყოფს საქმისწარმოებას, დამთავრებული დოკუმენტების აღრიცხვას, შენახვას და დაარქივებას დადგენილი წესით;

ე) მოქმედი კანონმდებლობის შესაბამისად აწესრიგებს საიდუმლო საქმისწარმოებას;

ვ) კომპეტენციის ფარგლებში ასრულებს სამსახურის უფროსის სხვა დავალებებს.

    მუხლი 8. საგადასახადო საკითხებში შემოსავლების სამსახურის სტრუქტურული ერთეულები და მათი ფუნქციები

1. ამ მუხლში მითითებული სტრუქტურული ერთეულები თავიანთ ფუნქციებს ახორციელებენ საგადასახადო საკითხებთან მიმართებაში.

2. საზოგადოებასთან ურთიერთობის სამმართველო:

ა) უზრუნველყოფს სამსახურის ურთიერთობას საზოგადოებასთან და მასობრივი ინფორმაციის საშუალებებთან;

ბ) სამსახურის შესაბამის სტრუქტურულ ერთეულებთან ერთად ამზადებს, გამოსცემს და ავრცელებს სამსახურის პერიოდულ საინფორმაციო ბიულეტენს;

გ) საგადასახადო ორგანოებისადმი საზოგადოების ნდობის ამაღლების მიზნით უზრუნველყოფს მათი მუშაობის გამჭვირვალობასა და საჯაროობას;

დ) მუშაობს სამსახურის ვებგვერდზე. ახორციელებს სამსახურის სტრუქტურული ერთეულებიდან შესაბამისი ინფორმაციის მიღების სისტემატიზაციას და ვებგვერდზე მონაცემების განახლებისათვის მასალების მომზადებას;

ე) კომპეტენციის ფარგლებში ასრულებს სამსახურის უფროსის სხვა დავალებებს.

3. საერთაშორისო ურთიერთობების სამმართველო:

ა) შეისწავლის საზღვარგარეთის ქვეყნების საგადასახადო სამსახურების მუშაობის გამოცდილებას;

ბ) ახორციელებს საერთაშორისო ორგანიზაციებთან და საზღვარგარეთის ქვეყნების საგადასახადო სამსახურებთან ურთიერთობების ორგანიზებას. აწარმოებს ინფორმაციის გაცვლას საგადასახადო კანონმდებლობის დაცვის საკითხებში;

გ) მონაწილეობს საგადასახადო სფეროში საერთაშორისო შეთანხმებების (შეთანხმების ნაწილის) მომზადების პროცესში;

დ) ატარებს მოსამზადებელ სამუშაოებს სამსახურის თანამდებობის პირების მონაწილეობის უზრუნველსაყოფად სხვადასხვა საერთაშორისო ორგანიზაციების და საზღვარგარეთის ქვეყნების საგადასახადო ორგანოების მიერ დაგეგმილ ღონისძიებებში, ასევე აღნიშნული ორგანიზაციების წარმომადგენელთა საქართველოში ვიზიტთან დაკავშირებით; უზრუნველყოფს მათი მუშაობის გამჭვირვალობასა და საჯაროობას;

ე) კომპეტენციის ფარგლებში ასრულებს სამსახურის უფროსის სხვა დავალებებს.

4. დაბეგვრის მეთოდოლოგიის სამმართველო:

ა) კომპეტენციის ფარგლებში უზრუნველყოფს საგადასახადო კანონმდებლობის სრულყოფაზე წინდადებების და შესაბამისი ნორმატიული აქტების პროექტების მომზადებას;

ბ) კომპეტენციის ფარგლებში უზრუნველყოფს საგადასახადო ორგანოებში მეთოდოლოგიური ერთიანობის დაცვას შემუშავებული ინსტრუქციების, განმარტებების და რეკომენდაციების ნაწილში;

გ) კომპეტენციის ფარგლებში შეიმუშავებს გადამხდელთა დაბეგვრასთან დაკავშირებული ინსტრუქციის პროექტებს, მეთოდურ მითითებებს და სხვა აქტებს, აგრეთვე საგადასახადო დეკლარაციების და გაანგარიშებების სხვა ფორმებს და მათი შევსების წესებს;

დ) მეთოდოლოგიურად უზრუნველყოფს საგადასახადო ორგანოთა საქმიანობას ფიზიკური პირების მიერ საშემოსავლო და ქონების დეკლარაციების და საგადასახადო შემოწმებების მეთოდების და საჯარო მოხელეთა მიერ დეკლარირების კუთხით;

ე) მონაწილეობს სხვა სახელმწიფოებთან ორმაგი დაბეგვრის შესახებ ხელშეკრულების პროექტების მომზადებასა და განხილვაში;

ვ) აანალიზებს წარმოდგენილი ანგარიშების ფორმებს და განაზოგადებს გამოკვეთილ ტენდენციებს კომპეტენციის ფარგლებში;

ზ) შეიმუშავებს უცხოური და საერთაშორისო ორგანიზაციებისათვის საგადასახადო აღრიცხვის და ანგარიშგების ფორმებს და მათგან მოგების (შემოსავლის), ქონების და დამატებული ღირებულების გადასახადების ამოღების თაობაზე ნორმატიულ და მეთოდოლოგიურ დოკუმენტებს;

თ) შეიმუშავებს ორმაგი დაბეგვრის თავიდან აცილების ხელშეკრულების გამოყენების საკითხებზე ნორმატიულ და მეთოდოლოგიურ დოკუმენტებს;

ი) შეიმუშავებს გადამხდელების მიერ უცხოურ ვალუტაში განხორციელებული ოპერაციების, აგრეთვე მათ მიერ საგარეო-ეკონომიკური საქმიანობიდან მიღებული შემოსავლების დაბეგვრის მეთოდოლოგიას. მონაწილეობს საქართველოს და უცხოური ორგანიზაციების და ფიზიკური პირების მიერ უცხოურ ვალუტაში განხორციელებული ოპერაციების, აგრეთვე მათ მიერ საგარეო-ეკონომიკური საქმიანობიდან მიღებული შემოსავლების დაბეგვრის საკითხებზე მეთოდოლოგიის მომზადებაში;

კ) კომპეტენციის ფარგლებში ახორციელებს საგადასახადო კანონმდებლობის გამოყენებასთან დაკავშირებით გადამხდელებისაგან, საგადასახადო ინსპექციებიდან და სხვა უწყებებიდან სამსახურში შემოსულ წერილებზე პასუხების მომზადებას და დასმულ საკითხებზე ერთიანი მიდგომის გამომუშავებას საგადასახადო ორგანოთა სისტემაში;

ლ) კომპეტენციის ფარგლებში ახორციელებს საგადასახადო ორგანოებისათვის პრაქტიკული დახმარების აღმოჩენას, უზრუნველყოფს მოქმედი საგადასახადო კანონმდებლობის ეფექტურობის ანალიზს და შესაბამისი ცვლილებების და დამატებების მომზადებას;

მ) კომპეტენციის ფარგლებში ასრულებს სამსახურის უფროსის სხვა დავალებებს.

5. აუდიტის და კონტროლის სამმართველო:

ა) კომპეტენციის ფარგლებში უზრუნველყოფს საგადასახადო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადებას;

ბ) შეიმუშავებს კამერალური და გასვლითი საგადასახადო შემოწმებების მომზადების და მათი შედეგების რეალიზაციის კომპლექსურ სტანდარტულ პრინციპებს;

გ) ახორციელებს საგადასახადო ორგანოების მიერ საგადასახადო შემოწმების ხაზით გაწეული საქმიანობის დაგეგმვას, ანალიზს და პრაქტიკის განზოგადებას;

დ) ორგანიზაციას უწევს სამართალდამცავ და სხვა მაკონტროლებელ ორგანოებთან ურთიერთობების პროცესს საგადასახადო სფეროში სამართალდარღვევების გამოვლენის, პრევენციის და აღკვეთის კუთხით;

ე) ახორციელებს საგადასახადო ორგანოების მიერ გადამხდელთა მიმართ ჩასატარებელ გასვლით გეგმურ საგადასახადო შემოწმებებზე გეგმის დამტკიცების ორგანიზებას და აწესებს მონიტორინგს მის შესრულებაზე;

ვ) ახორციელებს საგადასახადო ორგანოებისათვის გადამხდელთა საგადასახადო ანგარიშგების უტყუარობის შემოწმებაზე მეთოდური რეკომენდაციების დამუშავებას და კონსულტირებას;

ზ) ორგანიზაციას უწევს სრულყოფის და განვითარების პროგრამის ჩარჩოებში საგადასახადო კონტროლის და ტექნოლოგიის პერსპექტიული ღონისძიებების აღწერის მასალების შემუშავების პროცესს;

თ) კომპეტენციის ფარგლებში საგადასახადო ორგანოებს უწევს პრაქტიკულ დახმარებებს;

ი) კომპეტენციის ფარგლებში ასრულებს სამსახურის უფროსის სხვა დავალებებს.

6. არაპირდაპირი გადასახადების სამმართველო:

ა) კომპეტენციის ფარგლებში უზრუნველყოფს საგადასახადო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადებას;

ბ) უზრუნველყოფს საგადასახადო ინსპექციებს ანგარიშ-ფაქტურებით და დღგ-ის გადამხდელის სარეგისტრაციო სერტიფიკატებით. ამზადებს წინადადებებს და უზრუნველყოფს დღგ-ის დაბეგვრაზე შესაბამისი ხელშეკრულებებით გათვალისწინებული სპეციალური დღგ-ის ანგარიშ-ფაქტურა-სერტიფიკატების გაცემას;

გ) ამზადებს წინადადებებს მკაცრი აღრიცხვის ბლანკების და სათამაშო ბიზნესის გადასახადის გადახდის ნიშნების ბეჭდვის ორგანიზებაზე და უზრუნველყოფს მათ გაცემას;

დ) ახორციელებს საგადასახადო ანგარიშ-ფაქტურებით გათვალისწინებულ სხვადასხვა რეკვიზიტებში მექანიკური შეცდომის დაშვების შემთხვევაში გაუქმებული და დეფექტური მკაცრი აღრიცხვის ბლანკების ჩაბარებას ფინანსთა სამინისტროს შესაბამის სამსახურში, კომისიური წესით განადგურების მიზნით;

ე) ამზადებს წინადადებებს მკაცრი აღრიცხვის ბლანკების გამოყენებით წარმოქმნილ დარღვევებზე რეაგირების შესახებ და შემდგომი ღონისძიებების გატარების მიზნით აწვდის ინფორმაციას საგადასახადო ინსპექციებს;

ვ) კომპეტენციის ფარგლებში უზრუნველყოფს ექსპორტ-იმპორტის ოპერაციების და უცხოეთის სახელმწიფოების უფლებამოსილი ორგანოებიდან მიღებული საგადასახადო ინფორმაციის დამუშავებას, ანალიზს და შესაბამის საგადასახადო ინსპექციებზე დაყვანას. ამზადებს წინადადებებს საგადასახადო ინსპექციების მიერ გასატარებელ ღონისძიებებზე;

ზ) აანალიზებს ქვეყნის ტერიტორიაზე განხორციელებული დღგ-ით დასაბეგრი ოპერაციების პროცესს;

თ) კომპეტენციის ფარგლებში საგადასახადო ორგანოებს უწევს პრაქტიკულ დახმარებას;

ი) კომპეტენციის ფარგლებში ასრულებს სამსახურის უფროსის სხვა დავალებებს.

7. იურიდიული სამმართველო:

ა) კომპეტენციის ფარგლებში უზრუნველყოფს საგადასახადო ორგანოებში შემუშავებული ნორმატიული და ინდივიდუალური ადმინისტრაციულ-სამართლებრივი აქტების პროექტებზე სამართლებრივი ხასიათის შენიშვნების და წინადადებების (დასკვნების) მომზადებას;

ბ) უზრუნველყოფს სხვა სახელისუფლებო ორგანოებიდან გადმოგზავნილი საკანონმდებლო და სხვა ნორმატიული ხასიათის აქტების პროექტების სამართლებრივი ექსპერტიზის წარმოებას;

გ) სამართლებრივ დახმარებას უწევს საგადასახადო ინსპექციებს სასამართლოსა და სხვა ორგანოებში საჩივრების განხილვისას;

დ) კომპეტენციის ფარგლებში იხილავს გადასახადის გადამხდელთა საჩივრებს საგადასახადო ინსპექციების გადაწყეტილებებზე;

ე) აანალიზებს საგადასახადო დავების წარმოქმნის მიზეზებს, ატარებს მონიტორინგს გადამხდელთა საჩივრების განხილვის შედეგებზე;

ვ) დადგენილი წესით წარმოადგენს სამსახურს სასამართლოში საქმეთა განხილვის დროს;

ზ) საგადასახადო ინსპექციებიდან იღებს ინფორმაციას გადამხდელთა მიმართ საგადასახადო სამართალდარღვევებზე განხორციელებული ღონისძიებების შესახებ;

თ) ამზადებს მეთოდური მითითებების და ინსტრუქციების პროექტებს საგადასახადო სამართალდარღვევებზე საგადასახადო კოდექსით გათვალისწინებული სანქციების გამოყენების თაობაზე;

ი) კომპეტენციის ფარგლებში ასრულებს სამსახურის უფროსის სხვა დავალებებს.

8. მომსახურების სამმართველო:

ა) კომპეტენციის ფარგლებში უზრუნველყოფს საგადასახადო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადებას, ამუშავებს ნორმატიულ-სამართლებრივი აქტების პროექტებს საწარმოთა (მათ შორის, ინდივიდუალურ საწარმოთა), არასამეწარმეო (არაკომერციულ) იურიდიულ პირთა, ფილიალების (წარმომადგენლობების) სახელმწიფო რეგისტრაციისა და გადასახადის გადამხდელთა საგადასახადო აღრიცხვის წესის შესახებ;

ბ) კოორდინაციას უწევს საგადასახადო ინსპექციებში გადასახადის გადამხდელთა მომსახურების ორგანიზების პროცესს; ამზადებს წინადადებებს და მეთოდურ მითითებებს გადამხდელთა მომსახურების სრულყოფის მიზნით;

გ) ახორციელებს საგადასახადო ორგანოების მეთოდოლოგიურ ხელმძღვანელობას საწარმოთა (მათ შორის, ინდივიდუალურ საწარმოთა), არასამეწარმეო (არაკომერციულ) იურიდიულ პირთა, ფილიალების (წარმომადგენლობების) სახელმწიფო რეგისტრაციისა და გადასახადის გადამხდელთა საგადასახადო აღრიცხვის, ასევე საქველმოქმედო ორგანიზაციების რეესტრების წარმოების საქმეში;

დ) ამზადებს საგადასახადო ორგანოებისათვის გამოსაყენებელი პროგრამების, რეკომენდაციების და ინდივიდუალურ-სამართლებრივი აქტების პროექტებს საწარმოთა (მათ შორის, ინდივიდუალურ საწარმოთა), არასამეწარმეო (არაკომერციულ) იურიდიულ პირთა, ფილიალების (წარმომადგენლობების) სახელმწიფო რეგისტრაციისა და გადასახადის გადამხდელთა საგადასახადო აღრიცხვის, ასევე საქველმოქმედო ორგანიზაციების რეესტრების წარმოების, კანონმდებლობის დარღვევების გამოვლენისა და მათი აღმოფხვრის შესახებ;

ე) მონაწილეობს (კომპეტენციის ფარგლებში) ანალიტიკური მასალების მომზადებაში;

ვ) ამზადებს სამართლებრივი აქტების პროექტებს სპეციალიზებულ საგადასახადო ინსპექციებში გადამხდელთა საგადასახადო აღრიცხვაზე აყვანის წესის შესახებ;

ზ) არსებული ინფორმაციის საფუძველზე ამზადებს სპეციალიზებულ საგადასახადო ინსპექციებში საგადასახადო აღრიცხვაზე (რეგისტრაციაზე) ასაყვან გადამხდელთა სიას და მათ გადაყვანაზე ფინანსთა მინისტრის სათანადო ინდივიდუალური-სამართლებრივი აქტების პროექტებს;

თ) უზრუნველყოფს დადგენილი წესით საწარმოთა (მათ შორის, ინდივიდუალურ საწარმოთა), არასამეწარმეო (არაკომერციულ) იურიდიულ პირთა, ფილიალების (წარმომადგენლობების) სახელმწიფო რეგისტრაციისა და გადასახადის გადამხდელთა საგადასახადო აღრიცხვის ერთიანი სახელმწიფო (მათ შორის, სამეწარმეო) რეესტრების წარმოებას;

ი) შეიმუშავებს უცხოური და საერთაშორისო საწარმოების და ორგანიზაციების საგადასახადო ორგანოში საგადასახადო აღრიცხვაზე აყვანის ძირითად პრინციპებსა და თავისებურებებს;

კ) საგადასახადო რეგისტრაციის სრულყოფის მიზნით ამყარებს ურთიერთობებს და იღებს სათანადო ორგანოებიდან ინფორმაციებს, ადარებს მას გადამხდელთა სარეგისტრაციო ბაზებს და ხარვეზების გამოვლენის შემთხვევაში იღებს ზომებს მათ აღმოსაფხვრელად;

ლ) განაზოგადებს არსებულ პრაქტიკას სახელმწიფო (საგადასახადო) რეგისტრაციის შესახებ კანონმდებლობის გამოყენებაზე, აანალიზებს საანგარიშგებო და სტატისტიკურ მონაცემებს და ამზადებს შესაბამის წინადადებებს ხელმძღვანელობისათვის წარსადგენად;

მ) კომპეტენციის ფარგლებში უზრუნველყოფს მოქმედი საგადასახადო კანონმდებლობის და განხორციელებული ცვლილებების ეფექტურობის ანალიზს და ამზადებს შესაბამისი ცვლილებების და დამატებების პროექტებს;

ნ) დადგენილ ვადებში ახორციელებს გადამხდელთა სახელმწიფო და საგადასახადო რეგისტრაციის მდგომარეობის მონიტორინგს საგადასახადო ინსპექციების ჭრილში, აანალიზებს მათ საქმიანობას, საჭიროების შემთხვევაში – კომპეტენციის ფარგლებში ახორციელებს გასვლით შესწავლას, პრაქტიკულ დახმარებას უწევს საგადასახადო ინსპექციებს;

ო) ახორციელებს ბანკის ან საბანკო ოპერაციების ცალკეულ სახეობათა შემსრულებელი ორგანიზაციების მიერ უცხოური საწარმოსათვის გახსნილ საბანკო ანგარიშებზე მოწოდებული ინფორმაციების დამუშავებას და შესაბამისი საგადასახადო ინსპექციების ინფორმირებას;

პ) დადგენილი წესის შესაბამისად უზრუნველყოფს გადასახადის გადამხდელის ერთი საგადასახადო ინსპექციიდან სხვა საგადასხადო ინსპექციაში გადასვლისას სახელმწიფო და საგადასახადო რეგისტრაციის ცენტრალიზებულ კომპიუტერულ ბაზაში შესაბამისი ცვლილებების შეტანას და საგადასახადო ინსპექციების ინფორმირებას;

ჟ) კომპეტენციის ფარგლებში ასრულებს სამსახურის უფროსის სხვა დავალებებს.

9. ინფორმაციული ტექნოლოგიების სამმართველო:

ა) აწარმოებს სამსახურის ინფორმაციის ავტომატიზებული სისტემის შექმნის, განვითარების და დანერგვის სამუშაოების ორგანიზებას;

ბ) ახორციელებს პროგრესული ინფორმაციული ტექნოლოგიების, მონაცემთა ბაზების და საგადასახადო ორგანოებში ინფორმაციების ავტომატიზებული სისტემების უზრუნველყოფის საშუალებების შემუშავების მიღების და დანერგვის ორგანიზებას;

გ) შეიმუშავებს გამოყენებითი პროგრამული უზრუნველყოფის და საგადასახადო ინფორმაციის ავტომატიზებული დამუშავების ტექნოლოგიებს;

დ) ახორციელებს საგადასახადო ორგანოთა საქმიანობის პრაქტიკაში ახალი ინფორმაციული ტექნოლოგიების შემუშავებას და დანერგვას;

ე) უზრუნველყოფს სამსახურის საკომუნიკაციო სისტემის საიმედო და ეფექტური ფუნქციონირების სამუშაოების ორგანიზაციას და წარმოებას;

ვ) უზრუნველყოფს სამსახურში საკომუნიკაციო სისტემის შემადგენლობაზე, სტრუქტურაზე და ფუნქციებზე მოთხოვნების განსაზღვრას;

ზ) აკონტროლებს სამსახურის საკომუნიკაციო სისტემების და ინფორმაციის დაცვის საშუალებებზე მოთხოვნების წარმოდგენას და პროგრამულად უზრუნველყოფს სამსახურის საინფორმაციო ბაზაში არსებული გადამხდელთა იდენტიფიცირებული ინფორმაციის დაცვის სამუშაოებს;

თ) კომპეტენციის ფარგლებში შეიმუშავებს ინსტრუქციის და მეთოდური მითითებების პროექტებს. საგადასახადო ორგანოებში დანერგილი კომპიუტერული პროგრამების გამოყენების შესახებ ამზადებს სახელმძღვანელოებს და რეკომენდაციებს;

ი) კომპეტენციის ფარგლებში ასრულებს სამსახურის უფროსის სხვა დავალებებს.

10. ადმინისტრირების სამმართველო

ა) კომპეტენციის ფარგლებში უზრუნველყოფს საგადასახადო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადებას;

ბ) შეიმუშავებს საგადასახადო ვალდებულების შესრულების უზრუნველყოფის ღონისძიებებით გადახდევინების მეთოდებსა და პროგრამებს, რისთვისაც ამუშავებს მეთოდოლოგიური და ინსტრუქციული ხასიათის რეკომენდაციებს;

გ) აანალიზებს და მონიტორინგს უწევს საგადასახადო ორგანოების მიერ საგადასახადო ვალდებულების შესრულების უზრუნველყოფის ღონისძიებების განხორციელებას;

დ) აანალიზებს და მეთოდოლოგიურ დახმარებას უწევს საგადასახადო ინსპექციებს მათ მიერ ვადაგადაცილებულ დავალიანებათა ამოღების პროცესში;

ე) ახორციელებს საგადასახადო ორგანოების მიერ მიმდინარე კონტროლის პროცედურების შედეგების ანალიზს, შესაბამისი ანგარიშგების წარმოებას და პრაქტიკის განზოგადებას;

ვ) ახორციელებს საგადასახადო ორგანოთა მეთოდოლოგიურ უზრუნველყოფას საკონტროლო-სალარო აპარატების გამოყენების წესების დაცვის კუთხით;

ზ) ორგანიზაციას უწევს მომხმარებლებთან ნაღდი ფულით ანგარიშსწორებისას გამოსაყენებელი საკონტროლო-სალარო აპარატების მოდელების სახელმწიფო რეესტრის წარმოების და რეგისტრაციის პროცესს;

თ) კოორდინაციას უწევს საგადასახადო ორგანოების მუშაობას საკონტროლო-სალარო აპარატებთან დაკავშირებული სამუშაოების შესრულების პროცესში;

ი) ახორციელებს ვადაგადაცილებულ დავალიანებათა აღრიცხვასა და ანალიზს ელექტრონული და სხვა სახით წარმოდგენილი ინფორმაციის საფუძველზე;

კ) საგადასახადო ვალდებულებების ვადის შეცვლის, რესტრუქტურიზაციის და დავალიანებათა ჩამოწერის საკითხებზე ამზადებს სამართლებრივი აქტების და მეთოდური რეკომენდაციების პროექტებს;

ლ) აანალიზებს რესტრუქტურიზაციის რეჟიმში მომუშავე საწარმოების (ორგანიზაციების) მიერ საქართველოს ფინანსთა სამინისტროსთან დადებული რესტრუქტურიზაციის ხელშეკრულებით გათვალისწინებული პირობების შესრულებას და ინფორმაციას აწვდის საქართველოს ფინანსთა სამინისტროს;

მ) აანალიზებს საგადასახადო ორგანოების მიერ საგადასახადო დავალიანების უიმედო ვალად აღიარებისა და ჩამოწერის მიზნით განხორციელებულ ღონისძიებათა სისრულეს;

ნ) კომპეტენციის ფარგლებში საგადასახადო ორგანოებს უწევს პრაქტიკულ დახმარებებს;

ო) კომპეტენციის ფარგლებში ასრულებს სამსახურის უფროსის სხვა დავალებებს.

11. აღრიცხვა-ანალიზის სამმართველო:

ა) კომპეტენციის ფარგლებში უზრუნველყოფს საგადასახადო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადებას;

ბ) უზრუნველყოფს გადამხდელთა პირადი ბარათების წარმოების მეთოდოლოგიის შემუშავებას;

გ) შეიმუშავებს საგადასახადო ორგანოებში საბიუჯეტო შემოსულობათა (მათ შორის, ზედმეტად გადახდილი თანხის) დაბრუნებების, საგადასახადო სანქციების და საურავების მიხედვით აღრიცხვის წარმოების წესებს;

დ) ახორციელებს საგადასახადო შემოსავლების ანგარიშგების სტატისტიკური ფორმების შედგენის მეთოდოლოგიის შემუშავება-სრულყოფას და უზრუნველყოფს ეკონომიკურ ანალიზს;

ე) იღებს და ამუშავებს ელექტრონულ და სხვა სახის ინფორმაციას საგადასახადო შემოსავლების შესახებ;

ვ) ახდენს დამტკიცებული საგეგმო-საპროგნოზო მაჩვენებლების დაყვანას საგადასახადო ორგანოებამდე და აწესებს მონიტორინგს მათი შესრულების მიმდინარეობაზე;

ზ) ორგანიზაციას უწევს შემოსავლების დამუშავებას გადასახადის სახეების, ტერიტორიული ერთეულების, ინსპექციების, ეკონომიკის ძირითადი დარგების მიხედვით;

თ) ამზადებს საგადასახადო შემოსავლების მობილიზაციის და მათი აკრეფის გაუმჯობესების შესახებ წინადადებებს და ანალიტიკურ ინფორმაციას;

ი) ახდენს საგადასახადო შემოსავლების მიმდინარეობის, მათ შორის, ეკონომიკის დარგების და რაიონების მიხედვით, აგრეთვე დაბეგვრის საკითხებზე აქტუალური ინფორმაციების და მასალების მომზადებას;

კ) აწარმოებს საგადასახადო ბაზის საპროგნოზო გაანგარიშებებს ფინანსთა სამინისტროს მიერ დაშვებული წესით;

ლ) კომპეტენციის ფარგლებში შეიმუშავებს ინსტრუქციის, მეთოდური მითითებების და სხვა სამართლებრივი აქტების პროექტებს;

მ) თავისი კომპეტენციის ფარგლებში საგადასახადო ორგანოებს უწევს პრაქტიკულ დახმარებებს;

ნ) კომპეტენციის ფარგლებში ასრულებს სამსახურის უფროსის სხვა დავალებებს.

12. საფინანსო-სამეურნეო სამმართველო:

ა) ახორციელებს სამსახურის ცენტრალურ აპარატში ბუღალტრულ აღრიცხვა-ანგარიშგებას და ბიუჯეტიდან გამოყოფილი და სხვა სახსრების საჭიროებისამებრ ხარჯვას;

ბ) საგადასახადო ინსპექციებიდან იღებს, აანალიზებს და ფინანსთა სამინისტროში წარადგენს ნაერთ ანგარიშებს;

გ) ადგენს საგადასახადო ინსპექციების ყოველწლიური ბიუჯეტის პროექტს და დასამტკიცებლად წარუდგენს ფინანსთა სამინისტროს;

დ) ახორციელებს საგადასახადო ორგანოებზე გამოყოფილი ხარჯების მუხლების მიხედვით განაწილებას და აწესებს მონიტორინგს მათ მიზნობრივ ხარჯვაზე;

ე) ახორციელებს კონტროლს საშტატო სახარჯთაღრიცხვო დისციპლინის დაცვაზე;

ვ) უზრუნველყოფს სამსახურის ამ მუხლში მითითებული ქვედანაყოფებისა და საგადასახადო ინსპექციების მატერიალურ-ტექნიკურ მომარაგებას გამოყოფილი დაფინანსების ფარგლებში ,,სახელმწიფო შესყიდვების შესახებ“ საქართველოს კანონის შესაბამისად;

ზ) უზრუნველყოფს სამსახურის ამ მუხლში მითითებულ ქვედანაყოფებზე რიცხული ქონების დაცვას, შენახვას და მათი ექსპლუატაციისათვის აუცილებელ მიმდინარე მომსახურებას;

თ) კომპეტენციის ფარგლებში ასრულებს სამსახურის უფროსის სხვა დავალებებს.

13. ადამიანური რესურსების მართვის სამმართველო:

ა) კომპეტენციის ფარგლებში ამზადებს მოხელეთა დანიშვნა-გათავისუფლების, წახალისებისა და დისციპლინური სახდელის შესახებ და კადრების საქმიანობასთან დაკავშირებული სხვა ინდივიდუალურ-სამართლებრივი აქტების პროექტებს;

ბ) ,,საჯარო სამსახურის შესახებ“ საქართველოს კანონის მოთხოვნათა შესაბამისად უზრუნველყოფს ნომენკლატურულ მოხელეთა პირადი საქმეების შედგენას, შრომის წიგნაკების აღრიცხვა-წარმოებას;

გ) ახორციელებს საგადასახადო ორგანოების საშტატო ნუსხის ფორმირებას;

დ) ახდენს მოხელეთა საპენსიო საბუთების გაფორმებას;

ე) საგადასახადო სისტემის მოსამსახურეებისათვის სახელმწიფო სპეციალური წოდებების მისანიჭებლად ამზადებს სათანადო მასალებს და ახდენს დანიშნულებისამებრ წარდგენას;

ვ) ორგანიზებას უკეთებს კონკურსებსა და ატესტაციების პროცესებში მონაწილეობის მიღების პროცედურებს;

ზ) კოორდინაციას უწევს კადრების კვალიფიკაციის ამაღლების, მოხელეთა პროფესიული მომზადების და გადამზადების პროცესს;

თ) ატარებს სათანადო ღონისძიებებს შრომის დისციპლინის დაცვის მიზნით;

ი) ამზადებს მასალებს სამსახურებრივი მოვალეობის შესრულების პროცესში გამოვლენილ დარღვევებზე გატარებული ღონისძიებების შესახებ;

კ) უზრუნველყოფს კადრების შესახებ ინფორმაციული მონაცემების კომპიუტერულ დამუშავებას და მონაცემთა ბანკის შექმნას;

ლ) უზრუნველყოფს თანამდებობის პირთა მიერ ქონებრივი მდგომარეობისა და საფინანსო დეკლარაციის და სხვა მოსამსახურეთა მიერ შემოსავლებისა და ქონებრივი მდგომარეობის დეკლარაციების შესაბამის ორგანოებში ჩაბარების ორგანიზებასა და გაკონტროლებას;

მ) კომპეტენციის ფარგლებში ასრულებს სამსახურის უფროსის სხვა დავალებებს.

    მუხლი 9. საგამოძიებო და ოპერატიულ-სამძებრო საქმიანობის საკითხებში შემოსავლების სამსახურის სტრუქტურული ერთეულები და მათი ფუნქციები

1. ამ მუხლში მითითებული სტრუქტურული ერთეულები თავიანთ ფუნქციებს ახორციელებენ საგამოძიებო და ოპერატიულ-სამძებრო საქმიანობის საკითხებთან მიმართებაში.

2. ამ მუხლში მითითებული სტრუქტურული ერთეულების თანამშრომელს უფლება აქვს შეინახოს, ატაროს და გამოიყენოს სამსახურებრივ-საშტატო და შესაბამისი კანონით ნებადართული სხვა სახის იარაღი.

3. სამსახურებრივი მოვალეობის შესრულებისას ამ მუხლში მითითებული სტრუქტურული ერთეულების თანამშრომელს მინიჭებული უფლებების ფარგლებში კანონით დადგენილი წესით უფლება აქვს გამოიყენოს ფიზიკური იძულება, სპეციალური საშუალებები და სამსახურებრივ-საშტატო და სამხედრო საბრძოლო იარაღი.

4. ამ მუხლში მითითებული სტრუქტურული ერთეულები კანონმდებლობით განსაზღვრული ამოცანების შესაბამისად თავიანთი კომპეტენციის ფარგლებში ვალდებულები არიან:

ა) გამოავლინონ, გახსნან და აღკვეთონ საფინანსო-ეკონომიკურ სფეროში დანაშაული და სხვა სამართალდარღვევა;

ბ) შეისწავლონ საფინანსო-ეკონომიკურ სფეროში დანაშაულისა და სხვა სამართალდარღვევების გამომწვევი მიზეზები და პირობები, მიიღონ ზომები მათ აღმოსაფხვრელად;

გ) საფინანსო-ეკონომიკურ სფეროში ჩადენილ დანაშაულზე დაიწყონ გამოძიება;

დ) კანონით დადგენილი წესით განიხილონ და მიიღონ გადაწყვეტილებები მათ კომპეტენციას მიკუთვნებულ სისხლის სამართლის დანაშაულისა და ადმინისტრაციულ სამართალდარღვევათა საქმეებზე;

ე) შეასრულონ მოსამართლის, პროკურორის წერილობითი დავალებები, მითითებები საფინანსო-ეკონომიკურ სფეროში საგამოძიებო ან ოპერატიულ-სამძებრო მოქმედებების შესრულების დროს. დახმარება აღმოუჩინონ მათ საგამოძიებო მოქმედებების წარმოებისას;

ვ) შესაძლებლობა მისცენ დაკავებულს ან დაპატიმრებულ პირს კანონის შესაბამისად განახორციელონ სამართლებრივი დაცვის უფლება;

ზ) შეასრულონ კანონმდებლობით გათვალისწინებული სხვა მოვალეობები.

5. სამსახურებრივი მოვალეობის შესრულებისას ამ მუხლში მითითებული სტრუქტურული ერთეულების თანამშრომელი ვალდებულია ზედმიწევნით დაიცვას მოქალაქის კანონიერი უფლებები. მოქალაქის უფლებების შეზღუდვა განახორციელოს მხოლოდ კანონით დადგენილი წესით. მოქალაქის უფლებების იძულებითი შეზღუდვის ყოველ ცალკეულ შემთხვევაში თანამშრომელი მოქალაქეს მის წინაშე წარდგომისას წარუდგენს პირადობის მოწმობას, განუმარტავს მისი უფლებების კონკრეტული შეზღუდვის გამოყენების საფუძველს. თანამშრომელი ვალდებულია მოქალაქესთან ურთიერთობისას ზუსტად დაიცვას სამსახურებრივი ეთიკის ნორმები.

6. ოპერატიული აღრიცხვის სამმართველოს ძირითადი ამოცანაა: ოპერატიული ინფორმაციის, ოპერატიული აღრიცხვის საქმეების და საიდუმლო თანამშრომელთა აპარატის აღრიცხვა. შესაბამისი დანაყოფებისათვის ოპერატიულ-სამძებრო საქმიანობის განხორციელებისათვის მეთოდური და პრაქტიკული დახმარების გაწევა. სისტემაში საიდუმლო რეჟიმის, კონსპირაციის დაცვის უზრუნველყოფა და კონტროლი.

7. სპეციალურ დავალებათა სამმართველოს ძირითადი ამოცანაა: საფინანსო-ეკონომიკურ სფეროში სამოხელეო დანაშაულის (მათ შორის, პირადი შემადგენლობის მიერ ჩადენილი დანაშაულის) და კორუფციულ გარიგებათა გამოვლენა-აღკვეთის მიზნით ოპერატიულ-სამძებრო ღონისძიებების განხორციელება; კომპეტენციის ფარგლებში სამსახურის უფროსის სპეციალურ დავალებათა შესრულება.

8. ოპერატიულ-ტექნიკური უზრუნველყოფის დეპარტამენტის ძირითადი ამოცანაა: ოპერატიულ-საგამოძიებო დანაყოფების ოპერატიულ-ტექნიკური უზრუნველყოფა, სპეციალური საშუალებების და სპეციალიზირებული დანაყოფების გამოყენებით ოპერატიულ-სამძებრო ღონისძიებების განხორციელება.

9. სტატისტიკური აღრიცხვისა და საინფორმაციო სამმართველოს ძირითადი ამოცანაა: სისტემაში დანაშაულობათა (მათში მონაწილე პირთა) და სამართალდარღვევათა აღრიცხვა-სისტემატიზაცია, სტატისტიკური ანალიზი, საინფორმაციო საძიებო კომპიუტერული სისტემების დანერგვა და ექსპლუატაცია. სახელმწიფო დაწესებულებებიდან, საბაჟო და საგადასახადო სამსახურებიდან, ასევე კანონით დასაშვები წყაროებიდან ფუნქციონირებისათვის საჭირო ინფორმაციის მოგროვება, სისტემატიზაცია და მათი ოპერატიულ-საგამოძიებო ორგანოებისათვის მიწოდება; შესაბამისი დანაყოფებიდან დადგენილი წესით გაწეული მუშაობის შედეგების, ასევე მათი კონტროლის განხორციელების მიზნით ანგარიშების მიღება, თავისი კომპეტენციის ფარგლებში სისტემატიზაცია და ანალიზი; მუშაობის შემაჯამებელი ანგარიშების მომზადება.

10. სპეციალურ გამოკვლევათა და ფინანსური ექსპერტიზის დეპარტამენტის ძირითადი ამოცანებია: საჭიროების შემთხვევაში რევიზიის, ინვენტარიზაციის, შემოწმებების და ფინანსურ სფეროში სპეციალური გამოკვლევების ჩატარება გამოძიებისათვის შესაბამისად მიღებულ შედეგებზე დასკვნების (დოკუმენტების) წარდგენა, ასევე წინასწარი გამოძიების სტადიაზე ფინანსური ექსპერტიზის ორგანიზება და განხორციელება.

11. სამართლებრივ საკითხთა და საერთაშორისო ურთიერთობათა სამსახურის ძირითადი ამოცანაა: საფინანსო-ეკონომიკურ სფეროში დანაშაულის წინააღმდეგ ბრძოლის საქმეში სხვა ქვეყნის სამართალდამცავ ორგანოებთან და საერთაშორისო ორგანიზაციებთა თანამშრომლობა, მიმოწერის ორგანიზება, ამ მუხლში მითითებული სტრუქტურული ერთეულების საქმიანობის მარეგულირებელი საკანონმდებლო ნორმატიული აქტების მომზადების ორგანიზება; სამსახურში საჩივრებისა და განცხადებების განხილვა (სამოქმედო დაცვის საკითხებზე); სამსახურის ინტერესების წარმოდგენა და დაცვა სასამართლოსა და სხვა ორგანოებში (გარდა სისხლის სამართლის საქმეებისა) სამართლებრივი საკითხების განხილვისას.

12. საზოგადოებასთან ურთიერთობის სამსახურის ძირითადი ამოცანაა: მასობრივი ინფორმაციის საშუალებებთან, არასამთავრობო და სხვა საზოგადოებრივ ორგანიზაციებთან სამსახურის ურთიერთობის უზრუნველყოფა და ხელშეწყობა, საზოგადოების ინფორმირება სამსახურის კომპეტენციას მიკუთნებული საქმიანობის განხორციელების თაობაზე.

13. ამ პუნქტით დადგენილ უფლებამოსილებას ახორციელებენ საგამოძიებო დეპარტამენტის ოპერატიულ-საგამოძიებო დანაყოფების (მთავარი სამმართველო, სამმართველო, განყოფილება) უფროსები და მათი მოადგილეები, კერძოდ:

ა) ხელმძღვანელობენ ოპერატიულ-საგამოძიებო ორგანოების მუშაობას და პასუხს აგებენ მათ წინაშე მდგარი ამოცანების შესრულებაზე;

ბ) სწავლობენ და აანალიზებენ ხაზობრივად საფინანსო-ეკონომიკურ სფეროში დანაშაულის მდგომარეობას, მასთან ბრძოლის შედეგებს, სახავენ და ახორციელებენ ღონისძიებებს ამ მიმართულებით მუშაობის გაუმჯობესების მიზნით;

გ) ადგენენ დანაყოფის სამუშაო და სპეციალურ გეგმებს, აწესებენ კონტროლს მათ შესრულებაზე, აჯამებენ დანაყოფის მიერ გაწეულ მუშაობას, შეიმუშავებენ და წარუდგენენ სამსახურის ხელმძღვანელობას წინადადებებს დანაყოფის მუშაობის შემდგომი სრულყოფის თაობაზე;

დ) უზრუნველყოფენ პირადი შემადგენლობის საქმიანობაში კანონიერებისა და პირადი დისციპლინის დაცვას, დახმარებას უწევენ მათ, რათა სისტემატურად აიმაღლონ პროფესიული მომზადების დონე; აფასებენ მათ მიერ გაწეულ მუშაობას და სამსახურის ხელმძღვანელობას წარუდგენენ წინადადებებს დისციპლინური პასუხისგებლობის ან წახალისების გამოყენების შესახებ;

ე) კომპეტენციის ფარგლებში აწარმოებენ მიმოწერას მათ წინაშე მდგარი ამოცანების შესაბამისად;

ვ) ორგანიზაციას უწევენ მოქალაქეთა განცხადებების და საჩივრების დროულ და ხარისხიან განხილვას;

ზ) პირადად გააჩნიათ ოპერატიული წყაროები და მონაწილეობენ განსაკუთრებულ საქმეებთან დაკავშირებულ ოპერატიულ-სამძებრო ღონისძიებებში. აძლევენ მითითებებსა და რეკომენდაციებს დანაყოფის პირად შემადგენლობას ოპერატიულ-სამძებრო საქმიანობის განხორციელებაში;

თ) განიხილავენ საფინანსო-ეკონომიკურ სფეროში ადმინისტრაციულ სამართალდარღვევათა საქმეებს, კანონმდებლობის შესაბამისად დამრღვევს ადებენ ადმინისტრაციულ სახდელს;

ი) უწყებრივ და ორგანიზაციულ კონტროლს უწევენ მის დაქვემდებარებაში მყოფ გამომძიებლებს, აკონტროლებენ მათ მიერ საშემსრულებლო და სამსახურებრივი დისციპლინის დაცვას;

კ) უწყებრივ და ორგანიზაციულ კონტროლს უწევენ იმ მოქმედებათა შესრულებას, რომლებიც დანაშაულის გამოვლენისა და თავიდან აცილებისკენაა მიმართული;

ლ) კომპეტენციის ფარგლებში იღებენ გადაწყვეტილებებს ოპერატიულ-სამძებრო საქმიანობის განხორციელებაზე;

მ) საქართველოს კანონმდებლობის შესაბამისად სარგებლობენ სხვა უფლებამოსილებებით.

14. ამ პუნქტით დადგენილ უფლებამოსილებას ახორციელებენ ოპერატიულ-სამძებრო დანაყოფების (დეპარტამენტი, სამმართველო, განყოფილება) უფროსები და მათი მოადგილეები, კერძოდ:

ა) კომპეტენციის ფარგლებში სწავლობენ და აანალიზებენ დანაშაულის მდგომარეობას, მასთან ბრძოლის შედეგებს, სახავენ და ახორციელებენ ღონისძიებებს მუშაობის გაუმჯობესების მიზნით;

ბ) ადგენენ დანაყოფის სამუშაო და სპეციალურ გეგმებს, აწესებენ კონტროლს მათ შესრულებაზე, აჯამებენ დანაყოფის მიერ გაწეულ მუშაობას, შეიმუშავებენ და წარუდგენენ სამსახურის ხელმძღვანელობას წინადადებებს დანაყოფის მუშაობის შემდგომი სრულყოფის თაობაზე;

გ) უზრუნველყოფენ პირადი შემადგენლობის საქმიანობაში კანონიერებისა და პირადი დისციპლინის დაცვას, დახმარებას უწევენ მათ, რათა სისტემატურად აიმაღლონ პროფესიული მომზადების დონე; აფასებენ მათ მიერ გაწეულ მუშაობას და სამსახურის ხელმძღვანელობას წარუდგენენ წინადადებებს დისციპლინური პასუხისგებლობის ან წახალისების გამოყენების შესახებ;

დ) კომპეტენციის ფარგლებში აწარმოებენ მიმოწერას მათ წინაშე მდგარი ამოცანების შესაბამისად;

ე) ორგანიზებას უწევენ მოქალაქეთა განცხადებების და საჩივრების დროულ და ხარისხიან განხილვას;

ვ) იღებენ გადაწყვეტილებას მათ წარმოებაში არსებული მასალების საგამოძიებო ორგანოებისათვის გადაცემაზე;

ზ) პირადად გააჩნიათ ოპერატიული წყაროები და მონაწილეობენ განსაკუთრებულ საქმეებთან დაკავშირებულ ოპერატიულ-სამძებრო ღონისძიებებში. აძლევენ მითითებებსა და რეკომენდაციებს დანაყოფის პირად შემადგენლობას ოპერატიულ-სამძებრო საქმიანობის განხორციელებაში;

თ) კომპეტენციის ფარგლებში განიხილავენ ადმინისტრაციულ სამართალდარღვევათა საქმეებს, კანონმდებლობის შესაბამისად დამრღვევს ადებენ ადმინისტრაციულ სახდელს;

ი) ახორციელებენ კანონმდებლობით მინიჭებულ სხვა უფლებამოსილებებს.

15. საგამოძიებო დეპარტამენტის ძირითადი ამოცანებია:

ა) საფინანსო-ეკონომიკის სფეროში დანაშაულისა და სხვა სამართალდარღვევების გამოვლენა-აღკვეთა, მათზე სათანადო რეაგირება, მათში მონაწილე პირის ან პირების დადგენა, მათ მიმართ კანონმდებლობით გათვალისწინებული ღონისძიებების განხორციელება;

ბ) საფინასო-ეკონომიკურ სფეროში სამოხელეო დანაშაულისა და კორუფციულ გარიგებათა პრევენცია, აღკვეთა და გამოვლენა;

გ) დანაშაულის ნიშნების არსებობისას სისხლის სამართლის საპროცესო კანონმდებლობის შესაბამისად წინასწარი გამოძიების წარმოება;

დ) მოსამართლისა და პროკურორის წერილობითი დავალების, მითითებების შესრულება, საფინანსო-ეკომომიკურ სფეროში საგამოძიებო მოქმედებების წარმოებისას კომპეტენციის ფარგლებში მათთვის დახმარების გაწევა;

ე) დანაშაულის გამოვლენა-აღკვეთის მიზნით ოპერატიულ-სამძებრო საქმიანობა;

ვ) საბაჟო და საგადასახადო სახელმწიფო პოლიტიკის განხორციელებისათვის ხელის შეწყობა, რეკომენდაციათა შემუშავება ამ ურთიერთობის გაუმჯობესებისა და ბიუჯეტში გადასახადების სრულად და დროულად მობილიზაციის კუთხით;

ზ) საფინანსო-საბიუჯეტო და ფულად-საკრედიტო ურთიერთობათა სფეროში კანონმდებლობის დარღვევის ხელშემწყობი მიზეზების გამოვლენა, პირობების შესწავლა, ანალიზი და რეკომენდაციების შემუშავება.

16. საგამოძიებო დეპარტამენტის უფროსი:

ა) ხელმძღვანელობს დეპარტამენტის მუშაობას და პასუხს აგებს მის წინაშე მდგარი ამოცანების შესრულებაზე;

ბ) არის ოპერატიულ-საგამოძიებო ორგანოს უფროსი, უწყებრივ და ორგანიზაციულ კონტროლს უწევს მის დაქვემდებარებაში არსებულ საგამოძიებო დანაყოფებს და გამომძიებლებს, აკონტროლებს მათ მიერ საშემსრულებლო და სამსახურებრივი დისციპლინის დაცვას;

გ) უწყებრივ და ორგანიზაციულ კონტროლს უწევს იმ მოქმედებათა შესრულებას, რომლებიც დანაშაულის გამოვლენისა და თავიდან აცილებისკენაა მიმართული;

დ) ხელმძღვანელობს ოპერატიულ-სამძებრო ღონისძიებებს დანაშაულის გამოვლენის, დამნაშავე პირის დადგენა-დაკავების და დანაშაულის თავიდან აცილების მიზნით;

ე) კომპეტენციის ფარგლებში იღებს გადაწყვეტილებებს ოპერატიულ-სამძებრო საქმიანობის განხორციელებაზე;

ვ) ახორციელებს ოპერატიული ორგანოების თანამშრომელთა სამსახურებრივ ზედამხედველობას;

ზ) მონაწილეობს სამსახურის ოპერატიულ-საგამოძიებო ორგანოების თანამშრომელთა შერჩევასა და განაწილებაში;

თ) ანგარიშვალდებულია სამსახურის უფროსის წინაშე;

ი) საქართველოს კანონმდებლობის შესაბამისად სარგებლობს სხვა უფლებამოსილებებით.

17. საგამოძიებო დეპარტამენტის სტრუქტურული ერთეულებია:

ა) განსაკუთრებულ მნიშვნელოვან საქმეთა სამმართველო;

ბ) პირველი ოპერატიულ-საგამოძიებო სამმართველო;

გ) მეორე ოპერატიულ-საგამოძიებო სამმართველო;

დ) თბილისის მთავარი სამმართველო;

ე) ქვემო ქართლის სამმართველო;

ვ) კახეთის სამმართველო;

ზ) მცხეთა-მთიანეთის სამმართველო;

თ) შიდა ქართლის სამმართველო;

ი) სამცხე-ჯავახეთის სამმართველო;

კ) იმერეთის, რაჭა-ლეჩხუმის, გურიის სამმართველო;

ლ) სამეგრელო-ზემო სვანეთის სამმართველო;

მ) აჭარის სამმართველო.

18. საგამოძიებო დეპარტამენტის განსაკუთრებულ მნიშვნელოვან საქმეთა სამმართველოს ძირითადი ამოცანაა: აწარმოოს რთული, მრავალეპიზოდიანი, აგრეთვე საგამოძიებო დეპარტამენტის უფროსის გადაწყვეტილებით განსაზღვრული სხვა სისხლის სამართლის საქმეების გამოძიება. საგამოძიებო დეპარტამენტის საგამოძიებო ორგანოებს პერიოდულად გაუწიოს მეთოდური და პრაქტიკული დახმარება დანაშაულის გახსნისა და გამოძიების სრულყოფის მიზნით.

19. საგამოძიებო დეპარტამენტის პირველი ოპერატიულ-საგამოძიებო სამმართველოს ძირითადი ამოცანაა: ქვეყნის მასშტაბით აქციზური საქონლის უკანონო ბრუნვის სფეროში დანაშაულის გამოვლენა-აღკვეთის, მისი თავიდან აცილების მიზნით ოპერატიულ-სამძებრო ღონისძიებების ორგანიზება-განხორციელება, შესაბამისად, კომპეტენციის ფარგლებში, სისხლის სამართლის საქმეების წინასწარი გამოძიების წარმოება. ამ სფეროში დანაშაულის წინააღმდეგ ბრძოლის მდგომარეობის ხაზობრივი ანალიზი; დანაშაულის სახეების, ხერხების, მეთოდების განსაზღვრა და სათანადო ოპერატიულ-სამძებრო ღონისძიებების ორგანიზება; საგამოძიებო დეპარტამენტის ტერიტორიულ ორგანოებში ამ მიმართულებით ოპერატიულ-სამძებრო საქმიანობის ორგანიზება და კოორდინაცია.

20. საგამოძიებო დეპარტამენტის მეორე ოპერატიულ-საგამოძიებო სამმართველოს ძირითადი ამოცანაა: საბაჟო სფეროში დანაშაულის გამოვლენა-აღკვეთის, მისი თავიდან აცილების მიზნით ოპერატიულ სამძებრო ღონისძიებების ორგანიზება-განხორციელება, შესაბამისად, კომპეტენციის ფარგლებში, სისხლის სამართლის საქმეების წინასწარი გამოძიების წარმოება. ამ სფეროში დანაშაულის წინააღმდეგ ბრძოლის მდგომარეობის ანალიზი; დანაშაულის სახეების, ხერხების, მეთოდების განსაზღვრა და სათანადო ოპერატიულ-სამძებრო ღონისძიებების ორგანიზება; საგამოძიებო დეპარტამენტის ტერიტორიულ ორგანოებში საბაჟო სფეროში დანაშაულის წინააღმდეგ ბრძოლის კუთხით ოპერატიულ-სამძებრო საქმიანობის ორგანიზება და კოორდინაცია.

21. საგამოძიებო დეპარტამენტის ტერიტორიული ოპერატიულ-საგამოძიებო ორგანოების ძირითადი ამოცანებია: სამოქმედო ტერიტორიაზე საფინანსო-ეკონომიკურ სფეროში დანაშაულისა და სამართალდარღვევების გამოვლენა-აღკვეთა; დანაშაულის შესახებ განცხადებებისა და შეტყობინებების მიღება, რეგისტრაცია და რეაგირება; საფინანსო-ეკონომიკურ სფეროში ჩადენილ დანაშაულთა გახსნა, მათი ყოველმხრივი, სრული და ობიექტური გამოძიება; საქართველოს სისხლის სამართლის საპროცესო კოდექსით მისთვის მინიჭებული უფლებამოსილების განხორციელება. დანაშაულის გამოვლენა-აღკვეთის მიზნით ოპერატიულ-სამძებრო საქმიანობა. ადმინისტრაციულ სამართალდარღვევებზე კანონით დადგენილი წესით რეაგირება. სამოქმედო ტერიტორიაზე მოსამართლისა და პროკურორის წერილობითი დავალების, მითითებების შესრულება, საფინანსო-ეკონომიკურ სფეროში საგამოძიებო მოქმედების წარმოებისას მათთვის დახმარების აღმოჩენა.

22. საგამოძიებო დეპარტამენტის ტერიტორიულ ოპერატიულ-საგამოძიებო ორგანოებს სამოქმედო ტერიტორიებად განესაზღვროს:

ა) თბილისის მთავარი სამმართველო – ქ. თბილისის ადმინისტრაციული ტერიტორიის ფარგლები;

ბ) ქვემო ქართლის სამმართველო – ქ. რუსთავის, გარდაბნის, მარნეულის, ბოლნისის, დმანისის, წალკის, თეთრიწყაროს რაიონების ადმინისტრაციული ტერიტორიის ფარგლები;

გ) კახეთის სამმართველო – თელავის, საგარეჯოს, გურჯაანის, დედოფლისწყაროს, სიღნაღის, ყვარლის, ახმეტისა და ლაგოდეხის რაიონების ადმინისტრაციული ტერიტორიის ფარგლები;

დ) მცხეთა-მთიანეთის სამმართველო – ქ. მცხეთის, დუშეთის, ახალგორის, თიანეთისა და ყაზბეგის რაიონების ადმინისტრაციული ტერიტორიის ფარგლები;

ე) შიდა ქართლის სამმართველო – გორის, კასპის, ქარელისა და ხაშურის რაიონების ადმინისტრაციული ტერიტორიის ფარგლები;

ვ) სამცხე-ჯავახეთის სამმართველო – ქ. ბორჯომის, ახალციხის, ადიგენის, ასპინძის, ახალქალაქისა და ნინოწმინდის რაიონების ადმინისტრაციული ტერიტორიის ფარგლები;

ზ) იმერეთის, რაჭა-ლეჩხუმის, გურიის სამმართველო – ქ. ქუთაისის, ჭიათურის, საჩხერის, ზესტაფონის, თერჯოლის, ტყიბულის, ბაღდათის, ვანის, სამტრედიის, ხონის, ხარაგაულის, წყალტუბოს, ამბროლაურის, ონის, ცაგერის ლენტეხის, ლანჩხუთის, ჩოხატაურისა და ოზურგეთის რაიონების ადმინისტრაციული ტერიტორიის ფარგლები;

თ) სამეგრელო-ზემო სვანეთის სამმართველო – ქ. ფოთის, ზუგდიდის, წალენჯიხის, მესტიის, ჩხოროწყუს, მარტვილის, ხონის, აბაშის, სენაკის რაიონების ადმინისტრაციული ტერიტორიის ფარგლები;

ი) აჭარის სამმართველო – ქ. ბათუმის, ქობულეთის, ხელვაჩაურის, ქედის, შუახევისა და ხულოს რაიონების ადმინისტრაციული ტერიტორიის ფარგლები.

23. საქართველოს ტერიტორიული მთლიანობის აღდგენამდე აფხაზეთის ავტონომიური რესპუბლიკის ტერიტორიაზე ოპერატიულ-საგამოძიებო ორგანოების ფუნქციებს ახორციელებს საგამოძიებო დეპარტამენტის სამეგრელო-ზემო სვანეთის სამმართველო, ხოლო ყოფილი სამხრეთ ოსეთის ავტონომიური ოლქის ტერიტორიაზე – შესაბამისად საგამოძიებო დეპარტამენტის შიდა ქართლის სამმართველო.

24. სპეციალური დანიშნულების რაზმის ძირითადი ამოცანაა: სამსახურის ოპერატიული დანაყოფების და სხვა სტრუქტურული ერთეულებისათვის დანაშაულისა და სამართალდარღვევების გამოვლენა-აღკვეთისას, საგამოძიებო მოქმედებების ჩატარებისას და სხვა ამოცანების განხორციელებისას დახმარების აღმოჩენა. სამსახურის შენობა-ნაგებობების, დანაშაულის ადგილების, მტკიცებულებებისა და სხვა სპეციალური სადგომების დაცვა დანაშაულებრივი ხელყოფისაგან. სპეციალური დანიშნულების რაზმის შემადგენლობაში ფუნქციონირებს სამორიგეო განყოფილება, რომლის ძირითადი ამოცანაა: სამსახურის შენობაში მოქალაქეთა დაშვების ორგანიზება. ამ მუხლში მითითებული სტრუქტურული ერთეულების მიერ დაკავებულ და დაპატიმრებულ პირთა აღრიცხვა. დღეღამური ოპერატიული ვითარების ინფორმაციის მიღება-სისტემატიზაცია, სამსახურზე რიცხული ცეცხლსასროლი იარაღის და კავშირგაბმულობის საშუალებების გაცემის ორგანიზება, სამსახურის სპეციალური დანიშნულების რაზმზე რიცხული ავტოტრანსპორტის მომსახურება, განგაშის შემთხვევაში ხელმძღვანელობის ინფორმირება, საგანგებო შემთხვევაში სამსახურის შენობიდან თანამშრომელთა ევაკუაციის ორგანიზება.

25. კანცელარიის ძირითადი ამოცანაა: სამსახურში შემოსული კორესპონდენციების აღრიცხვა და დამუშავება; შესაბამის დანაყოფებში საქმისწარმოების, საჩივარ-განცხადებების განხილვისა და მოქალაქეთა მიღების ორგანიზება. განსაკუთრებით მნიშვნელოვანი საიდუმლო, სრულიად საიდუმლო კორესპონდენციების, ამანათების და სხვა სახის დოკუმენტაციის ადრესატებისათვის დადგენილი მარშრუტითა და წესით ოპერატიული მიწოდება. საჯარო ინფორმაციის გაცემის ორგანიზება.

26. კადრების სამმართველოს ძირითადი ამოცანებია: სისტემაში ერთიანი საკადრო პოლიტიკის განხორციელება, პირადი შემადგენლობის დაკომპლექტება და თვისობრივი გაუმჯობესება, მათი შერჩევა, განაწილება და პროფესიული დონის ამაღლება. საორგანიზაციო-საშტატო მუშაობის ორგანიზაცია. კომპეტენციის ფარგლებში მოსამსახურეთა მიერ სამსახურებრივი გადაცდომების გამოვლენა და სათანადო რეაგირება.

27. მატერიალურ-ტექნიკური და ფინანსური უზრუნველყოფის სამსახურის ძირითადი ამოცანაა: შესაბამისი დანაყოფების ეფექტური ფუნქციონირების ფინანსური და მატერიალურ-ტექნიკური უზრუნველყოფა. მითითებული დანაყოფების ცენტრალიზებული მომარაგება ყველა სახის კმაყოფით, კვარტალური და წლიური საფინანსო და სტატისტიკური ანგარიშების შედგენა და მათი დროულად წარდგენა.

28. ბუღალტერიის ძირითადი ამოცანაა: შესაბამისი დანაყოფების ფინანსური უზრუნველყოფა; ნაერთი ბიუჯეტის პროექტისა და ნაერთი ბალანსების შედგენა; ცენტრალური ბიუჯეტიდან გამოყოფილ ასიგნებათა განაწილება და ხარჯვის კონტროლის განხორციელება.

    მუხლი 10. საბაჟო საკითხებში შემოსავლების სამსახურის სტრუქტურული ერთეულები და მათი ფუნქციები

1. ამ მუხლში მითითებული სტრუქტურული ერთეულები თავიანთ ფუნქციებს ახორციელებენ საბაჟო საკითხებთან მიმართებაში.

2. საბაჟო საქმის ორგანიზაციის მეთოდოლოგიის სამმართველოს ფუნქციებია:

ა) საბაჟო კანონმდებლობის ნორმათა ზუსტი და ერთგვაროვანი გამოყენების და სრულყოფის მიზნით:

ა.ა) საკანონმდებლო ცვლილებებისა და დამატებების თაობაზე პროექტების მომზადება;

ა.ბ) საბაჟო კოდექსისა და სხვა საკანონმდებლო აქტებიდან გამომდინარე კანონქვემდებარე აქტების პროექტების, კანონქვემდებარე აქტებში შესატანი ცვლილებებისა და დამატებების შემუშავება;

ა.გ) საბაჟო კონტროლისა და საბაჟო პროცედურების, აგრეთვე საბაჟო ორგანოების და მათი სტრუქტურული ერთეულების მუშაობის ტექნოლოგიური სქემების შემუშავება და მათი სრულყოფა;

ა.დ) საბაჟო კანონმდებლობის გამოყენების თაობაზე მეთოდური მითითებების შედგენა და საბაჟო ორგანოებისათვის დაგზავნა;

ა.ე)საბაჟო კანონმდებლობის ნორმათა (მათ შორის, განხორციელებული ცვლილებებისა და დამატებების) ეფექტურობის შესწავლა, შესწავლის შედეგებიდან გამომდინარე – შესაბამისი რეკომენდაციებისა და პროექტების შემუშავება;

ა.ვ)საბაჟო საქმის მარეგულირებელი ნორმატიული აქტების შესწავლა, საკანონმდებლო ხარვეზების (ნორმათა კოლიზია, საკანონმდებლო ვაკუუმი) დადგენა და აღმოფხვრისათვის შესაბამისი წინადადებების შემუშავება;

ა.ზ) საბაჟო საქმის მარეგულირებელი ნორმატიული აქტების სისტემატიზაცია;

ბ) ამ პუნქტის ,,ა“ ქვეპუნქტით განსაზღვრული ფუნქციების შესრულების მიზნით, სამსახურის შესაბამისი ქვედანაყოფების და საბაჟო ორგანოების მიერ წინასწარი ოპერაციების, საბაჟო კონტროლისა და საბაჟო პროცედურების განხორციელების პროცესში საბაჟო კანონმდებლობის (მათ შორის, საერთაშორისო ხელშეკრულებების) ნორმათა გამოყენების პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) სისტემატურად, დადგენილი პერიოდულობით გეგმური და არაგეგმური თემატური შესწავლა, ხოლო შესწავლის შედეგებიდან გამომდინარე – შესაბამისი რეკომენდაციებისა და პროექტების შემუშავება;

გ) საბაჟო საქმის (მათ შორის, საერთაშორისო საბაჟო თანამშრომლობის) მომწესრიგებელ საერთაშორისო ხელშეკრულებებთან მიერთების, ასევე ამ ხელშეკრულებებში ცვლილებებისა და დამატებების შეტანის თაობაზე რეკომენდაციების შემუშავება; შესაბამის საერთაშორისო ორგანიზაციებთან მუშაობის წარმართვა.

3. მომსახურების სამმართველოს ფუნქციებია:

ა) ფიზიკური და იურიდიული პირებისათვის, ორგანიზაციებისათვის კონსულტაციების გაწევა საბაჟო კანონმდებლობის საკითხებზე, შესაბამისი განცხადებების და მომართვების განხილვა;

ბ) ფიზიკური და იურიდიული პირების, ორგანიზაციების ინფორმირება საბაჟო კანონმდებლობის საკითხებზე, მასობრივი ინფორმაციის საშუალებების (საინფორმაციო ბუკლეტების, ბეჭდვითი გამოცემების, სატელევიზიო გადაცემების და ა.შ.) მეშვეობით;

გ) ოპერატიული სამსახურებრივი ინფორმაციის მიღებისა და გადაცემის უზრუნველყოფა;

დ) კომპეტენციის ფარგლებში რეგიონალური საბაჟოების შესაბამისი სტრუტურული ერთეულების საქმიანობის ზედამხედველობა.

4. საბაჟო კონტროლის ორგანიზაციის სამმართველოს ფუნქციებია:

ა) ,,ლიცენზიებისა და ნებართვების შესახებ“ საქართველოს კანონით საბაჟო სამსახურის ქვემდებარეობას მიკუთვნებული ლიცენზიებისა და ნებართვების გაცემის და გაუქმების, სალიცენზიო და სანებართვო პირობების დარღვევასთან დაკავშირებით შესაბამისი სანქციების გამოყენების თაობაზე საკითხების განხილვა და შესაბამისი გადაწყვეტილებების პროექტების მომზადება;

ბ) სალიცენზიო და სანებართვო პირობების შესრულებაზე კანონმდებლობით დადგენილი წესით კონტროლი;

გ) საბაჟო კონტროლის განხორციელების და საბაჟო კონტროლის შედეგების რეალიზაციის ერთიანი პრინციპებისა და სტანდარტების დანერგვის, საბაჟო კონტროლის სრულყოფისა და ეფექტურობის გაზრდის მიზნით:

გ.ა.)საბაჟო ორგანოების მიერ წინასწარი ოპერაციების, საბაჟო საზღვრის გადმოკვეთის (გადაკვეთის), საქონლის დროებითი შენახვის, მისი ტრანსპორტირების და გადაადგილების, საბაჟო პროცედურების განხორციელების პროცესში საბაჟო კონტროლის განხორციელების პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) სისტემატურად, დადგენილი პერიოდულობით გეგმური და არაგეგმური შემოწმება;

გ.ბ.) საბაჟო ორგანოების მიერ საბაჟო რეჟიმის პირობების შესრულებაზე კონტროლის განხორციელების პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) სისტემატურად, დადგენილი პერიოდულობით გეგმური და არაგეგმური შემოწმება;

გ.გ.) შემოწმების შედეგების განზოგადებისა და ანალიზის, აგრეთვე საზღვარგარეთის ქვეყნების გამოცდილების შესწავლის საფუძველზე სამსახურის ხელმძღვანელობისათვის კანონმდებლობაში აუცილებელი ცვლილებებისა და დამატებების განხორციელების თაობაზე რეკომენდაციების წარდგენა, საბაჟო საქმის ორგანიზაციის მეთოდოლოგიის სამმართველოსთან ერთობლივად საბაჟო კონტროლის განხორციელების საკითხებზე შესაბამისი მეთოდური მითითებების მომზადება და დაგზავნა;

დ) საფინანსო-სამეურნეო საქმიანობის შემოწმების ორგანიზება – რეგიონალური საბაჟოების მიერ საფინანსო-სამეურნეო საქმიანობის გასვლითი და კამერალური შემოწმების ჩატარების დაგეგმვა, ანალიზი და პრაქტიკის განზოგადება, გადამხდელთა მიმართ ჩასატარებელი გასვლითი გეგმური შემოწმების გეგმის დამტკიცების ორგანიზება და მისი შესრულების მონიტორინგი;

ე) საბაჟო ვალდებულების დაფარვის საგარანტიო (საბანკო გარანტია, დაზღვევა, დეპოზიტი და სხვა) სისტემის ფუნქციონირების ორგანიზება და საგარანტიო სისტემის ერთიანი სტანდარტების დანერგვა: საბაჟო ვალდებულების უზრუნველყოფის საშუალებების პირობების შემოწმება, საბაჟო ვალდებულების უპირობო გადახდის უზრუნველსაყოფად; საგარანტიო საშუალებების გამცემ პირებთან მუშაობის წარმართვა; საგარანტიო საშუალებების, საგარანტიო საშუალებების დამოწმებაზე უფლებამოსილ პირთა ვინაობისა და ხელმოწერის ნიმუშების, ბეჭდებისა და შტამპების ერთიანი ბაზის შექმნა, მასში ცვლილებების შეტანა; საბაჟო ორგანოების ინფორმირება; საგარანტიო საშუალებების გამცემ პირთა საბაჟო ორგანოს ტერიტორიაზე განთავსების თაობაზე წინადადებების მომზადება და განხილვა, გადაწყვეტილების პროექტის მომზადება;

ვ) სპეციალური სატვირთო-საბაჟო დეკლარაციის გაცემა, აღრიცხვა, კონტროლი და გაუქმება;

ზ) საქონლისა და სატრანსპორტო საშუალებების დანიშნულების საბაჟო ორგანოში წარდგენისათვის დადგენილი ვადებისა და პირობების შესრულებაზე, მათ შორის საბაჟო კონტროლის ქვეშ საქონლისა და სატრანსპორტო საშუალების აღრიცხვის მოწმობებით საქონლის შემოტანის და გადაადგილების პირობების შესრულებაზე კონტროლი (კამერალური და ამ პუნქტის ,,გ.ა.“ ქვეპუნქტით განსაზღვრული შემოწმება) და შესაბამისი რეაგირება;

თ) კომპეტენციის ფარგლებში რეგიონალური საბაჟოების შესაბამისი სტრუტურული ერთეულების საქმიანობის ზედამხედველობა, საბაჟო ორგანოებისათვის კომპეტენციის ფარგლებში პრაქტიკული დახმარების აღმოჩენა, საბაჟო კონტროლის ორგანიზაციისა და განხორციელების კონკრეტულ საკითხებზე შესასრულებლად სავალდებულო მითითებების მიცემა;

ი) წინადადებების შემუშავება საბაჟო კონტროლის განხორციელებისათვის საჭირო ინფრასტრუქტურის განვითარების, კონტროლის ახალი მეთოდების და ტექნიკური საშუალებების დანერგვის თაობაზე;

კ) საბაჟო გადასახდელების გადამხდელების და გადასახდელების სახეობებისდა მიხედვით საბიუჯეტო შემოსულობათა და ზედმეტად გადახდილი თანხების, ზედმეტად გადახდილი თანხების დაბრუნების, კანონმდებლობის დარღვევებისათვის გამოყენებული სანქციებისა და საურავების აღრიცხვის წარმოების ორგანიზება და ამ მიზნით, საბაჟო ორგანოების შესაბამისი ქვედანაყოფების საქმიანობის სისტემატური და გეგმური კონტროლი;

ლ) საგადასახადო დავალიანებათა (მათ შორის, საგადასახადო დავალიანებათა რესტრუქტურიზაციის და უიმედო საგადასახადო დავალიანებათა შესახებ მონაცემების) აღრიცხვისა და ანალიზის პროცესის უზრუნველყოფა და ორგანიზება, ელექტრონული ან სხვა სახით წარმოდგენილი ინფორმაციის საფუძველზე;

მ) საგადასახადო დავალიანებათა ამოღებისათვის საბაჟო ორგანოების მიერ ჩატარებული ღონისძიებების (მათ შორის, საგადასახადო ვალდებულებების შესრულების უზრუნველყოფის ღონისძიებების) ზედამხედველობა და კონტროლი;

ნ) საბაჟო ორგანოებისათვის მინიჭებული კომპეტენციის ფარგლებში, საგადასახადო ვალდებულებების რესტრუქტურიზაციაზე და დავალიანებათა უიმედოდ აღიარების თაობაზე შესაბამისი დოკუმენტაციის მომზადება;

ო) ამ პუნქტის ,,კ“ – ,,ნ“ ქვეპუნქტებით გათვალისწინებულ საკითხებთან დაკავშირებით კანონმდებლობაში განსახორციელებელ ცვლილებებსა და დამატებებზე, აგრეთვე შესაბამისი მეთოდური მითითებებების შემუშავებაზე ხელმძღვანელობისათვის რეკომენდაციების წარდგენა და საბაჟო საქმის ორგანიზაციის მეთოდოლოგიის სამმართველოსთან ერთობლივად ამ მეთოდური მითითებების მომზადება და დაგზავნა;

პ) საბაჟო ორგანოებისათვის კომპეტენციის ფარგლებში პრაქტიკული დახმარების გაწევა;

ჟ) რეგიონალური საბაჟოების მიერ საბაჟო ორგანოების ქვემდებარეობას მიკუთვნებულ სამართალდარღვევათა საქმეების განხილვის მონიტორინგი – ამ სამართალდარღვევებზე შესაბამისი სამართალწარმოების პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) სისტემატურად, დადგენილი პერიოდულობით გეგმური და არაგეგმური შემოწმება;

რ) საბაჟო ორგანოების ქვემდებარეობას მიკუთვნებულ სამართალდარღვევებზე საქმისწარმოება;

ს) საბაჟო სფეროში სამართალდარღვევების გამოვლენა-აღკვეთის საქმეში საგამოძიებო და სხვა უფლებამოსილ ორგანოებთან თანამშრომლობა, მათ შორის ერთობლივი ღონისძიებების შემუშავება და განხორციელება.

5. საბაჟო კონტროლის ორგანიზაციის სამმართველოს ფუნქციებში არ შედის ამ მუხლის მე-6 და მე-7 პუნქტებით გათვალისწინებული საკითხები.

6. ფიტოსანიტარიული, ვეტერინარული და სპეციალური კონტროლის სამმართველოს ფუნქციებია:

ა) საბაჟო ორგანოების მიერ ფიტოსანიტარიული, ვეტერინარული, რადიაციული და სავალუტო კონტროლის, იარაღის, ნარკოტიკულ საშუალებათა და პრეკურსორების, სამკურნალო საშუალებათა, ორმაგი დანიშნულების საქონლის, სახიფათო ნარჩენების საქართველოში შემოტანასა და საქართველოდან გატანაზე ზედამხედველობის განხორციელების, აგრეთვე საავტორო უფლებათა დაცვის მექანიზმების სრულყოფისა და ეფექტურობის გაზრდის მიზნით:

ა.ა) კონტროლის ცალკეული სახეობების განხორციელების პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) სისტემატურად, დადგენილი პერიოდულობით გეგმური და არაგეგმური შემოწმება;

ა.ბ) შემოწმების შედეგების განზოგადებისა და ანალიზის, აგრეთვე საზღვარგარეთის ქვეყნების გამოცდილების შესწავლის საფუძველზე სამსახურის ხელმძღვანელობისათვის კანონმდებლობაში აუცილებელი ცვლილებებისა და დამატებების განხორციელების თაობაზე რეკომენდაციების წარდგენა, საბაჟო საქმის ორგანიზაციის მეთოდოლოგიის სამმართველოსთან ერთობლივად კონტროლის განხორციელების საკითხებზე შესაბამისი მეთოდური მითითებების მომზადება და დაგზავნა;

ბ) კომპეტენციის ფარგლებში რეგიონალური საბაჟოების შესაბამისი სტრუტურული ერთეულების საქმიანობის ზედამხედველობა, საბაჟო ორგანოებისათვის კომპეტენციის ფარგლებში პრაქტიკული დახმარების აღმოჩენა, ამ პუნქტის ,,ა“ ქვეპუნქტში მითითებული კონტროლის ცალკეული სახეობების ორგანიზაციისა და განხორციელების კონკრეტულ საკითხებზე შესასრულებლად სავალდებულო მითითებების მიცემა;

გ) წინადადებების შემუშავება ამ პუნქტის ,,ა“ ქვეპუნქტში მითითებული კონტროლის სახეობების განხორციელებისათვის საჭირო ინფრასტრუქტურის განვითარების, კონტროლის ახალი მეთოდების და ტექნიკური საშუალებების დანერგვის თაობაზე.

7. საბაჟო ღირებულების და სასაქონლო ნომენკლატურის საკითხთა სამმართველოს ფუნქციებია:

ა) ჰარმონიზებული სისტემების და საგარეო-ეკონომიკური საქმიანობის სასაქონლო ნომენკლატურის საკითხებზე საკითხებზე მუშაობა, ჰარმონიზებული სისტემის ცვლილებების სისტემატიზაციის და ამ ცვლილებებთან სასაქონლო ნომენკლატურის შესაბამისობაში მოყვანის, აგრეთვე ამ სფეროში საქართველოს მიერ ნაკისრი ვალდებულებების შესრულების უზრუნველსაყოფად შესაბამისი რეკომენდაციების წარდგენა;

ბ) საქონლის საბაჟო ღირებულების განსაზღვრის საკითხებზე მუშაობა, აღნიშნული სფეროს მომწესრიგებელი საერთაშორისო (მათ შორის, რეგიონალური და ორმხრივი ხასიათის) ხელშეკრულებების მიღების და მათში ცვლილებებისა და დამატებების შეტანის თაობაზე ინფორმაციის სისტემატიზაცია, ამ სფეროში საქართველოს მიერ ნაკისრი ვალდებულებების შესრულების უზრუნველსაყოფად შესაბამისი რეკომენდაციების წარდგენა;

გ) ამ პუნქტის ,,ა“ და ,,ბ“ ქვეპუნქტებით გათვალისწინებულ საკითხებზე:

გ.ა)საკანონმდებლო ცვლილებებისა და დამატებების თაობაზე პროექტების მომზადება;

გ.ბ) კანონქვემდებარე ნორმატიული აქტების და მათში შესატანი ცვლილებებისა და დამატებების პროექტების შემუშავება;

გ.გ) საბაჟო კანონმდებლობის შესაბამის ნორმათა (მათ შორის, განხორციელებული ცვლილებებისა და დამატებების) ეფექტურობის და გამოყენების პრაქტიკის შესწავლა, შესწავლის შედეგებიდან გამომდინარე შესაბამისი რეკომენდაციებისა და პროექტების შემუშავება;

გ.დ) მუშაობის ტექნოლოგიური სქემების შემუშავება და მათი სრულყოფა, საბაჟო კანონმდებლობის გამოყენების თაობაზე მეთოდური მითითებების შედგენა და საბაჟო ორგანოებისადმი დაგზავნა;

გ.ე) საბაჟო საქმის მარეგულირებელი ნორმატიული აქტების შესწავლა, საკანონმდებლო ხარვეზების (ნორმათა კოლიზია, საკანონმდებლო ვაკუუმი) დადგენა და აღმოფხვრისათვის შესაბამისი პროექტების შემუშავება;

დ) საბაჟო ღირებულების განსაზღვრის და საგარეო-ეკონომიკური საქმიანობის ეროვნული სასაქონლო ნომენკლატურის მიხედვით კლასიფიკაციის სისწორის კონტროლი – ამ პუნქტის ,,ა“ და ,,ბ“ ქვეპუნქტებით გათვალისწინებულ საკითხებზე საქმიანობის პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) სისტემატურად, დადგენილი პერიოდულობით გეგმური და არაგეგმური შემოწმება;

ე) საბაჟო ღირებულების განსაზღვრის მეთოდების პრაქტიკული გამოყენებისათვის აუცილებელი საინფორმაციო ბაზების (მსგავსი და იდენტური საქონლის ფასების, საქონლის საბაჟო ღირებულების სარეზერვო მეთოდით განსაზღვრის დროს გამოსაყენებელ საქონელთა ფასების სისტემა და სხვა) შემუშავება, წარმოება და ოპერატიული განახლება;

ვ) კომპეტენციის ფარგლებში რეგიონალური საბაჟოების შესაბამისი სტრუტურული ერთეულების საქმიანობის ზედამხედველობა, საბაჟო ორგანოებისათვის საბაჟო ღირებულების განსაზღვრის და საგარეოეკონომიკური საქმიანობის ეროვნული სასაქონლო ნომენკლატურის მიხედვით კლასიფიკაციის საკითხებზე პრაქტიკული დახმარების აღმოჩენა – კონსულტაციების გაწევა და სადავო საკითხების განხილვა-გადაწყვეტა;

ზ) საბაჟო საქმის (მათ შორის, საერთაშორისო საბაჟო თანამშრომლობის) მომწესრიგებელ საერთაშორისო ხელშეკრულებებთან მიერთების, ასევე ამ ხელშეკრულებებში ცვლილებებისა და დამატებების შეტანის თაობაზე რეკომენდაციების შემუშავება, შესაბამის საერთაშორისო ორგანიზაციებთან მუშაობის წარმართვა.

8. ინფორმაციული უზრუნველყოფის სამმართველოს ძირითადი ფუნქციებია:

ა) საგარეო ვაჭრობის საბაჟო სტატისტიკის და სპეციალური საბაჟო სტატისტიკის წარმოება;

ბ) მონაცემთა ელექტრონული (ქსელური და ელექტრონული ინფორმაციის მატარებლების გამოყენებით დაცული) და არაელექტრონული ბაზების შექმნა, ოპერატიული განახლება, სისტემატიზაცია და წარმართვა;

გ) სამსახურის ხელმძღვანელობისათვის, აგრეთვე საბაჟო სამსახურის სტრუქტურული ერთეულებისათვის აუცილებელი ინფორმაციის მიწოდება;

დ) საბაჟო ორგანოების ინფორმაციულ-ტექნიკური და პროგრამული უზრუნველყოფის განვითარების გეგმების და ამ სფეროში სახელმწიფო შესყიდვების განხორციელების შესახებ წინადადებების შემუშავება და ხელმძღვანელობისათვის წარდგენა;

ე) ქსელების ადმინისტრირება და საბაჟო მონაცემთა ერთიანი ელექტრონული სისტემის (ASYCUDA) შეუფერხებელი ფუნქციონირების უზრუნველყოფა;

ვ) სამსახურის ელექტრონულ მონაცემთა ბაზაში პირთა დაშვების კონტროლის მიზნით ინდივიდუალური პაროლების გაცემა, აღრიცხვა, გაუქმება, აგრეთვე ამ მიზნით სხვა მექანიზმების გამოყენება.

9. ანალიტიკური სამმართველოს ძირითადი ფუნქციებია:

ა) ინფორმაციული ბაზების, სპეციალური საბაჟო სტატისტიკის მონაცემების, საბაჟო კანონმდებლობის დარღვევების თაობაზე არსებული, აგრეთვე საერთაშორისო საბაჟო თანამშრომლობის მექანიზმების გამოყენებით მიღებული ინფორმაციის გათვალისწინებით რისკის ფაქტორების გამოვლენა და ანალიზი, რისკების მენეჯმენტის თაობაზე წინადადებების შემუშავება და მათი განხორციელების კოორდინაცია;

ბ) საგარეო ვაჭრობის საბაჟო სტატისტიკის და სპეციალური საბაჟო სტატისტიკის მონაცემების, საგარეო-ეკონომიკური საქმიანობის რეგულირების არსებული სატარიფო და არასატარიფო მექანიზმების საგარეო-ეკონომიკური ურთიერთობების დინამიკაზე ზეგავლენის ანალიზი, შესაბამისი რეკომენდაციებისა და წინადადებების შემუშავება;

გ) საბაჟო გადასახდელების სახით სახელმწიფო ბიუჯეტში თანხების მობილიზების პროგნოზირება;

დ) საბაჟო პროცედურების განხორციელებისას პირების მიერ წარდგენილი დოკუმენტაციის და ინფორმაციის ანალიზი და შერჩევითი შემოწმება საერთაშორისო საბაჟო თანამშრომლობის მექანიზმების გამოყენებით და შესაბამისი რეაგირება.

10. იურიდიული სამმართველოს ძირითადი ფუნქციებია:

ა) კომპეტენციის ფარგლებში შესაბამისი მინდობილობის (რწმუნებულების) საფუძველზე სამსახურის ინტერესების წარმომადგენლობა სასამართლო და სხვა სახის დავებში;

ბ) სასამართლო და სხვა სახის დავების წარმოშობის მიზეზების ანალიზი და შესაბამისი რეკომენდაციების შემუშავება და ხელმძღვანელობისათვის წარდგენა;

გ) კომპეტენციის ფარგლებში რეგიონალური საბაჟოების იურიდიული სამსახურების საქმიანობის კოორდინაცია;

დ) სამსახურში შემოსული საჩივრებისა და პროტესტების (მათ შორის, ზედმეტად გადახდილი საბაჟო გადასახდელების თანხის ჩათვლის ან დაბრუნების და რეგიონალური საბაჟოს საბაჟო შეტყობინებაზე გადასახადის გადამხდელის მიერ წარდგენილი წერილობითი შესაგებლის შესახებ მიღებული გადაწყვეტილების თაობაზე საბაჟო სამსახურში შემოსული საჩივრების) განხილვა და შესაბამისი გადაწყვეტილებების პროექტების მომზადება.

11. ადმინისტრაციული სამმართველოს ძირითადი ფუნქციებია:

ა) შესაბამის საჯარო მოსამსახურეთა სამსახურში მიღების, სამსახურებრივი გადაადგილების, გათავისუფლების, წახალისებისა და დისციპლინური პასუხისმგებლობის ღონისძიებების გამოყენებისა და სხვა საკადრო საკითხების თაობაზე წარდგინებების შესაბამისად სამსახურის უფროსის ინდივიდუალური ადმინისტრაციულ-სამართლებრივი აქტების (ბრძანებების) პროექტების მომზადება; შრომითი ხელშეკრულებების (კონტრაქტების) გაფორმება; შესაბამის საჯარო მოსამსახურეთა სამსახურის აღწერილობების შემუშავება და დასამტკიცებლად წარდგენა; ნამსახურობის ნუსხის შედგენა; შესაბამის საჯარო მოსამსახურეთა პირადი საქმეებისა და შრომის წიგნაკების წარმოება; თავისი კომპეტენციის ფარგლებში ატესტაციის და ვაკანტურ სახელმწიფო თანამდებობაზე კონკურსის ჩატარების პროცესში მონაწილეობა; საჯარო მოსამსახურეთათვის კონსულტაციების გაწევა მათი სამართლებრივი მდგომარეობისა და საბაჟო ორგანოში სამსახურის გავლასთან დაკავშირებულ სხვა საკითხებზე;

ბ) საჯარო მოსამსახურეთა შემოსავლებისა და ქონებრივი მდგომარეობის შესახებ დეკლარაციების შესაბამის ორგანოში ჩაბარების ორგანიზება და კონტროლი;

გ) სახელმწიფო სპეციალური წოდებებისა და საკლასო ჩინების მინიჭების მიზნით მასალების მომზადება;

დ) შრომის შინაგანაწესისა და შრომის დაცვაზე კონტროლის განხორციელება;

ე) საჯარო მოსამსახურეთა მომზადების, კვალიფიკაციის ამაღლებისა და პროფესიული გადამზადების ღონისძიებების ორგანიზება და ჩატარება;

ვ) კომპეტენციის ფარგლებში სახელმწიფო შესყიდვების განხორციელების უზრუნველყოფა; საბაჟო ორგანოების მატერიალურ-ტექნიკური საშუალებების აღრიცხვა და განაწილება, მისი დანიშნულებისამებრ გამოყენებისა და შენახვის უზრუნველყოფა; კაპიტალური მშენებლობისა და მიმდინარე რემონტის დაგეგმვასა და განხორციელებაში მონაწილების მიღება;

ზ) საფინანსო-საბუღალტრო საქმიანობის კოორდინაცია; სახელმწიფო ბიუჯეტით გამოყოფილი სახსრების მართვის ორგანიზაცია; ნაერთი ბალანსების მომზადება და საქართველოს ფინანსთა სამინისტროში წარდგენა; სახაზინო-საბანკო და სალაროს ოპერაციებთან დაკავშირებული დოკუმენტაციის მომზადება და კონტროლი მათ წარმოებაზე; საბაჟო ორგანოების წლიური ხარჯთაღრიცხვის შედგენა და დასამტკიცებლად წარდგენა; საბიუჯეტო ასიგნებათა ფარგლებში გასაწევი ხარჯებისა და სახელმწიფო შესყიდვების დაგეგმვაში მონაწილეობა, მათთან დაკავშირებული ვალდებულებითი დოკუმენტების მომზადება, გაფორმება და კონტროლი მათ შესრულებაზე. საჯარო მოსამსახურეთა ხელფასების დაანგარიშება, დარიცხვა და საბანკო ანგარიშებზე მათი გადატანის უზრუნველყოფა; სტრუქტურული ერთეულების საჯარო მოსამსახურეთა შრომის ანაზღაურების წესების დაცვაზე კონტროლის განხორციელება;

თ) განცხადებების და სხვა სახის, მათ შორის, უცხოური კორესპონდენციის, შიდა მიმოწერის აღრიცხვა, დამუშავება და საქმისწარმოების მარეგულირებელი კანონმდებლობით განსაზღვრული წესების დაცვის უზრუნველყოფა, მათი შესრულების კონტროლი;

ი) საუწყებო არქივის ფორმირება და მასში საქმეებისა და დოკუმენტების შენახვა, რეგიონალურ საბაჟოებში საქმეთა ფორმირების და შენახვის, აგრეთვე საუწყებო არქივში ჩაბარების ღონისძიებების განხორციელებაზე კოორდინაცია;

კ) მკაცრი აღრიცხვის ფორმების, პირადნომრიანი ბეჭდების, შტამპების, დამღების დამზადების, გაცემის და აღრიცხვის ორგანიზება.

12. მასმედიასთან ურთიერთობისა და საიდუმლო საქმისწარმოების სამსახურის ძირითადი ფუნქციებია:

ა) საზოგადოებრივ ორგანიზაციებთან, მასობრივ საინფორმაციო საშუალებებთან ურთიერთობების ჩამოყალიბება. სამსახურის მიერ დაგეგმილი და განხორციელებული ღონისძიებების საზოგადოებაზე გავლენის ანალიზი. საზოგადოებასთან და მასმედიასთან დაკავშირებული რეკომენდაციების მომზადება. სამსახურის საქმიანობასთან დაკავშირებით ოფიციალური შეტყობინების, განცხადებების და სხვა საინფორმაციო მასალების მომზადება და მასობრივი საინფორმაციო საშუალებებისათვის მიწოდება. სამსახურისა და მისი ხელმძღვანელობის დადებითი იმიჯის ფორმირება საზოგადოებაში;

ბ) საჯარო ინფორმაციის გაცემის ორგანიზება;

გ) საიდუმლო ინფორმაციასთან მუშაობის ორგანიზება და საიდუმლო ინფორმაციასთან მუშაობის კანონმდებლობით დადგენილი მოთხოვნების დაცვის უზრუნველყოფა;

დ) სამსახურებრივ-საშტატო იარაღის ტარების სამსახურებრივი მოწმობების გაცემის, სამსახურებრივ-საშტატო იარაღის მიღება-გაცემის, აღრიცხვისა და შენახვის ორგანიზება.

    მუხლი 11. სამსახურის სათათბირო ორგანო

1. სამსახურის საქმიანობასთან დაკავშირებული განსაკუთრებული მნიშვნელობის საკითხების განხილვისა და მათ შესახებ რეკომენდაციების შემუშავების მიზნით სამსახურის უფროსს შეუძლია თავისი მმართველობის სფეროში შექმნას სათათბირო ორგანოები სათათბირო უფლებით.

2. სათათბირო ორგანოები იქმნება სამსახურის უფროსის ინდივიდუალური ადმინისტრაციულ-სამართლებრივი აქტით.

3. სათათბირო ორგანოების სხდომების ორგანიზებას და სხდომის ოქმების წარმოებას უზრუნველყოფს სამსახურის უფროსის მიერ განსაზღვრული სტრუქტურული ქვედანაყოფი.

    მუხლი 12. სამსახურის რეორგანიზაცია, საქმიანობის შეწყვეტა, დებულებაში ცვლილებების შეტანა

1. სამსახურის რეორგანიზაცია ან მისი საქმიანობის შეწყვეტა ხდება კანონმდებლობით დადგენილი წესით.

2. სამსახურის დებულებაში ცვლილებების შეტანა ხორციელდება საქართველოს ფინანსთა მინისტრის ბრძანებით.