საქართველოს ტერიტორიაზე სხვა ქვეყანაში რეგისტრირებული სამოქალაქო საჰაერო ხომალდის ექსპლუატანტის მიერ სპეციალიზებული ექსპლუატაციის (საავიაციო სამუშაოების) განხორციელების და/ან არარეგულარული საერთაშორისო საჰაერო გადაყვანა-გადაზიდვის ნებართვის გაცემის წესისა და პირობების შესახებ დებულების დამტკიცების თაობაზე

საქართველოს მთავრობის

დადგენილება №196

2007 წლის 19 სექტემბერი

ქ. თბილისი

საქართველოს ტერიტორიაზე საავიაციო სამუშაოთა წარმოებისა და/ან არარეგულარული საერთაშორისო საჰაერო გადაყვანა-გადაზიდვის ნებართვის გაცემის წესისა და პირობების შესახებ დებულების დამტკიცების თაობაზე

1. საქართველოს საჰაერო კოდექსის 59-ე მუხლის მე-3 ნაწილის „ბ“ და „გ“ ქვეპუნქტების, „ლიცენზიებისა და ნებართვების შესახებ“ საქართველოს კანონის 24-ე მუხლის 28-ე პუნქტის, მე-40 მუხლის პირველი პუნქტისა და „ნორმატიული აქტების შესახებ“ საქართველოს კანონის 50-ე მუხლის პირველი პუნქტის „ბ“ ქვეპუნქტის შესაბამისად დამტკიცდეს „საქართველოს ტერიტორიაზე საავიაციო სამუშაოთა წარმოებისა და/ან არარეგულარული საერთაშორისო საჰაერო გადაყვანა-გადაზიდვის ნებართვის გაცემის წესისა და პირობების შესახებ“ თანდართული დებულება.

 2. ძალადაკარგულად გამოცხადდეს „საქართველოს ტერიტორიაზე საავიაციო სამუშაოთა წარმოების ნებართვის გაცემისა და პირობების შესახებ დებულების დამტკიცების თაობაზე“ საქართველოს მთავრობის 2005 წლის 23 ნოემბრის №211 დადგენილება (სსმ III, 2005 წ., №136, მუხლი 1507).

3. დადგენილება ამოქმედდეს გამოქვეყნებისთანავე.

პრემიერ-მინისტრი ზ. ნოღაიდელი

დებულება

საქართველოს ტერიტორიაზე საავიაციო სამუშაოთა წარმოებისა ან/და არარეგულარული საერთაშორისო საჰაერო გადაყვანა-გადაზიდვის ნებართვის გაცემის წესისა და პირობების შესახებ

    მუხლი 1

ეს დებულება განსაზღვრავს საქართველოს ტერიტორიაზე საავიაციო სამუშაოთა წარმოების ან/და არარეგულარული საერთაშორისო საჰაერო გადაყვანა-გადაზიდვის ნებართვის გამცემ ორგანოს, ნებართვის გაცემის წესსა და პირობებს.

    მუხლი 2

საქართველოს საჰაერო კოდექსის 59-ე მუხლის მე-3 ნაწილის „ა“ და „ბ“ ქვეპუნქტების შესაბამისად, საქართველოს ტერიტორიაზე საავიაციო სამუშაოთა წარმოების ან/და არარეგულარული საერთაშორისო საჰაერო გადაყვანა-გადაზიდვის ნებართვას გასცემს საქართველოს ეკონომიკისა და მდგრადი განვითარების სამინისტროს სისტემაში შემავალი საჯარო სამართლის იურიდიული პირი − სამოქალაქო ავიაციის სააგენტო (შემდგომში − სააგენტო).

1. საქართველოს ტერიტორიაზე საავიაციო სამუშაოთა წარმოების ნებართვის მისაღებად, ნებართვის მაძიებელი სააგენტოს „ლიცენზიებისა და ნებართვების შესახებ“ საქართველოს კანონით განსაზღვრული  დოკუმენტაციის გარდა, დამატებით წარუდგენს:

ა) ინფორმაციას იმის შესახებ, თუ რა სახეობის (სასოფლო-სამეურნეო, სატყეო, პატრულირება, სამშენებლო, აეროგადაღება, აეროვიზუალური ფრენა, საავარიო, ექსპერიმენტული, სამეცნიერო-კვლევითი ან/და სხვა) საავიაციო სამუშაოთა წარმოების ნებართვას მოითხოვს მაძიებელი;

ბ) ინფორმაციას იმის შესახებ, თუ რომელ გეოგრაფიულ რეგიონში, რა დროიდან და რა ტიპის საჰაერო ხომალდ(ებ)ით შესრულდება საავიაციო სამუშაოები, აგრეთვე მონაცემებს საჰაერო ხომალდის ეკიპაჟის წევრების კვალიფიკაციის შესახებ;

გ) სსიპ − სამოქალაქო ავიაციის სააგენტოს დირექტორის  ადმინისტრაციულ-სამართლებრივი აქტის შესაბამისად, ნებართვის მაძიებლის საჰაერო ხომალდის ექსპლუატანტის სამოქალაქო პასუხისმგებლობის სავალდებულო დაზღვევის დამადასტურებელ დოკუმენტებს (სადაზღვევო პოლისებს) ან ეკვივალენტურ დოკუმენტებს იმ შესაძლო ზიანის საკომპენსაციოდ, რომელიც შეიძლება, მიადგეს მგზავრს, ტვირთს, ბარგსა და მესამე პირს ამ ექსპლუატანტის ქმედებით;

დ) საჰაერო ხომალდის ექსპლუატანტის სერტიფიკატის ან საავიაციო სამუშაოების განხორციელების უფლების დამადასტურებელი შესაბამისი ეკვივალენტური დოკუმენტის, აგრეთვე სამოქალაქო საჰაერო ხომალდის ფრენის ვარგისობის სერტიფიკატის ასლსა და სამოქალაქო საჰაერო ხომალდის ხმაურის სერტიფიკატის ასლს (ასეთის არსებობის შემთხვევაში);

ე) ინფორმაციას იმის შესახებ, თუ რა პერიოდში სურს ნებართვის მაძიებელს საავიაციო სამუშაოების შესრულება;

ვ) საქართველოს თავდაცვის სამინისტროს თანხმობას (იმ სახეობის საავიაციო სამუშაოებისათვის, რომლებიც საჭიროებენ საჰაერო ხომალდიდან ფოტო და ვიდეოგადაღებას).

2. საქართველოს ტერიტორიაზე საავიაციო სამუშაოთა წარმოების ნებართვა გაიცემა კონკრეტული სახეობის საავიაციო სამუშაოთა წარმოებაზე, მაძიებლის მიერ მოთხოვნილი ვადით, მაგრამ არაუმეტეს 1 წლისა.

1. არარეგულარული საერთაშორისო საჰაერო გადაყვანა-გადაზიდვის ნებართვის მისაღებად, ნებართვის მაძიებელი სააგენტოს „ლიცენზიებისა და ნებართვების შესახებ“ საქართველოს კანონით განსაზღვრული დოკუმენტაციის გარდა, დამატებით წარუდგენს:

ა) ინფორმაციას იმის შესახებ, თუ რომელ საჰაერო ხაზზე მოითხოვს ნებართვის მაძიებელი არარეგულარული საჰაერო გადაყვანა-გადაზიდვის განხორციელების ნებართვას და რა ტიპის საჰაერო ხომალდ(ებ)ით უზრუნველყოფს იგი იმ საჰაერო ხაზის ექსპლუატაციას, ასევე რა პერიოდში შესრულდება გადაყვანა-გადაზიდვა;

ბ) სსიპ − სამოქალაქო ავიაციის სააგენტოს დირექტორის  ადმინისტრაციულ-სამართლებრივი აქტის შესაბამისად, ნებართვის მაძიებლის საჰაერო ხომალდის ექსპლუატანტის სამოქალაქო პასუხისმგებლობის სავალდებულო დაზღვევის დამადასტურებელ დოკუმენტებს (სადაზღვევო პოლისებს) ან შესაბამის ეკვივალენტურ დოკუმენტებს იმ შესაძლო ზიანის საკომპენსაციოდ, რომელიც შეიძლება,  მიადგეს მგზავრს, ტვირთს, ბარგსა და მესამე პირს ამ ექსპლუატანტის ქმედებით;

გ) საჰაერო ხომალდის ექსპლუატანტის სერტიფიკატის ასლს (გარდა იმ შემთხვევისა, როდესაც ნებართვის მაძიებელი საჰაერო ხომალდის ექსპლუატაციას საკუთარი მიზნებისთვის ახორციელებს);

დ) სამოქალაქო საჰაერო ხომალდის ფრენის ვარგისობის სერტიფიკატის ასლსა და სამოქალაქო საჰაერო ხომალდის ხმაურის სერტიფიკატის ასლს (ასეთის არსებობის შემთხვევაში).

2. არარეგულარული საერთაშორისო საჰაერო გადაყვანა-გადაზიდვის ნებართვა გაიცემა:

ა) იმ ვადით, რა ვადაშიც უნდა განხორციელდეს მრავალჯერადი საჰაერო გადაყვანა-გადაზიდვა, მაგრამ არა უმეტეს სამი თვისა;

ბ) ერთჯერადად, არარეგულარული გადაყვანა-გადაზიდვის განხოციელების კონკრეტული ვადით.

     მუხლი 5

1. სააგენტო ნებართვის გაცემის თაობაზე გადაწყვეტილებას იღებს საქართველოს ზოგადი ადმინისტრაციული კოდექსის VI თავით განსაზღვრული მარტივი ადმინისტრაციული წარმოების წესით.

2. სააგენტო 3 სამუშაო დღის ვადაში ამოწმებს ნებართვის მაძიებლის მიერ წარდგენილი განცხადებისა და თანდართული საბუთების შესაბამისობას ამ დებულების მოთხოვნებთან.

საქართველოს ტერიტორიაზე საავიაციო სამუშაოთა წარმოების ნებართვა და არარეგულარული საერთაშორისო საჰაერო გადაყვანა-გადაზიდვის ნებართვა უნდა შეიცავდეს შემდეგი სახის ინფორმაციას:

ა) ნებართვის მფლობელი ექსპლუატანტის დასახელებას;

ბ) ნებართვის ნომერს;

გ) აეროპორტების დასახელებას, სადაც უნდა განხორციელდეს ფრენა;

დ) რეისის ნომერს;

ე) საჰაერო ხომალდის ტიპსა და მის სარეგისტრაციო ნომერს;

ვ) ფრენის მარშრუტს;

ზ) ფრენის შესრულების თარიღს/პერიოდს;

თ) ფრენის მიზანს/საავიაციო სამუშაოების სახეობას.

    მუხლი 7

სანებართვო პირობების შესრულების კონტროლი და პასუხისმგებლობა სანებართვო პირობების დარღვევისათვის განისაზღვრება „ლიცენზიებისა და ნებართვების შესახებ“ საქართველოს კანონით.

    მუხლი 8

1. უცხო  ქვეყანაში  რეგისტრირებული  სამოქალაქო  საჰაერო  ხომალდის  ექსპლუატანტის მიერ საქართველოს ტერიტორიის ფარგლებში  ადგილობრივი ფრენების განხორციელებას ესაჭიროება სააგენტოს თანხმობა.

2. თანხმობის მისაღებად ავიაკომპანიამ სააგენტოში უნდა წარადგინოს  ამ დადგენილების მე-4 მუხლის პირველი პუნქტით გათვალისწინებული დოკუმენტები.

Annotate