საქართველოს კონტროლის პალატის რეგლამენტის დამტკიცების შესახებ

სახელმწიფო სარეგისტრაციო კოდი 010.230.000.09.010.005.305

საქართველოს კონტროლის პალატის თავმჯდომარის

ბრძანება №38

2002 წლის 20 მაისი

ქ. თბილისი

საქართველოს კონტროლის პალატის რეგლამენტის დამტკიცების შესახებ

„საქართველოს კონტროლის პალატის შესახებ” და „ნორმატიული აქტების შესახებ” საქართველოს კანონების შესაბამისად, ვბრძანებ:

1. დამტკიცდეს „საქართველოს კონტროლის პალატის რეგლამენტი”.

2. რეგლამენტი დაეგზავნოს კონტროლის პალატის ყველა სტრუქტურულ ერთეულს და უზრუნველყოფილ იქნეს მისი თანამშრომლებზე გაცნობა.

3. ბრძანება ძალაშია გამოქვეყნებისთანავე.

ს. მოლაშვილი

საქართველოს კონტროლის პალატის რეგლამენტი

თავი I. ზოგადი დებულებანი, სამართლებრივი აქტები, სტრუქტურული ერთეულები

    მუხლი 1. ზოგადი დებულებანი

1. საქართველოს კონტროლის პალატის (შემდგომში – კონტროლის პალატა) რეგლამენტი (შემდგომში – რეგლამენტი) განსაზღვრავს კონტროლის პალატის უფლებამოსილებათა განხორციელების წესებს, პროცედურას, კონტროლის პალატის სტრუქტურას, რევიზია-შემოწმების მომზადებისა და ჩატარების ფორმებს.

2. რეგლამენტი მიღებულია საქართველოს კონსტიტუციის, საქართველოს კანონების „საქართველოს კონტროლის პალატის შესახებ”, „ნორმატიული აქტების შესახებ” და სხვა საკანონმდებლო აქტების საფუძველზე.

3. რეგლამენტის მოთხოვნები სავალდებულოა კონტროლის პალატის ყველა მოხელისათვის.

4. კონტროლის პალატის იურიდიული მისამართია ქ. თბილისი, 380048, ქეთევან წამებულის გამზირი N96.

    მუხლი 2. კონტროლის პალატის სამართლებრივი აქტების მომზადების, გამოცემის, გამოქვეყნებისა და მოქმედების წესი

1. კონტროლის პალატის ნორმატიული აქტების მომზადების, გამოქვეყნებისა და მოქმედების წესი რეგულირდება „ნორმატიული აქტების შესახებ” საქართველოს კანონის შესაბამისად.

2. იმ საკითხებთან დაკავშირებით, რომლებზეც უნდა გამოიცეს კონტროლის პალატის სამართლებრივი აქტი, შესაბამისი წინადადება შემოაქვთ სტრუქტურულ ერთეულებს.

3. კონტროლის პალატის სამართლებრივი აქტის პროექტი ვიზირებული უნდა იყოს თავმჯდომარის მოადგილის, პროექტის შემომტანი სტრუქტურული ერთეულის ხელმძღვანელისა და მთავარი იურისტის, პარლამენტთან ურთიერთობისა და სამართლებრივი უზრუნველყოფის და საინფორმაციო-ანალიტიკური სამმართველოების მიერ.

4. კონტროლის პალატის თავმჯდომარის ინდივიდუალურ-სამართლებრივი აქტების, წარდგინების, მიწერილობისა და შემოწმების (ცნობის) აქტის ტიპური ფორმა მტკიცდება თავმჯდომარის ბრძანებით.

    მუხლი 3. კონტროლის პალატის სისტემა და სტურუქტურული ერთეულები

1. კონტროლის პალატა არის ერთიანი, ცენტრალიზებული სისტემა, რომლის შემადგენლობაშიც შედიან აფხაზეთის, აჭარის ავტონომიური რესპუბლიკის კონტროლის პალატები.

2. კონტროლის პალატის სტრუქტურული ერთეულები:

ა) I დეპარტამენტი;

ბ) II დეპარტამენტი;

გ) III დეპარტამენტი;

დ) IV დეპარტამენტი;

ე) V დეპარტამენტი;

ვ) დასავლეთ საქართველოს დეპარტამენტი;

ზ) აღმოსავლეთ საქართველოს დეპარტამენტი;

თ) რეფორმებისა და საერთაშორისო ურთიერთობების დეპარტამენტი;

ი) სპეციალურ დავალებათა სამმართველო;

კ) შიდა კონტროლის ინსპექცია;

ლ) მასმედიასა და საზოგადოებასთან ურთიერთობის ბიურო;

ნ) კონტროლის პალატის აპარატი.

    მუხლი 4. კონტროლის პალატის ხელმძღვანელობა

1. კონტროლის პალატას ხელმძღვანელობს თავმჯდომარე, რომელსაც ჰყავს პირველი მოადგილე და სამი მოადგილე.

2. საქართველოს კონტროლის პალატის თავმჯდომარის პირველი მოადგილე და მოადგილეები ხელმძღვანელობენ კონტროლის პალატის საქმიანობის განსაზღვრულ მიმართულებებს, მათ ფუნქციებს განსაზღვრავს საქართველოს კონტროლის პალატის თავმჯდომარე.

3. თავმჯდომარის ერთ-ერთი მოადგილე თავმჯდომარის დავალებით ახორციელებს საპარლამენტო მდივნის ფუნქციას.

    მუხლი 5. კონტროლის პალატის სტრუქტურული ერთეულის ხელმძღვანელი

1. სტრუქტურული ერთეულის ხელმძღვანელი უშუალოდ ემორჩილება თავმჯდომარეს, თავმჯდომარის პირველ მოადგილეს ან თავმჯდომარის მოადგილეს.

2. სტრუქტურული ერთეულის ხელმძღვანელი:

ა) ანაწილებს მოვალეობებს მისდამი დაქვემდებარებულ მოხელეებს შორის, აძლევს მითითებებსა და განკარგულებებს;

ბ) თვალყურს ადევნებს სტრუქტურული ერთეულის მოხელეების მიერ სამსახურებრივი მოვალეობების შესრულებას;

გ) ხელს აწერს ან ვიზას ადებს სტრუქტურულ ერთეულში მომზადებულ დოკუმენტებს;

დ) წარადგენს სტრუქტურული ერთეულის ანგარიშს გაწეული მუშაობის შესახებ;

ე) წარმოადგენს სტრუქტურულ ერთეულს საკუთარი მოვალეობის შესრულებისას და სტრუქტურული ერთეულის სახელით, ქვემდებარეობით წარადგენს დასკვნებს და წინადადებებს;

ვ) წარუდგენს კონტროლის პალატის ხელმძღვანელობას წინადადებებს სტრუქტურის შტატების, მუშაობის ორგანიზაციის, სტრუქტურული ერთეულის, მოხელეების პრემირების, წახალისების ან დისციპლინური პასუხისმგებლობის დაკისრების შესახებ;

ზ) შუამდგომლობს იმ სახსრების გამოყოფის თაობაზე, რომლებიც საჭიროა სტრუქტურული ერთეულების ამოცანების შესასრულებლად;

თ) შუამდგომლობს სტრუქტურული ერთეულების მოხელეთა კვალიფიკაციის ამაღლების შესახებ;

ი) ასრულებს ამ რეგლამენტითა და სტრუქტურული ერთეულების დებულებით, თავმჯდომარის ან უშუალო ხელმძღვანელის მიერ განსაზღვრულ ამოცანებს.

3. სტრუქტურული ერთეულების ხელმძღვანელებს შეიძლება ჰყავდეთ მოადგილეები. სტრუქტურული ერთეულები შეიძლება დაიყოს სამმართველოებად, განყოფილებებად.

    მუხლი 6. საკონტროლო-სარევიზიო საქმიანობით დაკავებული დეპარტამენტები (I, II, III, IV, V, დასავლეთ საქართველოს, აღმოსავლეთ საქართველოს)

კონტროლის პალატის თავმჯდომარის ბრძანებით ახორციელებენ რევიზია-შემოწმებებს მათთვის განსაზღვრული დარგებისა და ტერიტორიული ნიშნის მიხედვით, ადგენენ დეპარტამენტის სამუშაო გეგმების პროექტებს და უზრუნველყოფენ გეგმის შესრულებასა და კონტროლს, საკურატორო დარგის ორგანიზაციათა საქმიანობის შედეგების მიხედვით აანალიზებენ დარგში მიმდინარე პროცესებს, შეიმუშავებენ წინადადებებსა და რეკომენდაციებს გასატარებელ ღონისძიებათა შესახებ, რევიზია-შემოწმების პროცესში თანამშრომლობენ კონტროლის პალატის სხვა სტრუქტურულ ერთეულებთან და საკონტროლო სფეროს დაწესებულებებთან, ასრულებენ თავმჯდომარის კურატორი მოადგილისა და პრეზიდიუმის დავალებებს.

    მუხლი 7. რეფორმებისა და საერთაშორისო ურთიერთობების დეპარტამენტი

რეფორმებისა და საერთაშორისო ურთიერთობების დეპარტამენტი უზრუნველყოფს საქართველოს კონტროლის პალატის სისტემაში ინსტიტუციონალური განვითარების პროგრამის განხორციელებას; საზღვარგარეთის ქვეყნებთან და მათ წარმომადგენლობებთან, ასევე საფინანსო კონტროლის უმაღლეს ორგანოებთან და მათ საერთაშორისო გაერთიანებებთან თანამშრომლობას; უზრუნველყოფს ამ მიმართულებით საქართველოს კონტროლის პალატის თავმჯდომარის ბრძანებებისა და პრეზიდიუმის დადგენილებების პროექტების შემუშავებას და შესრულებას. ატარებს რევიზიებს სამოქმედო სფეროს ფარგლებში.

    მუხლი 8. შიდა კონტროლის ინსპექცია

ახორციელებს კონტროლის პალატაში საფინანსო დარღვევათა პრევენციას და სავალდებულო აუდიტს, საჯარო სახსრების მიღება-გამოყენების კანონიერების, მიზანშეწონილობისა და ეფექტიანობის შეფასებას; ზედამხედველობს კონტროლის პალატის მოხელეების მიერ სამსახურებრივი ეთიკის კანონმდებლობით განსაზღვრული წესების, მათ შორის, სამსახურებრივი შეუთავსებლობის მოქმედებათა აკრძალვის და სხვა ნორმების დაცვას; კონტროლის პალატის თავმჯდომარის დავალებით ატარებს ცალკეულ ადმინისტრაციულ, საფინანსო და სხვა სახის შემოწმებებს.

    მუხლი 9. სპეციალურ დავალებათა სამმართველო

თავმჯდომარის დავალებით ატარებს რევიზიებს საქართველოს პრეზიდენტის, პარლამენტისა და საქართველოს პარლამენტის დროებითი საგამოძიებო კომისიის მომართვის საფუძველზე, ასევე ასრულებს თავმჯდომარის სპეციალურ დავალებებს.

    მუხლი 10. მასმედიასა და საზოგადოებასთან ურთიერთობის ბიურო

ამყარებს ურთიერთობებს მასობრივი ინფორმაციის საშუალებებთან და არასამთავრობო ორგანიზაციებთან, აშუქებს საქართველოს კონტროლის პალატის საქმიანობას მასობრივი ინფორმაციის საშუალებებით, ამზადებს და წარმართავს პრესკონფერენციებსა და ბრიფინგებს.

    მუხლი 11. კონტროლის პალატის აპარატი

1. საქართველოს კონტროლის პალატის აპარატი (შემდგომში _ პალატის აპარატი) არის საქართველოს კონტროლის პალატის სტრუქტურული ერთეული, რომელიც ერთიანი რეგლამენტით განსაზღვრულ ფარგლებში ახორციელებს ორგანიზაციულ, სამართლებრივ, საინფორმაციო, მატერიალურ-ტექნიკურ და სხვა მომსახურებას.

2. პალატის აპარატს საერთო ხელმძღვანელობას უწევს კონტროლის პალატის თავმჯდომარე.

3. პალატის აპარატი შედგება შემდეგი სტრუქტურული ქვედანაყოფებისაგან:

ა) თავმჯდომარის სამდივნო;

ბ) პროტოკოლის განყოფილება;

გ) საინფორმაციო-ანალიტიკური სამმართველო;

დ) პარლამენტთან ურთიერთობისა და სამართლებრივი უზრუნველყოფის სამმართველო;

ე) კადრების სამმართველო;

ვ) პრეზიდიუმის სამდივნო;

ზ) კანცელარია;

თ) საფინანსო სამმართველო;

ი) სამეურნეო სამმართველო.

    მუხლი 12. თავმჯდომარის სამდივნო

კონტროლზე აჰყავს თავმჯდომარის მიერ გაცემული ოპერატიული დავალებები და მოახსენებს მათი შესრულების შესახებ; ამუშავებს თავმჯდომარის სახელზე შემოსულ დოკუმენტაციას და ახდენს ყველა იმ დოკუმენტის ვიზირებას, რომელიც ხელმოსაწერად და დასამტკიცებლად წარედგინება თავმჯდომარეს; აკონტროლებს თავმჯდომარის კვირის სამუშაო გრაფიკის მიმდინარეობას, თავისი კომპეტენციის ფარგლებში ორგანიზებას უწევს მის შესრულებას; სხვა სტრუქტურულ ერთეულებთან ერთად ამზადებს მასალებს თავმჯდომარის მოხსენებებისათვის; უფლებამოსილია საჭიროების შემთხვევაში კონტროლის პალატის ნებისმიერი სტრუქტურული ერთეულიდან მიიღოს ოპერატიული ინფორმაცია; ასრულებს და აკონტროლებს თავმჯდომარის ოპერატიულ დავალებებს.

    მუხლი 13. პროტოკოლის განყოფილება

არეგულირებს თავმჯდომარესთან, მის მოადგილეებთან და კონტროლის პალატის სხვა ხელმძღვანელებთან მოქალაქეთა მიღებას; ადგენს თავმჯდომარის კვირის სამუშაო გრაფიკს და უზრუნველყოფს მის შესრულებას; საქართველოსა და უცხოეთიდან ოფიციალურ პირთა მიღების აღრიცხვას; ოფიციალური დელეგაციების დახვედრა-გაცილებებს, მათ განთავსებას, ტრანსპორტით მომსახურებასა და პროტოკოლით გათვალისწინებული ყველა სხვა ღონისძიებას; კონტროლის პალატის ხელმძღვანელობისა და თანამშრომლების უცხო ქვეყნებში მივლინებისას მათთვის შესაბამისი ვიზების, სამგზავრო ბილეთების და ყველა საჭირო დოკუმენტაციის მომზადებას; სამეურნეო და საფინანსო სამმართველოებთან ერთად ეწევა კონტროლის პალატის შენობაში ან სხვა ტერიტორიაზე (თუკი ღონისძიება ტარდება კონტროლის პალატის სახელით) სტუმრების მიღებასთან დაკავშირებულ მომსახურებას.

    მუხლი 14. საინფორმაციო-ანალიტიკური სამმართველო

უზრუნველყოფს კონტროლის პალატის საკონტროლო საქმიანობის დაგეგმვას, კოორდინაციასა და მონიტორინგს; საბიუჯეტო პროცესის მიმდინარე ანალიზს, საინფორმაციო მომსახურებას; ადგენს კონტროლის პალატის საკონტროლო-სარევიზიო საქმიანობის პერსპექტიული და მიმდინარე გეგმების პროექტებსა და მათში შესატან ცვლილებებს, აგრეთვე, არაგეგმური რევიზია-შემოწმებათა ჩატარების თაობაზე პროექტებს, რომლებსაც წარადგენს პრეზიდიუმის სხდომებზე განსახილველად; ამზადებს კონტროლის პალატის მოხსენებებს სახელმწიფო ბიუჯეტის შესრულების და მიმდინარეობის შესახებ მთავრობის ანგარიშთან დაკავშირებით; ამზადებს კონტროლის პალატის წლიურ ანგარიშს საქართველოს პარლამენტში წარსადგენად; აგვარებს საქართველოს კონტროლის პალატასა და აფხაზეთის, აჭარის ავტონომიური რესპუბლიკის კონტროლის პალატებს შორის ინფორმაციული უზრუნველყოფის საკითხებს.

    მუხლი 15. პარლამენტთან ურთიერთობისა და სამართლებრივი უზრუნველყოფის სამმართველო

მონაწილეობს სამართალდამცავი ორგანოებისათვის გადასაგზავნი მასალების მომზადებაში; ახორციელებს პრეზიდიუმზე განსახილველი მასალების სამართლებრივ ექსპერტიზას, მთავრობის ანგარიშთან დაკავშირებული კონტროლის პალატის მოხსენების სამართლებრივ უზრუნველყოფას, კონტროლის პალატის ანგარიშის სამართლებრივ უზრუნველყოფას, თავმჯდომარის ბრძანებების სამართლებრივ უზრუნველყოფას, საქართველოს კონტროლის პალატის პრეზიდიუმის დადგენილებების სამართლებრივ უზრუნველყოფას; აკონტროლებს სამართალდამცავ ორგანოებში გადაგზავნილ მასალების რეალიზაციის პროცესს და პერიოდულად წარმოადგენს ანგარიშს თითოეულ საქმესთან დაკავშირებით; დეპარტამენტის იურისტებთან ერთად წარმოადგენს კონტროლის პალატას სასამართლოში; შეიმუშავებს და ამზადებს საკანონმდებლო და სხვა ნორმატიული აქტების პროექტებსა და დასკვნებს.

    მუხლი 16. კადრების სამმართველო

წარმართავს ატესტაცია-კონკურსთან დაკავშირებულ პროცედურებს, უზრუნველყოფს სამუშაო ადგილის (თანამდებობის) აღწერილობის მომზადებას, სახელმწიფო მოსამსახურეთა თანამდებობრივი ინსტრუქციების შემუშავებას, სახელმწიფო მოხელეთა მიერ ქონებრივი მდგომარეობის ამსახველი დეკლარაციების წარდგენას თანამდებობის პირთა ქონებრივი და საფინანსო მდგომარეობის საინფორმაციო ბიუროსა და საგადასახადო სამსახურის სტრუქტურებში, საკადრო რეზერვის ფორმირებას; ამზადებს შესაბამის ინფორმაციას საქართველოს სახელმწიფო კანცელარიის სახელმწიფო სამსახურის ბიუროში წარსადგენად. უზრუნველყოფს „საჯარო სამსახურის შესახებ” საქართველოს კანონისა და შრომის კანონთა კოდექსით გათვალისწინებული მოთხოვნების შესრულებას. ამზადებს ინდივიდუალურ-სამართლებრივი აქტების პროექტებს საკადრო პოლიტიკის გატარებასთან დაკავშირებით. კონტროლის პალატის საკადრო რეზერვის შესავსებად, პროფესიონალიზმის, კომპეტენციის ამაღლებისა და პიროვნული ჩვევების გამომუშავების მიზნით დანერგილია სტაჟირების ინსტიტუტი.

    მუხლი 17. პრეზიდიუმის სამდივნო

ადგენს პრეზიდიუმის დღის წესრიგს და ათანხმებს თავმჯდომარესთან; ამზადებს პრეზიდიუმის დადგენილების პროექტს, პრეზიდიუმის სხდომის ოქმებს, ატარებს სხდომაზე მოწვეულ პირთა რეგისტრაციას; უზრუნველყოფს პრეზიდიუმის მასალების პრეზიდიუმის წევრებისა და შესაბამისი სტრუქტურული ერთეულებისათვის მიწოდებას სხდომამდე 3 დღით ადრე, პრეზიდიუმის დადგენილების დანიშნულებისამებრ დაგზავნას, პრეზიდიუმზე განსახილველი მასალების მომზადებასა და პრეზიდიუმის დადგენილების შესრულებაზე მონიტორინგს; პრეზიდიუმის მიერ გაწეული საქმიანობის ანალიზს; აღრიცხავს და აანალიზებს აფხაზეთის, აჭარის ავტონომიური რესპუბლიკის კონტროლის პალატების კოლეგიური ორგანოების მიერ გაწეული საქმიანობის შედეგებს და უწევს მათ მეთოდურ დახმარებას.

    მუხლი 18. კანცელარია

წარმართავს კონტროლის პალატაში ერთიან საქმისწარმოებას. უზრუნველყოფს ცენტრალიზებულად შემოსული დოკუმენტების მიღებას, პირველად დამუშავებას, რეგისტრაციას, დახარისხებას, ყველა სახის დოკუმენტის დანიშნულებისამებრ გადაცემას. ამზადებს თავმჯდომარის, პირველი მოადგილისა და მოადგილეების სახელზე შემოსულ დოკუმენტებზე რეზოლუციების პროექტებს. უზრუნველყოფს რეზოლუციის შესაბამისად ამ დოკუმენტების დროულ და დანიშნულებისამებრ გადაცემას. წარმართავს კონტროლის პალატიდან გასული კორესპონდენციის რეგისტრაციას, მათ ოპერატიულ დაგზავნას, შესასრულებელი დოკუმენტების კონტროლის ორგანიზაციებს, დოკუმენტების კონტროლზე აყვანასა და კონტროლიდან მოხსნას. ამოწმებს შესრულების მიმდინარეობას, ახდენს შესრულების კონტროლის შედეგების აღრიცხვასა და განზოგადებას, ხელმძღვანელობისთვის ინფორმაციის რეგულარულ მიწოდებას, შესრულებული დოკუმენტების საინფორმაციო ბაზის ფორმირებას; ახორციელებს „საქმისწარმოების ერთიანი წესით” განსაზღვრულ სხვა უფლება-მოვალეობებს.

    მუხლი 19. საფინანსო სამმართველო

უზრუნველყოფს კონტროლის პალატის ერთიანი ბიუჯეტის პროექტის შემუშავებას, საბუღალტრო აღრიცხვის წარმართვას, ხარჯთა ნუსხის შედგენას და ფინანსურ უზრუნველყოფას, კონტროლის პალატის სისტემაში “სახელმწიფო შესყიდვების შესახებ” საქართველოს კანონის მოთხოვნათა აღსრულებას; ახორციელებს საქართველოს ფინანსთა სამინისტროს მიერ დამტკიცებული „საბიუჯეტო ორგანიზაციებში ბუღალტრული აღრიცხვის შესახებ” ინსტრუქციით გათვალისწინებულ უფლება-მოვალეობებს.

    მუხლი 20. სამეურნეო სამმართველო

უზრუნველყოფს კონტროლის პალატის სამეურნეო საქმისწარმოებას, კონტროლის პალატის ბალანსზე რიცხული სატრანსპორტო საშუალებების ტექნიკურ მომსახურებას, კონტროლის პალატის მატერიალურ ფასეულობათა მდგომარეობის განმტკიცებასა და დაცვას.

    მუხლი 21. თავმჯდომარის კომისიები

1. თავმჯდომარეს შეუძლია თავისი კომპეტენციის ფარგლებში შექმნას კომისიები სათათბირო უფლებით, განსაზღვროს მათი მოვალეობები და საქმიანობის ვადა.

2. კომისიის წევრად შეიძლება სხვადასხვა დარგის სპეციალისტების მოწვევა.

თავი II. სარევიზიო საქმიანობის ზოგადი წესები

    მუხლი 22. საკონტროლო-სარევიზიო საქმიანობის გეგმა

1. საქართველოს კონტროლის პალატის საკონტროლო საქმიანობა წარიმართება პრეზიდიუმის მიერ დამტკიცებული პერსპექტიული (წლიური) და მიმდინარე (კვარტალური) სამუშაო გეგმებით.

2. კონტროლის პალატის სამუშაო გეგმაში აუცილებლად შეიტანება საქართველოს პრეზიდენტის, საქართველოს პარლამენტისა და პარლამენტის დროებითი საგამოძიებო კომისიის წინადადებები.

3. კონტროლის პალატის სამუშაო გეგმის შედგენის დროს აუცილებლად განიხილება საქართველოს პარლამენტის კომიტეტებისა და კომისიების წინადადებები.

    მუხლი 23. საკონტროლო-სარევიზიო საქმიანობის გეგმის მომზადების წესი

1. კონტროლის პალატის საკონტროლო საქმიანობის პერსპექტიული და მიმდინარე სამუშაო გეგმების პროექტებს ადგენს საინფორმაციო-ანალიტიკური სამმართველო.

2. საქართველოს კონტროლის პალატის საინფორმაციო-ანალიტიკური სამმართველო I-V დეპარტამენტების მომდევნო წლის და პირველი კვარტ ა ლის საკონტროლო-სარევიზიო საქმიანობის გეგმების პროექტებს 1 ნოემბრამდე დაუგზავნის აღმოსავლეთისა და დასავლეთ საქართველოს დეპარტამენტებს, რომლებიც ვალდებულნი არიან 15 ნოემბრამდე წარუდგინონ თავიანთი გეგმების პროექტები საინფორმაციო-ანალიტიკურ სამმართველოს.

3. კონტროლის პალატის სტრუქტურული ერთეულები, აფხაზეთის, აჭარის ავტონომიური რესპუბლიკის კონტროლის პალატები წარადგენენ საინფორმაციო-ანალიტიკურ სამმართველოში მეორე კვარტლის სამუშაო გეგმის პროექტებს შესაბამისად, 15 თებერვალს, მესამე კვარტლისას – 15 მაისს, მეოთხე კვარტალისას – 15 აგვისტოს.

4. საქართველოს სხვა მაკონტროლებელ ორგანოებთან კონსულტაციების, სამუშაო გეგმების პროექტების შეჯერებისა და კოორდინირების შემდეგ, საინფორმაციო-ანალიტიკური სამმართველოს ხელმძღვანელი კონტროლის პალატის სამუშაო გეგმის საბოლოო პროექტს ათანხმებს დეპარტამენტების, აფხაზეთის, აჭარის ავტონომიური რესპუბლიკის კონტროლის პალატების ხელმძღვანელებთან, რის შესახებაც მოახსენებს საქართველოს კონტროლის პალატის პრეზიდიუმს სამუშაო გეგმის პროექტების განხილვისას.

    მუხლი 24. საკონტროლო-სარევიზიო საქმიანობის გეგმის პრეზიდიუმზე განხილვა

1. საქართველოს კონტროლის პალატის წლიური და კვარტალური სამუშაო გეგმები განიხილება პრეზიდიუმზე შესაბამის საანგარიშო პერიოდამდე 10 დღით ადრე.

2. კონტროლის პალატის სამუშაო გეგმის კორექტირება (საკითხის ამოღება, გადატანა ან დამატება) დასაშვებია მხოლოდ კონტროლის პალატის პრეზიდიუმის მიერ, შესაბამისი სტრუქტურული ერთეულების და საინფორმაციო-ანალიტიკური სამმართველოს წინადადებების საფუძველზე.

    მუხლი 25. არაგეგმური რევიზია-შემოწმება

არაგეგმური რევიზია და შემოწმება შეიძლება ჩატარდეს მხოლოდ საქართველოს პრეზიდენტის, საქართველოს პარლამენტისა და საქართველოს პარლამენტის დროებითი საგამოძიებო კომისიების მომართვის, ასევე თავისი კომპეტენციის ფარგლებში კონტროლის პალატის პრეზიდიუმის, აფხაზეთის, აჭარის ავტონომიური რესპუბლიკის კონტროლის პალატების პრეზიდიუმის გადაწყვეტილებით, რის შესახებ ინფორმაცია დაუყოვნებლივ მიეწოდება საინფორმაციო-ანალიტიკურ სამმართველოს.

    მუხლი 26. საკონტროლო-სარევიზიო საქმიანობის გეგმის შესრულებაზე პასუხისმგებლობა და კონტროლი

1. კონტროლის პალატის სამუშაო გეგმის შესრულებაზე პასუხისმგებლობა ეკისრებათ საქართველოს კონტროლის პალატის თავმჯდომარის მოადგილეებს, დეპარტამენტების, აფხაზეთის, აჭარის ავტონომიური რესპუბლიკის კონტროლის პალატების ხელმძღვანელობას.

2. საქართველოს კონტროლის პალატის სამუშაო გეგმის შესრულების მონიტორინგს ახორციელებს საინფორმაციო-ანალიტიკური სამმართველო.

3. საქართველოს კონტროლის პალატის სტრუქტურული ერთეულები, აფხაზეთის, აჭარის ავტონომიური რესპუბლიკის კონტროლის პალატები ვალდებულნი არიან საანგარიშო კვარტალის დამთავრებიდან 15 დღის, ხოლო საანგარიშო წლის დასრულებიდან 25 დღის ვადაში საინფორმაციო-ანალიტიკურ სამმართველოში წარადგინონ დეტალური ანალიზი სამუშაო გეგმის შესრულებისა და ჩატარებული არაგეგმური შემოწმებების შესახებ.

   

 

თავი III. რევიზია-შემოწმების ორგანიზების, ჩატარებისა და შედეგების რეალიზაციის წესი

    მუხლი 27. რევიზია-შემოწმების ორგანიზება და ვადები

1. კონტროლის პალატა საკონტროლო საქმიანობას ახორციელებს თავისი სტრუქტურული ერთეულების მეშვეობით.

2. რევიზია-შემოწმების (შემდგომში შემოწმება) მოცულობას, ვადას და ადგილს ქვეყნის მთელ ტერიტორიაზე ადგენს კონტროლის პალატის თავმჯდომარე, აფხაზეთის, აჭარის ავტონომიურ რესპუბლიკაში შესაბამისი კონტროლის პალატის თავმჯდომარეები – შესაბამის ტერიტორიაზე

3. შემოწმების ხანგრძლივობა, როგორც წესი, არ უნდა აღემატებოდეს 60 კალენდარულ დღეს. ამ ვადის გაგრძელება დასაშვებია მხოლოდ კონტროლის პალატის თავმჯდომარის მიერ, შესამოწმებელი პერიოდის ხანგრძლივობისა და ობიექტის სირთულის გათვალისწინებით სტრუქტურული ერთეულის ხელმძღვანელის წერილობითი დასაბუთების საფუძველზე.

    მუხლი 28. ბრძანება შემოწმების ჩატარების შესახებ და შემოწმების პროგრამა

1. შემოწმება ტარდება დამტკიცებული პროგრამის ფარგლებში კონტროლის პალატის თავმჯდომარისა და აფხაზეთის, აჭარის ავტონომიური რესპუბლიკის კონტროლის პალატების თავმჯდომარეების მიერ გამოცემული ბრძანების საფუძველზე.

2. ბრძანებაში მითითებული უნდა იყოს სარევიზიო ჯგუფის პერსონალური შემადგენლობა ჯგუფის ხელმძღვანელის მითითებით, შესამოწმებელი ობიექტის დასახელება, შემოწმების ფორმა (თემატური შემოწმების შემთხვევაში – საკითხის დასახელება), შესამოწმებელი პერიოდი, შემოწმების ვადა და საფუძველი.

4. ბრძანება შემოწმების შესახებ ვიზირებული უნდა იყოს თავმჯდომარის მოადგილის, შესაბამისი სტრუქტურული ერთეულის ხელმძღვანელის, პარლამენტთან ურთიერთობისა და სამართლებრივი უზრუნველყოფისა და საინფორმაციო-ანალიტიკური სამმართველოების მიერ.

5. შემოწმების პროგრამას ადგენს დეპარტამენტის უფროსის მოადგილე სარევიზიო დარგში და ამტკიცებს (ვიზირებულს დეპარტამენტის იურისტის მიერ) შესაბამისი დეპარტამენტის, სტრუქტურული ერთეულის ხელმძღვანელი.

6. შემოწმების პროგრამაში ან ჯგუფის შემადგენლობაში ცვლილებების შეტანა, აგრეთვე შემოწმების შეწყვეტა დასაშვებია მხოლოდ შესაბამისი კონტროლის პალატის თავმჯდომარის ბრძანებით.

7. შემოწმების დაწყებისას ჯგუფის ხელმძღვანელი ვალდებულია შესამოწმებელი ობიექტის ხელმძღვანელს წარუდგინოს ბრძანება, შემოწმების პროგრამა და შემოწმების პროცესში მხარეების უფლება-მოვალეობათა ჩამონათვალი.

    მუხლი 29. შემხვედრი წესით ჩასატარებელი შემოწმება

შემხვედრი შემოწმება ტარდება პრეზიდიუმის დადგენილების საფუძველზე, ძირითადი შემოწმებიდან გამომდინარე და მხოლოდ ძირითადი შემოწმების დროს დასმული საკითხების ფარგლებში, ბრძანებისა და დამტკიცებული პროგრამის საფუძველზე.

    მუხლი 30. შემოწმების აქტი (ცნობა)

1. შემოწმების დამთავრებისთანავე უნდა შედგეს აქტი (ცნობა) შემოწმების შედეგების შესახებ, რომელსაც ხელს აწერენ ჯგუფის ხელმძღვანელი, წევრები, აგრეთვე, გაცნობის შემდეგ შემოწმებული ობიექტის ხელმძღვანელი, მთავარი ბუღალტერი და სხვა პასუხისმგებელი პირები.

2. სარევიზიო ჯგუფის წევრები პერსონალურად აგებენ პასუხს შემოწმების შედეგების უტყუარობაზე.

3. შემოწმებული ობიექტის ხელმძღვანელობა არაუმეტეს 15 კალენდარული დღის ვადაში ეცნობა და ხელს აწერს შემოწმების აქტს. თუ მთლიანად ან ნაწილობრივ არ ეთანხმება აქტში დაფიქსირებულ ფაქტებს, აქტზე აკეთებენ სათანადო მინაწერს და აღნიშნულთან დაკავშირებით შემმოწმებლებს წარუდგენენ ახსნა-განმარტებას, რომელიც უნდა დაერთოს შემოწმების მასალებს. გაცნობისათვის შემოწმების აქტი (ცნობა) უნდა ჩაბარდეს შემოწმებული ობიექტის მარეგისტრირებელ დანაყოფს.

4. იმ შემთხვევაში, თუ შემოწმებული ობიექტის ხელმძღვანელობა ხელს არ აწერს აქტს, უნდა გაფორმდეს შესაბამისი ცნობა (აქტი), ხოლო შემოწმების აქტი ითვლება დასრულებულად.

5. შემოწმებული ობიექტის მხრიდან შემოწმების შედეგებზე პრეტენზიის წარდგენის შემთხვევაში, საკითხს იხილავს შესაბამისი სტრუქტურული ერთეულის ხელმძღვანელობა.

6. შემოწმების მასალები სამართალდამცავ ორგანოებს გადაეგზავნება პარლამენტთან ურთიერთობისა და სამართლებრივი უზრუნველყოფის სამმართველოს ვიზირების შემდეგ.

    მუხლი 31. მოხსენებითი ბარათი

1. შემოწმების აქტის ხელმოწერიდან 10 დღის ვადაში, ჯგუფის ხელმძღვანელი წევრებთან ერთად წერს მოხსენებით ბარათს შესაბამისი კონტროლის პალატის თავმჯდომარის სახელზე.

2. მოხსენებით ბარათში მოკლედ უნდა იყოს გაანალიზებული შემოწმების შედეგად გამოვლენილი დარღვევა-ნაკლოვანებები სათანადო შეფასებებითა და დასკვნებით. წარმოდგენილი უნდა იყოს ღონისძიებები და წინადადებები არსებულ ნაკლოვანებათა აღმოფხვრისა და შემოწმების შედეგებზე რეაგირების შესახებ.

3. მოხსენებით ბარათს ხელს აწერენ ჯგუფის ხელმძღვანელი და წევრები, განიხილავენ და ვიზას აძლევენ იურისტი, სტრუქტურული ერთეულის ხელმძღვანელი, მისი მოადგილე და თავმჯდომარის მოადგილე.

4. მოხსენებითი ბარათი და შემოწმებული ობიექტის ახსნა-განმარტება (თუ ასეთი არის) წარედგინება შესაბამისი კონტროლის პალატის თავმჯდომარეს.

    მუხლი 32. შემოწმებული ობიექტის განმეორებითი შემოწმება

შესამოწმებელი ობიექტის მოთხოვნის შემთხვევაში შემოწმებული ობიექტის გადამოწმების თაობაზე გადაწყვეტილებას იღებს საქართველოს კონტროლის პალატის პრეზიდიუმი.

   

 

თავი IV. კონტროლის პალატის პრეზიდიუმი

    მუხლი 33. კონტროლის პალატის პრეზიდიუმის სხდომის მომზადებისა და ჩატარების წესი

1. კონტროლის პალატის უმაღლესი კოლეგიური ორგანოს – პრეზიდიუმის სხდომები, როგორც წესი, ტარდება თვეში ერთხელ. მომავალი სხდომა ცხადდება ერთი კვირით ადრე.

2. პრეზიდიუმის რიგგარეშე სხდომა მოიწვევა შესაბამისი კონტროლის პალატის თავმჯდომარის ან პრეზიდიუმის წევრთა უმრავლესობის დასაბუთებული წერილობითი მოთხოვნის საფუძველზე.

3. პრეზიდიუმზე განსახილველი საკითხი შემოაქვს შესაბამის სტრუქტურულ ერთეულს.

4. პრეზიდიუმის სხდომის დღის წესრიგის პროექტს ადგენს პრეზიდიუმის სამდივნო, რომელსაც ყოველი თვის პირველ ორშაბათს ოპერატიულ თათბირზე განიხილავს შესაბამისი კონტროლის პალატის თავმჯდომარე.

5. პრეზიდიუმის სხდომის დღის წესრიგი მტკიცდება პრეზიდიუმის სხდომაზე.

6. პრეზიდიუმის დადგენილებების პროექტი წარედგინება პრეზიდიუმის სამდივნოს პრეზიდიუმის სხდომამდე 10 კალენდარული დღით ადრე.

7. პრეზიდიუმის დადგენილების პროექტი პრეზიდიუმის სხდომამდე 7 კალენდარული დღით ადრე ვიზირებისათვის გადაეცემა პარლამენტთან ურთიერთობისა და სამართლებრივი უზრუნველყოფის სამმართველოს და ურიგდებათ პრეზიდიუმის წევრებს – 3 კალენდარული დღით ადრე.

8. პრეზიდიუმის სხდომას პრეზიდიუმის წევრების გარდა ესწრებიან პრეზიდიუმის მდივანი, მასმედიასა და საზოგადოებასთან ურთიერთობის ბიუროს, პარლამენტთან ურთიერთობისა და სამართლებრივი უზრუნველყოფის სამმართველოს უფროსები, თავმჯდომარის თანაშემწე, კონკრეტულ საკითხებზე კი ჯგუფის წევრები.

9. პრეზიდიუმის სხდომები ღიაა, გარდა კანონით გათვალისწინებული შემთხვევებისა. დახურულ სხდომას ესწრებიან პრეზიდიუმის წევრები და ის პირები, რომელთა დასწრებას განსაზღვრავს პრეზიდიუმი.

10. პრეზიდიუმზე დამსწრე პირთა მოწვევას უზრუნველყოფს საკითხის გამომტანი სტრუქტურული ერთეული. მოწვეულ პირთა რეგისტრაცია ევალება პრეზიდიუმის სამდივნოს.

11. პრეზიდიუმის სხდომის ოქმს აფორმებს პრეზიდიუმის სამდივნო.

12. პრეზიდიუმის შედეგებიდან გამომდინარე, საკითხის გამომტანი ერთეული სხდომის ჩატარებიდან 3 დღის ვადაში ამზადებს დადგენილებას, რომელიც ვიზირდება ერთეულის ხელმძღვანელის, თავმჯდომარის მოადგილისა და პარლამენტთან ურთიერთობისა და სამართლებრივი უზრუნველყოფის სამმართველოს მიერ. აღნიშნული პროცედურის შესრულებას უზრუნველყოფს პრეზიდიუმის სამდივნო.

13. პრეზიდიუმის დადგენილება სხდომის ჩატარებიდან 7 დღის ვადაში ხელმოწერილი უნდა იქნეს პრეზიდიუმის თავმჯდომარის მიერ და დაეგზავნოს შესაბამის ადრესატებს, რასაც უზრუნველყოფს პრეზიდიუმის სამდივნო.

14. ჩატარებული რევიზია-შემოწმებების შედეგების თაობაზე მიღებული პრეზიდიუმის დადგენილების კონტროლიდან მოხსნა ხდება პრეზიდიუმის დადგენილებით.

    მუხლი 34. პრეზიდიუმის დადგენილების პროექტის მომზადება

1. შესაბამისი კონტროლის პალატის თავმჯდომარის მიერ შემოწმების შედეგების პრეზიდიუმის სხდომაზე განხილვის გადაწყვეტილების მიღების შემთხვევაში, ჯგუფის ხელმძღვანელი წევრებთან ერთად 5 დღის ვადაში ამზადებს პრეზიდიუმის დადგენილების პროექტს, რომელიც, როგორც წესი, არ უნდა აღემატებოდეს 1,5 ინტერვალით ნაბეჭდ 10 გვერდს.

2. დადგენილების პროექტში უნდა აღინიშნოს შემოწმებით გამოვლენილი ძირითადი დარღვევა-ნაკლოვანებები, შეფასებები, გასატარებელი ღონისძიებანი, შესრულებაზე პასუხისმგებელი პირები და ვადები.

3. დადგენილების პროექტს ხელს აწერენ ჯგუფის ხელმძღვანელი, წევრები, მთავარი იურისტი და ვიზირდება შესაბამისი ერთეულის ხელმძღვანელის, პარლამენტთან ურთიერთობისა და სამართლებრივი უზრუნველყოფის სამმართველოსა და თავმჯდომარის მოადგილის მიერ.

4. პრეზიდიუმის სხდომაზე საკითხის განხილვამდე დადგენილების პროექტი განიხილება წინასწარ თათბირზე შესაბამისი კონტროლის პალატის თავმჯდომარის ერთ-ერთ მოადგილესთან ან ერთეულის ხელმძღვანელთან, ჯგუფის ხელმძღვანელისა და წევრების, შემოწმებული ობიექტის წარმომადგენელთა მონაწილეობით.

    თავი V. კონტროლის პალატის საქმიანობის ანგარიშის და მთავრობის ანგარიშთან დაკავშირებული მოხსენებების მომზადების წესი

    მუხლი 35. კონტროლის პალატის მოხსენება მთავრობის ანგარიშთან დაკავშირებით

1. საქართველოს კონსტიტუციის და „საქართველოს კონტროლის პალატის შესახებ” საქართველოს კანონის შესაბამისად, კონტროლის პალატა წელიწადში ორჯერ, ბიუჯეტის შესრულების წინასწარი და სრული ანგარიშის წარდგენის დროს, პარლამენტს წარუდგენს მოხსენებას მთავრობის ანგარიშთან დაკავშირებით.

2. კონტროლის პალატის მოხსენება წარმოადგენს საანგარიშო წლისა და ექვსი თვის ანალიზს ბიუჯეტის შესრულების შესახებ, რომელშიც ასახულია ძირითადი მონაცემები ბიუჯეტის კუთვნილი თანხების მობილიზების მდგომარეობის, სახელმწიფო სახსრების ხარჯვის მიზნობრიობის კანონიერების თაობაზე.

3 კონტროლის პალატის სტრუქტურული ერთეულები აფხაზეთის აჭარის ავტონომიური რესპუბლიკის კონტროლის პალატები ბიუჯეტის წლის შესრულების შესახებ ინფორმაციას წარმოადგენენ არა უგვიანეს მომდევნო წლის 25 აპრილამდე, ხოლო ექვსი თვის შესრულების შესახებ მიმდინარე წლის 15 სექტემბრამდე.

4. კონტროლის პალატის სტრუქტურულმა ერთეულებმა ინფორმაცია უნდა წარადგინონ საქართველოს კონტროლის პალატის თავჯდომარის სახელზე.

    მუხლი 36. კონტროლის პალატის საქმიანობის ანგარიში

1. „საქართველოს კონტროლის პალატის შესახებ” საქართველოს კანონის შესაბამისად კონტროლის პალატა წელიწადში ერთხელ, არა უგვიანეს საანგარიშგებო წლის მომდევნო წლის 1 ივნისისა, პარლამენტს წარუდგენს თავისი საქმიანობის ანგარიშს.

2. კონტროლის პალატის ანგარიში წარმოადგენს შესაბამისი წლის საქმიანობის ანალიზს, რომელშიც ასახულია ყველა სტატისტიკური ინფორმაცია, განზოგადებულია მნიშვნელოვან შემოწმებათა მასალები, დარღვევა-ნაკლოვანებები, ტენდენციები, გატარებული ღონისძიებები და სხვა საკითხები.

3. კონტროლის პალატის სტრუქტურული ერთეულები, აფხაზეთის, აჭარის ავტონომიური რესპუბლიკის კონტროლის პალატები განვლილი წლის საქმიანობის ანგარიშს წარმოადგენენ არა უგვიანეს მომდევნო წლის 1 აპრილამდე.

4. კონტროლის პალატის სტრუქტურულმა ერთეულებმა საქმიანობის ანგარიშები უნდა წარმოადგინონ საქართველოს კონტროლის პალატის თავმჯდომარის სახელზე.

    მუხლი 37. მოხსენებისა და ანგარიშის მომზადება

1. მთავრობის ანგარიშთან დაკავშირებით მოხსენების და კონტროლის პალატის საქმიანობის ანგარიშის მოსამზადებლად თავმჯდომარის ბრძანებით ყოველწლიურად იქმნება სამუშაო ჯგუფი, როგორც წესი საინფორმაციო-ანალიტიკური სამმართველოს უფროსის ხელმძღვანელობით.

2. სამუშაო ჯგუფი არა უგვიანეს მომდევნო წლის 5 აპრილისა კონტროლის პალატის თავმჯდომარეს წარუდგენს ბიუჯეტის წლის შესრულების შესახებ, ხოლო არა უგვიანეს მიმდინარე წლის 1 ოქტომბრამდე ბიუჯეტის ექვსი თვის შესრულების შესახებ მოხსენების პროექტს.

3. სამუშაო ჯგუფი არა უგვიანეს 1 მაისამდე კონტროლის პალატის თავმჯდომარეს წარუდგენს კონტროლის პალატის საქმიანობის საერთო ანგარიშს.

4. მთავრობის ანაგრიშთან დაკავშირებით კონტროლის პალატის მოხსენება და საქმიანობის ანაგრიში განიხილება და მტკიცდება საქართველოს კონტროლის პალატის პრეზიდიუმზე.

    თავი VI. თათბირების ჩატარების წესი

    მუხლი 38. ოპერატიული თათბირის ჩატარების წესი

1. კონტროლის პალატაში, როგორც წესი, ყოველ ორშაბათს 10.00 საათზე ტარდება ოპერატიული თათბირი. თათბირს ატარებს პალატის თავმჯდომარე ან მის მიერ უფლებამოსილი მოადგილე.

2. ოპერატიულ თათბირს ესწრებიან: თავმჯდომარის მოადგილეები, სტრუქტურული ერთეულებისა და ქვედანაყოფების ხელმძღვანელები და მათი მოადგილეები საორგანიზაციო საკითხებში, თათბირის მდივანი. თათბირს ასევე ესწრება აფხაზეთის კონტროლის პალატის თავმჯდომარე.

3. აფხაზეთის, აჭარის ავტონომიური რესპუბლიკის კონტროლის პალატებში ოპერატიული თათბირის ჩატარების დღე, საათი და დამსწრეთა ნუსხა განისაზღვრება შესაბამისი ხელმძღვანელის ბრძანებით.

4. თათბირზე იხილება კონტროლის პალატის საქმიანობის მიმდინარე საკითხები, კვირის მანძილზე გაწეული მუშაობის შედეგები, იგეგმება უახლოესი მომავლის ამოცანები.

5. თათბირის ოქმს აფორმებს საოქმო განყოფილება და იმავე დღეს წარადგენს ხელმოსაწერად.

6. თათბირის ოქმი, არა უგვიანეს მეორე დღისა, ეგზავნება თათბირის ყველა მონაწილეს, ხოლო ოქმიდან ამონაწერი დავალების შემსრულებელ პასუხისმგებელ პირებს.

7. თათბირის დავალებათა შესრულების კონტროლს ახორციელებს თავმჯდომარის სამდივნო, აგრეთვე, თავმჯდომარის დავალებით, შიდა კონტროლის ინსპექცია.

    თავი VII. გარდამავალი დებულებები

    მუხლი 39. აფხაზეთის, აჭარის ავტონომიური რესპუბლიკის კონტროლის პალატების პრეზიდიუმები

1. აფხაზეთის, აჭარის ავტონომიურ რესპუბლიკის კონტროლის პალატების პრეზიდიუმების პერსონალური შემადგენლობას ამტკიცდებს საქართველოს კონტროლის პალატის პრეზიდიუმი.

2. კონტროლის პალატის პრეზიდიუმი უფლებამოსილია გააუქმოს ან შეცვალოს აფხაზეთის, აჭარის ავტონომიური რესპუბლიკის კონტროლის პალატების პრეზიდიუმების დადგენილებები.

    მუხლი 40. შემოწმების შედეგად გამოვლენილი თანხები

1. კონტროლის პალატის მიერ შემოწმების შედეგად სახელმწიფო ბიუჯეტის, ავტონომიური რესპუბლიკების, საქართველოს სხვა ტერიტორიული ერთეულების ბიუჯეტებისა და სახელმწიფო ფონდების სასარგებლოდ გამოვლენილ თანხებს ამოიღებს საგადასახადო სამსახური.

2. სახელმწიფო ბიუჯეტის, აფხაზეთის, აჭარის ავტონომიური რესპუბლიკის, საქართველოს სხვა ტერიტორიული ერთეულების ბიუჯეტებისა და სახელმწიფო ფონდების სასარგებლოდ გამოვლენილი თანხების ამოღების უზრუნველყოფის ღონისძიებათა გატარებაზე ზედამხედველობა ეკისრებათ საკონტროლო-სარევიზიო საქმიანობით დაკავებული სტრუქტურული ერთეულების ხელმძღვანელებს, თავმჯდომარის მოადგილეებსა და აფხაზეთის, აჭარის ავტონომიური რესპუბლიკის კონტროლის პალატების ხელმძღვანელებს. კონტროლის პალატის კუთვნილი თანხების (სპეცსახსრების) განაწილების წესი რეგულირდება თავმჯდომარის ბრძანებით დამტკიცებული დებულებით.

    მუხლი 41. მოქალაქეთა და დოკუმენტაციის მიღების წესი

1. კონტროლის პალატაში მოქმედებს მოქალაქეთა მიღების ერთიანი წესი – ორშაბათობით 15.00-დან 18.00 სთ-მდე.

2. კონტროლის პალატაში მოქალაქეთა მიღების, განცხადებების, საჩივრებისა და სხვა დოკუმენტაციის შემოსვლის უზრუნველსაყოფად ფუნქციობს სპეციალური მისაღები.

    მუხლი 42. კონტროლის პალატის სიმბოლიკა

1. კონტროლის პალატას აქვს ბეჭედი სახელმწიფო გერბის გამოსახულებით.

2. კონტროლის პალატა იყენებს სახელმწიფო დროშას მოქმედი კანონმდებლობის შესაბამისად.

3. სახელმწიფო გერბის გამოსახულება გამოიყენება კონტროლის პალატის ბლანკებსა და შესასვლელის აბრაზე.

4. კონტროლის პალატას აქვს ემბლემა, რომელიც მტკიცდება თავმჯდომარის ბრძანებით.

5. კონტროლის პალატას აქვს ბეჭდვითი ორგანო – ყოველკვარტალური ჟურნალი – „სახელმწიფო და კონტროლი”.