ეს დებულება აწესრიგებს საქართველოს შინაგან საქმეთა სამინისტროს სახელმწიფო საქვეუწყებო დაწესებულება – საქართველოს სასაზღვრო პოლიციის (შემდგომში – სასაზღვრო პოლიცია) სტატუსს, დანიშნულებას, სტრუქტურას, კომპეტენციას, უფლება-მოვალეობებს და მის საქმიანობასთან დაკავშირებულ სხვა საკითხებს.

მუხლი 2. საქართველოს სასაზღვრო პოლიციის სტატუსი და კომპეტენციის ფარგლები

1. სასაზღვრო პოლიცია არის საქართველოს შინაგან საქმეთა სამინისტროს გამგებლობაში შემავალი სპეციალური სამსახური და სამართალდამცავი ორგანო სახელმწიფო საქვეუწყებო დაწესებულების სტატუსით, რომელიც პასუხისმგებელია საქართველოს პრეზიდენტისა და საქართველოს შინაგან საქმეთა მინისტრის წინაშე.

2. სასაზღვრო პოლიციას აქვს გერბი და დროშა, რომელსაც ამტკიცებს საქართველოს პრეზიდენტი. სასაზღვრო პოლიციას აგრეთვე აქვს ნამდვილი და პირობითი სახელწოდება, ემბლემა, ბეჭედი საქართველოს სახელმწიფო გერბისა და თავისი სახელწოდების გამოსახულებით, ბლანკები, უნიფორმა, შტამპები და ოფიციალური ვებგვერდი.

3. საქართველოს სასაზღვრო პოლიცია სასაზღვრო პოლიციურ ღონისძიებებს ახორციელებს:

ა) სახელმწიფო საზღვარზე;

ბ) სასაზღვრო ზოლში (500 მეტრი სახელმწიფო საზღვრის ხაზიდან);

გ) სასაზღვრო ზონაში (5 კმ);

დ) საერთაშორისო აეროპორტებში;

ე) საქართველოს საზღვაო სივრცეში და ღია ზღვაში;

ვ) პორტებში;

ზ) სასაზღვრო სარკინიგზო სადგურებში;

თ) კომპეტენციის ფარგლებში – საქართველო მთელს ტერიტორიაზე.

4. სასაზღვრო პოლიციის დაფინანსება ხორციელდება საქართველოს სახელმწიფო ბიუჯეტიდან.

5. სასაზღვრო პოლიციის მოსამსახურეთა და სამოქალაქო პირთა სოციალური დაცვისა და მატერიალური უზრუნველყოფა განსაზღვრულია საქართველოს პრეზიდენტის შესაბამისი ბრძანებულებით.

6. სასაზღვრო პოლიციის მოსამსახურეთა და სამოქალაქო პირთა სამსახურის გავლის წესი განსაზღვრულია საქართველოს პრეზიდენტის შესაბამისი ბრძანებულებით.

7. სასაზღვრო პოლიციის იურიდიული მისამართია: საქართველო, 0160 თბილისი, სიმონ კანდელაკის ქ.№12.

მუხლი 3. სასაზღვრო პოლიციის უფლებამოსილება

1. სასაზღვრო პოლიციის უფლებამოსილებანი განისაზღვრება საქართველოს კონსტიტუციით, ,,სახელმწიფო საზღვრის შესახებ“, ,,საქართველოს საზღვაო სივრცის შესახებ“, ,,პოლიციის შესახებ“ საქართველოს კანონებით, საკანონმდებლო, კანონქვემდებარე ნომატიული აქტებითა და ამ დებულებით. სასაზღვრო პოლიციას მინიჭებული აქვს საქართველოს კანონმდებლობით დადგენილი პოლიციის სპეციალური, განსაკუთრებული უფლებები და ოპერატიულ-სამძებრო, სადაზვერვო საქმიანობის განხორციელების უფლებამოსილებანი. აქვს ძალის გამოყენების უფლება, აგრეთვე უფლებამოსილება დაიცვას საქართველოს სახელმწიფო საზღვრის, სასაზღვრო, საკონტროლო გამტარი პუნქტის და საზღვაო სივრცის სამართლებრივი რეჟიმი, კანონმდებლობით დადგენილი წესით გამოიძიოს სისხლის სამართლის საქმეები და განახორციელოს ყველა საგამოძიებო მოქმედება, რომელიც გათვალისწინებულია საქართველოს სისხლის სამართლის საპროცესო კანონმდებლობით. სამართალდარღვევებზე განახორციელოს ადმინისტრაციული საქმისწარმოება.

2. სასაზღვრო პოლიცია, თავისი კომპეტენციის ფარგლებში, სასაზღვრო საკითხებში თანამშრომლობს საქართველოს ცენტრალური ხელისუფლების და ადგილობრივი თვითმმართველობის ორგანოებთან, საერთაშორისო, საზოგადოებრივ, და სხვა ორგანიზაციებთან, ამყარებს ორმხრივ და მრავალმხრივ ურთიერთობებს საზღვარგარეთის ქვეყნების შესაბამის უწყებებთან, კომპეტენციის ფარგლებში ხელს აწერს შეთანხმებებს, მონაწილეობს ტრანსსასაზღვრო დანაშაულებათა და არალეგალური მიგრაციის წინააღმდეგ მიმართულ საერთაშორისო საქმიანობაში.

3. სასაზღვრო პოლიციას აქვს ინფორმაციის ანალიზის, სტრატეგიული დაგეგმის, ადმინისტრაციულ სამართალდარღვევათა კოდექსით დადგენილი წესის შესაბამისად – ადმინისტრაციულ სამართალდარღვევათა ოქმის შედგენის, ადმინისტრაციული სახდელის დადების, გაჩერების, დაკავების, ჩხრეკის, ამოღების, ტვირთის, ქონების, ადამიანის ან სათავსოს შემოწმების უფლება.

მუხლი 4. სასაზღვრო პოლიციის ძირითადი ამოცანები

თავისი კომპეტენციის ფარგლებში სასაზღვრო პოლიციის ამოცანებია:

ა) საქართველოს სახელმწიფო საზღვრის დაცვა, სხვა სახელმწიფო უწყებებთან ერთად ქვეყნის ტერიტორიული მთლიანობის, სახელმწიფო საზღვრის ხელშეუხებლობის, სახელმწიფოს, მოქალაქეთა და მათი ქონების უსაფრთხოების დაცვა;

ბ) მოქმედი კანონმდებლობის შესაბამისად, საქართველოს სახელმწიფო საზღვარზე, სასაზღვრო ზოლში, სასაზღვრო ზონაში, საქართველოს საზღვაო სივრცესა და საქართველოს იურისდიქციას დაქვემდებარებულ გემებსა და საფრენ საშუალებებზე კანონსაწინააღმდეგო ქმედებათა პრევენცია, გამოვლენა და აღკვეთა;

გ) სასაზღვრო ინციდენტების, სამხედრო ან სხვა სახის აგრესიის, ტერორისტული აქტების თავიდან აცილება და მოგერიება;

დ) უცხოელთა ინსპექტირება, მიგრაციისა და უცხოელთა სამართლებრივი მდგომარეობის შესახებ კანონმდებლობით გათვალისწინებული სხვა მოთხოვნების შესრულების უზრუნველყოფა;

ე) სამაშველო ოპერაციების განხორციელება ზღვაზე, სასაზღვრო ზოლსა და ზონაში, განსაკუთრებულ შემთხვევებში – ადამიანთა სიცოცხლისა და ქონების გადარჩენის მიზნით კი – საქართველოს მთელს ტერიტორიაზე;

ვ) სასაზღვრო გამტარ პუნქტებში სახელმწიფო საზღვრის დაცვის სუბიექტების საქმიანობის კოორდინირება, საბაჟო სამსახურთან შეთანხმებით, სასაზღვრო-სამიგრაციო, საბაჟო და სხვა სახის კონტროლის ადგილის, დროისა და თანამიმდევრობის განსაზღვრა;

ზ) სასაზღვრო გამტარ პუნქტებში სასაზღვრო რეჟიმის დაცვის ღონისძიებათა შემუშავება და მათი რეალიზაციის კონტროლი;

თ) კომპეტენციის ფარგლებში საქართველოს კანონმდებლობის დაცვისა და საერთაშორისო ვალდებულებების შესრულების კონტროლი საქართველოს სახელმწიფო სახმელეთო საზღვარზე, საზღვაო სივრცეში, პორტებსა და გემებზე, რომლებზეც საქართველოს იურისდიქცია ვრცელდება;

ი) შესაბამის სახელმწიფო უწყებებთან, უცხო სახელმწიფოების სასაზღვრო ორგანოებთან და საერთაშორისო ორგანიზაციებთან სახელმწიფო საზღვართან დაკავშირებული პრობლემების მოგვარების საკითხებში თანამშრომლობა, სასაზღვრო საკითხებზე საერთაშორისო მოლაპარაკებაში მონაწილეობის მიღება;

კ) ზღვის გარემოსა და ბუნებრივი რესურსების დაცვის ღონისძიებებში მონაწილეობის მიღება;

ლ) საქართველოს საზღვაო სივრცეში ბიორესურსების მოპოვებაზე და სამეცნიერო კვლევების ჩატარებაზე საქართველოს კანონმდებლობითა და საერთაშორისო საზღვაო სამართლის ნორმებით დადგენილი წესების დაცვის კონტროლი;

მ) საქართველოს ნავსადგურების დაცვა და უსაფრთხოება;

ნ) საქართველოს საზღვაო სივრცეში მისი სუვერენული უფლებების დაცვა და ნაოსნობის უსაფრთხოების უზრუნველყოფა, ნაოსნობის წესების დაცვისა და ჰიდროგრაფიული საქმიანობის კონტროლი;

ო) საქართველოს სახელმწიფო საზღვარზე, სასაზღვრო ზოლში, სასაზღვრო ზონასა და საქართველოს საზღვაო სივრცეში ტრეფიკინგის, კონტრაბანდული საქონლის იმპორტისა და ექსპორტის, მათ შორის, ნარკოტიკული საშუალებების, იარაღის, ასაფეთქებელი ნივთიერებებისა და მასობრივი განადგურების საშუალებების, პრევენცია, გამოვლენა და აღკვეთა;

პ) ოპერატიულ-სამძებრო საქმიანობის განხორციელება საქართველოს სახელმწიფო საზღვარზე, სასაზღვრო ზოლში, სასაზღვრო ზონაში და საზღვაო სივრცეში დანაშაულებათა გამოვლენა-აღკვეთის და თავიდან აცილების უზრუნველყოფის მიზნით. კომპეტენციის ფარგლებში, სისხლის სამართლის საპროცესო კოდექსის მოთხოვნათა დაცვით, სისხლის სამართლის საქმეებზე წინასწარი გამოძიების ჩატარება და ადმინისტრაციული საქმისწარმოება.

ჟ) საქართველოს სახელმწიფო საზღვრის, სასაზღვრო ზოლის, სასაზღვრო ზონისა და საზღვაო სივრცის დაცვასა და კონტროლთან დაკავშირებული საკანონმდებლო აქტების პროექტების შემუშავებაში მონაწილეობის მიღება;

რ) სასაზღვრო პოლიციის შემდგომი განვითარებისა და უწყების საქმიანობის გაუმჯობესების მიზნით შესაბამისი კონცეფციების შემუშავება;

ს) საქართველოს სახელმწიფო საზღვარზე, სასაზღვრო ზოლში, ზონასა და საზღვაო სივრცეში არსებული საფრთხეების შესახებ ინფორმაციის შეგროვება, მისი შესწავლა, ანალიზი და შესაბამისი რეაგირების მექანიზმების შემუშავება. საჭიროების შემთხვევაში შესაბამისი უფლებამოსილი სახელმწიფო ორგანოების ინფორმირება;

ტ) კომპეტენციის ფარგლებში სახელმწიფო საიდუმლოების შემცველი ცნობების დაცვის უზრუნველყოფა;

უ) კანონმდებლობით დაკისრებული სხვა ამოცანების შესრულება.

მუხლი 5. განსაკუთრებული ამოცანების შესრულება

1. სასაზღვრო პოლიციის განსაკუთრებული ამოცანებია:

ა) დაეხმაროს სხვა უწყებებს სტიქიური უბედურებების, კატასტროფებისა ან სხვა განსაკუთრებული საფრთხის დროს;

ბ) დაეხმაროს შესაბამის უწყებებს კარანტინის გამოცხადებისას და საშიში ინფექციური დაავადებების გავრცელების თავიდან აცილებაში;

გ) საგანგებო ან საომარი მდგომარეობის დროს ეროვნული თავდაცვის ვალდებულების შესრულება;

დ) შეასრულოს კანონმდებლობით გათვალისწინებული სხვა ამოცანები.

2. საომარი მდგომარეობის გამოცხადების დროს სასაზღვრო პოლიცია გადადის საქართველოს სამხედრო ძალების შემადგენლობაში.

3. სასაზღვრო პოლიცია უზრუნველყოფს პირადი შემადგენლობის, შეიარაღებისა და ტექნიკის მუდმივ საბრძოლო მზადყოფნას.

თავი II

მუხლი 6. სასაზღვრო პოლიციის ხელმძღვანელობა, სტრუქტურა და საქმიანობის ორგანიზება

1. სასაზღვრო პოლიცია – სასაზღვრო პოლიციის ცენტრალური აპარატის, ოპერატიულ-საგამოძიებო ორგანოების, სასაზღვრო პოლიციის სამმართველოებისა და მათ დაქვემდებარებაში მყოფი ქვედანაყოფების, სანაპირო დაცვის, სასაზღვრო ავიაციის, სწრაფი რეაგირების დანაყოფების, მომზადება-გადამზადების და სხვა დაწესებულებების ერთიანი სისტემაა, რომელიც უზრუნველყოფს სასაზღვრო სამსახურის საქმიანობას.

2. სასაზღვრო პოლიციას მართვას, კოორდინაციასა და ხელმძღვანელობას ახორციელებს სასაზღვრო პოლიციის უფროსი, რომელიც ამავდროულად არის შინაგან საქმეთა მინისტრის მოადგილე. შინაგან საქმეთა მინისტრის წარდგინებით, მას თანამდებობაზე ნიშნავს პრემიერ-მინისტრი საქართველოს პრეზიდენტთან შეთანხმებით, ხოლო თანამდებობიდან ათავისუფლებს საქართველოს პრეზიდენტი საკუთარი ინიციატივით ან პრემიერ-მინისტრი შინაგან საქმეთა მინისტრის წარდგინებით.

3. სასაზღვრო პოლიციის ძირითადი ფუნქციებიდან გამომდინარე უწყების საქმიანობის კონკრეტულ მიმართულებებს ხელმძღვანელობენ მისი მოადგილეები, რომელთაგანაც ერთ-ერთი სასაზღვრო პოლიციის უფროსის არყოფნის შემთხვევაში მის მოვალეობებს ასრულებს.

4. სასაზღვრო პოლიციის უფროსს ჰყავს სამი მოადგილე.

5. სასაზღვრო პოლიციის სტრუქტურული ერთეულებია:

ა) სახმელეთო საზღვრის დაცვის დეპარტამენტი;

ბ) სანაპირო დაცვის დეპარტამენტი;

გ) სასაზღვრო პოლიტიკის უზრუნველყოფის დეპარტამენტი;

დ) სპეციალური დანიშნულების ავიაციის სამმართველო;

ე) საგამოძიებო-ოპერატიული და დაზვერვის სამმართველო;

ვ) სწრაფი რეაგირების რაზმი (სამმართველო);

ზ) შიდა ინსპექცია (სამმართველო);

თ) ოპერატიული მართვისა და სასაზღვრო ტექნოლოგიების ცენტრი (სამმართველო);

ი) სამდივნო.

საქართველოს შინაგან საქმეთა მინისტრის 2008 წლის 18 აპრილის ბრძანება №495 - სსმ III, 21.04.2008, №60, მუხ.695

საქართველოს შინაგან საქმეთა მინისტრის 2008 წლის 6 მაისის ბრძანება №570 - სსმ III, 08.05.2008, №70, მუხ.752

მუხლი 7. სასაზღვრო პოლიციის უფროსის უფლებამოსილება

სასაზღვრო პოლიციის უფროსი:

ა) პასუხისმგებელია შინაგან საქმეთა მინისტრის წინაშე სასაზღვრო პოლიციაზე დაკისრებული მოვალეობების შესრულებაზე;

ბ) ორგანიზებას უწევს სასაზღვრო პოლიციის მუშაობას და ახორციელებს საერთო ხელმძღვანელობას;

გ) უფლებამოსილია გამოსცეს ბრძანებები და დირექტივები, რომლებიც აუცილებელია სასაზღვრო პოლიციისათვის კანონით დაკისრებული ამოცანების შესასრულებლად დამოუკიდებლად ან/და საზღვრის დაცვის სუბიექტებთან ერთად;

დ) განსაზღვრავს სასაზღვრო პოლიციის მოსამსახურეთა ფუნქციებსა და უფლებამოსილებას;

ე) ხელმძღვანელობს სასაზღვრო პოლიციის ქვედანაყოფების სადაზვერვო, ოპერატიულ-საგამოძიებო საქმიანობას საქართველოს კანონმდებლობის შესაბამისად;

ვ) საქართველოს შინაგან საქმეთა მინისტრს განსახილველად წარუდგენს სამართლებრივი აქტების პროექტებს სასაზღვრო პოლიციის საქმიანობასთან დაკავშირებულ საკითხებზე;

ზ) ხელმძღვანელობს სასაზღვრო პოლიციის კოორდინირებულ მუშაობას საქართველოს სახელმწიფო ხელისუფლების ორგანოებთან;

თ) წარმოადგენს სასაზღვრო პოლიციას მოსაზღვრე და სხვა სახელმწიფოებში, აგრეთვე საერთაშორისო ორგანიზაციებში, სასაზღვრო, სამართალდამცავ და სამხედრო ორგანოებში; კანონმდებლობით დადგენილი წესით ხელს აწერს უწყებათაშორისი ხასიათის საერთაშორისო შეთანხმებებს;

ი) საქართველოს შინაგან საქმეთა მინისტრს წარუდგენს წინადადებებს სასაზღვრო პოლიციის სტრუქტურისა და რიცხოვნობის შესახებ;

კ) საქართველოს შინაგან საქმეთა მინისტრს წარუდგენს კანდიდატურებს სასაზღვრო პოლიციის უფროსის მოადგილის თანამდებობაზე დანიშვნისა და გათავისუფლების მიზნით;

ლ) სასაზღვრო პოლიციის სამსახურში საშტატო განრიგით გათვალისწინებულ თანამდებობებზე ნიშნავს, რიცხავს, გადააადგილებს, თადარიგში გაჰყავს და ათავისუფლებს პირებს. შვებულებაში უშვებს და შვებულებიდან იძახებს სასაზღვრო პოლიციის თანამშრომლებს;

მ) სამსახურებრივ მივლინებაში გზავნის სასაზღვრო პოლიციის უფროსის მოადგილეებს, სასაზღვრო პოლიციის მოსამსახურეებსა და სამოქალაქო პირებს;

ნ) თანამშრომელთა მიმართ იყენებს წახალისებისა და დისციპლინარული სასჯელის ღონისძიებებს;

ო) ანიჭებს სასაზღვრო პოლიციის პირველად სპეციალურ წოდებებს, აგრეთვე მორიგ სპეციალურ წოდებებს პოლკოვნიკის (I რანგის კაპიტანი) ჩათვლით;

პ) ანიჭებს რიგგარეშე სპეციალურ წოდებებს პოლკოვნიკის (I რანგის კაპიტანი) ჩათვლით.

ჟ) საქართველოს შინაგან საქმეთა მინისტრს განსახილველად წარუდგენს წინადადებებს სასაზღვრო პოლიციის მოსამსახურეების უმაღლესი სპეციალური წოდების მინიჭების შესახებ;

რ) საქართველოს შინაგან საქმეთა მინისტრს განსახილველად წარუდგენს წინადადებებს სასაზღვრო პოლიციის საჯარო სამსახურის თანამდებობათა რეესტრში შეტანის შესახებ;

ს) ხელმძღვანელობს სასაზღვრო პოლიციის საერთო საკადრო და უწყების თანამშრომელთა მომზადება-გადამზადების პოლიტიკას;

ტ) განკარგავს საბიუჯეტო სახსრებს დამტკიცებული ასიგნების ფარგლებში;

უ) განსაზღვრავს და აკონტროლებს სასაზღვრო პოლიციის ფინანსური, მატერიალურ-ტექნიკური უზრუნველყოფისა და ინფრასტრუქტურის განვითარებისათვის აუცილებელ საქმიანობას;

ფ) ადგენს სასაზღვრო პოლიციის ყოველწლიური მოთხოვნილებების შესაბამისად ყველა სახის კმაყოფაზე საკვები პროდუქტების, სანივთე ქონების, ინვენტარის, შეიარაღების, ტექნიკის, სპეციალური და სტანდარტული ავტოსატრანსპორტო საშუალებების, სათბობის, საწვავ-საპოხი მასალების, საავიაციო ტექნიკისა და სხვა აუცილებელი მატერიალური ფასეულობების რაოდენობასა და უზრუნველყოფისთვის კანონმდებლობით განსაზღვრულ ღონისძიებებს;

ქ) აკონტროლებს სასაზღვრო პოლიციის ქვედანაყოფების სამსახურებრივ, ადმინისტრაციულ, საფინანსო და სამეურნეო საქმიანობას;

ღ) თავისი კომპეტენციის ფარგლებში ადგენს სასაზღვრო პოლიციის მოსამსახურეთა, სამოქალაქო პერსონალისა და მათი ოჯახების წევრთა სოციალური დაცვის საკითხებს;

ყ) ცეცხლსასროლი იარაღით, ფულადი ჯილდოთი და ფასიანი საჩუქრით აჯილდოებს და საპატიო წოდებებს ანიჭებს სასაზღვრო პოლიციის მოსამსახურეებსა და სამოქალაქო პერსონალს, უცხო სახელმწიფოების წარმომადგენლებს, აგრეთვე სხვა პირებს სასაზღვრო პოლიციის წინაშე მდგომი ამოცანების გადაჭრაში აქტიური დახმარებისათვის;

შ) ნიშნავს და აკონტროლებს სასაზღვრო წარმომადგენლების (სასაზღვრო კომისრების) საქმიანობას;

ჩ) შინაგან საქმეთა მინისტრს წარუდგენს პრეზიდენტის მიერ დასამტკიცებლად სასაზღვრო პოლიციის ფორმის ტანსაცმელსა და განმასხვავებელი ნიშნების ნიმუშებს;

ც) მოქმედი კანონმდებლობის შესაბამისად შინაგან საქმეთა მინისტრს წარუდგენს წინადადებებს სასაზღვრო პოლიციის მოსამსახურეთა დაჯილდოების შესახებ;

ძ) სასაზღვრო პოლიციის უფროსს უფლება აქვს გადასცეს მისთვის საქართველოს კანონმდებლობით ან ამ დებულებით მინიჭებული უფლებამოსილება მის დაქვემდებარებაში მყოფი ნებისმიერი სტრუქტურული ერთეულისა და ქვედანაყოფის უფროსს.

საქართველოს შინაგან საქმეთა მინისტრის 200 8 წლის 11 მარტის ბრძანება № 318 - სსმ III, 19.03.2008, № 41 , მუხ. 472

საქართველოს შინაგან საქმეთა მინისტრის 2008 წლის 18 აპრილის ბრძანება №494 - სსმ III, 21.04.2008, №60, მუხ.694

თავი III

მუხლი 8. სახმელეთო საზღვრის დაცვის დეპარტამენტი

1. სახმელეთო საზღვრის დაცვის დეპარტამენტი:

ა) უზრუნველყოფს საქართველოს სახელმწიფო საზღვარზე, სასაზღვრო ზოლში და სასაზღვრო ზონაში დადგენილი სამართლებრივი რეჟიმის კონტროლს;

ბ) ახორციელებს საზღვრის სახმელეთო მონაკვეთების დაცვას, სასაზღვრო-სამიგრაციო კონტროლს და უზრუნველყოფს ქვედანაყოფების მუდმივ მზადყოფნას;

გ) დამოუკიდებლად ან საქართველოს სახელმწიფო საზღვრის დაცვის სუბიექტებთან ურთიერთქმედებით ახორციელებს სასაზღვრო-პოლიციურ, ორგანიზაციულ-სამართლებრივ, ადმინისტრაციულ, მიგრაციულ, საგამოძიებო, სადაზვერვო, კონტრსადაზვერვო, გარემოსდაცვით და სხვა ღონისძიებებს.

2. სახმელეთო საზღვრის დაცვის დეპარტამენტს ხელმძღვანელობს დეპარტამენტის დირექტორი, რომელიც ამავდროულად სასაზღვრო პოლიციის უფროსის მოადგილეა. მას თანამდებობაზე ნიშნავს და ათავისუფლებს საქართველოს შინაგან საქმეთა მინისტრი სასაზღვრო პოლიციის უფროსის წარდგინებით. იგი ანგარიშვალდებულია უშუალოდ სასაზღვრო პოლიციის უფროსის წინაშე.

3. სახმელეთო საზღვრის დაცვის დეპარტამენტის დირექტორი:

ა) საქართველოს კანონმდებლობით, საქართველოს პრეზიდენტის ბრძანებულებებისა და განკარგულებების, საქართველოს შინაგან საქმეთა მინისტრისა და სასაზღვრო პოლიციის უფროსის ბრძანებებისა და განკარგულებების საფუძველზე თავისი კომპეტენციის ფარგლებში შეიმუშავებს და გამოსცემს ადმინისტრაციულ ინდივიდუალურ-სამართლებრივ აქტებს სამსახურებრივ საკითხებზე, ამოწმებს მათ შესრულებას;

ბ) სასაზღვრო პოლიციის უფროსის მიერ დელეგირებული კომპეტენციის ფარგლებში ახორციელებს საკადრო, საფინანსო და მატერიალურ-ტექნიკური უზრუნველყოფის პოლიტიკის გატარებას;

გ) თავისი კომპეტენციის ფარგლებში ახდენს მისდამი დაქვემდებარებული ცალკეული თანამდებობის პირებისათვის უფლებამოსილებების დელეგირებას;

დ) სახმელეთო საზღვრის დაცვის ქვედანაყოფების სამსახურებრივი საქმიანობის ორგანიზებასთან დაკავშირებული ნორმატიული და სახელმძღვანელო დოკუმენტების შემუშავებასა და მათი პრაქტიკაში დანერგვას;

ე) ხელმძღვანელობს სახმელეთო საზღვრის დაცვის განვითარების პროგრამის შემუშავებისა და მისი შესრულების ორგანიზებასა და სახმელეთო საზღვრის დაცვის თანამშრომელთა სპეციალურ მომზადებას.

4. სახმელეთო საზღვრის დაცვის დეპარტამენტი შედგება საზღვრის დაცვის და კონტროლის სამმართველოსა და სასაზღვრო პოლიციის სამმართველოებისაგან.

5. საზღვრის დაცვისა და კონტროლის სამმართველო:

ა) ორგანიზებას უწევს საზღვრის დაცვისა და სასაზღვრო კონტროლის საქმიანობის მართვას;

ბ) ახორციელებს სახმელეთო საზღვრის დაცვისა და სასაზღვრო კონტროლის საქმიანობის ანალიზს;

გ) აკონტროლებს სახმელეთო საზღვრის დაცვის საკითხებზე გამოცემული ნორმატიული აქტების შესრულებას;

დ) საერთაშორისო სამართლის ნორმების, პრინციპებისა და საქართველოს კანონმდებლობის შესაბამისად, საქართველოს საზღვრის სამართლებრივი რეჟიმის დაცვისა და სამიგრაციო კონტროლის სრულყოფის მიზნით, შეიმუშავებს სახმელეთო საზღვრის დაცვის განვითარების გრძელვადიან და მოკლევადიან პროგრამებს, დირექტივებსა და ინსტრუქციებს;

ე) სასაზღვრო პოლიციის სამმართველოებთან ერთად მონაწილეობს სასაზღვრო ინფრასტრუქტურის განვითარების წინადადებების შემუშავებაში და მატერიალურ-ტექნიკური საჭიროებების განსაზღვრაში.

6. სახმელეთო საზღვრის დაცვის დეპარტამენტის სამმართველოები ახორციელებენ:

ა) საქართველოს სახელმწიფო სახმელეთო საზღვრის დაცვისა და სახელმწიფო საზღვრის, სასაზღვრო და საკონტროლო გამტარი პუნქტის რეჟიმის დაცვასთან დაკავშირებული ამოცანების შესრულების ორგანიზებას, მართვასა და ხელმძღვანელობას;

ბ) ძალებისა და საშუალებების მზადყოფნისა და მათი ოპტიმალური გამოყენების უზრუნველყოფას;

გ) საქართველოს სახმელეთო საზღვრის დაცვის და სასაზღვრო კონტროლის მეთოდების შემუშავებას, ოპერაციების დაგეგმვასა და მათი ჩატარების უზრუნველყოფას;

დ) საქართველოს სახელმწიფო საზღვრის დაცვის სუბიექტების რეგიონულ ქვედანაყოფებთან ურთიერთქმედებას;

ე) საქართველოს სახმელეთო საკონტროლო გამტარ პუნქტებში სასაზღვრო კონტროლის ღონისძიებებს;

ვ) საგამოძიებო, ოპერატიულ-სამძებრო და სადაზვერვო საქმიანობას.

7. სახმელეთო საზღვრის დაცვის დეპარტამენტის სტრუქტურული დანაყოფებია:

ა) სასაზღვრო პოლიციის №1 სამმართველო (ბათუმი);

ბ) სასაზღვრო პოლიცის №2 სამმართველო (ახალციხე);

გ) სასაზღვრო პოლიციის №3 სამმართველო (წითელი ხიდი);

დ) სასაზღვრო პოლიციის №4 სამმართველო (დედოფლისწყარო);

ე) სასაზღვრო პოლიციის №5 სამმართველო (ლაგოდეხი);

ვ) სასაზღვრო პოლიციის №6 სამმართველო (ბარისახო);

ზ) სასაზღვრო პოლიციის №7 სამმართველო (ყაზბეგი);

თ) სასაზღვრო პოლიციის №8 სამმართველო (ჯავა-ონი);

ი) სასაზღვრო პოლიციის №9 სამმართველო (მესტია);

კ) სასაზღვრო პოლიციის №10 სამმართველო (ზემო აფხაზეთი);

ლ) სასაზღვრო პოლიციის №11 სამმართველო (აეროპორტი თბილისი);

მ) სასაზღვრო პოლიციის №12 სამმართველო (სოხუმი).

საქართველოს შინაგან საქმეთა მინისტრის 2006 წლის 13 ნოემბრის ბრძანება №1321 - სსმ III, 21.11.2006, №156, მუხ.2160

საქართველოს შინაგან საქმეთა მინისტრის 2007 წლის 21 თებერვლის ბრძანება №289 - სსმ III, 26.02.2007, №25, მუხ.311

საქართველოს შინაგან საქმეთა მინისტრის 2007 წლის 1 ივნისის ბრძანება №792 - სსმ III, 05.06.2007, №79, მუხ.849

მუხლი 9. სანაპირო დაცვის დეპარტამენტი

1. სანაპირო დაცვის დეპარტამენტი:

ა) უზრუნველყოფს საქართველოს საზღვაო სივრცეში სასაზღვრო-საზღვაო პოლიტიკის გატარებას, დადგენილი სამართლებრივი რეჟიმის შესრულებაზე კონტროლს და საერთაშორისო სამართლის ნორმებით დადგენილი ზომების მიღებას;

ბ) დამოუკიდებლად ან საქართველოს საზღვაო სივრცის სამართლებრივი რეჟიმის დაცვის კონტროლზე პასუხისმგებელ ორგანოებთან ურთიერთქმედებით ახორციელებს სასაზღვრო-პოლიციურ, ორგანიზაციულ-სამართლებრივ, ადმინისტრაციულ, მიგრაციულ, საგამოძიებო, სადაზვერვო, კონტრსადაზვერვო, გარემოსდაცვით, ძებნა-გადარჩენით და სხვა საზღვაო მოღვაწეობასთან დაკავშირებულ ღონისძიებებს.

2. სანაპირო დაცვის დეპარტამენტს ხელმძღვანელობს დეპარტამენტის დირექტორი, რომელიც ამავდროულად სასაზღვრო პოლიციის უფროსის მოადგილეა. მას თანამდებობაზე ნიშნავს და ათავისუფლებს საქართველოს შინაგან საქმეთა მინისტრი სასაზღვრო პოლიციის უფროსის წარდგინებით. იგი ანგარიშვალდებულია უშუალოდ სასაზღვრო პოლიციის უფროსის წინაშე.

3. სანაპირო დაცვის დეპარტამენტის დირექტორი:

დ) შეიმუშავებს სანაპირო დაცვის ქვედანაყოფების სამსახურებრივი საქმიანობის ორგანიზებასთან დაკავშირებულ სახელმძღვანელო დოკუმენტებს და უზრუნველყოფს მათ პრაქტიკაში დანერგვას;

ე) შეიმუშავებს სანაპირო დაცვის განვითარების პროგრამას და უზრუნველყოფს მის შესრულებას, ხელმძღვანელობს სანაპირო დაცვის ძალების მომზადებას.

4. სანაპირო დაცვის დეპარტამენტი შედგება შემდეგი სტრუქტურული ერთეულებისაგან: სანაპირო დაცვის ოპერაციების მართვის სამმართველო, სანაპირო დაცვის რესურსების მართვის სამმართველო და სანაპირო დაცვის დაგეგმვისა და კონტროლის სამსახური.

5. სანაპირო დაცვის ოპერაციების მართვის სამმართველო:

ა) უზრუნველყოფს საქართველოს სახელმწიფო საზღვაო საზღვრის დაცვისა და საზღვაო სივრცის სამართლებრივი რეჟიმის კონტროლთან დაკავშირებული ამოცანების შესრულების ორგანიზებას, მართვასა და ხელმძღვანელობას;

ბ) შეიმუშავებს სახელმწიფო საზღვაო საზღვრის დაცვისა და კონტროლის მეთოდებს, გეგმავს ოპერაციებს და უზრუნველყოფს მათ ჩატარებას;

გ) ორგანიზებას უკეთებს საქართველოს საზღვაო ნავსადგურებისა და სტრატეგიული ობიექტების დაცვასა და უსაფრთხოებას;

დ) საქართველოს საზღვაო სივრცეში ახორციელებს საგამოძიებო, ოპერატიულ-სამძებრო და სადაზვერვო საქმიანობას.

6. სანაპირო დაცვის რესურსების მართვის სამმართველო:

ა) უფლებამოსილების ფარგლებში ახორციელებს საფინანსო, საკადრო და სხვა რესურსების მართვას;

ბ) უზრუნველყოფს სანაპირო დაცვისადმი გამოყოფილი რესურსების ეფექტურ და ოპტიმალურ გამოყენებას;

გ) ამზადებს სანაპირო დაცვის ინფრასტრუქტურის განვითარებასთან დაკავშირებულ წინადადებებს;

დ) ორგანიზებას უკეთებს სანაპირო დაცვის პირადი შემადგენლობის ჯანმრთელობის დაცვასა და სამედიცინო უზრუნველყოფას;

ე) გეგმავს მცურავი საშუალებების, ტექნიკისა და შეიარაღების რემონტსა და მოდერნიზაციას;

ვ) უზრუნველყოფს სანაპირო დაცვის ობიექტებისა და ტერიტორიების დაცვას, უსაფრთხოებასა და მოვლა-პატრონობას.

8. სანაპირო დაცვის დაგეგმვისა და კონტროლის სამსახური:

ა) კომპეტენციის ფარგლებში ახორციელებს სანაპირო დაცვის საქმიანობის დაგეგმარებას, კონტროლსა და სამართლებრივ უზრუნველყოფას;

გ) უზრუნველყოფს სანაპირო დაცვის საკითხებზე სამართლებრივი აქტების კონტროლს და სამსახურებრივი საქმიანობის შედეგების ანალიზს;

დ) შეიმუშავებს სანაპირო დაცვის განვითარების გრძელვადიანი და მოკლევადიანი პროგრამების, დირექტივებისა და ინსტრუქციების პროექტებს.

მუხლი 10. სასაზღვრო პოლიტიკის უზრუნველყოფის დეპარტამენტი

1. სასაზღვრო პოლიტიკის უზრუნველყოფის დეპარტამენტს ხელმძღვანელობს სასაზღვრო პოლიტიკის უზრუნველყოფის დეპარტამენტის დირექტორი, რომელიც ამავდროულად სასაზღვრო პოლიციის უფროსის მოადგილეა. მას თანამდებობაზე ნიშნავს და თანამდებობიდან ათავისუფლებს შსს მინისტრი სასაზღვრო პოლიციის უფროსის წარდგინებით.

2. სასაზღვრო პოლიტიკის უზრუნველყოფის დეპარტამენტი შედგება შემდეგი ძირითადი სტრუქტურული ერთეულებისაგან: საერთაშორისო ურთიერთობებისა და სამართლებრივი უზრუნველყოფის სამმართველო, საკადრო საკითხთა სამმართველო, საფინანსო-სამეურნეო უზრუნველყოფის სამმართველო, პრესასთან და საზოგადოებასთან ურთიერთობის სამსახური და წვრთნისა და გადამზადების ცენტრი.

3. სასაზღვრო პოლიტიკის უზრუნველყოფის დეპარტამენტის დირექტორი ანგარიშვალდებულია უშუალოდ სასაზღვრო პოლიციის უფროსის წინაშე. იგი გეგმავს, წარმართავს და კონტროლს უწევს სასაზღვრო პოლიტიკის ერთიანი საერთაშორისო, სამართლებრივი, საკადრო და საფინანსო-სამეურნეო პოლიტიკის ორგანიზაციასა და მათ კომპლექსურად განხორციელებას; საქართველოს კანონმდებლობით, საქართველოს პრეზიდენტის ბრძანებულებებისა და განკარგულებების, საქართველოს შინაგან საქმეთა მინისტრისა და სასაზღვრო პოლიციის უფროსის ბრძანებებისა და განკარგულებების საფუძველზე თავისი კომპეტენციის ფარგლებში შეიმუშავებს და გამოსცემს ინდივიდუალურ ადმინისტრაციულ-სამართლებრივ აქტებს სამსახურებრივ საკითხებზე, ამოწმებს მათ შესრულებას;

4. საერთაშორისო ურთიერთობებისა და სამართლებრივი უზრუნველყოფის სამმართველო:

ა) უზრუნველყოფს სასაზღვრო პოლიციის საერთაშორისო საქმიანობის ორგანიზებას;

ბ) ორგანიზებას უწევს ორმხრივი და მრავალმხრივი თანამშრომლობის ჩამოყალიბებასა და გაღმავებას საზღვარგარეთის შესაბამის უწყებებთან და საერთაშორისო ორგანიზაციებთან;

გ) შეიმუშავებს და ამზადებს საერთაშორისო-სამართლებრივ აქტებს და ახორციელებს სასაზღვრო პოლიციის მიერ მათი შესრულების კონტროლს;

დ) სახელმწიფო ევროინტეგრაციული კურსის შესაბამისად ახორციელებს სასაზღვრო პოლიციის სრულფასოვან მონაწილეობას ამ პროცესში;

ე) კოორდინაციას უწევს სასაზღვრო პოლიციის საერთაშორისო საქმიანობას არალეგალური მიგრაციისა და სხვა ტრანსსასაზღვრო დანაშაულებების წინააღმდეგ ბრძოლაში;

ვ) კოორდინაციას უწევს საკანონმდებლო, აღმასრულებელი და სასამართლო ხელისუფლების ორგანოებთან და არასამთავრობო ორგანიზაციებთან ურთიერთობას;

ზ) წარმოადგენს და იცავს სასაზღვრო პოლიციის ინტერესებს სასამართლოსა და სხვა სახელმწიფო ორგანოებში სამართლებრივი საკითხების განხილვისას;

თ) დასკვნას უკეთებს სამართლებრივი ხასიათის დოკუმენტებს;

ი) უზრუნველყოფს სასაზღვრო პოლიციაში კანონშემოქმედებითი საქმიანობის დაგეგმვასა და განხორციელებას;

კ) ახორციელებს სასაზღვრო პოლიციის მიერ ოფიციალური ვიზიტების, საერთაშორისო ღონისძიებების, მაღალი რანგის დელეგაციების მიღებასთან დაკავშირებული საპროტოკოლო ღონისძიებების ჩატარებას.

5. საკადრო საკითხთა სამმართველო:

ა) კოორდინაციას უწევს სასაზღვრო პოლიციის ერთიან საკადრო პოლიტიკას;

ბ) შეიმუშავებს კადრების შერჩევის, განაწილების და კვალიფიკაციის ამაღლების სისტემას;

გ) ახორციელებს სააღრიცხვო-საშტატო მუშაობას, პერსონალის რიცხობრივ და ხარისხობრივ ანალიზსა და თვისობრივ გაუმჯობესებას, რეზერვთან მუშაობას;

დ) ორგანიზებას უწევს და აკონტროლებს პირადი შემადგენლობის პროფესიული დონის ზრდას, მათ შორის, ატესტაციის მოწყობის გზით.

6. საფინასო-სამეურნეო უზრუნველყოფის სამმართველო

ა) ორგანიზებას უწევს სასაზღვრო პოლიციაში ფინანსური პოლიტიკის გატარებას, ფულადი სახსრების მიზნობრივ ხარჯვას;

ბ) შეიმუშავებს სასაზღვრო პოლიციის ბიუჯეტს;

გ) ანაწილებს პარლამენტის მიერ დამტკიცებულ ბიუჯეტს შესაბამის ქვედანაყოფებზე;

დ) აკონტროლებს მოქმედი კანონმდებლობისა და შესაბამისი ნორმატიული აქტების მიხედვით დაგეგმვის, ფინანსირებისა და აღრიცხვა-ანგარიშწორების ღონისძიებებს;

ე) არსებული კანონმდებლობის შესაბამისად ფინანსურად უზრუნველყოფს სასაზღვრო პოლიციის თანამშრომელთა და მათი ოჯახის წევრთა სოციალური დაცვის ღონისძიებების განხორციელებას;

ვ) აკეთებს ბიუჯეტის შესრულების ანალიზს, კანონმდებლობის შესაბამისად აწარმოებს სახელმწიფო შესყიდვებს, აფორმებს ხელშეკრულებებს მიმწოდებელთან და აკონტროლებს მიწოდებული საქონლის ხარისხს;

ზ) ახორციელებს სასაზღვრო პოლიციის ორგანოთა სამეურნეო და მომარაგების უზრუნველყოფას;

თ) აკონტროლებს სასაზღვრო პოლიციის საყაზარმო და საბინაო ფონდის ექსპლუატაციას, დადგენილი წესის მიხედვით საცხოვრებელი ფართობის აღრიცხვა-გადანაწილებას;

ი) უზრუნველყოფს სასაზღვრო ინფრასტრუქტურის დაპროექტებას, მშენებლობას და მის სწორ ექსპლუატაციას.

7. პრესასთან და საზოგადოებასთან ურთერთობის სამსახური:

ა) მასობრივი საინფორმაციო საშუალებებით მოიპოვებს ინფორმაციას, აანალიზებს მას და წარუდგენს ხელმძღვანელობას;

ბ) საზოგადოებასა და მასმედიას ინფორმაციას აწვდის სასაზღვრო პოლიციაში მიმდინარე პროცესების თაობაზე;

გ) უზრუნველყოფს სასაზღვრო პოლიციის ვებ გვერდის მუშაობას;

დ) ხელს უწყობს საზოგადოებაში სასაზღვრო პოლიციის შესახებ ობიექტური აზრის ჩამოყალიბებას.

8. წვრთნისა და გადამზადების ცენტრი

ა) შეიმუშავებს პირადი შემადგენლობის მომზადება-გადამზადების პროგრამებსა და თემატურ გეგმებს საერთაშორისო სტანდარტების გათვალისწინებით;

ბ) ახორციელებს სასაზღვრო პოლიციის პირადი შემადგენლობის მომზადება-გადამზადებას, კოორდინაციას და კონტროლს უწევს სწავლების ჩატარების პროცესს და სამსახურის საქმიანობიდან გამომდინარე სხვა საორგანიზაციო საკითხებს;

გ) ახორციელებს ცენტრის მსმენელთა ცოდნისა და პროფესიული უნარ-ჩვევების შემოწმებას და გასცემს შესაბამის დოკუმენტს;

დ) ახორციელებს სამოსამსახურე ძაღლების გაწვრთნას და მათი მომსახურე თანამშრომელთა სათანადო გადამზადებას.

საქართველოს შინაგან საქმეთა მინისტრის 2007 წლის 28 დეკემბრის ბრძანება №1635 - სსმ III, 03.01.2008, №1, მუხ.24

მუხლი 11. საგამოძიებო-ოპერატიული და დაზვერვის სამმართველო

საგამოძიებო-ოპერატიული და დაზვერვის სამმართველო უშუალოდ ექვემდებარება სასაზღვრო პოლიციის უფროსს და უზრუნველყოფს ოპერატიულ-საგამოძიებო საქმიანობას დანაშაულის პროფილაქტიკისა და აღკვეთა-გამოვლენის მიზნით; კომპეტენციის ფარგლებში ახორციელებს პოლიტიკური, ეკონომიკური, სამხედრო ხასიათის, ტერორისტული ორგანიზაციების საქმიანობის ამსახველი და წინმსწრები ოპერატიული ინფორმაციების მოპოვებას, ანალიზსა და პროგნოზირებას, არალეგალური მიგრაციის წინააღმდეგ ბრძოლას, ერთობლივ ოპერატიულ ღონისძიებებს, ახორციელებს წინასწარ გამოძიებას, სამგზავრო დოკუმენტების ტექნიკურ ექსპერტიზას. საერთაშორისო ხელშეკრულებების საფუძველზე საზღვარგარეთის ქვეყნების შესაბამის სამსახურებთან ახდენს ინფორმაციის გაცვლას. სწავლობს საქართველოს სახელმწიფო საზღვრის დაცვასთან დაკავშირებულ ოპერატიულ ვითარებას და მისი განვითარების შესაძლო ტენდენციებს.

მუხლი 12. შიდა ინსპექცია

შიდა ინსპექცია უშუალოდ ექვემდებარება სასაზღვრო პოლიციის უფროსს და აკონტროლებს სასაზღვრო პოლიციის საქმიანობაში კანონიერების, ნორმატიული აქტებისა და სხვა მარეგლამენტირებელი დოკუმენტების მოთხოვნათა შესრულებას, ახორციელებს სასაზღვრო პოლიციის თანამშრომელთა მიერ ჩადენილი დანაშაულის, დისციპლინური დარღვევების თავიდან აცილებისა და დანაშაულის ხელშემწყობი გარემოებების გამოვლენის ღონისძიებებს, შეიმუშავებს დანაშაულთან ბრძოლის სამოქმედო გეგმებს; ორგანიზებას უწევს საიდუმლოების დაცვასთან დაკავშირებულ ღონისძიებებს.

მუხლი 13. სწრაფი რეაგირების რაზმი

სწრაფი რეაგირების რაზმი არის სასაზღვრო პოლიციის უფროსის უშუალო დაქვემდებარებაში, რომელიც განსაკუთრებულ შემთხვევებში სასაზღვრო პოლიციის უფროსის ბრძანებით სახელმწიფო საზღვარზე ატარებს დამატებით სპეციალურ ღონისძიებებს სახელმწიფო საზღვარსა და საკონტროლო გამშვებ პუნქტებში სახელმწიფო საზღვრის, სასაზღვრო და საკონტროლო გამტარი პუნქტის რეჟიმის დაცვის უზრუნველსაყოფად. სასაზღვრო პოლიციის უფროსის ბრძანებით (განკარგულებით), ქვეყნის მთელ ტერიტორიაზე გადაადგილებისას ახორციელებს სასაზღვრო პოლიციის ხელმძღვანელობის, საერთაშორისო ორგანიზაციებისა და დიპლომატიური მისიების წარმომადგენელთა უსაფრთხოების უზრუნველყოფას, სასაზღვრო პოლიციის თანამშრომელთა და მათი ოჯახის წევრთა დაცვას.

მუხლი 14. სპეციალური დანიშნულების ავიაციის სამმართველო

სპეციალური დანიშნულების ავიაციის სამმართველო არის სასაზღვრო პოლიციის უფროსის უშუალო დაქვემდებარებაში და მისი ბრძანებით ახორციელებს სახელმწიფო საზღვრის, სასაზღვრო ზოლის, სასაზღვრო ზონისა და საზღვაო სივრცის კონტროლს, უზრუნველყოფს პირადი შემადგენლობის, სურსათისა და სხვა ტვირთის ტრანსპორტირებას, მონაწილეობას იღებს სახელმწიფო საზღვარზე შექმნილი განსაკუთრებული სიტუაციების დროს შესაბამისი ღონისძიებების განხორციელებაში; მონაწილეობს სამაშველო ღონისძიებებში სასაზღვრო ზოლსა და ზონაში, განსაკუთრებულ შემთხვევებში საქართველოს მთელ ტერიტორიაზე.

მუხლი 15. ოპერატიული მართვისა და სასაზღვრო ტექნოლოგიების ცენტრი

ოპერატიული მართვისა და სასაზღვრო ტექნოლოგიების ცენტრი ხელს უწყობს სასაზღვრო ქვედანაყოფების სადღეღამისო უწყვეტ ოპერატიულ მართვას; ზედამხედველობას და კონტროლს უწევს საინფორმაციო-საკომუნიკაციო სისტემების შექმნას და ტექნოლოგიების დანერგვა-განვითარებას; სასაზღვრო მონიტორინგის სისტემის გამართულ მუშაობას, მის რეალიზაციასა და ექსპლუატაციას; აწარმოებს სამეცნიერო საქმიანობას; მეცნიერებისა და ტექნიკის უახლესი მიღწევების საფუძველზე შეიმუშავებს განვითარების გეგმებს ახალი ტექნოლოგიების დანერგვის მიზნით. უზრუნველყოფს სასაზღვრო პოლიციის საინფორმაციო ანალიტიკურ საქმიანობას. შესაბამისი ინფორმაციის (გარდა ოპერატიულისა) შეკრების, სისტემატიზაციისა და ანალიზის საფუძველზე ხელმძღვანელობისათვის შეიმუშავებს რეკომენდაციებსა და წინადადებებს, ახორციელებს სახელმწიფო საზღვარზე მომხდარი შემთხვევების ანალიზსა და სტატისტიკურ დამუშავებას, სასაზღვრო პოლიციის მიერ გაწეული სამსახურებრივი საქმიანობის ანალიზს.

მუხლი 16. სამდივნო

სამდივნოს ძირითადი ამოცანაა სასაზღვრო პოლიციაში საქმისწარმოების ორგანიზება და ხელმძღვანელობა, შემოსული და გასული დოკუმენტაციისა და კორესპონდენციების რეგისტრაცია, საქართველოს პრეზიდენტის ბრძანებულებების, განკარგულებების, საქართველოს პარლამენტისა და მთავრობის დადგენილებების, პრემიერ-მინისტრის ბრძანებების, შინაგან საქმეთა მინისტრის ბრძანებების, სასაზღვრო პოლიციის უფროსის ბრძანებების, მისი და მისი მოადგილეების მითითებების ვადების შესრულების კონტროლი, მოქალაქეთა მიღების ორგანიზება და აღრიცხვა.

მუხლი 17. გარდამავალი დებულება

სასაზღვრო სექტორების საშტატო თანამდებობზე საკონტრაქტო სისტემის პირადი შემადგენლობით სრულ დაკომპლექტებამდე საზღვრის დაცვის და სამსახურებრივი ღონისძიებების განსახორციელებლად გამოყენებული იქნება სავალდებულო სამსახურის პირადი შემადგენლობა.

მუხლი 18. დასკვნითი დებულება

სასაზღვრო პოლიციის დებულებაში ცვლილებების შეტანა ხდება საქართველოს შინაგან საქმეთა მინისტრის ბრძანებით.

გამოსვლა შენახვა

Annotate

როგორ დავიმოწმოთ

საქართველოს მინისტრის ბრძანება „საქართველოს შინაგან საქმეთა სამინისტროს სახელმწიფო საქვეუწყებო დაწესებულება საქართველოს სასაზღვრო პოლიციის დებულების დამტკიცების შესახებ“, №786, 21.06.2006, სარეგისტრაციო კოდი 010.240.070.22.034.008.796 (კონსოლიდირებული რედაქცია 06.05.2008). ხელმისაწვდომია: https://legali.ge/law/65122-8/

შემდგომი ცვლილებები (38)

წინა ცვლილებები (8)

დოკუმენტის ტექსტი

მუხლი 15. მართვისა და სასაზღვრო ტექნოლოგიების ცენტრი🔗

მუხლი 16. კანცელარია🔗

როგორ დავიმოწმოთ