„საქართველოს გარემოს დაცვისა და ბუნებრივი რესურსების სამინისტროს დებულების დამტკიცების შესახებ“

საქართველოს მთავრობის

დადგენილება №50

2004 წლის 12 ივნისი

ქ. თბილისი

საქართველოს გარემოს დაცვისა და ბუნებრივი რესურსების სამინისტროს დებულების დამტკიცების შესახებ

1. დამტკიცდეს საქართველოს გარემოს დაცვისა და ბუნებრივი რესურსების სამინისტროს თანდართული დებულება.

2. საქართველოს გარემოს დაცვისა და ბუნებრივი რესურსების სამინისტრომ (თ. ლებანიძე) მოამზადოს და საქართველოს მთავრობის სხდომაზე განსახილველად წარმოადგინოს დებულებით გათვალისწინებული სამინისტროს სისტემისა და სტრუქტურის ამოქმედებისათვის საჭირო საკანონმდებლო ცვლილებების პროექტების პაკეტი.

3.  დადგენილება ამოქმედდეს გამოქვეყნებისთანავე.

პრემიერ-მინისტრი     ზ. ჟვანია

 

შეტანილი ცვლილებები:

1. საქართველოს მთავრობის 2004 წლის 6 აგვისტოს დადგენილება  №66-სსმ III, №83, 10.08.2004წ; მუხ.733

2. საქართველოს მთავრობის 2004 წლის 24 ნოემბრის დადგენილება  №110-სსმ III, №137, 26.11.2004წ; მუხ.1228

3. საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

4. საქართველოს მთავრობის 2005 წლის 14 ივლისის დადგენილება  №114-სსმ III, №83, 15.07.2005წ; მუხ.904

5. საქართველოს მთავრობის 2005 წლის 11 აგვისტოს დადგენილება  №139-სსმ III, №94, 12.08.2005წ; მუხ.1071

6. საქართველოს მთავრობის 2005 წლის 23 ნოემბრის დადგენილება  №213-სსმ III, №139, 29.11.2005წ; მუხ.1532

7. საქართველოს მთავრობის 2006 წლის 16 მარტის  დადგენილება  №61-სსმ III, №35, 17.03.2006წ; მუხ.427

 

საქართველოს გარემოს დაცვისა და ბუნებრივი რესურსების სამინისტროს დებულება

    მუხლი 1. ზოგადი დებულებანი

1. საქართველოს გარემოს დაცვისა და ბუნებრივი რესურსების სამინისტრო (შემდგომში – სამინისტრო) არის საქართველოს აღმასრულებელი ხელისუფლების სამთავრობო დაწესებულება, რომელიც უზრუნველყოფს სახელმწიფო მმართველობას გარემოს დაცვისა და ბუნებრივი რესურსების რაციონალურად გამოყენების, აგრეთვე მოსახლეობის ეკოლოგიური უსაფრთხოების სფეროში.

2. სამინისტრო მოქმედებს თავისი კომპეტენციის ფარგლებში, საქართველოს კონსტიტუციის, სხვა კანონებისა და კანონქვემდებარე ნორმატიული აქტების, საქართველოს პრეზიდენტის, პრემიერ-მინისტრისა და საქართველოს მთავრობის აქტების საფუძველზე და მათ შესასრულებლად.

3. საქართველოს კანონმდებლობით დაკისრებულ მოვალეობათა შესრულებისას სამინისტრო უფლებამოსილია გასწიოს სახელმწიფო წარმომადგენლობა.

4. სამინისტროს აქვს დასრულებული ბალანსი და ანგარიში ხაზინაში, ხარჯთა ნუსხა და ბეჭედი სახელმწიფო გერბის გამოსახულებით.

5. სამინისტრო ანგარიშვალდებულია მთავრობის წინაშე.

6. სამინისტრო ეფუძნება ერთმმართველობის პრინციპს.

7. სამინისტროს იურიდიული მისამართია: ქ. თბილისი, გულუას №6.

საქართველოს მთავრობის 2005 წლის 14 ივლისის დადგენილება  №114-სსმ III, №83, 15.07.2005წ; მუხ.904

    მუხლი 2. სამინისტროს საქმიანობის სფერო და ამოცანები

1. სამინისტროს საქმიანობის სფეროსა და ამოცანებს გარემოს დაცვისა და ბუნებრივი რესურსების მართვის, აგრეთვე მოსახლეობის ეკოლოგიური უსაფრთხოების საკითხებში წარმოადგენს:

ა) ქვეყნის მდგრადი განვითარების ხელშეწობისა და გარემოს დაცვისა და ბუნებრივი რესურსებით სარგებლობის დაგეგმვის სისტემის გამართვის მიზნით გარემოსდაცვით ღონისძიებათა პრიორიტეტულ მიმართულებათა განსაზღვრა და მათი განხორციელების ორგანიზება;

ბ) გარემოს დაცვისა და ბუნებრივი რესურსებით სარგებლობის, აგრეთვე მოსახლეობის ეკოლოგიური უსაფრთხოების სფეროში სახელმწიფო პოლიტიკის შემუშავებაში მონაწილეობა და მისი განხორციელება;

გ) ქვეყნის ეკონომიკური და სოციალური განვითარების კონცეფციების, ინდიკატორული გეგმების პროექტებისა და სახელმწიფო მიზნობრივი პროგრამების შემუშავებაში მონაწილეობა;

გ1) ჰიდრომეტეოროლოგიისა და გარემოს დაბინძურების მონიტორინგის მართვის სახელმწიფო პოლიტიკის განხორციელება;

გ2) გეოლოგიის დარგის მართვის სახელმწიფო პოლიტიკის განხორციელება;

გ3) გეოდეზიისა და კარტოგრაფიის დარგის მართვის სახელმწიფო პოლიტიკის განხორციელება;

დ) გარემოს მონიტორინგის ერთიანი სახელმწიფო სისტემის ორგანიზება;

ე) გარემოს მდგომარეობის ხარისხობრივი და რაოდენობრივი მაჩვენებლების სახელმწიფო აღრიცხვის, ანგარიშგებისა და შეფასების ხელმძღვანელობა;

ვ) მოსახლეობის ეკოლოგიური უსაფრთხოების, აგრეთვე გარემოს დაცვისა და ბუნებრივი რესურსების სახელმწიფო მართვა (რეგულირება, ზედამხედველობა, აღრიცხვა, სალიცენზიო/სანებართვო მოწმობების გაცემა), მათ შორის:

ვ.ა) საქართველოს კანონმდებლობით დადგენილ გარემოსდაცვით მოთხოვნათა შესრულების ზედამხედველობა;

ვ.ბ) შესაბამის საერთაშორისო ვალდებულებათა შესრულების ზედამხედველობა;

ზ) გარემოს დაცვისა და ბუნებრივი რესურსების, აგრეთვე მოსახლეობის ეკოლოგიური უსაფრთხოების სფეროში სახელმწიფო დაწესებულებათა საქმიანობის კოორდინაცია და არასამთავრობო ორგანიზაციებთან თანამშრომლობა;

თ) საერთაშორისო ორგანიზაციებსა და საზღვარგარეთის ქვეყნებთან თანამშრომლობის პრიორიტეტულ მიმართულებათა განსაზღვრა და საერთაშორისო ვალდებულებათა შესრულების ორგანიზება;

ი) საზღვარგარეთის ქვეყნების შესაბამის სახელმწიფო ორგანოებსა და საერთაშორისო ორგანიზაციებთან თანამშრომლობა;

კ) მეზობელ ქვეყნებთან ტრანსასაზღვრო ბუნებრივი რესურსების განაწილებისა და გამოყენების შესახებ წინადადებათა მომზადება და საერთაშორისო პროგრამების შემუშავებაში მონაწილეობა;

ლ) თავისი კომპეტენციის ფარგლებში საკანონმდებლო აქტების პროექტების შემუშავებაში მონაწილეობა, შესაბამისი კანონქვემდებარე ნორმატიული აქტების შემუშავება, მიღება (გამოცემა);

მ) გარემოსდაცვითი განათლების ერთიანი სახელმწიფო სისტემის ორგანიზებაში მონაწილეობა;

ნ) კადრების მომზადებისა და კვალიფიკაციის ამაღლების სისტემის ორგანიზებაში მონაწილეობა;

ო) სამეცნიერო კვლევის პროგრამებისა და გეგმების შემუშავებაში მონაწილეობა;

პ) ეკონომიკური მექანიზმების შემუშავება (ეკომარკის მინიჭების ორგანიზების ჩათვლით);

ჟ) გარემოში ქიმიურ საშუალებათა (მათ შორის, მცენარეთა დაცვისა და ნიადაგის განოყიერების ქიმიურ საშუალებათა), აგრეთვე ნარჩენების გამოყენების, იმპორტის, ექსპორტის, რეექსპორტის, ტრანზიტის, ტრანსპორტირების, გადამუშავების, გაუვნებლებისა და განთავსების სახელმწიფო მართვა;

რ) ბუნებრივი რესურსებით სარგებლობის კვოტების დადგენა;

ს) გარემოს დაცვის ნორმების შემუშავება და დამტკიცება;

ტ) საქართველოს კანონმდებლობით დადგენილი სალიცენზიო/სანებართვო მოწმობების გაცემა და ლიმიტის დამტკიცება;

უ) სახელმწიფო ეკოლოგიური ექსპერტიზის ორგანიზება;

ფ) საქართველოს კანონმდებლობით დადგენილ შემთხვევებში გარემოსდაცვითი აუდიტის განხორციელების ორგანიზება;

ქ) ბუნებრივი და ანთროპოგენური რისკების პროგნოზირების, მათი შედეგების შერბილებისა და მოსახლეობის ეკოლოგიური უსაფრთხოების უზრუნველყოფის ერთიანი ორგანიზაციული და სამეცნიერო-ტექნიკური პოლიტიკის განხორციელება;

ღ) წინადადებათა შემუშავება საგანგებო ეკოლოგიური მდგომარეობის ან ეკოლოგიური უბედურების ზონების გამოცხადებისა და მათი გაუქმების შესახებ;

ყ) საფრთხის წინაშე მყოფი ველური მცენარეებისა და გარეული ცხოველების ,,წითელი ნუსხის“ წარმოება და ,,საქართველოს წითელი წიგნის“ გამოცემის ორგანიზება;

შ) გარემოს მდგომარეობის შესახებ ეროვნული მოხსენების პროექტის მომზადება;

ჩ) ქვეყნის, რეგიონალურ, ადგილობრივ და საქმიანობის ობიექტის დონეებზე გარემოს დაბინძურების ინტეგრირებული კონტროლის სისტემის მართვა;

ც) გარემოს დაცვის სფეროში სახელმწიფო კონტროლის განხორციელება;

ძ) მიწის რაციონალურად გამოყენებისა და დაცვის უზრუნველყოფა, ნიადაგის ეროზიის წინააღმდეგ ზომების მიღება, ნაყოფიერების აღდგენისა და შენარჩუნების ღონისძიებების განხორციელება;

წ) საქართველოს კანონმდებლობით განსაზღვრულ სხვა ამოცანათა შესრულება.

2. სამინისტროს გამგებლობაში არსებული სახელმწიფო საქვეუწყებო დაწესებულებების დებულებებით განსაზღვრულ ფუნქციათა განხორციელებას სამინისტრო ზედამხედველობს თავისი კომპეტენციის ფარგლებში, საქართველოს კანონმდებლობით დადგენილი წესით.

საქართველოს მთავრობის 2005 წლის 23 ნოემბრის დადგენილება  №213-სსმ III, №139, 29.11.2005წ; მუხ.1532

    მუხლი 3. სამინისტროს უფლებამოსილება

სამინისტროს უფლება აქვს:

ა) კანონმდებლობით დადგენილი წესით მოითხოვოს სახელმწიფო დაწესებულებებისა და სხვა პირებისაგან (საკუთრებისა და ორგანიზაციულ-სამართლებრივი ფორმის მიუხედავად) გარემოსდაცვითი საქმიანობის ამსახველი ინფორმაცია, სტატისტიკური ანგარიშები და სხვა მასალები;

ბ) შექმნას და აწარმოოს დამოუკიდებელ ექსპერტთა სახელმწიფო რეესტრი სახელმწიფო ეკოლოგიური ექსპერტიზის განსახორციელებლად;

გ) სამინისტროს კომპეტენციას მიკუთვნებული საკითხების გადაწყვეტის მიზნით, კანონმდებლობით განსაზღვრულ შესაბამის შემთხვევებში, საკონკურსო და საკონტრაქტო ფორმით სამინისტროში მოიწვიოს სხვადასხვა დარგის სპეციალისტები და დამოუკიდებელი ექსპერტები (მათ შორის, უცხო ქვეყნის მოქალაქეები);

დ) განახორციელოს კანონმდებლობით მინიჭებული სხვა უფლებამოსილებანი.

    მუხლი 4. სამინისტროს დაფინანსება და საქმიანობის ფინანსური უზრუნველყოფა

სამინისტროს დაფინანსების წყაროა სახელმწიფო ბიუჯეტი.

    მუხლი 5. მინისტრი

1. მინისტრის კომპეტენცია განსაზღვრულია საქართველოს კანონმდებლობით.

2. მინისტრი:

ა) მოქმედებს სამინისტროს სახელით, წარმოადგენს სამინისტროს სახელმწიფო ხელისუფლების დაწესებულებებთან, ორგანიზაციებთან და სხვა პირებთან ურთიერთობისას;

ბ) ამტკიცებს სამინისტროს სტრუქტურული ქვედანაყოფების, სამინისტროს სისტემის დანარჩენი ორგანიზაციების დებულებებს, შეაქვს მათში ცვლილებები და დამატებები;

გ) ამტკიცებს სამინისტროს საქმისწარმოების წესს, სამინისტროს საშტატო ნუსხასა და ხარჯთა ნუსხას, აკონტროლებს მათ შესრულებას და აუცილებლობის შემთხვევაში იძლევა მითითებებს საბიუჯეტო სახსრების გამოყენების შესახებ;

დ) შეიმუშავებს სამინისტროს მმართველობის სფეროს ბიუჯეტის პროექტს;

ე) ამტკიცებს საკონკურსო და საატესტაციო მოთხოვნებს სამინისტროს საჯარო მოსამსახურეებისადმი;

ვ) ქმნის კომისიებს, საბჭოებს სათათბირო უფლებებით და დებულებებით განსაზღვრავს მათ კომპეტენციასა და საქმიანობის წესს;

ზ) ამტკიცებს სამინისტროს სისტემაში სტაჟირების გავლის წესს და ახორციელებს კანონმდებლობით დადგენილ სხვა უფლებამოსილებებს.

საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

    მუხლი 6. მინისტრის მოადგილეები

1. მინისტრს ჰყავს ოთხი მოადგილე, მათ შორის, ერთი პირველი.

2. მინისტრის ერთ-ერთი მოადგილე მინისტრის დავალებით ახორციელებს საპარლამენტო მდივნის ფუნქციას.

3. მინისტრის პირველი მოადგილისა და მოადგილეების უფლებამოსილებანი განისაზღვრება მინისტრის ბრძანებით, გარდა იმ უფლებამოსილებებისა, რომლებიც დადგენილია საქართველოს კანონებითა და მთავრობის აქტებით.

    მუხლი 7. სამინისტროს სისტემის მართვა და საქმიანობის ორგანიზება

1. სამინისტროს სისტემა შედგება სამინისტროს სტრუქტურული ქვედანაყოფებისაგან, ტერიტორიული ორგანოებისაგან, აჭარისა და აფხაზეთის ავტონომიური რესპუბლიკების შესაბამისი სამსახურებისაგან, სახელმწიფო საქვეუწყებო დაწესებულებებისა და სამინისტროს სისტემაში შემავალი საჯარო სამართლის იურიდიული პირებისაგან.

2. სამინისტროს სისტემაში შემავალი სტრუქტურული ქვედანაყოფების ფუნქციები და უფლებამოსილებანი განისაზღვრება დებულებებით, რომლებსაც ამტკიცებს მინისტრი.

საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

საქართველოს მთავრობის 2005 წლის 11 აგვისტოს დადგენილება  №139-სსმ III, №94, 12.08.2005წ; მუხ.1071

    მუხლი 8. სამინისტროს სისტემა

1. სამინისტროს სტრუქტურული ქვედანაყოფები არიან:

ა) გენერალური ინსპექცია;

ბ) იურიდიული დეპარტამენტი;

გ) ლიცენზიებისა და ნებართვების დეპარტამენტი;

დ) ადმინისტრაციული დეპარტამენტი;

ე) ფინანსური უზრუნველყოფის დეპარტამენტი;

ვ) მდგრადი განვითარების დეპარტამენტი;

ზ) საერთაშორისო ურთიერთობებისა და კონვენციების დეპარტამენტი;

თ) გარემოს ინტეგრირებული მართვის დეპარტამენტი;

ი) სამდივნო;

კ) გეოლოგიის სამსახური;

ლ) გეოდეზიისა და კარტოგრაფიის სამსახური;

მ) ბირთვული და რადიაციული უსაფრთხოების სამსახური;

ნ) საზოგადოებასა და მასმედიასთან ურთიერთობის სამსახური;

ო) ბიომრავალფეროვნების დაცვის სამსახური;

პ) მიწის მართვის სამსახური.

2. სამინისტროს ტერიტორიული ორგანოები არიან:

ა) სამეგრელოსა და ზემო სვანეთის გარემოს დაცვისა და ბუნებრივი რესურსების რეგიონალური სამმართველო;

ბ) გარემოს დაცვისა და ბუნებრივი რესურსების დასავლეთ ცენტრალური რეგიონალური სამმართველო;

გ) გარემოს დაცვისა და ბუნებრივი რესურსების აღმოსავლეთ ცენტრალური რეგიონალური სამმართველო;

დ) ქვემო ქართლის გარემოს დაცვისა და ბუნებრივი რესურსების რეგიონალური სამმართველო;

ე) სამცხე-ჯავახეთის გარემოს დაცვისა და ბუნებრივი რესურსების რეგიონალური სამმართველო;

ვ) კახეთის გარემოს დაცვისა და ბუნებრივი რესურსების რეგიონალური სამმართველო.

3. სამინისტროს სახელმწიფო საქვეუწყებო დაწესებულებები არიან:

ა) გარემოს დაცვის ინსპექცია;

ბ) სატყეო მეურნეობის დეპარტამენტი;

გ) დაცული ტერიტორიების დეპარტამენტი.

4. სამინისტროს სისტემაში შემავალი საჯარო სამართლის იურიდიული პირები არიან:

ა) სივრცული ინფორმაციის ცენტრი;

ბ) მონიტორინგისა და პროგნოზირების ცენტრი;

გ) ქობულეთის სახელმწიფო ნაკრძალის, ქობულეთის აღკვეთილისა და ქობულეთის მრავალმხრივი გამოყენების ტერიტორიის ადმინისტრაცია;

დ) ბორჯომ-ხარაგაულის ეროვნული პარკისა და ბორჯომის სახელმწიფო ნაკრძალის ადმინისტრაცია;

ე) კოლხეთის ეროვნული პარკისა და კოლხეთის მრავალმხრივი გამოყენების ტერიტორიის ადმინისტრაცია;

ვ) თუშეთის დაცული ტერიტორიების დირექცია;

ზ) ბაწარა-ბაბანეურის დაცული ტერიტორიების დირექცია;

თ) ლაგოდეხის დაცული ტერიტორიების დირექცია;

ი) ვაშლოვანის დაცული ტერიტორიების დირექცია;

კ) სანაპირო ზონის ინტეგრირებული მართვის ცენტრი;

ლ) დაცული ტერიტორიების განვითარების ცენტრი;

მ) სატყეო სექტორის განვითარების ცენტრი;

ნ) იშვიათი და გადაშენების საფრთხის პირას მყოფი თევზის სახეობათა აღწარმოების ცენტრი.

4. სამინისტროს სისტემაში შემავალი საჯარო სამართლის იურიდიული პირები არიან: (ამოქმედდეს 2006 წლის 8 მაისიდან)

ა) სივრცული ინფორმაციის ცენტრი;

ბ) მონიტორინგისა და პროგნოზირების ცენტრი;

გ) ქობულეთის სახელმწიფო ნაკრძალის, ქობულეთის სახელმწიფო აღკვეთილისა და ქობულეთის მრავალმხრივი გამოყენების ტერიტორიის ადმინისტრაცია;

დ) ბორჯომ-ხარაგაულის ეროვნული პარკისა და ბორჯომის სახელმწიფო ნაკრძალების ადმინისტრაცია;

ე) კოლხეთის ეროვნული პარკისა და კოლხეთის მრავალმხრივი გამოყენების ტერიტორიის ადმინისტრაცია;

ვ) თუშეთის დაცული ტერიტორიების დირექცია;

ზ) ბაწარა-ბაბანეურის დაცული ტერიტორიების დირექცია;

თ) ლაგოდეხის დაცული ტერიტორიების დირექცია;

ი) ვაშლოვანის დაცული ტერიტორიების დირექცია;

კ) მდგრადი განვითარების პროექტების განმახორციელებელი სააგენტო;

ლ) იშვიათი და გადაშენების საფრთხის პირას მყოფი თევზის სახეობათა აღწარმოების ცენტრი.

5. სამინისტროს სისტემაში არიან აჭარისა და აფხაზეთის ავტონომიური რესპუბლიკების შესაბამისი სამსახურები.

6. აჭარისა და აფხაზთის ავტონომიური რესპუბლიკების შესაბამისი სამსახურების საქმიანობის კოორდინაციას ახორციელებს სამინისტრო.

საქართველოს მთავრობის 2004 წლის 6 აგვისტოს დადგენილება  №66-სსმ III, №83, 10.08.2004წ; მუხ.733

საქართველოს მთავრობის 2004 წლის 24 ნოემბრის დადგენილება  №110-სსმ III, №137, 26.11.2004წ; მუხ.1228

საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

საქართველოს მთავრობის 2005 წლის 14 ივლისის დადგენილება  №114-სსმ III, №83, 15.07.2005წ; მუხ.904

საქართველოს მთავრობის 2005 წლის 11 აგვისტოს დადგენილება  №139-სსმ III, №94, 12.08.2005წ; მუხ.1071

საქართველოს მთავრობის 2005 წლის 23 ნოემბრის დადგენილება  №213-სსმ III, №139, 29.11.2005წ; მუხ.1532

საქართველოს მთავრობის 2006 წლის 16 მარტის  დადგენილება  №61-სსმ III, №35, 17.03.2006წ; მუხ.427

    მუხლი 9. სამინისტროს სტრუქტურული ქვედანაყოფების კომპეტენცია (ამოქმედდეს 2006 წლის 1 იანვრიდან)

1. გენერალური ინსპექციის კომპეტენციაა სამინისტროს სისტემის მოსამსახურეთა მიერ დისციპლინისა და კანონიერების დაცვის სამსახურებრივი კონტროლი, სამსახურებრივი პასუხისმგებლობისა და დისციპლინური გადაცდომის ფაქტების გამოვლენა, თავიდან აცილება და პროფილაქტიკა.

2. იურიდიული დეპარტამენტის კომპეტენციაა:

ა) სამინისტროს ხელმძღვანელობისა და სამინისტროს სტრუქტურული ქვედანაყოფების ძირითადი საქმიანობის სამართლებრივი უზრუნველყოფა, ასევე სამინისტროს სამართალშემოქმედებითი საქმიანობის წარმართვა;

ბ) სამართლებრივი თვალსაზრისით გარემოსდაცვით ხელშეკრულებებში საქართველოს მონაწილეობის მიზანშეწონილობის ანალიზი და შესაბამისი სახელმწიფო პოლიტიკის რეალიზაციაში მონაწილეობა. საქართველოს კანონმდებლობის ჰარმონიზაციის უზრუნველყოფა საერთაშორისო გარემოსდაცვით კანონმდებლობასთან (კონვენციებთან);

გ) სამართლებრივი მიზანშეწონილობის დადგენისა და შემდგომი უზრუნველყოფის მიზნით საერთაშორისო და რეგიონალური მნიშვნელობის გარემოსდაცვითი კონვენციების ეროვნული პასუხისმგებელი პირების საქმიანობის კოორდინაცია.

3. ლიცენზიებისა და ნებართვების დეპარტამენტის კომპეტენციაა სახელმწიფო ეკოლოგიური ექსპერტიზის განხორციელების უზრუნველყოფა, ლიმიტების დამტკიცების ორგანიზება, სარგებლობის ლიცენზიებთან დაკავშირებით აუქციონების მოწყობის ორგანიზება, სალიცენზიო და სანებართვო მოწმობების გაცემა.

4. ადმინისტრაციული დეპარტამენტის კომპეტენციაა:

ა) თავისი კომპეტენციის ფარგლებში სამინისტროს სისტემაში შემავალი სტრუქტურული ქვედანაყოფების, სახელმწიფო საქვეუწყებო დაწესებულებებისა და ტერიტორიული ორგანოების კოორდინაცია, ერთიანი საქმისწარმოების ორგანიზება და მინისტრის დავალებების შესრულების კონტროლი;

ბ) სამინისტროს სისტემის საკადრო რესურსების მართვის ოპტიმიზაციის მიზნით რეკომენდაციების შემუშავება;

გ) სამინისტროს სისტემის მოსამსახურეთა დადგენილი წესის შესაბამისად დანიშვნის, სამსახურებრივი გადაადგილების (გადაყვანის), გათავისუფლების, დისციპლინური წესით დასჯისა და წახალისების, შვებულებისა და მივლინების შესახებ წინადადებებისა და ბრძანებების პროექტების მომზადება;

დ) კომპეტენციის ფარგლებში სამინისტროს სისტემის მოსამსახურეთა პირადი საქმეების შედგენა და წარმოება;

ე) სამინისტროს სისტემის კადრების სამსახურების მუშაობის მეთოდური ხელმძღვანელობა და კოორდინაცია, აგრეთვე მათი მუშაობის შემოწმების მიზნით დადგენილი წესის შესაბამისად რევიზიების მოწყობა;

ვ) დადგენილი წესის შესაბამისად ატესტაციისა და სამინისტროს სისტემაში არსებული ვაკანტური თანამდებობების დასაკავებლად კონკურსების გამართვის ორგანიზაციული უზრუნველყოფა;

ზ) სამინისტროს სისტემის მოსამსახურეთა შესახებ მონაცემთა ბაზის შექმნა, მისი სრულყოფა და სისტემატიზაცია;

თ) შრომითი დავების შესახებ სამინისტროს წარმომადგენლობა სასამართლოში;

ი) სამინისტროში ოფიციალურად შემოსული და გასული კორესპონდენციის რეგისტრაცია, სისტემატიზაცია და მისი ოპერატიული მიწოდება სამინისტროს ხელმძღვანელობისა და შემსრულებლებისათვის;

კ) სამინისტროს სტრუქტურული ქვედანაყოფების მიერ საქართველოს პრეზიდენტის, საქართველოს მთავრობისა და სამინისტროს ხელმძღვანელობის აქტებითა და მითითებებით განსაზღვრულ კონტროლზე აყვანილ დავალებათა დადგენილ ვადებში შესრულების კონტროლი;

ლ) საიდუმლო საქმისწარმოების განხორციელება, მოქმედი კანონმდებლობით გათვალისწინებულ შესაბამის ინფორმაციასა და დოკუმენტაციასთან დაკავშირებით საიდუმლოების რეჟიმის დაცვის უზრუნველყოფა;

მ) საქმისწარმოების დასრულებული დოკუმენტაციის აღრიცხვა, დამუშავება და გადაცემა არქივისათვის არსებული წესის თანახმად;

ნ) სამინისტროს ტერიტორიული ორგანოების მართვისა და მათი საქმიანობის კოორდინაციის ხელშეწყობა;

ო) კანონმდებლობითა და მინისტრის მიერ კანონმდებლობის საფუძველზე განსაზღვრული სხვა უფლებამოსილების განხორციელება.

5. ფინანსური უზრუნველყოფის დეპარტამენტის კომპეტენციაა:

ა) სამინისტროს სისტემის საფინანსო-ეკონომიკური საქმიანობის ანალიზი;

ბ) მატერიალური, ფინანსური და საკრედიტო რესურსების განაწილება, მათი მიზნობრივი გამოყენება;

გ) სამინისტროს სისტემის საბუღალტრო საქმიანობისა და აღრიცხვა-ანგარიშგების მეთოდური უზრუნველყოფა;

დ) სამინისტროს სტრუქტურული ქვედანაყოფების, ტერიტორიული ორგანოებისა და სახელმწიფო საქვეუწყებო დაწესებულებათა ბალანსზე არსებული ქონებისა და მისი მოძრაობის, მატერიალური და ფინანსური რესურსების გამოყენების კონტროლი;

ე) სამინისტროს მატერიალურ-ტექნიკური უზრუნველყოფა.

6. მდგრადი განვითარების დეპარტამენტის კომპეტენციაა:

ა) ქვეყნის მდგრადი განვითარების გარემოსდაცვითი სტრატეგიის, გარემოსდაცვითი და რესურსთსარგებლობის პოლიტიკის ძირითადი მიმართულებების შემუშავების კოორდინაცია;

ბ) სამინისტროს სისტემაში მიმდინარე ინსტიტუციური რეფორმების განხორციელების ხელშეწყობა და კოორდინაცია;

გ) სამინისტროს სისტემაში საერთაშორისო წყაროების დაფინანსებით დაგეგმილი და მიმდინარე პროექტებისა და პროგრამების მომზადებისა და განხორციელების კოორდინირება, მათ შორის, პროექტებისა და პროგრამების მიმდინარეობის შესახებ ანგარიშების გამოთხოვა და განხილვა;

დ) გარემოსდაცვითი სახელმწიფო მიზნობრივი პროგრამების მომზადებისა და განხორციელების კოორდინაცია.

7. საერთაშორისო ურთიერთობებისა და კონვენციების დეპარტამენტის კომპეტენციაა:

ა) კოორდინაცია გაუწიოს სამინისტროს ურთიერთობას საერთაშორისო ორგანიზაციებთან და უცხოეთის ქვეყნების სახელმწიფო, არასამთავრობო, აკადემიურ და სხვა სახის ორგანიზაციებთან, საერთაშორისო და რეგიონალური მნიშვნელობის გარემოსდაცვითი კონვენციების სამდივნოებთან;

ბ) თავისი კომპეტენციის ფარგლებში კოორდინაცია გაუწიოს საერთაშორისო და რეგიონალური მნიშვნელობის გარემოსდაცვითი კონვენციების ეროვნული პასუხისმგებელი პირების საქმიანობას;

გ) თავისი კომპეტენციის ფარგლებში მონაწილეობა მიიღოს საერთაშორისო და რეგიონალური მნიშვნელობის გარემოსდაცვით კონვენციებთან მიერთების პროცედურული ღონისძიებების ორგანიზებაში;

დ) თავისი კომპეტენციის ფარგლებში მონაწილეობა მიიღოს სამინისტროს მიერ განხორციელებულ საერთაშორისო ურთიერთობებში და აწარმოოს ამ ურთიერთობათა მონიტორინგი;

ე) თავისი კომპეტენციის ფარგლებში მონაწილეობა მიიღოს გარემოს დაცვის სფეროში საერთაშორისო ორგანიზაციებსა და საზღვარგარეთის ქვეყნებთან თანამშრომლობის პრიორიტეტული მიმართულებების განსაზღვრასა და საერთაშორისო ვალდებულებების შესრულების კოორდინირებაში;

ვ) სამინისტროს კომპეტენციის ფარგლებში განახორციელოს საერთაშორისო ხელშეკრულებებში საქართველოს მონაწილეობის მიზანშეწონილობის ანალიზი;

ზ) მონაწილეობა მიიღოს გარემოსდაცვითი საერთაშორისო ხელშეკრულებების მომზადებაში;

თ) განახორციელოს საქართველოს მიერ საერთაშორისო გარემოსდაცვითი კონვენციებითა და ხელშეკრულებებით ნაკისრი ვალდებულებების შესრულების მდგომარეობის მონიტორინგი და მონაწილეობა მიიღოს შესაბამისი სახელმწიფო პოლიტიკის რეალიზაციაში;

ი) მაღალი ეკოლოგიური რისკის მქონე ობიექტებზე გარემოსდაცვითი მონიტორინგის განხორციელება მშენებლობისა და ოპერირების პერიოდში;

კ) მაღალი ეკოლოგიური რისკის მქონე ობიექტების მონიტორინგის პროგრამის განხილვა და შეთანხმება;

ლ) სამინისტროს მიერ გაცემული მაღალი ეკოლოგიური რისკის მქონე ობიექტების ლიცენზიების/ნებართვების პირობების შესრულების მონიტორინგი;

მ) თავისი კომპეტენციის ფარგლებში მონიტორინგის სახელმძღვანელო პრინციპების, მონიტორინგის პროცედურებისა და მონაცემთა ბაზის შექმნა;

ნ) მაღალი ეკოლოგიური რისკის მქონე ობიექტების ადგილმდებარეობის მიხედვით მინისტრის ბრძანებით სამინისტროს რეგიონალურ სამმართველოებში შექმნილი მონიტორინგის ჯგუფების ხელმძღვანელობა;

ო) საქართველოში კლიმატის ცვლილების პრობლემებზე წარმოებულ სამუშაოთა სახელმწიფო რეგულირების, სახელმწიფო პოლიტიკისა და სტრატეგიის შემუშავებასა და განხორციელებაში მონაწილეობა, საქართველოში კლიმატის ცვლილების მდგომარეობის შესახებ ქვეყნის მმართველობითი ორგანოების, მეურნეობის დარგებისა და მოსახლეობის ფაქტობრივი პროგნოსტიკული ინფორმაციით უზრუნველყოფა;

პ) თავისი კომპეტენციის ფარგლებში ჰიდრომეტეოროლოგიისა და გარემოს დაბინძურების მონიტორინგის მართვის სახელმწიფო პოლიტიკის განხორციელებასთან დაკავშირებული საკითხების კოორდინაცია საქართველოს მიერ ნაკისრი საერთაშორისო ვალდებულებების გათვალისწინებით.

8. გარემოს ინტეგრირებული მართვის დეპარტამენტის კომპეტენციაა:

ა) საქართველოს მთელ ტერიტორიაზე ატმოსფერული ჰაერის დაცვის სახელმწიფო პოლიტიკის რეალიზაციის უზრუნველყოფა;

ბ) ატმოსფერული ჰაერის დაცვის ღონისძიებების პრიორიტეტულ მიმართულებათა განსაზღვრა;

გ) ატმოსფერული ჰაერის დაბინძურების წყაროებისა და მათ მიერ გაფრქვეულ მავნე ნივთიერებათა ინვენტარიზაციის ტექნიკური ანგარიშისა და ზღვრულად დასაშვები (ან დროებით შეთანხმებული) მნიშვნელობების განხილვისა და დამტკიცების უზრუნველყოფა კანონმდებლობით დადგენილი წესით;

დ) საქართველოს მთელ ტერიტორიაზე ზედაპირული წყლის რესურსების დაცვის სფეროში სახელმწიფო პოლიტიკის რეალიზაციის უზრუნველყოფა, წყალსარგებლობის სახელმწიფო აღრიცხვა და წყალსარგებლობის ნორმირება;

ე) წყალდაცვითი ღონისძიებების პრიორიტეტულ მიმართულებათა განსაზღვრა, მათი განხორციელებისათვის გამიზნულ სამუშაოთა შესრულების კოორდინაცია;

ვ) წყლის სახელმწიფო კადასტრის, წყალსამეურნეო ბალანსების, წყლის კომპლექსური გამოყენებისა და დაცვის გენერალური სქემების შესადგენ სამუშაოთა ორგანიზება;

ზ) წყლის ობიექტებში დამაბინძურებელ ნივთიერებათა ზღვრულად დასაშვები ჩაშვების (ზდჩ) ნორმატივების განხილვისა და დამტკიცების უზრუნველყოფა კანონმდებლობით დადგენილი წესით;

თ) ნარჩენებისა და ქიმიური ნივთიერებების მართვის სფეროში სახელმწიფო პოლიტიკის შემუშავებაში მონაწილეობის მიღება და მისი რეალიზაციის უზრუნველყოფა საქართველოს მთელ ტერიტორიაზე, პრიორიტეტულ მიმართულებათა განსაზღვრა, მიზნობრივი პროგრამების შემუშავება და მათი განხორციელების ორგანიზება;

ი) თავისი კომპეტენციის ფარგლებში საკანონმდებლო აქტების პროექტების შემუშავებაში მონაწილეობა, შესაბამისი კანონქვემდებარე ნორმატიული აქტების მომზადება;

კ) თავისი კომპეტენციის ფარგლებში ატმოსფერული ჰაერის დაცვის, წყლის, ნარჩენებისა და ქიმიური ნივთიერებების მართვის სფეროებში საერთაშორისო ვალდებულებათა შესრულება;

ლ) გარემოს მდგომარეობის შესახებ ეროვნული მოხსენების პროექტის მომზადებაში მონაწილეობა.

9. სამდივნოს კომპეტენციაა:

ა) მინისტრის ბრძანებების შესრულების კონტროლი;

ბ) სამინისტროს ხელმძღვანელობის თათბირების ორგანიზება, თათბირის ოქმის შედგენა;

გ) სამინისტროს ხელმძღვანელობის შეხვედრების განრიგის დაგეგმვა და მომზადება;

დ) სამინისტროს ხელმძღვანელობის მივლინებების ორგანიზება;

ე) სამინისტროს ხელმძღვანელობის მიერ მოქალაქეთა მიღების საკითხების რეგულირება;

ვ) თავისი კომპეტენციის ფარგლებში სამინისტროს ხელმძღვანელობის დავალებათა შესრულება;

ზ) სამინისტროს ხელმძღვანელობის საზღვარგარეთ ოფიციალური ვიზიტების ორგანიზება, ვიზიტის შედეგების ანალიზის საფუძველზე შემუშავებული რეკომენდაციების, წინადადებებისა და შესაბამისი მასალების მომზადება;

თ) სხვადასხვა საკითხებთან დაკავშირებით სამინისტროს ხელმძღვანელობის მიერ დაკისრებული კონკრეტული დავალებების შესრულება.

10. გეოლოგიის სამსახურის კომპეტენციაა გეოლოგიის დარგის სახელმწიფო რეგულირებისა და სახელმწიფო მართვის პოლიტიკის პრაქტიკული განხორციელება.

11. გეოდეზიისა და კარტოგრაფიის სამსახურის კომპეტენციაა გეოდეზიისა და კარტოგრაფიის დარგის სახელმწიფო მართვის პოლიტიკის პრაქტიკული განხორციელება.

12. ბირთვული და რადიაციული უსაფრთხოების სამსახურის კომპეტენციაა ბირთვული და რადიაციული უსაფრთხოების სფეროში სახელმწიფო პოლიტიკის რეალიზაციის უზრუნველყოფა.

13. საზოგადოებასა და მასმედიასთან ურთიერთობის სამსახურის კომპეტენციაა:

ა) საზოგადოებასთან და მასმედიასთან ურთიერთობა;

ბ) საზოგადოებისათვის გარემოსდაცვითი ინფორმაციის ხელმისაწვდომობისა და გამჭვირვალობის უზრუნველყოფა;

გ) გარემოსდაცვით საკითხებში საზოგადოების მაქსიმალური ინფორმირება და გარემოსდაცვითი ცნობიერების დონის ამაღლების ხელშეწყობა;

დ) საზოგადოების მონაწილეობის უზრუნველყოფა გარემოსდაცვითი გადაწყვეტილებების მიღების პროცესში და გარემოს დაცვის სფეროში საზოგადოების მხარდაჭერის გაძლიერება.

14. ბიომრავალფეროვნების დაცვის სამსახურის კომპეტენციაა ბიომრავალფეროვნების დაცვის სახელმწიფო პოლიტიკის რეალიზაციის უზრუნველყოფა.

15. მიწის მართვის სამსახურის კომპეტენციაა მიწის რაციონალურად გამოყენებისა და დაცვის, ნიადაგის ეროზიის საწინააღმდეგო ღონისძიებათა, ნაყოფიერების აღდგენისა და შენარჩუნების ღონისძიებათა განხორციელება, მიწის მიზნობრივი გამოყენებისა და დაცვის შესახებ კანონმდებლობით გათვალისწინებული მოთხოვნების შესაბამისად სახელმწიფო კონტროლის განხორციელების, მიწის რესურსების მდგომარეობის თაობაზე მონაცემთა ერთიანი ბანკის შექმნა.

საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

საქართველოს მთავრობის 2005 წლის 11 აგვისტოს დადგენილება  №139-სსმ III, №94, 12.08.2005წ; მუხ.1071

საქართველოს მთავრობის 2005 წლის 23 ნოემბრის დადგენილება  №213-სსმ III, №139, 29.11.2005წ; მუხ.1532

 

    მუხლი 91. სამინისტროს სისტემის დაწესებულებების, ერიტორიული ორგანოების, საქვეუწყებო დაწესებულებებისა და მათი ტერიტორიული ორგანოების, საჯარო სამართლის იურიდიული პირების კომპეტენცია

სამინისტროს სისტემის დაწესებულებების, ტერიტორიული ორგანოების, საქვეუწყებო დაწესებულებებისა და მათი ტერიტორიული ორგანოების, საჯარო სამართლის იურიდიული პირების კონკრეტული კომპეტენცია განისაზღვრება მათი დებულებებითა და მოქმედი კანონმდებლობით.

საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

    მუხლი 10. (ამოღებულია)

საქართველოს მთავრობის 2005 წლის 11 აგვისტოს დადგენილება  №139-სსმ III, №94, 12.08.2005წ; მუხ.1071

    მუხლი 11. სამინისტროს სიმბოლიკა

1. სამინისტრო გამოიყენებს სახელმწიფო დროშასა და სახელმწიფო გერბს, სხვა სახელმწიფო სიმბოლიკას მოქმედი კანონმდებლობის შესაბამისად.

2. სახელმწიფო გერბი გამოისახება სამინისტროს ფასადზე, ხოლო მცირე სახელმწიფო გერბის გამოსახულება გამოიყენება სამინისტროსა და მისი ტერიტორიული ორგანოების სანებართვო დოკუმენტებში, თანამშრომლების პირადობის დამადასტურებელ დოკუმენტებში და ბლანკებზე.

3. სამინისტროს აქვს ემბლემა (ლოგო), რომელიც რეგისტრირებულია მოქმედი კანონმდებლობის შესაბამისად.

4. სამინისტროს ემბლემა შეიძლება გამოყენებულ იქნეს მხოლოდ სამინისტროს ტერიტორიული ორგანოების, აჭარისა და აფხაზეთის ავტონომიური რესპუბლიკების შესაბამისი სამსახურებისა და სახელმწიფო საქვეუწყებო დაწესებულებების, სამინისტროს თანამშრომლების სავიზიტო ბარათებზე, სხვა ბეჭდვით გამოცემებზე, აგრეთვე სამინისტროს სუვენირებსა და კუთვნილ სატრანსპორტო საშუალებებზე (ავტომანქანებსა და კატარღებზე).

საქართველოს მთავრობის 2005 წლის 3 ივნისის დადგენილება  №98-სსმ III, №68, 06.06.2005წ; მუხ.724

    მუხლი 12. სამინისტროს ლიკვიდაცია

სამინისტროს ლიკვიდაცია ხდება კანონით დადგენილი წესით.

Annotate