სპეციალური სარიტუალო მომსახურების წესის დამტკიცების შესახებ

სახელმწიფო სარეგისტრაციო კოდი 040.200.010.22.027.008.601

საქართველოს იუსტიციის მინისტრის

ბრძანება №487

2006 წლის 11 მაისი

ქ. თბილისი

სპეციალური სარიტუალო მომსახურების წესის დამტკიცების შესახებ

,,სამოქალაქო რეესტრის სააგენტოს მიერ გაწეული მომსახურებისათვის დაწესებული საფასურის შესახებ� საქართველოს კანონის მე-8 მუხლის თანახმად, ვბრძანებ:

1. დამტკიცდეს სპეციალური სარიტუალო მომსახურების თანდართული წესი.

2. სამოქალაქო რეესტრის სააგენტომ (ი. ფორჩხიძე) უზრუნველყოს ქორწინების რეგისტრაცია ამ ბრძანებით დადგენილი სპეციალური სარიტუალო მომსახურების წესის შესაბამისად.

3. ეს ბრძანება ამოქმედდეს გამოქვეყნებისთანავე.

�გ. ქავთარაძე

სპეციალური სარიტუალო მომსახურების

წესი

1. სპეციალური სარიტუალო მომსახურება გულისხმობს ქორწინების რეგისტრაციის საზეიმო ვითარებაში ჩატარებას.

2. სპეციალური სარიტუალო მომსახურება წარმოადგენს სამოქალაქო რეესტრის სააგენტოს სპეციალიზებული სამსახურის კომპეტენციას; რიტუალი ხორციელდება შესაბამისი სპეციალიზებული სამსახურისათვის გამოყოფილ შენობაში.

3. სპეციალური სარიტუალო მომსახურების ჩატარებას უზრუნველყოფს სამოქალაქო რეესტრის სააგენტო.

4. დასაქორწინებელმა პირებმა, რომელთაც სურთ სპეციალური სარიტუალო მომსახურება, უნდა მიმართონ სამოქალაქო რეესტრის სააგენტოს შესაბამის სპეციალიზებულ სამსახურს და აღნიშნულის თაობაზე მიუთითონ ქორწინების რეგისტრაციის შესახებ განცხადებაში. განცხადებასთან, კანონმდებლობით გათვალისწინებულ ქორწინების რეგისტრაციისათვის აუცილებელ საბუთებთან და ქორწინების რეგისტრაციისათვის ,,სახელმწიფო ბაჟის შესახებ� საქართველოს კანონით გათვალისწინებულ სახელმწიფო ბაჟის გადახდის ქვითართან ერთად დაქორწინების მსურველმა პირებმა უნდა წარადგინონ ,,სამოქალაქო რეესტრის სააგენტოს მიერ გაწეული მომსახურებისათვის დაწესებული საფასურის შესახებ� საქართველოს კანონით გათვალისწინებული საფასურის გადახდის ქვითარი.

5. სპეციალური სარიტუალო მომსახურების თაობაზე დასაქორწინებელ პირთა განცხადების საფუძველზე სამოქალაქო რეესტრის სააგენტოს შესაბამისი სპეციალიზებული სამსახური ვალდებულია გააცნოს განმცხადებლებს ამ ბრძანებითა და შესაბამისი სამართლებრივი აქტებით გათვალისწინებული რიტუალის წესი და პირობები, უზრუნველყოს რიტუალის სათანადოდ ჩატარება.

6. დაქორწინების მსურველ პირებს უფლება აქვთ მოითხოვონ ამ ბრძანებითა და შესაბამისი სამართლებრივი აქტებით გათვალისწინებული სპეციალური სარიტუალო მომსახურება.

7. სპეციალური სარიტუალო მომსახურება მოიცავს:

ა) ქორწინების რეგისტრაციისას საზეიმო გარემოს შექმნას;

ბ) სარიტუალო დარბაზის გაფორმება სპეციალიზებულ სამსახურში არსებული ინვენტარისა და დაქორწინების მსურველი პირების სურვილის გათვალისწინებით;

გ) ქორწინების რეგისტრაციის მუსიკალურ გაფორმებას დაქორწინების მსურველი პირების სურვილის გათვალისწინებით;

დ) დაქორწინებულთათვის მილოცვის განსაკუთრებულ ფორმას;

ე) რიტუალის ჩატარებისათვის აუცილებელ სხვა საკითხებს.

8. სპეციალურ სარიტუალო მომსახურებაში შემავალი საკითხები განისაზღვრება სამოქალაქო რეესტრის სააგენტოს თავმჯდომარის ინდივიდუალური ადმინისტრაციულ-სამართლებრივი აქტით.